Bible in one year
October 20

1. Акэ, исын лав, саво́ явдя́ кэ Ереме́ё пал сарэ́ манушэ́ндэ Юдэя́тыр дро шта́рто бэрш, сыр Иоакимо, чхаво́ Иосия́скиро – кра́ли пир Юдэ́я, лыя́ тэ кралинэ́л. Дава́ сыс пэ́рво бэрш, сыр Навуходоносо́ро, лыя́ тэ кралинэ́л пир Вавило́но.
2. Дава́ лав проро́ко Ереме́ё пхэндя́ сарэ́ манушэ́нгэ Юдэя́тыр и сарэ́ манушэ́нгэ Ерусалимо́стыр, ракири́:
3. “Биш тэ трин бэрш – дэшутритонэ бэршэстыр, сыр кралиндя Иосия, чхаво́ Амоно́скиро, кра́ли Юдэя́киро кэ ададывэ́с явэ́лас кэ мэ лав Ра́стыр-Дэвлэ́стыр, и мэ, Ереме́ё, ракирдём тумэ́нгэ, уштыи пэ зло́ко (ра́нко) и ракири́, нэ тумэ́ на шундлэ́.
4. И бичхавэлас Рай Дэвэ́л тумэ́нгэ сарэ́ Лэ́скирэ дынарье́н-пророкэ́н, пэ зло́ко (пэ ра́нко) бичхавэлас Ёв, нэ тумэ́ на шундлэ́, и тумэ́ на причхудэ кан тэ шунэ́н.
5. Э проро́ки ракирдэ́ тумэ́нгэ: “Рисён нэвэ́стыр акана́, со кэ екх тумэ́ндыр, пэ́скирэ бибахталэ́ дромэндыр, фуипнастыр, со тумэ́ кэрэ́нас, и ячэ́нпэ тэ дживэ́н пэ пхув, сави́ дыя́ Рай Дэвэ́л тумэ́нгэ, и тумарэ́ дадэ́нгэ ґара́ векэндыр и пэ ве́ки.
6. И на джа́н пала́л пал явирэ дэвлорэ́ тэ дынаринэ́н лэ́нгэ, и тэ кэрэ́н паты́в лэ́нгэ, и на дэн яг холякэ андрэ́ Ма́ндэ тэ холясовав пэ тумэ́ндэ пал бутя́, со кэрдэ́ тумарэ́ васта́, соб (кай) Мэ тэ на кэра́в дош тумэ́нгэ.”
7. Нэ тумэ́ на шундлэ́ Ман, – ракирэ́ла Рай Дэвэ́л, – соб (кай) тумэ́нгэ тэ на дэн яг холякэ андра́л Ма́ндэ тэ холясовав пэ тумэ́ндэ пал бутя́ (налачхэ́ рэ́нды), со кэрдэ́ тумарэ́ васта́ ваш дош [холы́-р.с.] пэ́скэ.”
8. Палдава́ адя́кэ ракирэ́ла янголэ́нгиро-болыбна́скиро Рай Дэвэ́л: “Пал дова́, со тумэ́ на шундлэ́ Мирэ́ лава́,
9. акэ, Мэ бичхава́ва, и Мэ ла́ва сарэ́ сэм΄и (ирья́) паш-ратитконэ́ (севернонэ) рига́тыр’, – ракирэ́ла Рай Дэвэ́л, – ‘и Мэ бичхава́ва лэн кэ Навуходоносо́ро, кра́ли пир Вавило́но, Миро писха́ри, и Мэ яна́ва лэн проти дая́ пхув, и проти манушэ́ндэ, кон дживэ́ла пэ дая́ пхув, и проти сарэ́ далэ́ Наюды́тка на́цыи, савэ́ исын трусця́л, и Мэ сарэ́са хасякира́ва лэн, и Мэ кэра́ва адя́кэ, со мануша́ явэ́на тэ дивинэнпэ трашатыр (дара́тыр) пэ лэ́ндэ, тэ дэн шоля сабнаса и лэ́нгэ явэ́ла ве́чно хась/ хасибэ́н.
