Bible in one year
October 22

1. И, акэ, исын лава́ лылэстыр, саво́ проро́ко Ереме́ё бичхадя́ пхурыдырэнгэ Ерусалимо́стыр, савэ́ ячнэ́пэ машки́р пленнонэндэ, и рашангэ, и пророкэнгэ, и сарэ́ манушэ́нгэ, савэ́н лыджия́ дро пле́но о Навуходоносо́ро Ерусалимо́стыр кэ Вавило́но.
2. Дава́ сыс пало́ (после) дова́, ке́ли о Ехония кра́ли и кра́лица, и евнухи, и тхага́рья Юдэя́кирэ и Ерусалимо́стыр, и спе́цы дрэ вастытка бутя́ пир кашт (кхэра́-кхэрибнаскирэ) и пэталэнгирэ (ковали) выгинэ́ Ерусалимо́стыр.
3. О Ереме́ё пиридыя дава́ лыл дро васт Елиасоскэ (Эльясоскэ), чхавэ́скэ Шафаноскирэскэ, и Ѓэмарияскэ, чхавэ́скэ Хелкияскирэскэ, савэ́н о Сэдэки́я, кра́ли Юдэя́киро, бичхадя́ кэ Навуходоносо́ро, кра́ли Вавилоно́скиро. Дро лыл ракирдяпэ:
4. Адя́кэ ракирэ́ла болыбна́скирэ-янголэ́нгиро Рай Дэвэ́л, Дэвэ́л Израилёскиро, сарэ́ пленнонэ манушэ́нгэ, савэ́н Мэ пиричхудём [пирилыджиём-р.с.] тэ дживэ́н Ерусалимо́стыр кэ Вавило́но:
5. “Чхувэ́н кхэра́ и дживэ́н дрэ лэ́ндэ, чхувэ́н пэ пхув унты (сады) и хан пхаба́ лэ́ндыр.
6. И соб (кай) тэ явэ́н чхавэ́, и чхая́ тумэ́ндэ, лэн ромне́н пэ́скирэ чхавэ́нгэ и отдэ́н пэ́скирэ чхае́н палоро́м, соб (кай) ёнэ тэ янэ́н пэ свэ́то чхавэ́н и чхае́н, соб (кай) тумэн тэ явэ́л бутэды́р одо́й, соб (кай) тэ на явэ́л кутэдыр тумэн.
7. И прихчувэн зор сарэ́ зорья́тыр, соб (кай) тэ явэ́л рама́нё (миро) дро фо́ро, кэ саво́ Мэ пиричхудём [пирилыджиём-р.с.] тумэн тэ дживэ́н дро пле́но, и мангэ́нпэ Ра́скэ-Дэвлэ́скэ пал дава́, пал-дова́ со рама́нё дро дова́ фо́ро явэ́ла тумаро́ рама́нё.
8. Пал-дова́ со адя́кэ ракирэ́ла болыбна́скирэ-янголэ́нгиро Рай Дэвэ́л: ‘Мэк тумарэ́ проро́ки, савэ́ исын машки́р тумэ́ндэ, и тумарэ́ драбакирибнаскирэ тэ на хохавэн тумэн. На рискирэ́н тумари́ годы́ кэ тумарэ́ сунэ́, со тумэ́ дыкхэ́на.
9. Пал-дова́ со ёнэ ангилпхэнэна хоханэ́с тумэ́нгэ Мирэ́ лавэ́стыр: Мэ на бичхадём лэн’, – ракирэ́ла Рай Дэвэ́л.
10. ‘Акэ, со ракирэ́ла Рай Дэвэ́л: ‘Ке́ли кончынэнапэ [проджа́на-р.с.] тумарэ́ эфтадэша́ бэрш дро Вавило́но, тэды Мэ ява́ва кэ тумэ́, и Мэ сполнинава Миро лачхо́ лав ваш тумэ́нгэ, соб (кай) тэ янав палэ тумэн пэ дава́ штэ́то.
