Bible in one year - Пэ Балтитко Романи чиб

Bible in one year October 29

1. И сыс адя́кэ: ке́ли Ереме́ё пирияця́ (кончындя) тэ ракирэ́л анги́л сарэ́ манушэ́ндэ сарэ́ лава́ Ра́скирэ-Дэвлэ́скирэ, лэ́нгирэ Дэвлэ́скирэ, савэ́нца Рай Дэвэ́л, лэ́нгиро Дэвэ́л, бичхадя́ лэс кэ ёнэ – сарэ́ далэ́ лава́,

2. то Аза́рия, чхаво́ Осаияскиро (Госаияскиро); Иоханано, чхаво́ Кареёскиро и сарэ́ пхутькирдэ́ мануша́, пхэндлэ́ Еремеёскэ: “Ту ракирэ́са начачипэ́н! О Рай Дэвэ́л, амаро́ Дэвэ́л, на бичхадя́ тут тэ пхэнэ́с: ‘На джа́н кэ Еги́пто тэ дживэ́н одо́й!’

3. Нэ дава́ исын Варухо, чхаво́ Нирияскиро, кон подракирэла тут проти амэ́ндэ, соб (кай) тэ выдэс амэн дрэ васта́ Халдеенгирэ, соб (кай) ёнэ, тэ мулякирэ́н амэн, ци тэ лыджа́н криг дро пле́но кэ Вавило́но.”

4. Акэ, о Иоханано, чхаво́ Кареёскиро, и сарэ́ рая халадэ́нгирэ и сарэ́ мануша́, на кандынэ́ зан Ра́скирэ-Дэвлэ́скири, соб (кай) тэ ячэ́нпэ тэ дживэ́н пэ пхув Юдэякири.

5. Нэ Иоанано, чхаво́ Кареяскиро и сарэ́ рая халадэ́нгирэ, лынэ́ сарэ́н, савэ́ ячнэ́пэ Юдэя́тыр, кон на рисинэ́ тэ ячэ́нпэ тэ дживэ́н пэ Юдэякири пхув, сарэ́ Наюдытконэ́ нацые́ндыр, кэ савэ́ лэн традынэ –

6. муршэ́н, джувле́н, биятэ́н, крали́скирэ чхае́н и кажнонэ́ (сваконэ) манушэ́с, конэ́с о Навузардано, рай пэ крали́скири стрэ́га, ячкирдя́ Годолияса, чхавэ́са Ахикамоскирэса (унукоса (непотоса) Шафаноскирэса), и Еремеёс, пророко́с, и Варухос, чхавэ́с Нерияскирэс.

7. И ёнэ гинэ́ кэ пхув Египто́скири, пал-дова́ сыр ёнэ на кандынэ́ зан Ра́скирэ-Дэвлэ́скири. И ёнэ догинэ́ кэ Тафнисо [Тафанхе́со-ю.о.].

8. И сыс дро Тафнисо лав Ра́стыр-Дэвлэ́стыр кэ Ереме́ё, ракири́:

9. “Лэ барэ́ бара́ дрэ васта́ пэ́скирэ и гарав лэн дрэ ґлэя (глина) дро бар, саво́ исын пэ штэ́то, сыр джа́са андрэ́ кхэр Фараоно́скиро пэ якха́ сарэ́ Юдэ́нгирэ,

10. и пхэн лэ́нгэ: ‘Адя́кэ ракирэ́ла болыбна́скирэ-янголэ́нгиро Рай Дэвэ́л, Дэвэ́л Израилёскиро: А́кэ, Мэ бичхава́ва и лава́ Навуходоносорос, крали́с Вавилоноскирэс, Мирэ́ писхари́с, и Мэ чхува́ва лэ́скиро троно пэ кадалэ́ бара́, савэ́ Мэ гарадём. И ёв росчхувэла пир рига́ пэ́скири крали́тко бари ша́тра упра́л пэ лэ́ндэ.

