Bible in one year
October 31

1. Лав Ра́скирэ-Дэвлэ́скиро, саво́ сыс пророкоскэ Еремеёскэ пал Филистимия́кирэ манушэ́ндэ анги́л дова́, сыр фарао́но пыя́ (розмардя́) Газа.
2. Адя́кэ ракирэ́ла Рай Дэвэ́л: “Акэ, паня́ ґаздэ́напэ паш-ратитконэ́ (севернонэ) рига́тыр и ячэ́напэ сыр тасадыпнаскиро панинг; ёнэ зачхувэна пане́са пхув и саро́, со исын пэ ла́тэ: фо́рья, и одолэ́н, кон дживэ́на дрэ лэ́ндэ. Мануша́ явэ́на тэ ровэ́н, и сарэ́ джиибна́скирэ пэ пхув явэ́на тэ тугинэн (тэ ровэ́н) ясвэ́нца.
3. Ке́ли явэ́ла шундло лопотымо (топото) пэталэндыр зоралэ́-грэнгирэн, ке́ли явэ́на тэ грукинэн лэ́скирэ марибны́тка вурдэна́, ке́ли явэ́на тэ грыминэн лэ́скирэ ро́ты, со дада́ аж на подыкхэна палэ пэ пэ́скирэ биятэндэ, пир дова́, со лэ́нгирэ васта́ исын бизорья́кирэ.
4. Пал-дова́ со явэ́ла дывэ́с тэ вымарэн сарэ́ Филистимлянэн, тэ ячкирэн Ти́ро и Сидоно сарэ́са би помогибнаскиро, савэ́ ячэ́напэ. Рай Дэвэ́л ячкирэ́ла нисоса Филистимлянэн, савэ́ ячнэ́пэ островостыр Кафторостыр.
5. Газа ячэ́ла бибалэнгири, Аскалоно [Ашкелоно-ю.о.] хасёла, – дова́, со ячэ́лапэ лэ́нгирэ долостыр? Сыр ґара́ ту явэ́са тэ чхинэс пэс дрэ ту́га?
6. О, курта́ла Ра́скирэ-Дэвлэ́скири? Сыр ґара́ (длу́гэс) ту на явэ́са тэ пасёс тихо (штылёс)? Рисёв палэ дрэ пэ́скири ножна? Пирияч (откхинёв) и яв штыл!
7. Нэ сыр ёй могинэ́ла тэ пириячэл (откхинёл)? – Ко́ли Рай Дэвэ́л припхэндя́ проти Аскалоно и проти брэ́го морёскиро (дэрьявэ́скиро)? Одо́й Ёв припхэндя́ курталакэ тэ чингирэл.”
1. Проти Моа́во. Адя́кэ ракирэ́ла болыбна́скирэ-янголэ́нгиро Рай Дэвэ́л, Дэвэ́л Израилёскиро: “Бида фороскэ Не́во: Пал-дова́ со ёв исын пхагирдо́, Кариафаимо исын ладжакирдо́ и лыно́; Мизгаво исын ладжакирдо́ и пхагирдо́.
2. Буты́р на явэ́на тэ шарэ́н Моа́во, а дро Есево́но [Хешэвоно-ю.о.] придуминэна биба́хт проти дава́ штэ́то, ракири́: ‘Явэ́н, соб (кай) амэ́нгэ тэ хасякирас лэс сыр манушы́тко нацыя.’ И ту адя́кэ-паць, Мадме́на, хасёса [пириячэса тэ явэс-р.с.], курта́ла дотрадэла тут.
3. Зан роибнаскири явэ́ла шундлы Оронаимостыр: ‘Бэдыпэн (би́да) и хасибэ́н’ исын баро́!
4. Моа́во исын пхагирдо́ дрэ руи́ны, лэ́скирэ бияты (чхаворэ́) годлэна, со исын шундло.
5. Пал-дова́ со роибэ́н джа́ла лэ́нца, ке́ли ёнэ джа́на упрэ́ пэ штэ́то Лухито; ке́ли ёнэ джа́на тэлэ́ Оронаимостыр, ёнэ ровэна пал бэдыпэн (чорорипэн).
