Bible in one year October 1Isaiah 53:1-121. Кон патяндыя лавэ́скэ, саво́ шундлэ́ амэ́ндыр, конэ́скэ откэрдяпэ Ра́скирэ-Дэвлэ́скиро васт?2. Ёв выбария анги́л Лэ́стэ сыр чарори, сыр отбарипэн шукэ́ пхувья́тыр; Ёв на выдыкхэлас, сыр ману́ш патывалэ́ минаса, на сыс дрэ Лэ́стэ барипэ́н; амэ Лэс дыкхцям, и Лэ́стэ на сыс дасаво, со б притырдыя амэн кэ Ёв.3. Ёв сыс, сыр нисо́ анги́л манушэ́ндэ, Лэ́скэ на дынэ́ паты́в мануша́; Мурш, Саво́ прилыя́ дукха́ амарэ́ и насвалыпэн; амэ отрисиям Лэ́стыр пэ́скирэ мо́са; амэ на камдям тэ дыкхас пэ Лэ́стэ, амэ на приласас Лэс.4. Нэ Ёв лыя́ пэ Пэ́стэ амаро́ бизорьякирибэн, Ёв лыджия́ амаро́ насвалыпэн, а амэ думиндям, со дава́ Дэвэ́л дукхадя Лэс, чхудя́ ка́ра пэ Лэ́стэ и чхудя́ пхарипэ́н пэ Лэ́стэ.5. Нэ Ёв страдынэлас пал амарэ́ грэ́хи, пал амаро́ чорипэ́н Лэс мэнчинэнас; ка́ра, сави́ яндя́ свэ́то пэ амэ́ндэ, сыс пэ Лэ́стэ, Лэ́скирэ франсостыр (дукхатыр) амэ яця́м састэ.6. Сарэ́ амэ, сыр бакря́ псирасас, гиям кажно пэ́скирэ дромэ́са, и Рай Дэвэ́л чхудя́ пэ Лэ́стэ грэ́хи, савэ́ сарэ́ амэ кэрдя́м.7. Лэс марэнас, и притасавэнас, нэ Ёв выкэдыя́ тэ страдынэл, Ёв на откэрэлас Пэ́скирэ ушта́; сыр бакри Ёв гия́ пэ мэрибэ́н; сыр бакроро́ ничи́ на пхэнэ́ла, ко́ли злэнас лэ́скири вы́лна, адя́кэ Ёв Пэ́скирэ ушта́ на откэрэлас.8. Лэс лынэ́ сэндостыр и бэшыбнастыр, нэ пал ро́до Лэ́скиро, кон пхэнэ́ла? Ёв сыс отчурдыно джидэ́ манушэ́нгирэ пхувья́тыр; мыя́ пал грэ́хо, саво́ кэрдя́ Миро народо.9. Лэс камлэ́ тэ гаравэн кхэтанэ́ прахарьенца, нэ Ёв сыс гарадо́ кэ барвало́ ману́ш, пал-дова́ со Ёв на кэрдя́ грэ́хо, и на сыс хохаибэ́н дрэ Лэ́скирэ ушта́.10. Нэ сыс Ра́скирэ-Дэвлэ́скири во́ля, соб (кай) Лэс тэ марэ́н кэ калэ́ маса́; Ёв отдыя́ Лэс пэ мэ́ньки; ко́ли ж Лэ́скиро ди янэ́ла свэ́нто дыибэ́н, соб (кай) тэ отмэкэнпэ грэ́хи, то Ёв удыкхэ́ла Пэ́скиро ро́до анги́л, и Ра́скирэ-Дэвлэ́скири во́ля явэ́ла тэ кэрэ́лпэ Лэ́скирэ вастэ́са.11. Бахтало́ явэ́ла Ёв одолэ́стыр тэ дыкхэ́л, со кэрдя́ Лэ́скиро ди; Пэ́скирэ ґалыибнастыр Ёв, чачипна́скиро, писха́ри Миро, зракхэ́ла бут манушэ́н и грэ́хи лэ́нгирэ лыджа́ла пэ Пэ́стэ.12. Палдава́ Мэ да́ва Лэ́скэ котэ́р (паш) машки́р барэндэ, и зоралэнца Ёв дорэсыбэ́н роскэрэла (розделинэла), пал-дова́ со