Bible in one year - Пэ Балтитко Романи чиб

Bible in one year October 12

1. О, тэ явэ́л Миро шэро́ пхэрдо́ панингэнца, соб (кай) тэ явэ́н Мирэ́ якха́ сы́рбы ясвэнгири ґаны́нг, соб (кай) Мэ могинавас тэ ровав дывэ́с и рат пал Мирэ́-манушэ́нгиро-чхакиро хасибэ́н.

2. О, тэ явэ́л Ма́нгэ штэ́то пэ чхучи́ пхув сыр дромэскирэскэ (путникоскэ), соб (кай) Мэ могинавас тэ мэкав Мирэ́ манушэ́н, и тэ джав пэ́скэ лэ́ндыр. Ёнэ сарэ́ исын биладжаипнарья, биладжаипэ́н-кэрибнаскирэ (прелюбодеи), ёнэ исын скэдынэ́ ваш здыибнаскирэ манушэ́нгэ.

3. И ёнэ бандякирэна пэ́скирэ чиба́ тэ хохавэн сы́рбы лу́ко, нэ ёнэ на бидарипнаскирэ ваш патяибэ́н пэ пхув: пал-дова́ со ёнэ пириджана екхэ бибахтятыр (холя́тыр) кэ яви́р, нэ ёнэ на джинэ́на Ман, – ракирэ́ла Рай Дэвэ́л.

4. Кажно (сва́ко) тэ рикирэ́лапэ ригаса пэ́скирэ малэстыр, и на допатя зоралэ́с дрэ пэ́скирэ пшалэ́стэ, пал-дова́ со кажно пшал заджа́ла фротымаса пэ дром явирэскэ, и кажно мал исын каля-кэрибнаскиро (плёткари).

5. Кажно лэ́ндыр хохавэла пэ́скирэ пашатунэс, и на ракирэ́ла патяибэ́н: ёнэ высыклякирдэ пэ́скирэ чиба́ тэ ракирэ́н хохаибэ́н, и ёнэ кхинякирэна пэс, кэри чорипэ́н.

6. Одо́й, кай ёнэ дживэ́на, машкира́л исын хохаибэ́н, ёнэ отпхэнэнапэ тэ джинэ́н Ман пир пэ́скиро хохаибэ́н’, – ракирэ́ла Рай Дэвэ́л.

7. ‘Палдава́ ракирэ́ла болыбна́скирэ-янголэ́нгиро Рай Дэвэ́л: ‘Акэ, Мэ билякирава лэн и Мэ спробинава лэн; пал-дова́ со ишчо (инкэ́) Ма́нгэ тэ кэра́в мирэ́-манушэ́нгирэ чхаса?

8. Лэ́нгири чиб исын мулякирибнаскири буст (стре́ла), ёй ракирэ́ла хохаибэ́н. О ману́ш ракирэ́ла кучэс (раманёса) кэ пэ́скиро пашатуно пэ́скирэ чиба́са, нэ ёв андра́л пэ́стэ сы́рбы подракхэла тэ замарэ́л лэс.

9. Ци Мэ на сэндякирава пхарэ́с лэн пал саро́ дава́, – ракирэ́ла Рай Дэвэ́л. ‘Ци Мэ на отда́ва палэ холынаса дасавэ́ нацыякэ сыр дая́?’

10. Мэ, Ереме́ё, ґазда́ва роибэ́н пал бэ́рги, и мэ обровавапэ пал чараибнытка фэ́лды пэ чхучэ́ маля (степи), и мэ ява́ва тэ ракира́в ясвэ́нца пал-дова́, со чхучэ́ маля хачинэ адя́кэ, со нико́н на дэ́ла ра́да тэ джал пирда́л лэ́ндэ. Зан кхэритконэ́-жывёлэнгири (мурдалэнгири) исын на шундлы. Сыр болыбны́тка чирикля́, адя́кэ-паць и кхэри́тка мурдала́ (ското) хасинэ́, ёнэ гинэ́ криг.

11. Мэ кэра́ва Ерусалимо́стыр руи́ны, штэ́то, дро саво́ дживэ́на шакалы. Мэ кэра́ва Юдэя́кирэ форье́ндыр чхучо́ штэ́то, со нико́н на дживэ́ла.

