Bible in one year - Пэ Балтитко Романи чиб

Bible in one year October 2

1. “Кон древа́н камэ́ла тэ пьел (исын трушало), мэк тэ джал кэ пани́! Ко́ли нанэ тумэ́ндэ ловэ́, усае́кх джа́н, кинэн и хан! Кинэн биловэнгиро мол (вино) и тхуд!

2. Со́скэ тумэ́нгэ отдэ́н ловэ́ пал дова́, со нанэ маро́; со́скэ тэ отдэ́н ловэ́ пал дова́, со на чалякэрэла? Шунэ́н акана́ Ман и хан лачхипэ́н; мэк тумаро́ ди тэ явэ́л чало тхулыпнаса.

3. Откэрэн тумарэ́ кана́, явэ́н кэ Мэ; пошунэн и явэ́ла тэ дживэ́л тумаро́ ило́; и Мэ да́ва тумэ́нгэ ве́чно завето, Мэ да́ва лачхипэ́н, пал саво́ дыём лав Давидо́скэ.

4. Акэ, Мэ чхудём лэс, соб (кай) ёв тэ досыкавэл (тэ допхэнэл) чачипэ́н народэнгэ, соб (кай) тэ сыклякирэ́л лэн.

5. Акэ, ту кхарэса народо, савэ́с Ту на джиндян; народы, и савэ́ тут на джинэ́на, савэ́ джа́на кэ ту ваш Тырэ́ Ра́скэ-Дэвлэ́скэ, ваш Свэ́нто Израилё, пал-дова́ со Ёв дыя́ ту́кэ бари паты́в.

6. Родэ́н Рас-Дэвлэ́с, ко́ли сашты́ тэ латхэ́н Лэс; кхарэ́н Лэс, ко́ли Ёв исын пашы́л.

7. Мэк грэхи́тко ману́ш тэ мэкэл пэ́скиро дром и пэ́скирэ налачхэ́ ду́мы, мэк тэ явэ́л ёв кэ Рай Дэвэ́л, и Дэвэ́л отмэкэ́ла лэ́скиро грэ́хо; мэк ёв тэ явэ́л кэ Дэвэ́л амаро́, Савэ́скэ сарэ́ исын дро́га.

8. Мирэ́ ду́мы – нанэ тумарэ́ ду́мы; Мирэ́ дрома́ – нанэ тумарэ́ дрома́, – ракирэ́ла Рай Дэвэ́л.

9. Нэ сыр болыбэ́н исын вучэды́р пхувья́тыр, адя́кэ-паць и Мирэ́ дрома́: ёнэ исын вучэды́р тумарэ́ дромэндыр, и ду́мы Мирэ́ исын вучэды́р тумарэндыр.

10. Сыр ив и брышы́нд пэрэ́на болыбна́стыр, нэ палэ на рисёна, а пэрэ́на пэ пхув, соб (кай) ёй тэ биянэ́л и тэ барьякирэл; соб (кай) тэ дэл гив (зя́рка) одолэ́скэ, кон чхувэ́ла дрэ пхув, и маро́ одолэ́скэ, кон ха́ла:

11. адя́кэ и лав Миро, саво́ выджа́ла Мирэ́ уштэндыр, – ёв на рисёла кэ Мэ палэ нисоса, нэ кэрэ́ла дова́, со Ма́нгэ трэй пир Мири́ во́ля, и кэрэ́ла дова́, ваш со Мэ бичхадём лэс.

12. А тумэ́ выджа́на радыма́са, и лачхипна́са тумэн пролыджана; бэ́рги и бэ́ргицы явэ́на тэ бага́н гилы́ анги́л тумэ́ндэ, и сарэ́ кашта́ пэ фэ́лда явэ́на сы́рбы радыма́са мануша́, савэ́ марэна дрэ васта́.

13. Выбарьёла кипарисо пэ штэ́то, кай хру́сто сувьенца, пэ штэ́то цукнудякиро выбарьёла мирто; саро́ дава́ явэ́ла ваш барипэ́н Дэвлэ́скиро, дава́ исын досыкаибэн ве́чно.”

Isaiah 56:1-12

1. Адя́кэ ракирэ́ла Рай Дэвэ́л: “Ракхэ́н сэ́ндо и кэрэ́н чачипэ́н, пал-дова́ со подги́я Миро зракхибэ́н и Миро чачипэ́н сыкадёла (откэрлапэ).

