Bible in one year
October 26

1. И лыя́ тэ кралинэ́л о Сэдэки́я, чхаво́ Иосия́скиро, пэ штэ́то Иехонияскиро, саво́ сыс чхаво́ Иоакимоскиро, конэ́с Навуходоносо́ро кра́ли Вавилоно́скиро чхудя́ сыр крали́с пэ пхув Юдэякири.
2. И ни ёв, ни Сэдэки́я, и ние́кх лэ́скирэ дынарье́ндыр (слугэ́ндыр), ни манушэ́ндыр долэ́ пхувья́тыр на причхудэ кан кэ лава́ Ра́скирэ-Дэвлэ́скирэ, со Ёв ракирдя́ пир ма́ндэ, Еремеёстэ.
3. И о Сэдэки́я, кра́ли бичхадя́ Иегухалос, чхавэ́с Сэлэмиякирэс и Софонияс, чхавэ́с Маасеяскирэс, кон сыс раша́й, кэ проро́ко Ереме́ё тэ пхэнэ́н: “Помангпэ пал амэ́ндэ Ра́скэ-Дэвлэ́скэ, амарэ́ Дэвлэ́скэ.”
4. Нэ Ереме́ё тэды явэ́лас и псирэлас вольнэс машки́р манушэ́ндэ, пал-дова́ со ёнэ на чхудэ́ лэс ишчо (инкэ́) дро штарибэ́н.
5. Тэды фараоно́скиро халадыбэ́н выгия́ Египто́стыр, и ке́ли э Халде́и, савэ́ обчхудэ трусця́л Ерусалимо, шундлэ́ дая́ зан (зве́сь) пал лэ́ндэ, то тэды ёнэ гинэ́ криг Ерусалимо́стыр.
6. И сыс лав Ра́скирэ-Дэвлэ́скиро кэ проро́ко Ереме́ё, ракири́:
7. “Адя́кэ ракирэ́ла Рай Дэвэ́л, Дэвэ́л Израилёскиро: Адя́кэ тумэ́ пхэнэ́н Юдэя́кирэ крали́скэ, кон бичхадя́ тумэн кэ Мэ, соб (кай) тэ пхучэ́н Ма́ндыр: ‘А́кэ, исын фараоно́скиро халадыбэ́н, со выгия́ тэ подэл васт тумэ́нгэ, явэ́ла тэ рисёл палэ пэ пэ́скири пхув.
8. Нэ явэ́на палэ э Халде́и, и явэ́на тэ марэ́нпэ проти дава́ фо́ро, и ёнэ лэ́на лэс, и ёнэ схачкирэна лэс яга́са.’
9. Адя́кэ ракирэ́ла Рай Дэвэ́л: ‘На хохавэн пэс’, ракири́: ‘Халде́и, чачэс, гинэ́ амэ́ндыр пэ́скэ’, нэ ёнэ на джа́на пэ́скэ.
10. Пал-дова́ со на дыкхи́ пэ дова́, со тумэ́ и домарэнас саро́ халадыбэ́н Халдеенгиро, савэ́ марэнаспэ проти тумэ́ндэ, и одо́й тэ ячэ́нпэ фэ́ни дукхадэ (ранена) мануша́ лэ́ндыр, тэды сароекх уштэлас кажно (сва́ко) ману́ш дрэ пэ́скири ша́тра, и хачкирэлас фо́ро яга́са.’”
11. И сыс адя́кэ: ке́ли Халдее́нгиро халадыбэ́н мэкця́ осада Ерусалимо пир дова́, со сыс халадыбэ́н Фараоно́скиро,
12. то о Ереме́ё гия́ криг Ерусалимо́стыр пэ пхув Веньяминоскири, соб (кай) тэ гарадёл машки́р манушэ́ндэ.
