Beblia

1. Лав, саво́ сыс ма́нгэ, Еремеёскэ, Ра́стыр-Дэвлэ́стыр, со пхэнэлас:

2. “Тэрдёв дрэ по́рта анги́л Ра́скирэ-Дэвлэ́скиро Кхэр (Кхангири́), и пхэн зоралэ́с анги́л манушэ́ндэ дава́ лав и пхэн: “Шунэ́н Ра́скирэ-Дэвлэ́скиро лав сарэ́ тумэ́, кон исын Юдэя́тыр, савэ́ заджа́на пирда́л дая́ по́рта тэ отдэ́н паты́в Ра́скэ-Дэвлэ́скэ.

3. Адя́кэ ракирэ́ла болыбна́скирэ-янголэ́нгиро Рай Дэвэ́л; Израилёскиро Дэвэ́л: “Парувэн тэ явэ́л чачунэдыр дова́, сыр тумэ́ дживэ́на, и со тумэ́ кэрэ́на, и Мэ кэра́ва адя́кэ, со тумэ́ явэ́на тэ дживэ́н пэ дава́ штэ́то.

4. На допатян зоралэ́с хоханэ́ лавэнгэ, со пхэнэ́на: ‘Дава́ исын Ра́скирэ-Дэвлэ́скири Кхангири́, Ра́скирэ-Дэвлэ́скири Кхангири́, Ра́скирэ-Дэвлэ́скири Кхангири́.’

5. Нэ ко́ли тумэ́ илэ́стыр парувэна тэ явэ́л чачунэдыр тумаро́ джиибэ́н и дова́, со тумэ́ кэрэ́на; ке́ли тумэ́ явэ́на чачипна́са тэ кэрэ́н пир чачипэ́н сэ́ндо машки́р екхэ манушэ́стэ и лэ́скирэ пашатунэстэ;

6. ко́ли тумэ́ на явэ́на тэ притасавэн чужонэ́ манушэ́с, пиротос (сиротас) и пивля (удова), и тумэ́ на явэ́на тэ прочхувэн набанго рат пэ дава́ штэ́то, и тумэ́ на явэ́на тэ псирэ́н тэ отдэ́н паты́в явирэ дэвлорэ́нгэ пэ тумари́ дош (би́да);

7. тэ́ньчи Мэ кэра́ва адя́кэ, со тумэ́ явэ́на тэ дживэ́н пэ дава́ штэ́то, пэ дая́ пхув, со Мэ дыём тумарэ́ дадэ́нгэ аж пэ сарэ́ ве́ки.

8. Акэ, тумэ́ зоралэ́с допатяна хоханэ́ лавэнгэ, савэ́ на дэ́на ко́фо.

9. Сыр да тумэ́ ишчо (инкэ́) чорэна, замарэна, кэрэ́на биладжаипэ́н, совлахана хоханэ́с, хачкирэна дро́га смо́лы Ваалоскэ, и тумэ́ псирэ́на тэ отдэ́н паты́в явирэ дэвлорэ́нгэ, конэ́с тумэ́ на джинэ́на,

10. и тэ́ньчи тумэ́ явэ́на и тэрдёна анги́л Ма́ндэ дро кхэр, савэ́скэ дынэ́ тумэ́ Миро лав, и тумэ́ пхэнэ́на: ‘Амэ сам зракхнэ́, соб (кай) и дурэды́р тумэ́ тэ кэрэ́н далэ́ джунгалэ́ рэ́нды?

11. Ци со, Миро кхэр, савэ́скэ тумэ́ дынэ́ Миро лав, яця́ виртаса (вертепоса) прахарьенгэ анги́л тумарэ́ якха́? Акэ, Мэ дыкхцём дава́”, – ракирэ́ла Рай Дэвэ́л.

12. Нэ тумэ́ акана́ джа́н пэ Миро штэ́то, со сыс дро Сило́мо, кай Мэ кэрдём адя́кэ, соб (кай) Миро лав англэды́р сарэ́стыр тэ ячэ́лпэ одо́й, и тумэ́ подыкхэн, со Мэ кэрдём одо́й пал фуипэ́н, Мирэ́-манушэ́нгиро Израилёстыр.

