Bible in one year January 6Genesis 11:1-321. Пэ сари́ пхув сыс екх чиб, и екх ракирибэ́н.2. И сыс адя́кэ: вастоко́стыр гинэ́ ёнэ дромэ́са, пэ Синароскири пхув латхнэ́ ёнэ до́ло и лынэ́ тэ дживэ́н одо́й.3. И пхэндлэ́ ёнэ екх екхэ́скэ: “Явэ́н, кэра́са бут кирпичы (кинта́) и обхачкираса лэн яга́са.” И ячнэ́ лэ́ндэ кирпичы заме́ст бара́, а пхувитко смола заме́ст звёска.4. И пхэндлэ́ ёнэ: “Явэ́н, кэра́са пэ́скэ фо́ро и вучарды́ (башня), вучипна́са кэ болыбэ́н; и даса пэ́скэ лав, соб (кай) тэ на розджаспэ пир сари́ пхув.”5. И гия́ тэлэ́ Рай Дэвэ́л тэ дыкхэ́л фо́ро и вучарды́ (башня), сави́ кэрдэ́ манушэ́нгирэ чхавэ́.6. И пхэндя́ Рай Дэвэ́л: “А́кэ, екх исын нацыя, и сарэ́ ракирэ́на пэ екх чиб; и ґа́да, со ёнэ лынэ́ тэ кэрэ́н, и на отячэна ёнэ далэ́стыр, со закамлэ тэ кэрэ́н;7. явэ́н, джа́са тэлэ́, и пирипэнтынаса одо́й лэ́нгиро ракирибэ́н адя́кэ, соб (кай) екх ману́ш тэ на ґалёл, со ракирэ́ла яви́р ману́ш.”8. И росчхудя́ Рай Дэвэ́л лэн одотхы́р пир сари́ пхув; и ёнэ пириячнэ тэ кэрэ́н фо́ро.9. Палдава́ лэ́скэ дыно́ лав Вавило́но, одо́й Рай Дэвэ́л пирипэнтындя пир сари́ пхув ракирибэ́н, и одотхы́р лэн Рай Дэвэ́л росчхудя́ тэ дживэ́н пир сари́ пхув.10. Ѓа́да, исын лав пал Симоскиро ро́до: Симоскэ сыс шэл бэрш, и пир дуй бэрш пало́ пане́скиро зачхуибэн (потопо), лэ́стыр бия́ндыя Арфаксадо;11. пало́ Арфаксадоскиро бияныпэ́н, о Симо дживдя́ панджшэла́ бэрш, и лэ́стыр бия́ндынэ чхавэ́ и чхая́.12. Дрэ трияндапандж бэрш Арфаксадостыр бия́ндыя Сала.13. Пало́ Саласкиро бияныпэ́н, Арфаксадо дживдя́ штаршэлатрин бэрш, и лэ́стыр бия́ндынэ чхавэ́ и чхая́.14. Дрэ трия́нда бэрш Саластыр бия́ндыя Еверо.15. Пало́ Евероскиро бияныпэ́н Сала дживдя́ штаршэлатрин бэрш, и лэ́стыр бия́ндынэ чхавэ́ и чхая́.16. Дрэ трия́нда триндэша штар бэрш Еверостыр бия́ндыя Фалеко.17. Пало́ Фалекоскиро бияныпэ́н, Еверо дживдя́ штаршэла́ триндэша бэрш, и лэ́стыр бия́ндынэ чхавэ́ и чхая́.18. Дрэ трия́нда (триндэша) бэрш Фалекостыр бия́ндыя Рагаво.19. Пало́ Рагавоскиро бияныпэ́н Фале́ко дживдя́ дуйшэла́ еня́ бэрш, и лэ́стыр бия́ндынэ чхавэ́ и чхая́.20. Дрэ трия́нда (триндэша) дуй бэрш Рагавостыр бия́ндыя