Bible in one year
October 15

1. И пхэндя́ Рай Дэвэ́л ма́нгэ: “Мэк Мо́йза и Самуи́ло тэ тэрдён анги́л Ма́ндэ, нэ Миро ди на рисёла кэ адалэ́ мануша́. Бичха́в лэн криг Мирэ́ якхэ́ндыр, и мэк ёнэ тэ джа́н пэ́скэ.
2. И явэ́ла адя́кэ: ко́ли ёнэ пхэнэ́на ту́кэ: ‘Карик амэ́нгэ тэ джас?’, тэды ту пхэнэ́са лэ́нгэ: ‘Адя́кэ ракирэ́ла Рай Дэвэ́л: ‘Кон исын присэндиндло пэ мэрибэ́н – джа́ пэ мэрибэ́н, кон исын присэндиндло пэ курта́ла – пэ курта́ла, конэ́скэ присэндиндло бари бокх – бари бокх, конэ́скэ присэндиндло пле́но – дро пле́но.
3. Мэ ява́ва кэ ёнэ и Мэ да́ва лэ́нгэ штар ра́зна кары’ – ракирэ́ла Рай Дэвэ́л: Курта́ла тэ мулякирэ́л, джукэла тэ рискирэ́н, болыбны́тка чирикля́, и рискирибна́скирэ мурдала́ (звери) пэ пхув, тэ похан и тэ хасякирэ́н.
4. И Мэ отда́ва лэн, соб (кай) сарэ́ кралипэна́ пэ пхув тэ традэ́н лэн одори́к и палэ пал Манасиястэ, Езэкияскирэ чхавэ́стэ, пал-дова́ со ёв кэрдя́ дро Ерусалимо.
5. Пал-дова́ со, кон потангинэла тут, Ерусалимо? Кон сыкавэ́ла лачхэ́-илы́ткима ту́кэ? Кон заджа́ла кэ ту тэ пхучэс, сыр ту сан?
6. Тырэ́ мануша́ мэкнэ́ Ман!’, – ракирэ́ла Рай Дэвэ́л, – тумэ́ дынэпэ палэ. Палдава́ Мэ протырдава (ґазда́ва) Пэ́скиро васт пэ тумэ́ндэ, и Мэ хасякира́ва тумэн: Мэ кхиныём тэ отмэкав (тэ простинав) тумэ́нгэ.
7. И Мэ росчхурдава лэн веелоса (барэ́ лопатаса) пал по́рты пэ пхув; и Мэ ла́ва криг сарэ́са лэ́нгирэ чхаворэ́н, и Мэ хасякира́ва Мирэ́ манушэ́н: пал-дова́ со ёнэ на рисёна пэ́скирэ дромэндыр.
8. Ма́ндэ явэ́ла лэ́нгирэ пивлен (удовэн) буты́р сыр пра́хо дро мо́рё (дэрья́в): Мэ яна́ва пэ лэ́ндэ пэ тэрнэ́-манушэ́нгирэ датэ прахарис – чорэс дро паш-дывэ́с: Мэ кэра́ва адя́кэ, со екха́тыр илытко дукх и трашаибэ́н (дар) пэрэ́на пэ лэ́ндэ.
9. Э дай, сави́ бияндя́ эфта́ тыкнэн, ёй выпхурдыя палатуно́ ду́хо (фа́но); ла́киро кхам гия́ тэлэ́, мэк дава́ ишчо (инкэ́) исын дывэ́с; ёй исын ладжакирды и запхагирды дрэ годы́. И кон ячэ́лапэ, кодолэ́н Мэ пиридава курталакэ анги́л лэ́нгирэ вэргэ́ндэ’, – пхэндя́ Рай Дэвэ́л.
10. Бида ма́нгэ, Еремеёскэ, мири́ дай, со ту бияндян ман тэ кошавпэ, и тэ чингардавпэ сарэ́ пхувья́са! Мэ на дыём никонэ́скэ ловэ́ тэл ко́фо, и ёнэ адя́кэ-паць на дынэ́ ма́нгэ тэл ко́фо, нэ кажно (сва́ко) лэ́ндыр прокошэла ман (кэрэ́ла арманя пэ ма́ндэ).
11. Рай Дэвэ́л пхэндя́: “Чачипна́са Мэ мэкава пэ во́ля тут ваш лачхипэ́н, чачипна́са Мэ кэра́ва адя́кэ, со вэ́рго явэ́ла тэ мангэ́л тут дро бибахтало́ часо и тэды, ке́ли явэ́на тэ традэ́н тут.
