Bible in one year - Пэ Балтитко Романи чиб

Bible in one year October 17

1. Адя́кэ пхэндя́ Рай Дэвэ́л ма́нгэ, Еремеёскэ: “Джа́ и кин кхоро́ ґлэятыр, и лэ пэ́са манушэ́нгирэ пхурыдырэн и пхурыдырэ раша́н,

2. И джа́ кэ Еномоскиро [Геномоскиро-ю.о.] до́ло, саво́ исын пашы́л Пирье́нгири по́рта (Харшыфо) и пхэн зоралэ́с анги́л сарэ́ндэ лава́, савэ́ Мэ пхэна́ва ту́кэ.

3. Пхэн лэ́нгэ: ‘Шунэ́н Ра́скирэ-Дэвлэ́скиро лав: Юдэя́кирэ кра́лья, джиибнарья Ерусалимо́стыр. Адя́кэ ракирэ́ла болыбна́скирэ-янголэ́нгиро Рай Дэвэ́л, Израилёскиро Дэвэ́л: ‘Акэ Мэ яна́ва биба́хт (би́да) пэ дава́ штэ́то адя́кэ, со кажнонэ́стэ, кон шунэ́ла дава́, явэ́ла тэ кудунякирэл (тэ звенинэл) дрэ лэ́скирэ кана́.

4. Пал-дова́ со ёнэ мэкнэ́ Ман, и ёнэ кэрдэ́ чу́жо дава́ штэ́то ваш Ма́нгэ, и ёнэ тхувалякирдэ дрогонэ́ смолэнца явирэ дэвлорэ́нгэ, савэ́н ёнэ на джиндлэ́, и лэ́нгирэ дада́, и Юдэя́кирэ кра́лья, и ёнэ пхэрдякирдэ дава́ штэ́то бибангипнаскирэ ратэ́са;

5. и ёнэ адя́кэ-паць чхудэ́ вучэ́ штэ́ты Ваалоскэ тэ хачкирэ́н пэ́скирэ чхавэ́н дрэ яг сыр хачкирибнаскиро свэ́нто дыибэ́н Ваалоскэ, со Мэ припхэндём тэ на кэрэ́н, пал со Мэ на ракирдём, дава́ на сыс и Ма́ндэ пэ годы́.

6. Палдава́ акэ, явэ́на дывэса́, – ракира́ва Мэ, Рай Дэвэ́л, – ке́ли дава́ штэ́то на явэ́ла тэ кхарэлпэ Тофе́то, ци Гиномэскирэ-чхавэ́нгиро до́ло, а явэ́ла тэ кхарэлпэ мулякирибнаскиро (умарибнытко) до́ло.

7. И Мэ кэра́ва адя́кэ, со ничы́ на явэ́ла мол зракирибэ́н пэ скэдыны кэ Юдэ́я и кэ Ерусалимо пэ дова́ штэ́то, и Мэ кэра́ва адя́кэ, со ёнэ пэрэ́на куртала́тыр анги́л пэ́скирэ вэргэ́ндэ, и кодолэнгирэ вастэ́стыр, савэ́ родэ́на лэ́нгиро джиибэ́н, и Мэ кэра́ва адя́кэ, со лэ́нгирэ тру́пы Мэ да́ва сыр хабэ́н болыбнытконэ чириклэнгэ и мурдалэ́нгэ пэ пхув.

8. И Мэ кэра́ва далэ́ форо́стыр штэ́то тэ санпэ, и тэ дивинэнпэ трашаса манушэ́нгэ, кажно (сва́ко) ману́ш, кон пашы́л проджа́ла, явэ́ла ухтылдо дивоса, и ёв явэ́ла тэ дэл шоля сабнаса, дыкхи́ долэ́ сарэ́ фра́нсы (язвы).

9. И Мэ кэра́ва адя́кэ, со ёнэ явэ́на тэ хан лоч (плоть) пэ́скирэ чхавэ́н и чхае́н, и, кажно (сва́ко) лэ́ндыр, явэ́ла тэ хал пэ́скирэ-малэнгирэ джидэ́ маса́, ке́ли обчхувэна вэ́рги сарэ́ ригэ́ндыр, ке́ли лэ́нгэ явэ́ла пхаро́ вэргэ́ндыр, и кодолэндыр, савэ́ явэ́на тэ тасавэн лэн, и тэ родэ́н лэ́нгиро джиибэ́н.

