Bible in one year - Пэ Балтитко Романи чиб

Bible in one year October 13

1. Ѓа́да, исын лав, саво́ пхэндя́ Рай Дэвэ́л Еремеёскэ:

2. “Шунэ́н лава́ далэ́ Заветоскирэ и пхэнэ́н манушэ́нгэ Юдэя́тыр и манушэ́нгэ, кон дживэ́ла кэ Ерусалимо.

3. И пхэн лэ́нгэ: ‘Адя́кэ ракирэ́ла, Рай Дэвэ́л, Израилёскиро Дэвэ́л: ‘Тэ явэ́н прокошыбэна (арманя) пэ манушэ́стэ, саво́ на шунэ́ла лава́ заветостыр.

4. Саво́ Мэ припхэндём тумарэ́ дадэ́нгэ тэ кэрэ́н дро дывэ́с, ке́ли Мэ лыджиём лэн криг Египто́скирэ пхувья́тыр, саструнэ́ бовэстыр, пхэни́: ‘Кандэ́н Мири́ зан и кэрэ́н дова́ саро́, сыр Мэ припхэндём тумэ́нгэ, соб (кай) тумэ́ тэ явэ́н Мирэ́ мануша́, и, соб (кай) Мэ тэ явав тумаро́ Дэвэ́л;

5. соб (кай) Мэ тэ выпхэрдякирав (тэ сполнинав) совла́х, сави́ Мэ дыём тумарэ́ дадэ́нгэ тэ дав пхув, пир сави́ тэ тхадэл тхуд и авги́н, сыр исын ададывэ́с. И Мэ, Ереме́ё отпхэндём и пхэндём: “Ами́нь, Раё Дэ́вла.”

6. Тэ́ньци пхэндя́ Рай Дэвэ́л ма́нгэ: ‘Пхэн зоралэ́с анги́л манушэ́ндэ сарэ́ кадалэ́ лава́ дрэ Юдэя́кирэ фо́рья, и пэ Ерусалимо́скирэ вули́цы (га́сы) кадасавэ́ лавэ́нца: “Шунэ́н кадалэ́ Заветоскирэ лава́ и выпхэрдякирэн лэн.”

7. Пал-дова́ со Мэ барэ́ ласкаса допхэна́вас тэ ракхэ́нпэ тумарэ́ дадэ́нгэ дро дывэ́с, сыр Мэ лыджиём лэн криг Египто́скирэ пхувья́тыр аж кэ ададывэсатуно дывэ́с, уштыи тася́рлэс пэ зло́ко (пэ ра́нко) и допхэна́вас лавэ́нца: “Кандэ́н мири́ зан.”

8. Нэ ёнэ на кандынэ́, ёнэ на причхудэ кан, а кажно (сва́ко) лэ́ндыр кэрдя́ пир нахратыма лэ́нгирэ бибахталэ́ илэндыр: и Мэ яна́ва пэ лэ́ндэ сарэ́ лава́ кадалэ́ Законо́стыр, савэ́ Мэ припхэндём лэ́нгэ тэ выпхэрдякирэн (тэ сполнинэн), нэ ёнэ дава́ на кэрдэ́.

9. И пхэндя́ Рай Дэвэ́л ма́нгэ: “Зракирибэ́н исын латхно машки́р Юдэя́кирэ манушэ́ндэ и кодолэндэ, савэ́ дживэ́на кэ Ерусалимо.

10. Ёнэ рисинэ́ палэ кэ чорипэ́н, саво́ кэрдэ́ лэ́нгирэ прапапы, и ёнэ гинэ́ пал яви́р дэвлорэндэ тэ дынаринэ́н лэ́нгэ. Израилёскиро кхэр и Юдэя́киро кхэр пхагирдэ́ Миро завето, саво́ Мэ счхудём лэ́нгирэ дадэ́нца.”

11. Палдава́ адя́кэ ракирэ́ла Рай Дэвэ́л: “Акэ, Мэ яна́ва бари би́да пэ лэ́ндэ, савья́тыр ёнэ на нашэ́на: и мэк ёнэ явэ́на тэ дэн го́дла кэ Мэ, Мэ на ява́ва тэ шунав лэн.

12. Тэ́ньци Юдэя́кирэ фо́рья и Ерусалимо́скирэ мануша́ явэ́на и ёнэ явэ́на тэ дэн го́дла яври́ кэ дэвлорэ́; ваш савэ́нгэ ёнэ хачкирдэ́ дро́га смо́лы, нэ ёнэ на выракхэна лэн тэды, ке́ли явэ́ла биба́хт пэ лэ́ндэ.

