Bible in one year January 8Genesis 15:1-211. Пало́ далэ́ рэ́нды (де́лы) Ра́скирэ-Дэвлэ́скиро лав сыс дро дыкхибэ́н Аврамоскэ, и сыс пхэндло́: “Авраме, на дар; Мэ сом тыро́ шчы́то; мазу́ри (награда) ту́кэ тыро́ исын древа́н бари.2. Авра́мо пхэндя́: “Баро́ Раё, Дэ́вла! Со Ту дэ́са ма́нгэ? Мэ яцёмпэ би чхаворэнгиро, а хула́й дро миро кхэр исын дава́ Елиезэро Дамаскостыр.”3. И ишчо (инкэ́) Авра́мо пхэндя́: “Ѓа́да, Ту на дыя́н ма́нгэ чхавэ́н, и, ґа́да, екх мирэ́ кхэрэ́стыр явэ́ла, пэ миро мэкно́ миштыпэ́н хула́са.”4. И, акэ, сыс Ра́скирэ-Дэвлэ́скиро лав кэ ёв, и сыс пхэндло́: “На дорэсэ́ла (на долэла) ёв тыро́ мэкно́ миштыпэ́н; нэ одова́, кон выджа́ла тырэ́ нутрятыр (масэ́ндыр), одова́ дорэсэ́ла тыро́ миштыпэ́н.”5. И вылыджия́ лэс яври́, и пхэндя́: “Подыкх пэ болыбэ́н, и гин чэргэня́, ко́ли ту могинэ́са (сашты́) тэ гинэс лэн.” И пхэндя́ лэ́скэ: “Ада́кицы ту́тэ явэ́на чхаворэ́.”6. Авра́мо патяндыя Ра́скэ-Дэвлэ́скэ, и Ёв приґалыя дава́ лэ́скэ дро чачипэ́н.7. И пхэндя́ лэ́скэ: “Мэ сом Рай Дэвэ́л, Саво́ вылыджия́ тут Уростыр Халдеенгирэстыр, соб (кай) тэ дав ту́кэ дая́ пхув дро мэкно́ миштыпэ́н пэ́скэ.”8. Ёв пхэндя́: “Раё Баро́, Дэвлалэ! Пир со ма́нгэ тэ джина́в, со мэ прилава ла?”9. Рай Дэвэ́л пхэндя́ лэ́скэ: “Лэ ма́нгэ тринэ́-бэршыткона рэца́ (телица), тринэ́-бэршыткона бузня́ (коза), тринэ́-бэршытконэ бакрэ́с, голумбица и тэрнэ́ голумбос.”10. Ёв лыя́ лэн сарэ́н, росчингирдя пэ паш проти лэн, и чхудя́ екх пашы́л яви́р; екхэ чирикле́н на росчингирдя.11. И приурняндынэ пэ тру́пы рискирибна́скирэ чирикля́; нэ Авра́мо традэлас лэн.12. Ке́ли кхам бэшэлас, пыя́ зорало́ соибэн пэ Аврамостэ; и, ґа́да, пыя́ пэ лэ́стэ дар и баро́ калыпэ́н.13. И пхэндя́ Рай Дэвэ́л Аврамоскэ: “Джин, со ро́до тыро́ явэ́ла чу́жо пэ пхув, сави́ на явэ́ла лэ́нгири, и кэрэ́на лэн писхарье́нца, и явэ́на тэ притасавэн лэн штаршэла́ бэрш,14. нэ Мэ кэра́ва сэ́ндо пэ манушэ́ндэ, савэ́нгэ ёнэ явэ́на тэ дынаринэ́н; пало́ дава́ ёнэ выджа́на барэ́ барвалыпнаса,15. а ту джа́са кэ тырэ́ дада́ раманёса (миро́са), и ту явэ́са ґарадо дро лачхо́ пхурипэн;16. нэ дрэ шта́рто стрэч (поколе́ниё) ёнэ рисёна адари́к: пал-дова́ со акана́ Амореёскиро чорипэ́н кэ дава́ часо исын