Beblia

1. И Дэвэ́л бахтякирдя́ Ноёс и лэ́скирэ чхавэ́н, и пхэндя́ лэ́нгэ: “Тэ бияндён чхаворэ́ тумэ́ндэ и тэ явэ́н тумэн буты́р, и тэ пхэрдякирэн тумэ́ пхув.

2. Мэк тэ дарэ́н и тэ трашадён тумэ́ндыр сарэ́ пхувитка рискирибна́скирэ мурдала́ (зве́ри), и сарэ́ болыбна́скирэ чирикля́, саро́, со псирэ́ла пир пхув, и сарэ́ морёскирэ (дэрьявэ́скирэ) мачхэ́; отдынэ́ ёнэ дрэ тумарэ́ васта́.

3. Саро́, со псирэ́ла и дживэ́ла, явэ́ла тумэ́нгэ дро хабэ́н; сыр чар Мэ да́ва саро́ тумэ́нгэ.

4. На хан джиды лоч (плоть), ратэ́са на хан.

5. Мэ, ґалён, пхучавапэ пал и тумаро́ рат, дро саво́ исын тумаро́ джиибэ́н, Мэ пхучавапэ кажнонэ́ рискирибна́скирэ мурдалэстыр (зверёстыр), адя́кэ-паць Мэ пхучавапэ манушэ́скиро ди манушэ́скирэ вастэ́стыр, лэ́скирэ-пшалэ́скирэ вастэ́стыр.

6. Кон прочхувэла манушэ́скиро рат, кодолэскиро рат прочхувэлапэ явирэ манушэ́скирэ вастэ́са: пал-дова́ со ману́ш сыс создыно́ пир Дэвлэ́скири патри́н (о́бразо).

7. И тэ бияндён чхаворэ́ тумэ́ндэ и тэ ячэн тумэн буты́р, и тэ розджанпэ тумэ́ пир пхув, и тэ явэ́н тумэн буты́р пэ ла́тэ.”

8. И пхэндя́ Дэвэ́л Ноёскэ и лэ́скирэ чхавэ́нгэ лэ́са:

9. “А́кэ, Мэ чхува́ва Миро заве́то тумэ́нца и тумарэ́ родоса коригэды́р (позжэды́р) тумэ́ндыр.

10. И кажнонэ́ джидэ́ де́са, саво́ исын тумэ́нца, чирикленца и кхэритконэ́ мурдалэса (скотоса), и сарэ́ рискирибна́скирэ мурдалэ́нца (зверенца) пэ пхув, савэ́ исын тумэ́ндэ, сарэ́нца, кон выгия́ ковчэгостыр, кажнонэ́ мурдалэса (жывотнонэса), саво́ исын пэ пхув.

11. Мэ чхува́ва Миро завето тумэ́нца, со буты́р на явэ́ла хасякирдо кажно лоч панитконэ зачхуибнаса (потопоса), и на явэ́ла буты́р панитко зачхуибэн пэ хасибэ́н пхувьякэ.”

12. И пхэндя́ Дэвэ́л: “Ѓа́да, исын шпэ́ра (знако) пал завето, саво́ Мэ чхува́ва машки́р Ма́ндэ и машки́р тумэ́ндэ, и машки́р кажно джидо́ ди, саво́ тэ явэ́л тумэ́нца, дро тумаро́ ро́до пэ саро́ ве́ко.

13. Мэ сыкава́ва Мири́ банги (радуга) дрэ о́блоки, соб (кай) ёй тэ явэ́л шпэраса пал завето машки́р Ма́ндэ и машки́р пхув.

14. И явэ́ла, ке́ли Мэ яна́ва о́блоко пэ пхув, тэды пэ о́блоко явэ́ла банги;

15. и Мэ ла́ва тэ рипирав Миро заве́то, саво́ исын машки́р Ма́ндэ и машки́р тумэ́ндэ, и машки́р кажнонэ́ джидэ́ де́са дрэ кажно лоч (плоть), пани́ буты́р на явэ́ла сыр потопо тэ хасякирэ́л кажно лоч.

16. И явэ́ла банги (радуга) пэ о́блоко, и Мэ дыкха́ва ла, и рипирава заве́то пэ саро́ ве́ко машки́р Дэвлэ́стэ и машки́р кажно джидо́ ди дрэ кажно лоч, сави́ исын пэ пхув.”

