Bible in one year
January 4

1. И пхэндя́ Рай Дэвэ́л Ноёскэ: “Заджа́ ту и сари́ тыри́ чэ́карь (семе́йство) дро ковчэго, пал-дова́ со Мэ дыкха́ва, со ту сан чачуно́ анги́л Ма́ндэ сарэ́ далэ́ родо́стыр.
2. И лэ кажнонэ́ жужэ́ рискирибна́скирэ мурдалэ́ндыр [зверендыр-ю.о.] [ското́стыр-р.с.] пир эфта́ (битринэ́нгиро дэш), муршканэ́ и джувликанэ родо́стыр, а нажужэ́ мурдалэ́ндыр пир дуй, муршканэ́ и джувликанэ родо́стыр.
3. Адя́кэ-паць и болыбнытконэ чириклендыр пир эфта́ муршканэ́ и джувликанэ родо́стыр, соб (кай) тэ зракхэс ро́до ваш сари́ пхув.
4. Пал-дова́ со пир эфта́ дывэса́, Мэ ява́ва тэ чхував пэ пхув брышы́нд штардэша́ дывэса́ и штардэша́ ратя; и саро́, со исын пэ пхув, и со Мэ создыём, Мэ хасякира́ва.”
5. Ноё кэрдя́ саро́, со припхэндя́ Рай Дэвэ́л лэ́скэ.
6. Ноёскэ сыс шов шэла́ бэрш, сыр пэ пхув яця́ панитко зачхуибэн (потопо).
7. И загия́ Ноё, и лэ́скирэ чхавэ́, и лэ́скири ромны́, и лэ́са лэ́скирэ-чхавэ́нгирэ ромня́ дро ковчэго пане́скирэ зачхуибнастыр.
8. И жужэ́ мурдалэ́ндыр (ското́стыр) и нажужэ́ мурдалэ́ндыр (ското́стыр), чирикле́ндыр и сарэ́ндыр, кон ползынэла пири́ пхув.
9. Пир дуй, муршканэ́ и джувликанэ родо́стыр, кэ Ноё загинэ́ дро ковчэго, сыр Дэвэ́л Ноёскэ припхэндя́.
10. Пир эфта́ дывэса́, пэ пхув яця́ тэ чхувэлпэ пани́.
11. Ке́ли Ноёскэ сыс шовшэла́ бэрш, пэ яви́р чхон, дрэ дэшуэфтато дывэ́с, дро дава́ дывэ́с роспхандлэпэ сарэ́ барэ́ хорипнаскирэ (безднакирэ) ґанынга́, и отчхакирдэпэ болыбна́скирэ фэнштры;
12. и пэ пхув чхудяпэ брышы́нд штардэша́ дывэса́ и штардэша́ ратя.
13. Дрэ дава́-паць дывэ́с загия́ дро ковчэго Ноё, и Симо, Хамо и Иафето, Ноёскирэ чхавэ́, и Ноёскири ромны́ и тринэ́ лэ́скирэ-чхавэ́нгирэ ромня́ лэ́са.
14. Ёнэ, и сарэ́ рискирибна́скирэ мурдала́ (зве́ри) пир лэ́нгиро ро́до, и кажно кхэри́тко мурда́л (ското) пир лэ́скиро ро́до, и сарэ́ джидэ́ создыибэна, савэ́ ползынэна пир пхув, пир лэ́нгиро ро́до, и сарэ́ чирикля́, савэ́ вурняна пир лэ́нгиро ро́до – сарэ́ чирикля́, конэ́стэ исын пхака́ (крылы).
15. И загинэ́ кэ Ноё дро ковчэго пир дуй кажнонэ́ лочатыр (плотятыр), дрэ саво́ исын джидо́ ду́хо.
16. И кон загия́, сыс муршкано́ и джувликано джино кажнонэ́ лочатыр, сыр Дэвэ́л припхэндя́ лэ́скэ. И зачхакирдя ковчэго Дэвэ́л пал лэ́стэ.
17. И пане́скиро зачхуибэн (потопо) сыс штардэша́ дывэса́ пэ пхув, и барьёлас вучэды́р пани́, и ґаздыя́пэ ковчэго, и ёв ґаздыя́пэ упрэ́ пхувья́тыр.
18. Пани зоралэ́с ґаздэласпэ вучэды́р и сыг барьёлас пэ пхув; и ковчэго плывинэла (дэла плима) пир пани́.
19. И яця́ древа́н бут пани́ пэ пхув, адя́кэ, со зачхудэпэ сарэ́ вучэ́ бэ́рги, савэ́ сыс тэл саро́ болыбэ́н.
20. Пэ дэшупандж куня́ (локци) пэ лэ́ндэ ґаздыя́пэ пани́ и зачхакирдэпэ бэ́рги.
