Beblia

1. Лав, саво́ явдя́ кэ Ереме́ё Ра́стыр-Дэвлэ́стыр, ке́ли кра́ли Сэдэки́я бичхадя́ кэ ёв Пасхорос, Молхиноскирэ чхавэ́с, и Софонияс (Зэфанияс), Маасеяхоскирэ чхавэ́с, раша́с, тэ пхэнэ́л лэ́скэ:

2. “Выпхуч, мэ манга́ва тут, Ра́стыр-Дэвлэ́стыр пал амэ́ндэ, пал-дова́ со о Навуходоносо́ро, Вавилоно́скиро кра́ли, джа́ла марибна́са пэ амэ́ндэ: ко́ли тэ явэ́л адя́кэ, соб (кай) Рай Дэвэ́л тэ кэрэ́л лэ́са пир сарэ́ Лэ́скирэ ди́вна бутя́, соб (кай) кра́ли Навуходоносо́ро тэ джал криг амэ́ндыр.”

3. Тэ́ньци пхэндя́ Ереме́ё лэ́нгэ: “Адя́кэ тумэ́ пхэнэ́н Сэдэкияскэ:

4. ‘Адя́кэ ракирэ́ла Рай Дэвэ́л, Израилёскиро Дэвэ́л: ‘А́кэ, Мэ рискира́ва палэ мардытка, со исын дрэ тумарэ́ васта́, савэ́нца тумэ́ марэнапэ Вавилоно́скирэ крали́са и Халдее́нца, савэ́ обчхудэ трусця́л тумэн халадэнца яври́, пал барунэ́ ва́нты, и Мэ скэда́ва лэн машкира́л дава́ фо́ро.

5. И Мэ Кокоро́ ява́ва тэ маравпэ тумэ́нца диньдькирдэ вастэ́са и зоралэ́ масняса (мышцаса) дрэ холы́, дро мижэхипэн, и дро баро́ холякирибэ́н;

6. и Мэ мулякирава манушэ́н, савэ́ дживэ́на дро дава́ кхэр фо́ро и кхэритконэ́ мурдалэ́н: ёнэ мэрэ́на франсэндыр.

7. И пало́ (после) дава́, – ракира́ва Мэ, Рай Дэвэ́л, – Мэ отда́ва Сэдэкияс, Юдэя́кирэ крали́с, и лэ́скирэ дынарье́н, и яви́р манушэ́н кадалэ́ форо́стыр, савэ́ ячэ́напэ джидэ́ франсэндыр, куртала́тыр и бокхалыпнастыр дрэ Навуходоноскирэ васта́, Вавилоно́скирэ крали́стэ, дрэ тумарэ́-вэргэ́нгирэ васта́, и дрэ кодолэнгирэ васта́, савэ́ родэ́на тумаро́ джиибэ́н. И ёв мулякирэ́ла тумэн курталакирэ ягороса. Ёв на явэ́ла тэ тангинэ́л (тэ жалинэл) тумэн, тэ тангинэ́л, и ёв на явэ́ла лачхэ́-илытко кэ тумэ́.”

8. ‘Акана́ ту, Ереме́ё, пхэн кадалэ́ манушэ́нгэ: ‘Адя́кэ – ракира́ва Мэ, Рай Дэвэ́л, – ‘А́кэ, Мэ чхува́ва анги́л тумэ́ндэ джиибна́скиро дром, и мэрибнаскиро дром.

9. Кон ячэ́лапэ дро дава́ фо́ро, мэрэ́ла куртала́тыр, ци бокхалыпнастыр, ци франсэндыр, нэ кон выджа́ла и здэлапэ Халдее́нгэ, савэ́ обчхудэ трусця́л тумэн, кодова́ ячэ́лапэ джидо́ и лэ́скиро джиибэ́н явэ́ла лэ́скэ да́ро.