13. И ке́ли ёв сыс дрэ Веньяминоскири по́рта, одо́й сыс барыдыро́ пэ стрэ́га (ракхибнарье́ндэ), кон кхарэ́ласпэ Ирия, чхаво́ Сэлэмеяскиро (чхаво́ Хананеяскиро), и ёв ухтылдя Еремеёс, пророко́с, и пхэндя́: “Ту нашэса кэ Халде́и.”
14. Тэды о Ереме́ё пхэндя́: “Дава́ исын начачо! Мэ на нашава кэ Халдеи.” Нэ Иерея [Ирия-ю.о.] на шундя́ лэс, и ёв ухтылдя Еремеёс и яндя́ лэс кэ тхага́рья.
15. И тхага́рья древа́н холясынэ пэ Еремеёстэ, и ёнэ шулякирэнас (марэнас) лэс и ёнэ чхудэ́ лэс дро штарибэ́н дро кхэр Ионафаноскиро, лыла́-чхиныбнаскирэскэ. Пал-дова́ со ёнэ кэрдэ́ штарибэ́н дро дова́ кхэр.
16. Ке́ли Ереме́ё загия́ дрэ штарибэ́н ґанбинаса (ямаса), со сыс дрэ кхэлтра (подвало), кай ёв яця́пэ одо́й бут дывэса́,
17. то кра́ли Сэдэки́я бичхадя́ тэ янэл лэс яври́. О кра́ли пхучэлас чораханэ́с лэ́стыр дро пэ́скиро кхэр и пхэндя́: “Ци исын вари-саво́ лаворо Ра́стыр-Дэвлэ́стыр?” И отпхэндя́ Ереме́ё: “Исын.” Тэ́ньци ёв пхэндя́: “Тут выдэна дрэ васта́ крали́скирэ Вавилоно́стыр!”
18. И пхэндя́ Ереме́ё крали́скэ Сэдэкияскэ: “Саво́ чорипэ́н мэ кэрдём ту́кэ и тырэ́ дынарье́нгэ, ци тырэ́ манушэ́нгэ, со ту чхудя́н ман дро штарибэ́н?”
19. И кай исын тырэ́ проро́ки, савэ́ ангилпхэнэлас, ракири́: “О кра́ли Вавилоно́скиро на явэ́ла тэ джал пэ тумэ́ндэ ци проти дая́ пхув?
20. Палдава́ мэ манга́ва тэ шунэ́с акана́: ‘Миро Раё, кра́лё! Мэк тэ прилэс ту миро мангипэ́н, на ри́скир ман дро Ионафаноскиро лыла́-чхиныбнаскиро кхэр, соб (кай) тэ на мэрав мэ одо́й.’”
21. Тэ́ньци кра́ли Сэдэки́я припхэндя́, соб (кай) тэ чхувэ́н Еремеёс дрэ грэ́да, кай сыс стрэ́га, и ёнэ дэ́нас лэ́скэ котэ́р (куско) маро́ пэкибнаскирэ гасатыр (вулицатыр) аж кэ дова́, сыр маро́ дро фо́ро кончиндяпэ. И Ереме́ё яця́пэ дрэ грэ́да, кай сыс стрэ́га.
1. И шундя́ Сафатия [Шэфатия-ю.о.], чхаво́ Матаноскиро, и о Годолия [Гэдалия-ю.о.], чхаво́ Пасхуроскиро, и Юхало, чхаво́ Сэлэмияскиро (Шэлэмеяскиро), и Пасхоро, чхаво́ Малхиякиро’, – лава́, со пхэндя́ проро́ко Ереме́ё сарэ́ манушэ́нгэ, ракири́:
2. ‘Адя́кэ ракирэ́ла Рай Дэвэ́л: “Кон ячэ́лапэ дро дава́ фо́ро, одова́ мэрэ́ла куртала́тыр, бокха́тыр и мэрибнытконэ франсэндыр, нэ кон джа́ла кэ Халде́и, одова́ явэ́ла тэ дживэ́л: и лэ́скиро джиибэ́н явэ́ла сыр почастунко лэ́скэ, и ёв явэ́ла джидо́.”