12. Кон исын годо́ ману́ш, соб (кай) ёв тэ дэл ра́да тэ ґалёл саро́ дава́? И конэ́скэ Ра́скирэ-Дэвлэ́скирэ ушта́ пхэндлэ́, соб (кай) ёв могинэлас тэ пхэнэ́л статэчнэс сарэ́нгэ? Со́скэ дая́ пхув хасия́, схачия сы́рбы шуки́ чхучи́ пхув мал адя́кэ, со нико́н на джа́ла пир ла́тэ?’

13. И отпхэндя́ Рай Дэвэ́л: “Пал-дова́, сыр ёнэ мэкнэ́ Миро Зако́но, саво́ Мэ дыём лэ́нгэ, и сыр ёнэ на шундлэ́ Мири́ зан, и ёнэ на кэрдэ́ пир Миро Зако́но,

14. а ёнэ кэрдэ́ пир пэ́скирэ пхарэ́ илэ, и отдэнас паты́в Ваалоскэ, сыр лэ́нгирэ дада́ сыклякирдэ́ лэн;”

15. палдава́ адя́кэ ракирэ́ла болыбна́скирэ-янголэ́нгиро Рай Дэвэ́л, Израилёскиро Дэвэ́л: “Акэ, Мэ чалякирава кадалэ́ манушэ́н палыноса и Мэ панякирава лэн пане́са жэлучоса.”

16. И Мэ росчхувава лэн тэ дживэ́н машки́р Наюдэ́ндэ, конэ́с на джиндлэ́ ни ёнэ, ни лэ́нгирэ дада́. И Мэ бичхава́ва курта́ла пал лэ́ндэ, анги́л дова́, сыр Мэ сарэ́са хасякира́ва лэн.’

17. Адя́кэ ракирэ́ла болыбна́скирэ-янголэ́нгиро Рай Дэвэ́л: “Обдуминэн и кхарэ́н джувле́н, савэ́ тугинэна роибнаса, соб (кай) ёнэ могинэн тэ явэ́н; и бичхавэн пал джиндлэ́ джувлендэ, соб (кай) ёнэ могинэ́нас тэ явэ́н.

18. Мэк тэ явэ́н ёнэ сыгэды́р, и мэ тэ ґаздэ́н ёнэ роибэ́н пал амэ́ндэ адя́кэ, соб (кай) тэ прастан (тэ чхувэнпэ) ясва амарэ́ якхэ́ндыр, и соб (кай) амарэ́ цымблэндыр тэ тхадэн (чхувэнпэ) паня́.

19. Пал-дова́ исын шундлы зан, сыр тугинэла зоралэ́с джувлы́ Сионо́стыр: “Сыр амэн обчордэ! Сыр амэ сам ладжакирдэ́, пал-дова́ со амэ мэкцям пхув пир-дова́, со амэн традынэ криг амарэ́ кхэрэндыр!

20. Джувлялэ! Шунэ́н Ра́скирэ-Дэвлэ́скиро лав, и мэк тумарэ́ кана́ тэ прилэ́н Лэ́скиро лав; сыклякирэ́н тумарэ́ чхае́н тэ тугинэн роибнаса, и тэ бага́н роибнытка гиля́ екх екхэ́скэ.

21. Пал-дова́ со мэрибэ́н джа́ла пирда́л амарэ́ фэншры и джа́ла дрэ амарэ́ фэлатиня́ тэ мулякирэ́л амарэ́ чхаворэ́н пэ ґасы (вули́цы), и тэрнэ́ манушэ́н пэ форуны́ (пло́шча) дро фо́ро.

22. Пхэн, Ереме́ё: ‘Адя́кэ ракирэ́ла Рай Дэвэ́л: “Манушэ́нгирэ тру́пы явэ́на тэ равэнпэ (тэ пасён) сыр ґнэё пэ откэрды фэ́лда, и сыр ґарбы пала́л пал гивачхиныбнаскирэстэ, и на явэ́ла буты́р нико́н тэ скэдэл лэн.”