6. Нашэ́н, зракхэн пэ́скиро джиибэ́н! Явэ́н сы́рбы дова́ хру́сто пэ чхучи́ мал (степ).
7. Пир дова́ со ту, Моа́во, допатяндыяпэ зоралэ́с дрэ пэ́скирэ бутя́ и пэ́скирэ кучипэна, тут адя́кэ-паць лэ́на, и Хамосо джа́ла дро пле́но, лэ́скирэ рашая́ и лэ́скирэ тхага́рья кхэтанэ́.
8. Розмарибнаскиро явэ́ла пэ кажно фо́ро, со нисаво́ фо́ро на ячэ́лапэ цэ́ло (зракхно), и до́ло хасёла, и ровно фэ́лда хасякирэна [явэ́ла чхучи́-р.с.]: – адя́кэ, сыр и пхэндя́ Рай Дэвэ́л.
9. Дэн пхака́ Моавоскэ, соб (кай) ёв могинэлас тэ вурнял криг, пал-дова́ со лэ́скирэ фо́рья явэ́на чхучэ́, ние́кх на явэ́ла тэ дживэ́л дрэ лэ́ндэ.
10. “Тэ явэ́н прокошыбэна (арманя) пэ кодолэстэ, кон кэрэ́ла Ра́скирэ-Дэвлэ́скири буты́ биилэскиро, тэ явэ́л прокошыбэ́н пэ кодолэстэ, кон обрикирэла Пэ́скири курта́ла ратэстыр!
11. Моа́во сыс усады / сак (всегда) вольнонэ пэ́скирэ тэрныпнастыр и ёв сыс чхудо пэ пэ́скиро хумэр (дрожджы); лэс на пиричхувэнас екхэ пирьятыр дро яви́р; сы́рбы мол (вино); – ёв ние́кхвар на сыс дро пле́но: палдава́ лэ́скиро смако ячэ́лапэ дрэ лэ́стэ, и лэ́скиро лачхо́ кхандыпэн на парудяпэ.
12. Палдава́, акэ, явэ́на дывэса́’, – ракирэ́ла Рай Дэвэ́л, – ‘со Мэ бичхава́ва манушэ́н кэ Моа́во тэ пиричхувэн лэс сыр мол (лолы бравинта). Ёнэ чхучакирэна Лэ́скирэ кхорэ́ (сасу́ды) и пхагирэна пэ котэра́ лэ́скирэ штэклы.
13. И явэ́ла Моа́во ладжакирдо́ пал Хамосо, сыр и кхэр Израилёскиро сыс ладжакирдо́ пал Вефиль, дро со мануша́ Израилёстыр зоралэ́с патяндынэ́.’
14. Сыр да тумэ́ ракирэ́на: ‘Амэ сам зоралэ́, и амэ сам мурша́ тэ мараспэ?’
15. Моа́во ж исын розмардо дрэ руи́ны, и лэ́скирэ форье́ндыр джа́ла тхув, а лэ́скирэ выкэдынэ́ мануша́ гинэ́ тэл курта́ла пэ мэрибэ́н тэ чхинэн лэн, – ракирэ́ла Кра́ли, Конэ́скиро Лав исын Рай Дэвэ́л, болыбна́скирэ-янголэ́нгиро.
16. Бари би́да пэрэ́ла сыг пэ Моа́во, и биба́хт (хасибэ́н) прастала сы́гэс пэ лэ́стэ.
17. Тангинэн ясвэ́нца лэс, сарэ́, кон исын пашы́л лэ́стэ, и сарэ́, кон джинэ́ла лэ́скиро лав, пхэнэ́н: ‘Саво́ зорало́ дэсто́ исын пхагирдо́, сави́ шука́р кхия сыс!’
