Bible in one year
January 25

1. И кхардя́ Яково пэ́скирэ чхавэ́н, и пхэндя́: “Скэдэ́нпэ и мэ роспхэнава тумэ́нгэ, со явэ́ла тумэ́нца пэ дывэса́; со явэ́на анги́л:
2. скэдэ́нпэ и шунэ́н, Яково́скирэ чхавэ́, шунэ́н, Израилё, тумарэ́ дадэ́с.
3. Рувимо, англатуно́ миро! Ту сан миро зоралыпэ́н и англатуно́ мирэ́ зорьякэ, най патывалэдыр пир мина и най зоралэды́р;
4. нэ ту сан шумно, сыр пани́, ту на явэ́са тэ припхэнэс явирэ́нгэ, пал-дова́ со ту ги́ян пэ тырэ́-дадэ́скиро чхуибэ́н; ту магирдян миро чхуибэ́н.
5. Пша́ла Симеоно и Левиё, лэ́нгирэ курталы на тангинэна;
6. дрэ лэ́нгирэ мысли мэк тэ на дыкхэ́л миро ди, и кэ лэ́нгиро скэдыибэ́н мэк тэ на явэ́л мири́ сла́ва, пал-дова́ со ёнэ дрэ пэ́скири холы́ замардэ́ манушэ́с, и пир пэ́скиро ило́ пиричхиндлэ гурувэскэ жылы;
7. мэк тэ хасёл лэ́нгири холы́, пал-дова́ со ла́тэ нанэ тангипэ́н, и лэ́нгири бари холы́, пал-дова́ со ёй исын на манушаны; мэ роскэрава пэ паша́ лэн тэ дживэ́н пир Яковостэ, и росчхувава лэн пир Израилё.
8. Юда! Явэ́на тэ шарэ́н тут тырэ́ пша́ла. Тыро́ васт явэ́ла пэ тырэ́-вэргэнгиро думо; ту́кэ кэрэ́на шэрэ́са кэ пхув тырэ́-дадэ́скирэ чхавэ́.
9. Тэрно́ шчэр (ле́во) Юда, дорэсыбнастыр, сыр ёв захала, миро чхаво́, ґаздэ́лапэ ёв. Пасия́ ёв, сыр шчэр (ле́во) и сыр шчэриха (львица): кон ґаздэ́ла лэс?
10. На отджала Юдастыр скипетро и законоскиро дыибнари лэ́скирэ трушулэндыр, кэ дава́ часо, пака явэ́ла Раманёскиро (Примирителё), и лэс явэ́на тэ кандэ́н мануша́.
11. Ёв припхандэла кэ винаграды́тко (дракхи́тко) кашторо пэ́скирэ ослёнко́с (мегарицорэ́с), и кэ фэдыршо винаграды́тко (дракхи́тко) кашторо пэ́скирэ ослица́кирэ (мегарица́кирэ) чхавэ́с; морэла дрэ мол (вино) пэ́скири и́дя и дрэ грозде́нгиро рат пэ́скиро урибэ́н;
12. хачона лэ́скирэ якха́ моля́тыр (виностыр), и парнэ́ лэ́скирэ данда́ тхудэстыр.
13. Завулоно явэ́ла тэ дживэ́л пашы́л морёскиро (дэрьявэ́скиро) брэ́го, кай исын тэрдэ́ па́рмы (корабли), и ко́нцо (яго́ро) лэ́скиро кэ Сидоно.
14. Исахаро исын зорало́ о́сло (мега́ри), саво́ исын пашто́ машкира́л пане́скиро тхадыпэн;
15. и дыкхця́ ёв, со откхиныбэн сыс лачхо́, и со пхув сыс шука́р: и бандякирдя пэ́скирэ псикэ́ ваш пхарипэ́н и лыя́ тэ кэрэ́л буты́ дро плэскирибэн.
16. Дано явэ́ла тэ сэндинэл пэ́скирэ манушэ́н, сыр екх Израилёскирэ родыцэндыр (чангэндыр);
17. Дано явэ́ла сапэса пэ дром, саплыняса пэ дром, сави́ дукхавэла грэскэ ґэро́й адя́кэ, со ману́ш, саво́ бэшто́ уклисто, пэрэ́ла палэ.
18. Пэ тыро́ подрикирибэ́н (помошч) мэ розгинава, Раё Дэ́вла!