на пхэрдо́.”17. Ке́ли бэсця́ кхам, и яця́ калыпэ́н, ґа́да, тхув (дымо) сыс бовэстыр и яга чибакирэ прогинэ́ машкира́л росчингирдэ котэра́ мурдалэнгирэ.18. Дро дова́ дывэ́с Рай Дэвэ́л кэрдя́ заве́то Аврамоса, и пхэндя́: “Тырэ́-чхавэ́нгирэ чхавэ́нца Мэ да́ва дая́ пхув, Египто́скирэ рэка́тыр (лэня́тыр) кэ бари рэка (лэнь), рэка (лэнь) Евфрато,19. Кенеенгири, Кенезеенгири, Кедмонеенгири,20. Хетеенгири, Ферезеенгири, Рефаимэнгири,21. Амореенгири, Хананеенгири, Гергесеенгири и Евусеенгири.”Genesis 16:1-161. Нэ Аврамоскири ромны́, Сара, на биянэлас чхаворэ́н лэ́скэ. Ла́тэ сыс дына́рица (слугица) Египтянка, савья́ кхардэ́ Агарь.2. И Сара пхэндя́ Аврамоскэ: “Ѓа́да, Рай Дэвэ́л закэрдя миро пэр, соб (кай) ма́нгэ тэ на биянав чхаворэ́н, мэ манга́ва, заджа́ кэ мири́ дына́рица; сашты́ (могинэ́ла) тэ явэ́л, соб (кай) ма́нгэ тэ явэ́н ла́тыр чхаворэ́.” Авра́мо кандыя́ Сара.3. И лыя́ Аврамоскири ромны́, Сара, пэскирья́ дына́рица Египтянка Агарь, и дыя́ ла Аврамоскэ, пэ́скирэ ромэскэ дрэ ромня́тэ, пал-дова́, сыр ёй дживдя́ пэ Ханаано́скири пхув дэш бэрш.4. Ёв загия́ кэ Агарь, и ёй запхария. Ке́ли дыкхця́ ёй, со запхария, то ёй лыя́ тэ бидыкхэл пэскирья́ хуланя.5. И Сара пхэндя́ Аврамоскэ: “Дрэ холы́ мири́ ту сан банго́; мэ отдыём мирья дына́рица кэ колы́н тыро́; а ёй, сыр дыкхця́, со запхария, то лыя́ тэ бидыкхэл ман; мэк тэ явэ́л Рай Дэвэ́л сэндариса машки́р ма́ндэ и ту́тэ.”6. Авра́мо пхэндя́ Саракэ: “А́кэ, тыри́ дына́рица исын дрэ тырэ́ васта́; кэр ла́са, со ту́кэ трэй.” И Сара лыя́ тэ на дэл ла́кэ во́ля, и ёй настя́ ла́тыр.7. И латхя́ ла Ра́скирэ-Дэвлэ́скиро Янго́ло пэ чхучи́ пхув (пустыня) пашы́л пане́скири ґаны́нг, каты́р джа́ла пани́ пэ дром кэ Суро.8. И пхэндя́ ла́кэ: “Агари́е, Саракири дына́рица! Каты́р ту явдя́н, и карик джа́са?” Ёй пхэндя́: “Мэ прастава Саратыр, мирэ́ хуланятыр.”9. Ра́скирэ-Дэвлэ́скиро Янго́ло пхэндя́ ла́кэ: “Рисёв кэ пэ́скири хуланы и яч тэ кандэс.”10. И пхэндя́ Ра́скирэ-Дэвлэ́скиро Янго́ло ла́кэ: “Мэ бутэдырьякирава и кэра́ва баро́, тырэ́-чхавэ́нгиро ро́до адя́кэ, со явэ́ла нашты́ тэ пиригинэс лэс.”11. И дурэды́р пхэндя́ Ра́скирэ-Дэвлэ́скиро Янго́ло ла́кэ: “Ѓа́да, ту сан пхари́, и ту биянэса чхавэ́с, и