Bible in one year - Пэ Балтитко Романи чиб

Bible in one year January 7

1. И гия́ Авра́мо Египто́стыр, кокоро́ и лэ́скири ромны́, и саро́, со сыс лэ́стэ, и Лото гия́ лэ́са пэ паш-дывэ́с пэ Ханаано.

2. И Авра́мо сыс древа́н барвало́ кхэритконэ́ мурдалэ́нца (скотоса), и рупэ́са, и сувнака́са.

3. И джа́лас ёв дромэ́са паш-дывэсэ́стыр кэ Вефи́лё, пэ штэ́то, кай англэды́р сыс лэ́скири ша́тра машки́р Вефи́лё и машки́р Гаё,

4. кэ дова́ штэ́то, кай сыс алта́рё, саво́ ёв англэды́р одо́й кэрдя́; и одо́й Авра́мо прикхардя лав Ра́скирэ-Дэвлэ́скиро.

5. И Лотостэ, саво́ Аврамоса псирдя́, адя́кэ-паць сыс кхэри́тка мурдала́ (тыкно́ и баро́ ското), и ша́тры.

6. И пхув на могиндя́ лэн дуе́н тэ рикирэ́н, соб (кай) тэ дживэ́н кхэтанэ́, пал-дова́ со лэ́нгиро миштыпэ́н сыс дасаво баро́, со ёнэ на могиндлэ́ тэ дживэ́н кхэтанэ́.

7. И сыс кошыбэ́н машки́р Аврамоскирэ чхупнарьендэ (пастухэндэ) и машки́р Лотоскирэ чхупнарьендэ (пастухэндэ); и Хананеи и Ферезеи тэды дживдэ́ пэ доя́ пхув.

8. И пхэндя́ Авра́мо Лотоскэ: “Мэк тэ на явэ́л кошыбэ́н машки́р ма́ндэ и ту́тэ, и машки́р мирэ́ скотоскирэ чхупнарьендэ и тырэндэ; пал-дова́ со амэ сам сэмэ́нца.

9. Ци на сари́ пхув исын анги́л ту́тэ? Лэ пэ́скири паш и джа́. Ко́ли ту джа́са пэ зэ́рво (ле́во) риг, то мэ пэ чачи́ (право) риг; а ко́ли ту пэ чачи́ риг, тэды мэ пэ зэ́рво.”

10. Лото ґаздыя́ пэ́скирэ якха́ и, акэ, дыкхця́ сари́ Иорданоскири округа (сави́ сыс анги́л дова́, сыр Рай Дэвэ́л хасякирдя́ Содо́мо и Гомо́ра), сари́ кэ Сигоро чхувэласпэ пане́са, сыр Ра́скирэ-Дэвлэ́скири у́нта (садо), сыр Египто́скири пхув.

11. Тэ́ньци выкэдыя́ пэ́скэ Лото сарэ́ Иорданоскирэ штэ́ты; и гия́ Лото пэ васто́ко. И роскэрдэ ёнэ пэ́скирэ паша́ екх екхэстыр.

12. Авра́мо яця́ тэ дживэ́л пэ Ханаано́скири пхув; а Лото яця́ тэ дживэ́л дрэ округакирэ фо́рья, и чхудя́ пэ́скирэ ша́тры кэ Содо́мо.

13. Мануша́, савэ́ дживдэ́ кэ Содо́мо, сыс фуй и древа́н грэхи́тка анги́л Растэ-Дэвлэ́стэ.

14. И пхэндя́ Рай Дэвэ́л Аврамоскэ пало́ дова́, сыр Лото отгия́ лэ́стыр: “Ѓаздэ пэ́скирэ якха́, и далэ́ штэто́стыр, пэ саво́ ту сан акана́, подыкх пэ паш-рат, и пэ паш-дывэ́с, и пэ васто́ко и пэ западо;

15. пал-дова́ со сари́ пхув, сави́ ту дыкхэ́са, Мэ да́ва ту́кэ и тырэ́ родо́скэ пэ ве́ки,

16. и созда́ва Мэ тырэ́ родо́стыр бут бут манушэ́н, сыр пхувья́киро пра́хо; ко́ли вари-кон сашты́ (могинэ́ла) тэ пиригинэл пхувья́киро пра́хо, тэды и ро́до тыро́ явэ́ла згиндло;

17. ушты́, джа́ пир дая́ пхув дрэ ла́киро длэнгипэ́н и буґлыпэ́н, пал-дова́ со Мэ да́ва ла ту́кэ.”