19. Гадос, мануша́ сыр халадэ́ явэ́на тэ притасавэн, нэ ёв лэн отчхурдэла пир пе́нты (кхурья́).
20. Ваш Асироскэ лэ́скиро маро́ исын древа́н тхуло, и ёв явэ́ла тэ дорэсэл крали́скирэ присма́ки (фришма́ки).
21. Нефалимо исын сыр шука́р олениха, саво́ пир ило́ ракирэ́ла.
22. Ёза (Иосифо) исын отбарипэн лачхэ́ вэшэскиро, отбарипэн пашы́л джиибна́скири ґаны́нг; лэ́скирэ рандя́ розбарьёнапэ пэ ва́нта;
23. холякирэнас лэс, и дэ́нас карье лукостыр дрэ лэ́стэ и на могиндлэ́ тэ дыкхэ́н пэ лэ́стэ мануша́, савэ́ дынэ́ карье лукостыр;
24. нэ яця́пэ зорало́ лэ́скиро лу́ко, и зоралэ́ исын лэ́скирэ-вастэнгирэ маса́, зоралэ́ Яково́скирэ-Дэвлэ́скирэ вастэ́ндыр. Одотхы́р исын Чхупна́ри и Израилёскири тва́рдыма,
25. тырэ́-дадэ́скирэ Дэвлэ́стыр, Саво́ помогинэла ту́кэ, и Сарэзорьякирэстыр, Саво́ и бахтякирэ́ла тут вучипна́стыр болыбна́скирэ бахтякирибнаса, хорипнаскирэ бахтякирибнаса, саво́ исын пашто́ дро до́ло, бахтякирибнаса цюцендыр (сосцэндыр) и лочовя́тыр (утробатыр),
26. тырэ́-дадэ́скирэ бахтякирибнэнца, савэ́ исын вучэды́р бахтякирибнастыр пхуранэ́ бэргэндыр и лачхипнастыр вечнонэ бэргицэнгиро. Мэк тэ явэ́н ёнэ пэ Ёзаскиро шэро́ и пэ темё (гутуп), саво́ сыс выкэдыно машки́р пэ́скирэ пшалэ́ндэ.
27. Вениамино исын рискирибна́скиро рув (януро), пэ зло́ко (ранкоса) явэ́ла тэ хал дова́, со ёв ухтылэ́ла и бэльвэляса явэ́ла тэ роскэрэ́л (тэ делинэл) дова́, со дорэсэ́ла.”
28. Ѓа́да, исын сарэ́ Израилёскирэ дэшуду́й ро́дыцы: и ґа́да, со лэ́нгэ пхэндя́ лэ́нгиро дад; и бахтякирдя́ лэн, и дыя́ бахтякирибэ́н лэ́нгэ, кажнонэ́скэ пэ́скиро.
29. И припхэндя́ ёв лэ́нгэ, и пхэндя́ лэ́нгэ: “Мэ причхувавапэ кэ пэ́скирэ мануша́; гаравэ́н ман мирэ́ дадэ́нца дрэ ґеба́р (пешчэра), сави́ исын пэ Ефроноскирэ-Хетеяниноскири фэ́лда,
30. дрэ ґеба́р (пешчэра), сави́ исын пэ Махпеласкири фэ́лда, со исын анги́л Мамре, пэ Ханаано́скири пхув, сави́ киндя Авраа́мо фэлдаса Ефроностыр Хетеяниностыр ваш пэ́скэ ваш гараибэн;
31. одо́й гарадэ́ Авраамос и Са́рра, лэскирья ромня́; одо́й гарадэ́ Исаакос и Ревека, лэскирья ромня́; и одо́й гарадэ́ Лия;
32. дая́ фэ́лда и ґеба́р (пешчэра), сави́ сыс пэ ла́тэ, сыс киндлы Хетее́нгирэ чхавэ́ндыр.”
33. И пирияця́ Яково тэ ракирэ́л пэ́скирэ чхавэ́нгэ, и чхудя́ кхэтанэ́ пэ́скирэ ґэра́ пэ чхуибэ́н, и мыя́, и причхудяпэ кэ пэ́скирэ мануша́.
1. И Ёза пыя́ пэ лэ́скирэ-дадэ́скиро муй, и рондя́ пэ лэ́стэ, и чамудя лэс.
2. И пхэндя́ Ёза пэскирэнгэ дынарье́нгэ, састыпнарье́нгэ (урачэнгэ) тэ бальзаминэн лэ́скирэ дадэ́с; и састыпнарья бальзаминдлэ Израилёс.