17. И пхэндя́ Дэвэ́л Ноёскэ: “Ѓа́да, исын ґерты́к (знаме́ниё) пал заве́то, саво́ Мэ чхудём машки́р Ма́ндэ и машки́р кажно лоч, сави́ исын пэ пхув.”

18. Ноёскирэ чхавэ́, савэ́ выгинэ́ ковчэгостыр сыс: Симо, Хамо и Иафе́то. Хамо сыс Ханааноскиро дад.

19. Кадалэ́ трин сыс Ноёскирэ чхавэ́, и лэ́ндыр ячнэ́ мануша́ тэ розджанпэ пир сари́ пхув.

20. Ноё яця́ тэ ганавэл пхув, и почхудя винаградо (дракх).

21. И выпия ёв мол (вино), и матия, и сыс нанго пашто́ дрэ пэ́скири ша́тра.

22. И дыкхця́ Хамо, Ханааноскиро дад, пэ́скирэ-дадэ́скиро нангипэ́н, и ке́ли выгия́, роспхэндя́ дуенгэ пэ́скирэ пшалэ́нгэ.

23. Симо и Иафе́то лынэ́ и́ди, и чхудэ́ ла пэ пэ́скирэ псикэ́, гинэ́ палалэса, и лэ́нгирэ-дадэ́скиро нангипэ́н чхакирдэ; лэ́нгирэ муя́ сыс пирискирдэ палэ, и ёнэ лэ́нгирэ-дадэ́скиро нангипэ́н на дыкхнэ́.

24. И просутяпэ Ноё пэ́скирэ моля́тыр (виностыр), и уджиндя́, со кэрдя́ пэ лэ́стэ лэ́скиро тыкнэды́р чхаво́;

25. И пхэндя́ ёв: “Тэ явэ́л прокошно́ Ханаано, писхарье́нгиро-дына́ри ёв явэ́ла пэ́скирэ пшалэ́нгэ.”

26. И пхэндя́ ёв: “Тэ явэ́л бахтякирдо́ Рай Дэвэ́л, Дэвэ́л Симоскиро, Ханаано тэ явэ́л писхариса лэ́скэ.

27. Мэк тэ барьякирэл Дэвэ́л Иафетос; и мэк ёв тэ лэл тэ дживэ́л пэ Симоноскирэ ша́тры; Ханаано явэ́ла лэ́скэ писхариса.”

28. И Ноё дживдя́ пало́ пане́скиро зачхуибэн (потопо) трин шэла́ пандждэша́ бэрш.

1. А́кэ, исын Ноёскирэ-чхавэ́нгиро ро́до: Симо, Хамо и Иафето. Пало́ (после) пане́скиро зачхуибэн (потопо) лэ́ндыр бия́ндынэ чхавэ́.

2. Иафетоскирэ чхавэ́ сыс: Гомеро, Магого, Мадаё, Явано [Иавано-р.с.], Фувало, Мешэхо и Фирасо.

3. Гомероскирэ чхавэ́ сыс: Ашкеназо [Аскеназо-р.с.], Рифато и Фогарма.

4. Яваноскирэ чхавэ́ сыс: Елиша [Елиса-р.с.], Фарсисо, Китимо (Китими) и Доданимо (Доданими).

5. Лэ́ндыр ячнэ́пэ островы (джипа́) манушытконэ́ нацые́нца, пэ лэ́нгирэ пхувья́, кажно ракирдя́ пэ пэ́скири чиб, пир пэ́скиро кхэри́тко ро́до (племё), машкира́л пэ́скирэ манушэ́ндэ.

6. Хамоскирэ чхавэ́ сыс: Хушо, Мицраимо, Футо и Ханаано.

7. Хушоскирэ чхавэ́ сыс: Сева, Хавила, Савта, Раама и Савтеха. Рамоскирэ чхавэ́: Шэва и Дедано.

8. Хушостыр бия́ндыя Нимродо: лэ́скэ трэиндя́ тэ явэ́л зоралэса пэ пхув.

9. Ёв сыс анги́л Растэ-Дэвлэ́стэ зорало́ мурдалэнгиро (зверенгиро) старибнари, палдава́ и ракирэ́на: зорало́ мурдалэнгиро (звере́нгиро) старибнари, сыр анги́л Растэ-Дэвлэ́стэ Нимродо.