10. И ишчо (инкэ́) Мэ кэра́ва адя́кэ, со буты́р на явэ́ла лэ́ндэ радымакиро сабэн, и радымакири зан, зан тэрнэскири, и зан тэрнякири, и грукото жорнэндыр (бэлэдинэндыр) пэ сяв (пхурт), и дуд (свэ́то) момолытконэстыр.
11. И сари́ дая́ пхув явэ́ла чхучи́ и сыр траш (дар), и сарэ́ далэ́ на́цыи явэ́на тэ дынаринэ́н крали́скэ дро Вавило́но эфтадэша́ бэрш.
12. Коригэды́р (позжэды́р) явэ́ла адя́кэ: ке́ли проджа́на эфтадэша́ бэрша́, тэды Мэ ла́ва тэ сэндякирав Вавилоно́скирэ крали́с и дая́ нацыя’, – ракирэ́ла Рай Дэвэ́л, – ‘пал лэ́нгиро чорипэ́н, и пхув Халдее́нгири, и Мэ кэра́ва адя́кэ, со ёй явэ́ла ве́чнэс чхучи́.
13. И Мэ яна́ва пэ дая́ пхув сарэ́ Мирэ́ лава́, со Мэ выпхэндём пэ лэ́ндэ, – саро́ дава́ исын чхиндло́ дрэ дая́ лылвари́, сави́ Ереме́ё ангилпхэнэлас пал сарэ́ на́цыи.
14. Пал-дова́ со бут на́цыи и барэ́ кра́лья кэрэ́на лэ́ндыр, кокорэндыр Халдеендыр, писхарье́н, и Мэ отда́ва фуипнаса палэ лэ́нгэ пал лэ́нгирэ рэ́нды и бутя́, со кэрдэ́ лэ́нгирэ васта́.”
15. И ишчо (инкэ́), со Рай Дэвэ́л, Дэвэ́л Израилёскиро, пхэндя́ ма́нгэ: “Лэ тахта́й (чаша) моляса (виноса), со исын пхэрды́ холя́са Мирэ́ вастэ́стыр, и кэр адя́кэ, соб (кай) сарэ́ Наюды́тка на́цыи, кэ савэ́ Мэ бичхадём тут, тэ пьен лэ́стыр.
16. И ёнэ выпье́на, и ёнэ явэ́на тэ кунинэнпэ (шатынэнпэ), и ёнэ явэ́на тэ дылнён, ке́ли дыкхэ́на курта́ла, сави́ Мэ бичхава́ва пэ лэ́ндэ.”
17. И Мэ, Ереме́ё, лыём тахта́й (чаша) Ра́скирэ-Дэвлэ́скирэ вастэ́стыр, и мэ зачхудём тэ пье́н сарэ́ Наюды́тка на́цыи, кэ савэ́ Рай Дэвэ́л бичхадя́ ман:
18. кэ Ерусалимо и кэ сарэ́ фо́рья Юдэя́тыр, лэ́нгирэ кралье́н и лэ́нгирэ тхагарьен, соб (кай) тэ кэра́в лэ́ндыр чхучо́ штэ́то, соб (кай) пэ лэ́ндэ тэ дивинэнпэ трашаса [дара́тыр-р.с.], тэ сипинэн, Мэ кэра́ва лэ́нгирэ лавэ́стыр кошыбэ́н (арман), сыр дава́ исын аж и кэ дава́ дывэ́с;
19. Фараонос, крали́с Египтоскирэс, лэ́скирэ дынарье́н, лэ́скирэ тхагарьен, и сарэ́ лэ́скирэ манушэ́н:
20. и сарэ́н мешанонэ манушэ́н, сарэ́ кра́лья Узоскирэ пхувья́тыр, сарэ́-кралье́н Филистимэнгирэ пхувья́тыр: Ашкелоностыр, Газатыр, Экроностыр, и кон яця́пэ Азотостыр [Ашдодатыр-ю.о.];
21. манушэ́н Эдомостыр, Моавостыр и Амоноскирэ чхавэ́;
22. и сарэ́ кралье́н пир Ти́ро и сарэ́ кралье́н пир Сидоно, и сарэ́ кра́лья пир островы, савэ́ исын пал панинга́ морёскирэ (дэрьявэ́скирэ).