Серухо.21. Пало́ Серухоскиро бияныпэ́н Рагаво дживдя́ дуй шэла́ эфта́ бэрш, и лэ́стыр бия́ндынэ чхавэ́ и чхая́.22. Дрэ трия́нда (триндэша) бэрш Серухостыр бия́ндыя Нахоро.23. Пало́ Нахороскиро бияныпэ́н Серухо дживдя́ дуй шэла́ бэрш, и лэ́стыр бия́ндынэ чхавэ́ и чхая́.24. Дрэ биш тэ еня́ бэрш Нахоростыр бия́ндыя Фара.25. Пало́ Фараскиро бияныпэ́н Нахоро дживдя́ шэл тэ дэшуеня бэрш, и лэ́стыр бия́ндынэ чхавэ́ и чхая́.26. Дрэ эфтадэша́ бэрш Фарастыр бия́ндыя Авра́мо [Абрамо-ю.о.], Нахоро и Гарано.27. Ѓа́да, исын Фараскиро ро́до: Фарастыр бия́ндыя Авра́мо, Нахоро и Гарано. Гараностыр бия́ндыя Лото.28. И Гарано мыя́ анги́л пэ́скирэ дадэ́стэ Фарастэ, пэ пхув, пэ сави́ ёв бия́ндыя, Ўро Халдее́нгиро.29. Авра́мо и Нахоро лынэ́ пэ́скэ ромне́н, Аврамоскирэ ромня́ кхардэ́: Сара; Нахороскирэ ромня́ кхардэ́ Милка [Милька-ю.о.], сави́ сыс Гараноскири чхай, Милкакирэ-дадэ́скири и Искаскирэ-дадэ́скири.30. Сара сыс накхабны́ джувлы́, бичхаворэнгири.31. И лыя́ Фара Аврамос, пэ́скирэ чхавэ́с, и Лотос, Араноскирэ чхавэ́с, пэ́скирэ унукос, и Сара, пэскирья́ борья, пэ́скирэ-чхавэ́скирэ Аврамоскирэ ромня́, и гия́ криг лэ́нца Уростыр Халдеенгиростыр, соб (кай) тэ джа́н пэ Ханаано́скири пхув; ке́ли догинэ́ ёнэ кэ Харано, ёнэ тэрдинэ́ одо́й.32. И дживдя́ Фара дуйшэла́ пандж бэрш, и мыя́ Фара дро Харано.Genesis 12:1-201. И, акэ, Рай Дэвэ́л пхэндя́ Аврамоскэ: “Джа́ тырэ́ пхувья́тыр, тырэ́ родо́стыр и тырэ́-дадэ́скирэ кхэрэ́стыр, пэ доя́ пхув, сави́ Мэ ту́кэ сыкава́ва.2. И Мэ созда́ва ту́тыр бари нацыя, и Мэ бахтякирава тут, и барьякирава лав тыро́; и ту́тыр явэ́ла бахтякирибэ́н ваш явирэ́нгэ.3. Мэ бахтякирава манушэ́н, савэ́ явэ́на тэ бахтякирэн тут, и кон прокошэл тут, одолэ́н Мэ прокошава; и дрэ ту́тэ явэ́на бахтякирдэ сарэ́ кхэри́тка ро́ды пэ пхув.”4. И гия́ Авра́мо, сыр пхэндя́ Рай Дэвэ́л лэ́скэ; и гия́ лэ́са Лото. Аврамоскэ сыс эфтадэша́ падж бэрш, ке́ли ёв гия́ криг Хараностыр.5. И Авра́мо лыя́ пэ́са пэскирья́ ромня́ Сара, Лотос, пэ́скирэ пшалэ́скирэ чхавэ́с, и саро́ лэ́нгиро маёнко, со ёнэ скэдынэ́, и манушэ́н сарэ́н, савэ́ лэ́ндэ сыс дро Харано; и выгинэ́, соб (кай) тэ джа́н пэ Ханаано́скири пхув; и явнэ́ пэ Ханаано́скири пхув.6. И прогия́ Авра́мо пир дая́ пхув кэ Сихемоскиро штэ́то, кэ до́ло дэмбитконэ вэшорэса Морэ. Тэды пэ дая́ пхув дживдэ́ Ханане́и.7. И Дэвэ́л сыкадыя́ Аврамоскэ, и пхэндя́: “Дая́ пхув Мэ да́ва тырэ́ родо́скэ, саво́ явэ́ла анги́л.” И ёв кэрдя́ алта́рё одо́й Ра́скэ-Дэвлэ́скэ, Саво́ сыкадыя́ лэ́скэ.8. Одотхы́р ёв гия́ пэ васто́ко Вефилёстыр кэ бэ́рга; и чхудя́ пэ́скири ша́тра адя́кэ, со ла́тыр Вефи́лё сыс пэ западо (пал-паня́), а Гаё пэ васто́ко; и чхудя́ одо́й Ра́скэ-Дэвлэ́скэ алта́рё и прикхардя лав Ра́скирэ-Дэвлэ́скиро.9. И ґаздыя́пэ Авра́мо, и дурэды́р гия́ пэ паш-дывэ́с (юго).10. И дрэ доя́ пхув сыс бокх. И явдя́ Авра́мо дро Еги́пто тэ дживэ́л одо́й; пал-дова́ со пэ доя́ пхув яця́ пхарэдыр бокх.11. И сыс адя́кэ: ке́ли ёв джа́лас пашылэды́р кэ Еги́пто, тэды пхэндя́ пэ́скирэ ромнякэ Саракэ: “Ѓа́да, мэ джино́м (джина́в), со ту сан шука́р джувлы́;12. и ке́ли Египтя́ни дыкхэ́на тут, то ёнэ пхэнэ́на: ‘Акэ, исын лэ́скири ромны́;’ и замарна ман, а тут ячкирэна джидя;13. пхэн, со ту сан мири́ пхэн, соб (кай) ма́нгэ пир ту́тэ тэ явэ́л шука́р, и, соб (кай) миро ди тэ явэ́л джидо́ пир ту́тэ.”14. И сыс адя́кэ: ке́ли Авра́мо явдя́ дро Еги́пто, Египтя́ни дыкхнэ́, со ёй сыс древа́н шука́р.15. И адя́кэ-паць дыкхнэ́ ла фараоно́скирэ тхага́рья (кня́зи), и шардэ ла фараоно́скэ; и лынэ́ ла дро фараоно́скиро кхэр.16. И ёв пир ла́тэ кэрдя́ Аврамоскэ бут миштыпэ́н; и сыс лэ́стэ кхэри́тка мурдала́ (тыкно́ и баро́ ското): бакрэ́ и ослы (мега́рья), и слу́ги (дына́рья) и дынарицы (слугицы), и лошаки и верблюды.17. Нэ Рай Дэвэ́л чхудя́ бари ка́ра пэ фараоностэ и пэ лэ́скиро кхэр пал Аврамоскирэ ромня́тэ Саратэ.18. И фарао́но кхардя́ Аврамос, и пхэндя́: “Со да ту ма́нца кэрдя́н? Ваш со на пхэндя́н ма́нгэ, со ёй исын тыри́ ромны́?19. ваш со ту пхэндя́н: ‘Ёй исын пхэн мири́?’ И мэ камдём тэ лав ла пал ромня́тэ пэ́скэ. И акана́, ґа́да, тыри́ ромны́, лэ ла и джа́.”20. И фарао́но дыя́ пал лэ́стэ припхэныбэ́н манушэ́нгэ, и лыджинэ́ дур лэс, и лэ́скирэ ромня́, и саро́, со сыс лэ́стэ.Psalms 4:1-31. Хоро́скирэ Дирижоро́скэ. Пэ балытка Струме́нты. Давидо́скиро Пса́лмо.2. Ке́ли мэ кхара́ва, отпхэн ма́нгэ, Дэ́вла пал миро чачипэ́н: ма́нгэ сыс пхаро́. Ту помогиндян ма́нгэ: потангинэ ман и пошун миро мангипэ́н Дэвлэ́скэ.3. Манушы́тка чхавалэ! Ци бут явэ́на тумэ́ тэ обракирэн мири́ сла́ва? Ци бут тумэ́ явэ́на тэ выкэдэн хохано́ чачипэ́н? Ци бут тумэ́ явэ́на тэ тэрдэнпэ кэ фрэнтыма? Сэ́ла.Proverbs 1:28-3328. то тэды тумэ́ кхарэ́на ман, нэ мэ на ява́ва тэ отпхэнав тумэ́нгэ, и тумэ́ явэ́на тэ родэ́н ман сарэ́ зорья́тыр, нэ тумэ́ на латхэ́на ман.29. Пал-дова́ со тумэ́ на вырикирэнас джиныбэ́н, и на выкэдынэ́ ваш пэ́скэ (на закамлэ тэ кутякирэс кэ дар) Рас-Дэвлэ́с,30. и тумэ́ ние́кхвар на прилынэ́ миро годыпэ́н и тумэ́ на прилынэ́ кэ годы́, сыр мэ сыкадём тумари́ банг,31. пал-дова́ тумэ́ явэ́на тэ хан дова́, со тумэ́ сан мол, и тумэ́ явэ́на тэ чалён долэ́стыр, со тумэ́ придуминдлэ.32. Пал-дова́ со ёнэ хасёна, ке́ли ёнэ рисёна криг годыпнастыр и дылынэ́-манушэ́нгири нахратыма кокори хасякирэ́ла лэн.33. Нэ кон шунэ́ла мирэ́ лава́, кодова́ явэ́ла тэ дживэ́л би дара́киро, и ёв явэ́ла би трашаибнаскиро (штылэ́с), ёв на явэ́ла тэ дарэл фуипнастыр.”Matuš 5:27-4827. Тумэ́ шундлэ́, сыр сыс пхэндло́ дро ґаратуно часо: ‘На кэр биладжаипэ́н.’28. Нэ Мэ ракира́ва тумэ́нгэ, со кажно, кон дыкхэ́ла пэ джувля́тэ налачхэ́ камибнаса, одова́ ужэ кэрэ́ла биладжаипэ́н дро пэ́скиро ило́.29. Ко́ли ж чачи́ якх злыджала тут кэ грэ́хо, ри́скир ла яври́ и вычхурдэ; пал-дова́ со фэды́р ваш ту́кэ тэ нашавэс екх якх, сыр саро́ тэ джал дро лю́но (адо).30. Ко́ли ж чачо́ (пра́во) васт лыджа́ла тут кэ грэ́хо, отчингир лэс и вычхурдэ; пал-дова́ со фэды́р ваш ту́кэ тэ нашавэс екх васт, сыр сарэ́ маса́ тэ джа́н дро лю́но.31. Адя́кэ-паць сыс пхэндло́: ‘Ко́ли вари-кон розджалапэ пэ́скирэ ромня́са, мэк тэ дэл ла́кэ лыл пал розгиибэн.’32. Нэ, Мэ ракира́ва тумэ́нгэ: ‘Кон мэкэ́ла пэ́скирэ ромня́ апри́ч сыр пал напатяибнытко банг, одова́ ячэ́лапэ банго́, ко́ли ёй кэрэ́ла биладжаипэ́н; а кон лэ́ла пал пэ́стэ джувля́, сави́ исын розлыджины ромэса, одова́ сы́рбы кокоро́ исын банго́ дро напатяибэн.33. Ишчо шундлэ́ тумэ́, со сыс пхэндло́ дро