13. Пал-дова́ со кицы́ исын ту́тэ тырэ́ фо́рья, Юдэ́я, ада́кицы ту́тэ исын тырэ́ дэвлорэ́; кицы́ исын вули́цы (га́сы) дро Ерусалимо, ада́кицы тумэ́ чхудэ́ алта́ри пэ ладж, алта́ри, соб (кай) тэ хачкирэ́н дро́га смо́лы Ваалоскэ.

14. Палдава́, Ереме́ё, на мангпэ Ма́нгэ пал адалэ́ манушэ́ндэ, и адя́кэ-паць на ґа́здэ патерья ци мангипэ́н пал лэ́ндэ, пал-дова́ со Мэ на ява́ва тэ шунав лэн дро часо (цы́ро), ке́ли ёнэ явэ́на тэ дэн го́дла яври́ кэ Мэ, сыр явэ́ла биба́хт (би́да) лэ́нгэ.

15. Со ж трэй мирэ́ пирамнэскэ (камлэскэ) дро Миро кхэр, ко́ли ёй ада́кицы бут кэрэ́ла биладжакунэ́ рэ́нды? И свэ́нто мас ваш яныбэ́н гия́ криг ту́тыр? Ко́ли ту кэрэ́са биба́хт, тэды ту радынэсапэ.”

16. Рай Дэвэ́л дыя́ лав ту́кэ: “Зэлэно маслинитко кашт, саво́ исын гожо, лачхэ́ пхабаса!” Нэ акана́ зоралэ́ годла́са и ґлумоса Ёв, Рай Дэвэ́л, росхачкирдя яг пэ ла́тэ и ла́кирэ рандя́ (вэ́тки) пхадинэ.

17. Пал-дова́ со болыбна́скирэ-янголэ́нгиро, Рай Дэвэ́л, Саво́ чхудя́ дрэ пхув тут, выпхэндя розплэскирибэн пэ ту́тэ пал фуипэ́н (биба́хт), сави́ кэрдэ́ Израилёскирэ и Юдэя́кирэ кхэра́. Ёнэ кэрдэ́ дава́ пэ пэ́стэ и далэ́са ёнэ дукхадэ Ман кэ холы́, сыр ёнэ хачкирдэ́ дро́га смо́лы Ваалоскэ.”

18. Акана́ Рай Дэвэ́л дыя́ ма́нгэ, Еремеёскэ, тэ джина́в пал дава́, и Мэ джино́м дава́; пал-дова́ со Ёв сыкадя́ ма́нгэ лэ́нгирэ кэрибэна пэ миро шэро́.

19. Нэ мэ со́мас сыр рахмано бакроро́, савэ́с лыджинэ́ тэ чхинэн; и мэ на джиндём, со ёнэ придуминдлэ фуипэ́н (биба́хт) пэ ма́ндэ, ракири́: “Явэ́н, хасякираса кашт лэ́скирэ пхабэнца, и явэ́н, чингираса дава́ кашт криг джидэ́ пхувья́тыр, соб (кай) буты́р тэ на рипирэ́н лэ́скиро лав.”

20. Нэ Ту, болыбна́скирэ-янголэ́нгиро Рай Дэвэ́л, Саво́ сэндинэла пир чачипэ́н; Саво́ спробинэла годы́ и ило́, мэк мэ тэ дыкха́в, сыр Ту отдэса палэ лэ́нгэ: пал-дова́ со Ту́кэ, Раё Дэ́вла, мэ допатяндыём миро рэ́ндо.

21. Палдава́ адя́кэ ракирэ́ла Рай Дэвэ́л пал муршэндэ Анатотостыр [Анафофостыр-р.с.], савэ́ камэ́на тэ мулякирэ́н ман, пхэни́ (ракири́): “Ту буты́р на ангилпхэн Ра́скирэ-Дэвлэ́скирэ лавэ́стыр, соб (кай) ту́кэ тэ на мэрэс амарэ́ вастэ́стыр.”