3. ‘Адя́кэ ракирэ́ла Рай Дэвэ́л: “Дава́ фо́ро, сыр пхэндло́, отдэлапэ дрэ васта́ крали́скирэ Вавилоно́скирэ халадэнгэ, савэ́ лэ́на лэс.”
4. Палдава́ э тхага́рья пхэндлэ́ крали́скэ: “Амэ мангаса тут, соб (кай) тэ мулякирэ́н адалэ́ манушэ́с, пал-дова́ со, со́скэ ёв бизорьякирэла васта́ манушэ́нгирэ, савэ́ марэнапэ, соб (кай) тэ ячэ́нпэ дро дава́ фо́ро, и васта́ сарэ́ манушэ́нгэ, ко́ли ёв ракирэ́ла дасавэ́ лава́ лэ́нгэ? Кадава́ ману́ш на родэ́ла [на камэ́ла-р.с.] лачхипэ́н далэ́ манушэ́нгэ, а биба́хт (би́да).”
5. О кра́ли Сэдэки́я тэды пхэндя́: “Дыкхэ́н, ёв исын дрэ тумарэ́ васта́. Крали́скэ нашты́ ничы́ тэ кэрэ́л проти тумэ́ндэ.”
6. Тэ́ньци ёнэ лынэ́ Еремеёс и чхурдынэ́ лэс дрэ штарибнытко ґанби́н, сави́ сыс кэ Малхия, крали́скиро чхаво́, пэ грэ́да (дво́ро) штарибнаскири и ёнэ мэкнэ́ Еремеёс тэлэ́ шэлэнца. Дрэ ґанби́н штарибнаскири на сыс пани́, нэ е́кх бла́та (блатаны артапе́ль). И лыя́ тэ тасадёл Ереме́ё дрэ бла́та.
7. И Авдемеле́хо (Эбэд-Меле́хо) Эфиоплянино, о евнухо дро крали́скиро кхэр, шундя́, со ёнэ чхудэ́ Еремеёс дрэ штарибнытко ґанби́н (яма). Ке́ли о кра́ли сыс бэшто́ пашы́л по́рта Веньяминоскири,
8. то о Авдемеле́хо гия́ яври́ крали́скирэ кхэрэ́стыр и пхэндя́ крали́скэ, ракири́:
9. “Миро Раё кра́лё! Кадалэ́ мануша́ кэрдэ́ фуипэ́н дро саро́, со ёнэ кэрэ́нас, Еремеёскэ, пророкоскэ, савэ́с ёнэ чхурдынэ́ дро штарибнытко ґанби́н, и ёв мэрэ́ла пир дова́, со исын бокх пэ дова́ штэ́то, кай ёв исын: пал-дова́ со нанэ буты́р маро́ дро фо́ро.”
10. И припхэндя́ кра́ли Авдемелехоскэ, Эфиопляниноскэ, пхэни́: “Лэ адатхы́р трия́нда манушэ́н пэ́са, и ґаздэ́н упрэ́ Еремеёс пророко́с, штарибнытконэ ґанбинатыр анги́л дова́, сыр ёв мэрэ́ла.”
11. И лыя́ Авдемеле́хо манушэ́н тэл пэ́скири зор, и ёв загия́ дрэ крали́скиро кхэр тэл пиралы́, и лыя́ одотхы́р пхуранэ́ патавэ и пхуранэ́ иде́нгирэ котэра́ (куски), и мэкця́ лэн тэлэ́ пэ шэлэ дрэ штарибнытко ґанби́н.
12. И пхэндя́ Авдемеле́хо, Эфиоплянино, Еремеёскэ: “Подчхув пхуранэ́ патавэ и пхуранэ́ иденгирэ котэра́ тэл пхака́, и тэл шэлэ.” И кэрдя́, Ереме́ё адя́кэ.