18. И пиричхудя Авра́мо пэ́скири ша́тра, и гия́, и яця́ тэ дживэ́л пашы́л дэмбитко вэшоро Мамре́, со исын дро Хевро́но; и одо́й кэрдя́ алта́рё Ра́скэ-Дэвлэ́скэ.

Genesis 14:1-24

1. Дава́ сыс адя́кэ: ке́ли дживдя́ Амрафело, Сенаароскиро (Шиноароскиро ) кра́ли, о Ариохо, Еласароскиро кра́ли, Кедорлаомеро, Еламоскиро кра́ли, и Тидало, Гоимэнгиро кра́ли,

2. то гинэ́ ёнэ марибна́са пэ Берастэ, Содомо́скирэ крали́стэ, пэ Биршастэ, Гоморакирэ крали́стэ, Шынавостэ, Адмаскирэ крали́стэ, Шэмеверостэ, Цэвоимоскирэ крали́стэ, и пэ Беласкирэ крали́стэ, саво́ акана́ исын Сигоро (Цоаро).

3. Ёнэ сарэ́ явнэ́ кхэтанэ́ пэ Сидимоскиро до́ло, кай акана́ исын Лондо мо́рё (дэрья́в).

4. Дэшуду́й бэрш ёнэ сыс слу́ги (дына́рья) Кедорлаомеростэ, а пэ дэшутрито бэрш ґаздынэ́ ёнэ бу́нто.

5. Пэ дэшуштарто бэрш явдя́ Кедорлаомеро и кра́лья, савэ́ сыс лэ́са, и замардэ́ Рефаимэн дро Аштэроф-Карнаимо, Зузимэн дро Гамо, Эмимэн дро Шав-Кириафаимо,

6. и Хореен пэ бэ́рга лэ́нгири Сеиро, кэ Эл-Фарано, со исын пашы́л чхучи́ пхув.

7. И ке́ли рисинэ́ ёнэ одотхы́р, ёнэ явнэ́ кэ Мишпато, саво́ исын Каде́со, и розмардэ Амаликитянэнгири сари́ риг, и адя́кэ-паць Амореен, савэ́ дживдэ́ кэ Хацацон-Фамаро.

8. И выгинэ́ Содомоскиро кра́ли, Гоморакиро кра́ли, Адмаскиро кра́ли, Цэвоимоскиро кра́ли и Беласкиро кра́ли, саво́ исын Сигоро (Цоаро); и лынэ́ тэ марэ́нпэ лэ́нца пэ Сидимоскиро до́ло,

9. Кедорлаомероса, Еламоскирэ крали́са, Тидалоса, Гоимэнгирэ крали́са, Амрафелоса, Сенаароскирэ крали́са, Ариохомоса, Еласароскирэ крали́са, – штар кра́лья проти панджэндэ.

10. Дро Сидимоскиро до́ло бут сыс смолакирэ ґанбиня́ (ямы). Содомоскиро и Гоморакиро кра́лья, мэкнэпэ тэ нашэ́н, пынэ́ дрэ лэ́ндэ; а палатунэ́ (после́дня) нашнэ́ дрэ бэ́рги.

11. Одолэ́, кон пиризорьякирдэ, лынэ́ Гоморакиро и Содомоскиро маёнко (миштыпэ́н), и саро́ лэ́нгиро хабэ́н, и гинэ́ пэ́скэ.

12. И Лотос лынэ́, Аврамоскирэ плименикос, саво́ дживдя́ кэ Содо́мо, и маёнко лэ́скиро, и гинэ́ пэ́скэ.

13. И екх ману́ш, саво́ яця́пэ джидо́, явдя́, и роспхэндя́ Юдоскэ Аврамоскэ, саво́ тэды дживдя́ пашы́л дэмбитко вэшоро Мамре́, Амореянинос, Эшколоскирэ пшалэ́с и Анероскирэ пшалэ́с, савэ́ сыс дро доракирибэ́н Аврамоса.

14. Авра́мо, сыр шундя́, со лэ́скири сэмэ́нца лынэ́ дро пле́но, скэдыя́ пэскирэн дынарье́н, савэ́ бия́ндынэ дро лэ́скиро кхэр, триншэла́ дэшуохто манушэ́н, и традыя́ вэргэ́н кэ Дано;

15. и ёв розмардя́ лэн пэ отря́ды, и ёв, и лэ́скирэ дына́рья пынэ́ пэ лэ́ндэ раты́, и розмардя́ лэн, и традыя́ лэн кэ Хова, со исын пир зэ́рво (ле́во) риг Дамаскостыр;

16. и рискирдя́ Лотос и саро́ лэ́скиро маёнко, и пэ́скири сэмэ́нца, и саро́ лэ́скиро миштыпэ́н рискирдя́, адя́кэ-паць джувле́н и манушэ́н.

