Bible in one year October 25Jeremiah 35:1-191. Лав, саво́ сыс кэ Ереме́ё Ра́стыр-Дэвлэ́стыр дрэ Иоакимоскирэ дывэса́, чхавэ́скирэ Иосияскирэ (Ёсияскирэ), кон сыс кра́ли пир Юдэ́я, ракири́:2. “Джа́ дро кхэр Рэхавитэнгиро и пхэн лэ́нгэ, и ян лэн дро Кхэр Ра́скирэ-Дэвлэ́скиро, дрэ екх комора, и дэ лэ́нгэ мол (вино) тэ пьен.”3. Тэ́ньци лыём мэ Иазанияс (Язанияс), явирэ чхавэ́с Еремеёскирэс, саво́ сыс Авацынияскиро (Хабацынияскиро) чхаво́, и лэ́скирэ пшалэ́н и сарэ́н лэ́скирэ чхавэ́н, и саро́ кхэр (чэ́карь) Рэхавитэнгиро,4. и яндём мэ лэн дро Кхэр Ра́скирэ-Дэвлэ́скиро, дрэ коморы Ананоскирэ чхавэ́нгирэ, кон сыс Ѓодолияскиро чхаво́, саво́ сыс ману́ш Дэвлэ́стыр. Далэ́ коморы сыс пашы́л коморы тхагарьенгирэ, упра́л Маасеяскири комора (кон сыс Селумоскиро чхаво́), саво́ сыс ракхибнаскиро пашы́л вуда́р.5. Тэ́ньци мэ чхудём анги́л чхавэ́ндэ Рэхавитэнгирэндэ кучыка пхэрдэ́ моляса (виноса), и мусэра (стаканы), и пхэндём мэ лэ́нгэ: “Пье́н мол (вино).”6. Нэ ёнэ отпхэндлэ́: “Амэ на ла́са тэ пьяс мол, пал-дова́ со амаро́ дад Ионадаво (чхаво́ Рэхавоскиро) припхэндя́ амэ́нгэ, ракири́: ‘Тумэ́ на явэ́на тэ пье́н мол, ни тумэ́, ни тумарэ́ чхавэ́, ние́кхвар дро джиибэ́н.7. И тумэ́ на чхувэ́н кхэра́, и на почхувэн гив дрэ пхув, на розлыджан винаграды́тко бар, и тэ на явэ́л тумэ́ндэ нисо́ далэ́стыр, нэ тумэ́ явэ́на тэ дживэ́н сарэ́ пэ́скирэ дывэса́ дрэ ша́тры, соб (кай) тумэ́нгэ тэ дживэ́н бут дывэса́ пэ пхув, пэ сави́ тумэ́ явэ́на тэ лодэн.”8. Адя́кэ амэ кандыям зан Ионадавоскири (чхавэскири Рэхавоскири), амарэ́-дадэ́скири дро саро́, со ёв припхэндя́ шылалэс (стрэнгэс) амэ́нгэ: тэ на пьяс мол дрэ амарэ́ сарэ́ дывэса́: – амэ, амарэ́ ромня́, амарэ́ чхавэ́ ци амарэ́ чхая́,9. и тэ на чхувас кхэра́ тэ джива́с, ци, соб (кай) тэ на явэ́н амэ́нгэ винаграды́тка барья, ци фэ́лды, ци гив тэ почхувас.10. Нэ амэ яцямпэ тэ джива́с дрэ ша́тры, амэ кандыям и кэра́са саро́ адя́кэ, сыр о Ионадаво (амаро́ дад) припхэндя́ амэ́нгэ тэ кэра́с.11. И сыр сыс адя́кэ со о Навуходоносо́ро, кра́ли Вавилоно́скиро, явдя́ пэ дая́ пхув, тэды амэ пхэндям: “Явэ́н, джа́са кэ Ерусалимо, даранэ Халдее́нгирэ халадыбнастыр, даранэ Сирийцэнгирэ халадыбнастыр”, и амэ дживаса кэ Ерусалимо.”12. Тэ́ньци сыс лав кэ Ереме́ё Ра́стыр-Дэвлэ́стыр, ракири́:13. ‘Адя́кэ ракирэ́ла болыбна́скирэ-янголэ́нгиро Рай Дэвэ́л, Дэвэ́л Израилёскиро: “Джа́ и пхэн манушэ́нгэ Юдэя́тыр и одолэ́нгэ, кон дживэ́ла кэ Ерусалимо: ‘Ци на прилэ́на тумэ́ упхэныбэ́н тэ шунэ́н Мирэ́ лава́?’”, – ракирэ́ла Рай Дэвэ́л.14. Лава́ Ионадавоскирэ (чхавэ́скирэ Рэхавоскирэ), со ёв припхэндя́ пэ́скирэ чхавэ́нгэ – тэ на пьен мол (вино) выпхэрдякирэнапэ (сполнинэнапэ), и кэ ададывэ́с ёнэ на пье́на, и ёнэ кандэ́на припхэныбэна́ лэ́нгирэ дадэнги́рэ. Нэ сароекх (усае́кх) со Мэ и ракирдём тумэ́нгэ тася́рлэс (ра́нэс) злокостыр (ранкостыр), нэ тумэ́ на кандынэ́ Ман.15. И Мэ бичхававас кэ тумэ́ сарэ́ Мирэ́ дынарье́н, пророкэ́н, Мэ бичхававас тася́рлэс (ра́нэс) злокостыр лэн, ракири́: “Рисён акана́, кажно (сва́ко) екх тумэ́ндыр пэ́скирэ бибахталэ́ дромэ́стыр, лачхакирэн (кэрэ́н фэдэды́р) пэ́скирэ рэ́нды, и на псирэ́н тэ кэрэ́н паты́в явирэ дэвлорэ́нгэ, тэды тумэ́ явэ́на тэ дживэ́н пэ пхув, со Мэ дыём тумэ́нгэ и тумарэ́ дадэ́нгэ.” Нэ тумэ́ на причхудэ пэ́скиро кан, и на кандынэ́ Ман.16. Дыкхэ́н: чхавэ́ Ионадавоскирэ (чхаво́ Рэхавитоскиро) выпхэрдякирдэ припхэныбэ́н пэ́скирэ дадэ́скиро, со ёв дыя́ лэ́нгэ, нэ кадалэ́ мануша́ на кандынэ́ Ман.17. Палдава́ адя́кэ ракирэ́ла болыбна́скирэ-янголэ́нгиро Рай Дэвэ́л, Израилёскиро Дэвэ́л: “Акэ, Мэ яна́ва пэ Юдэ́я, и пэ сарэ́ манушэ́ндэ, кон дживэ́ла кэ Ерусалимо, саро́ фуипэ́н, со Мэ кхардём лэн, нэ ёнэ на отпхэндлэ́ Ма́нгэ.’”18. И пхэндя́ Ереме́ё кхэрэ́скэ (чэкарьякэ) Рехавитоскирэскэ: “Адя́кэ ракирэ́ла Рай Дэвэ́л, болыбна́скирэ-янголэ́нгиро, Дэвэ́л Израилёскиро: ‘Пал-дова́ со тумэ́ шундлэ́ припхэныбэ́н Ионадавоскиро (тумарэ́-дадэ́скиро), и тумэ́ ракхнэ (рикирдэпэ кэ сарэ́ лэ́скирэ упхэныбэна́) и кэрдэ́ саро́, со ёв припхэндя́ тумэ́нгэ,19. то палдава́ адя́кэ ракирэ́ла болыбна́скирэ-янголэ́нгиро Рай Дэвэ́л, Дэвэ́л Израилёскиро: ‘Ионадавостэ, чхавэ́стэ Рэхавитоскирэстэ’, дрэ сарэ́ дывэса́ явэ́ла ману́ш тэ тэрдёл анги́л Ма́ндэ.’”Jeremiah 36:1-321. И сыс адя́кэ дро шта́рто бэрш Иоакимоскиро (чхаво́ Иосия́скиро), кон сыс кра́ли пэ Юдэ́я, сыс дасаво лав Еремеёскэ Ра́стыр-Дэвлэ́стыр, пхэни́:2. “Лэ сви́тко лылварьятыр, и зачхин пэ дава́ сви́тко сарэ́ лава́, со Мэ пхэндём ту́кэ пал Израилё, пал Юдастэ и пал Наюды́тка на́цыи, долэ́ дывэсэ́стыр, ке́ли Мэ лыём тэ ракира́в тумэ́нгэ: Иосияскирэ дывэсэ́ндыр кэ дава́ дывэ́с.3. Дава́, хай, (могинэ́ла) тэ явэ́л, со кхэр Юда́скиро явэ́ла тэ шунэ́л пал сари́ би́да, со Мэ камамас тэ янав пэ лэ́ндэ, соб (кай) кажно (сва́ко) лэ́ндыр