23. Адя́кэ, ракирэ́ла Рай Дэвэ́л: “Мэк годо́ ману́ш тэ на барьякирэл пэс пэ́скирэ годыпнаса (годя́са), мэк зорало́ ману́ш тэ на барьякирэл пэс пэ́скирэ (шарэлпэ) зорья́са; и мэк барвало́ ману́ш тэ на барьякирэл пэс (тэ на шарэлпэ) пэ́скирэ барвалыпнаса:

24. нэ мэк ёв, кон барьякирэ́ла пэс, тэ шарэлпэ (тэ барьякирэл пэс) далэ́са, со ёв ґалёла и, со ёв джинэ́ла Ман; пал-дова́ со дава́ Мэ сом, Рай Дэвэ́л, Кон сыкавэ́ла дро́го ла́ска, чачуно́ сэ́ндо и чачипэ́н пэ пхув. Пал-дова́ со Мэ зоралэ́с радынавпэ сарэ́стыр далэ́стыр”, – ракирэ́ла Рай Дэвэ́л.

25. “Акэ, сыг явэ́на дывэса́”, – ракирэ́ла Рай Дэвэ́л, – ке́ли Мэ пхарэ́с сэндякирава кодолэ́н, савэ́ исын обчхиндлэ́ и савэ́ исын наобчхиндлэ:

26. дро Еги́пто, и дрэ Юдэ́я и дро Едомо чхаворэ́н Амоностыр и Моавостыр, савэ́ндэ яго́ры (краи́) пэ балэнгирэ пе́йсы исын обчхиндлэ́ и савэ́ дживэ́на пэ чхучи́ пхув. Пал-дова́ со сарэ́ далэ́ Наюды́тка на́цыи исын наобчхиндлэ и, саро́ Израилёскирэ-кхэрэ́скирэ-манушэ́нгиро ило́ исын на обчхиндло.”

Jeremiah 10:1-25

1. Шунэ́н лав, саво́ Рай Дэвэ́л ракирэ́ла ту́кэ, Израилёскиро кхэр.

2. Адя́кэ ракирэ́ла Рай Дэвэ́л: “На сыклён дромэнгэ, савэ́нца Наюды́тка на́цыи псирэ́на, и на замэрэн дара́тыр дыкхи́ пэ болыбны́тка ґертыка́ (знаме́нии), со́стыр замэрэна Наюды́тка на́цыи.

3. Пал-дова́ со далэ́ манушы́тка стату́ты нисо́ нанэ мол. Акэ, екх ману́ш вычингирэла кашт дро вэш, скаминдарискирэ васта́ обкэрэна лэс товэрэса.

4. Ёнэ гожакирэна лэс сувнака́са и рупэ́са, ёнэ прикэрэна лэс гвоздэнца (карфинэнца) и чоканэнца (млоткэнца), соб (кай) ёв тэ на роспхадёл пэ котэра́.

5. Далэ́ и́долы исын сы́рбы вычхиндло сты́лбо пэ фэ́лда, ёнэ на ракирэ́на, лэн лыджа́на, пал-дова́ со ёнэ на псирэ́на. На дар лэ́ндыр, пал-дова́ со ёнэ на могинэ́на тэ кэрэ́н вари-сави́ биба́хт (чорипэ́н), адя́кэ-паць ёнэ на кэрэ́на ни саво́ лачхипэ́н.”

6. Нанэ ние́кх, кон исын кадасаво́, саво́ Ту сан, Раё Дэ́вла! Ту сан баро́ и Тыро́ лав исын баро́ пир Тыро́ зоралыпэ́н.

7. Ци исын вари-кон, саво́ на дарэ́ла Ту́тыр, манушэ́нгирэ Крали́стыр? Пал-дова́ со чачипэ́н исын дро дова́, соб (кай) тэ дарэ́н Ту́тыр; пал-дова́ со машки́р сарэ́ годэ́ манушэ́ндэ дрэ манушы́тка на́цыи, и сарэ́ лэ́нгирэ кралипэна́ нанэ ние́кх, саво́ тэ явэ́л кадасаво́, сыр Ту сан, Раё Дэ́вла!

8. Ёнэ исын со кэ екх бигодякирэ и дылынинька, лэ́нгиро сыклякирибэ́н исын чхучо́, соб (кай) тэ дэн паты́в каштэнгэ.

9. Руп, савэ́стыр исын чикадэ чарэ́, яндлэ́ Таршыностыр, сувнака́й Уфазостыр, сарэ́ ёнэ исын бутя́ мастероскирэ пир сувнака́й: голубово и пурпурно урибэ́н исын пэ кадалэ́ и́долы: ёнэ исын джиндлэ́-манушэ́нгирэ бутя́.