18. Джа́ тэлэ́ славутнонэ штэто́стыр, и бэш смэгаса тэ пьел, чхай Дивоноскири, кон дживэ́ла дро дова́ фо́ро. Розмарибнаскиро пэ Моа́во явдя́ пэ ту́тэ, ёв розмарэла пэ котэра́ тырэ́ зоралэ́ ва́нты (тва́рдыми).
19. Ту, сави́ дживэса кэ Арое́ро, тэрдёв пашы́л дром и дыкх цямкэс. Пхучпэ лэ́стыр, саво́ нашэла, и пхучпэ ла́тыр, сави́ ракхэлапэ, и пхэн: ‘Со кэрдя́пэ?’
20. Моа́во ладжакирдо́, пал-дова́ со ёв пхагирдо́ пэ бара́, ров зоралэ́с и дэ го́дла! Пхэн дава́ дро Арноно, со Моа́во исын пхагирдо́ кэ пхув.
21. И сэ́ндо явдя́ пэ лошчыны, саво́ исын пэ роўно фэ́лда: пэ Халоно, пэ Яца, пэ Мофафо (Мефа),
22. и пэ Дивоно, и пэ Ново, и пэ Бет-Дивлафаимо;
23. и пэ Кариафаимо, и пэ Бет-Гамуло; и пэ Бет-Маоно;
24. и пэ Кериофо, и пэ Восоро (Боцра), и пэ сарэ́ фо́рья пэ пхув Моавоскири, дуратунэ́ и пашатунэ́!
25. Моавоскири зор сыр шынг (ро́го) исын чхурдыно́ тэ хасёл, и лэ́стэ васт сы́рбы исын пхагирдо́” – ракирэ́ла Рай Дэвэ́л.
26. “Матякирэн лэс, пал-дова́ со ёв ґаздыя́ пэс пэ Растэ-Дэвлэ́стэ; и Моа́во явэ́ла тэ равэлпэ дрэ пэ́скиро чхадыпэн и мануша́ лэ́на дава́ штэ́то пэ данд тэ санпэ (кокоро́ явэ́ла просандло).’
27. Ци ту, Моа́во, на лыян Израилё пэ данд, соб (кай) тэ саспэ? Ци на отлыджасаспэ ту кэ Израилё, сы́рбы кэ чор? Со ту кунинэса шэрэ́са бут мо́лы, ке́ли ракирэ́са пал лэ́стэ?
28. Тумэ́, савэ́ дживэ́на кэ Моа́во, ячкирэн фо́рья и дживэ́н пэ скалы. Явэ́н сы́рбы голумбы, савэ́ кэрэ́на гня́зды (ку́фы) пэ скалакирэ рига́, кай заджа́на дрэ гэбар (пешчэра).
29. Амэ шундя́м пал пхутькирибэ́н Моавоскиро: ёв исын древа́н пхутькирдо – лэ́стэ исын вучи́ мина пэ муй, – ёв барьякирэ́ла пэс, – ёв пхутёла, – и ёв думинэ́ла вучэ́с пал пэ́стэ дро пэ́скиро ило́.
30. Мэ джино́м лэ́скиро холякирибэ́н’ – ракирэ́ла Рай Дэвэ́л, – ‘лэ́скиро ракирибэ́н исын чхучо́, лэ́стыр нисо́ на выджа́ла чачуно́.
31. Палдава́ Мэ ява́ва тэ ровав зоралэ́с пал Моа́во, и Мэ ява́ва тэ дав го́дла пал сарэ́ндэ Моавостыр; Мэ ява́ва тэ тугинав ясвэ́нца пал манушэ́ндэ Кир-Харесостыр.
32. О винагра́днико дрэ Се́вма! Мэ ява́ва тэ ровав буты́р пал ту́тэ сыр пал Иазе́ро (Язэро): тырэ́ отбарьякирибэна пирибаринэ мо́рё (дэрья́в), ёнэ догинэ́ кэ зеро Иазе́ро (Язэро). О росчорибнаскиро пыя́ пэ тумарэ́ лынаитка му́ри и пэ тумарэ́-молякиро (виноскиро) обкэдыпэн.