дэ́са лав лэ́скэ Измаило, пал-дова́ со Рай Дэвэ́л шундя́ тырэ́ мэ́ньки;12. ёв явэ́ла бу́со (дико) ману́ш; лэ́скирэ васта́ явэ́на пэ сарэ́ндэ, и сарэнгирэ васта́ пэ лэ́стэ; ёв явэ́ла тэ дживэ́л анги́л сарэ́ндэ пэ́скирэ пшалэ́ндэ.”13. И дыя́ лав Агарь Ра́скэ-Дэвлэ́скэ, Саво́ ракирдя́ ла́кэ, кадасаво́ лав: “Ту сан Дэвэ́л, Саво́ дыкхэ́ла ман.” Палдава́ пхэндя́ ёй: “Мэ, чачунэ́с, ада́й дыкхцём Кодолэ́с, Кон дыкхця́ ман.”14. Палдава́ дая́ ґаны́нг, каты́р джа́ла пани́, кхарэ́лапэ: Беэр-лахай-рои (Эль рой). Ёй исын машки́р Каде́со и Баредо [Бередо-ю.о.].15. Э Агарь бияндя́ чхавэ́с Аврамоскэ; и дыя́ лав Авра́мо пэ́скирэ чхавэ́скэ, саво́ бия́ндыя Агарьятыр: Измаило.16. Аврамоскэ сыс охтодэшашов бэрш, ке́ли Агарь бияндя́ лэ́скэ Измаилос.Psalms 5:1-71. Хоро́скирэ Дирижоро́скэ. Пэ балытка Струме́нты. Давидо́скиро Пса́лмо.2. Шун на́бут мирэ́ лава́, Раё Дэ́вла, обмеркин мирэ́ хор думки.3. Шун мири́ зан, ке́ли мэ да́ва го́дла ясвэ́нца, миро Кра́лё и миро Дэ́вла, мэ мангавапэ Ту́кэ.4. Раё Дэ́вла! Ту шунэса мири́ зан злокостыр (ранкостыр), Мэ яна́ва миро мангипэ́н пэ зло́ко, Мэ ужакирава на́бут (куты́), ке́ли Ту отпхэнаса.5. Ту на сан Дэвэ́л, Саво́ древа́н радынэ́лапэ, ке́ли кэрэ́на фуипэ́н.6. Пхутькирдэ́ на вытэрдёна анги́л Тырэ́ якха́. Ту бидыкхэса одолэ́н, савэ́ кэрэ́на на пир чачипэ́н.7. Ту хасякирэса одолэ́н, кон ракирэ́ла хоханэ́ лава́: Рай Дэвэ́л древа́н на камэ́ла манушэ́н, савэ́ исын нахрата кэ рат и хоханэ́.Proverbs 2:6-96. Пал-дова́ со Рай Дэвэ́л дэ́ла джиныбэ́н, Лэ́скирэ лавэ́стыр явэ́ла джиныбэ́н и ґалыибэ́н.7. Ёв пригаравэла зракхибэ́н (баро́ годыпэ́н) дэвлытконэнгэ, Ёв исын шчы́то ваш одолэ́нгэ (дыкхэ́ла пал одолэ́ндэ), савэ́ дживэ́на пир чачипэ́н;8. Ёв приракхэла дроморэ, кай исын чачипэ́н манушэ́ндэ, и Ёв ракхэ́ла дрома́ ваш Пэ́скирэ свэнтонэнгэ.9. Тэ́ньци ту ґалёса чачипэ́н, чачипэ́н машки́р манушэ́ндэ, и чачуно́ дром.Matuš 6:19-3419. На кэдэн пэ́скэ кучипэна пэ пхув, кай моль и оржа хасякирэна, и чора подґанавэнапэ и чорэна;20. нэ кэдэн пэ́скэ кучипэ́н ваш Болыбна́скиро Раё, кай ни моль, ни оржа на хасякирэ́ла, ни чора на подґанавэнапэ; и на чорэна;21. пал-дова́ со, кай тыро́ кучипэ́н исын, одо́й тыро́ ило́ явэ́ла.22. Якха́ исын сыр момолы́тко (свети́льнико) ваш маса́. Палдава́, ко́ли якх тыри́ явэ́ла жужы (чысто), тэды тырэ́ маса́ явэ́на жужэ́.23. Ко́ли якх тыри́ на явэ́ла жужы, тэды сарэ́ маса́ тырэ́ явэ́на дро цямлыпэ́н. Палдава́, ко́ли яг, сави́ исын дрэ ту́тэ, яця́ цямлыпнаса, саво́ ж баро́ тэды исын дава́ калыпэ́н (цямлыпэ́н).24. Нико́н на могинэ́ла тэ дынаринэ́л дуе рангэ, ци екхэ́скэ явэ́ла тэ сыкавэ́л паты́в, нэ яви́р явэ́ла на пир ило́; ци явэ́ла чачуно́ кэ екх, а кэ яви́р явэ́ла на пир ило́. Тумэ́нгэ нашты́ тэ дынаринэ́н (тэ служынэн) Дэвлэ́скэ и барвалыпнаскэ.25. Палдава́ Мэ ракира́ва тумэ́нгэ: на пиридживэн пал тумаро́ джиибэ́н, со тумэ́нгэ тэ хан ци тэ пьен; ци пал тумарэ́ маса́, со тэ урьен. Нау́што (хай) джиибэ́н исын на дрогэдыр хабнастыр, нау́што маса́ исын на дрогэдыр урибнастыр?26. Подыкхэн пэ болыбнытконэ чириклендэ; ёнэ на сеинэна, на счхинэна, на чхувэ́на счхиндло дрэ шу́рна; и Дад тумаро́ Болыбна́скиро чаравэла лэн. Нау́што тумэ́ на сан пэ бут дрогэдыр лэ́ндыр?27. Нэ кон тумэ́ндыр, пиридживи пал джиибэ́н, могинэ́ла тэ кэрэ́л длэнгэдыр пэ на́бут пэ́скиро джиибэ́н?28. Нэ со тумэ́ пиридживэна пал урибэ́н? Дыкхэ́н пэ фэлды́тка лилии, сыр ёнэ барьёна; на кэрэ́на буты́, на кхувэна тхава,29. нэ Мэ пхэна́ва тумэ́нгэ, со и Соломо́но пэ́скирэ барвалыпнаса на урьеласпэ адя́кэ, сыр кажно лэ́ндыр.30. Ко́ли ж дасаво урибэ́н Дэвэ́л дэ́ла фэлдытконэ чарьякэ, сави́ ададывэ́с исын, нэ атася́ явэ́ла чхурдыи дро бов, тэды со ж на фэды́р Ёв дэ́ла тумэ́нгэ урибэ́н, тумэ́ ж сан набарэ́ – патяибнаскирэ мануша́?31. Тэды на пиридживэн, и на ракирэ́н: ‘Со амэ́нгэ тэ хас?’ ци ‘Со тэ пьяс, ци дро со тэ урьяваспэ?’32. Пал-дова́ со саро́ дава́ родэ́на На́юды, и пал-дова́ со Дад тумаро́ Болыбна́скиро джинэ́ла, со тумэ́ндэ исын трэ́бима дро дава́ саро́.33. Родэ́н жа анги́л Дэвлэ́скиро Кралипэ́н дро Болыбна́скиро Раё и чачипэ́н Лэ́скиро, саро́ яви́р явэ́ла дыно́ тумэ́нгэ упралэстыр.34. Палдова́ на пиридживэн пал атасятуно дывэ́с, пал-дова́ со атасятуно дывэ́с кокоро́ явэ́ла тэ думинэл пал пэ́стэ; ухты́лла (до́си) пхарипэ́н ваш кажно дывэ́с. Romani Bible Baltic 2019 Maintained by the United Bible Societies for the Baltic Romani Mission