Bible in one year
January 3

1. Ѓа́да, исын пхэныбэ́н пал Адамоскиро ро́до: ке́ли Дэвэ́л создыя́ манушэ́с, Ёв создэлас лэс адя́кэ, соб (кай) ману́ш тэ зджал (тэ поджал) пэ Лэ́стэ.
2. Муршэс и джувля́ создыя́, и бахтякирдя́ лэн дро дывэ́с, ке́ли создыя́ лэн и дыя́ лэ́нгэ лав ману́ш (Адамо).
3. Адамо дживдя́ шэл тэ трия́нда бэрш, и лэ́стыр бия́ндыя чхаво́, саво́ зджалас пэ лэ́стэ, и саво́ сыс пир лэ́скири патри́н (о́бразо) и дыя́ лэ́скэ лав: Сифо.
4. Ке́ли Адамостыр бия́ндыя чхаво́ Сифо, лэ́скэ сыс охтошэла (бидуешэлэнгиро бар) бэрш, и бия́ндынэ лэ́стыр чхавэ́ и чхая́.
5. Адамо дживдя́ еняшэла (бишэлэнгиро бар) трия́нда бэрш; и мыя́.
6. Ке́ли Сифоскэ сыс шэл тэ пандж бэрш, лэ́стыр бия́ндыя Еносо.
7. Ке́ли латхяпэ Еносо, Сифо дживдя́ охтошэла эфта́ (тринэнгиро дэш) бэрш и бия́ндынэ лэ́стыр чхавэ́ и чхая́.
8. Сифо дживдя́ еняшэла дэшуду́й бэрш; и ёв мыя́.
9. Ке́ли Енососкэ сыс енядэша бэрш, лэ́стыр бия́ндыя Каинано.
10. Ке́ли бия́ндыя Каинано, Еносо дживдя́ охтошэла дэшупандж бэрш, и бия́ндынэ лэ́стыр чхавэ́ и чхая́.
11. Еносо дживдя́ еняшэла пандж бэрш; и ёв мыя́.
12. Ке́ли Каинаноскэ сыс эфтадэша́ бэрш, лэ́стыр бия́ндыя Малэлэило (Махалаэлё).
13. Ке́ли латхяпэ Малелэило, Каинано дживдя́ охтошэла штардэша́ бэрш, и бия́ндынэ лэ́стыр чхая́ и чхавэ́.
14. Каинано дживдя́ еняшэла дэш бэрш; и ёв мыя́.
15. Ке́ли Малелэилоскэ сыс шовдэшапандж бэрш, лэ́стыр бия́ндыя Иаре́до (Яредо).
16. Пало́ (после) Иаредоскиро бияныпэ́н, Малелэило дживдя́ охтошэла трия́нда бэрш, и бия́ндынэ лэ́стэ чхая́ и чхавэ́.
17. Малелэило дживдя́ охтошэла енядэша пандж бэрш; и ёв мыя́.
18. Ке́ли Яредоскэ сыс шэл шовдэша́ дуй бэрш, лэ́стыр бия́ндыя Енохо.
19. Пало́ Енохоскиро бияныпэ́н, Яре́до дживдя́ охтошэла бэрш, и лэ́стыр бия́ндынэ чхавэ́ и чхая́.
20. Яре́до дживдя́ еняшэла шовдэша́ дуй бэрш; и ёв мыя́.
21. Ке́ли Енохоскэ сыс шовдэша́ пандж бэрш, лэ́стыр бия́ндыя Мафусало.
22. Пало́ Мафусалоскиро бияныпэ́н Енохо дживдя́ анги́л Дэвлэ́стэ триншэла́ бэрш, и бия́ндынэ лэ́стыр чхавэ́ и чхая́.
23. Енохо дживдя́ триншэла́ шовдэша́ пандж бэрш.
24. И псирдя́ Енохо анги́л Дэвлэ́стэ; и на яця́ лэс, пал-дова́ со Дэвэ́л лыя́ лэс.
25. Ке́ли Мафусалоскэ сыс шэл эфтадэша́ охто́ бэрш, лэ́стыр бия́ндыя Ламехо.
26. Пало́ Ламехоскиро бияныпэ́н, Мафусало дживдя́ ишчо (инкэ́) эфта́ шэла́ охтодэша́ дуй бэрш, и лэ́стыр латхнэпэ чхавэ́ и чхая́.
27. Мафусало дживдя́ еняшэла шовдэша́ еня́ бэрш; и ёв мыя́.
28. Ке́ли Ламехоскэ сыс шэл охтодэша́ дуй бэрш, лэ́стыр бия́ндыя чхаво́.
29. И кхардя́ лэс Ноё, и пхэндя́: “Ёв обрадынэла амэн дрэ буты́, амари́ и дрэ пхари́ амарэ́-вастэнгири буты́ сыр ява́са тэ обкэрас пхув, сави́ прокостя Дэвэ́л.”