10. Кралипэ́н лэ́скиро вагэдыр (англэды́р) сыс: Вавило́но, Эре́хо, Акадо и Халнэ, пэ Сенаароскири пхув.

11. Далэ́ пхувья́тыр выгия́ Асуро (Ассуро), и ёв чхудя́ Ниневия, Рэховоф-иро, Калахо,

12. И Ресе́но машки́р Нине́вия и машки́р Калахо, дава́ исын баро́ фо́ро.

13. Мицраимостыр бия́ндынэ Лудимо, Анамимо, Легавимо, Нафтухимо,

14. Патрусимо, Каслухимо, каты́р выгинэ́ Филистимля́ни и Кафторимо.

15. Ханааностыр бия́ндынэ: Сидоно, лэ́скиро англатуно́ чхаво́, и Хе́то,

16. Евусе́ё, Аморе́ё, Гергесе́ё,

17. Еве́ё, Арке́ё, Сине́ё,

18. Арваде́ё, Цэмаре́ё и Химафе́ё [Хамате́ё-ю.о.]. Кодолэ́ дывэсэ́ндыр Ханааноскирэ кхэри́тка ро́ды (пле́ми) розгинэпэ пир ра́зна штэ́ты,

19. и сыс ме́жа, кай дживдэ́ Ханане́и Сидоностыр проти Гераро кэ Газа, адатхы́р кэ Содо́мо, Гомо́ра, Адма и Цевоимо, кэ Лаша.

20. Кадалэ́ сыс Хамоскирэ чхавэ́, пир лэ́нгирэ кхэри́тка ро́ды (пле́ми), пир лэ́нгирэ екхэ-чибакирэ ирья́ (чиб/ чибья́) (языки), пэ лэ́нгирэ пхувья́, пир лэ́нгирэ манушы́тка на́цыи.

21. Сыс и Симостэ чхавэ́, и ёв сыс дад сарэ́нгэ Евероскирэ чхавэ́нгэ, ёв сыс пхурэды́р пшал Иафетоскэ, пхурэдырэ пшалэ́скэ.

22. Симаскирэ чхавэ́ сыс: Еламо, Асуро, Арфаксадо, Лудо, Ара́мо.

23. Арамоскирэ чхавэ́ сыс: Ўцо, Хуло, Ге́феро и Машо.

24. Арфаксадостыр бия́ндыя Сала, Саластыр бия́ндыя Еве́ро.

25. Еверостыр бия́ндынэ дуй чхавэ́; екхэ́с кхардэ́ Фале́ко, пал-дова́ со дрэ лэ́скирэ дывэса́ росчхуды пэ паша́ сыс пхув; лэ́скирэ пшалэ́с кхардэ́ Иоктано.

26. Иоктаностыр бия́ндынэ Алмодадо, Шалефо, Хацармавефо, Ерахо,

27. Гадорамо, Узало, Дикла,

28. Овало, Авимаило, Шэва,

29. Офиро, Хавила и Иоваво. Сарэ́ кадалэ́ сыс Иоктаноскирэ чхавэ́.

30. Дживдэ́ ёнэ Мешатыр кэ Сефара, васточнонэ бэрга́тыр.

31. Кадалэ́ сыс Симоскирэ чхавэ́ пир лэ́нгирэ кхэри́тка ро́ды (пле́ми), пир лэ́нгири екхэ-чибакирэ ирья́ (чиб/ чибья́) (языки), пэ лэ́нгирэ пхувья́, пир лэ́нгирэ манушы́тка на́цыи.

32. Кадалэ́ сыс Ноёскирэ-чхавэ́нгирэ кхэри́тка ро́ды (пле́ми), пир лэ́нгиро ро́до, дрэ лэ́нгирэ манушы́тка на́цыи. Лэ́ндыр ячнэ́ ра́зна мануша́ пэ пхув пало́ потопо (пане́скиро зачхуибэн).

5. Мэ кхара́ва зоралэ́с Дэвлэ́с мирэ́ заня́са, и Ёв шунэ́ла ман Пэ́скирэ свэнтонэ́ бэрга́тыр. Сэ́ла.

6. Мэ пасиём и со́мас суто́: мэ уштыём, пал-дова́ со Рай Дэвэ́л подрикирэ́ла ман.