21. И хасия́ саро́, со сыс джидо́ пэ пхув, кажно лоч (плоть), сави́ псирэлас пир пхув: и чирикля́, и кхэри́тка мурдала́ (ското), и рискирибна́скирэ мурдала́ (зве́ри), и сарэ́ гады (плазуны), савэ́ ползынэнас пир пхув, и сарэ́ мануша́.
22. Саро́, со дыхинэлас дрэ рутхуня (ноздри) джиибна́скирэ духо́са, мыя́.
23. Хасия́ саро́, со сыс джидо́ пэ пхув: манушэ́стыр кэ кхэри́тко мурда́л (ското), и кэ цапня, и кэ болыбна́скирэ чирикля́, саро́ хасия́ пхувья́тыр. Яця́пэ екх Ноё джидо́, и со лэ́са сыс дро ковчэго.
24. Пани пэ пхув ячэлас буты́р шэл тэ пандждэша́ дывэса́.
1. И пририпирдя Дэвэ́л пал Ноёстэ, и пал кажно джидо́ создыибэн, и пал сарэ́ кхэритконэ́ мурдалэ́ндэ (ското), савэ́ сыс лэ́са дро ковчэго; и ґаздыя́ Дэвэ́л балва́л пэ пхув, и пирияця́ пани́.
2. И зачхакирдэпэ хорипнаскирэ ґанынга́ и болыбна́скирэ фэнштры (дудаля), и болыбна́стыр пирияця́ тэ джал брышы́нд.
3. Пани пэ на́бут рисёлас пхувья́тыр, и пало́ шэл тэ панджэша дывэса́ пани́ яця́ тэ тыкнёл.
4. И дро эфта́то (битринэ́нгиро дэ́што) чхон, пэ дэшуэфтатонэ-чхонэ́скиро дывэ́с, пэ Араратоскирэ бэ́рги тэрдия́ ковчэго.
5. Пани саро́ часо тыкнёлас кэ дэ́што чхон; дро англатуно́ дывэ́с дэштонэ-чхонэ́скиро ячнэ́ дыцьлэ упралэстыр бэ́рги.
6. Пир штардэша́ дывэса́, Ноё отчхакирдя́ фэнштрори дро ковчэго, сави́ ёв кокоро́ кэрдя́.
7. И вымэкця коракос (воронос), саво́ вурняндыя, отурняндыя и рисия́, пака вышутия пхув пане́стыр.
8. Адя́кэ-паць ёв отмэкця́ пэ́стыр голумбос, соб (кай) тэ дыкхэ́л, ци згия пани́ пхувья́тыр.
9. Нэ голумбо на латхя́ (ластя) шуко штэ́то ваш пэ́скирэ ґэра́, и рисия́ кэ ёв дро ковчэго; пал-дава́ со пани́ сыс упра́л пир сари́ пхув; и ёв протырдыя́ пэ́скиро васт, и лыи лэс, прилыя́ кэ пэ дро ковчэго.
10. И промэкця яви́р эфта́ дывэса́; и нэвэ́стыр (нэвэ́с) вымэкця голумбос ковчэгостыр.
11. Голумбо кэ ёв рисия́ бэльвэлякиро; и ґа́да, яло (свяжо) оливи́тко патри́н (листо) сыс лэ́стэ дро муй: и Ноё ґалыя́, со пани́ гия́ криг пхувья́тыр.
12. Ёв промэкця яви́р эфта́ дывэса́, и вымэкця голумбос; и ёв буты́р на рисия́ кэ ёв.
13. Шовшэла́ пэ́рво бэрш кэ пэ́рво (англатуно́) дывэ́с, пэрвонэ́-чхонэ́скиро, вышутия пани́ пэ пхув; и Ноё отчхакирдя́ стрэ́ха (чхаки́н) дро ковчэго, и подыкхця́, и ґа́да, пхув упра́л яця́ шуки́.
14. И пэ яви́р чхон, пэ биш тэ эфта́то-чхонэ́скиро дывэ́с, пхув вышутия.
15. И Дэвэ́л пхэндя́ Ноёскэ:
16. “Выджа ковчэгостыр ту, и тыри́ ромны́, и чхавэ́ тырэ́, и тырэ́-чхавэ́нгирэ ромня́ ту́са.
17. Вылыджа кажно джидо́ создыибэн, саво́ исын ту́са, кажнонэ́ лочатыр, чирикле́ндыр, и кхэритконэ́ мурдалэ́ндыр (ското́стыр), и сарэ́ гадэн, савэ́ ползынэна пир пхув: мэк ёнэ тэ розджанпэ пир пхув, и мэк ёнэ тэ биянэн тыкнэн и тэ явэ́н лэн бут пэ пхув.”