3. И прогия́ лэ́скэ штардэша́ дывэса́, пал-дова́ со ада́кицы дывэса́ трэй ваш бальзаминыбэн, и обровэнас лэс Египтя́ни эфтадэша́ дывэса́.
4. Ке́ли прогинэ́ (накхлэ) роибнытка дывэса́ пал лэ́стэ, о Ёза пхэндя́ фараоно́скирэ кхэритконэнгэ: “Ко́ли мэ латхём ла́ска дрэ тумарэ́ якха́, тэды пхэнэ́н фараоно́скэ адя́кэ:
5. ‘Дад миро совлахадя́ ман, пхэндя́: Ѓа́да, мэ мэра́ва; дрэ миро маґилы́тко (копли́ца), саво́ мэ выганадём пэ́скэ пэ Ханаано́скири пхув, одо́й гарав ман. И акана́ мэ камдём тэ джав, и тэ гаравав мирэ́ дадэ́с, и тэ рисёвав.’”
6. И пхэндя́ фарао́но: “Джа́ и гарав тырэ́ дадэ́с, сыр ёв засовлахадя тут.”
7. И гия́ Ёза тэ гаравэл пэ́скирэ дадэ́с. И гинэ́ сарэ́ лэ́са фараоно́скирэ дына́рья, лэ́скирэ пхурыдыра́, и сарэ́ Египто́скирэ-пхувья́кирэ пхурыдыра́,
8. и саро́ Ёзаскиро кхэр, и лэ́скирэ пша́ла, и лэ́скирэ-дадэ́скиро кхэр. Екхэ пэ́скирэ чхавэ́н и тыкнэ́ и барэ́ кхэритконэ́ мурдалэ́н (ското) ячкирдэ́ пэ Гесемоскири пхув.
9. И лэ́са гинэ́ адя́кэ-паць марибны́тка вурдэна́ и мануша́, адя́кэ со таборо (лод) сыс древа́н баро́.
10. И догинэ́ ёнэ кэ Горе́н-гаатада (гиваобмарибнаскири шу́рна кэ Атадо) пашы́л Иорда́но, и рондлэ́ одо́й барэ́ роибнаса и древа́н зоралэ́с; и кэрдя́ Ёза роибэ́н пал пэ́скирэ дадэ́стэ эфта́ дывэса́.
11. И дыкхнэ́ Ханане́и одолэ́ пхувья́кирэ мануша́ роибэ́н дро Горен-гаатада, и пхэндлэ́: “Баро́ дасаво роибэ́н исын Египтянэндэ! Палдава́ дыно́ далэ́ штэтоскэ лав: Египтянэнгиро роибэ́н, со исын пашы́л Иорда́но.
12. И кэрдэ́ Яково́скирэ чхавэ́ лэ́са, сыр ёв ракирдя́ лэ́нгэ;
13. и отлыджинэ лэ́скирэ чхавэ́ лэс пэ Ханаано́скири пхув и ґарадэ́ лэс дрэ ґеба́р (пешчэра), пэ Махпелоскири фэ́лда, сави́ Авраа́мо киндя фэлдаса ваш пэ́скэ ваш гараибэн Ефроностэ Хетияниностыр анги́л Мамре.
14. И рисия́ Ёза дро Еги́пто, кокоро́ и лэ́скирэ пша́ла, и сарэ́, кон псирдя́ лэ́са тэ гаравэн лэ́скирэ дадэ́с.
15. И дыкхнэ́ Ёзаскиро пша́ла, со лэ́нгиро дад мыя́, и пхэндлэ́: “Со, ко́ли амэ на ява́са дро́га Ёза́скэ, и ёв закамэ́ла тэ отхал палэ амэ́нгэ пал саро́ фуипэ́н, саво́ амэ лэ́скэ кэрдя́м?”
16. И бичхадэ́ ёнэ тэ пхэнэ́н Ёза́скэ: “Тыро́ дад анги́л лэ́скиро мэрибэ́н дыя́ лав, ракири́:
17. Адя́кэ пхэнэ́н Ёза́скэ: ‘Мэ манга́ва тэ примангэс тырэ́ пшалэ́нгэ лэ́нгиро чорипэ́н, и грэ́хо, адя́кэ сыр ёнэ кэрдэ́ ту́кэ фуипэ́н. И акана́ прима́нг тырэ́ дадэ́скирэ Дэвлэ́скирэ писхарьенгиро чорипэ́н.’” Ёза рондя́, ке́ли лэ́скэ ракирдэ́ дава́.