30. И сыс Ламехоскэ, ке́ли лэ́стыр бия́ндыя Ноё, панджшэла́ енядэша пандж бэрш, и бия́ндынэ лэ́стыр чхавэ́ и чхая́.
31. Ламе́хо дживдя́ эфта́ шэла́ эфтадэша́ эфта́ бэрш, и ёв мыя́.
32. Ке́ли Ноёскэ сыс панджшэла́ бэрш, лэ́стыр бия́ндынэ: Симо, Хамо и Иафето.
1. И сыс адя́кэ, ке́ли мануша́ пэ пхув бия́ндынэ (лотинэ) буты́р, и лэ́ндыр бия́ндынэ чхая́,
2. то Дэвлэ́скирэ чхавэ́ дыкхнэ́ манушэнгирэн чхае́н, со ёнэ сыс шука́р, и лэнас лэн палоро́м, савья́ кон выкэдыя́.
3. И пхэндя́ Рай Дэвэ́л: “На саро́ джиибэ́н ману́ш тэ на рискирэ́л годы́ пэ Миро Ду́хо (Фа́но) [на ўса́ды/на сак (всегда) Мирэ́ Духоскэ тэ дживэ́л дрэ манушэ́стэ-ю.о.]; пал-дова́ со ёнэ исын лоч (плоть); мэк тэ дживэ́н ёнэ шэл тэ биш бэрш.”
4. Дрэ долэ́ дывэса́ пэ пхув сыс древа́н вучэ́ мануша́, буты́р одолэ́ часостыр, сыр Дэвлэ́скирэ чхавэ́ лынэ́ тэ псирэ́н кэ манушэ́нгирэ чхая́, и ёнэ лынэ́ тэ биянэн лэ́нгэ. Ёнэ сыс зоралэ́, ґаратунэ́, славутна мануша́.
5. И Рай Дэвэ́л дыкхця́, со мануша́ лынэ́ бут тэ кэрэ́н фуипэ́н пэ пхув, со сарэ́ лэ́нгирэ думки и илэ сыс холынакирэ пэ кажно дывэ́с.
6. И Рай Дэвэ́л лыя́ тэ тангинэ́л (тэ жалинэл), со создыя́ манушэ́с пэ пхув, и Ёв лыя́ тэ тугинэл дро Пэ́скиро ило́.
7. И пхэндя́ Рай Дэвэ́л: “Мэ хасякира́ва манушэ́н пхувья́кирэ мо́стыр, савэ́н Мэ создыём, манушэ́стыр кэ кхэри́тко мурда́л (ското), и цапнен и болыбна́скирэ чириклен пэ болыбэ́н, пал-дова́ со Мэ тангинава, со лэн создыём.”
8. Нэ Ноё латхя́ бахтякирибэ́н анги́л Ра́скирэ-Дэвлэ́скирэ якха́.
9. Ѓа́да, исын лав пал Ноёскиро ро́до: Ноё сыс чачуно́ ману́ш и би грэхоскиро дро пэ́скиро ро́до, Ноё псирдя́ дро екхипэ́н анги́л Дэвлэ́стэ.
10. Ноёстыр бия́ндынэ трин чхавэ́: Симо, Хамо и Иафето.
11. Нэ пхув яця́ бипатывалы анги́л Дэвлэ́стэ и ёй сыс пхэрды́ нахратонэ рэндэ́нца (делэнца).
12. И Дэвэ́л дыкхця́ пэ пхув и, ґа́да, ёй сыс хасибны́тко: пал-дова́ со кажно лоч (плоть) лыя́ тэ кэрэ́л бипатывалэ рэ́нды (де́лы).
13. И Дэвэ́л пхэндя́ Ноёскэ: “Анги́л Ма́ндэ кажнонэ́ лочакэ явэ́ла ко́нцо (яго́ро); пал-дова́ со пхув пхэрдия лэ́нгирэ нахратонэ рэндэ́нца (злодеяниенца). И ґа́да, Мэ хасякира́ва лэн пхувья́тыр.
14. Кэр пэ́скэ гоферытконэ вэшэ́стыр ковчэго (баро́ мохто́); кэр коморки дро ковчэго, явре́стыр и андра́л обмакх лэс смоласа.
15. И кэр лэс адя́кэ: длэнгипэ́н ковчэгоскиро явэ́ла трин шэла́ куня́ (логци), лэ́скиро буґлыпэ́н-пандждэша́ куня́ (лоґци), а лэ́скиро вучипэ́н-трия́нда куня́.
16. И кэр фэнштрори (дудали) дро ковчэго и дрэ кунь вучипна́са, пхандэ лэс упра́л и дрэ ковчэгоскирэ рига́ кэр вуда́р; кэр дрэ лэ́стэ тэлатуно, яви́р и три́то ярусы.