11. И явэ́ла ёв и розмарэла пхув Египто́скири, кон исын банго́ тэ мэрэ́л, джа́ла пэ мэрибэ́н, кон банго́ дро пле́но, джа́ла дро пле́но, кон банго́ тэл курта́ла, джа́ла тэл курта́ла.

12. Мэ росхачкирава яг дрэ кхэра́, пэ мангипнытка штэ́ты, кай дэвлорэ́ Египто́скирэ, и о Навуходоносо́ро схачкирэ́ла лэн и лэ́ла лэн дро пле́но. И ёв выкэдэ́ла миштыпэ́н пхувья́тыр Египтоскирьятыр сыр о чхупна́ри выкэдэ́ла (урье́ла) пэ пэ́стэ пэ́скиро урибэ́н, и ёв джа́ла криг одотхы́р раманёса (спокоёса).

13. Ёв пхагирэ́ла тэлэ́ обсвэнцона сты́лбы (статулы) дро Бэфсамисо (Бэф-Сэмэса), со исын пэ пхув Египто́скири, и мангипнытка (дэвлорэнгирэ) штэ́ты дро Еги́пто ёв хачкирэ́ла сарэ́са яга́са.’”

Jeremiah 44:1-30

1. Лав, саво́ сыс Еремеёскэ пал сарэ́ Юдэ́ндэ, кон дживдя́ пэ пхув Египто́скири, савэ́ ячнэ́ тэ дживэ́н кэ Магдола [Мигдола-ю.о.], и дро Тафнисо (Тафанеса), дро Нофо, и пэ пхув Пафрососкири, ракири́:

2. “Адя́кэ ракирэ́ла болыбна́скирэ-янголэ́нгиро Рай Дэвэ́л, Дэвэ́л Израилёскиро: ‘Тумэ́ дыкхнэ́ сари́ биба́хт (би́да), со Мэ яндём пэ Ерусалимо и пэ сарэ́ фо́рья Юдэя́кирэ; и, акэ, далэ́ фо́рья исын чхучэ́ (пуста), и ние́кх (нико́н) на дживэ́ла одо́й,

3. пал лэ́нгирэ фуй рэ́нды, савэ́ ёнэ кэрдэ́, соб (кай) тэ дэн яг Мирэ́ холякэ пир дова́, со ёнэ псирдэ́ тэ хачкирэ́н дро́га смо́лы и тэ дынаринэ́н явирэ дэвлорэ́нгэ, савэ́н ёнэ на джиндлэ́, ни тумэ́, ни тумарэ́ дада́.

4. Нэ Мэ бичхававас кэ тумэ́ сарэ́ Мирэ́ писхарье́н, пророкэ́н, тася́рлэс (ра́нэс) злокостыр Мэ бичхававас лэн, соб (кай) тэ пхэнэ́н тумэ́нгэ: ‘На кэрэ́н далэ́ джунгалэ́ рэ́нды, со Мэ древа́н на кама́м!’

5. Нэ тумэ́ на кандынэ́, и на причхудэ пэ́скиро кан, соб (кай) тэ рисён криг пэ́скирэ фуипнастыр, соб (кай) тэ на хачкирэ́н дро́га смо́лы явирэ дэвлорэ́нгэ.

6. Палдава́ Миро холякирибэ́н и Мири́ холы́ вычхудэпэ и росхачинэ дрэ фо́рья Юдэя́кирэ и пэ вули́цы (га́сы) Ерусалимо́скирэ; и ёнэ исын чхучэ́ и би манушэ́нгирэ, сыр исын дава́ ададывэ́с.

7. И акана́ – адя́кэ ракирэ́ла Рай Дэвэ́л, болыбна́скирэ-янголэ́нгиро Дэвэ́л, Дэвэ́л Израилёскиро: ‘Ваш (пал) со тумэ́ кэрэ́на дая́ бари биба́хт проти пэ́стэ, со́скэ тумэ́ кэрэ́на адя́кэ, соб (кай) тэ хасён тумарэ́ мурша́ и джувля́, бияты и тыкнэмаса, соб (кай) тэ на ячэ́лпэ ние́кх Юдэя́тыр,

8. ваш со тумэ́ дэ́на яг Мирэ́ холякэ (холякирэна Ман) буте́нца тумарэ́-вастэнгирэ, ке́ли тумэ́ хачкирэна дро́га смо́лы явирэ дэвлорэ́нгэ пэ пхув Египто́скири, пэ сави́ тумэ́ гинэ́ тэ дживэ́н, соб (кай) тэ хасён тумэ́ (хасякирэ́н пэс) и, соб (кай) машки́р сарэ́ на́цыи пэ пхув тэ явэ́л прокошыбэ́н (арман) и бипатыв кэ тумэ́?