10. Нэ Рай Дэвэ́л исын чачуно́ Дэвэ́л: Ёв исын джидо́ Дэвэ́л и Кра́ли пэ сарэ́ ве́ки. Лэ́скирэ холя́тыр издрала пхув и манушы́тка на́цыи на дэ́на ра́да тэ вырикирэн, сыр Ёв холясо́ла зоралэ́с.

11. Тумэ́, мануша́лэ, пхэнэ́н лэ́нгэ: “Дэвлорэ́, со тумэ́ндэ исын, на кэрдэ́ болыбэ́н и пхув, ёнэ хасёна пхувья́тыр и тэл болыбна́стыр.”

12. Ёв создыя́ пхув Пэ́скирэ зорья́са, и Ёв чхудя́ свэ́то Пэ́скирэ годыпнаса, и Ёв роздиньдькирдя (ростырдыя) болыбэ́н Пэ́скирэ годя́са.

13. Ке́ли Ёв пхэнэ́ла Пэ́скирэ заня́са, тэды пэ болыбэ́н шуминэна паня́: и Ёв кэрэ́ла адя́кэ, со о́блоки пане́са ґаздэ́напэ ягорэндыр пэ пхув; ёв кэрэ́ла блискави́цы машки́р брышы́нд, и ёв лыджа́ла анги́л балва́л Лэ́скирэ кучонэ́-пиральендыр.

14. Кажно ману́ш ячэ́ла буро [дылыно́-р.с.] биджиныбнаскиро, кажно сувнакэнгиро мастеро явэ́ла ладжакирдо́ вычхудэ́ идолостыр, пал-дова́ со дава́ биладо идоло исын хохано́, и нанэ ду́хо (фа́но) дрэ лэ́стэ.

15. Саро́ дава́ исын чхучипэн (пустота), буты́ пэ сабэн, ёнэ хасёна, ке́ли Рай Дэвэ́л явэ́ла тэ сэндякирэ́л.

16. Яковоскири до́ля нанэ кадасави сыр лэ́нгири, пал-дова́, со Ёв, Кон создыя́ саро́, и Кон выкэдыя́ Израилё сыр Лэ́скиро миштыпэ́н, исын болыбна́скирэ-янголэ́нгиро Рай Дэвэ́л и дава́ исын Лэ́скиро лав.

17. Кэдэн криг пэ́скирэ клунки пхувья́тыр, конэ́с вэ́рги обкрэнжындлэ (заухтылдэ) дро Ерусалимо.

18. Адя́кэ ракирэ́ла Рай Дэвэ́л: “Акэ, Мэ чхурдава манушэ́н дро дава́ уляго (пора), савэ́ дживэ́на пэ дая́ пхув, и лэ́нгэ явэ́ла бари траш (дар), соб (кай) тэ ухтылэ́н (латхэ́н) лэн.

19. Бида ма́нгэ, пал-дова́ со биба́хт дукхавэла ман, миро (фра́нсо/рана) исын дукхано. Нэ мэ, Ереме́ё, пхэндём пэ́скэ: “Куч, миро ило́ пхарьёла, и мэ вырикирава дава́.

20. Мири́ ша́тра исын зарады, и сарэ́ мирэ́ шэлэ исын роскушнэ. Мирэ́ чхаворэ́ гинэ́ дур ма́ндыр, и ёнэ ада́й буты́р нанэ. Нанэ ние́кх, соб (кай) нэвэ́стыр тэ роздиньдькирэл (росчхувэл) мири́ ша́тра, и тэ прикэрэл пологи.

21. Пал-дова́ со чхупна́рья [пастыри-р.с.] ячнэ́ пхарэ́-илытка, и ёнэ на родынэ Рас-Дэвлэ́с, палдава́ ёнэ на кэрдэ́ годэс, и саро́ лэ́нгиро ґурто исын росчхурдыно.

22. Шунэ́н зан, сави́ дыя́ звесь: “Акэ, джа́ла баро́ ґлумо годлэнца паш-ратитконэ́ (севернонэ) рига́тыр, соб (кай) тэ чхучакирэл фо́рья дрэ Юдэ́я, и тэ кэрэ́л адя́кэ, соб (кай) одо́й шакалы тэ дживэ́н.

23. Мэ джино́м, Раё Дэвлалэ, со ману́ш на дэ́ла ра́да тэ хулаинэ́л пэ́скирэ судьбаса (джиибнаса), и нанэ кадасаво́ ману́ш, саво́ псирэ́ла и саво́ рикирэ́ла зор пэ дова́, карик ґэра́ лыджа́на лэс.