10. Пал-дова́ со, Мэ рискирдём Пэ́скиро ило́ пэ дава́ фо́ро пэ биба́хт (чорипэ́н), а на пэ лачхипэ́н, – ракира́ва Мэ, Рай Дэвэ́л. ‘Дава́ фо́ро явэ́ла отдыно́ дрэ крали́скирэ-Вавилоно́скиро васт, и ёв схачкирэ́ла лэс яга́са.’”

11. А крали́скирэ Юдэя́кирэ кхэрэ́скэ пхэн адя́кэ: ‘Шунэ́н Ра́скирэ-Дэвлэ́скиро лав,

12. О, Давидо́скиро кхэр! Адя́кэ’, – ракира́ва Мэ, Рай Дэвэ́л: ‘Сэндякирэн чачипна́са тася́рлэс (ра́нэс) пэ зло́ко, и ракхэ́н обчордэ манушэ́с вастэ́стыр, саво́ традэ́ла лэс, соб (кай) Миро мижэхипэн тэ на выджа́л сыр яг, и тэ на росхачол адя́кэ, со нико́н на мурдякирэла ла пал дова́, со тумэ́ кэрэ́нас биба́хт (налачхэ́ рэ́нды).

13. Акэ, Мэ сом проти ту́тэ долоскири джиибна́скири, ска́ла лошчынакири’, – ракирэ́ла Рай Дэвэ́л, – тумэ́нгэ, кон ракирэ́ла: ‘Кон явэ́ла пэ амэ́ндэ? Ци заджа́ла дрэ штэ́ты, кай амэ дживаса?’

14. И Мэ сэндякирава тумэн пир тумарэ́ барьякирдэ́ (пло́ды), савэ́ сыкавэ́на, со кэрдэ́ тумэ́’, – ракирэ́ла Рай Дэвэ́л, – и Мэ росхачкирава яг дро тумаро́ вэш, и ёй похала саро́, со исын трусця́л лэ́стэ.’”

1. Адя́кэ пхэндя́ Рай Дэвэ́л, ма́нгэ, Еремеёскэ: “Джа́ дро кхэр Юдэя́кирэ крали́скиро, и одо́й пхэн дава́ лав,

2. и пхэн: “О, Кра́ли Юдэя́киро! Шун Ра́скирэ-Дэвлэ́скиро лав, ту, кон исын бэшто́ пэ Давидо́скиро троно, ту и тырэ́ дына́рья, и мануша́, савэ́ заджа́на пирда́л дая́ по́рта!

3. Адя́кэ ракира́ва Мэ, Рай Дэвэ́л: Кэрэ́н чачуно́ сэ́ндо и пир чачипэ́н, и ракхэ́н обчордэ манушэ́с вастэ́стыр, саво́ традэ́ла лэс: и на кэрэ́н намиштэс, на кэрэ́н нахратэс чужонэ́ манушэ́скэ, пиротоскэ (сиротаскэ), пивлякэ (удовакэ), и на прочхувэн бибангипнаскиро (набанго) рат пэ дава́ штэ́то.

4. Пал-дова́ со, ко́ли тумэ́ чачунэ́с явэ́на тэ кэрэ́н адя́кэ, тэ́ньчи кра́лья, савэ́ исын бэштэ́ пэ Давидо́скиро штэ́то пэ лэ́скиро троно, явэ́на тэ заджа́н пирда́л по́рта далэ́ кхэрэ́скири, кон традэ́ла пэ марибны́тка вурдэна́ и уклистэ́, кра́лья и лэ́скирэ мануша́.

5. Нэ ко́ли тумэ́ на шунэ́на далэ́ лава́, тэды Мэ совлахава пэ Пэ́стэ’, – ракирэ́ла Рай Дэвэ́л, – со дава́ Кхэр явэ́ла чхучо́.”

6. Пал-дова́ со адя́кэ пхэндя́ Рай Дэвэ́л пал Юдэя́киро кхэр: “Ту сан шука́р ваш Ма́нгэ сыр Галаа́до, сыр вучипэ́н пэ Ливаноскири бэ́рга: нэ Мэ, чачэс, кэра́ва ту́тыр чхучи́ пхув, фо́ро, дро саво́ нико́н на дживэ́ла.

7. И Мэ приракхава/ скэда́ва вымарибнаскирэн (истребителе́н) пэ ту́тэ, кажнонэс пэ́скирэ марибнытконэ́ састырэса; и ёнэ чингирэна тэлэ́ выкэдынэ́ (фэдырша) кедры, и ёнэ чхурдэна лэн дрэ яг.

8. И бут яви́р мануша́ явэ́на тэ джа́н пирда́л дава́ фо́ро, и кажно лэ́ндыр пхэнэ́ла екх екхэ́скэ: ‘Пал со да Рай Дэвэ́л кэрдя́ адя́кэ кадалэ́ барэ́ фороса?’

9. И ёнэ пхэнэ́на: ‘Пал-дова́ со форитка мануша́ мэкнэ́ Ра́скирэ-Дэвлэ́скиро Зако́но, лэ́нгирэ Дэвлэ́скиро, и ёнэ дынэ́ совла́х дынариндлэ́ явирэ дэвлорэ́нгэ.’

10. На ровэ́н пал мулэстэ, и на тугинэн кхэтанэ́ пал лэ́стэ, нэ ровэ́н киркэс пал одолэ́стэ, саво́ гия́ дро пле́но, пал-дова́ со ёв буты́р на рисёла палэ, и ёв на дыкхэ́ла буты́р пэ́скирэ-дадэнгири пхув;

11. палдава́ адя́кэ ракирэ́ла Рай Дэвэ́л пал Салумостэ (Шалумостэ), Иосиякирэ чхавэ́стэ, кон сыс кра́ли Юдэя́киро, саво́ кралиндя пало́ Иосиястэ, лэ́скирэ дадэ́стэ, саво́ гия́ пэ́скирэ пхувья́тыр: ‘Ёв буты́р на рисёла палэ;

12. нэ ёв мэрэ́ла пэ дова́ штэ́то, карик лэс залыджана дро пле́но, и ёв буты́р на явэ́ла тэ дыкхэ́л дая́ пхув:

13. Бида лэ́скэ, кон ґаздэ́ла лэ́скиро кхэр начачипнаса, и лэ́скирэ упратунэ кралитка коморы намиштэс, пэ конэ́стэ сусе́до (кота́ри) кэрэ́ла буты́ би ловэнгиро;

14. Кон пхэнэ́ла: ‘Мэ чхува́ва пэ́скэ буґло́ кхэр и барэ́ упратунэ кралитка коморы, и ёв вычингирэла фэнштры пэ́скэ и обсувэла кедроса, и макхэла лолэ́ мастиняса (краскаса).

15. Ци ту думинэса тэ явэс крали́са пир дова́, со Ту учхакирдян пэс кедроса? Дад тыро́ хая и пия, и ци на кэрдя́ ёв чачуно́ сэ́ндо и саро́ пир чачипэ́н? И ваш дава́ сыс мишто́ лэ́скэ.

16. Ёв лыджия́ пэ сэ́ндо рэ́ндо чорорэскиро и кодолэскиро, саво́ сыс дрэ трэ́бима; тэды и палдава́ сыс мишто́ лэ́скэ. “Ци на дава́ саро́ сыкавэ́ла, со ту джинэ́са Ман?” – ракирэ́ла Рай Дэвэ́л.

17. Нэ тырэ́ якха́ и тыро́ ило́ исын рискирдо ваш тыри́ ґалкима кэ барвалыпэ́н и тэ прочхувэс бибангипнаскиро (набанго) рат, и ваш дова́, соб (кай) тэ притасавэс, и тэ лэс пэ зор.