11. И Мэ Кокоро́ джино́м (джина́в) Мирэ́ планы ваш тумэ́нгэ’ – ракирэ́ла Рай Дэвэ́л’, – планы, соб (кай) тэ явэ́л рама́нё (миро), а на чорипэ́н, соб (кай) тумэ́ндэ тэ явэ́л лачхо́ ужакирибэ́н (наде́я) пэ дывэса́, со ишчо (инкэ́) явэ́на.
12. И тумэ́ явэ́на тэ кхарэ́н Ман и тумэ́ явэ́на, и тумэ́ явэ́на тэ мангэ́нпэ Ма́нгэ, и Мэ ява́ва тэ шунав тумэн,
13. И тумэ́ явэ́на тэ родэ́н Ман, и тумэ́ латхэ́на Ман, ко́ли тумэ́ явэ́на тэ родэ́н Ман сарэ́ илэ́стыр’, –
14. и Тумэ́ латхэ́на Ман’, – ракирэ́ла Рай Дэвэ́л, – и Мэ яна́ва палэ тумэн тумарэ́ плено́стыр: и Мэ скэда́ва тумэн сарэ́ Наюдытконэ́ нацые́ндыр и сарэ́ штэтэ́ндыр, кэ савэ́ Мэ традыём тумэн’, – ракирэ́ла Рай Дэвэ́л, – ‘и Мэ яна́ва тумэн палэ пэ штэ́то’, савэ́стыр Мэ тумэн лыджиём дро пле́но.
15. Пал-дова́ со тумэ́ пхэндлэ́: “Рай Дэвэ́л чхудя́ пророкэ́н амэ́нгэ дро Вавило́но”, –
16. палдава́ адя́кэ ракирэ́ла Рай Дэвэ́л пал крали́стэ, саво́ исын пэ Давидо́скиро троно пал сарэ́ манушэ́ндэ, савэ́ дживэ́на дро дава́ фо́ро, пал тумарэ́ пшалэ́ндэ, савэ́ на гинэ́ тумэ́нца дро пле́но, –
17. адя́кэ ракирэ́ла болыбна́скирэ-янголэ́нгиро Рай Дэвэ́л: ‘Акэ, Мэ бичхава́ва пэ лэ́ндэ курта́ла, бокх и мэрибнытка фра́нсы, и Мэ кэра́ва лэн сы́рбы кирмалэ инжыритка му́ри, савэ́ нашты́ тэ хас, ёнэ исын древа́н фуй.
18. И Мэ ява́ва тэ традав лэн куртала́са, бокхаса, и мэрибнытконэ франсэнца, и Мэ отда́ва лэн, соб (кай) тэ традэ́н лэн одори́к и палэ пэ би́да дрэ сарэ́ кралипэна́ пэ пхув, – соб (кай) тэ выпхэнэн прокошыбэна (тэ арманякирэн лэн), тэ дивинэнпэ трашаса пэ лэ́ндэ, тэ сипинэн, и тэ обракирэн холя́са лэн мануша́ Наюдытконэ́ нацые́ндыр, кэ савэ́ Мэ традава лэн:
19. пал-дова́ со ёнэ на шундлэ́ Мирэ́ лава́’, – ракирэ́ла Рай Дэвэ́л, – савэ́ Мэ пирипхэндём пир Мирэ́ писхарьендэ, Мирэ́ пророкэ́ндэ, пэ зло́ко (пэ ра́нко) бичхававас Мэ, нэ ёнэ на шундлэ́’, – ракирэ́ла Рай Дэвэ́л.
20. Нэ тумэ́ сарэ́, кон исын дро пле́но, савэ́н Мэ бичхадём Ерусалимо́стыр кэ Вавило́но, шунэ́н Ра́скирэ-Дэвлэ́скиро лав.