22. Палдава́ адя́кэ ракирэ́ла болыбна́скирэ-янголэ́нгиро Рай Дэвэ́л: “Акэ, Мэ пхарэ́с сэндякирава лэн: тэрнэ́ мануша́ мэрэ́на куртала́тыр, лэ́нгирэ чхавэ́ и чхая́ мэрэ́на бокха́тыр;

23. со буты́р ние́кх на ячэ́лапэ лэ́ндыр; пал-дова́ со Мэ яна́ва хасибэ́н (биба́хт) пэ манушэ́ндэ Анафофостыр [Анатотостыр-ю.о.] дро дова́ бэрш, ке́ли Мэ ява́ва тэ сэндякирав лэн.”

Jeremiah 12:1-17

1. Чачуно́ сан Ту, Рай Дэвэ́л, ко́ли мэ ява́ва тэ лыджав миро рэ́ндо Ту́са, мэк мэ тэ ракира́в пал Тыро́ чачипэ́н. Со́скэ да злыднитконэ манушэ́нгэ удэлапэ кэ миштыпэ́н? Со́скэ исын куч одолэ́нгэ, савэ́ исын бикиибнарья [нахрата-р.с.]?

2. Ту чхудя́н дрэ пхув лэн, лэ́нгирэ ґэрорья баринэ: ёнэ барьёна буты́р, чачо́, и ёнэ дэ́на пхаба́: Ту сан лэ́ндэ пэ чиб, нэ Ту сан дура́л лэ́нгирэ годендыр (илэндыр).

3. Нэ Ту, Раё Дэ́вла джинэ́са ман: Ту дыкхця́н ман и Ту спробиндян миро ило́ кэ Ту. Тырдэ криг лэн сыр бакрэ́н тэ зачхинэн, и чхув дрэ риг лэн ваш дывэ́с тэ зачхинэн лэн.

4. Сыр ґара́ (длу́гэс) пхув явэ́ла тэ тугинэл, и чхарья пэ фэ́лда тэ шутён? Мурдала́ и чирикля́ хасинэ́ пал адалэ́ злыдня (фуе́) манушэ́ндэ, савэ́ дживэ́на одо́й, пал-дова́ со ёнэ ракирэ́на: “Дэвэ́л на дыкхэ́ла амаро́ ко́нцо (яго́ро).”

5. Рай Дэвэ́л отпхэндя́: “Ко́ли ту, Ереме́ё, прастандыян псирибнаскирэнца, и ёнэ кхинякирдэ тут, сыр тэды ту явэ́са тэ спробинэс зорья грэнца? И ко́ли пэ пхув, кай исын рама́нё (миро) ту са́нас бидарипнаскиро, тэ́ньчи со ту явэ́са тэ кэрэ́с, сыр ґаздэ́напэ панинга́ дро Иорда́но?

6. Пал-дова́ со ровно (адя́кэ-паць) и тырэ́ пша́ла, и тырэ́-дадэ́скиро кхэр, адя́кэ-паць и ёнэ обгинэпэ ту́са сыр бикиибнаскирья (бикиныбнарья), мэк ёнэ и дэ́на го́дла яври́ пал ту́тэ. На патя лэ́нгэ, мэк и ракирэ́на ёнэ лачхинька лава́ ту́кэ.

7. Мэ мэкцём Миро кхэр, Израилё, Мэ чхурдыём Миро миштыпэ́н, Мэ отдыём Мирэ́ дрогонэ́ манушэ́с дрэ васта́ вэргэ́нгэ.

8. Миро миштыпэ́н – Мирэ́ мануша́, ячнэ́ сыр шчэр (ле́во) дро вэш, ёнэ ґаздынэ́ пэ́скири зан пэ Ма́ндэ, палдава́ Мэ нашты́ тэ дыкха́в пэ лэ́ндэ.

9. Миро миштыпэ́н яця́ сыр чириклы, савья́ сашты́ тэ розрискирэс, рискирибна́скирэ чирикля́ кружынэнапэ (крэнжынэнапэ) тэ пэрэ́н пэ ла́тэ. Джа́н, скэдэ́нпэ, сарэ́ мурдала́ пэ фэ́лда, янэ́н лэн тэ хан.

10. Бут шэралэ́ чхупна́рья хасякирдэ́ Мири́ винаґрадытко бар, ёнэ выштакирдэ (вытопчындлэ) Мирэ́-фэлдакири паш ґэрэ́нца, ёнэ кэрдэ́ Мирэ́ ґожонэ пашатыр (пашэстыр) биманушэнгири чхучи́ пхув!

