Bible in one year October 21Jeremiah 27:1-221. Анги́л, ке́ли о Сэдэки́я; чхаво́ Иосия́скиро сыс кра́ли пэ Юдэ́я, дасаво лав явдя́ Еремеёскэ.2. Адя́кэ ракирэ́ла Рай Дэвэ́л ма́нгэ: “Кэр пэ́скэ саструнэ́ пенты и ґа́мо, и чхув лэн пэ́скэ пэ мэн,3. и бичха́в лэн Идумеякирэ (Эдомоскирэ) крали́скэ, Моавоскирэ крали́скэ, Амонитэнгирэ-чхавэ́нгирэ крали́скэ, Тироскирэ крали́скэ, Сидоноскирэ крали́скэ бичхаибнаскирэнгирэ вастэ́са, савэ́ явэ́на кэ Ерусалимо, кэ кра́ли Сэдэки́я пир Юдэ́я.4. И припхэн лэ́нгэ тэ пхэнэ́н лэ́нгирэ рангэ: ‘Адя́кэ ракирэ́ла болыбна́скирэ-янголэ́нгирэ Рай Дэвэ́л, Дэвэ́л Израилёскиро – адя́кэ тумэ́ пхэнэ́н тумарэ́ рангэ:5. Мэ кэрдём пхув, создыём манушэ́с и мурдалэ́н, савэ́ исын пир сари́ пхув Мирэ́ барэ́ зорья́са и Мирэ́ выдиндзькирдэ псикэса, и Мэ отда́ва дава́ кодолэ́скэ, кон исын лачхо́ Ма́нгэ.6. И акана́ Мэ да́ва сарэ́ далэ́ пхувья́ дро васт Навуходоносороскиро, крали́скэ пэ Вавило́но, Мирэ́ писхари́скэ, и Мэ да́ва адя́кэ-паць фэлдытконэ мурдалэ́н лэ́скэ тэ дынаринэ́н лэ́скэ.7. И сарэ́ Наюды́тка на́цыи явэ́на тэ дынаринэ́н лэ́скэ, лэ́скирэ чхавэ́скэ, и лэ́скирэ-чхавэ́скирэ чхавэ́скэ анги́л дова́, сыр явэ́ла адя́кэ-паць хасибны́тко дывэ́с лэ́скирэ пхувьякэ. И тэды бут Наюды́тка на́цыи и барэ́ кра́лья тыкнякирэна Вавило́но тэ дынаринэ́н лэ́скэ.8. И явэ́ла адя́кэ: кажно Наюдытко нацыя и кралипэ́н, саво́ на явэ́ла на дынаринэ́л Навуходоносороскэ, крали́скэ пэ Вавило́но, и саво́ на чхувэ́ла пэ́скири мэн дро ґа́мо крали́скиро пэ Вавило́но, дая́ нацыя Мэ пхарэ́с сэндякирава, – ракирэ́ла Рай Дэвэ́л, – куртала́са, бокхаса и франсэнца акана́ анги́л дова́, сыр Навуходоносороскиро васт хасякирэ́ла сарэ́са лэн.9. И тумэ́ палдава́ на кандэ́н тумарэ́ пророкэ́н, тумарэ́ зумакирибнаскирэн, тумарэ́ сунэ́-пхэныбнаскирэн, тумарэ́ човаханэн, тумарэ́ джиныбнаскирэн пир чэргэня́, савэ́ ракирэ́на тумэ́нгэ, пхэни́: ‘Тумэ́ тэ на дынаринэ́н крали́скэ Вавилоноскирэскэ’10. Ёнэ ангилпхэнэна хоханэ́с тумэ́нгэ, соб (кай) тэ дурьякирэн тумэн дур тумарэ́ пхувья́тыр, и, соб (кай) Мэ тэ традав криг тумэн, соб (кай) тумэ́ тэ хасён.11. Нэ нацыя, сави́ чхувэ́ла пэ́скири мэн дро ґа́мо крали́скиро Вавилоно́стыр, и сави́ явэ́ла тэ дынаринэ́л лэ́скэ, Мэ да́ва во́ля лэ́нгэ тэ ячэ́нпэ пэ лэ́нгири пхув’, – ракирэ́ла Рай Дэвэ́л, – ‘и ёнэ явэ́на тэ обкэрэн дая́ пхув, и ёнэ явэ́на тэ дживэ́н