18. Палдава́ адя́кэ ракирэ́ла Рай Дэвэ́л пал Иоакимостэ (Яхакимостэ), Иосиякирэ (Ёсияскирэ) чхавэ́стэ, крали́стэ пэ Юдэ́я: ‘На явэ́на тэ обровэн лэс “со ж Миро пшал? И со ж Мири́ пхэн?” На явэ́на тэ обровэн лэс: “Со ж, ту сан, миро Кхенинго?” и “Со ж лэ́скиро барипэ́н?”

19. И гаравэна лэс сыр осло́с, вытырдэна лэс, и чхурдэна лэ́скиро тру́по пал Ерусалимо́скири по́рта.’

20. ‘Джа́н упрэ́ пэ Лива́но, мануша́лэ Ерусалимо́стыр, и дэн го́дла, и годлэн пэ Башано, и дэн го́дла пэ Аваримоскирэ вучэ́ штэ́ты, пал-дова́ со сарэ́ тумарэ́ камлэ́ дру́ги (мала́) исын мулякирдэ́.

21. Мэ ракиравас тумэ́нгэ тэды, сыр тумэ́ндэ саро́ гия́ лачхэ́с, нэ тумэ́ пхэндлэ́, со тумэ́ на шунэ́на. Адя́кэ кэрэ́нас тумэ́ тэрнал (смолоду), со тумэ́ на причхувэнас кан кэ Мири́ зан.

22. Балва́л явэ́ла тэ выпхурдэл сарэ́н тумарэ́ чхупнарьен, и тумарэ́ мала́ джа́на дро пле́но; тэды, чачэс, тумэ́ явэ́на ладжакирдэ́ и пхагирдэ́ дрэ пэ́скири годы́ пал сари́ тумари́ биба́хт [сарэ́ тумарэ́ бибахталэ́ рэ́нды-р.с.].

23. О тумэ́, кон дживэ́ла пэ Лива́но, кон кэрэ́ла гня́зды (ку́фы) пэ кедры, [сыр явэ́ла тут танго-р.с.] ке́ли пэрэ́на дукха́ пэ ту́тэ, сы́рбы пэ джувля́тэ, савьякэ трэй тэ биянэ́л.’

24. “Мэ сом джидо́”, – ракирэ́ла Рай Дэвэ́л, – мэк Иехония [Кониах-ю.о.], чхаво́ Иоакимоскиро, кра́ли Юдэя́киро, тэ явэ́л сы́рбы ангрусты якхитконэса (печатка) пэ Миро чачо́ васт, нэ Мэ и одотхы́р вытырдавас тут,

25. и Мэ отда́ва тут дрэ одолэнгирэ васта́, савэ́ камэ́на тэ замарэ́н тут, и дрэ кодолэскирэ васта́, конэскирэ мо́стыр ту дарэса – васта́ Навуходоносороскирэ, крали́стэ Вавилоно́стыр, и – васта́ Халдеенгирэ.

26. И вычхурдава Мэ тут, и тырэ́ да, сави́ яндя́ тут пэ свэ́то, кэ яви́р тхэм, дро саво́ ние́кх тумэ́ндыр на явдя́ пэ свэ́то, и одо́й тумэ́ мэрэ́на.

27. Нэ пэ пхув, кэ сави́ тумарэ́ дия́ тырдэнапэ [явэ́на тэ камэн тэ рисён-р.с.], тумэ́ на рисёна палэ.

28. Ци исын Иехония адасаво́ ману́ш, соб (кай) тэ дыкхэ́н пэ лэ́стэ вучипна́стыр сыр пэ пхагирдо́ кхоро́? Ци исын ёв сы́рбы кхоро́, саво́ на радынэла якха́? Пал со ёв и лэ́скиро ро́до вычхурдынэ, и чхурдынэ́ пэ пхув, сави́ ёнэ на джинэ́на?

29. О пхув, пхув, пхув! Шун Ра́скирэ-Дэвлэ́скиро лав!