13. И акана́, пал-дова́ со тумэ́ кэрдэ́ сарэ́ далэ́ бутя́, – пхэндя́ Рай Дэвэ́л, – и мэк Мэ и ракирдём тумэ́нгэ, сыр Мэ уштавас тася́рлэс (ра́нэс) пэ зло́ко (фра́нсо) и Мэ пхэндём, нэ тумэ́ на шундлэ́ Ман, и Мэ кхардём тумэн, нэ тумэ́ на отпхэндлэ́ Ма́нгэ:

14. палдава́ Мэ кэра́ва далэ́ Мирэ́ кхэрэса, савэ́скэ тумэ́ зоралэ́с допатяна, и штэтоса, со Мэ дыём тумэ́нгэ и тумарэ́ дадэ́нгэ, дова́-паць, сыр Мэ кэрдём Силомоса.

15. И Мэ традава криг тумэн Мирэ́ якхэ́ндыр, сыр Мэ традыём криг сарэ́н тумарэ́ пшалэ́н, – саро́ Ефремоскиро (Ефраимоскирэ) явибнаскиро ро́до.

16. Палдава́ ту, Ереме́ё, на мангпэ пал адалэ́ манушэ́ндэ, и на пхэн патерья (молитвы), и на манг Ман пал лэ́ндэ, пал-дова́ со Мэ на ява́ва тэ шунав тут.

17. Ци на дыкхэ́са ту, со ёнэ кэрэ́на дрэ фо́рья пир Юдэ́я, и пэ Ерусалимо́скирэ вули́цы (га́сы)?

18. Бияты скэдэ́на кашта́, и дада́ росхачкирэна яга, и джувля́ мешынэна хумэр (тясто), соб (кай) тэ кэрэ́н параморэ болыбнытконэ кралицакэ, и тэ вычхувэн тхадунэ свэ́нта дыибэна́ явирэ дэвлорэ́нгэ, соб (кай) тэ холякирэн (дукхавэн) Ман тэ холясовав.

19. Ци дава́ ёнэ Ман дукхавэна тэ холясовав?”, – ракирэ́ла Рай Дэвэ́л. “Ци дава́ ёнэ на кокорэ́ пэс дукхавэнас пэ нашукарипэн пэ́скэ?

20. Палдава́ адя́кэ ракирэ́ла Рай Дэвэ́л, Дэвэ́л: “Акэ, Мири́ холы́ и Миро холякирибэ́н вычхувэнапэ пэ дава́ штэ́то – пэ манушэ́стэ, и пэ кхэритконэ́ мурдалэ́ндэ (ското); пэ фэлды́тка кашта́, и пэ пхаба́, со барьёна пэ пхув. Мири́ холы́ явэ́ла тэ хачол сы́рбы яг, и на мурдёла.

21. Адя́кэ ракирэ́ла болыбна́скирэ-янголэ́нгиро Рай Дэвэ́л, Израилёскиро Дэвэ́л: ‘Дочхувэн хачкирибнаскирэ яныбэна́ кэ тумарэ́ свэ́нта дыибэна́ и хан дава́ мас.

22. Мэ ж на пхэндём тумарэ́ дадэ́нгэ, и Мэ на припхэндём лэ́нгэ дро дова́ дывэ́с, ке́ли Мэ яндём лэн Египто́скирэ пхувья́тыр, нисо́ пал хачкирибнаскирэ яныбэна́ и свэ́нта дыибэна́.

23. Нэ, акэ, со Мэ припхэндём лэ́нгэ, пхэни́: “Шунэ́н мири́ зан и Мэ ява́ва тумаро́ Дэвэ́л, и тумэ́ явэ́на Мирэ́ мануша́. И дживэ́н адя́кэ, сыр Мэ припхэндём тумэ́нгэ, соб (кай) тэ явэ́л миштэ́с тумэ́нгэ.”