17. Ке́ли ёв рисия́ палэ пало́ Кедорлаомероскиро и кральенгиро розмарибэн, савэ́ исыс лэ́са, то Содомоскиро кра́ли выгия́ анги́л лэ́стэ пэ до́ло Шаве́, со исын акана́ крали́скиро до́ло;

18. и Салимоскиро кра́ли, Мелхисэдэко, вылыджия́ маро́ и мол (вино). Ёв сыс раша́й Най Вучэдырэскиро Дэвлэ́скиро,

19. и бахтякирдя́ ёв и пхэндя́: “Тэ явэ́л бахтало́ Авра́мо Дэвлэ́стыр, Най Вучэдырэстыр, Барэ́ Ра́стыр пэ болыбэ́н и пэ пхув.

20. Тэ явэ́л барьякирдо́ Дэвэ́л, Най Вучэдырэскиро, Саво́ отдыя́ вэргэ́н дрэ тырэ́ васта́.” Авра́мо сарэ́стыр дыя́ лэ́скэ дэ́што паш.

21. И пхэндя́ Содомоскиро кра́ли Аврамоскэ: “Дэ ма́нгэ манушэ́н, а маёнко лэ пэ́скэ.”

22. Нэ Авра́мо пхэндя́ Содомакирэ крали́скэ: “Ѓаздава миро васт кэ Най Вучэдырэскиро Рай Дэвэ́л (Яхва́), Дэвэ́л, Саво́ исын пхувья́кирэ и болыбна́скиро Баро́ Рай.

23. Со мэ на лава́ ни тхав, ни ґэритконэндыр симироро сарэ́ тырэстыр, соб (кай) ту тэ на пхэнэ́с: ‘Мэ барвалякирдём Аврамос’,

24. апри́ч долэ́стыр, со ханэ́ тэрнэ́-бэршэнгирэ мануша́, и апри́ч паша́тыр, сави́ исын манушэ́нгэ, савэ́ ма́нца псирдэ́; Эне́ро, Эшко́ло и Мамре́, мэк ёнэ тэ лэн пэ́скири паш.”

Psalms 4:4-8

4. Нэ джинэ́н, со Рай Дэвэ́л чхудя́ дрэ риг ваш Пэ́скэ дэвлытконэ́ манушэ́н: Рай Дэвэ́л шунэла ман, ке́ли мэ кхара́ва Лэс.

5. Издран и на кэрэ́н грэ́хи; розлэн пэ́скирэ илэ́са пэ тумаро́ чхуибэ́н и явэ́н штыл (тиха). Сэ́ла.

6. Янэ́н свэ́нта дыибэна́ чачипнастыр и допатян Ра́скэ Дэвлэ́скэ.

7. Бут мануша́ ракирэ́на: “Кон сыкавэ́ла амэ́нгэ вари-саво́ лачхипэ́н?” Ѓаздэ Пэ́скрэ-Москиро дуд пэ амэ́ндэ, Раё Дэ́вла!

8. Ту дыя́н ра́дыма мирэ́ илэскэ буты́р, сыр ёнэ радынэ́напэ аплодостыр пэ гив и винаградо.

Proverbs 2:1-5

1. Ми́ро чхава! Ко́ли ту прилэса мирэ́ лава́, и гаравэса (зракхэ́са) миштэ́с мирэ́ припхэныбэна́ андрэ́ пэ́стэ;

2. адя́кэ, со ту пришунэсапэ кэ годыпэ́н, и рискирэса ило́, соб (кай) тэ ґалёс;

3. и, ко́ли ту явэ́са тэ мангэс зоралэ́с пэ́скэ годыпэ́н и ту рискирэса ило́, соб (кай) тэ ґалёс;

4. ко́ли ту явэ́са тэ причхувэс зор тэ латхэс годыпэ́н сыр руп, и ту явэ́са тэ родэс годыпэ́н сыр кучипэ́н:

5. то тэды ту ґалёса, со́скэ трэй тэ кутякирэс кэ дар Рас-Дэвлэ́с, и тэ уджинэс бутэды́р пал Дэвлэ́стэ.

Matuš 6:1-18

1. Дыкхэ́н, и на сыкавэ́н пэ́скиро патяибэ́н пэ якха́ манушэ́нгэ; ко́ли на адя́кэ, на явэ́ла тумэ́нгэ отдыибэ́н Болыбна́скирэ Дадэ́стыр.