11. Ёнэ кэрдэ́ ла́тыр замэкно биманушэнгиро штэ́то; саро́, со исын замэкно, зоралэ́с тугинэла анги́л Ма́ндэ: сари́ пхув исын замэкны, пал-дова́ со нанэ нико́н, соб (кай) тэ чхувэ́л дава́ пэ ило́ пэ́скэ.

12. Мижэх чора явэ́на пэ вучэ́ штэ́ты пир чхучэ́ прахи, пал-дова́ со Мэ, Рай Дэвэ́л, бичхава́ва курта́ла екхэ ягоро́стыр пэ пхув кэ яви́р; со на явэ́ла рама́нё ни екхэ джидэ́ дескэ.

13. Ёнэ чхудэ́ дрэ пхув гив, нэ ёнэ счхиндлэ пхусадытка хру́сты, ёнэ кхинякирдэ пэс кэ дукха́, и лэ́нгэ на удэлапэ кэ миштыпэ́н. Ладжан дасавэ́ тумарэ́ чорорэ́ умалотостыр, пал-дова́ со явэ́ла бари холы́ Ра́стыр-Дэвлэ́стыр.

14. Адя́кэ ракирэ́ла Рай-Дэвэ́л пэ сарэ́ бибахталэ́ Израилёскирэ суседэндэ (котарьендэ): “Савэ хасякирэна пхув, сави́ Мэ сыр миштыпэ́н дыём манушэ́нгэ Израилёстыр. Акэ, Мэ рискира́ва яври́ лэн Израилёскирэ пхувья́тыр и Мэ вырискирава Юда́скиро кхэр лэ́ндыр.

15. И явэ́ла адя́кэ: пало́ (после) саро́ дава́, сыр Мэ вырискирава лэн, Мэ рисёва́ва палэ, и тэды Мэ потангинава (пожалинава) лэн, и Мэ яна́ва палэ лэн – кажнонэс кэ пэ́скиро миштыпэ́н, и кажнонэс кэ пэ́скири пхув.

16. И явэ́ла адя́кэ: ко́ли ёнэ, сусе́ды (кота́рья) миштэ́с высыклёна тэ псирэ́н пир дрома́ Мирэ́-манушэ́нгирэ тэ совлахан Мирэ́ лавэ́са: “Тэ явэ́л джидо́ Рай Дэвэ́л”, адя́кэ-паць сыр ёнэ сыклякирдэ́ Мирэ́ манушэ́н тэ совлахан Ваалоса, тэды ёнэ ячэ́напэ машкира́л Мирэ́ манушэ́ндэ.

17. Нэ ко́ли ёнэ на явэ́на тэ кандэ́н, тэды Мэ выкушава лэн криг и Мэ хасякира́ва кадалэ́ манушэ́н”, – пхэндя́ Рай Дэвэ́л.

Psalms 118:10-14

10. Сарэ́ Наюды́тка на́цыи обгинэ трусця́л ма́ндэ, нэ мэ хасякира́ва лэн Ра́скирэ-Дэвлэ́скирэ лавэ́са.

11. Ёнэ обгинэ трусця́л ма́ндэ, чачо́, обгинэ трусця́л ма́ндэ; нэ мэ хасякира́ва лэн Ра́скирэ-Дэвлэ́скирэ лавэ́са.

12. Ёнэ обгинэ трусця́л ма́ндэ сыр бырлиня (пчолы), и ёнэ мурдинэ сыр яг дрэ хру́сты сувьенца; нэ мэ хасякира́ва лэн Ра́скирэ-Дэвлэ́скирэ лавэ́са.

13. Ёнэ шпулдэ (толкиндлэ) ман и пэкадэ тэ пэрав; нэ Рай Дэвэ́л дыя́ васт ма́нгэ.

14. Рай Дэвэ́л исын миро зоралыпэ́н и мири́ гилы́ радыма́са и Ёв зракхця́ ман.

Proverbs 27:8-8

8. Сыр чириклы, сави́ лодэла пэ́скирэ гнязда́тыр (куфо́стыр), адя́кэ-паць исын и ману́ш, саво́ лодэла пэ́скирэ штэто́стыр.

Kološanenge 4:1-18

1. Раялэ, явэ́н чачунэ́ кэ писха́рья (рабы), рипирэ́н пал дова́, со и тумэ́ндэ исын Хула́й дро Болыбна́скиро Раё.