24. Нэ ёнэ на кандынэ́, и ёнэ на причхудэ кан тэ шунэ́н, нэ ёнэ дживдэ́ пир пэ́скири годы́, пир пэ́скирэ пхарэ́, бибахталэ́ илэ, и ёнэ рисинэ́ думэса, а на мо́са кэ Мэ.

25. Далэ́ дывэсэ́стыр сыр тумарэ́ дада́ выгинэ́ Египто́скирэ пхувья́тыр кэ ададывэ́с, Мэ бичхававас кэ тумэ́ сарэ́ Мирэ́ писхарье́н, Мирэ́ пророкэ́н, Мэ бичхававас лэн кажно дывэ́с тася́рлэс (ра́нэс) пэ ра́нко;

26. нэ ёнэ на кандынэ́ Ман, и ёнэ на причхудэ кан тэ шунэ́н, нэ ёнэ пхарьякирдэ пэ́скирэ мэня. Ёнэ кэрдэ́ фуеды́р пэ́скирэ дадэндыр.

27. И палдава́ ту, Ереме́ё, пхэнэ́са сарэ́ далэ́ лава́ лэ́нгэ, нэ ёнэ на явэ́на тэ кандэ́н тут. Ту явэ́са тэ кхарэс лэн, нэ ёнэ на отпхэнэна ту́кэ.

28. И ту пхэнэ́са лэ́нгэ: “Дая́ исын манушы́тко нацыя, сави́ на кандэ́ла пэ́скири Ра́скирэ-Дэвлэ́скири зан, и сави́ на сыклёла пхарэ́ сыклякирибнастыр: нанэ патяибэ́н лэ́ндэ, ёв сы́рбы лыно́ криг лэ́нгирэ мо́стыр.

29. Обчхин тырэ́ бала́, шукарни Ерусалимо́стыр, и чхурдэ криг лэн, и ров пэ вучэ́ штэ́ты, пал-дова́ со Рай Дэвэ́л на прилыя́ и мэкця́ ро́до, саво́ зоралэ́с холякирдя Лэс.

30. Пал-дова́ со мануша́ Юдэя́тыр кэрдэ́ биба́хт пэ Мирэ́ якха́’, – ракирэ́ла Рай Дэвэ́л, – ‘ёнэ чхудэ́ пэ́скирэ джунгалэ́ и́долы дро кхэр, со исын кхардо пир Миро лав, соб (кай) тэ магирэ́н лэс.

31. И ёнэ кэрдэ́ вучэ́ штэ́ты кэ Тофето, со исын пэ Хиномоскирэ-чхавэ́нгиро до́ло тэ хачкирэ́н Пэ́скирэ чхавэ́н и чхае́н дрэ яг – со Мэ припхэндём тэ на кэрэ́н, и со на явдя́ кэ Мэ пэ годы́.

32. ‘Палдава́, акэ, явэ́на дывэса́’, – ракирэ́ла Рай Дэвэ́л; – ‘ке́ли дава́ штэ́то на явэ́на тэ кхарэ́н “Тофитоскиро”, ци “Хиномоскирэ–чхавэ́нгиро до́ло”, нэ ёй ячэ́ла “Мэрибнаскиро до́ло”; – пал-дова́ со явэ́на тэ гаравэн дро Тофито кэ дова́ дывэ́с, сыр на явэ́ла буты́р штэ́то одо́й.

33. Кадалэ́-манушэ́нгирэ тру́пы явэ́на сыр хабэ́н болыбнытконэ чирикленгэ и мурдалэ́нгэ пэ пхув. И ние́кх на явэ́ла тэ страхакирэл лэн криг (на явэ́ла конэ́скэ тэ оттрадэл лэн).

34. И тэ́ньчи Мэ кэра́ва адя́кэ, со пириячэна тэ санпэ радыма́тыр, и на явэ́на радыпнытка (хотна), и на явэ́ла зан тэрнэскири и зан тэрнякири дрэ фо́рья кэ Юдэ́я и пэ ґасы (вули́цы) дро Ерусалимо. Пал-дова́ со дая́ пхув явэ́ла чхучакирды/ чхучи́ (пусто).’