13. И ёнэ лынэ́ тэ тырдэн упрэ́ Еремеёс шэлэнца и ґаздынэ́ лэс яври́ штарибнытконэ ґанбинатыр: и яця́пэ Ереме́ё пэ грэ́да (дво́ро) штарибнаскири.
14. И кра́ли Сэдэки́я, бичхадя́, соб (кай) тэ янэ́н пророко́с Еремеёс кэ пэ кэ три́то загиибэ́н дро Кхэр Ра́скирэ-Дэвлэ́скиро. И пхэндя́ кра́ли Еремеёскэ: “Мэ пхучава ту́тыр вари-со. На гарав нисо́ ма́ндыр.”
15. И Ереме́ё пхэндя́ Сэдэкияскэ: “Ко́ли мэ подава зан (звесь) ту́кэ, ци на мулякирэса ту ман? И ко́ли мэ да́ва годы́ ту́кэ, ци ту явэ́са тэ кандэс ман?”
16. И кра́ли о Сэдэки́я дыя́ совла́х чораханэ́с Еремеёскэ, ракири́: “Тэ явэ́л джидо́ Рай Дэвэ́л, Кон создыя́ амарэ́ далэ́ дия́, со мэ на мулякирава тут, и со мэ на выдава тут дрэ васта́ манушэ́нгирэ, савэ́ родэ́на тыро́ ди.”
17. Тэ́ньци пхэндя́ Ереме́ё Сэдэкияскэ: ‘Адя́кэ ракирэ́ла Рай Дэвэ́л: болыбна́скирэ-янголэ́нгиро, Дэвэ́л Израилёскиро: “Ко́ли ту кокоро́ пэ́стыр джа́са муй пэ муй кэ Вавилоно́скирэ тхага́рья, то тыро́ ди явэ́ла джидо́, и дава́ фо́ро на явэ́ла хачкирдо яга́са; и ту явэ́са джидо́, и тыро́ кхэр.
18. Нэ ко́ли ту на джа́са муй пэ муй кэ Вавилоно́скирэ тхага́рья, то тэды дава́ фо́ро явэ́ла дыно́ дрэ васта́ Халдее́нгирэ, и ёнэ хачкирэна лэс яга́са, и ту никай на кэрэсапэ (на дэсапэ) лэ́нгирэ вастэ́ндыр.’”
19. И о кра́ли Сэдэки́я пхэндя́ Еремеёскэ: “Мэ дарава Юдэендыр (Юдэндыр), савэ́ нашнэ́ (пиригинэ́) кэ Халде́и, соб (кай) э Халдеи тэ на выдэн ман дрэ васта́ лэ́нгирэ, и соб (кай) ёнэ тэ на кэрэ́н ма́нца, со ёнэ закамэна.”
20. Нэ Ереме́ё пхэндя́: “Ёнэ на выдэна тут. Шун, мэ манга́ва тут, зан Ра́скирэ-Дэвлэ́скири дро дова́, со мэ пхэна́ва ту́кэ, и тыро́ ди явэ́ла тэ дживэ́л.
21. Нэ ко́ли ту отпхэнэсапэ тэ здэспэ, то, акэ, исын лав, со Рай Дэвэ́л сыкадя́ ма́нгэ:
22. ‘А́кэ, сарэ́ джувле́н, савэ́ ячнэ́пэ дро кхэр крали́скиро пэ Юдэ́я, янэ́на кэ Вавилоно́скирэ тхага́рья, и кодолэ́ джувля́ пхэнэ́на ту́кэ: ‘Тырэ́ мала́ подракирдэ тут, и ёнэ лынэ́ упралыпэ́н пэ ту́тэ, тырэ́ ґэра́ тасадынэ дрэ бла́та (артапель) И ёнэ рисинэ́ криг ту́тыр.’