12. Ци могинэ́ла (сашты́) вари-кон тэ пхагирэл састы́р, паш-рати́тко (северно) састы́р и харко́ма (медь) [пирдо (бронза)-ю.о.]?
13. Саро́ тыро́ миштыпэ́н и сарэ́ тырэ́ кучипэна Мэ отда́ва тэ чорэн биловэнгиро пал Тырэ́ грэ́хи, со кэрдя́н пир сарэ́ тырэ́ пхувья́ кэ кустыка (границы);
14. и Мэ кэра́ва адя́кэ, со ту джа́са пэ́скирэ вэргэнца пэ пхув, сави́ ту на джинэ́са: пал-дова́ со Мири́ холы́ хачола сыр яг: ёй явэ́ла тэ хачол пэ тумэ́ндэ.”
15. Тэ́ньци Мэ пхэндём: “Раё Дэ́вла! Ту джинэ́са саро́: ри́пир ман и подэ васт ма́нгэ, отдэ́ палэ холынаса одолэ́нгэ, савэ́ традэ́на ман: на закэдэ ман криг пир Тыри́ баро́ вырикирибэн (те́рпима): джин, со Мэ лыджа́ва ладж пэ пэ́стэ пал Ту́тэ.
16. Тырэ́ лава́ латхнэ́ миро ило́, и мэ хаём лэн. Тыро́ лав яця́ сыр ра́дыма ма́нгэ и радымакирдя (обрадындя) зоралэ́с миро ило́, пал-дова́, со Тыро́ лав исын пэ Ма́ндэ, Раё Дэ́вла, болыбна́скирэ-янголэ́нгиро Дэвэ́л.
17. Мэ на со́мас бэшто́ пэ скэдыипэн, кай сыс просаибнаскирэ и мэ на радындёмпэ кэ вучипэ́н; Мэ со́мас бэшто́ екхджино́: пал-дова́ со Ту пхэрдякирдян ман холя́са.
18. Со́скэ мири́ дукх ґара́ (длу́гэс) тырдэлапэ, со́скэ миро рискирибэн пэ маса́ на састёла, саво́ Ту отпхэндянпэ тэ састякирэс? Нау́што Ту явэ́са ваш ма́нгэ сы́рбы хоханы ґанынгори, сы́рбы на́лачхо пани́.”
19. Палдава́ адя́кэ ракирэ́ла Рай Дэвэ́л: “Ко́ли ту рисёса, тэ́ньчи Мэ рискира́ва тут палэ, тэ́ньчи ту тэрдёса анги́л Ма́ндэ; и, ко́ли ту выкэдэса кучипэ́н бэдыпнастыр (чорипна́стыр), тэ́ньчи ту явэ́са тэ ракирэ́с Мирэ́ мо́стыр. Мэк кадалэ́ мануша́ рисёна кэ ту, нэ ту́кэ на трэй тэ рисёс кэ ёнэ.
20. И Мэ кэра́ва ту́тыр зоралы́ харкуны (ме́дно) ва́нта пэ кадалэ́ манушэ́ндэ, и ёнэ явэ́на тэ марэ́нпэ проти ту́тэ, нэ ёнэ на лэ́на упра́л пэ ту́тэ, пал-дова́ со Мэ сом ту́са тэ зракхав, и тэ приракхав тут,” – пхэндя́ Рай Дэвэ́л.
21. “Чачэс, Мэ ява́ва тэ приракхав тут бибахталэ́ вастэ́стыр, и Мэ зракха́ва тут даракунэ вастэ́стыр.”
1. И сыс пхэндло́ Ра́скирэ-Дэвлэ́скиро лав кэ мэ:
2. “На лэ пэ́скэ ромня́, мэк тэ на явэ́н ту́тэ ни чхавэ́ – ни чхая́ пэ дава́ штэ́то.
3. Мэ пхэна́ва ту́кэ пал чхавэ́ндэ и чхае́ндэ, савэ́ бияндёна пэ дова́ штэ́то; и пал дае́ндэ, савэ́ биянэна лэн, и пал дадэндэ, савэ́ндыр ёнэ бияндёна:
4. ёнэ мэрэ́на дукханэ мэрибна́стыр, нико́н на явэ́ла тэ обровэл лэн: ние́кх лэ́ндыр на явэ́ла гарадо́, нэ ёнэ явэ́на сыр гнэё пэ пхув. Ёнэ хасёна куртала́тыр и бокхалыпнастыр, и лэ́нгирэ тру́пы явэ́на сы́рбы хабэ́н болыбнытконэ чирикленгэ и рискирибна́скирэ мурдалэ́нгэ (зверенгэ) пэ пхув.