18. И выгия́ Ноё, и лэ́скирэ чхавэ́, и ромны́ лэ́скири и лэ́са лэ́скирэ-чхавэ́нгирэ ромня́.
19. И кажно рискирибна́скиро мурда́л (зверё), и кажно цапны (плазуно), и кажно чириклы, и саро́, со ползынэла пир пхув, пир ро́до пэ́скиро, выгинэ́ ковчэгостыр.
20. И кэрдя́ Ноё алта́рё (жэртвенико) Ра́скэ-Дэвлэ́скэ; и лыя́ кажнонэ́ жужэ́ кхэритконэ́ мурдалэстыр (ското́стыр) и кажнонэ́ жужэ́ чириклятыр, и яндя́ цэ́ла хачкирибнаскирэ свэ́нта дыибэна́ пэ алта́рё.
21. И сунгадя Рай Дэвэ́л гудло́ тхув (дымо) и пхэндя́ Рай Дэвэ́л дро Пэ́скиро ило́: “Мэ на ява́ва буты́р тэ прокошав пал пхув манушэ́с, пал-дова́ со манушэ́скиро ило́ исын тэ кэрэ́л фуипэ́н лэ́скирэ тэрныпнастыр: и буты́р Мэ на ява́ва тэ хасякира́в саро́, со исын джидо́, сыр Мэ кэрдём.
22. Акана́ дрэ сарэ́ дывэса́ явэ́на тэ почхувэн дрэ пхув и тэ укэдэн, шыл и хачкирибэ́н, ивант (зима) и лынай (милай), дывэ́с и рат на пириячэна.”
1. Давидо́скиро Пса́лмо, сыр Ёв насця пэ́скирэ Чхавэстыр Авесаломостыр.
2. Раё Дэ́вла! Сыр буты́р мирэ́ вэ́рги ячнэ́, сыр буты́р лэ́ндыр ґаздэ́напэ проти миро джиибэ́н!
3. Бут пхэнэ́на мирэ́ илэскэ: “Нанэ зракхибэ́н лэ́скэ Дэвлэ́стыр!” Сэ́ла.
4. Нэ Ту, Раё Дэ́вла, сан шчы́то пашы́л ма́ндэ; мири́ сла́ва и Ту ґаздэса миро шэро́.
20. Годыпэ́н годлэла яври́ пэ вули́ца (га́са): ёв ґаздэ́ла пэ́скири зан (глос) пэ форуня́ (пло́шчы);
21. годыпэ́н прикхарэла пэ трушулытка дрома́, пашы́л форо́скири по́рта и дро фо́ро ракирэ́ла:
22. “Ци бут тумэ́, бу́ра мануша́ (невежды), явэ́на тэ тырдэннэ кэ напатывалыпэн (биладжаипэ́н)? Ци бут одолэ́, кон салапэ холямэс, явэ́на тэ бахталён холямэ́ сабнастыр? Ци бут (кицы́) дылынэ́ явэ́на древа́н тэ на прилэ́н джиныбэ́н?
1. Тэ́ньци лыджия́ Ду́хо (Фа́но) Исусо́с пэ чхучи́ пхув, соб (кай) тэ пропатякирэл Лэс на́лачхо.
2. И ке́ли Ёв постиндя штардэша́ дывэса́ и штардэша́ ратя, Ёв закамдя́ тэ хал.
3. И на́лачхо подги́я кэ Ёв и пхэндя́: “Ко́ли Ту сан Дэвлэ́скиро Чхаво́, пхэн, соб (кай) далэ́ бара́ тэ ячэн марэ́са.”
4. Нэ Ёв отпхэндя́ лэ́скэ: “Исын чхиндло́: ‘На марэ́са екхэ́са дживэ́ла ману́ш, а кажнонэ́ лавэ́са, со джа́ла яври́ Дэвлэ́скирэ уштэндыр’”
5. Тэ́ньци лэ́ла Лэс на́лачхо дро свэ́нто фо́ро и чхувэ́ла Лэс пэ Кхангирья́кири стрэ́ха (чхаки́н),
6. и раки́рла Лэ́скэ: “Ко́ли Ту сан Дэвлэ́скиро Чхаво́, ухты Кокоро́ тэлэ́; пал-дова́ со исын чхиндло́: “Ёв дэ́ла припхэныбэ́н Янголэнгэ (А́нгелэнгэ) Пэскирэнгэ пал Ту́тэ и пэ васта́ ёнэ лыджа́на Тут, соб (кай) Ту тэ на обштавэспэ (тэ на обстэмпинэспэ) пир бар ґэрьяса Пэскирьяса.”