1. “‘Дро долэ́ дывэса́’, – ракирэ́ла Рай Дэвэ́л’, – вэргитка халадэ́ вытырдэна [вычхурдэна-р.с.] кокалы́ маґилэндыр: Юдэя́кирэ-кральенгирэ кокалы́, тхагарьенгирэ кокалы́, раша́нгирэ кокалы́, пророкэ́нгирэ кокалы́, и явирэ-манушэ́нгирэ кокалы́ Ерусалимо́стыр.

2. Ёнэ росчхувэна [росчхурдэна-р.с.] лэн анги́л кхам, и анги́л чхон, и анги́л сарэ́ болыбна́скирэ халадыбэна (янголы), савэ́н ёнэ камлэ́, и савэ́нгэ ёнэ дынариндлэ́; пал савэ́ндэ ёнэ гинэ́, и савэ́ндыр ёнэ мангнэ́ тэ дэн годы́: савэ́н ёнэ родынэ и савэ́нгэ ёнэ отдынэ́ паты́в. Далэ́ кокалы́ на явэ́на тэ укэдэн, и на явэ́на тэ гаравэн, нэ ёнэ явэ́на сы́рбы ґнэё упра́л пэ пхув.

3. И сарэ́ мануша́, савэ́ ячэ́напэ джидэ́ далэ́ бибахталэ́-кхэритконэ́ родо́стыр выкэдэна пэ́скэ фэды́р тэ мэрэ́н, сыр тэ дживэ́н пэ сарэ́ долэ́ штэ́ты, пэ савэ́ Мэ традыём [вытрадава-р.с.] лэн,’ – ракирэ́ла болыбна́скирэ-янголэ́нгиро Рай Дэвэ́л.

4. “И ту, Ереме́ё, пхэн адя́кэ лэ́нгэ: ‘Адя́кэ ракирэ́ла Рай Дэвэ́л: ‘Ци мануша́ пэрэ́на и буты́р на уштэна, Ци кон рисёла дрэ риг дромэ́стыр, на рисёла палэ?

5. Со́скэ кадалэ́ Мирэ́ мануша́ Ерусалимо́стыр пэрэ́на буты́р [отджана-р.с.] и зоралэды́р чачипнастыр? Ёнэ рикирэнапэ зоралэ́с кэ хохаибэ́н, ёнэ на камэ́на тэ рисён.

6. Мэ пришундёмпэ и на шундём, со ёнэ ракирэ́на чачипэ́н. Нико́н лэ́ндыр на приґалыя пэ́скиро фуипэ́н, соб (кай) тэ пхэнэ́л: ‘Со ж да мэ кэрдём?’ Кажно лэ́ндыр рисёла чачипнастыр пэ́скирэ дромэ́са сы́рбы грай, саво́ чхурдэлапэ пэ марибэ́н.

7. И аж бутяно (бусько) пэ болыбэ́н джинэ́ла пэ́скиро упхэндло́ часо, и цуглица, и бахирка (ласточка), и жураво дыкхэ́ла дуе якхэ́нца пал часо, сыр лэ́нгэ тэ явэ́н [тэ приурнян-р.с.]. Нэ Мирэ́ мануша́ на джинэ́на Ра́скирэ-Дэвлэ́скиро чачипэ́н.

8. Сыр тумэ́ сашты́ тэ пхэнэ́н: “Амэ сам барэ́-годякирэ (годымарья), и Ра́скирэ-Дэвлэ́скиро Зако́но исын амэ́нца? Дыкхэ́н: хоханэ́-сыклякирибнаскири кхия (трость) тэ чхинэл дро Зако́но кэрдя́ адя́кэ, со Зако́но яця́ хохано́.

9. Кадалэ́ барэ́-годякирэ мануша́ исын ладжакирдэ́, лэ́нгиро ду́хо (фа́но) исын пхагирдо́ и ёнэ дынэпэ дукха́. Акэ, ёнэ отпхэндэпэ Ра́скирэ-Дэвлэ́скирэ лавэ́стыр; и саво́ ж годыпэ́н исын лэ́ндэ?