23. И ёнэ лыджа́на криг ту́тыр тырэ́ джувле́н и тырэ́ чхаворэ́н Халдеенгэ, и ту никай на кэрэсапэ лэ́нгирэ вастэ́ндыр, нэ крали́скиро васт Вавилоно́стыр лэ́ла тут. И ту кэрэ́са адя́кэ, со дава́ фо́ро схачкирэна яга́са.’”
24. И Сэдэки́я пхэндя́ Еремеёскэ: “Мэк ние́кх тэ на джинэ́л далэ́ лава́, и ту на мэрэ́са.”
25. Нэ ко́ли тэ шунэ́н тхага́рья, со мэ ракирдём ту́са, и ёнэ явэ́на кэ ту, и пхэнэ́на ту́кэ: ‘Пиридэ амэ́нгэ со ту акана́ пхэндя́н крали́скэ, и адя́кэ-паць дова́, со кра́ли пхэндя́ ту́кэ; на гарав ничы́ амэ́ндыр, и амэ на даса тут пэ мэрибэ́н’,
26. то ту тэды пхэнэ́са лэ́нгэ: ‘Мэ чхудём миро мангипэ́н анги́л крали́стэ, соб (кай) ёв тэ на рискирэ́л ман дро Ионафаноскиро кхэр тэ на мэрав одо́й.’”
27. И сарэ́ тхага́рья явнэ́ кэ Ереме́ё и ёнэ пхучнэ́ лэ́стыр, и ёв пхэндя́ лэ́нгэ сарэ́ одолэ́ лава́, со о кра́ли припхэндя́. И ёнэ гинэ́ криг лэ́стыр штылэ́с, пал-дова́ со ёнэ на шундлэ́, пал со сыс ракирибэ́н крали́са.
28. И Ереме́ё ячэласпэ пэ грэ́да (дво́ро) штарибнаскири анги́л/ кэ дова́ дывэ́с, сыр Ерусалимо лынэ́. И сыс ёв одо́й, ке́ли лынэ́ Ерусалимо.
73. Тырэ́ васта́ создынэ ман и чхудэ́ ман, дэ ма́нгэ годы́ тэ сыклёвав Тырэ́ припхэныбнэнгэ.
74. Одолэ́, савэ́ дарэ́на Ту́тыр, явэ́на зоралэ́с тэ радынэ́нпэ, сыр дыкхэ́на ман, пал-дова́ со мэ ужакирава лачхипэ́н Тырэ́ лавэ́стыр.
75. Мэ джино́м (джина́в), о Раё Дэ́вла, со Тыро́ сэ́ндо исын чачуно́, и со Ту тасадян ман пир Тыро́ чачипэ́н.
76. Мэк тэ явэ́л Тыри́ лачхэ́-илы́ткима тэ подрикирэ́л ман, Тырэ́ писхари́с, пир Тыро́ лав.
77. Мэк тэ явэ́л кэ мэ Тыри́ лачхэ́-илы́ткима, соб (кай) мэ могинавас тэ джива́в, пал-дова́ со мэ бахталёвава Тырэ́ Законо́стыр.
78. Мэк пхутькирдэ́ тэ явэ́н ладжакирдэ́, пал-дова́ со ёнэ пэфроми кэрдэ́ хохаибэ́н пэ ма́ндэ: нэ мэ ж ява́ва тэ розлав Тырэ́ упхэныбэна́.
79. Мэк одолэ́, савэ́ дарэ́на Ту́тыр, тэ явэ́н кэ мэ, и сарэ́ одолэ́, кон джинэ́ла Тырэ́ досыкаибэна.
80. Мэк тэ явэ́л миро ило́ бидошэ́нгиро дрэ Тырэ́ стату́ты, соб (кай) ма́нгэ тэ на явэ́л ладжаво.
23. Дыкх кучэс пал пэ́скиро бакрэнгиро гурто, и придыкх миштэ́с пал пэ́скири кхэри́тко стада:
24. пал-дова́ со барвалыпэ́н нанэ пэ сарэ́ ве́ки, и, крали́тко стадык (коро́на) жа на ячэ́лапэ пэ сарэ́ ро́ды?