23. Кэ Дедано, Те́ма и Бузо, савэ́ндэ яго́ры пэ балэнгирэ пе́йсы исын обчхиндлэ́;
24. и сарэ́ кралье́н пир Аравия и сарэ́ кралье́н пэ мешанонэ манушэ́ндэ, савэ́ дживэ́на пэ чхучэ́ прахи;
25. и сарэ́ кралье́н Зимриятыр, и кэ сарэ́ кра́лья Эламостыр, и кэ сарэ́ кра́лья Мидиятыр;
26. и сарэ́ кралье́н паш-ратитконэ́ (севернонэ) рига́тыр, дура́л и пашы́л екх явирэстыр, и сарэ́ кралипэна́ пэ свэ́то, савэ́ исын пир пхувья́киро барипэ́н, и кра́ли Сесаха [Шэшахо-ю.о.] выпье́ла пало́ лэ́ндэ.
27. И ту пхэн лэ́нгэ: ‘Адя́кэ ракирэ́ла болыбна́скирэ-янголэ́нгиро Рай Дэвэ́л, Израилёскиро Дэвэ́л: ‘Пье́н и матён, и чхадэн, и пэрэ́н, и на уштэ́н буты́р анги́л курта́ла, сави́ Мэ бичхадём пэ тумэ́ндэ.
28. И адя́кэ явэ́ла: ко́ли ёнэ отпхэнэнапэ тэ лэн тахта́й тырэ́-вастэ́стыр тэ пье́н, тэды ту пхэн лэ́нгэ: ‘Адя́кэ ракирэ́ла Рай Дэвэ́л болыбна́скирэ-янголэ́нгиро: ‘Тумэ́ сан бангэ́ тэ пье́н.’
29. И дыкхэ́н! Мэ ла́ва тэ янав биба́хт (бари би́да) пэ фо́ро, пэ саво́ исын Миро лав, и со тумэ́, хай, ячэ́напэ насэндякирдэ пхарэ́с? Над, тумэ́ явэ́на пхарэ́с сэндякирдэ, пал-дова́ со Мэ кхара́ва курта́ла пэ сарэ́ндэ, кон дживэ́ла пэ пхув, ракирэ́ла Рай Дэвэ́л болыбна́скирэ-янголэ́нгиро.
30. Палдава́ ту, Ереме́ё, ангилпхэн (пророчын) лэ́нгэ сарэ́ кадалэ́ лава́ и пхэн лэ́нгэ: “Рай Дэвэ́л загриминэла вучипна́стыр, и Ёв пхэнэ́ла Пэ́скирэ заня́са Пэ́скирэ свэнтонэ́ штэто́стыр; Ёв загриминэла зоралэ́с пэ Пэ́скири пхув, сы́рбы кодолэ́, савэ́ тасавэна винаградо, пэ сарэ́ндэ, кон дживэ́ла пэ пхув.
31. Глумо (шумо) доджа́ла кэ яго́ры (кэ краи́) пхувья́кирэ: пал-дова́ со Растэ-Дэвлэ́стэ исын чинга́рд (споро) Наюдытконэ́ нацые́нца, Ёв явэ́ла тэ лыджа́л сэ́ндо кажнонэ́ лочаса (плотяса), нэ фуе́ манушэ́н Ёв бичхавэ́ла сарэ́н тэл курта́ла,” – адя́кэ ракирэ́ла Рай Дэвэ́л.
32. Адя́кэ ракирэ́ла Рай Дэвэ́л болыбна́скирэ-янголэ́нгиро: ‘Акэ, биба́хт (бари би́да) явэ́ла тэ джал екхэ нацыятыр кэ яви́р, и баро́ штормо ґаздэ́лапэ дуратунэ́ ягорэндыр (краендыр) пэ пхув.’”
33. И бари хась (хасибэ́н) пэ манушэ́ндэ явэ́ла Ра́стыр-Дэвлэ́стыр дро дова́ дывэ́с екхэ ягоро́стыр пэ пхув аж кэ яви́р яго́ро пэ пхув: нико́н на явэ́ла тэ обровэл лэн, нико́н на укэдэла лэн, нико́н на явэ́ла тэ гаравэл лэн, ёнэ явэ́на сыр гнэё, пир сари́ пхув.