2. Бахтало́ исын мурш, саво́ кэрэ́ла дава́, и манушэ́скиро чхаво́, саво́ дава́ рикирэ́ла, саво́ ракхэ́ла са́вато (субо́та), соб (кай) тэ на явэ́л магирдо́, ракхэ́ла пэ́скиро васт, соб (кай) тэ на кэрэ́л нисаво́ чорипэ́н.

3. Тэ на пхэнэ́л чхаво́ явирэ народо́стыр, саво́ лыя́ тэ патял Ра́скэ-Дэвлэ́скэ: “Рай Дэвэ́л на прилыя́ Ман дро Пэ́скиро народо, и тэ на ракирэ́л ману́ш евнухо: “Акэ, мэ сом шуко кашт.”

4. Пал-дова́ со Рай Дэвэ́л адя́кэ ракирэ́ла пал адасавэ́ манушэ́ндэ (евнухэндэ): “Ко́ли ёнэ ракхэна Мирэ́ са́ваты (суботы), выкэдэна дова́, со исын лачхо́ Ма́нгэ, рикирэ́на Миро завето.

5. Одолэ́нгэ Мэ да́ва штэ́то дро Миро кхэр и дрэ Мирэ́ ва́нты; Мэ да́ва лав фэды́р лэ́нгэ, сыр чхавэ́нгэ, и сыр чхаенгэ; Мэ да́ва ве́чно лав, саво́ на хасёла.

6. И чхавэ́н явирэ народо́стыр, савэ́ явнэ́ кэ Рай Дэвэ́л, соб (кай) тэ кэрэ́н лэ́скэ буты́ и тэ рикирэ́н дро ило́ Ра́скирэ-Дэвлэ́скиро лав, и тэ явэ́н Лэ́скирэ писхарье́нца, сарэ́н, кон ракхэ́ла са́вато (субо́та) тэ на явэ́л магирдо́ и зоралэ́с тэ рикирэлпэ кэ Миро завето.

7. Мэ яна́ва лэн пэ Мири́ свэ́нто бэ́рга, Мэ обрадынава (лошакирава) лэн дро Миро кхэр, кай мангэ́напэ; лэ́нгирэ цэ́ла схачкирибэна и свэ́нта дыибэна́ лачхэ́ явэ́на пэ Миро алта́рё (жэртвенико), пал-дова́ со Миро кхэр кхарэ́лапэ кхэрэса, кай мангэ́напэ сарэ́ народы.

8. Рай Дэвэ́л, Саво́ скэдэ́ла рострадынэн манушэ́н Израилёстыр, ракирэ́ла: “Кэ выкэдэнэ лэ́скирэ Мэ ишчо (инкэ́) лава́ тэ скэдав явирэ́н.”

9. Джа́н тэ хан, сарэ́ рискирибна́скирэ мурдала́ (звери) фэлды́тка, сарэ́ мурдала́ вэшытка джа́н тэ хан!

10. Лэ́нгирэ ракхибна́рья сарэ́ рискирибна́скирэ исын корорэ́ и бура (нахрата) мануша́ насыклякирдэ; сарэ́ ёнэ сы́рбы джукэла бичибакирэ, джукэла, савэ́ на башэна, джукэла насвалэ, лэн тырдэла тэ совэн.

11. Кадалэ́ исын джукэла захалэ илэ́са, ёнэ нисыр на чалёна, кадалэ́ исын чхупна́рья (пастыри) бигодякирэ; сарэ́ дыкхэ́на пэ пэ́скиро дром; кажно лэ́ндыр родэ́ла ко́фо пэ́скэ, нанэ явирэ манушэ́н.

12. Ёнэ ракирэ́на: “Явэ́н, мэ дорэсава мол (вино); амэ бравинта выпьяса кэ кирло, атася́ явэ́ла дова́, со и ададывэ́с; и ишчо (инкэ́) буты́р явэ́ла.”

Psalms 113:5-9

5. Кон исын дасаво-паць сыр Рай Дэвэ́л, амаро́ Дэвэ́л, Саво́ хулаинэла вучипна́стыр;

6. Саво́ бандия тэлэ́ тэ дыкхэ́л болыбэ́н и пэ пхув.