18. Явнэ́ и кокорэ́ лэ́скирэ пша́ла, пынэ́ анги́л лэ́стэ лэ́нгирэ муенца, и пхэндлэ́: “Ѓа́да, амэ сам писха́рья ту́кэ.”
19. И пхэндя́ Ёза: “На дарэ́н, пал-дова́ со мэ Дэвлэ́стыр дарава;
20. ґа́да, тумэ́ кэрдэ́ ма́нгэ фуипэ́н; нэ Дэвэ́л пирикэрдя дава́ дрэ лачхипэ́н, соб (кай) тэ кэрэ́л дова́, со акана́ исын: тэ зракхэс джиибэ́н бутэ́ манушэ́нгэ;
21. и палдава́ на дарэ́н: мэ ява́ва тэ чалякирав тумэн и тумарэ́ чхавэ́н.” И подрикирдя ду́хо (фа́но) дрэ лэ́ндэ, и ракирдя́ пир лэ́нгиро ило́.
22. И дживдя́ Ёза кокоро́ кэ Еги́пто и кэ лэ́скирэ-дадэ́скиро кхэр; о Ёза дживдя́ шэл тэ дэш бэрш.
23. И дыкхця́ Ёза Ефремо́скирэ чхавэ́н кэ три́то ро́до, адя́кэ-паць Махироскирэ чхавэ́н, Манасия́скирэ чхавэ́с, савэ́ бия́ндынэ пэ Ёза́скирэ чанга́.
24. И пхэндя́ Ёза пэ́скирэ пшалэ́нгэ: “Мэ мэра́ва, нэ Дэвэ́л явэ́ла тэ помогинэл, и вылыджала тумэн далэ́ пхувья́тыр пэ пхув, пал сави́ Ёв совлахадя́ Авраамо́скэ, Исаако́скэ и Яково́скэ.”
25. И засовлахадя Ёза Израилёскирэ чхавэ́н, и пхэндя́: “Дэвэ́л явэ́ла тэ помогинэл тумэ́нгэ и тумэ́ вылыджан мирэ́ кокалы́ адатхы́р.”
26. И мыя́ Ёза шэл тэ дэш бэрш. И бальзаминдлэ лэс, и чхудэ́ дро Еги́пто дро мулыкано /ґробо [ковчэго-р.с.]
1. Хоро́скирэ Дирижоро́скэ. Давидо́скиро Пса́лмо. Дылыно́ пхэндя́ пэ́скэ: “Нанэ Дэвлэ́с!” Мануша́ ячнэ́ розмэкнэ, ёнэ кэрдэ́ злыднитка рэ́нды: нанэ ние́кх, кон кэрэ́ла пир чачипэ́н.
2. Рай Дэвэ́л дыкхця́ болыбна́стыр пэ манушэ́скирэ чхавэ́ндэ тэ дыкхэ́л, ци исын вари-кон, саво́ ґалёла и родэ́ла Дэвлэ́с.
3. Сарэ́ гинэ́ криг чачэ́ дромэ́стыр, ёнэ сарэ́ ячнэ́ чорэ́ мануша́: нанэ ние́кх, кон кэрэ́ла пир чачипэ́н, нанэ ни екхорэс!
4. Нау́што чорэ́ манушэ́ндэ нанэ годы́, со ёнэ ха́на мирэ́ манушэ́н сы́рбы ёнэ ха́на маро́. А ёнэ на кхарэ́на Рас-Дэвлэ́с.
5. Ѓа́да, ёнэ явэ́на тэ издран дара́тыр, пал-дова́ со Дэвэ́л явэ́ла одолэнца, савэ́ кандэ́на Лэс.
6. Тумэ́ сандлэпэ чорорэстыр, пал-дова́ со ёв ракхэлапэ дрэ Растэ-Дэвлэ́стэ.
7. О, соб (кай) тэ явэ́л зракхибэ́н ваш Израилё Сионо́стыр! Ке́ли Рай Дэ́вла янэ́ла палэ Лэ́скирэ манушэ́н Сионо́стыр, соб (кай) Яково бут тэ радынэ́лпэ, и, соб (кай) Израилё тэ явэ́л лошало (весёло).
20. Ми́ро чхаво́! Прилэ́ илэ́са дова́, со мэ пхэна́ва; причху́в тыро́ кан (пришунпэ) кэ мирэ́ лава́.