34. Тугинэн роибнаса, чхупна́рья (пастыри), и ровэ́н! Катынэнпэ дрэ пра́ска, барэ́ шэрэ́ пир ґурто! Пал-дова́ со подгинэ́ дывэса́, соб (кай) тумэн тэ хасякирэ́н, и тэ росчхурдэн; тумэ́ пэрэ́на сыр куч кхорэ́ (сасу́ды).
35. И чхупнарьенгэ на явэ́ла штэ́то тэ гарадён, и барэ́ шэрэнгэ пир ґурто тэ нашэ́н.
36. Чхупнарьенгири зан, сыр ёнэ ровэна, и барэ́-шэрэнгири пир ґурто зан явэ́на шундлэ́, пал-дова́ со Рай Дэвэ́л хасякирдя́ лэ́нгирэ чарьитка фэ́лды,
37. и штыл (тиха) фэ́лды вычингирдэ пал бари холы́ Ра́стыр-Дэвлэ́стыр.
38. Ёв мэкця́ Пэ́скирэ манушэ́н сы́рбы шчэр (ле́во) пэ́скири гаравипнаскири (логово), палдова́ лэ́нгири пхув яця́ чхучи́ пир дова́, со вэ́рго исын древа́н мижэх и пал Раскири-Дэвлэ́скири бари холы́.”
1. Дро са́мо англыпэ́н (начало), ке́ли кралиндя Иоакимо, чхаво́ Иосия́скиро, кра́ли пир Юдэ́я, явдя́ дасаво лав Ра́стыр-Дэвлэ́стыр ма́нгэ, Еремеёскэ, пхэни́:
2. “Адя́кэ ракирэ́ла Рай Дэвэ́л: ‘Тэрдёв пэ грэ́да (дво́ро) Кхангирья́кири Ра́скирэ-Дэвлэ́скири и пхэн сарэ́ форьенгэ Юдэя́тыр, со явэ́на тэ дэн паты́в дрэ Кхангири́ Ра́скирэ-Дэвлэ́скири, сарэ́ лава́, со Мэ припхэнава ту́кэ тэ пхэнэ́с лэ́нгэ: На гарав ани е́кх лав.
3. Кажно лэ́ндыр, хай, явэ́ла тэ кандэл и тэ рискирэ́л пэ́скирэ бибахталэ́ дромэ́стыр, соб (кай) Мэ тэ обрискирав (тэ отпарував) Пэс чорипна́стыр, саво́ Мэ думинава тэ кэра́в лэ́нгэ пал фуипэ́н, со ёнэ кэрэ́на.’”
4. И ту пхэнэ́са лэ́нгэ: ‘Адя́кэ ракирэ́ла Рай Дэвэ́л: ‘Ко́ли тумэ́ на кандэ́на Ман, соб (кай) тэ псирэ́н пир Миро Зако́но, саво́ Мэ дыём тумэ́нгэ;
5. соб (кай) тэ причхувэ́н кан кэ Мирэ́ дынарьенгирэ, Мирэ́ пророкэ́нгирэ лава́, савэ́н Мэ бичхадём кэ тумэ́, пэ зло́ко (ра́нко) Мэ бичхававас, нэ тумэ́ на причхудэ кан;
6. тэды Мэ кэра́ва далэ́ Кхангирья́тыр яви́р Сило́мо (Шыло), и Мэ кэра́ва адя́кэ, со пэ лэ́стэ явэ́на тэ кэрэ́н прокошыбэна (арманя) сарэ́ Наюды́тка на́цыи пэ пхув.’”
7. И сарэ́ рашая́, и проро́ки, и сарэ́ мануша́ шундлэ́, сыр Ереме́ё ракирэ́лас далэ́ лава́ дрэ Кхангири́ Ра́скирэ-Дэвлэ́скири.