9. Ци бистырдэ тумэ́ фуипэ́н тумарэ́-дадэ́нгиро, фуипэ́н кралье́нгиро Юдэя́тыр, фуипэ́н лэ́нгирэ-ромненгиро до-са́мо фуипэ́н, со тумэ́ кокорэ́ кэрдэ́, и фуипэ́н, со тумарэ́ джувля́ кэрдэ́ пэ пхув Юдэякири и пэ вули́цы (га́сы) дро Ерусалимо.

10. Тумэ́ кэ ададывэ́с на тыкнякирдэ пэс, на лынэ́ тэ дарэ́н, тумэ́ на кэрдэ́ пир Миро Зако́но ци пир Мирэ́ стату́ты, савэ́ Мэ дыём тумэ́нгэ и тумарэ́ дадэ́нгэ.

11. Палдава́ – акэ, со ракирэ́ла болыбна́скирэ-янголэ́нгиро Рай Дэвэ́л, Дэвэ́л Израилёскиро: “Акэ, Мэ рискира́ва Миро муй проти тумэ́ндэ ваш биба́хт, и ваш хасибан Юдэя́киро.

12. И Мэ ла́ва кодолэ́н, савэ́ ячэ́напэ Юдэя́тыр, соб (кай) ёнэ тэ рискирэ́н пэ́скирэ муя́ тэ джа́н пэ пхув Египто́скири тэ дживэ́н сыр чу́жа; одо́й ёнэ хасёна сарэ́ и лэ́нгэ явэ́ла хасибэ́н пэ пхув Египто́скири. Ёнэ хасёна куртала́тыр и бокха́тыр. Ёнэ мэрэ́на, тыкнэстыр кэ най барэды́р куртала́тыр, бокха́тыр, и пэ тумэ́ндэ явэ́ла прокошыбэ́н и ди́во трашаса (трашаибэ́н), прокошыбэ́н и бипатыв.

13. И Мэ пхарэ́с сэндякирава лэн, савэ́ дживэ́на пэ пхув Египто́скири, адя́кэ-паць сыр Мэ пхарэ́с сэндякирдём Ерусалимо куртала́са, бокхаса, и мэрибнытконэ франсэнца;

14. соб (кай) ние́кх, кон ячэ́лапэ Юдэя́тыр, савэ́ явнэ́ пэ пхув Египто́скири тэ дживэ́н одо́й сыр чу́жа, тэ на кэрэнпэ никай, и тэ на выджидён, соб (кай) тэ рисён палэ пэ пхув Юдэякири, кэ сави́ лэ́нгиро ило́ марэлапэ тэ рисён палэ и тэ дживэ́н: нико́н на рисёла палэ апри́ч одолэ́ндэ, савэ́ нашэ́на.”

15. Тэ́ньци сарэ́ мурша́, савэ́ джиндлэ́, со лэ́нгирэ ромня́, хачкирдэ́ дро́га смо́лы явирэ дэвлорэ́нгэ, и сарэ́ джувля́, кон сыс тэрдэ́ пашы́л, бут лэн, и сарэ́ мануша́, савэ́ дживдэ́ пэ пхув Египто́скири кэ Пафросо, отпхэндлэ́ Еремеёскэ и пхэндлэ́:

16. “Со касынэлапэ лав, со ту пхэндя́н амэ́нгэ Ра́скирэ-Дэвлэ́скирэ лавэ́стыр, амэ на ява́са тэ шунас дава́ лав ту́тыр!