21. Акэ, исын лава́ – савэ́ ракирэ́ла болыбна́скирэ-янголэ́нгиро Рай Дэвэ́л, Израилёскиро Дэвэ́л пал Ахавостэ, Колияскирэ чхавэ́стэ, и пал Сэдэкиястэ, Масеяскирэ чхавэ́стэ, савэ́ ангилпхэнэна хохаибэ́н тумэ́нгэ Мирэ́ лавэ́стыр: “Акэ, Мэ выдава лэн дро васт Навуходоносороскиро, крали́скэ Вавилоно́стыр, и Ёв мулякирэ́ла лэн пэ тумарэ́ якха́.
22. И пал лэ́ндэ лэ́нгирэ лава́ явэ́на сыр прокошыбэ́н (арман) машки́р сарэ́ Юдэя́кирэ пленнонэндэ дро Вавило́но, сыр ёнэ явэ́на тэ ракирэ́н: ‘Мэк тэ кэрэ́л адя́кэ ту́кэ Рай Дэвэ́л сыр Сэдэкияскэ и Ахавоскэ, савэ́н Вавилоно́скиро кра́ли пэкця пэ яг;
23. пал дова́, со ёнэ кэрдэ́ джунгалыпэ́н (брыдкима) дро Израилё, и ёнэ кэрдэ́ биладжаипэ́н лэ́нгирэ-суседенгирэ (котарьенгирэ) джувле́нца, и ёнэ ракирдэ́ хохано́ лав Мирэ́ лавэ́стыр, со Мэ на припхэндём лэ́нгэ тэ кэрэ́н: и Мэ джино́м дава́, и Мэ сом Якхи́тко,” – ракирэ́ла Рай Дэвэ́л.
24. И ту пхэнэ́са Шэмияскэ Нехеламостыр, ракири́:
25. “Адя́кэ ракирэ́ла болыбна́скирэ-янголэ́нгиро Рай Дэвэ́л, Израилёскиро Дэвэ́л: ‘Пал дова́, со ту бичхадян лыла́ тырэ́ лавэ́стыр, савэ́ исын дро Ерусалимо раша́скэ Софонияскэ (Зэфанияскэ), чхавэ́скэ Маасеяскирэскэ, и сарэ́ рашангэ, ракири́:
26. ‘Рай Дэвэ́л чхудя́ тут сыр раша́с пэ рашаскирэ – Иодаёскирэ (Егоядаскиро) штэ́то, соб (кай) ту тэ явэс дыкхибнаскирэса (блюстителёса) пэ Кхангири́ Ра́скирэ-Дэвлэ́скири, пир кажнонэ́ бигодякирэ манушэ́стэ и кажнонэ́стэ, кон дылнёла и кхарэ́лапэ пророкоса, соб (кай) тэ чхувэ́н лэс дрэ калодки и дро штарибэ́н.
27. Со́скэ ту на выракирдян Еремеёскэ Анафофостыр, саво́ кэрдя́ пэ́стыр пророко́с кэ тумэ́?
28. Пал-дова́ со ёв пирипхэндя лав амэ́нгэ дро Вавило́но, пхэни́: “Дава́ пле́но явэ́ла ґара́ (длу́гэс) тэ тырдэлпэ; чхувэ́н кхэра́ и дживэ́н дрэ лэ́ндэ, и чхувэ́н пэ пхув унты (сады), и хан лэ́нгиро фрукто (пло́до)!’”
29. И раша́й Софония (Цэфания) гиндя зоралэ́с (дро саро́ шуныбэ́н) дава́ лыл пророкоскиро Еремеёскиро.
1. Лав, саво́ явдя́ кэ Ереме́ё, Ра́стыр-Дэвлэ́стыр, ракири́:
2. “Адя́кэ ракирэ́ла Рай Дэвэ́л, Израилёскиро Дэвэ́л: “‘Чхин дрэ лылвари́ пэ́скэ, сарэ́ лава́, со Мэ пхэндём ту́кэ.