7. Мэ на ява́ва тэ дарав тысёнцонэ манушэ́ндыр, савэ́ облынэ ман трусця́л.

8. Тэрдёв анги́л, Раё Дэ́вла, зра́кх ман; миро Дэ́вла! Пал-дова́ со Ту пэкадян сарэ́н мирэ́ вэргэ́н дрэ жанда, Ту вымардян данда́ бэдэ манушэнгирэндэ.

23. Рисён мо́са кэ мэ, ке́ли мэ бангякирава холямэс тумэн: акэ, мэ выпхурдава миро ду́хо (фа́но) пэ тумэ́ндэ, мэ кэра́ва адя́кэ, соб (кай) тумэ́ тэ джинэ́н мирэ́ лава́.

24. Палдава́ со мэ кхардём, и тумэ́ на кандынэ́ (отпхэндлэпэ); мэ протырдыём пэ́скиро васт и ние́кх на прилыя́ кэ ило́.

25. Пал-дова́ со тумэ́ на прилынэ́ сарэ́ годыпэна (советы) и на рискирдэ́ илэ, ке́ли мэ сыкадём тумари́ банг,

26. мэ ява́ва тэ савпэ тумарэ́ барэ́ бидатыр (хасибнастыр), мэ ява́ва тэ просав тумэн, сыр явэ́ла трашаибэ́н (бари дар).

27. Ке́ли трашаибэ́н пэрэ́ла пэ тумэ́ндэ сыр сы́гно хасякирибэн и тумаро́ хасибэ́н явэ́ла сыр вихро, ке́ли бари дар и би́да пэрэ́на пэ тумэ́ндэ,

1. Ке́ли Ису́со дыкхця́ манушэ́н, Ёв гия́ пэ бэ́рга, и, сыр бэсця́, сыкляибны́тка (учэники) Лэ́скирэ подгинэ́ кэ Ёв,

2. и Ёв откэрдя Пэ́скирэ ушта́ и лыя́ тэ сыклякирэ́л лэн, ракири́:

3. “Бахталэ́ исын одолэ́, савэ́ джинэ́на, со лэ́нгирэ духоскэ трэй Дэвэ́л; лэ́нгиро сыс Кралипэ́н дро Дэвлэ́скиро Раё.

4. Бахталэ́ исын одолэ́, савэ́ ровэна, пал-дова́ со Дэвэ́л подрикирэ́ла лэ́нгиро ду́хо (фа́но).

5. Бахталэ́ исын ковлэ́-илы́тка, пал-дова́ со пхув явэ́ла лэ́нгири.

6. Бахталэ́ исын одолэ́, конэ́скиро ило́ исын бокхало пал Дэвлэ́скиро лав и сыр пани́ древа́н родэ́ла чачипэ́н. Дэвэ́л чалякирэла лэ́нгиро ило́.

7. Бахталэ́ исын одолэ́, савэ́ примангэна банг манушэ́нгэ, пал-дова́ со лэ́нгэ явэ́ла примангло.

8. Бахталэ́ исын одолэ́, савэ́ндэ исын жужо́ (чы́сто) ило́, пал-дова́ со ёнэ дыкхэ́на Дэвлэ́с.

9. Бахталэ́ исын одолэ́, савэ́ кэрэ́на рама́нё (миро), пал-дова́ со явэ́на тэ кхарэ́н лэн ‘Дэвлэ́скирэ чхавэ́.’

10. Бахталэ́ исын одолэ́, конэ́с традэ́на пал чачипэ́н; лэ́нгиро исын Кралипэ́н дро Дэвлэ́скиро Раё.

11. Бахталэ́ сан тумэ́, ке́ли мануша́ явэ́на тэ кошэн тумэн и тэ традэ́н, и явэ́на тэ ракирэ́н налачхэ́ лава́ пэ тумэ́ндэ пал Ма́ндэ.

12. Явэ́н бахталэ́ и радынэ́нпэ, пал-дова́ со баро́ отдыибэ́н Дэвлэ́стыр ужакирэ́ла тумэн дро Болыбна́скиро Раё: адя́кэ традэнас и пророкэ́н, савэ́ сыс анги́л тумэ́ндэ.