ґаратуно часо: ‘На совлаха́, ко́ли ту на сан твардо; нэ кэр пир совлаха́ пэ́скирэ анги́л Дэвлэ́стэ!34. Нэ Мэ ракира́ва тумэ́нгэ: ‘На совлаха́ сарэ́са; ни болыбнаса, пал-дова́ со ёв исын Дэвлэ́скиро престоло;35. ни пхувья́са, пал-дова́ со ёй исын штэ́то тэл Лэ́скирэ ґэра́, ни Ерусалимоса, пал-дова́ со ёв исын фо́ро барэ́ Крали́скиро;36. на совлаха́ пэ́скирэ шэрэ́са, пал-дова́ со ни екх бал на могинэ́са тэ кэрэ́с ни парнэса, ни калэса.37. Мэк тэ явэ́л тумаро́ лав ‘ны, ны’, ‘над, над’, а со упрэдыр далэ́стыр, дова́ исын налачхэстыр.’38. Тумэ́ шундлэ́, со сыс пхэндло́: ‘Якх пал якх, и данд пал данд.’39. Нэ Мэ ракира́ва тумэ́нгэ: на кэр фуипэ́н палэ одолэ́скэ, кон кэрдя́ фуипэ́н ту́кэ; нэ кон пэкавэла тут дрэ тыри́ чачи́ (право) чам (шчока), тэ́ньчи ри́скир кэ ёв яви́р.40. Нэ кон закамэ́ла тэ сэндинэлпэ ту́са и тэ лэл ту́тыр гад, отдэ́ лэ́скэ и упратуно урибэ́н.41. Нэ кон зачхувэла тут тэ джал лэ́са екх вэрста, джа́ лэ́са дуй.42. Кон мангэ́ла ту́тыр, дэ, и на отрисёв одолэ́стыр, кон камэ́ла тэ залэл ту́тыр.43. Тумэ́ шундлэ́, со сыс пхэндло́: ‘Сыка́в паты́в пэ́скирэ пашатунэ́ манушэ́скэ и на сыка́в паты́в пэ́скирэ вэргэ́нгэ (врогэ́нгэ).’44. Нэ Мэ пхэна́ва тумэ́нгэ: сыкавэ́н паты́в пэ́скирэ вэргэ́нгэ, и мангэ́нпэ Дэвлэ́скэ пал одолэ́ндэ, савэ́ кошэна тумэн, кэрэ́н лачхипэ́н одолэ́нгэ, савэ́ древа́н на камэ́на тумэн и мангэ́нпэ Дэвлэ́скэ пал одолэ́ндэ, савэ́ нашукар отлыджанапэ кэ тумэ́ и традэ́на тумэн;45. соб (кай) тумэ́ могинэ́нас тэ явэ́н ‘чхавэ́ Болыбна́скирэ Дадэ́скирэ’, и Ёв зачхувэла Пэ́скиро Кхам тэ свэнцынэл пэ лачхэ́ и налачхэ́ манушэ́ндэ, и бичхавэ́ла брышы́нд пэ одолэ́ндэ, кон кэрэ́ла лачхипэ́н и кон кэрэ́ла фуипэ́н.46. Палдова́, ко́ли тумэ́ сыкавэ́на паты́в одолэ́нгэ, савэ́нгэ тумэ́ сан дро́га, саво́ отдыибэ́н Дэвлэ́стыр явэ́ла тумэ́нгэ? И мытоскирэ скэдыибнарья кэрэ́на адя́кэ.47. Нэ ко́ли тумэ́ дэ́на ‘добридим’ пэ́скирэ пшалэ́нгэ, со дасаво тумэ́ кэрэ́на? Аж На́юды кэрэ́на адя́кэ.48. Палдова́ явэ́н бидошакирэ, сыр бидошакиро исын тумаро́ Болыбна́скиро Дад. Romani Bible Baltic 2019 Maintained by the United Bible Societies for the Baltic Romani Mission