3. Акэ явэ́на дывэса́’, – ракирэ́ла Рай Дэвэ́л, – ‘Ке́ли Мэ яна́ва палэ плено́стыр Мирэ́ манушэ́н Израилёстыр и Юдэя́тыр’, – ракирэ́ла Рай Дэвэ́л. ‘И Мэ кэра́ва адя́кэ, соб (кай) ёнэ тэ рисён пэ пхув, сави́ Мэ дыём лэ́нгирэ дадэ́нгэ, соб (кай) ёнэ тэ явэ́н хулая́ пэ ла́тэ.’”
4. И, акэ, исын лава́, со пхэндя́ Рай Дэвэ́л пал Израиле и пал Юдэ́я:
5. “Адя́кэ ракирэ́ла Рай Дэвэ́л: ‘Амэ шундя́м зан (глос), сави́ издралас, исын дар, нанэ рама́нё (миро).’
6. Пхучэ́н и ґалён, ци могинэ́ла (сашты́) мурш тэ биянэ́л? Со́скэ тэды Мэ дыкха́ва, со кажнонэ́стэ муршэстэ васта́ исын пашы́л трушула, сы́рбы джувля́тэ, сави́ скэдэлпэ тэ биянэ́л, и муя́ лэ́нгирэ ячнэ́ парнэ́?
7. Пэ биба́хт (бари би́да), явэ́ла баро́ дава́ дывэ́с, со буты́р дасаво нанэ и на явэ́ла, И адя́кэ-паць явэ́ла пхаро́ Яково́скэ, нэ ёв явэ́ла зракхно;
8. И явэ́ла адя́кэ дро дова́ дывэ́с’, – ракирэ́ла болыбна́скирэ-янголэ́нгиро Рай Дэвэ́л – со Мэ пхагирава лэ́скиро ґа́мо лэ́скирэ мэнятыр, и Мэ роскушава лэ́скирэ састыра́, и чу́жа мануша́ на явэ́на буты́р тэ рикирэ́н лэс сыр писхари́с.
9. Нэ Мирэ́ мануша́ явэ́на тэ дынаринэ́н Ра́скэ-Дэвлэ́скэ, пэ́скирэ Дэвлэ́скэ, и Давидо́скэ, пэ́скирэ крали́скэ, савэ́с Мэ чхудём лэ́нгэ.
10. И ту, Миро писха́ри, Яково, на дар’, – ракирэ́ла Рай Дэвэ́л’, – на замэр дара́тыр, о Израилё: Акэ, Мэ зракха́ва тут дуратунэ́ тхэмэстыр, и тыро́ кхэри́тко ро́до штэтэ́ндыр, кай сыс ёнэ дро пле́но. О Яково рисёла палэ и явэ́ла рама́нё, Ёв явэ́ла тэ дживэ́л би дара́киро.
11. Пал-дова́ со Мэ сом ту́са’, – ракирэ́ла Рай Дэвэ́л, – соб (кай) тэ зракхав тут, мэк Мэ хасякира́ва сарэ́са сарэ́ Наюды́тка на́цыи, машки́р савэ́ндэ Мэ чхудём тэ дживэ́с тут. Нэ Мэ на хасякира́ва сарэ́са тут, нэ Мэ ява́ва тэ пирисыклякирав тут пир чачипэ́н, и Мэ на домэкава, соб (кай) ту, тэ на джас пэ́скэ сарэ́са би сэндякирибнаскиро.’
12. ‘Пал-дова́ со адя́кэ ракирэ́ла Рай Дэвэ́л: ‘Тыро́ кало́ мас (синяко) исын насастякирибнытко, и тырэ́ фра́нсы (раны) исын пхарэ́.
13. Нико́н на пэкэлапэ (на дэл ту́га), пал ту́тэ, соб (кай) тэ пирипхандэн тырэ́-масэ́нгиро фра́нсо (рана); ту́тэ нанэ драба тэ састякирэспэ.