5. Палдава́ Мэ адя́кэ пхэна́ва ту́кэ: на заджа́ дро кхэр, кай тугинэна роибнаса, адя́кэ-паць на джа́ тэ обровэс мулэн, ци на тангинэ кхэтанэ́ лэ́нца; пал-дова́ со Мэ отлава Миро рама́нё кадалэ́ манушэ́ндыр, Мэ ишчо (инкэ́) пхэна́ва ту́кэ, – и дро́го лачхипэ́н и лачхэ́-илы́ткима (тангипэ́н).
6. Сыр барэ́, адя́кэ-паць и тыкнэ́ мэрэ́на пэ дая́ пхув. Лэн на явэ́на тэ гаравэн, адя́кэ-паць и нико́н на явэ́ла тэ обровэл лэн; ци тэ чхинэл пэс, ци тэ обчхинэл бала́ пал лэ́ндэ.
7. Нико́н на явэ́ла тэ пхагирэл маро́ ваш лэ́нгэ дрэ смэнтныма тугитко, ци тэ подрикирэ́л дро ду́хо (фа́но) пал мулэ́ндэ, и нико́н на дэ́ла тахта́й лэ́нгэ тэ выпье́н, соб (кай) тэ раманякирэл (штылякирэл) лэ́нгиро ило́ пал дадэ́стэ ци пал датэ.
8. И на джа́ дро кхэр, кай ёнэ свэнкинэна, и на бэш лэ́нца тэ хас, тэ пьес.
9. Палдава́ адя́кэ ракира́ва Мэ, болыбна́скирэ-янголэ́нгиро Рай Дэвэ́л, Израилёскиро Дэвэ́л: ‘Акэ, Мэ кэра́ва адя́кэ, со анги́л тырэ́ якха́ дрэ тырэ́ дывэса́ на явэ́на шундлэ́ радымакирэ и сабнытка заня́, тэрнэскирэ и тэрнякирэ заня́.’
10. И явэ́ла адя́кэ: ке́ли ту роспхэнэса сарэ́ далэ́ лава́ одолэ́ манушэ́нгэ, тэ́ньчи ёнэ пхэнэ́на ту́кэ: ‘Пал со дава́ выпхэндя Рай Дэвэ́л сари́ дая́ бари биба́хт (би́да) пэ амэ́ндэ? Дро со исын амаро́ чорипэ́н? Ци саво́ грэ́хо амэ кэрдя́м проти Растэ-Дэвлэ́стэ, амарэ́ Дэвлэ́стэ?’
11. Тэ́ньци ту пхэнэ́са лэ́нгэ: ‘Пал-дова́ со тумарэ́ дада́ ячкирдэ́ Ман, – дава́ Мэ, Рай Дэвэ́л, ракира́ва: ёнэ гинэ́ пал явирэ дэвлорэндэ и ишчо (инкэ́) тумэ́ дынэ́ паты́в лэ́нгэ, и тумэ́ ячкирдэ́ Ман, и на рикирдэ Миро Зако́но.
12. И тумэ́ кэрдэ́ фуеды́р тумарэ́ дадэндыр, и со кажно (сва́ко) тумэ́ндыр дживэ́ла пир пэ́скиро пхаро́ и бибахтало́ ило́ адя́кэ, со тумэ́ на причхудэ кан кэ Мэ [соб (кай) тэ на шунэ́н Ман-р.с.].
13. Палдава́ Мэ вычхурдава тумэн далэ́ пхувья́тыр пэ пхув, со тумэ́ на джинэ́на, и сави́ на джиндлэ́ тумарэ́ дада́, кай тумэ́ явэ́на тэ дынаринэ́н явирэ дэвлорэ́нгэ дывэ́с и рат: пал-дова́ со Ма́ндыр на явэ́ла ни саво́ тангипэ́н (жалима) тумэ́нгэ.’
14. “Палдава́, акэ, явэ́на дывэса́, – дава́ Мэ, Рай Дэвэ́л, ракира́ва, – со на явэ́на буты́р тэ ракирэ́н: ‘Тэ дживэ́л Рай Дэвэ́л, Саво́ яндя́ Израилёскирэ чхавэ́н Египто́скирэ пхувья́тыр’;
15. нэ явэ́на тэ ракирэ́н: ‘Тэ дживэ́л Рай Дэвэ́л, Саво́ яндя́ Израилёскирэ чхавэ́н паш-ратитконэ́ (севернонэ) пхувья́тыр, и, сарэ́ пхувьендыр, карик Ёв вытрадыя́ лэн. ‘Пал-дова́ со Мэ яна́ва палэ лэн пэ пхув, сави́ Мэ дыём лэ́нгирэ дадэ́нгэ.