25. Кхас укэдэна криг и ялы́ (свя́жо) чар сыкадёла, и бэргитка зэлэна чарья́ скэдэ́на.
26. Бакрэ́ исын ту́кэ ваш урибэ́н, и бузнэ (козлы) исын ваш ту́кэ, соб (кай) тэ дэн ловэ́ пэ фэлдакири тими́н;
27. ту́кэ явэ́ла тэ ухтылэл (тэ явэ́л до́си) бузнытко (козлытко) тхуд ваш тыро́ хабэ́н, ваш хабэ́н тырэ́ кхэритконэнгэ, и тэ чалякирэн тырэ́ дынарицэн.
1. На сыка́в банг пхурэ́ манушэ́скэ, нэ отлыджапэ кэ ёв, сыр кэ пэ́скиро дад, а кэ тэрнэ́ отлыджапэ, сыр кэ пэ́скирэ пша́ла,
2. отлыджапэ кэ пхури джувлы́, сыр кэ дай, кэ тэрнэ́ джувля́ отлыджапэ, сыр кэ пхэня́ сарэ́ жужымаса.
3. Кутякир (уважын) пивле́н (удовэн), савэ́ ячнэ́пэ би ромэнгиро чачунэ́с;
4. ко́ли вари-савьятэ пивлятэ исын чхавэ́ ци ўнуки, то мэк ёнэ англэды́р тэ сыклён тэ сыкавэ́н дэвлыткима кэ пэ́скири сэ́м΄я (ири́) и кэ дада́, дава́ исын лачхо́ Дэвлэ́скэ.
5. А чачуны́ пивлы и сави́ исын екхджины, ужакирэ́ла лачхипэ́н Дэвлэ́стыр и мангэлапэ Дэвлэ́скэ и мангэ́ла Дэвлэ́с дывэ́с и рат.
6. Нэ, одоя, сави́ дживэ́ла ваш пэ́скиро камибэн, исын сы́рбы мулы, на дыкхи́, со ёй исын джиды.
7. И дава́ пхэн зорья́са манушэ́нгэ, соб (кай) ёнэ тэ явэ́н бидошэнгирэ.
8. А ко́ли вари-кон пал пэ́скирэ манушэ́ндэ и буты́р сарэ́стыр пал кхэритконэндэ на дыкхэ́ла, одова́ ману́ш отпхэндяпэ патяибнастыр и ёв исын фуеды́р одолэ́стыр, саво́ на патя́ла.
9. Мэк ни екх пивлы тэ на зачхинэлпэ дрэ кхангирья́кири лылвари́ тэ помогинэн ла́кэ, пака ла́кэ нанэ шовдэша́ бэрш, соб (кай) ла́тэ тэ явэ́л екх ром,
10. савья́ джинэ́на пир ла́кирэ лачхэ́ рэ́нды, ко́ли ёй выбарьякирдя лачхэнца пэ́скирэ чхавэ́н, ко́ли ёй прилэлас чужонэ́ манушэ́н, савэ́ндэ на сыс, кай тэ дживэ́н, мордя ґэра́ свэнтонэнгэ, и помогинэлас одолэ́нгэ, конэ́стэ сыс би́да, и ко́ли ёй какана́ кэрэ́ла дурэды́р лачхэ́ рэ́нды.
11. На прилэ́ тэрнэ́ пивлен дрэ кхангирья́кири лылвари́ тэ помогинэн лэ́нгэ дрэ кхангири́, пал-дова́ со, ке́ли лэ́нгирэ-масэ́нгиро камибэн ячэ́ла зоралэды́р тырдыпнастыр кэ Христо́со, ёнэ нэвэ́стыр камэ́на тэ джа́н палоро́м.
12. Ёнэ кокорэ́ ячэ́напэ бангэ́, со ёнэ мэкнэ́ англатуно́ патяибэ́н и дыно́ лав.