8. И яця́ адя́кэ: ке́ли Ереме́ё кончындя (пирияця́) тэ ракирэ́л саро́, со Рай Дэвэ́л припхэндя́ лэ́скэ тэ пхэнэ́л сарэ́ манушэ́нгэ, тэды рашая́, и проро́ки, и сарэ́ яви́р мануша́ ухтылдэ́ лэс, ракири́: “Ту, чачэс, мэрэ́са [банго́ тэ мэрэс-р.с.]!
9. Со́скэ ту ангилпхэнэса Ра́скирэ-Дэвлэ́скирэ лавэ́стыр, ракири́: ‘Дава́ кхэр явэ́ла сы́рбы Сило́мо (Шыло), и дава́ фо́ро явэ́ла чхучо́, би манушэ́нгиро?’” И сарэ́ мануша́ скэдынэ́пэ проти Еремеёстэ дрэ Кхангири́ Ра́скирэ-Дэвлэ́скири.
10. Ке́ли тхага́рья Юдэя́кирэ шундлэ́ сарэ́ кадалэ́ лава́, ёнэ гинэ́ Крали́скирэ кхэрэ́стыр кэ Кхангири́ Ра́скирэ-Дэвлэ́скири, и ёнэ бэшнэ́ кэ загиибэ́н дрэ нэви́ по́рта дрэ Кхангири́ Ра́скирэ-Дэвлэ́скири.”
11. И рашая́, и проро́ки пхэндлэ́ тхагарьенгэ, и сарэ́ манушэ́нгэ, ракири́: “Адава́ ману́ш домардяпэ (мол) тэ мэрэ́л! Пир дова́, со ёв ангилпхэнэлас проти дава́ фо́ро, сыр тумэ́ шундлэ́ пэ́скирэ канэнца.”
12. Тэ́ньци пхэндя́ Ереме́ё сарэ́ тхагарьенгэ и сарэ́ манушэ́нгэ, пхэни́: “Рай Дэвэ́л бичхадя́ ман тэ ангилпхэнав проти дава́ Кхэр и проти дава́ фо́ро сарэ́ лавэ́нца, со тумэ́ шундлэ́.
13. Акэ, палдава́ парувэн кэ фэды́р тумарэ́ дрома́, и дова́, со тумэ́ кэрэ́на, и кандэ́н зан Раскири-Дэвлэ́скири, тумарэ́ Дэвлэ́скири, тэды Рай Дэвэ́л потангинэла (пожалинэла) пал доя́ биба́хт, со Ёв выпхэндя пэ тумэ́ндэ.
14. Нэ со пал ма́ндэ, ґа́да, Мэ сом дрэ тумарэ́ васта́; кэрэ́н ма́нца дова́, со здэлапэ (сыкавэлапэ) тумэ́нгэ чачунэ́с и лачхэ́с.
15. Нэ тумэ́ джинэ́н чачэс, со ко́ли тумэ́ мулякирэна ман, тумэ́ джинэ́н, со тумэ́ лэ́на бибангипнаскиро рат пэ пэ́стэ, пэ дава́ фо́ро, и пэ лэ́скирэ манушэ́ндэ; пал-дова́ со, чачунэ́с, Рай Дэвэ́л бичхадя́ ман тэ пхэна́в сарэ́ далэ́ лава́ дрэ тумарэ́ кана́.”
16. И тхага́рья и сарэ́ мануша́ пхэндлэ́ рашангэ и пророкэнгэ: “Дава́ ману́ш на домардяпэ (намол) тэ мэрэ́л; пал-дова́ со ёв пхэндя́ амэ́нгэ Ра́скирэ-Дэвлэ́скирэ лавэ́стыр, амарэ́ Дэвлэ́стыр.”
17. Тэ́ньци вари-савэ́ пхурыдыра́ пэ пхув ґаздынэ́пэ и пхэндлэ́ сарэ́ манушэ́нгэ, савэ́ скэдынэ́пэ, пхэни́:
18. “Михай Морашостыр ангилпхэнэлас дро дывэ́с, ке́ли о Езэки́я сыс кра́ли пир Юдэ́я, и пхэндя́ сарэ́ манушэ́нгэ Юдэя́тыр, ракири́: ‘Адя́кэ ракирэ́ла болыбна́скирэ-янголэ́нгиро Рай Дэвэ́л: “Сио́но явэ́ла пхарадо сыр пхув плуґостыр (пхарадятыр), Ерусалимо́стыр ячэ́напэ руи́ны [бара́-р.с.], И бэ́рга, кай исын Кхангири́, явэ́ла сыр бэ́ргица машки́р вэш.