10. И ту пхагирэса кхоро́ анги́л манушэ́нгирэ якха́, савэ́ явэ́на ту́са,

11. и ту пхэнэ́са лэ́нгэ: – ‘Адя́кэ ракирэ́ла болыбна́скирэ-янголэ́нгиро Рай Дэвэ́л: ‘Адя́кэ-паць Мэ пхагирава кадалэ́ манушэ́н и дава́ фо́ро, сыр пхагирэна кхоро́, со нашты́ лэс нэвэ́стыр тэ кэрэ́н, и ёнэ явэ́на тэ гаравэн пэ́скирэ мулэн дро Тофе́то кэ дасаво часо (цы́ро), со на явэ́ла буты́р штэ́то тэ гаравэн.

12. Адя́кэ Мэ кэра́ва кадалэ́ штэтоса, – ракира́ва Мэ, Рай Дэвэ́л, – и лэ́скирэ манушэ́нца, и Мэ кэра́ва кадалэ́ форо́стыр сы́рбы Тофе́то.

13. И кхэра́ дро Ерусалимо и кральенгирэ кхэра́ дрэ Юдэ́я явэ́на магирдэ́ сы́рбы Тофе́то, – сарэ́ кхэра́, кай пэ лэ́нгирэ стрэхи тхувалякирдэ дрогонэ́ смолэнца, и вычхувэнас тхадунэ свэ́нта дыибэна́ явирэ дэвлорэ́нгэ.’”

14. Тэ́ньци явдя́ Ереме́ё Тофетостыр, карик лэс бичхадя́ Рай Дэвэ́л тэ ангилпхэнэл, и ёв тэрдия́ пэ грэ́да (дво́ро), саво́ сыс дро Ра́скирэ-Дэвлэ́скиро Кхэр, и ёв пхэндя́ сарэ́ манушэ́нгэ:

15. Адя́кэ ракирэ́ла болыбна́скирэ-янголэ́нгиро Рай Дэвэ́л, Израилёскиро Дэвэ́л: “Акэ, Мэ яна́ва биба́хт [бари би́да-р.с.] пэ дава́ фо́ро и сарэ́ лэ́скирэ форицы, пэ савэ́ Мэ припхэндём биба́хт, пал-дова́ со ёнэ пхарьякирдэ пэ́скирэ мэня, соб (кай) лэ́нгэ тэ на шунэ́н мирэ́ лава́.”

Jeremiah 20:1-18

1. Ѓа́да, Пасхоро, Имэроскиро чхаво́, раша́й – и ёв сыс пхурэды́р дыкхибнаскиро (надзирателё) пир Ра́скирэ-Дэвлэ́скиро Кхэр, шундя́, сыр Ереме́ё ангилпхэнэлас (пророчынэла) кадалэ́ лава́.

2. Тэды Пасхоро пэкадя́ Еремеёс пророко́с и бэшлякирдя лэс дрэ калодки запхандлэ вастэ́нца и ґэрэ́нца, савэ́ сыс дрэ упратуны Веньяминоскири по́рта, со сыс пашы́л Ра́скирэ-Дэвлэ́скиро Кхэр.

3. И адя́кэ сыс пэ яви́р дывэ́с: Пасхоро вымэкця Еремеёс калодкэндыр, и Ереме́ё пхэндя́ лэ́скэ: “Рай Дэвэ́л на явэ́ла тэ кхарэл тут лавэ́са ‘Пасхоро, а Магор-Мисавиво.

4. Пал-дова́ со адя́кэ ракирэ́ла Рай Дэвэ́л: ‘Акэ, Мэ кэра́ва адя́кэ, со Ту, Пасхоро, явэ́са тэ дарэс кокоро́ пэ́стыр, и адя́кэ-паць сарэ́ Тырэ́ дру́ги (мала́), и ёнэ пэрэ́на вэргэ́нгирэ куртала́тыр и тырэ́ якха́ явэ́на тэ дыкхэ́н дава́. И Мэ отда́ва сари́ Юдэ́я дрэ Вавилоно́скирэ-крали́скирэ васта́ и ёв лыджа́ла криг лэн дро пле́но кэ Вавило́но, и одо́й ёв мулякирэ́ла лэн куртала́са.