13. Тумэ́ исын сыр лонд ваш сарэ́ манушэ́нгэ. Ко́ли ж лонд нашавэла пэ́скиро лондыпэн, нисыр нашты́ тэ кэрэ́с, соб (кай) нэвэ́стыр лонд тэ явэ́л лондо; лэ́стэ буты́р ни саво́ лачхипэ́н нанэ, екх со тэ вычхурдэс лэс яври́ тэ штавэн мануша́ ґэрэ́нца.

14. Тумэ́ исын сыр яг ваш сарэ́ манушэ́нгэ. Фо́ро, со исын пэ бэ́рга пэ вучипэ́н, на могинэ́ла тэ ґарадёл.

15. И ке́ли захачкирэна момолы́ (све́чка), на чхувэ́на ла тэл пири́, а дро шандало (подсвечнико) тэ свэнцынэл яг пир саро́ кхэр.

16. Адя́кэ мэк тэ свэнцынэл тумари́ яг анги́л манушэ́ндэ, соб (кай) ёнэ тэ дыкхэ́н тумарэ́ лачхэ́ рэ́нды и тэ славинэ́н Дадэ́с тумарэс Болыбнаскирэс.

17. На думинэн, со Мэ явдём тэ отпарував Зако́но ци пророкэ́н, нэ тэ кэра́в кэ ко́нцо/яго́ро (тэ сполнинав).

18. Чачэс, Мэ ракира́ва тумэ́нгэ: пака на явэ́ла ко́нцо (яго́ро) болыбнаскэ и пхувьякэ, ни екх тыкны буквица ни чэрта буквакири на отлэлапэ Законо́стыр анги́л, сыр Зако́но тэ кэрэ́лпэ.

19. Адя́кэ, ко́ли вари-кон отпарувэла хоць екх лав припхэныбнастыр и сыклякирэ́ла адя́кэ манушэ́н, одова́ явэ́ла най тыкнэды́р дро Кралипэ́н дро Болыбна́скиро Раё. Нэ кон кандэ́ла и кэрэ́ла пир лав, явэ́ла най барэды́р дро Кралипэ́н дро Болыбна́скиро Раё.

20. Палдова́ Мэ ракира́ва тумэ́нгэ: ко́ли чачипэ́н тумаро́ нанэ бутэды́р сыр лылваритконэнгиро (книжникэ́нгиро) и Фарисеенгиро чачипэ́н, тумэ́ никели на заджа́на дро Кралипэ́н дро Болыбна́скиро Раё.

21. Тумэ́ шундлэ́, со ракирдэ́ дро пхурано́ часо: ‘На замар (на умар), кон жа замарэла, тэл сэ́ндо джа́ла.”

22. Нэ Мэ ракира́ва тумэ́нгэ: ‘Кажно, кон холясо́ла пэ пэ́скирэ пшалэ́стэ ни палсо́, джа́ла тэл сэ́ндо. Кон жа пхэнэ́ла пэ́скирэ пшалэ́скэ ‘дылыно́’, явэ́ла дрэ дар Синедрионостыр. И кон пхэнэ́ла ‘бигодякиро’, явэ́ла дрэ дар, со джа́ла дро лю́но (адо) яга́са.

23. Адя́кэ, ко́ли ту янэса пэ́скиро да́ро кэ алта́рё, и одо́й пририпирэса, со тыро́ пшал исын холямо́ пэ Ту́тэ,

24. мэк пэ́скиро свэ́нто дыибэ́н анги́л алта́рё и джа́, анги́л кэр рама́нё (миро) пэ́скирэ пшалэса, тэ́ньчи джа́ и ян пэ́скиро свэ́нто дыибэ́н.

25. Кэр ‘рама́нё’ (миро) пэ́скирэ манушэ́са сыгэды́р, пака ту ишчо (инкэ́) сан пэ дром лэ́са, соб (кай) ману́ш тэ на отдэ́л тут сэндарискэ, а сэнда́ри тэ на отдэ́л тут дынари́скэ (слуга́скэ), и одова́ тэ на чхурдэл тут дро штарибэ́н.

26. Чачэс, Мэ ракира́ва ту́кэ: ту на выджаса одотхы́р, пака ту отдэса кэ най тыкнэды́р ґасприн’

Romani Bible Baltic 2019

United Bible Societies for the Baltic Romani Mission