13. И ёнэ адя́кэ-паць на кэрэ́на нисо́, а псирэ́на пир кхэра́, злыджана плётки, рэсэна на дрэ пэ́скирэ рэ́нды тэ ракирэ́н дова́, со налачхэ́с тэ ракирэ́н.
14. И палдава́ мэ кама́м, соб (кай) тэрнэ́ пивля, тэ джа́н палоро́м тэ биянэн чхаворэ́н, и тэ лыджа́н кхэри́тко хулаибэн, тэ на дэн нисаво́ саштыпэн тумарэ́ вэргоскэ, соб (кай) тэ ракирэ́л фуипэ́н.
15. Пал-дова́ со вари-савэ́ лэ́ндыр змардэпэ патяибнаскирэ дромэ́стыр и гинэ́ пал налачхэстэ.
16. Ко́ли вари-савэ́ патяибнаскирэ джувля́тэ исын пивля (удовы) кхэрэ́, мэк ёй тэ дэл васт лэ́нгэ, и мэк ёй тэ на чхувэ́л пхарипэ́н пэ кхангири́, соб (кай) ёй дэл васт чачунэ́ пивленгэ.
17. Мэк годэпхурэ́ (пхурэды́р пша́ла), савэ́ шука́р дынаринэна ваш Дэвлэ́скэ, тэ явэ́н дрэ бари паты́в, буты́р сарэ́стыр одолэ́, савэ́ роспхэнэна Христосо́скиро лав и сыклякирэ́н;
18. пал-дова́ со дрэ свэ́нто чхиныбэ́н исын пхэндло́: “На закэр муй бутярнэ́ гурувэскэ пэ гив, и бутярно исын мол тэ лэл плэскирибэн пал пэ́скири буты́.”
19. На прилэ́ бангякирибэн пэ годэпхурэстэ (пхурэдырэ пшалэ́стэ) ни дро со, сыр анги́л дуендэ ци тринэндэ якхитконэндэ/ якхалэндэ (свидетелендэ).
20. Манушэ́н, савэ́ кэрдэ́ грэ́хо, бангякир маму́й анги́л сарэ́ндэ, соб (кай) яви́р тэ дарэ́н.
21. Мэ засовлахава тут анги́л Дэвлэ́стэ и Растэ – Дэвлэ́стэ, Исусо́стэ Христосо́стэ и Янголэндэ, савэ́н выкэдынэ́, тэ зракхэс далэ́ упхэныбэна́ и адя́кэ нисо́ тэ на парувэс ваш вари-конэ́скэ, соб (кай) ничы́ тэ на кэрэ́с пир пэ́скиро ило́.
22. На сыгнёв (на яв сы́гно) тэ чхувэ́с упрэ́ васта́ ни пэ конэ́стэ, соб (кай) тумэ́ тэ на явэс кхэтанэ́ манушэ́нца, савэ́ кэрэ́на грэ́хо и на чхув упрэ́ васта́ пэ манушэ́стэ, саво́ наґара лыя́ тэ патял, ракх пэс набангэса (жужэса)
23. Дурэды́р на пи екх пани́, нэ выпи на́бут мол (вино) ваш тыро́ кужум и тыро́ часто насвалыпэн.
24. Вари-савэ́ манушэ́нгирэ грэ́хи исын адя́кэ бицялэ, со ёнэ янэ́на пэ пэ́стэ сэ́ндо англэды́р одолэ́ часостыр, саво́ явэ́ла, нэ яви́р манушэ́нгирэ грэ́хи пака исын набицялэ, ёнэ джа́на лэ́са, карик и ёв джа́ла.
25. Адя́кэ-паць и лачхэ́ рэ́нды исын бицялэ; ко́ли ёнэ нанэ дасавэ́, на могинэн тэ явэ́н ґарадэ́.
Romani Bible Baltic 2019
United Bible Societies for the Baltic Romani Mission