10. Палдава́ Мэ да́ва лэ́нгирэ ромне́н явирэ́нгэ, и лэ́нгирэ фэ́лды кодолэ́ манушэ́нгэ, савэ́ явэ́на хулая́ пэ лэ́ндэ. Пал-дова́ со кажно лэ́ндыр тыкнэстыр кэ са́мо барэды́р исын присыклыно и ґа́лко кэ барвалыпэ́н: пророкостыр кэ раша́й – кажно лэ́ндыр кэрэ́ла начачунэс.

11. И ёнэ састякирдэ абысыр дыкхады (фра́нсо/рана), сави́ кэрдя́пэ Мирэ́-манушэ́нгирэ чхатэ, пхэни́: ‘Рама́нё, рама́нё (миро)’! Ке́ли нанэ рама́нё.

12. Ци ладжандынэ ёнэ, сыр ёнэ кэрдэ́ джунгалэ́ дэвлорэ́? Над! Ёнэ на ладжандынэ сарэ́са, и ёнэ на джиндлэ́ тэ лолён. Палдава́ ёнэ пэрэ́на машки́р одолэ́ндэ, савэ́ пынэ́, дро лэ́нгирэ-сэндоскиро часо (цы́ро) ёнэ обштавэна,’ – раки́рла Рай Дэвэ́л.

13. ‘Мэ, чачэс, откэдава саро́ лэ́ндыр’ – раки́рла Рай Дэвэ́л. ‘На явэ́на му́ри пэ винаграды́тко кашт, и на явэ́на фиги пэ финикитко кашт; и патри́н пэ дрэ́во (кашт) зашутёла; и саро́, со Мэ дыём лэ́нгэ, на явэ́ла буты́р лэ́ндэ.

14. Со́скэ амэ сам бэштэ́ штыл? Кэдэнпэ тумэ́, и явэ́н, джа́са дрэ фо́рья зоралэ́ тыноса, и амэ мэраса одо́й. Пал-дова́ со Рай Дэвэ́л кэрдя́, соб (кай) амэ тэ хасёвас, и Ёв дыя́ амэ́нгэ жэлучо пане́са тэ пьяс, долэ́скэ, со амэ кэрдя́м грэ́хи анги́л Растэ-Дэвлэ́стэ.

15. Амэ ужакирдям рама́нё, нэ нисаво́ лачхипэ́н на явдя́ далэ́стыр; амэ ужакирдям тэ састёвас, нэ дыкхэ́н: исыс екх трашаибэ́н!

16. Дано́скирэ форье́ндыр сыс шундло, сыр дэ́на пырски (храпинэна) вэргэ́нгирэ граё: сари́ пхув издрала лэ́нгирэ-грэнгирэ зорья́тыр, сыр ёнэ ґрымитынэна; и ёнэ явэ́на и похана (знишчынэна) сари́ пхув, и саро́, со исын пэ ла́тэ, и фо́ро, и сарэ́н, савэ́ исын джидэ́ дро дова́ фо́ро.

17. ‘Палдава́, дыкхэ́н: Мэ бичхава́ва машки́р пэ тумэ́ндэ сапэн, саплынен, савэ́н нашты́ тэ зарикирэн, и ёнэ явэ́на тэ дандырэн тумэн’, – ракирэ́ла Рай Дэвэ́л.

18. Мэ, Ереме́ё, подрикирава миро ду́хо (фа́но), ке́ли мэ тугинава, миро ило́ нашавэла зор андрэ́ ма́ндэ.

19. Шунэ́н! Акэ, шундлы исын мирэ́ манушэ́нгирэ-чхакири зан, сыр ёй дэ́ла го́дла древа́н дуратунэ́ тхэмэстыр?: ‘Ци исын дава́ Рай Дэвэ́л пэ Сио́но? Ци исын дава́ Сионоскиро кра́ли одо́й?’ Рай Дэвэ́л, лэ́нгиро Кра́ли, отпхэнэ́ла: ‘Со́скэ ёнэ дукхавэнас Ман, соб (кай) Мэ тэ холясовав пэ лэ́ндэ пал лэ́нгирэ вычхиндлэ́ и́долы, савэ́ исын чу́жа и (ничы́ намол) хартытка?’