14. Сарэ́ тырэ́ дру́ги (мала́) бистырдэ пал ту́тэ; ёнэ на родэ́на тут. Мэ ж пэкадём тут вэргитконэ дабаса сыр биде́скири ка́ра пал баро́ тыро́ чорипэ́н, пал-дова́ со тырэ́ грэ́хи выбаринэ.
15. Со́скэ ровэса ту пал тырэ́ фра́нсы (раны)? Тыри́ дукх исын насастякирибнытко. Пал тыро́ баро́ чорипэ́н, и пал дова́ со тырэ́ грэ́хи выбаринэ, Мэ кэрдём дава́ саро́ ту́кэ.
16. Пал-дова́ со сарэ́, кон дукхавэла тут, ёнэ кокорэ́ явэ́на дукхадэ, и сарэ́ тырэ́ вэ́рги, кажно лэ́ндыр джа́ла дро пле́но. Сарэ́, кон чорэла миштыпэ́н ту́тыр, ёнэ кокорэ́ явэ́на обчордэ; и сарэ́, кон рискирэ́ла тыро́ миштыпэ́н, лэ́ндэ кокорэндэ явэ́ла рискирдо миштыпэ́н.’
17. И Мэ пирипхандава тут [пластырёса-р.с.], и Мэ састякирава тут тырэ́-масэнгирэ франсэндыр’, – ракирэ́ла Рай Дэвэ́л, – пал-дова́ со ёнэ кхардэ́ тут ‘бикхэрэскиро’: дава́ исын Сио́но, пэ саво́ нико́н на дыкхэ́ла.
18. ‘Адя́кэ ракирэ́ла Рай Дэвэ́л: “Акэ, Мэ яна́ва палэ плено́стыр Яково́скирэ ша́тры, и Мэ сыкава́ва ла́ска пэ лэ́скиро штэ́то шатрэнца; и фо́ро нэвэ́стыр явэ́ла чхудо пэ пэ́скиро штэ́то, и Кхангири́ явэ́ла кэрды сыр сыс.
19. И долэ́ форо́стыр мануша́ явэ́на тэ парикирэ́н зоралэ́с, и ёнэ явэ́на древа́н тэ радынэ́нпэ. И Мэ кэра́ва адя́кэ, со лэн явэ́ла бутэды́р, и ёнэ на явэ́на тэ тыкнён. И Мэ барьякирава лэ́нгири паты́в, соб (кай) ёнэ тэ на дыкхэ́н пэ лэ́ндэ вучипна́стыр.
20. Лэ́нгирэ чхавэ́ явэ́на адя́кэ-паць сыр ангэдыр (англэды́р) и лэ́нгиро скэдыибэ́н явэ́ла зорало́ анги́л Ма́ндэ; и Мэ пхарэ́с сэндякирава кодолэ́н, савэ́ притасавэ́на лэн.
21. Лэ́нгиро тхага́ри явэ́ла лэ́ндыр кокорэндыр/ лачхэ́-родоскирэндыр, и лэ́нгиро баро́ рай (владыка) явэ́ла лэ́нгирэ манушэ́ндыр, и Мэ кэра́ва адя́кэ, соб (кай) ёв тэ явэ́л пашэдыр; и Ёв подджа́ла кэ Мэ. Пал-дова́ со, кон исын адасаво́ муршкано́, соб (кай) тэ зачхувэл пэ́скиро ило́ тэ явэ́л пашэдыр кэ Мэ?’, – ракирэ́ла Рай Дэвэ́л.
22. Тумэ́ явэ́на Мирэ́ мануша́, и Мэ ява́ва тумаро́ Дэвэ́л.’”
23. “Акэ, баро́ штормо джа́ла анги́л холя́са Ра́стыр-Дэвлэ́стыр, рискирибнаскири балва́л (вихро); ёй пэрэ́ла зорья́са пэ бибахталэнгиро шэро́.