5. И Мэ отда́ва саро́ форо́скиро барвалыпэ́н, и сари́ лэ́скири бажын, и сарэ́ лэ́скирэ дро́га предме́ты (чысы), и саро́ кучипэ́н, со сыс Юдэя́кирэ кралье́ндэ, и саро́ лэ́ндыр чорэна, и отлэна, и лыджа́на лэн кэ Вавило́но.

6. И ту, Пасхоро, и сарэ́, кон дживэ́ла дро тыро́ кхэр, сарэ́ тумэ́ джа́на дро пле́но. Тумэ́ джа́на кэ Вавило́но, и одо́й мэрэ́на тумэ́, и одо́й гаравэна тумэн, тут и сарэ́ тырэ́ малэн, конэ́скэ ту хоханэ́с ангилпхэнэсас.’”

7. О, Раё Дэ́вла! Ту притырдыян ман, и мэ сом притырдыно; Ту сан зоралэды́р ма́ндыр, и Ту лыян упралыпэ́н пэ ма́ндэ. Ма́ндыр лынэ́ тэ санпэ яври́; кажно (сва́ко) ману́ш просала ман.

8. Пал-дова́ со, ко́ли мэ вари-кицы́ ракира́ва, тэды, мэ да́ва го́дла, мэ годлава: ‘Нахратыма и хась’ пал-дова́ со пал Ра́скирэ-Дэвлэ́скиро лав санапэ яври́ и просана ман,

9. тэ́ньци пхэндём [подуминдём-р.с.] мэ: ‘Мэ на ява́ва буты́р тэ рипирав Лэ́скиро лав, ци тэ ракира́в буты́р Лэ́скирэ лавэ́стыр, нэ Лэ́скиро лав исын сыр хачибнаскири яг, сави́ исын пхандлы дрэ мирэ́ кокалы́; и Мэ кхиныём тэ рикирав лэс, и мэ на могиндём.

10. Пал-дова́ со Мэ шундём, сыр бут розлыджана бэдо сла́ва: ‘Траш исын пэ кажно риг’: ‘Мэк ёв пхэнэ́ла вари-со’, – ёнэ ракирэ́на, – и амэ здаса (пхукаваса) лэс.’ Сарэ́, кон сыс сы́рбы пэ мири́ риг, дыкхэ́на цямкэс, соб (кай) мэ тэ обштававпэ, и пхэнэ́на: ‘Амэ, хачи, затырдаса лэс, тэ́ньчи амэ ла́са упралыпэ́н пэ лэ́стэ, и амэ отхаса (отдаса) палэ лэ́скэ (кушаса холы́ пэ лэ́стэ!)’”

11. Нэ Ту, Раё Дэ́вла, сан зоралыпнаскиро и трашано (би дара́киро), и Ту сан пэ мири́ риг; палдава́ вэ́рги, савэ́ традэ́на ман, обштавэнапэ, и ёнэ на лэ́на упралыпэ́н пэ ма́ндэ: ёнэ явэ́на ладжакирдэ́, пал-дова́ со лэ́нгирэ планы на удэнапэ лэ́нгэ кэ миштыпэ́н [енэ кэрдэ́ нагодьварэс, ладж явэ́ла лэ́нгэ пэ саро́ ве́ко и ние́кхвар на бистрэлапэ-р.с.],

12. Нэ Ту, болыбна́скирэ-янголэ́нгиро Рай Дэвэ́л, Кон спробинэла чачунэн, Кон дыкхэ́ла годы́ и ило́, дэ ма́нгэ тэ дыкха́в, сыр Ту дукхавэса палэ лэн, пал-дова́ со Ту́кэ мэ выпхэндём (допатяндыём) миро рэ́ндо.

13. Бага́н Ра́скэ-Дэвлэ́скэ, шарэ́н Рас-Дэвлэ́с, пал-дова́ со Ёв зракхэ́ла чорорэ́-манушэ́нгирэ дия́ бибахталэ́ вастэ́ндыр.