20. Укэдыибэн марэскиро сыс, лынай кончындяпэ (прогия́), и амэ на зракхцямпэ!’” – годлэна мануша́.

21. ‘Миро ило́ хасия́ (замыя́) пал-дова́, со мирэ́ мануша́ хасинэ́, мэ, Ереме́ё, зоралэ́с тугинава: бари дар (ди́во трашаса) ухтылдэ́ Ман.

22. Ци исын дава́ бальзамо дро Галаа́до? Ци нанэ да састыпнари одо́й? Со́скэ на састякирдэ чха мирья, мирэ́ манушэнгирья?

1. Парикирэ́н Ра́скэ-Дэвлэ́скэ, пал-дова́ со ёв исын лачхо́! Пал-дова́ со Лэ́скири ла́ска явэ́ла пэ сарэ́ ве́ки.

2. Мэк Израилёскиро кхэр тэ пхэнэ́л акана́: “Лэ́скири ла́ска ячэ́лапэ пэ сарэ́ ве́ки.”

3. Мэк Ароноскиро кхэр тэ пхэнэ́л какана́, со Лэ́скири лачхэ́-илы́ткима ячэ́лапэ пэ сарэ́ ве́ки.

4. Мэк одолэ́, савэ́ дарэ́на Ра́стыр-Дэвлэ́стыр тэ пхэнэ́н какана́, со Лэ́скири лачхэ́-илы́ткима ячэ́лапэ пэ сарэ́ ве́ки.

5. Тэ сыкавэс банг манушэ́скэ анги́л якха́ исын фэды́р, сыр тэ сыкавэс паты́в чораханэ́с.

6. Даба́ (пэкаибэна) патяибнытконэ малэстыр (другостыр) исын фэды́р вэргоскирэ чамудыпнастыр.

1. Мэ кама́м, соб (кай) тумэ́ тэ джинэ́н, сыр мэ маравпэ пал тумэ́ндэ и пал одолэ́ндэ, савэ́ дживэ́на кэ Лаодикия и пал сарэ́ндэ, савэ́ на дыкхнэ́ ман, саво́ мэ сом,

2. соб (кай) лэ́нгирэ илэ тэ явэ́н подрикирдэ, соб (кай) ёнэ тэ явэ́н кхэтанэ́ дрэ паты́в кэ яви́р мануша́ ваш кажно барвалыпэ́н, тэ уджинэ́н пхэрдэ́с Дэвлэ́скиро гарадо́ чачипэ́н пал Христосо́стэ,

3. дрэ Савэ́стэ исын гарадо́ саро́ кучипэ́н пир годьварипэн и пир джиныбэ́н.

4. И мэ пхэна́ва дава́ ваш дова́, соб (кай) нико́н тэ на хохавэ́л тумэн пэ́скирэ хоханэ́ лавэ́нца.

5. Мэк мэ на сом тумэ́нца какана́, нэ мэ сом тумэ́нца мирэ́ духо́са.

6. Палдава́, сыр тумэ́ уджиндлэ́ Исусо́с Христосо́с сыр Рас-Дэвлэ́с, адя́кэ тумэ́ и дживэ́н дро екхипэ́н Лэ́са,

7. Явэ́н би кунипнаскирэ (тварда) дрэ Лэ́стэ и барьён пир патяибэ́н дрэ Лэ́стэ, сыр тумэн сыклякирдэ́, ячэ́нпэ дрэ патяибэ́н парикирибнаса.

8. Дыкхэ́н кучэс, соб (кай) ние́кх тэ на злыджал тумэн патяибнастыр философияса и хохаибнаса, савэ́ придуминдлэ мануша́, и савэ́ счхудэ пэ свэто́скирэ ду́мы, а на пэ Христосо́скиро сыклякирибэ́н.