2. Нэ ко́ли ту дэ́са одолэ́нгэ, савэ́ндэ исын трэ́бима, на пхурдэ зоралэ́с шарибнаса дро ро́го (труба) анги́л пэ́стэ, сыр кэрэ́на дуемуитка мануша́ дрэ синагоги и пэ вули́цы (га́сы), соб (кай) тэ славинэ́н лэн мануша́. Чачэс, ракира́ва тумэ́нгэ: ёнэ ужэ дорэснэ́ пэ́скиро отдыибэ́н.

3. Нэ ке́ли ту дэ́са одолэ́нгэ, савэ́ндэ сыс трэ́бима, мэк тыро́ зэ́рво (ле́во) васт на джинэ́ла, со кэрэ́ла чачо́ (право).

4. Соб (кай) тыро́ дыибэ́н тэ на явэ́л дыцьло; и Дад тыро́, Саво́ дыкхэ́ла саро́, отдэ́ла ту́кэ тыро́ отдыибэ́н.

5. Ке́ли ту мангэсапэ, на яв сыр кадалэ́ дуемуитка, савэ́ камэ́на тэ тэрдён пэ вэ́нглы яври́ и дрэ синагоги, соб (кай) лэн тэ дыкхэ́н мануша́. Чачэс, Мэ ракира́ва тумэ́нгэ: ёнэ ужэ дорэснэ́ пэ́скиро отдыибэ́н.

6. Ке́ли ту мангэсапэ, заджа́ дрэ андратуны́ шту́ба пэ́скири, пхандэ вуда́р, и мангпэ Дадэ́скэ тырэ́скэ, Саво́ исын надыцьло; и Дад тыро́, Саво́ дыкхэ́ла тут, со явирэ́нгэ на дыцьло, отдэ́ла ту́кэ.

7. Ке́ли ту мангэсапэ, на ра́кир бут лава́, сыр На́юды, савэ́ думинэ́на, со лэн ушунэна пал лэ́нгирэ длэнгэ мангипэна.

8. На явэ́н, сыр ёнэ исын, пал-дова́ со Дад тумаро́ джинэ́ла, со тумэ́нгэ трэй анги́л, сыр тумэ́ помангэна Лэ́стыр.

9. Мангэ́нпэ жэ адя́кэ: ‘Дад амаро́ Болыбна́скиро, Саво́ исын дро Болыбна́скиро Раё! Мэк тэ славинэлпэ Тыро́ лав;

10. Мэк тэ явэ́л Тыро́ Кралипэ́н, Мэк тэ сполнинэ́лпэ Тыри́ во́ля пэ пхув, Сыр и пэ болыбэ́н;

11. Подэ амэ́нгэ маро́ со дывэ́с;

12. И приманг амэ́нгэ длуги амарэ́, Сыр амэ примангаса одолэ́нгэ, Савэ исын вужлэ амэ́нгэ;

13. И на домэк амэн кэ чорипэ́н; нэ зра́кх амэн налачхэстыр; пал-дова́ со исын Тыро́ Кралипэ́н и зор и сла́ва пэ ве́ки. Ами́нь.’

14. Пал-дова́, ко́ли тумэ́ примангэна манушэ́нгэ пал лэ́нгирэ грэ́хи, тумаро́ Болыбна́скиро Дад примангэла тумэ́нгэ,

15. нэ ко́ли тумэ на явэ́на тэ примангэн грэ́хи манушэ́нгэ, тумаро́ Болыбна́скиро Дад на примангэла грэ́хи тумарэ́.

16. Ке́ли тумэ́ постинэна, на кэрэ́н рондлэ́ муя́, сыр кэрэ́на дуемуитка, пал-дова́ со ёнэ гаравэна пэ́скирэ чачунэ́ муя́, соб (кай) мануша́ тэ дыкхэ́н, со ёнэ постинэна. Чачэс, Мэ ракира́ва тумэ́нгэ: ‘Ёнэ ужэ дорэснэ́ пэ́скиро отдыибэ́н.’

17. Ке́ли ту постинэса, помакх пэ́скиро шэро́ и вымор муй пэ́скиро,

18. соб (кай) тэ на сыкавэспэ явирэ́нгэ, со ту постинэса, нэ екхэ Дадэ́скэ тырэ́скэ, Саво́ исын надыцьло; и Дад тыро́, Саво́ дыкхэ́ла дова́, со на дыкхэ́на яви́р мануша́, отдэ́ла ту́кэ лачхипна́са.

Romani Bible Baltic 2019

Maintained by the United Bible Societies for the Baltic Romani Mission