24. Холякирибнаскири (холякири) яг Ра́стыр-Дэвлэ́стыр на пириячэ́ла анги́л дова́, сыр Ёв выпхэрдякирэла саро́, со Ёв камэ́ла. Тумэ́ ґалёна саро́ дава́ дрэ дывэса́ пэ са́мо ко́нцо (яго́ро).”
41. Мэк тэ явэ́л кэ мэ Тыри́ лачхэ́-илы́ткима, Раё Дэ́вла, зра́кх ман пир Тыро́ лав.
42. И мэ отпхэнава одолэ́скэ, кон обракирэла ман, пал-дова́ со мэ зоралэ́с патя́ва Тырэ́ лавэ́скэ.
43. На отлэ сарэ́са чачипна́скиро лав мирэ́ мо́стыр, пал-дова́ со мэ древа́н ужакирдём лачхипэ́н Тырэ́ сэндостыр.
44. И мэ ўса́ды (сак) ява́ва тэ ракхав Тыро́ Зако́но и пэ сарэ́ ве́ки.
45. И мэ ўса́ды (сак) ява́ва тэ псирав пир во́ля, пал-дова́ со мэ родава Тырэ́ упхэныбэна́.
46. И мэ ява́ва тэ ракира́в пал Тырэ́ досыкаибэна анги́л кралье́ндэ, и мэ на ява́ва ладжакирдо́.
47. И мэ ява́ва тэ бахталёвав Тырэ́ припхэныбнэндыр, савэ́ ячнэ́.
48. И мэ ґазда́ва пэ́скирэ васта́ кэ Тырэ́ припхэныбэна́, савэ́ исын дро́га ма́нгэ, и мэ ява́ва тэ розлав Тырэ́ стату́ты.
19. Сыр дро пани́ муй сыкавэ́ла, саво́ ёв исын; адя́кэ-паць и манушэ́скиро ило́ сыкавэ́ла, саво́ ману́ш исын.
1. Павли́стыр, Исусо́скирэ-Христосо́скирэ Апостолостыр, савэ́с выкэдыя́ Дэвэ́л, амаро́ Зракхибнари (Спасителё) и Рай Дэвэ́л, Ису́со Христо́со, пэ савэ́стэ мэ надеинасапэ,
2. Химаскэ, чачунэ́ чхавэ́скэ дро патяибэ́н: мэк тэ дэл бахталыпэ́н, тангипэ́н и рама́нё ту́кэ, амаро́ Дэвэ́л Дад и амаро́ Рай Дэвэ́л, Ису́со Христо́со.
3. Ке́ли мэ скэдаваспэ тэ традав кэ Македония, мэ зоралэ́с мангдём тут тэ ячэспэ дрэ Ефесия и тэ припхэнэс одолэ́ манушэ́нгэ тэ на сыклякирэ́н яви́р сыклякирибэ́н,
4. и тэ на шунэ́н лэ́нгирэ парамыси́тка и роспхэныбэна пал вари-конэ́скиро ро́до би концоскиро (би ягороскиро), савэ́ кэрэ́на буты́р чинга́рд, сыр сыклякирэ́на пал Дэвлэ́скиро патяибэ́н.
5. Дава́ припхэныбнаскиро чачипэ́н исын дро паты́в кэ яви́р мануша́ жужэ́ илэ́стыр и лачхэ́ патыватыр и чачунэ́ патяибнастыр,
6. вари-савэ́ мануша́ дуринэ далэ́ дромэ́стыр, и лынэ́ тэ залэнпэ чхучэ́ (пустонэ) ракирибнаса,
7. ёнэ закамлэ тэ явэ́н Законо́скирэ сыклякирдэ́, нэ ёнэ кокорэ́ на джинэ́на ни дова́, пал со ёнэ ракирэ́на, ни дова́, со ёнэ допхэнэна.