14. Тэ хасёл дывэ́с, дро саво́ мэ бияндыём! Мэк тэ на явэ́л бахтякирдо́ дывэ́с, дро саво́ мири́ дай бияндя́ ман!

15. Тэ хасёл ману́ш, саво́ яндя́ звесь (зан) мирэ́ дадэ́скэ, пхэни́: ‘Муршоро латхяпэ ту́тэ!’ И далэ́са (со́са) ёв древа́н обрадындя мирэ́ дадэ́с.’

16. И мэк тэ явэ́л дова́ ману́ш сыр фо́рья, савэ́ Рай Дэвэ́л пхагирдя́ пэ котэра́, и Ёв на потагиндя (пожалиндя) пал дова́; и мэк одова́ ману́ш тэ шунэ́л го́дла пэ зло́ко (пэ ра́нко), и годлыма [роибэ́н-р.с.] дрэ паш-дывэ́с.

17. Пал-дова́ со Ёв на мулякирдя́ ман дрэ дакири лочови́, соб (кай) тэ явэ́н мирэ́-да́кирэ маса́ сыр маґила ма́нгэ, и соб (кай) тэ явэ́л ла́кири лочови́ пхари́ ўса́ды (сак).

18. Ваш со мэ выгиём да́кирэ лочовьтыр тэ дыкха́в пхари́ буты́ и ту́га, и соб (кай) мирэ́ дывэса́ тэ джа́н пэ́скэ дрэ ладж.

Psalms 119:1-8

1. Бахталэ́ исын одолэ́, савэнгиро джиибэ́н исын би дошэнгиро, савэ́ дживэ́на пир Ра́скирэ-Дэвлэ́скиро Зако́но.

2. Бахталэ́ исын одолэ́, савэ́ рикирэнапэ кэ Лэ́скирэ допхэныбэна, савэ́ родэ́на Лэс сарэ́ илэ́стыр.

3. Ёнэ адя́кэ-паць на кэрэ́на начачипэ́н: ёнэ псирэ́на Лэ́скирэ дромэ́нца.

4. Раё Дэ́вла! Ту припхэндян ракхипныткэс тэ ракхэ́н Тырэ́ упхэныбэна́,

5. соб (кай) тэ лыджа́н ман мирэ́ дрома́ пир Тырэ́ стату́ты (уставы).

6. Тэ́ньци мэ на ява́ва ладжакирдо́, ке́ли мэ ява́ва тэ дыкха́в илэ́стыр пэ Тырэ́ припхэныбэна́.

7. Ке́ли мэ уджинава Тыро́ чачипна́скиро сэ́ндо, тэды мэ ява́ва тэ парикира́в Ту́кэ сарэ́ илэ́стыр.

8. Мэ ява́ва тэ ракхав Тырэ́ стату́ты: на мэк ман сарэ́са.

Proverbs 27:13-13

13. Лэ и́дя кодолэстыр, саво́ яця́н якхитконэса (поручителёса) пал чужонэ́ манушэ́стэ; и рикир ла сыр сымады́, ке́ли ёв исын якхи́тко пал явирэ джувля́тэ рига́тыр.

1 Tesaloničanenge 4:1-18

1. Пшала́лэ, какана́ амэ мангаса и примангаса тумэн ваш Исусо́скэ Христосо́скэ, со дова́, со какана́ тумэ́ высыклынэ амэ́ндыр, сыр трэй тэ дживэ́н и тэ кэрэ́н пир чачипэ́н Дэвлэ́скэ, соб (кай) адя́кэ и дурэды́р тэ дживэ́н.

2. Тумэ́ джинэ́на, савэ́ припхэныбэна́ амэ дыям тумэ́нгэ амарэ́ Ра́стыр-Дэвлэ́стыр Исусо́стыр.