16. “Акэ, Мэ бичхава́ва пэ лэ́ндэ бут мачхибнарье́н, – дава́ Мэ, Рай Дэвэ́л, ракира́ва, – и ёнэ явэ́на тэ ухтылэ́н (тэ старэн) лэн, а тэ́ньчи Мэ бичхава́ва пэ лэ́ндэ бут карэдынитконэн (охотникэн), и ёнэ традэ́на криг лэн кажнонэ́ бэрга́тыр, и кажнонэ́ бэргицэндыр и шчэлендыр дрэ скалы.
17. Пал-дова́ со Мирэ́ якха́ исын пэ сарэ́ лэ́нгирэ дрома́; ёнэ на гаравэнапэ Мирэ́ мо́стыр, и лэ́нгиро чорипэ́н нанэ гарадо́ Мирэ́ якхэ́ндыр.
18. Нэ анги́л Мэ отплэскирава пал лэ́нгиро чорипэ́н и лэ́нгиро грэ́хо дуй мо́лы, пал-дова́ со ёнэ магирдэ́ Мири́ пхув трупэнца джунгалэ́ (брыдконэ) идолэндыр, савэ́нца ёнэ пхэрдякирдэ Миро миштыпэ́н.”
19. Раё Дэ́вла! Ту сан миро зоралыпэ́н и мири́ тва́рдыма, и пал Ту́тэ Мэ гарадёвава дрэ трашанэ (даракунэ) дывэса́, кэ Ту явэ́на бут мануша́ сарэ́ ягорэндыр (краендыр) пэ пхув и пхэнэ́на: “Амарэ́ дада́, чачэс, дорэснэ́ (долынэ) мэкно́ миштыпэ́н, саво́ исын хохано́ и хартытко (никчэмно), и лэ́стыр нанэ ни саво́ лачхипэ́н.
20. Ци могинэ́ла (сашты́) ману́ш кокоро́ тэ кэрэ́л дэвлорэ́, савэ́ исын на дэвэла́ сарэ́са?”
21. Палдава́, акэ, Мэ кэра́ва адя́кэ, соб (кай) ёнэ тэ джинэ́н Миро васт и Миро зоралыпэ́н, и ёнэ явэ́на тэ джинэ́н, со Миро лав исын Рай Дэвэ́л.”
21. Мэ ява́ва тэ парикира́в Ту́кэ, пал-дова́ со Ту отпхэндян ма́нгэ и Ту зракхця́н ман.
22. Бар, Саво́ на прилынэ́ бутярнэ́, яця́ шэралэ́ барэса ваш кэрибэн кхэри́тко:
23. дава́ яця́ Дэвлэ́стыр, дава́ исын дивно дрэ амарэ́ якха́.
24. Дава́ исын дывэ́с, дро саво́ Рай Дэвэ́л адя́кэ кэрдя́, амэ ява́са тэ радынаспэ и амэ ява́са бахталэ́.
10. На мэк пэ́скирэ малэс, ци тырэ́-дадэ́скирэ малэс; на джа́ кэ тырэ́-пшалэскиро кхэр дро дывэ́с, ке́ли ту́тэ исын бари би́да. Фэды́р исын пашатуно, кон исын пашылэды́р кэ ту, сыр пшал, саво́ исын дур.
1. Пшала́лэ, тумэ́ джинэ́на, кокорэ́, со амаро́ явибэн кэ тумэ́ на сыс ивья́ (напра́снэс),
2. а сыр тумэ́ джинэ́на, со анги́л дава́ амэ́нгэ пригияпэ бут тэ пиридживас мэ́ньки и ладжаипэ́н дрэ Филипы, нэ Дэвэ́л дыя́ амэ́нгэ зор тэ роспхэнас Лэ́скири бахталы́ зан, на дыкхи́ пэ саро́ пхарипэ́н проти амэ́ндэ.
3. Пал-дова́ со дро амаро́ сыклякирибэ́н нанэ нисави́ дош, ни нисави́ нажужы мысля, ни хохаибэ́н,
4. нэ, сыр Дэвэ́л выкэдыя́ амэн ваш дава́, соб (кай) тэ роспхэнас бахталы́ зан (звесь), адя́кэ амэ и ракираса на ваш манушэ́нгиро ило́, нэ сыр трэй Дэвлэ́скэ, Саво́ пропатякирэла амарэ́ илэ.