17. Нэ амэ, чачэс ява́са тэ кэра́с пир кажно лав, со амэ пхэндям пэ́скирэ чиба́са: тэ хачкирас дро́га смо́лы болыбнытконэ дэвлорьякэ и тэ чхувас ла́кэ тхадунэ свэ́нта дыибэна́, сыр амэ кэрдя́м: амэ и амарэ́ дада́, амарэ́ кра́лья и амарэ́ тхага́рья дрэ фо́рья Юдэя́кирэ и пэ вули́цы (га́сы) Ерусалимо́скирэ. Палдава́ амэ́ндэ сыс бут маро́, амэ́нгэ сыс миштэ́с, и амэ на дыкхцям биба́хт.

18. Нэ сыр фэ́ни (то́ка) амэ мэкцям тэ хачкирас дро́га смо́лы болыбнытконэ дэвлорьякэ, и тэ чхувас ла́кэ тхадунэ свэ́нта дыибэна́, амэ́нгэ яця́ тэ на ухтылэл (тэ на явэ́л до́си) саро́, и амэ хасёваса куртала́тыр и барэ́ бокха́тыр.”

19. Э джувля́ ишчо (инкэ́) пхэндлэ́: “И ке́ли амэ хачкирдям дро́га смо́лы дэвлорьякэ болыбнытконакэ и чхудям ла́кэ тхадунэ свэ́нта дыибэна́; ци амэ кэрдя́м марикля ла́кирэ мо́са, ци чхудям тхадунэ свэ́нта дыибэна́ ла́кэ, соб (кай) тэ на джинэ́н амарэ́ рома́?”

20. Тэ́ньци пхэндя́ Ереме́ё анги́л сарэ́ манушэ́ндэ-муршэндэ, джувле́ндэ, и сарэ́ яви́р манушэ́ндэ, савэ́ лэ́скэ отпхэндлэ́ адя́кэ, ракири́:

21. “Ци дава́ исын на дро́га смо́лы, со тумэ́ хачкирдэ́ дрэ фо́рья Юдэя́кирэ и пэ вули́цы (пэ га́сы) Ерусалимо́скирэ, тумэ́ и тумарэ́ дада́, тумарэ́ кра́лья и тумарэ́ тхага́рья, мануша́ далэ́ пхувья́кирэ? Ци со дава́ Рай Дэвэ́л на рипирдя лэн, ци хай, на явдя́ дава́ Лэ́скэ пэ годы́?

22. И Рай Дэвэ́л буты́р на дэ́лас ра́да тэ вырикирэл дава́ пир доя́ биба́хт, со тумэ́ кэрдэ́ и пир джунгалэ́ (брыдка) рэ́нды, со тумэ́ кэрдэ́. Палдава́ тумари́ пхув исын чхучи́, ди́во трашаса, прокошыбэ́н (арман), би манушэ́нгири, сыр дава́ исын кэ ададывэ́с.”

23. Пал-дова́ со тумэ́ хачкирдэ́ дро́га смо́лы и пал-дова́ со тумэ́ кэрдэ́ грэ́хи проти Растэ-Дэвлэ́стэ, и тумэ́ на кандынэ́ зан Ра́скирэ-Дэвлэ́скири, и на кэрдэ́ пир Лэ́скиро Зако́но, ци пир Лэ́скирэ стату́ты, ци Лэ́скирэ упхэныбэна́, палдава́ дая́ бари биба́хт (би́да) кэрдя́пэ тумэ́нца, сыр дава́ исын кэ ададывэ́с.”

24. И пхэндя́ Ереме́ё сарэ́ манушэ́нгэ, и сарэ́ джувле́нгэ: “Шунэ́н лав Ра́скирэ-Дэвлэ́скиро, сарэ́ – Юдэя́кирэ мануша́, савэ́ дживэ́на пэ Египто́скири пхув:

25. адя́кэ ракирэ́ла Рай Дэвэ́л, Дэвэ́л Израилёскиро, пхэни́: ‘Тумэ́ и тумарэ́ джувля́ ракирдэ́ пэ́скирэ уштэ́нца и кэрдэ́ пэ́скирэ вастэ́нца, пхэни́: ‘Амэ чачэс, ла́са тэ кэра́с пир амарэ́ совлаха́, со амэ дыям – тэ хачкирас дро́га смо́лы болыбнытконэ дэвлорьякэ и тэ чхувас тхадунэ дыибэна́ ла́кэ.’ Тумэ́ зоралэ́с рикирэнапэ кэ тумарэ́ совлаха́ и кэрэ́на пир тумарэ́ совлахадэ лава́.’