19. Ци Езэки́я, кра́ли Юдэя́киро, и сари́ Юдэ́я мулякирдэ́ лэс? Ци со ёв, Езэки́я, на дарэлас и на родэлас Дэвлэ́скири ла́ска. И Рай Дэвэ́л потангиндя (пожалиндя) пал биба́хт, со Ёв выпхэндя пэ лэ́ндэ. Нэ амэ кэра́са баро́ чорипэ́н проти амарэ́ дия́.”
20. Дыкхэ́н, сыс адя́кэ-паць екх ману́ш, саво́ ангилпхэнэлас Ра́скирэ-Дэвлэ́скирэ лавэ́са, о Урия, чхаво́ Шэмаяскиро Кирьят-Ярмостыр, кон ангилпхэнэлас проти дава́ фо́ро и проти дая́ пхув дасавэ́-самонэ лавэ́нца, со Ереме́ё.
21. И ке́ли кра́ли Иоакимо, и сарэ́ лэ́скирэ зормануша, и сарэ́ тхага́рья шундлэ́ лэ́скирэ лава́, тэды кра́ли родыя, сыр тэ мулякирэ́л лэс. Нэ сыр Урия шундя́ дава́, ёв дарандыя, и ёв насця и гия́ кэ Еги́пто.
22. Тэды кра́ли Иоакимо бичхадя́ манушэ́н кэ Еги́пто: Елнатанос, чхавэ́с Ахбороскирэс, и явирэ манушэ́н лэ́са кэ Еги́пто,
23. савэ́ лыджинэ́ пэ́са Урияс Египто́стыр, и яндлэ́ лэс кэ кра́ли Иоакимо; и ёв мулякирдя́ лэс куртала́са и чхурдыя́ яври́ лэ́скиро тру́по дрэ маґилы, кай сыс нарайканэ (чорорэ́) мануша́.
24. Нэ сароекх (усае́кх) Ахикамоскиро васт, чхавэ́скирэ Шафаноскиро, сыс пал Еремеёстэ, соб (кай) тэ на отдэ́н лэс дрэ васта́ манушэ́нгэ тэ замарэ́н лэс.
25. Миро ди пририкирдо зоралэ́с кэ пра́хо; джидякир ман пир Тыро́ лав.
26. Мэ пхэндём анги́л сарэ́ндэ, со мэ кэрдём и Ту отпхэндян ма́нгэ.
27. Кэр, соб (кай) мэ тэ ґалёвав Тырэ́ упхэныбэна́ и мэ ява́ва тэ розлав Тырэ́ ди́вна бутя́.
28. Миро ди калёла, зораля́кир ман Тырэ́ лавэ́са.
29. Лэ криг ма́ндыр хохаибэ́н и сыка́в Тыри́ ла́ска пир Тыро́ Зако́но.
30. Мэ выкэдыём чачипна́скиро дром, и мэ рискирдём годы́ кэ Тыро́ чачипэ́н.
31. Мэ пририкиравпэ кэ Тыро́ допхэныбэ́н, о Раё Дэ́вла, на ладжакир ман.
32. Мэ прастава дромэ́са пир Тырэ́ припхэныбэна́, ке́ли Ту дыя́н зор мирэ́ илэскэ.
17. Састы́р востринэла састы́р, адя́кэ-паць ману́ш востринэла лачхипэ́н пэ́скирэ малэстэ.
1. Амэ древа́н мангаса тумэн, пшала́лэ, тэ на кунинэнпэ дро дова́, со амаро́ Рай-Дэвэ́л, Ису́со Христо́со явэ́ла, соб (кай) тэ скэдэл амэн кэ Пэ.
2. И соб (кай) тумэ́ тэ на сыгнён тэ зджан годятыр ци и тэ на пиридживэн пал духоскиро сыкаибэ́н, ни лавэ́стыр, ни лылэстыр, сы́рбы дава́ амэ бичхадям, савэ́ выпхэнэна, со Ра́скирэ-Дэвлэ́скиро дывэ́с какана́ явдя́.