могинэлас тэ рисёл криг лэ́скирэ бибахталэ́ дромэ́стыр, соб (кай) Мэ сашты́ тэ отмэкав (тэ простинав) лэ́нгэ лэ́нгиро чорипэ́н и лэ́нгиро грэ́хо.”4. Тэ́ньци Ереме́ё кхардя́ кэ пэ Варухос (чхавэ́с Нерияскирэс); и о Варухо чхиндя́ пэ сви́тко лылварьятыр сарэ́ лава́ Ра́скирэ-Дэвлэ́скирэ, савэ́ сыс чибатыр Еремеёскирьятыр, савэ́ Рай Дэвэ́л пхэндя́ Еремеёскэ.5. И припхэндя́ Ереме́ё Варухоскэ, и пхэндя́: “Мэ сом пхандло [чхудо дро бэшыбэн-р.с.], ма́нгэ нашты́ тэ джав дро Кхэр Ра́скирэ-Дэвлэ́скиро.6. Палдава́ ту джа́ и гин зоралэ́с (дэ упрэ́) свиткостыр лава́, со ту зачхиндян мирэ́ чибатыр (лавэ́ндыр). Дэ упрэ́ лава́ Ра́скирэ-Дэвлэ́скирэ дро дывэ́с, ке́ли постинэна, дрэ кана́ манушэ́нгэ Юдэя́тыр, савэ́ явэ́на пэ́скирэ форье́ндыр.7. Дава́ сашты́ тэ явэ́л, со ёнэ выпхэнэна пэ́скирэ патерья (молитвы) анги́л Растэ-Дэвлэ́стэ, и со ёнэ рисёна пэ́скирэ кажнонэ́ бибахталэ́ дромэ́стыр. Пал-дова́ со бари холын исын и мижэхипэн (мижэх лава́), савэ́ Рай Дэвэ́л пхэндя́ пэ далэ́ манушэ́ндэ.”8. И Варухо (чхаво́ Нерияскиро) кэрдя́ саро́ пир дова́, со проро́ко Ереме́ё припхэндя́ тэ кэрэ́л лэ́скэ, сыр ёв дэ́лас упрэ́ лылварьятыр лава́ Ра́скирэ-Дэвлэ́скирэ дро Кхэр Ра́скиро-Дэвлэ́скиро.9. И сыс адя́кэ, со дро па́нджто бэрш Иоакимоскиро (чхаво́ Иосия́скиро), кон сыс кра́ли пэ Юдэ́я, дро еня́то (биекхэ́скиро дэ́што) чхон, со посто исын пхэндло́ тэ рикирэ́н сарэ́нгэ манушэ́нгэ Ерусалимо́стыр и сарэ́ манушэ́нгэ, савэ́ явнэ́ форье́ндыр дрэ Юдэ́я кэ Ерусалимо,10. тэ́ньчи о Варухо гиндя зоралэ́с (дэ́лас упрэ́) лылварьятыр лава́ Еремеёскирэ дро Кхэр Ра́скирэ-Дэвлэ́скиро дрэ комора Гемарияскири (унуко Шафаноскиро), саво́ сыс лыла́-чхиныбнаскиро (лылэнгиро чхиныбнари / писцо) пэ упратуны грэ́да, сыр тэ джа́н андрэ́ нэви́ по́рта дро Кхэр Ра́скирэ-Дэвлэ́скиро, зоралэ́с сарэ́ манушэ́нгэ.11. Ке́ли о Михеё (Михна), чхаво́ Гемарияскиро, (унуко Шафаноскиро) шундя́ сарэ́ лава́ Ра́скирэ-Дэвлэ́скирэ, лылварьятыр,12. то ёв гия́ тэлэ́ дро крали́скиро кхэр, дрэ комора лыла́-чхиныбнаскирэскири ваш крали́скэ; и одо́й сыс бэштэ́ сарэ́ тхага́рья – Элисамо (Элишама), лыла́-чхиныбнаскиро; – Дэлаия, чхаво́ Сэмаияскиро, – Елнафано, чхаво́ Ахбороскиро; – Гемария, чхаво́ Сафаноскиро, – Сэдэки́я, чхаво́ Ананияскиро, и сарэ́ яви́р тхага́рья.13. Тэ́ньци Михеё (Михна) пирипхэндя лэ́нгэ сарэ́ лава́, со ёв шундя́, ке́ли Варухо гинэлас зоралэ́с (дэ́лас упрэ́) лылварьятыр сарэ́ манушэ́нгэ.14. Палдава́ сарэ́ тхага́рья бичхадэ́ Иегудис (Егудис), чхавэ́с Нафанияскирэс (ўнукос Шэлемеяскирэс), (праўнукос Хусияскирэс) кэ Варухо, тэ пхэнэ́л лэ́скэ: “Лэ пэ́скирэ вастэ́са сви́тко, со́стыр ту гинэсас зоралэ́с сарэ́ манушэ́нгэ и яв.” И Варухо, чхаво́ Нерияскиро, лыя́ сви́тко дро васт и явдя́ кэ ёнэ.15. И пхэндлэ́ ёнэ лэ́скэ: “Бэш акана́ и гин зоралэ́с амэ́нгэ.” И гинэлас Варухо зоралэ́с лэ́нгэ.16. И сыр сыс, со, ке́ли ёнэ шундлэ́ сарэ́ далэ́ лава́, тэды ёнэ подыкхнэ екх пэ екхэ́стэ дара́са, и ёнэ пхэндлэ́ Варухоскэ: “Амэ́нгэ сыр тэ на пхэнас (тэ на пирипхэнас) крали́скэ сарэ́ далэ́ лава́.”17. И ёнэ пхучнэпэ Варухостыр, пхэни́: “Пхэн ту акана́ амэ́нгэ, сыр ту зачхиндян (записындян) сарэ́ далэ́ лава́ лэ́скирэ, Еремеёскирэ чибатыр (чибьятыр)?”18. И пхэндя́ Варухо лэ́нгэ: “О Ереме́ё пхэндя́ сарэ́ далэ́ лава́ пэ́скирэ чиба́са, и мэ зачхиндём лэн чэрниласа дрэ лылвари́.”19. Тэ́ньци тхага́рья пхэндлэ́ Варухоскэ: “Джа́ и гарадёв, ту и Ереме́ё; и мэк ние́кх (нико́н) тэ на джинэ́л, кай тумэ́ сан”20. И гинэ́ ёнэ кэ кра́ли пэ грэ́да барэ́ фэлатинякири (коловоскири), нэ ёнэ англэды́р чхудэ́ сви́тко дрэ комора Елисамоскири, лыла́-чхиныбнаскирэскири, и ёнэ пирипхэндлэ сарэ́ лава́ дро кан крали́скиро.21. И о кра́ли бичхадя́ Егудис тэ янэл сви́тко и ёв яндя́ лэс коморатыр Елисамоскирьятыр, кон сыс лыла́-чхиныбнаскиро ваш крали́скэ. И о Егуди гинэлас лэс зоралэ́с тэ шунэ́л кра́ли, и тэ шунэ́н тхага́рья, савэ́ сыс тэрдэ́ пала́л [пашы́л-р.с.] крали́стэ.22. Пэ дова́ часо о кра́ли сын бэшто́ дро ивантытко (зимитко) кхэр, сыс еня́то (биекхэ́скиро дэш) чхон, и хачолас яг дрэ саструны пири́ анги́л лэ́стэ.23. И сыс адя́кэ: ке́ли о Егуди пиригиндя трин ци штар ряды (колонки), о кра́ли чхиндя́ лэн чхурьяса лыла́-чхиныбнаскирьяса, и чхурдыя́ дрэ яг, сави́ сыс дро саструны пири́ аж сыр яг похая саро́ сви́тко, саво́ сыс дрэ пири́.24. И ёнэ на дара́ндынэ, и на рискирдэ́ пэ́скирэ и́ди: ни кра́ли, ние́кх лэ́скирэ дынарье́ндыр (слугэ́ндыр), кон шундлэ́ далэ́ лава́.25. На дыкхи́ пэ дова́, со Элнафано, Дэлаия и Гемария мангнэ́ крали́с тэ на хачкирэл сви́тко, нэ ёв сароекх (усае́кх) на кандыя́ лэн.26. И припхэндя́ кра́ли Иерамеилоскэ крали́скирэ чхавэ́скэ, Сэраияскэ, Азриэлёскирэ чхавэ́скэ, и Сэлэмияскэ, Авдилоскирэ чхавэ́скэ, тэ ухтылэ́н Варухос, лыла́-чхиныбнаскирэс и