9. Пал-дова́ со дрэ Лэ́стэ дживэ́ла Дэвлы́тко пхэрдыпэн дрэ манушы́тка маса́ пир ду́хо (фа́но),

10. и тумэ́ндэ исын пхэрдо́ джиибэ́н дро екхипэ́н Лэ́са, Саво́ исын Шэрало́ пэ сарэ́ барэ́ рандэ и свэтоскиро зоралыпэ́н,

11. дро екхипэ́н Лэ́са тумэ́ са́нас обчхиндлэ́ на манушытконэ́ вастэ́нца, ке́ли лэнапэ криг грэхоскирэ лочакирэ маса́ обчхиныбнаса, а Христосо́скирэ-духо́скирэ обчхиныбнаса;

12. ке́ли тумэ́ болдэпэ, то тумэ́ сы́рбы мынэ́ кхэтанэ́ Лэ́са, дрэ Лэ́стэ тумэ́ и отджидынэ пир патяибэ́н дрэ Дэвлэ́скири зор, Саво́ отджидякирдя́ Христосо́с мулэ́ндыр.

13. И тумэн, савэ́ сыс мулэ́ дрэ тумарэ́ грэ́хи и дрэ тумарэ́-лочакиро обчхиныбэн, Дэвэ́л отджидякирдя́ кхэтанэ́ Лэ́са и отмэкця́ амарэ́ сарэ́ грэ́хи;

14. Ёв отпарудя сыкляибнаса сарэ́ припхэныбэна́ Законо́стыр, со сыс чхиндлэ́ вастэ́са, савэ́ сыс проти амэ́ндэ, и Ёв укэдыя дава́ саро́, и примардя лэс кэ трушу́л;

15. Христо́со откэдыя зор барэ́ рандыр и свэто́скирэ зоралыпнастыр и отдыя́ лэн пэ манушы́тко ладж, и трушулэскирэ зорья́са лыя́ зор пэ лэ́ндэ.

16. Мэк нико́н тэ на сэндинэл тумэн пал хабэ́н ци пал пибэ́н, ци пал вари-саво́ свэ́нко, ци са́вато (субо́та),

17. Саро́ дава́ исын сы́рбы зэр (тенё) долэ́стыр, со явэ́ла анги́л, нэ чачипэ́н исын дрэ Христосо́скирэ Маса́.

18. Мэк ние́кх тэ на злыджал тумэн пэ́скирэ хоханэ́ кандыпнаса и мангипнаса Янголэнгэ, и саво́ патя́ла дро дова́, со ёв на дыкхця́, – дасавэ́ мануша́ пхутёна ивья́ (дармэс) пэ́скирэ манушытконэ́ годьварипнаса,

19. и ёнэ на рикирэнапэ пал Христосо́стэ, Саво́ исын Шэро́ сарэ́нгэ, Саво́ рикирлапэ и чалякирэлапэ Пэ́скирэ джидэ́ спхандыпнаса и пашэнца, и, Саво́ барьёла адя́кэ, сыр трэй Дэвлэ́скэ.

20. Ко́ли тумэ́ мынэ́ кхэтанэ́ Христосо́са ваш далэ́ свэто́скирэ-джиибнытка присыкляибэна, тэды со́скэ тумэ́ усае́кх адя́кэ-паць спхандэна пэс манушытконэ́ припхэныбнэнца?

21. “На кэр, на ха, на лэ”,

22. саро́ дава́ кокоро́ пэ́стыр хасякирэ́ла зор: пал-дова́ со саро́ дава́ исын пир манушы́тко припхэныбэ́н и сыклякирибэ́н,

23. Дава́ лэ́ндэ исын екх дыцьло годьварипэн дро манушэ́нгиро выдуминдло дынарибэ́н, дро хохано́ кандыпэн и пэ́скирэ-масэнгирэ мэ́ньки, нэ ёнэ исын ничы́ на мол тэ обрикирэн лэ́нгирэ-лочакиро выкэдыибэн.

Romani Bible Baltic 2019

United Bible Societies for the Baltic Romani Mission