пэ ла́тэ.’”12. И мэ пхэндём Сэдэкияскэ, крали́скэ пэ Юдэ́я, сарэ́ дасавэ́-сама лава́, ракири́: “Чхувэ́н тумарэ́ мэня дро ґа́мо крали́скиро Вавилоно́стыр, и тумэ́ дынаринэ́н лэ́скэ, и лэ́скирэ манушэ́нгэ и тэ дживэ́н’ явэ́на тумэ́:13. палсо́ тэ мэрэс ту́кэ, и тырэ́ манушэ́нгэ куртала́тыр, бокха́тыр, и мэрибнытконэ франсэндыр, сыр и ракирэ́лас Рай Дэвэ́л пал Наюдытко нацыя, со на явэ́ла тэ дынаринэ́л крали́скэ Вавилоноскирэскэ?14. И на шунэ́н лава́ пророкэ́нгирэ, савэ́ ракирэ́на тумэ́нгэ: ‘Тумэ́ на явэ́на тэ дынаринэ́н крали́скэ Вавилоноскирэскэ, пал-дова́ со ёнэ ангилпхэнэна хохаибэ́н тумэ́нгэ;15. пал-дова́ со Мэ на бичхадём лэн’, – ракирэ́ла Рай Дэвэ́л, – ‘нэ ёнэ ангилпхэнэна хоханэ́с Мирэ́ лавэ́стыр, соб (кай) Мэ тэ традав криг тумэн, соб (кай) тумэ́ тэ хасён – тумэ́, и тумарэ́ проро́ки, кон ангилпхэнэла тумэ́нгэ!’”16. И мэ, Ереме́ё, ракирдём кэ рашая́, и кэ сарэ́ мануша́: ‘Адя́кэ ракирэ́ла Рай Дэвэ́л!’: На причхувэ́н кан кэ лава́ тумарэ́-пророкэ́нгирэ, савэ́ ангилпхэнэна тумэ́нгэ, ракири́: ‘А́кэ, сыр янэ́на палэ кхорэ́ (сасу́ды) Ра́скирэ-Дэвлэ́скирэ Кхангирья́тыр’, – пал-дова́ со ёнэ ангилпхэнэна хоханэ́с тумэ́нгэ.17. На шунэ́н лэн. Дынаринэ́н крали́скэ Вавилоно́стыр, и дживэ́н пэ́скэ! Со́скэ тэ явэ́л чхучо́ штэ́то далэ́ форо́стыр?18. Нэ ко́ли ёнэ исын проро́ки, и, ко́ли исын Дэвлэ́скиро лав лэ́ндэ, мэк ёнэ тэ мангэ́н зоралэ́с Рас-Дэвлэ́с, янголэ́нгирэ-болыбнаскирэс, соб (кай) кхорэ́ (сасу́ды), савэ́ ячнэ́пэ дрэ Ра́скирэ-Дэвлэ́скиро Кхангири́, и дро кхэр Крали́скиро Юдэя́киро, и дро Ерусалимо тэ на пириджан кэ Вавило́но.19. Пал-дова́ со, акэ, со ракирэ́ла янголэ́нгиро-болыбна́скиро Рай-Дэвэ́л пал сты́лбы, и пал харкуно (ме́дно) мо́рё (дэрья́в), и пал скаминдорэ пэ ротыцы, и пал яви́р кхорэ́ (сасу́ды), со ячнэ́пэ дро дава́ фо́ро,20. сарэ́ долэ́ куч предме́ты, савэ́ на лыя́ Навуходоносо́ро пэ́са, ке́ли лыджия́ дро пле́но Иехонияс, Ехакимоскирэ чхавэ́с, крали́с пир Юдэ́я, Ерусалимо́стыр кэ Вавило́но, и сарэ́ лачхэ́-родоскирэн манушэ́н Юдэя́тыр и Ерусалимо́стыр,21. чачо́, адя́кэ ракирэ́ла болыбна́скирэ-янголэ́нгиро Рай Дэвэ́л, Израилёскиро Дэвэ́л пал кхорэ́ (сасу́ды), со ячэ́напэ дрэ Кхангири́ Раскири-Дэвлэ́скири, и дро кхэр крали́скиро Юдэя́тыр и дро Ерусалимо:22. лэн лыджа́на криг дро Вавило́но, и одо́й явэ́на ёнэ кэ дывэ́с, ке́ли Мэ ява́ва кэ ёнэ’ – ракирэ́ла Рай Дэвэ́л.’ Тэды Мэ яна́ва лэн и Мэ чхува́ва палэ лэн пэ дава́ штэ́то.’”Jeremiah 28:1-171. И сыс дава́ дро дова́-са́мо бэрш, анги́л, ке́ли о Сэдэки́я кралиндя пэ Юдэ́я, дро шта́рто бэрш, дро па́нджто чхон, со Анания, Азуроскиро чхаво́, проро́ко Гаваоностыр, ракирдя́ ма́нгэ дрэ Кхангири́ Ра́скирэ-Дэвлэ́скири анги́л рашандэ и сарэ́ манушэ́ндэ, и пхэндя́:2. “Адя́кэ ракирэ́ла болыбна́скирэ-янголэ́нгиро Рай Дэвэ́л; Израилёскиро Дэвэ́л: ‘Мэ пхагирдём [пхагирава-р.с.] ґа́мо крали́скиро Вавилоно́стыр.’3. Пир дуй бэрш Мэ яна́ва палэ пэ дава́ штэ́то сарэ́ кхорэ́ (сасу́ды), Ра́скирэ-Дэвлэ́скирэ Кхангирья́тыр, савэ́ о Навуходоносо́ро, кра́ли Вавилоно́скиро, лыя́ криг кадалэ́ штэто́стыр и лыджия́ кэ Вавило́но.4. И Мэ яна́ва палэ пэ дава́ штэ́то Иехонияс, чхавэ́с Ёакимоскирэс, крали́с пэ Юдэ́я, сарэ́ Юдэя́кирэ пленонэн, кон гия́ кэ Вавило́но’, – ракирэ́ла Рай Дэвэ́л – пал-дова́ со Мэ пхагирава ґа́мо крали́скиро Вавилоно́стыр”.’5. Тэ́ньци проро́ко о Ереме́ё ракирэ́лас кэ проро́ко Анания анги́л рашандэ, и анги́л сарэ́ манушэ́ндэ, савэ́ сыс тэрдэ́ дрэ Кхангири́ Ра́скирэ-Дэвлэ́скири.6. И пхэндя́ проро́ко Ереме́ё: “Ами́нь! Мэк Рай Дэвэ́л тэ кэрэ́л адя́кэ! Мэк Рай Дэвэ́л тэ кэрэ́л дро чачипэ́н тырэ́ лава́, со ту ангилпхэндян тэ янэ́н кхорэ́ (сасу́ды) Кхангирья́тыр Ра́скирэ-Дэвлэскирьятыр и сарэ́ пленонэн Вавилоно́стыр пэ дава́ штэ́то!7. Нэ фэ́ни шун акана́ дава́ лав, со мэ пхэна́ва зоралэ́с ту́кэ и сарэ́ тырэ́ манушэ́нгэ:8. Э проро́ки, савэ́ сыс англэды́р ма́ндэ и англэды́р ту́тэ, ангилпхэнэнас адя́кэ-паць пал бут тхэма (страны) и пал барэ́ кралипэна́, пал марибэ́н, пал биба́хт [бари би́да-р.с.] и пал фра́нсы.9. О проро́ко, саво́ ангилпхэнэлас рама́нё, ке́ли лэ́скиро лав тэ ангилпхэнэл дова́, со явэ́ла, ко́ли кэрэласпэ дро чачипэ́н, тэды лэс приджинэнас пал пророкостэ, савэ́с Рай Дэвэ́л, чачэс, бичхадя́.”10. И проро́ко Анания злыя́ ґа́мо пророкоскирэ Еремеёскирэ мэнятыр и пхагирдя́ лэс.11. И пхэндя́ Анания анги́л якха́ сарэ́ манушэ́ндэ далэ́ лава́: “Адя́кэ ракирэ́ла Рай Дэвэ́л: ‘Адя́кэ Мэ пхагирава ґа́мо крали́скиро Навуходоносороскиро Вавилоно́стыр пир дуй бэрш криг мэнятыр сарэ́ нацые́ндыр!” И гия́ проро́ко Ереме́ё пэ́скирэ дромэ́са.12. И сыс лав Ра́стыр-Дэвлэ́стыр кэ Ереме́ё пало́ (после) дова́, ке́ли проро́ко Анания пхагирдя́ ґа́мо криг мэнятыр пророкоскирэ Еремеёскирэ:13. “Джа́ и пхэн Ананияскэ, ракири́: ‘Адя́кэ ракирэ́ла Рай Дэвэ́л: ‘Ту пхагирдян каштуно ґа́мо, нэ ту кэрэ́са саструно ґа́мо пэ лэ́скиро штэ́то.’14. Пал-дова́ со адя́кэ ракирэ́ла болыбна́скирэ-янголэ́нгиро Рай Дэвэ́л, Дэвэ́л Израилёскиро: “Мэ чхува́ва саструно ґа́мо пэ мэн сарэ́ Наюдытконэ́ нацыенгэ, соб (кай) ёнэ тэ дэн ра́да тэ дынаринэ́н Навуходоносороскэ, крали́скэ Вавилоно́стыр; и ёнэ явэ́на тэ дынаринэ́н лэ́скэ: Мэ адя́кэ-паць и фэлдытконэ мурдалэ́н (зверен) дыём лэ́скэ!’”15. И пхэндя́ проро́ко Ереме́ё кэ проро́ко Анания: “Шун акана́, Анания: Рай Дэвэ́л на бичхадя́ тут, нэ ту кэрэ́са адя́кэ, соб (кай) адалэ́ мануша́ тэ патя́н дро хохаибэ́н.16. Палдава́ адя́кэ ракирэ́ла Рай Дэвэ́л: ‘А́кэ, Мэ чхурдава тут криг пхувья́кирэ штэто́стыр: ту мэрэ́са, дава́ бэрш, пал-дова́ со ту сыклякирэсас тэ ґаздэ́н бу́нто проти Растэ-Дэвлэ́стэ!”17. И Анания, проро́ко, мыя́ дро дова́-паць бэрш пэ эфта́то (битринэ́нгиро дэ́што) чхон.Psalms 119:33-4033. Сыкля́кир ман, Раё Дэ́вла, Тырэ́ стату́ты, и мэ ява́ва тэ рискирав годы́ кэ ёнэ кэ (ко́нцо) яго́ро.34. Кэр, соб (кай) мэ тэ ґалёвав лэн и мэ ява́ва тэ рикиравпэ зоралэ́с кэ Тыро́ Зако́но и мэ ява́ва тэ приракхав лэс сарэ́ мирэ́ илэ́са.35. Кэр, соб (кай) мэ тэ псирав дромэ́са пир Тырэ́ припхэныбэна́, пал-дова́ со лэ́ндыр мэ бахталёвава.36. Бандякир миро ило́ кэ Тыро́ нарипирибэн, а на кэ ґалкима.37. Ри́скир мирэ́ якха́ тэ на дыкха́в ма́нгэ пэ хартытка (фальшыва) рэ́нды, дэ ма́нгэ джиибэ́н тэ джав Тырэ́ дромэ́са.38. Дэ зор Тырэ́ лавэ́скэ ваш Тырэ́ писхари́скэ, лав, саво́ сыс дыно́ одолэ́нгэ, савэ́ дарэ́на Ту́тыр.39. Ри́скир криг ма́ндыр мири́ ладж, савья́тыр мэ дарава, пал-дова́ со Тыро́ сэ́ндо исын чачуно́.40. Ѓа́да, мэ тырдавапэ кэ Тырэ́ упхэныбэна́, дэ ма́нгэ джиибэ́н пир Тыро́ чачипэ́н.Proverbs 27:18-1818. Кон ракхэ́ла инжыритко кашт (смоковница), кодова́ явэ́ла тэ хал лэ́скири пхабай; адя́кэ-паць, кон приракхэла пэ́скирэ хула́с, одова́ явэ́ла дрэ паты́в.2 Tesaloničanenge 3:1-181. Какана́, амэ мангаса тумэн, пшала́лэ, тэ мангэ́нпэ Дэвлэ́скэ пал амэ́ндэ, соб (кай) Ра́скирэ-Дэвлэ́скиро лав тэ розджалпэ сы́гэс и тэ славинэлпэ адя́кэ-паць, сыр и тумэ́ндэ;2. и соб (кай) амэ тэ явас зракхнэ́ налачхэ́ и хоханэ́ манушэ́ндыр, пал-дова́ со на дрэ сарэ́ндэ исын патяибэ́н.3. Нэ патяибны́тко исын Рай Дэвэ́л, Саво́ дэ́ла тумэ́нгэ зор и