Ёв отдыя́ Пэс пэ мэрибэ́н. Лэс гиндлэ́ пал прахаристэ, нэ Ёв лыджия́ пэ Пэ́стэ бутэ́-манушэ́нгиро грэ́хо и пал прахарьендэ адя́кэ мангэлас.Isaiah 54:1-171. Ра́дынпэ, накхабны́ (беплодно) джувлы́, сави́ ние́кхвар на бияндя́, ґа́здэ тыри́ зан радыма́са, и ра́дынпэ кодоя, сави́ николи на биянэлас! Джувля́тэ, савья́ ячкирдя́ ром буты́р чхаворэ́н, сыр одольятэ, сави́ дживэ́ла ромэса, – ракирэ́ла Рай Дэвэ́л.2. Кэр буты́р штэ́то ваш тыри́ ша́тра; кэр ша́тра барэдырэ пологэнца, на ладжа! Протырдэ шылэ длугэдыр, замар тырэ́ килорэ (конки).3. Ту буглёса пэ сарэ́ рига́; чхаворэ́ тырэ́ залэна дро пле́но народы, и ёнэ явэ́на тэ дживэ́н дрэ ячадэ фо́рья.4. На дар, ту на явэ́са ладжакирды; на ладжа, нико́н тут на ладжакирэла; Ту бистрэса ладжаипэ́н, саво́ прилыян дрэ тэрнэ́ бэрша́; и ту на явэ́са тэ рипирэс пал ладж, сави́ ту прилыян, сыр са́нас биромэскири.5. Кодова́, Кон создыя́ тут, исын тыро́ ром; Рай Дэвэ́л, болыбна́скирэ-янголэ́нгиро исын Лэ́скиро лав; Свэ́нто Израилёскиро тут выкинэла; Ёв кхарлапэ сарэ́-пхувья́кирэ Дэвлэ́са.6. Сы́рбы ромня́, сави́ ровэла, и сави́ исын ячкирды, кхарэ́ла тут Рай Дэвэ́л; сыр тэрня ромня́, сави́ никонэ́скэ на сыс трэй”, – ракирэ́ла тыро́ Дэвэ́л.7. Мэ ячкирдём пэ на́бут тут, нэ барэ́ тангипнаса (жалимаса) Мэ прилава тут палэ.8. Холясыём Мэ пэ ту́тэ, гарадём ту́тыр Миро муй пэ на́бут, нэ Мэ потангинава тут барэ́ лачхипна́са, – ракирэ́ла Рай Дэвэ́л, Саво́ выкиндя тут.9. Дава́ исын ваш Ма́нгэ сыр пани́ дрэ Ноёскирэ дывэса́; сыр совлахадём, тэ́ньчи, ко́ли дживэлас Ноё, со пани́ буты́р на явэ́ла пэ пхув, адя́кэ совлахадём, со Мэ на лава́ тэ холясовав пэ ту́тэ.10. Бэ́рги зджана пэ́скирэ штэто́стыр, бэ́ргицы издрана, Миро лачхипэ́н ту́тыр на отджала, Завето, дрэ саво́ исын Миро рама́нё (миро) на парудёла”, – ракирэ́ла Рай Дэвэ́л, Саво́ тангинэла тут.11. “Чорори, чхурдыны рискирибна́скирэ балваляса, сави́ ровэла и на пириячэ́ла! Акэ, Мэ чхува́ва тырэ́ бара́ пэ рубино, Мэ ла́ва тэ кэра́в тут сапфиростыр.12. Мэ кэра́ва тырэ́ фэнштры рубинэндыр и тыри́ по́рта мутинэндыр (жэмчужынэндыр), и саро́ тыро́ тыно дрогонэ́ барэндыр.13. Сарэ́ Тырэ́ чхавэ́ явэ́на тэ сыклён Ра́стыр-Дэвлэ́стыр; явэ́ла лэ́ндэ баро́ рама́нё (миро).14. Ту явэ́са