24. Раё Дэ́вла, пирисыклякир ман кэ дукха́ пир чачипэ́н, нэ на пир Пэ́скиро холякирибэ́н, соб (кай) тэ на явэ́л саро́ ма́нгэ.

25. Вычхув Пэ́скиро холякирибэ́н пэ Наюдытконэ́ манушэ́ндэ, савэ́ на джинэ́на Тут, и пэ ро́ды, савэ́ на прикхарэна Тыро́ лав; пал-дова́ со ёнэ хасякирдэ́ Яково́с, ёнэ дукхадэ лэс, и ёнэ домардэ́ лэс. Ёнэ кэрдэ́ лэ́скирэ кхэрэ́стыр чхучо́ штэ́то.

Psalms 118:5-9

5. Мэ кхардём Рас-Дэвлэ́с барэ́ дара́тыр (дарьятыр), Ёв отпхэндя́ ма́нгэ и вылыджия́ пэ баро́ штэ́то.

6. Рай Дэвэ́л исын пал ма́ндэ, Мэ на ява́ва тэ дарав, со ману́ш могинэ́ла тэ кэрэ́л ма́нгэ.

7. Рай Дэвэ́л исын пал ма́ндэ машки́р одолэ́ндэ, савэ́ дэ́на васт ма́нгэ: мэ дыкха́ва, сыр пэрэ́на одолэ́, савэ́ бидыкхэна.

8. Дава́ исын фэды́р тэ ґарадёс тэ зракхэспэ пал Растэ-Дэвлэ́стэ, сыр тэ ґарадёс тэ зракхэспэ пал манушэ́стэ.

9. Дава́ исын фэды́р тэ ґарадёс тэ зракхэспэ кэ Рай Дэвэ́л, сыр тэ рисёс тэ зракхэспэ кэ тхага́рья.

Proverbs 27:7-7

7. Чало ди на дыкхэ́ла и пэ авги́н, нэ бокхалэ́ дескэ кажно кирко котэ́р исын гудло́.

Kološanenge 3:1-25

1. И адя́кэ, ко́ли тумэ́ отджидынэ мулэ́ндыр Христосо́са, тэды причхувэ́н зор тэ дживэ́н пир чачипэ́н, саво́ исын дро Болыбна́скиро Раё, кай Христо́со исын бэшто́ пир чачо́ (право) васт Дэвлэ́стыр Дадэ́стыр.

2. Думинэн (дэн годы́ пэ́скэ) пал дова́, со исын дро Болыбна́скиро Раё, нэ на пал дова́, со исын пэ пхув.

3. Пал-дова́ со тумэ́ мынэ́ ваш дава́ свэтоскиро джиибэ́н и какана́ тумаро́ джиибэ́н исын гарадо́ Христосо́са дрэ Дэвлэ́стэ.

4. Ке́ли явэ́ла Христо́со, дрэ Савэ́стэ исын тумаро́ джиибэ́н, тэды и тумэ́ явэ́на кхэтанэ́ Лэ́са дрэ сла́ва.

5. Мулякирэ́н тумарэ́ налачхэ́ пхувитка рэ́нды: джиибэ́н дро блэ́ндо, магирипэ́н, тырдыпэ́н кэ грэ́хо, налачхэ́ мысли и зэвлыныпэ́н, саро́ дава́ исын дынарибэ́н идолэ́нгэ.

6. Палдава́ и явэ́ла Дэвлэ́скири холы́ пэ одолэ́ манушэ́ндэ, савэ́ Лэс на кандэ́на.

7. Вари-ке́ли и тумэ́ адя́кэ-паць кэрдэ́, ке́ли тумэ́ дживдэ́ дрэ кадалэ́ грэ́хи.

8. Нэ какана́ тумэ́ мэкэ́н саро́: холякирибэ́н, мижэхипэн (ярось), обракирибэн, ладжаипнытка лава́ тэ на пхэнэ́н тумарэ́ ушта́.

9. На хохавэн екх екхэ́скэ, пал-дова́ со тумэ́ отпхэндлэпэ пхуранэ́ пэ́скирэ джиибнастыр сарэ́ лэ́скирэ рэндэ́нца.