8. Нэ амэ джина́са, со Зако́но исын лачхо́, ко́ли вари-кон кэрэ́ла пир Зако́но,
9. амэ джина́са, со Зако́ны исын счхудэ на ваш патяибнытконэ манушэ́скэ, а ваш одолэ́нгэ, савэ́ кэрэ́на на пир Зако́но, и савэ́ на кандэ́на, и савэ́ на патя́на Дэвлэ́скэ, и савэ́ кэрэ́на грэ́хи, и савэ́ исын бидэвлыткарья, и савэ́ исын магирдэ́, и савэ́ ґаздэ́на васт пэ пэ́скирэ дадэ́стэ ци датэ, и савэ́ мулякирэна манушэ́н,
10. савэ́ дживэ́на джувле́нца би сэвлакиро, савэ́ дживэ́на муршэнца сыр джувле́нца, савэ́ чорэна манушэ́н, савэ́ исын хохаибнарья, савэ́ совлахана хоханэ́с сыр якхи́тка.
11. Адя́кэ упхэнэла пэ лэ́ндэ славу́тно бахталы́ зан амарэ́ бахтякирдэ Дэвлэ́скири, сави́ сыс допатяндлы ма́нгэ тэ роспхэнав.
12. И мэ парикирава мирэ́ Ра́скэ-Дэвлэ́скэ, Исусо́скэ Христосо́скэ, Саво́ дыя́ ма́нгэ зор, со Ёв приґалыя ман патяибнытконэса и дыя́ ма́нгэ тэ дынаринав Лэ́скэ,
13. ма́нгэ, саво́ англэды́р тэлякирдя Дэвлэ́с, и традыя́ дэвлытконэ́ манушэ́н, и кэрдём чорипэ́н лэ́нгэ: нэ Дэвэ́л примангдя ма́нгэ, пал-дова́ со адя́кэ кэрдём пир наджиныбэн и пир напатяибэн.
14. Нэ бахталыпэ́н амарэ́ Ра́скиро-Дэвлэ́скиро сыс сыкадо кэ мэ дро саро́ ла́киро барвалыпэ́н, выкэдыибнаса и илэ́са дрэ Исусо́стэ Христосо́стэ.
15. Кадава́ лав исын патяибны́тко, со Ису́со Христо́со явдя́ дро свэ́то тэ зракхэ́л грехитконэ́н, савэ́ндыр мэ сом най фуеды́р.
16. Нэ ваш дава́ ма́нгэ сыс примангнэ грэ́хи, соб (кай) Ису́со Христо́со тэ сыкавэ́л дрэ ма́ндэ пэрвонэстэ саро́ длуго вырикирибэн, соб (кай) тэ дыкхэ́н одолэ́, савэ́ явэ́на тэ патя́н дрэ Лэ́стэ кэ ве́чно джиибэ́н.
17. Вечнонэ Крали́скэ, саво́ ние́кхвар на мэрэ́ла и дживэ́ла дрэ сарэ́ ве́ки, Набицялэскэ и Екхджинэскэ Дэвлэ́скэ, мэк тэ явэ́л паты́в и сла́ва дрэ сарэ́ ве́ки.
18. Мэ да́ва ту́кэ дава́ упхэныбэ́н, чха́ва миро Хима, сыр анги́л сыс пхэндло́ пал ту́тэ, соб (кай) тэ рикирэспэ кэ далэ́ лава́ и тэ могинэс тэ лыджас свэ́нто марибэ́н,
19. и тэ ракхэ́с патяибэ́н и лачхи́ паты́в, сави́ вари-савэ́ мануша́ хасякирдэ́, и лэ́нгиро патяибэ́н роспыяпэ,
20. машки́р лэ́ндэ сыс Именеё и Лександро (Александро), савэ́н мэ отдыём налачхэскэ, соб (кай) ёнэ тэ на тэлякирэн Дэвлэ́с.
Romani Bible Baltic 2019
United Bible Societies for the Baltic Romani Mission