зоралы́ чачипна́са, на трэй ту́кэ тэ дарэс, пал-дова́ со нико́н ту́кэ буты́р на дэ́ла пхарипэ́н, ту на явэ́са тэ дарэс, пал-дова́ со ёв кэ ту на подджа́ла.15. Акэ, явэ́на тэ ґаздэ́нпэ пэ ту́тэ, нэ дава́ нанэ Ма́ндыр; кон ґаздэ́лапэ пэ ту́тэ, одова́ пэрэ́ла (хасёла).16. Акэ, Мэ кэрдём фаурнарис (ковалёс), ёв росхачкирэла вангар дрэ яг, соб (кай) тэ кэрэ́л струменто ваш пэ́скири буты́; а Мэ созда́ва вэргос, соб (кай) ёв тэ хасёл.17. Кон бы на ґаздэласпэ пэ ту́тэ вари-со́са, ничи́ ту́са на кэрэ́лапэ; со б на ракирэ́нас пал ту́тэ пэ сэ́ндо, ёнэ явэ́на бангэ́, а на ту. Дава́ исын да́ро сыр мэкно́ миштыпэ́н, со прилэ́на Ра́скирэ-Дэвлэ́скирэ писха́рья, ёнэ явэ́на отмэкнэ и дава́ исын Ма́ндыр,” – ракирэ́ла Рай Дэвэ́л.Psalms 113:1-41. Аллилуя. Шарэ́н Рас-Дэвлэ́с! Шарэ́н Ра́скирэ-Дэвлэ́скирэ писха́рья, шарэ́н Ра́скирэ-Дэвлэ́скиро лав.2. Тэ явэ́л бахтало́ Ра́скирэ-Дэвлэ́скиро лав далэ́ дывэсэ́стыр и дурэды́р пэ сарэ́ ве́ки!3. Мэк тэ шарэ́н Ра́скирэ-Дэвлэ́скиро лав долэ́ часостыр, сыр кхам уштэ́ла кэ/жы́ко дова́ часо, ке́ли кхам бэшэ́ла.4. Рай Дэвэ́л исын вучэды́р сарэ́ Наюдытконэ́ нацые́ндыр, Лэ́скири сла́ва исын вучэды́р болыбна́стыр.Proverbs 26:17-1917. Кон чхувэ́ла пэ́скиро накх дрэ чу́жо чинга́рд, одова́ исын сы́рбы ману́ш, саво́ ухтылэ́ла джуклэс пал кана́.18. Сы́рбы бигодякиро ману́ш, кон чхурдэ́ла яг (ягунэ глоўни), марибны́тка бустя́ (стре́лы) и мэрибэ́н,19. исын адасаво́ ману́ш, саво́ хохавэла пэ́скирэ пашатунэс, и ракирэ́ла: “Мэ фэ́ни (то́ка) кэра́ва пэраса (шутки).”Efežanenge 3:1-211. Ваш дава́ мэ, Па́вли, сом Исусо́скиро Христосо́скиро ману́ш дро штарибэ́н ваш тумэ́нгэ, Наюдэ́нгэ.2. Ко́ли тумэ́ шундлэ́ пал Дэвлэ́скирэ-бахтякирибнаскири буты́, сави́ сыс дыны́ ма́нгэ ваш тумэ́нгэ, сыр кхэритконэ́ барыдырэ́скэ,3. пал-дова́ со ма́нгэ отчхакирдяпэ чораханыбэн, пал со мэ англэды́р чхиндём на́бут тумэ́нгэ,4. тэды, ке́ли тумэ́ явэ́на тэ гинэн дава́, тумэ́ могинэ́нас тэ ґалён, со мэ джина́в Христосо́скирэ чораханыбэна,5. савэ́ на сыс англэды́р джиндлэ́ ни екхэ́ манушытконэ́ родо́скэ адя́кэ, сыр ёнэ какана́ исын отчхакирдэ Лэ́скирэ Свэнтонэ́ Апостолэнгэ и пророкэнгэ пир Свэ́нто Ду́хо (Фа́но),6. соб (кай) и Наюдэ́нгэ тэ явэ́н кхэтанэ́ Юдэнца дро Дэвлэ́скиро