10. Тумэ́ пирикэрдэ пэ́скиро пхурано́ джиибэ́н пэ нэво́, саво́ ячэ́лапэ нэво́ пир джиныбэ́н пал Кодолэстэ, Саво́ создыя́ лэс пир Пэ́скири патри́н (о́бразо);

11. палдава́ нанэ буты́р ни Елинос (Баламэс), ни Юдос, ни обчхиныбэн, ни наобчхиныбэн, ни бэдонэ-нацыякирэ манушэ́с, ни Скифос, ни дынари́с, ни вольнонэ манушэ́с, нэ саро́ и дро саро́ исын Христо́со.

12. И палдава́ пирикэрэн пэс дрэ манушэ́ндэ, савэ́н Дэвэ́л выкэдыя́: явэ́н свэ́нта, дро́га, явэ́н тангипны́тка и лачхэ́-илытка, бишарибнаскирэ, ковлэ́-илы́тка, длугонэ вырикирибнаса;

13. явэ́н ковлэ́ екх кэ екх и примангэн екх екхэ́скэ, ко́ли вари-кон пэ вари-конэ́стэ рикирэ́ла холы́; то сыр Христо́со примангдя тумэ́нгэ, адя́кэ-паць и тумэ́ кэрэ́н.

14. Кэ саро́ дава́ дочхувэн паты́в кэ яви́р мануша́, сави́ исын фунда́менто ваш чачуно́ сарэнгиро кхэтанякирибэн.

15. И мэк тэ явэ́л дрэ тумарэ́ илэ Дэвлэ́скиро рама́нё (миро), кэ саво́ тумэ́ са́нас кхардэ́ сыр паша́ Екхэ Масэндыр, парикирэ́н пал дава́.

16. Мэк тэ дживэ́л дрэ тумэ́ндэ сарэ́ барвалыпнаса Христосо́скиро лав, ке́ли тумэ́ сыклякирэ́на и дэ́на годы́ екх екхэ́скэ псалмэнца, лачхэ́ лавэ́нца, дэвлытконэ́ гиленца, бага́н Дэвлэ́скэ парикирибнаса дрэ тумарэ́ илэ.

17. И саро́, соб (кай) тумэ́ тэ на кэрэ́н, лавэ́са ци рэндоса, саро́ кэрэ́н ваш Ра́скиро-Дэвлэ́скиро, Исусо́скирэ Христосо́скиро лав, парикирэ́н Дэвлэ́скэ Дадэ́скэ пир Лэ́стэ.

18. Джувлялэ, кандэ́н Пэскирэн ромэн, сыр дава́ трэй тэ явэ́л дрэ Растэ – Дэвлэ́стэ.

19. Мурша́лэ, явэ́н лачхэ́ кэ Пэ́скирэ ромня́, и на явэ́н пхарэ́ лэ́нца.

20. Чхавэ́, кандэ́н пэ́скирэ дадэн дро саро́, пал-дова́ со дава́ трэй Ра́скэ Дэвлэ́скэ.

21. Дадолэ, на ґаздэ́н холы́ дрэ пэ́скирэ чхавэ́ндэ, соб (кай) ёнэ тэ на пэрэ́н дро ду́хо (фа́но).

22. Писхарьялэ, кандэ́н дро саро́ пэ́скирэ пхувья́кирэ хулан дрэ лоч, дынаринэ́н (служынэн) лэ́нгэ, на ваш дова́, соб (кай) тэ шарэ́н мануша́, нэ кэрэ́н дава́ сарэ́ илэ́стыр.

23. И саро́, со тумэ́ кэрэ́на, кэрэ́н сарэ́ илэ́стыр, сыр ваш Ра́скэ-Дэвлэ́скэ, нэ на, сыр ваш манушэ́нгэ,

24. и джинэ́н, со Рай Дэвэ́л отдэ́ла лачхипна́са тумэ́нгэ, со Ёв скэдыя́ ваш Пэ́скирэ манушэ́нгэ; пал-дова́ со тумэ́ дынаринэна Ра́скэ-Дэвлэ́скэ Христосо́скэ.

25. Палдова́ со, кон кэрэ́ла фуипэ́н, дорэсэ́ла ка́ра пал фуипэ́н, со ёв кэрдя́, на дыкхи́ пэ дава́, кон адава́ ману́ш исын.

Romani Bible Baltic 2019

Maintained by the United Bible Societies for the Baltic Romani Mission