7. Ёв ґаздэ́ла богос прахостыр и ґнэёстыр (ґноёстыр). Ёв вучэ́с чхувэ́ла одолэ́с, конэ́стэ исын трэ́бима,

8. соб (кай) ёв тэ бэшэ́л машки́р тхагарьендэ, тхагарьендэ Лэ́скирэ манушэ́ндыр.

9. Ёв кэрэ́ла адя́кэ, соб (кай) бичхаворэнгири дай тэ дживэ́л дро кхэр и тэ радынэ́лпэ (тэ лошалё́л) ла́кирэ чхаворэндыр. Аллилуя.

Proverbs 26:20-21

20. Кай буты́р кашта́ нанэ, одо́й яг мурдёла; и кай нанэ ману́ш, саво́ исын би-патывакиро кэ яви́р, кошыбэ́н пириячэ́ла (штылёла).

21. Сыр вангар чхувэ́на дрэ яг тэ хачол, и кашта́ ваш яг, адя́кэ-паць исын чингардуно ману́ш, кон росхачкирэла кошыбэ́н.

Efežanenge 4:1-32

1. Мэ, саво́ сом пхандло ману́ш пал Растэ – Дэвлэ́стэ, манга́ва тумэн тэ дживэ́н чачунэ́ (мольнонэ́) джиибнаса, савэ́са Дэвэ́л кхардя́ тумэн,

2. тэ явэ́н тумэ́ штыл (тиха) и кандыпны́тка и ковлэ́-илы́тка, тэ отлыджанпэ екх кэ екх длугонэ вырикирибнаса и патыва́са,

3. тэ причхувэ́н зор тэ зракхэн екхипэ́н, саво́ Ду́хо (Фа́но) дэ́ла пир рама́нё (миро), со кхэтанякирэла тумэн.

4. Исын екх маса́ и екх Ду́хо (Фа́но), сыр исын и екх наде́я, кэ сави́ Дэвэ́л кхардя́ тумэн;

5. исын екх Рай Дэвэ́л, екх патяибэ́н, екх болдыипэн.

6. Исын екх Дэвэ́л и Дад сарэ́нгэ, Саво́ исын вучэды́р сарэ́ндыр и пир сарэ́ндэ и дрэ амэ́ндэ сарэ́ндэ.

7. Сарэ́нгэ амэ́нгэ сыс дыно́ бахтякирибэ́н ада́кицы, ци бут Христо́со Кокоро́ выкэдыя́ тэ дэл кажнонэ́скэ амэ́ндыр,

8. палдава́ Свэ́нто Чхиныбэ́н ракирэ́ла: “Ёв ґаздыя́пэ пэ вучыпэн, отмэкця́ пленонэн и дыя́ бахтякирибэ́н манушэ́нгэ”,

9. нэ дова́, со Ёв “ґаздыя́пэ”, нау́што значынэ́ла на дова́, со Ёв англэды́р гия́ тэлэ́ дрэ люноскирэ (адоскирэ)-пхувья́кирэ паша́.

10. Палдава́ Ёв, Саво́ гия́ тэлэ́, исын Одова́-Паць, Кон и ґаздыя́пэ вучэды́р сарэ́ Болыбна́скирэ Раёстыр, соб (кай) тэ пхэрдякирэл саро́;

11. и Ёв чхудя́ вари-конэ́с Апостолэнца, вари-конэ́с пророкэнца, вари-конэ́с тэ роспхэнэ́н манушэ́нгэ бахталы́ зан, вари-конэ́с Дэвлытконэ́-манушэ́нгирэ ракхибнарье́нца и вари-конэ́с сыклякирибнаскирэ́нца,

12. соб (кай) тэ фэдырьякирэн Дэвлытконэ́ манушэ́н тэ роспхэнэ́н Дэвлэ́скиро лав тэ зоралякирэн Кхангири́, Сави́ исын Христосо́скирэ-духо́скирэ маса́;

13. пака амэ сарэ́ ява́са дро екхипэ́н кэ екх патяибэ́н и амэ уджинаса Дэвлэ́скирэ Чхавэ́с, и амэ ячаса барэ́ (стала) мурша и доджаса кэ най сталэдыр (сама стала) Христосо́скирэ бэрша́;

14. ваш дова́, соб (кай) амэ тэ на явас буты́р сыр бияторэ́ (тыкнорэ́), савэ́ кунинэнапэ и могинэ́на тэ змарэнпэ чачунэ́ дромэ́стыр манушытконэ́ мэндрипнаса и хохаибнаса;