бахтякирибэ́н и, соб (кай) ёнэ тэ ячэн пашэ́нца екхэ масэ́ндыр, адя́кэ-паць и дыно́ лав отлыджалапэ лэ́нгэ, саво́ сыс дыно́ дро Исусо́стэ Христосо́стэ пир бахталы́ зан.7. И мэ яцём дына́ри (служы́телё) ваш дая́ бахталы́ зан пир Дэвлэ́скиро бахтякирибэ́н, саво́ сыс дыно́ ма́нгэ Лэ́скирэ зорья́са.8. Ма́нгэ, кон исын най тыкнэды́р сарэ́ дэвлытконэндыр, сыс дыно́ дава́ бахтякирибэ́н тэ роспхэнав Наюдэ́нгэ пал Христосо́скиро барвалыпэ́н, саво́ ние́кхвар на хасёла.9. И тэ роспхэнав сарэ́нгэ, пал дава́ чорахано кэрибэн, саво́ сыс чхакирдо векэндыр дрэ Дэвлэ́стэ, Саво́ саро́ кэрдя́ пир Исусо́стэ Христосо́стэ.10. Соб (кай) какана́ тэ явэ́л джиндлы пир Кхангири́ барыдырэ́нгэ и хула́нгэ дро Болыбна́скиро Раё бари Дэвлэ́скири годы́,11. адя́кэ, сыр Дэвэ́л задуминдя англэды́р свэто́скирэ создыибнастыр, саво́ Ёв создыя́ дрэ Исусо́стэ Христосо́стэ, амарэ́ Растэ-Дэвлэ́стэ,12. дро екхипэ́н Савэ́са амэ́ндэ исын муршыпэн и наде́я тэ явас пашылэды́р кэ Дэвэ́л пир патяибэ́н дрэ Лэ́стэ.13. Палдава́ мэ манга́ва тумэн, тэ на пэрэ́н илэ́са пал мирэ́ пхарипэна пал тумэ́ндэ, савэ́ исын ваш тумари́ сла́ва.14. Ваш дава́ мэ и сом тэрдо́ пэ чанга́ анги́л амарэ́ Ра́скирэ-Дэвлэ́скирэ, Исусо́скирэ Христосо́скирэ Дадэ́стэ,15. Савэ́стыр кажно ро́до дро Болыбна́скиро Раё и пэ пхув дорэсэ́ла пэ́скиро лав,16. мэк тэ дэл Дэвэ́л тумэ́нгэ пир Лэ́скирэ-славакиро барвалыпэ́н, тэ ячэн зоралэды́р Лэ́скирэ Духо́скирэ зорья́са дрэ андратунэ́ манушэ́стэ,17. соб (кай) тэ дживэ́л Христо́со пир патяибэ́н дрэ тумарэ́ илэ, и соб (кай) тумэ́ тэ явэ́н зоралэ́ дрэ паты́в екх кэ екх,18. и соб (кай) тумэ́ могиндлэ́ тэ уджинэ́н сарэ́ свэнтонэ́нца, со дасаво исын буґлыпэ́н и длэнгипэ́н, и хорипэ́н, и вучипэ́н,19. и тэ ґалён, со исын барэды́р сарэ́стыр пэ свэ́то Христососкири ла́ска ваш дова́, соб (кай) Дэвэ́л тэ явэ́л сарэ́ пэ́скирэ пхэрдыпнаса дро тумаро́ джиибэ́н.20. Нэ Одолэ́скэ, Конэ́скири зор исын дрэ амэ́ндэ, и сави́ могинэ́ла тэ кэрэ́л бутэды́р долэ́стыр, пал со амэ мангаса, ци амэ думинаса,21. тэ явэ́л Лэ́скэ сла́ва дрэ Кхангири́ и дрэ Исусо́стэ Христосо́стэ сарэ́ родэ́нгэ дрэ сарэ́ ве́ки. Ами́нь. Romani Bible Baltic 2019 Maintained by the United Bible Societies for the Baltic Romani Mission