7. Ису́со пхэндя́ лэ́скэ: “Исын адя́кэ-паць (такжэ) чхиндло́: ‘На пропатякир Рас-Дэвлэ́с, Дэвлэ́с пэ́скирэс.’”
8. Нэвэ́стыр лэ́ла Лэс на́лачхо пэ древа́н вучы бэ́рга и сыкавэ́ла Лэ́скэ сарэ́ свэто́скирэ кралипэна́ и лэ́нгирэ барипэна,
9. и раки́рла Лэ́скэ: “Саро́ мэ да́ва Ту́кэ, ко́ли пэрэса и поклонинэсапэ ма́нгэ.”
10. Тэ́ньци ракирэ́ла лэ́скэ Ису́со: “Джа́ Ма́ндыр, на́лачхо, исын чхиндло́: ‘Дэвлэ́скэ тырэ́скэ клонинпэ и Лэ́скэ екхэ́скэ дынарин.’”
11. Тэ́ньци мэкэ́ла Лэс на́лачхо, и акэ, Янго́лы явнэ́ и дынариндлэ́ Лэ́скэ.
12. Сыр шундя́ Ису́со, со Ианос лынэ́, то дурия дрэ Галиле́я;
13. и гии Назаретостыр, явдя́ и яця́ тэ дживэ́л кэ Капернаумо пашы́л мо́рё (дэрья́в), пэ штэ́ты Завулоноскирэ и Нефалимоскирэ,
14. соб (кай) тэ сполнинэ́лпэ дова́, со пхэндя́ проро́ко Исаё:
15. “Пхув Завулоноскири и пхув Нафалимоскири, со исын пэ дром пашы́л мо́рё (дэрья́в), палэ Иорда́но, Наюдэнгири Галиле́я,
16. акэ, мануша́, савэ́ сыс бэштэ́ дро калыпэ́н, дыкхнэ́ баро́ дуд (свэ́то); и пэ одолэ́ндэ, савэ́ исын сы́рбы мулэ́, – пал-дова́ со ёнэ дживэ́на би Дэвлэ́скиро, засвэнцындя дуд.”
17. Далэ́ часостыр Ису́со лыя́ тэ ракирэ́л: “Рискирэ́н пэ́скиро джиибэ́н кэ Дэвэ́л, пал-дова́ со явдя́ пашылэды́р Кралипэ́н дро Болыбна́скиро Раё.”
18. Гии пашы́л Галилеякиро мо́рё (дэрья́в), Ёв дыкхця́ дуе пшалэ́н, Симонос, савэ́с кхардэ́ Пэ́три, и Ендрис (Андреёс), лэ́скирэ пшалэ́с, савэ́ зачхурдэнас кхудя (сетки) дро мо́рё (дэрья́в), пал-дова́ со ёнэ сыс мачхибнарья (рыбаки).
19. И Ёв ракирэ́ла лэ́нгэ: “Явэ́н Ма́нца, и Мэ кэра́ва тумэ́ндыр манушэ́нгирэ мачхибнарьен”
20. И ёнэ екха́тыр (сра́зу) мэкнэ́ пэ́скирэ кхудя́ (се́тки) и гинэ́ пал Лэ́стэ.
21. И отгии одотхы́р дурэды́р, Ёв дыкхця́ дуе пшалэ́н, Яково́с чхавэ́с Заведеёскирэс и Иоанос, пшалэ́с лэскирэс, савэ́ сыс дрэ ба́рка (лодка) лэ́нгирэ дадэ́са Заведеёса, савэ́ кэрэ́нас пэ́скирэ кхудя: и Ёв кхардя́ лэн Пэ́са;
22. и ёнэ екха́тыр мэкнэ́ ба́рка и пэ́скирэ дадэ́с и гинэ́ Лэ́са.
23. И Ису́со псирэлас пир сари́ Галиле́я, сыклякири манушэ́н пал Дэвлэ́стэ дрэ лэ́нгирэ синагоги и пхэни́ бахталы́ зан (звесь) пал Кралипэ́н и састякири кажно насвалыпэн и дукх дрэ манушэ́ндэ.
24. И гия́ мавлы́н (малва) пал Лэ́стэ пир сари́ Сирия: и янэ́нас кэ Ёв сарэ́н манушэ́н, савэ́ сыс насвалэ и мэньчиндлэпэ налачхэ́ Духо́стыр и чхонытконэ насвалыпнастыр, праличостыр, и Ёв састякирдя лэн.
25. И гинэ́ пал Лэ́стэ бут мануша́ Галилеятыр, Дэшуфорьендыр (Десятиградиятыр), Ерусалимо́стыр, Юдэя́тыр и пал Иорданостыр.
Romani Bible Baltic 2019
United Bible Societies for the Baltic Romani Mission