15. а соб (кай) амэ́нгэ тэ рикирас чачипэ́н дрэ паты́в екх кэ екх, пир саро́ тэ барьёвас тэ зджас (тэ подджас) пэ Христосо́стэ, Саво́ исын Хула́й пэ саро́:

16. Лэ́стыр сарэ́ Духо́скирэ маса́ (Кхангири́) исын спхандлэ́ и кхэтанякирдэ́ машки́р пэ́стэ джидэ́ спхандыпнаса и пир дова́, со сарэ́ паша́ подрикирэна екх екхэ́с и кажно паш кэрэ́ла пэ́скири буты́, и сарэ́ маса́ барьёна и ячэ́напэ зоралэды́р пир паты́в кэ яви́р мануша́.

17. Палдава́ мэ ракира́ва, и манга́ва анги́л Растэ – Дэвлэ́стэ, соб (кай) буты́р тумэ́ тэ на кэрэ́н, сыр кэрэ́на на́цыи пир пэ́скири кро́тко годы́,

18. лэ́нгири годы́ калыя, ёнэ хасякирдэ́ Дэвлэ́скиро джиибэ́н пир пэ́скиро биладжаипэ́н и холынакиро ило́,

19. лэ́нгири годы́ кашталыя, ёнэ лынэ́ тэ залэнпэ нашукаронэ́ рэндэ́нца адя́кэ, со кэрэ́на кажно магирипэ́н бокхалыпнаса.

20. Нэ тумэ́ на адя́кэ высыклынэ Христосостыр,

21. а тумэ́ шундлэ́ пал Лэ́стэ и гинэ́ пал Лэ́стэ, пал-дова́ со чачипэ́н исын дрэ Исусо́стэ Христосо́стэ.

22. Мэкэ́н пэ́скиро пхурано́ джиибэ́н и на поддэнпэ грэхо́скэ, кэ саво́ злыджала грэхи́тко тырдыпэ́н;

23. нэ лэн тэ думинэн нэвонэ́-манушэ́скирэ-годя́са дро Ду́хо (Фа́но);

24. и пирипарудён дрэ нэвонэ́ манушэ́стэ, савэ́с Дэвэ́л создыя́ пир Пэ́скиро дро патяибэ́н и свэ́нто чачипэ́н.

25. Палдава́ мэкэ́н хохаибэ́н, кажно тумэ́ндыр тэ ракирэ́л чачипэ́н пэ́скирэ пашатунэ́скэ, пал-дова́ со амэ сам екхэ́ масэ́нгирэ паша́ екх екхэ́скэ.

26. Ко́ли тумэ́ холясона, на кэрэ́н грэ́хо: на явэ́н холынакирэ саро́ дывэ́с,

27. и на дэн штэ́то бэнгэ́скэ дро тумаро́ джиибэ́н.

28. Кон чордя, мэк буты́р тэ на чорэл, нэ мэк фэды́р тэ кэрэ́л буты́, кэри пэ́скирэ вастэ́нца лачхипэ́н, соб (кай) тэ явэ́л со́стыр тэ дэл одолэ́ манушэ́нгэ, савэ́ исын чорорэ́.

29. На ракирэ́н нисавэ кирнэ лава́, а екх лачхэ́ лава́, ваш подрикирибэ́н дро патяибэ́н, соб (кай) дава́ тэ янэл бахтякирибэ́н одолэ́нгэ, кон шунэ́ла.

30. И на кэрэ́н фуипэ́н Дэвлэ́скирэ Свэнтонэ́ Духо́скэ, Саво́ чхудя́ чэргэнори́ пэ тумэ́ндэ дро выкиныбнаскиро дывэ́с.

31. Мэк кажно киркипэн, холы́, чинга́рд, и го́дла и налачхэ́ лава́ тэ отджан тумэ́ндыр кхэтанэ́ сарэ́ тумарэ́ фуипнаса.

32. Явэ́н лачхэ́ екх кэ екх, тангипны́тка (жалосна), примангэн екх екхэ́скэ, сыр и Дэвэ́л пир Христосо́стэ примангдя тумэ́нгэ.

Romani Bible Baltic 2019

Maintained by the United Bible Societies for the Baltic Romani Mission