26. Пал-дава́ шунэ́н лав Ра́скирэ-Дэвлэ́скиро, сарэ́ Юдэя́кирэ мануша́, савэ́ дживэ́на пэ Египто́скири пхув: ‘Акэ, Мэ совлахадём Мирэ́ барэ́ лавэ́са’, – ракирэ́ла Рай Дэвэ́л –, соб (кай) Миро лав тэ на пхэнэ́л буты́р ние́кх ману́ш Юдэя́тыр, кон дживэ́ла пэ Египто́скири пхув, пхэни́: ‘Тэ дживэ́л Рай Дэвэ́л, Дэвэ́л.”

27. Акэ, Мэ ява́ва тэ дыкха́в пэ тумэ́ндэ кэ биба́хт, а на ваш лачхипэ́н: сарэ́ мануша́ Юдэя́тыр, савэ́ исын пэ пхув Юдэякири явэ́на тэ хасён куртала́тыр, и барэ́ бокха́тыр анги́л дова́, сыр явэ́ла ко́нцо (яго́ро) лэ́нгэ.

28. Нэ кодолэ́ на́бут мануша́, савэ́ нашэ́на куртала́тыр, рисёна палэ кэ пхув Юдэякири пхувья́тыр Египто́стыр, и сарэ́, кон ячэ́лапэ Юдэя́тыр, савэ́ гинэ́ пэ пхув Египто́скири тэ дживэ́н одо́й сыр чу́жа, уджинэна, конэскирэ лава́ рисёна дро чачипэ́н, Мирэ́ ци лэ́нгирэ.

29. “И явэ́ла ґерты́к (знаме́ниё) тумэ́нгэ’, – ракирэ́ла Рай Дэвэ́л – со Мэ пхарэ́с сэндякирава тумэн пэ дова́ штэ́то, соб (кай) тумэ́ тэ джинэ́н, со Мирэ́ лава́ рисёна дро чачипэ́н пал тумэ́ндэ пэ биба́хт тумари́.’

30. ‘Адя́кэ ракирэ́ла Рай Дэвэ́л: ‘А́кэ, Мэ выдава фараонос Вафриёс [Хофрас-ю.о.], крали́с Египтоскирэс дро васта́ лэ́нгирэ-вэргэ́нгирэ, савэ́ родэ́на лэ́нгиро ди, сыр Мэ выдыём Сэдэкияс, крали́с Юдэякирэс, дро васт Навуходоносороскирэ, крали́скэ Вавилоноскирэскэ, саво́ сыс вэ́рго Сэдэкияскэ и, кон родыя лэ́скиро ди.’”

Psalms 119:97-104

97. О, ма́нгэ пир ило́ Тыро́ Зако́но. Мэ розлава лэс дывэсэ́ и раты́.

98. Ту кэрдя́н ман годэдыр мирэ́ вэргэ́ндыр пир Тырэ́ припхэныбэна́, пал-дова́ со ёнэ исын усады (сак) ма́нца.

99. Мэ ґалёвава буты́р сыклякирибнаскирьендыр, пал-дова́ со мэ розлава Тырэ́ пририпирибэна.

100. Мэ ґалёвава буты́р пхурэ́ манушэ́ндыр, пал-дова́ со мэ рискирдём годы́ кэ Тырэ́ упхэныбэна́.

101. Мэ рикирдём дрэ риг мири́ ґэро́й кажнонэ́ чорэ́ дромэ́стыр, соб (кай) тэ приракхав Тырэ́ упхэныбэна́.

102. Мэ на рисиём криг Тырэ́ сэндостыр, пал-дова́ со Ту сыклякирдян ман.