21. Мэк ёнэ тэ на джа́н криг тырэ́ якхэ́ндыр, ракх лэн машкира́л тыро́ ило́.
22. Пал-дова́ со ёнэ исын сы́рбы джиибэ́н кодолэ́нгэ, кон латхэ́ла лэн и састыпэн сарэ́ лэ́нгирэ масэнгэ (лочакэ).
23. Ракх пэ́скиро ило́ бутэды́р сарэ́стыр, со исын дро́го ту́кэ. Пал-дова́ со лэ́стыр тхадэ́ла ґаны́нг, сави́ дэ́ла джиибэ́н.
24. Ри́скир пэ́стыр хоханы чиб, и ушта́, со исын фрэнта.
1. И Фарисе́и и Садукеи подгинэ́, и, соб (кай) тэ пропатякирэн Исусо́с, палдава́ ёнэ мангнэ́ тэ сыкавэ́л лэ́нгэ ґерты́к (знаме́ниё) болыбна́стыр.
2. Нэ, Ёв отпхэндя́ лэ́нгэ, пхэни́: “Ке́ли да бэльвэ́ль, тумэ́ ракирэ́на, ‘Явэ́ла лачхи́ вэдра (погода), пал-дова́ со болыбэ́н исын лоло́;’
3. и пэ зло́ко: ‘Ададывэ́с яври́ исын вихура, пал-дова́ со болыбэ́н исын лоло́ и зачхакирдо облокэ́нца.’ Тумэ́ джинэ́на, сыр тэ ґалён пир болыбэ́н, нэ тумэ́ на джинэ́на тэ ґалён ґертыка́ (знаме́нии) пир разно часо.
4. Тумэ́ сан бибахтало́ и биладжаипнытко ро́до, саво́ родэ́ла ґерты́к, на явэ́ла тумэ́нгэ ґерты́к, апри́ч Ионаскири гертык.” И Ёв мэкця́ лэн и гия́ пэ́скэ.
5. И ке́ли сыкляибны́тка явнэ́ пэ яви́р брэ́го, ёнэ бистырдэ тэ лэн пэ́са лабы маро́.
6. И Ису́со пхэндя́ лэ́нгэ: “Дыкхэ́н жа, ракхэ́нпэ Фарисее́нгирэ и Садукеенгирэ сыклякирибнастыр, саво́ исын сы́рбы рошчына (закваска).”
7. Нэ ёнэ лынэ́ тэ пириракирэн машки́р пэ́стэ: “Амэ на лыям лабы маро́.”
8. Ису́со джиндя́, со лэ́ндэ сыс пэ годы́, пхэндя́: “Тумэ́ сан мануша́ на барэ́ патяибна́са, со́скэ ж тумэ́ обракирэна машки́р пэ́стэ, со тумэ́ндэ нанэ маро́?
9. Нау́што тумэ́ ишчо (инкэ́) на ґалёна и на рипирэна пал пандж лабы маро́ ваш пандж тысёнцы, и кицы́ кхудэ́ тумэ́ скэдынэ́?
10. И пал эфта́ (битринэ́нгиро дэш) лабы маро́ ваш штар тысёнцы, и кицы́ кхудэ́ тумэ́ скэдынэ́?
11. Сыр тумэ́ на ґалёна, со Мэ пхэндём на пал маро́: ‘Ракхэ́нпэ Фарисее́нгирэ и Садукеенгирэ рошчынатыр?’”
12. Тэ́ньци ёнэ ґалынэ́, со Ёв пхэндя́ лэ́нгэ тэ ракхэ́нпэ на марунэ рошчынатыр, а Фарисее́нгирэ и Садукеенгирэ сыклякирибнастыр.
13. И ке́ли Ису́со явдя́ пэ пхувья́ Кесария Филипоскири, Ёв пхучэлас Пэ́скирэ сыклытконэндыр, ракири́: “Пал Конэ́стэ мануша́ гинэ́на Ман, Манушэ́скирэ Чхавэ́с?”
14. И ёнэ пхэндлэ́: “Вари-савэ́ пал Ианостэ Болдэипнаристэ, яви́р пал Илиястэ, яви́р пал Еремеёстэ ци пал екхэ́стэ пророкэндыр”
15. Ёв жа ракирэ́ла лэ́нгэ: “Нэ тумэ́ пал конэ́стэ Ман гинэ́на?”