Еремеёс, пророко́с, нэ о Рай Дэвэ́л гарадя лэн.27. И пало́ (после) дова́, сыр кра́ли хачкирдя́ сви́тко лавэ́нца, савэ́ о Варухо зачхиндя́ Еремеёскирэ чибатыр, явдя́ лав Ра́скирэ-Дэвлэ́скиро кэ Ереме́ё, и сыс пхэндло́ лэ́скэ:28. “Лэ яви́р сви́тко и зачхин пэ лэ́стэ сарэ́ лава́, со сыс англэды́р пэ пэ́рво сви́тко, саво́ Иоакимо, кра́ли Юдэя́киро, хачкирдя́.29. И ту пхэн Иоакимоскэ, крали́скэ пэ Юдэ́я, – ‘адя́кэ ракирэ́ла Рай Дэвэ́л: ‘Ту хачкирдян дава́ сви́тко, пхэни́: ‘Со́скэ ту чхиндян пэ лэ́стэ, со о кра́ли Вавилоно́скиро, чачэс, явэ́ла и хасякирэ́ла дая́ пхув, и ёв кэрэ́ла адя́кэ, со на явэ́ла ни ману́ш, ни мурда́л (жывотно) одо́й.’”30. Палдава́ адя́кэ ракирэ́ла Рай Дэвэ́л пал Иоакимостэ, крали́стэ пэ Юдэ́я: ‘Лэ́стыр на явэ́ла ние́кх тэ бэшэ́л пэ Давидо́скиро троно, и лэ́скиро тру́по чхурдэна пэ хачкирибэ́н дывэсэ́, и пэ мразо раты́.31. И Мэ ява́ва тэ сэндякирав лэс, и лэ́скиро кхэри́тко ро́до и лэ́скирэ дынарье́н пал лэ́нгиро чорипэ́н, и Мэ яна́ва биба́хт (би́да) пэ лэ́ндэ, и пэ джиибнаскирэндэ дро Ерусалимо, пэ муршэндэ дрэ Юдэ́я, со Мэ пхэндём пэ лэ́ндэ, нэ ёнэ на причхудэ кан.’”32. Тэ́ньци Ереме́ё лыя́ яви́р сви́тко и дыя́ лэс Варухоскэ, лыла́-чхиныбнаскирэскэ, чхавэ́скэ Нерияскирэ, саво́ чхиндя́ пэ сви́тко сарэ́ лава́ Еремеёскирэ чибатыр, сарэ́ долэ́ лава́ лылварьятыр, со хачкирдя́ дрэ яг о Иоакимо, кра́ли пэ Юдэ́я; и одо́й сыс бут дочхудэ лава́, савэ́ сыс дасавэ́-паць сыр и пэ́рва лава́.Psalms 119:65-7265. Ту кэрдя́н лачхипэ́н Тырэ́ писхари́скэ, о Раё Дэ́вла, пир Тыро́ лав.66. Сыкля́кир ман кучэс тэ сэндякирав пир Тыро́, пал-дова́ со мэ патя́ва Тырэ́ припхэныбнэнгэ.67. Анги́л дова́, сыр Ту притасадян ман, мэ хохадёмпэ, нэ какана́ мэ ракхава Тыро́ лав.68. Ту сан лачхо́ и кэрэ́са лачхипэ́н, сыкля́кир ман Тырэ́ статутэ́нгэ.69. Пхутькирдэ́ пэфроми хохадэ пэ ма́ндэ: мэ ж ява́ва тэ рикиравпэ кэ Тырэ́ упхэныбэна́ сарэ́ мирэ́ илэ́стыр.70. Лэ́нгиро ило́ исын тхуло, на шунэ́ла нисо́, нэ ма́нгэ исын древа́н дро́го Тыро́ Зако́но.71. Ту пририкирдян ман ваш миро лачхипэ́н, соб (кай) ма́нгэ тэ высыклёвав Тырэ́ стату́ты.72. Тыро́ Зако́но исын бут фэды́р ма́нгэ, сыр бара́ котэра́ сувнака́стыр ци рупэ́стыр.Proverbs 27:22-2222. Мэк ту тэ тоўчынэс (тэ курэс) дылынэс дрэ ступа тоўкачоса, нэ усае́кх лэ́скиро дылныпэ́н на дурьёла лэ́стыр,1 Timoteoske 4:1-161. Ду́хо (Фа́но) маму́й ракирэ́ла, со дро палатуно́ (последнё) часо бут мануша́ мэкэ́на тэ патя́н, лэ́на тэ кандэ́н хоханэ́ ду́хи и тэ шунэ́н бэнгланэ-духэнгиро сыклякирибэ́н;2. кадава́ сыклякирибэ́н роспхэнэна дуемуитка хохаибнарья, савэ́ хасякирдэ́ сари́ ладж, сы́рбы вари-кон схачкирдя́ ла,3. и адалэ́ мануша́ запхэнэна тэ лэнпэ, и тэ на хан саро́, со создыя́ Дэвэ́л ваш дова́, соб (кай) патяибнаскирэнгэ, и кон уджиндя́ чачипэ́н, тэ хан саро́ парикирибнаса.4. Пал-дова́ со саро́, со создыя́ Дэвэ́л, исын лачхо́ и сашты́ саро́ тэ хас, ко́ли амэ парикираса пал хабэ́н,5. пал-дова́ со саро́ хабэ́н ячэ́ла жужо́ пир Дэвлэ́скиро лав и мангипэ́н.6. Ко́ли ту явэ́са тэ сыклякирэс кадава́ упхэныбэ́н пшалэ́нгэ, ту явэ́са лачхо́ кхангирья́киро дына́ри Исусо́скэ Христосо́скэ, и ту явэ́са чарадо патяибнаскирэ лавэ́нца и сыклякирибнаса, саво́ ту пхэрдэ́с кэрдя́н кэ ко́нцо/яго́ро (сполниндян).7. Ракхпэ магирдэ́ ракирибнэндыр, и пхурэ́-джувленгирэ парамысендыр, нэ сыклёв тэ дживэ́с дара́са анги́л Дэвлэ́стэ.8. Пал-дова́ со, кон залэлапэ пэ́скирэ мускулэнца и масэнца, дава́ лэ́скэ зорьякирэла лэ́скирэ маса́-дава́ исын набаро́ лачхипэ́н, нэ кон дживэ́ла дара́са анги́л Дэвлэ́стэ, одова́ янэ́ла лачхипэ́н пир саро́ и дэ́ла наде́я дро дава́ свэ́то и дрэ дова́, со явэ́ла анги́л.9. Кадава́ лав исын патяибны́тко, ёв исын мол тэ прилэл лэс,10. ваш дава́ амэ и кэра́са дая́ буты́ и сы́рбы марасапэ, со амэ чхуваса наде́я пэ джидэ́ Дэвлэ́стэ, Саво́ исын сарэнгирэ-манушэ́нгиро Зракхибнари, нэ буты́р кодолэ́нгэ, кон патя́ла дрэ Лэ́стэ.11. Пхэн зоралэ́с дава́ манушэ́нгэ и сыкля́кир лэн.12. Мэк ние́кх тэ на дыкхэ́л вучипна́стыр пэ ту́тэ пал тыро́ тэрныпэн; нэ сыка́в пэс дэвлытконэса патяибнаскирэнгэ дро лав, дро джиибэ́н, дрэ паты́в кэ яви́р мануша́, дро ду́хо (фа́но), дро патяибэ́н, дрэ жужыма.13. Гин Свэ́нто Чхиныбэ́н, подрикир манушэ́н, и сыкля́кир лэн кэ дава́ часо, пака мэ ява́ва.14. Прилэ́ илэ́са тала́но, со исын дрэ ту́тэ, саво́ сыс дыно́ ту́кэ пророкэндыр, пир саво́ кэрдэ́ рашая́, ке́ли ёнэ чхудэ́ упрэ́ васта́ пэ ту́тэ.15. Дыкх пал дава́, отдэ́ пэс пхэрдэ́с далэскэ, соб (кай) тэ явэ́л бицялы тыри́ буты́ ваш сарэ́нгэ.16. Дыкх цямкэс пал пэ́скиро джиибэ́н и сыклякирибэ́н, кэр дава́ саро́ часо, ко́ли ту адя́кэ явэ́са тэ кэрэ́с, зракхэ́са пэс и кодолэ́ манушэ́н, савэ́ шунэ́на тут. Romani Bible Baltic 2019 Maintained by the United Bible Societies for the Baltic Romani Mission