103. Сыр гудло́ исын дро миро муй Тырэ́ лавэ́ндыр. Ёнэ исын гудлэдыр авгинэстыр мирэ́ москэ.

104. Тырэ́ упхэныбнэндыр мэ лыём тэ ґалёвав, пал-дова́ со мэ бидыкхава кажно начачуно дром.

Proverbs 28:3-3

3. Чороро́ ману́ш, кон притасавэла явирэ чорорэ́ манушэ́с, исын сы́рбы зорало́ брышы́нд, со на ячкирэ́ла патря (листы) пэ кашта́ (дрэвы): [саво́ зморэла маро́ пэ фэ́лда-р.с.].

2 Timoteoske 2:1-26

1. Ми́ро чха́во, барьёв бутэды́р дро бахталыпэ́н, саво́ исын дыно́ амэ́нгэ дро екхипэ́н Исусо́са Христосо́са,

2. дова́ сыклякирибэ́н, со ту шундя́н ма́ндыр анги́л бутэндэ якхитконэнгэ, роспхэн патяибнытконэ манушэ́нгэ, савэ́ явэ́на тэ сыклякирэ́н адя́кэ-паць явирэ́н.

3. И палдава́ пирилыджа пэ́скири до́ля дрэ мэ́ньки, сыр лачхо́ Исусо́скиро Христосо́скиро халадо.

4. Нисаво́ халадо на спхандэла пэс джиибнытконэ рэндэ́нца, пал-дова́ со лэ́скэ трэй явэ́ла тэ явэ́л лачхо́ кодолэ́скэ, савэ́стэ ёв дынаринэла.

5. И ко́ли адя́кэ-паць вари-кон и лэ́лапэ тэ марэ́лпэ дрэ атлетика, усае́кх ёв на выбашавэла (на выкхэлэла) вя́нка, ко́ли ёв явэ́ла тэ кэрэ́л на пир упхэныбэ́н.

6. Гавитконэ манушэ́скэ, саво́ кэрэ́ла буты́ пэ фэ́лда, трэй англэды́р сарэ́ндыр тэ хал барьякирдо́ (пло́до), со ёв кокоро́ выбарьякирдя.

7. Дэ годы пэскэ (подумин) пал дова́, со мэ пхэна́ва, и Рай Дэвэ́л дэ́ла ґалыибэ́н ту́кэ дро саро́.

8. Ри́пир Исусо́с Христосо́с, Давидо́скирэ родо́стыр, Саво́ отджидыя́ мулэ́ндыр, сыр исын чхиндло́ дрэ Ева́нгелия, сави́ мэ роспхэнава,

9. пал дава́ мэ и мэнчынавапэ, и пал дава́ мэ аж сом дрэ састыра́ сыр розмарибнари: нэ Дэвлэ́скиро лав исын на запхандло дрэ састыра́.

10. Палдава́ мэ саро́ вырикирава ваш манушэ́нгэ, савэ́н выкэдыя́ Дэвэ́л, соб (кай) и ёнэ тэ дорэсэн зракхибэ́н, саво́ явэ́ла пир Исусо́стэ Христосо́стэ вечнонэ слава́са.

11. Патяибны́тко исын кадава́ лав: “Ко́ли амэ мыям Лэ́са, тэды амэ адя́кэ-паць ява́са и тэ джива́с кхэтанэ́ Лэ́са;

12. ко́ли амэ вырикираса мэ́ньки, тэды амэ адя́кэ ява́са тэ кралинас кхэтанэ́ Лэ́са, а ко́ли отпхэнасапэ Лэ́стыр, тэды и Ёв отпхэнэлапэ амэ́ндыр;

13. ко́ли амэ на сам патяибнытка, Ёв ячэ́лпэ патяибны́тко, пал-дова́ со Ёв на могинэ́ла тэ отпхэнэлпэ Кокоро́ Пэ́стыр.”