зракхэ́ла налачхэстыр.4. Амэ би кунипнаскиро (твардэс) джина́са пир патяибэ́н дрэ Растэ – Дэвлэ́стэ, со тумэ́ кэрэ́на и дурэды́р явэ́на тэ кэрэ́н дова́, со амэ пхэндям тумэ́нгэ.5. Мэк Рай Дэвэ́л тэ отчхакирэл тумарэ́ илэ кэ Дэвлэ́скири ла́ска и кэ Христосо́скиро вырикирибэн.6. Пшала́лэ, амэ припхэнаса тумэ́нгэ, амарэ́ Ра́скирэ-Дэвлэ́скирэ, Исусо́скирэ Христосо́скирэ лавэ́са, соб (кай) тумэ́ тэ рикирэнпэ криг адасавэ́ пшалэстыр, саво́ дживэ́ла на кэри буты́, а на пир сыклякирибэ́н, саво́ тумэ́ прилынэ́ амэ́ндыр.7. Пал-дова́ со тумэ́ кокорэ́ джинэ́на, со тумэ́нгэ трэй тэ дживэ́н адя́кэ, сыр и амэ, пал-дова́ со амэ на са́мас кирнэ-масэнгирэ, ке́ли амэ дживдям кэ тумэ́;8. амэ на хаям никонэскиро маро́, а кэрдя́м пхари́ буты́ рат и дывэ́с, соб (кай) тэ на явас дро пхарипэ́н никонэ́скэ тумэ́ндыр:9. амэ на дыкхцям пэ дава́, со амэ́ндэ сыс зор тэ лас ловэ́ тумэ́ндыр, нэ амэ камдям тэ сыкавас приме́ро (сыкаибэ́н) тумэ́нгэ, соб (кай) и тумэ́ адя́кэ-паць тэ кэрэ́н дурэды́р.10. Пал-дова́ со, ке́ли амэ са́мас кэ тумэ́, амэ ракирдям тумэ́нгэ дава́: “Ко́ли вари-кон на камэ́ла тэ кэрэ́л буты́, мэк и тэ на хал.”11. Нэ амэ шунаса, со вари-савэ́ мануша́ машки́р тумэ́ндэ дживэ́на биладжаипныткэс дро бу́нто проти Дэвлэ́стэ: ёнэ на кэрэ́на нисави́ буты́, а екх со дыкхэ́на, со яви́р мануша́ кэрэ́на.12. Амэ припхэнаса кадасавэ́ манушэ́нгэ и приракхаса амарэ́ Ра́скирэ-Дэвлэ́скирэ, Исусо́скирэ Христосо́скирэ лавэ́са, соб (кай) ёнэ тэ кэрэ́н буты́ штылэ́с и тэ хан пэ́скиро маро́.13. А тумэ́, пшала́лэ, на кхинён тэ кэрэ́н лачхипэ́н.14. Ко́ли вари-кон на явэ́ла тэ кандэл амаро́ лав, саво́ исын чхиндло́ дро дава́ лыл, одолэ́с манушэ́с зарипирэн, на малынэнпэ (на дружынэн) лэ́са, соб (кай) лэ́скэ тэ явэ́л ладжаво;15. Нэ и тэ на гинэн лэс пал вэргостэ, а сыклякирэ́н лэс сыр пшалэ́с.16. Мэк Рай Дэвэ́л Кокоро́, тэ дэл тумэ́нгэ рама́нё (миро) ўса́ды (сак) дро саро́. Мэк тэ явэ́л Рай Дэвэ́л сарэ́нца тумэ́нца.17. Мэ сом Па́вли, мэ чхина́ва и пиридава “рама́нё” мирэ́ вастэ́са, адя́кэ-паць, сыр мэ кэра́ва дрэ сарэ́ мирэ́ лыла́ сыр шпэ́ра (знако), со кадава́ лыл исын ма́ндыр, мэ адя́кэ чхина́ва:18. Мэк тэ явэ́л бахталыпэ́н амарэ́ Ра́скирэ-Дэвлэ́скиро, Исусо́скирэ Христосо́скиро сарэ́нца тумэ́нца. Ами́нь. Romani Bible Baltic 2019 Maintained by the United Bible Societies for the Baltic Romani Mission