30. Адя́кэ ракирэ́ла Рай Дэвэ́л: “Зачхинэн (записынэн) кадалэ́ манушэ́с, Иехонияс, сыр бичхаворэнгирэс, сыр манушэ́с, савэскиро джиибэ́н на явэ́ла мишто́; пал-дова́ со ние́кх лэ́скирэ кхэритконэ́ родо́стыр на явэ́ла тэ дживэ́л миштэ́с, и на явэ́ла тэ бэшэ́л пэ Давидо́скиро троно, и на явэ́ла тэ хулаинэ́л буты́р пир Юдэ́я.”

9. Сыр могинэ́ла тэрно́ ману́ш тэ дживэ́л би дошэнгиро? Ке́ли ёв явэ́ла тэ рикирэлпэ кэ Тыро́ лав.

10. Мэ родыём Тут сарэ́ мирэ́ илэ́са: на домэк, соб (кай) мэ тэ псирав кригал Тырэ́ припхэныбнэндыр.

11. Мэ гарадём Тыро́ лав дро пэ́скиро ило́, соб (кай) ма́нгэ тэ на кэра́в грэ́хи проти Ту́тэ.

12. Тэ шарэ́н зоралэ́с и тэ парикирэ́н Ту́кэ, о Раё Дэ́вла! Сыкля́кир ман Тырэ́ припхэныбнэнгэ.

13. Мирэ́ уштэ́нца мэ пхэндём сарэ́нгэ пал сарэ́ чачипэна́, со Ту пхэндя́н.

14. Мэ радындёмпэ джиибнастыр пир Тырэ́ нарипирибэна адя́кэ-паць, сыр барэ́ барвалыпнастыр.

15. Мэ ява́ва тэ розлав Тырэ́ упхэныбэна́ и мэ ява́ва тэ думинав зоралэ́с пал Тыро́ сыклякирибэ́н.

16. Мэ ява́ва тэ бахталёвав Тырэ́ статутэндыр, мэ на бистрава Тыро́ лав.

14. Кон ґаздэ́ла шариндой пэ́скирэ малэс зоралэ́ заня́са (глосаса) тася́рлэс (ра́нэс) пэ зло́ко (пэ ра́нко), дава́ могинэ́ла тэ загинэлпэ сыр прокошыбэ́н лэ́скэ.

1. Пшала́лэ, амэ́нгэ на трэй тэ чхинас тумэ́нгэ, ке́ли и дро саво́ часо дава́ явэ́ла,

2. пал-дова́ со тумэ́ лачхэ́с джинэ́на, со дывэ́с, ке́ли явэ́ла Христо́со, нико́н на джинэ́ла, Ёв явэ́ла сыр чор ратя́киро.

3. Ке́ли мануша́ явэ́на тэ ракирэ́н: “Рама́нё исын и на трэй тэ дарэс ни со́стыр”, сыр екха́тыр (сра́зу) явэ́ла пэ лэ́ндэ хасибэ́н, сыр дукха́ джувля́тэ, сави́ мэнчынэлапэ, ке́ли биянэ́ла тыкнэ́ биято́с, и нико́н лэ́ндыр на менинэла хасибэ́н.

4. Нэ тумэ́, пшала́лэ, на сан дро калыпэ́н (цямлыпэ́н), соб (кай) Дывэ́с тэ на ухтылэл тумэн сыр чор:

5. пал-дова́ со тумэ́ сарэ́ сан дудэскирэ и дывэсэскирэ чхавэ́, амэ на сам ратякирэ и цямлыпнаскирэ чхавэ́.