14. Пхэн сарэ́нгэ тэ рипирэ́н пал дава́; совлаха́ анги́л Дэвлэ́стэ, соб (кай) тэ на лыджа́н сы́рбы марибэ́н пал лава́, со на со екх на яндэла нисаво́ лачхипэ́н, а чхувэ́ла тэлэ́ одолэ́н, кон шунэ́ла.

15. Причху́в зор, соб (кай) ту тэ явэс лачхо́ анги́л Дэвлэ́стэ, и тэ явэс лачхо́ бутярно, савэ́скэ на трэй тэ ладжал, саво́ чачунэ́с сыклякирэ́ла манушэ́н пал Дэвлэ́скиро лав.

16. А дылынэ́ и чхучэ́ лавэ́ндыр джа́ криг, пал-дова́ со кадасавэ́ мануша́ уса́ дурэды́р отджана Дэвлэ́стыр,

17. и лэ́нгиро лав, сыр кирмо (рако), явэ́ла тэ розджалпэ бутэды́р, машки́р лэ́ндэ исын Именеё, и Филито;

18. савэ́ дуринэ цэлёстыр (рэса́тыр) кэ чачипэ́н и ракирэ́на, со отджидякирибэн мулэ́ндыр ужэ сыс, и далэ́са ёнэ сы́рбы пхагирэна патяибнаскиро фунда́менто дрэ вари-савэ́ манушэ́нгирэ илэ.

19. Нэ усае́кх зорало́ чачыпнаскиро фунда́менто, со Дэвэ́л чхудя́ анги́л, исын тэрдо́, пэ лэ́стэ исын чхуды́ чэргэнори́ чхиндлэ́ лавэ́нца: “Рай Дэвэ́л джинэ́ла Пэскирэн манушэ́н, кажно, кон рипирэла Ра́скирэ-Дэвлэ́скиро лав, мэк тэ дурьёл начачипнастыр.”

20. Дрэ баро́ кхэр исын кхорэ́ на со екхэ сувнака́стыр и рупэ́стыр, нэ адя́кэ-паць исын и каштэ́стыр и ґлэятыр (глинатыр); и екх чарэ́ ваш свэ́нко, а яви́р ваш кажно дывэ́с,

21. ко́ли вари-кон выжужакирэ́ла пэс кадалэ́ грэхэ́ндыр, ёв явэ́ла сыр чаро́, саво́ лэ́на ваш свэ́нко и саво́ трэй лэ́скирэ Ра́скэ пэ кажно лачхо́ рэ́ндо.

22. Наш пэ́скирэ – тэрнэнгирэ грэхитконэ́ тырдыпнастыр, а ро́дэ чачипэ́н, ри́кирпэ патяибнаскэ, патыва́кэ кэ яви́р мануша́ и мэк тэ явэ́л рамане манушэ́нца, савэ́ кхарэ́на Дэвлэ́скиро лав сарэ́ илэ́стыр.

23. Наш дылынэ́ и чхучэ́ спрэчкэндыр, ту ж джинэ́са, со далэ́стыр джа́ла чинга́рд.

24. А Ра́скирэ-Дэвлэ́скиро писхари́скэ нашты́ никонэса тэ марэ́лпэ пал лава́, а лэ́скэ трэй тэ явэ́л штыл (тихо) сарэ́ манушэ́нца, тэ джинэ́л тэ сыклякирэ́л и тэ явэ́л рахмано (бихолынакиро);

25. тэ сыклякирэ́л пал патяибэ́н ковлэ́ илэ́са одолэ́ манушэ́н, савэ́ исын проти лэ́скиро сыклякирибэ́н, пал-дова́ со дава́ сашты́ тэ явэ́л, со Дэвэ́л дэ́ла саштыпэн (возможность/ваканцыя) лэ́нгэ тэ приґалён лэ́нгирэ грэ́хи и тэ уджинэ́н чачипэ́н,

26. соб (кай) ёнэ тэ выджа́н налачхэскирэ фэлятыр, саво́ ухтылдя лэн, и зачхувэла лэн тэ кэрэ́н пир лэ́скири во́ля.

Romani Bible Baltic 2019

Maintained by the United Bible Societies for the Baltic Romani Mission