3. Дыкхэ́н, соб (кай) ние́кх тэ на хохавэ́л тумэн: пал-дова́ со кадава́ дывэ́с на явэ́ла кэ / жы́ко дова́ часо, пака явэ́ла отгиибэн Дэвлэ́стыр и явэ́ла сыкадо грэхэнгиро ману́ш, савэ́скэ трэй тэ хасёл;
4. ёв явэ́ла тэ джал проти саро́ свэ́нто, со кхарэ́на Дэвлэ́са ци свэнтымаса, адя́кэ, со ёв бэшэ́ла дрэ Дэвлэ́скири Кхангири́ сы́рбы Дэвэ́л и явэ́ла тэ выдэл пэс пал Дэвлэ́стэ.
5. Нау́што тумэ́ на рипирэна, со мэ, ке́ли со́мас кэ тумэ́, ракирдём тумэ́нгэ пал дава́?
6. И какана́ тумэ́ джинэ́на, со на домэкэла лэс тэ сыкавэ́л пэс дро лэ́скиро часо.
7. Пал-дова́ со чораханы бизладоскири зор какана́ кэрэ́ла буты́, и екх пака обрикирэла саро́ дава́, и ёв явэ́ла тэ кэрэ́л дава́ кэ/жы́ко дова́ часо, пака лэ́на лэс криг.
8. И тэды би законоскиро грэхэнгиро ману́ш сыкавэ́ла пэс, савэ́с Рай Дэвэ́л Ису́со замарэла (мулякирэ́ла) Пэ́скирэ уштэ́нца, ке́ли явэ́ла.
9. Бизаконоскиро ману́ш явэ́ла налачхэскирэ зорья́са, ёв явэ́ла тэ сыкавэ́л бари зор, и хоханэ́ знаме́нии (ґертыка́) и ди́вы,
10. ёв явэ́ла сарэ́ хохаибнаса ваш манушэ́нгэ, савэ́ хасёна пал дова́, со ёнэ на прилынэ́ чачуны́ паты́в ваш пэ́скиро зракхибэ́н.
11. И пал дава́ Дэвэ́л бичхавэ́ла зор лэ́нгэ, соб (кай) ёнэ тэ пэрэ́н тэл дошвалэ сыклякирибэ́н и тэ патя́н хохаибнаскэ.
12. Мэк тэ явэ́н сэндиндлэ сарэ́, кон на закамдя́ тэ патял чачипнаскэ, нэ выкэдыя́ начачипэ́н.
13. Нэ амэ́нгэ трэй, пшала́лэ, саро́ часо тэ парикирас Дэвлэ́скэ пал тумэ́ндэ, савэ́н Рай Дэвэ́л выкэдыя́, пал-дова́ со Ёв англэды́р выкэдыя́ тумэн ваш зракхибэ́н пир Духоскири зор и патяибэ́н дро чачипэ́н;
14. кэ саво́ Ёв и кхардя́ тумэн пир амаро́ роспхэныбэн пал бахталы́ зан (звесь), соб (кай) тумэ́ндэ тэ явэ́н паш дрэ сла́ва амарэ́ Ра́скирэ-Дэвлэ́скири, Исусо́скирэ Христососкири.
15. И палдава́, пшала́лэ, явэ́н зоралэ́ пир ду́хо (фа́но) и рикирэнпэ упхэныбнаскэ, савэ́скэ тумэ́ са́нас высыклякирдэ, ци пир лав, ци пир амаро́ лыл.
16. Мэк Кокоро́ амаро́ Рай Дэвэ́л, Ису́со Христо́со, и Дэвэ́л амаро́ Дад, Савэ́скэ яця́м дро́га амэ и дыя́ пир бахталыпэ́н ве́чно подрикирибэ́н и лачхи́ наде́я,
17. тэ подрикирэ́л тумарэ́ илэ и тэ кэрэ́л зоралэды́р тумэн дро кажно лав и лачхо́ рэ́ндо.
Romani Bible Baltic 2019
United Bible Societies for the Baltic Romani Mission