6. И адя́кэ, ява́са тэ ракхаспэ, сыр яви́р мануша́ дава́ кэрэ́на, ракхэ́нпэ и явэ́н пэ стрэ́га,

7. пал-дова́ со одолэ́, савэ́ исын сутэ́, ёнэ исын сутэ́ ратя́киро, и одолэ́, кон пьела, матёна ратя́киро;

8. Нэ амэ, савэ́ сам дывэсэскирэ чхавэ́, ява́са тэ явас пэ стрэ́га, и ява́са тэ урьявас пэ пэ́стэ бронь патяибнастыр и патыватыр и, сыр шлёмо урьяваса пэ шэро́ лачхо́ ужакирибэ́н пал зракхибэ́н;

9. пал-дова́ со Дэвэ́л на выкэдыя́ амэн ваш холы́, нэ соб (кай) амэ́ндэ тэ явэ́л зракхибэ́н пир амарэ́ Растэ-Дэвлэ́стэ, Исусо́стэ Христосо́стэ,

10. Саво́ мыя́ пал амэ́ндэ, соб (кай) тэ джива́с кхэтанэ́ Лэ́са, ци ява́са амэ тэ ракхаспэ, ци ява́са сутэ́.

11. Палдава́ подрикирэн и сыклякирэ́н екх екхэ́с, сыр тумэ́ адя́кэ и кэрэ́на.

12. Пшала́лэ, амэ мангаса тумэн, кутякирэн (патывакирэн) одолэ́ манушэ́н, савэ́ кэрэ́на буты́ тумэ́ндэ, и кон исын шэрало́ пэ кхангири́, и сыклякирэ́ла тумэн,

13. кутякирэн лэн барэ́ ковлыпнаса пал лэнгира буты́, сави́ ёнэ кэрэ́на. Малынэ́нпэ (дружынэн) машки́р пэ́стэ.

14. Амэ примангаса тумэн, пшала́лэ, сыклякирэ́н одолэ́ манушэ́н, савэ́ на камэ́на тэ кэрэ́н буты́, подрикирэн ду́хо (фа́но) одолэ́нгэ, савэ́ на зоралэ́с патя́на, дэн васт одолэ́нгэ, савэ́ндэ нанэ зор, вырикирэн сарэ́н.

15. Дыкхэ́н, соб (кай) нико́н тэ на кэрэ́л никонэ́скэ чорипэ́н палэ пал чорипэ́н, нэ ўса́ды (сак) кэрэ́н лачхипэ́н екх екхэ́скэ и сарэ́ манушэ́нгэ,

16. тумэ́ усады (сак) радынэ́нпэ;

17. Мангэ́нпэ Дэвлэ́скэ саро́ часо;

18. парикирэ́н Дэвлэ́скэ пал саро́, пал-дова́ со дава́ исын Дэвлэ́скири во́ля пал тумэ́ндэ, сави́ исын дро екхипэ́н;

19. на мудькирэн Свэнтонэ́-Духоскири яг,

20. на дыкхэ́н вучипна́стыр пэ пророкэнгиро лав;

21. нэ спробинэн саро́, рикирэ́н зоралэ́с кэ лачхипэ́н.

22. Ракхэ́нпэ кажнонэ́ фуипнастыр.

23. Мэк Дэвэ́л, Саво́ дэ́ла рама́нё, тэ кэрэ́л тумэн свэнтонэнца дро саро́, соб (кай) тумаро́ ду́хо (фа́но), ило́ и маса́ тэ явэ́н бидошакирэ, ке́ли явэ́ла амаро́ Рай Дэвэ́л, Ису́со Христо́со.

24. Одова́, Кон кхарэ́ла тумэн, исын патяибны́тко и кэрэ́ла дова́.

25. Пшала́лэ, мангэ́нпэ Дэвлэ́скэ пал амэ́ндэ.

26. Пиридэ́н “добридим” и “рама́нё” сарэ́ пшалэ́нгэ свэнтонэ́ чамудыпнаса.

27. Мэ совлахава тумэн Ра́са-Дэвлэ́са тэ прогинэн кадава́ лыл сарэ́ свэнтонэ́ пшалэ́нгэ.

28. Мэк бахталыпэ́н амарэ́ Ра́скирэ-Дэвлэ́скиро, Исусо́скирэ Христосо́скиро тэ явэ́л тумэ́нца.

Romani Bible Baltic 2019

United Bible Societies for the Baltic Romani Mission