5. Тумэ́ джинэ́на, со амэ ние́кхвар на са́мас анги́л тумэ́ндэ хоханэ́ ракирибнаса, ци вари-савэ́ бокхаса кэ ловэ́ ваш пэ́скэ: Дэвэ́л исын якхи́тко (свидетелё) далэ́ сарэскэ.
6. Амэ на родаса манушы́тко шарибэ́н, ни тумэ́ндыр, ни явирэндыр,
7. амэ могиндям тэ явас кэ тумэ́ минаса сыр Христосо́скирэ Апо́столы, нэ амэ са́мас штыл (тиха) машки́р тумэ́ндэ, адя́кэ сыр дай ласкаса отлыджалапэ пэ́скирэ чхавэ́нца,
8. адя́кэ амэ, барэ́ тырдыпнастыр кэ тумэ́, закамдям тэ пиридас тумэ́нгэ на екх со Дэвлэ́скири бахталы́ зан (звесь), нэ и амаро́ джиибэ́н, адя́кэ тумэ́ сан дро́га амэ́нгэ.
9. Пал-дова́ со тумэ́ рипирэна амари́ буты́ и кхиныпэн: амэ кэрдя́м буты́ раты́ и дывэсэ́, соб (кай) тэ на явас дро пхарипэ́н тумэ́нгэ, амэ роспхэнасас Дэвлэ́скири бахталы́ зан тумэ́нгэ.
10. Тумэ́ и Дэвэ́л сан якхи́тка амэ́нгэ, со сыр амэ са́мас машки́р тумэ́ндэ, саро́ кэрдя́м сыр свэ́нта и чачунэ́ и бидошэнгирэ.
11. Пал-дова́ со тумэ́ джинэ́на, ке́ли амэ отлыджасаспэ тумэ́нца, сыр дад джинэ́ла пэ́скирэ чхавэ́н: амэ сыклякирдям кажнонэ́ тумэ́ндыр и подрикирдям и мангдям тумэн;
12. соб (кай) тумэ́ тэ дживэ́н, сыр трэй Дэвлэ́скэ, Саво́ кхардя́ тумэн дрэ Лэ́скиро Кралипэ́н и сла́ва.
13. Палдава́ и амэ адя́кэ-паць ўса́ды (сак) парикираса Дэвлэ́скэ, со тумэ́ прилынэ́ Дэвлэ́скиро лав, саво́ амэ роспэндям, тумэ́ прилынэ́ лэс на сы́рбы манушэ́нгиро лав, нэ сыр Дэвлэ́скиро лав, пир чачипэ́н, саво́ кэрэ́ла буты́ дрэ тумэ́ндэ патяибнаскирэндэ.
14. Палдава́ со тумэ́нца, пшала́лэ, кэрдя́пэ дова́-паць, со и Дэвлэ́скирэ кхангирьенца, савэ́ исын кэ Юдэ́я дрэ Исусо́стэ Христосо́стэ, адя́кэ-паць и пэ́скирэ мануша́ мэнчындлэ тумэн, сыр и лэн Юды,
15. кадалэ́ мануша́ замардэ́ (мулякирдэ́) и Рас-Дэвлэ́с, Исусо́с и пророкэ́н, и амэн, ёнэ нанэ лачхэ́ Дэвлэ́скэ, и исын вэ́рги (вроги) сарэ́ манушэ́нгэ,
16. савэ́ сыс тэрдэ́ пэ дром тэ ракирас Наюдэ́нгэ пал зракхибэ́н, и пир дава́ саро́ кэрэ́на барэды́р пэ́скирэ грэ́хи: нэ какана́ Дэвлэ́скири холы́ явдя́ пэ лэ́ндэ.
17. Нэ амэ, пшала́лэ, сыр розяцямпэ тумэ́нца пэ набаро́ часо (цы́ро) мо́са, нэ на илэ́са, амэ причхудям зор, и кэрасас саро́, соб (кай) тэ дыкхаспэ тумэ́нца;
18. палдава́ мэ древа́н камдём тэ явас кэ тумэ́, аж мэ, Па́вли, екх яви́р мо́ло скэдаваспэ тэ явав кэ тумэ́, нэ на́лачхо на мэкця́ амэн.
19. Кон могинэ́ла тэ явэ́л амарэ́ лачхэ́ ужакирибнаса, ци радыма́са, ци шарибнытконэ вянкаса (коронаса)? Ци дава́ исын на тумэ́ анги́л амарэ́ Растэ – Дэвлэ́стэ, Исусо́стэ Христосо́стэ, сыр Ёв явэ́ла.
20. Тумэ́ сан амари́ сла́ва и ра́дыма.
Romani Bible Baltic 2019
United Bible Societies for the Baltic Romani Mission