16. И Си́моно Пэ́три отпхэндя́ и пхэндя́: “Ту сан Христо́со, Чхаво́ Джидэ́ Дэвлэ́скиро, Саво́ дживэ́ла ве́чнэс”
17. И Ису́со отпхэнэ́лас лэ́скэ и пхэндя́: “Бахтало́ ту сан, Си́моно Иониноскиро, пал-дова́ со на ману́ш, конэ́стэ исын рат и маса́, дыя́ дава́ чачипэ́н дрэ тыри́ годы́, нэ Миро Дад, Саво́ исын дро Болыбна́скиро Раё.
18. И Мэ пхэна́ва ту́кэ: Ту сан Пэ́три, пэ дава́ бар Мэ кэра́ва Кхангири́ Мири́, и люноскири зор (мэрибэ́н) на лэ́ла упралыпэ́н пэ ла́тэ.
19. Мэ да́ва ту́кэ клыдына вударэндыр, савэ́ исын Кралипнастыр дро Болыбна́скиро Раё, Савэ́са хулаинэла Дэвэ́л; и со ту запхэнэса пэ пхув, дова́ явэ́ла запхэндло дро Болыбна́скиро Раё, и со домэкэса пэ пхув, дова́ явэ́ла домэкно дро Болыбна́скиро Раё.’”
20. Тэ́ньци Ёв припхэндя́ шылалэс сыкляибнытконэ́нгэ ни конэ́скэ тэ на ракирэ́н, со Ёв исын Христо́со.
21. Долэ́ часостыр лыя́ Ису́со тэ ракирэ́л яснэс Лэ́скирэ сыкляибнытконэ́нгэ, со Лэ́скэ трэй тэ джал дро Ерусалимо и бут мэ́ньки тэ пиридживэл годэпхурэндыр и рашангирэндыр и лылваритконэндыр, и явэ́ла Ёв замардо, и пэ три́то дывэ́с Ёв отджидёла.
22. И кхардя́ Пэ́три Лэс дрэ риг, и лыя́ тэ отракирэл: “Потангинэ Пэс, Раё Дэ́вла! Мэк тэ на явэ́л дава́ Ту́са.”
23. Нэ Ёв рисия́ кэ Пэ́три и пхэндя́: “Джа́ криг Ма́ндыр, на́лачхо; ту Ма́нгэ сан, сыр бар пэ дром, пал-дова́ со ту думинэса на пал Дэвлы́тко, а пал манушы́тко.”
24. Тэ́ньци Ису́со пхэндя́ Пэ́скирэ сыкляибнытконэ́нгэ: “Ко́ли вари-конэ́скэ пир ило́ тэ джал Ма́нца, мэк тэ на думинэл буты́р пал пэ́стэ, и мэк тэ лэл трушу́л пэ́скиро, и мэк тэ джал пал Ма́ндэ.”
25. Нэ ко́ли вари-кон, савэ́скэ исын дро́го джиибэ́н пэ́скиро тэ зракхэ́л, кодова́ хасякирэ́ла лэс, и вари-кон, саво́ отдэ́ла пэ́скиро джиибэ́н ваш Ма́нгэ, кодова́ латхэ́ла Лэс.
26. Саво́ лачхипэ́н исын манушэ́скэ, ко́ли лэ́стэ явэ́ла саро́, со лэ́скэ трэй далэ́ свэто́стыр, а ёв хасякирэ́ла пэ́скиро ве́чно джиибэ́н? Нэ со ману́ш могинэ́ла тэ отдэ́л кучэдыр дро паруибэн пал пэ́скиро джиибэ́н?
27. Пал-дова́ со явэ́ла Чхаво́ Манушэ́скиро дрэ зорьякири сла́ва Пэ́скирэ Дадэ́скирэ Янголэнца, и тэды кажно (сва́ко) дорэсэ́ла, со явэ́ла мол пал пэ́скиро дова́, со кэрдя́ ёв дро джиибэ́н.
28. Чачэс, Мэ ракира́ва тумэ́нгэ: ада́й исын вари-савэ́ мануша́, савэ́ на мэрэ́на, ко́ли анги́л явэ́на тэ дыкхэ́н Чхавэ́с Манушэ́скирэ, саво́ явэ́ла сыр Кра́ли дро Кралипэ́н Пэ́скиро.”
Romani Bible Baltic 2019
United Bible Societies for the Baltic Romani Mission