17. И ґа́да, Мэ зачхувава дая́ пхув пане́са, соб (кай) кажно лоч (плоть) тэ хасякира́в, дрэ сави́ исын джиибнытко ду́хо (фа́но) тэл болыбэ́н; саро́, со исын пэ пхув, соб (кай) тэ мэрэ́л.
18. Нэ ту́са Мэ кэра́ва Миро заве́то, и ту заджаса дрэ ковчэго, и тырэ́ чхавэ́, и тыри́ ромны́, и ту́са тырэ́-чхавэ́нгирэ ромня́.
19. Адя́кэ-паць залыджа дрэ ковчэго кажнонэ́ мурдалэ́ндыр и кажнонэ́ лочатыр пир дуй, соб (кай) ту́са ёнэ тэ ячэ́нпэ джидэ́: мэк ёнэ тэ явэ́н муршканэ́ и джувликанэ родо́стыр.
20. Чирикле́ндыр пир лэ́нгиро ро́до, и кхэритконэ́ мурдалэ́ндыр пир лэ́нгиро ро́до, и сарэ́ндыр, кон ползынэла пир пхув пир лэ́нгиро ро́до, сарэ́ндыр пир дуй кэ ту тэ заджа́н, соб (кай) тэ ячэ́нпэ джидэ́.
21. Ту лэ пэ́скэ саво́ трэй хабэ́н, саво́ ха́на, и скэ́дэ кэ пэ; и ёв явэ́ла ваш ту́кэ и ваш лэ́нгэ хабнаса.”
22. И Ноё саро́ кэрдя́, сыр Дэвэ́л лэ́скэ припхэндя́, адя́кэ ёв и кэрдя́.
7. “Мэ пхэна́ва Зако́но манушэ́нгэ тэ джинэ́н: Рай Дэвэ́л пхэндя́ ма́нгэ: ‘Ту сан Миро Чхаво́. Мэ ададывэ́с яцём Дадэ́са Ту́кэ.
8. Манг Ма́ндыр, и Мэ да́ва ту́кэ манушыпнаскирэ расы сыр мэкно́ миштыпэ́н и сари́ пхув явэ́ла тыри́:
9. Ту розмарэса лэн саструнэ́ дэстэса (жэзлоса) и ту розмарэса лэн пэ котэра́ (куски) сыр пиритконэскиро кхоро́ (сасудо).’”
10. И какана́, кралья́лэ, явэ́н годьварэ́, сыклён, тумэ́ сан сэнда́рья пэ пхув.
11. Дынаринэ́н Ра́скэ-Дэвлэ́скэ дара́са и радынэ́нпэ издраняса.
12. Кутякирэн Чхавэ́с, соб (кай) тумэ́ тэ на хасён дромэ́са, а Лэ́скири холы́ сашты́ тэ росхачол сы́гэс. Бахталэ́ исын одолэ́, савэ́ патя́на дрэ Лэ́стэ.
10. Ми́ро чхаво́; ко́ли грэхи́тка мануша́ тырдэна тут кэ пэ, на зджапэ (на малынпэ) лэ́нца.
11. Ко́ли ёнэ пхэнэ́на: “Яв амэ́нца, явэ́н, подракхаса тэ замарас кэ рат, явэ́н, ужакираса бибангэскирэ манушэ́с, конэ́стэ нанэ дош;
12. явэ́н, накхаваса лэн джидэнца сыр лю́но (адо), и сарэ́н кодолэ́н, савэ́ джа́на прочхувэн тэлэ́ дрэ маґила (кула).
13. Амэ латхаса (заласа) саро́ куч барвалыпэ́н, амэ пхэрдякираса амарэ́ кхэра́ чордэ миштыпнаса;
14. ту чхурдэ пэ́скиро жрэбиё пэ бахт кхэтанэ́ амэ́нца и амэ́ндэ сарэ́ндэ явэ́ла екх траминэнгиро (кошэлько).”
15. Ми́ро чхаво́! На псир екхэ дромэ́са лэ́нца. Ракх криг пэ́скири ґэро́й лэ́нгирэ дроморэстыр;
16. пал-дова́ со лэ́нгирэ ґэра́ праста́на тэ кэрэ́н чорипэ́н, и ёнэ праста́на сы́гэс тэ прочхувэн манушэ́нгиро рат.
17. Нэ ивья́ (напра́снэс) ёнэ чхудэ́ фэлы́ анги́л якха́ сарэ́ чириклендэ.
18. И кадалэ́ мануша́ исын паштэ́, и сы́рбы ужакирэ́на пэ лэ́нгиро рат, ёнэ ґарадёна чораханэ́с и родэ́на мэрибэ́н пэ́скэ.