3. Дэвэ́л выкэдэ́ла, соб (кай) тумэ́ тэ явэ́н свэ́нта и тэ ракхэ́нпэ джиибнастыр би совлакиро;

4. соб (кай) кажно ману́ш тумэ́ндыр тэ джинэ́л, сыр тэ зрикирэл пэ́скиро кхоро́ налачхэ́ тырдыпнастыр дрэ свынтыма и жужыпэн (чыстота),

5. и тэ на поддэнпэ грэхитконэ́ тырдыпнаскэ, сыр дава́ кэрэ́на На́юды, савэ́ на джинэ́на Дэвлэ́с,

6. соб (кай) ние́кх тумэ́ндыр тэ на кэрэ́л чорипэ́н пэ́скирэ пшалэ́скэ и тэ на барвалёл пал лэ́скиро допатяибэн, пал далэ́ грэ́хи Дэвэ́л чхувэ́ла ка́ра, сыр англэды́р амэ ракирдям тумэ́нгэ и допхэнасас.

7. Дэвэ́л кхардя́ амэн на кэ нажужо джиибэ́н, нэ кэ чачуно́.

8. И ко́ли вари-кон на прилэ́ла дава́ сыклякирибэ́н, ёв прилэ́ла на, со манушэ́с, а Дэвлэ́с, Саво́ и дыя́ тумэ́нгэ Пэ́скиро Свэ́нто Ду́хо (Фа́но).

9. Мэ гинава, со пал пшалэнгири паты́в на трэй тумэ́нгэ буты́р тэ чхинав, пал-дова́ со Дэвэ́л сыклякирдя́ тумэн кокорэн тэ сыкавэ́н паты́в екх екхэ́скэ.

10. Тумэ́ адя́кэ-паць и кэрэ́на сарэ́нгэ пэ́скирэ пшалэ́нгэ пир сари́ Македония; нэ амэ примангаса тумэн, пшала́лэ, тэ кэрэ́н адя́кэ бутэды́р;

11. и тэ причхувэ́н зор тэ дживэ́н штылэ́с, тэ дыкхэ́н кажно пэ́скиро рэ́ндо, и тэ кэрэ́н буты́ пэ́скирэ вастэ́нца, сыр амэ ракирдям тумэ́нгэ англэды́р;

12. тэ дживэ́н патывалэс адя́кэ, соб (кай) мануша́, савэ́ исын надэвлытка, тэ кутякирэн тумэн, и соб (кай) тумэ́ тэ на явэ́н вужлэ ни дро со явирэ манушэ́нгэ.

13. Пшала́лэ, мэ кама́м, соб (кай) тумэ́ тэ джинэ́н саро́ чачипэ́н, пал манушэ́ндэ, савэ́ мынэ́, соб (кай) тумэ́ на тугинэн, сыр яви́р мануша́, савэ́ндэ нанэ наде́я пал ве́чно джиибэ́н.

14. Нэ ко́ли амэ патя́са, со Ису́со мыя́ и отджидыя́ мулэ́ндыр, тэды и манушэ́н, савэ́ мынэ́ патяибна́са дрэ Исусо́стэ, Дэвэ́л янэ́ла палэ кхэтанэ́ Лэ́са.

15. Амэ ракираса дава́ тумэ́нгэ Ра́скирэ-Дэвлэ́скирэ лавэ́са, со амэ, савэ́ ява́са джидэ́ кэ / жы́ко Христосо́скиро явибэн, усае́кх на ява́са англэды́р одолэ́ндыр, кон мыя́;

16. пал-дова́ со Рай Дэвэ́л Кокоро́ явэ́ла Болыбна́скирэ Раёстыр и Лэ́скиро явибэн сыкавэ́ла сарэ́нгэ тэ шунэ́н Архангелоскири зан, зоралы́ сыр Дэвлэ́скиро ро́го (труба), и кон пэ́рво мыя́ патяибна́са дрэ Христосо́стэ, отджидёла мулэ́ндыр;

17. тэ́ньчи амэ, сэвэ явэ́на джидэ́ дро дова́ часо, ява́са ґаздынэ́ пхувья́тыр, кхэтанэ́ лэ́нца пэ о́блоки тэ стрэнинас (тэ пирилас) Рас-Дэвлэ́с и амэ саро́ часо ява́са кхэтанэ́ Лэ́са.

18. Подрикирэн екх екхэ́с далэ́ лавэ́нца.

Romani Bible Baltic 2019

Maintained by the United Bible Societies for the Baltic Romani Mission