2. Мангэ́нпэ Дэвлэ́скэ саро́ часо, явэ́н пэ стрэ́га парикирибнаса;

3. мангэ́нпэ Дэвлэ́скэ кхэтанэ́ адя́кэ-паць пал амэ́ндэ, соб (кай) Дэвэ́л тэ псиравэл (тэ отпхандэл) амэ́нгэ вуда́р ваш лав тэ роспхэнас Христосо́скиро гарадо́ чачипэ́н, пал саво́ мэ сом бэшто́ дро штарибэ́н,

4. соб (кай) мэ тэ могинав тэ ракира́в манушэ́нгэ, адя́кэ сыр трэй.

5. Дживэ́н и лыджа́н пэс годьварэс напатяибнаскирэнца, причхувэ́н ило́ кэ кажно ваканцыя (случаё).

6. Мэк тэ явэ́л тумаро́ лав саро́ часо бахталыпнаса и причхудэ лондэса, соб (кай) тумэ́ тэ джинэ́н, сыр кажнонэ́ манушэ́скэ тэ отпхэнэн.

7. Пал ма́ндэ саро́ роспхэнэ́ла тумэ́нгэ Тихико, дро́го пшал и патяибны́тко кхангирья́киро дына́ри и дру́го (мал) пир буты́ дрэ Растэ-Дэвлэ́стэ,

8. савэ́с мэ бичхадём кэ тумэ́ ваш дова́, соб (кай) ёв тэ уджинэл пал тумарэ́ рэ́нды (де́лы) и, соб (кай) тэ подрикирэ́л тумарэ́ илэ,

9. ёв явэ́ла кэ тумэ́ кхэтанэ́ Анисимоса, амарэ́ патяибнытконэ и дрогонэ́ пшалэса, саво́ исын тумэ́ндыр: ёнэ роспхэнэна тумэ́нгэ пал саро́, сыр амэ ада́й сам.

10. Пиридэла “рамане” тумэ́нгэ Аристархо, саво́ исын бэшто́ кхэтанэ́ ма́нца, и Марко Варнаваскиро плименико (бано), пал савэ́стэ мэ тумэ́нгэ чхиндём; ко́ли ёв явэ́ла кэ тумэ́, прилэ́н лэс,

11. и Ису́со, савэ́с прокхардэ Иусто, ёнэ тринджинэ исын Юдэндыр машки́р бутэндэ малэндэ пир буты́, савэ́ кэрдэ́ буты́ ваш Дэвлэ́скиро Кралипэ́н, и савэ́ подрикирэнас ман.

12. Пиридэла “рама́нё” тумэ́нгэ тумаро́ Епафрасо, Исусо́скирэ-Христосо́скиро писха́ри, саво́ саро́ часо мангэлапэ Дэвлэ́скэ зоралэ́с пал тумэ́ндэ, соб (кай) тумэ́ тэ явэ́н тварда и зоралэ́ дро патяибэ́н и тэ кэрэ́н саро́ пир Дэвлэ́скири во́ля.

13. Палдава́ мэ допхэнава пал лэ́стэ, со ёв кэрэ́ла древа́н пхари́ буты́ пал тумэ́ндэ и пал одолэ́ндэ, савэ́ дживэ́на кэ Лаодикия и кэ Иераполё,

14. пиридэла “рама́нё” тумэ́нгэ Лука, амаро́ дро́го састыпнари (врачо), и адя́кэ-паць Димасо.

15. Пиридэ́н “рама́нё” и мирэ́ пшалэ́нгэ дрэ Лаодикия, и Нимфаноскэ, и лэ́скирэ кхэритконэ́ кхангирьякэ,

16. ке́ли явэ́на тэ гинэн дава́ лыл тумэ́ндэ, мэк тэ прогинэн лэс и дрэ кхангири́ Лаодикийцэнгэ, а дова́ лыл, саво́ Лаодикиятыр, прогинэн и тумэ́.

17. И пхэнэ́н Архипоскэ, мэк ёв тэ кэрэ́л сыр трэй дынарибэ́н, саво́ ёв прилыя́ дрэ Растэ-Дэвлэ́стэ.

18. Дава́ пиридыибэн “рама́нё” исын чхиндло́ мирэ́, Павлискирэ вастэ́са. Рипирэн, со мэ сом бэшто́ дро штарибэ́н. Мэк тэ явэ́л бахталыпэ́н сарэ́нца тумэ́нца. Ами́нь.

Romani Bible Baltic 2019

Maintained by the United Bible Societies for the Baltic Romani Mission