19. Кадасаво́ исын тала́но манушэ́нгэ, савэ́ исын ґалка (алчна) кэ манушэ́нгиро барвалыпэ́н, кэ хохано́ ко́фо (прибыль), ёнэ сы́гэс пхагирэна пэ́скиро шэро́.
1. Дрэ долэ́ дывэса́ явэ́ла Иа́но Болдэипнари тэ пхэнэ́л лав пир чхучи́ (пусто) пхув дрэ Юдэ́я,
2. и раки́рла: “Приґалён пэ́скирэ грэ́хи (бизы), какана́ явдя́ пашылэды́р Кралипэ́н дро Болыбна́скиро Раё.”
3. Пал-дова́ со ёв исын одова́, пал конэ́стэ пхэндя́ проро́ко Исаё: “Дава́ исын зан, сави́ дэ́ла го́дла пир чхучи́ пхув: ‘Кэрэ́н дром Ра́скэ-Дэвлэ́скэ, чхувэ́н Лэ́скэ маму́й (пря́мо) дром.’”
4. Кокорэстэ Ианостэ сыс урибэ́н верблюдытконэ балэндыр; цыпитко кусты́к пэ лэ́скирэ маса́; лэ́скиро хабэ́н сыс акриды и авги́н (мэда) фэлдытко.
5. Тэды джа́нас кэ ёв саро́ Ерусалимо и сари́ Юдэ́я и сарэ́ штэ́ты Иорданоскирэ,
6. и ёв болдя лэн дро Иорда́но, пало́ дова́, сыр ёнэ приґалёнас пэ́скирэ грэ́хи.
7. Нэ сыр ёв дыкхця́, со бут Фарисе́и и Садукеи джа́нас тэ болэнпэ кэ ёв, пхэндя́ лэ́нгэ: “Тумэ́ сан сапитко ро́до! Кон сыклякирдя́ тумэн тэ нашэ́н Дэвлэ́скирэ холя́тыр, со явэ́ла сыг?
8. Кэрэ́н вари-со, соб (кай) тэ допхэнэн, со тумэ́ мэкнэ́ тэ кэрэ́н грэ́хи и рисинэ́ кэ Дэвэ́л.
9. И на думинэн тэ ракирэ́н пэ́скэ: ‘Авраа́мо сыс дад амаро́;’ пал-дова́ со мэ ракира́ва тумэ́нгэ, со Дэвэ́л могинэ́ла далэндыр барэндыр тэ ґаздэл биятэ́н Авраамо́скэ.
10. Акэ, ужэ товэр пашто́ исын пашы́л каштэскиро корнё (рукх): кажно кашт (дрэ́во), со на лыджа́ла лачхо́ барьякирдо́ (пло́до), чингирэна тэлэ́ и чхурдэна дрэ яг.
11. Мэ болава тумэн пане́са пал тумаро́ при ґалыибэ́н дрэ грэ́хи, нэ Ёв, Саво́ джа́ла пал ма́ндэ, исын зоралэды́р ма́ндыр, Конэ́скэ ґэритка мэ на сом мол тэ злав; Ёв явэ́ла тэ болэл тумэн Свэнтонэ́ Духо́са (Фаноса) и яга́са.
12. Лэ́скиро ґанадытко (лопата) исын дрэ Лэ́скиро васт, и Ёв жужакирэла (чыстинэла) Пэ́скиро шу́рна и скэдэ́ла Пэ́скиро парно́ гив дрэ пиралы́, а пхус хачкирэ́ла яга́са, сави́ на мурдёла.”
13. Тэ́ньци явэ́ла Ису́со Галилеятыр кэ рэка (лэнь) Иорда́но кэ Иа́но, соб (кай) Иа́но тэ болэл Лэс.
14. Иа́но жа тэрдякирэлас Лэс, ракири́: “Ма́нгэ трэй тэ болавпэ Ту́тэ, а Ту явэ́са кэ мэ?”
15. Нэ Ису́со отпхэндя́ лэ́скэ: “Мэк адя́кэ какана́ тэ явэ́л; пал-дова́ со адя́кэ амэ́нгэ трэй тэ кэра́с пир кажно чачипэ́н.” Тэды ёв домэкэла Лэс.
16. И сыр Ису́со болдяпэ, Ёв гия́ яври́ екха́тыр (сра́зу) пане́стыр, и, акэ, болыбэ́н псирадыя (отчхакирдяпэ), и Иа́но дыкхця́ Дэвлэ́скиро Ду́хо (Фа́но), Саво́ джа́лас тэлэ́ сыр голумбо, и мэкэласпэ тэлэ́ пэ Исусо́стэ;
17. И акэ, зан болыбна́стыр, сави́ ракирдя́: “Кадава́ исын Миро дро́го Чхаво́, дрэ Савэ́стэ исын Мири́ бари ра́дыма.”
Romani Bible Baltic 2019
United Bible Societies for the Baltic Romani Mission