33. Ра́дыма и весёлыма (лош) лынэ́ криг пхабунэ фэлдатыр и Моавоскирэ пхувья́тыр; Мэ кэрдём адя́кэ, со нисо́ на явэ́ла дро пре́со ваш мол (вино), ёнэ буты́р на явэ́на тэ штакирэн (тэ топчынэн) радымитконэ годла́са, на явэ́ла буты́р го́дла радыма́са.’
34. Пал лэ́нгири го́дла Есевоностыр (Хешэвоностыр) кэ Елеала (Елалэя), кэ Яаца (Яхазо) ёнэ ґаздынэ́ го́дла Сиоростыр кэ Оронаимо, кэ три́то Эґла (Эґла-Шэлишыя); пал-дова́ со адя́кэ-паць и паня́ Нимримоскирэ пиришутёна.
35. И ишчо (инкэ́) Мэ кэра́ва адя́кэ, со дро Моа́во пириячэна тэ янэ́н свэ́нта яныбэна́ пэ вучэ́ штэ́ты и Мэ мулякирава кодолэ́с, саво́ хачкирэлас дро́га смо́лы пэ́скирэ дэвлорэ́нгэ’, – ракирэ́ла Рай Дэвэ́л.
36. ‘Палдава́ Миро ило́ явэ́ла тэ обровэлпэ пал Моа́во сы́рбы свиролька, и Миро ило́ явэ́ла тэ обровэлпэ пал манушэ́ндэ Кир-Харесостыр; пал-дова́ со баро́ барвалыпэ́н, со ёнэ кэдынэ хасия́.
37. Кажно шэро́ исын мурадо и кажна чхора (брода) исын мурадэ́, пэ кажно васт исын почхиныбэна, и пэ трушула исын балыткса гонэ́.
38. Сарэ́ ракирэ́на ясвэ́нца пэ сарэ́ кхэрэ́скирэ стрэхи (чхакиня), и пэ га́сы дро Моа́во, пал-дова́ со Мэ розмардём Моа́во сы́рбы пири́, сави́ на трэй” – ракирэ́ла Рай Дэвэ́л.
39. Ёнэ ровэна зоралэ́с – сыр да Моа́во розмардо? Сыр да Моа́во рискирдя́ палуй ладжаса! И явэ́на тэ санпэ Моавостыр, и лэ́стыр явэ́на тэ трашадён сарэ́, кон исын пашы́л лэ́стэ.
40. Пал-дова́ со ракирэ́ла Рай Дэвэ́л: “Акэ, Вавило́но явэ́ла тэ вурнял сыр о́рло (ки́до), и ёв росчхувэла пэ́скирэ пхака́ пир рига́ упралэстыр пэ Моа́во.
41. Фо́рья явэ́на лынэ́ и тва́рдыми (кре́пости) заухтылэна. Дро дова́ дывэ́с ило́ зоралэ́-муршэнгирэ Моавостыр явэ́ла сыр ило́ джувля́киро, савья́ мэнчынэна дукха́ тэ биянэ́л.
42. И явэ́ла Моа́во вымардо сыр нацыя пир дова́, со ёв барьякирдя пэс [гия́-р.с.] проти Растэ-Дэвлэ́стэ.
43. Дар, ґанби́н и фэлы́ явэ́на пэ ту́тэ, ману́ш Моавоскиро!” – ракирэ́ла Рай Дэвэ́л.
44. ‘Кон нашэла дара́тыр, одова́ пэрэ́ла дрэ ґанби́н, и кон выджа́ла ґанбинятыр, одолэ́с ухтылэ́ла фэлы́, пал-дова́ со Мэ ява́ва кэ Моа́во,” – ракирэ́ла Рай Дэвэ́л.
45. “Одолэ́, савэ́ нашнэ́, тэрдинэ́ тэл Есево́но (Хешэвоно), пал пэ́скиро бизорьякирибэн. Нэ явэ́ла яг Есевоностыр, явэ́ла бари яг машкиралыпнастыр Сигоностыр и похала ме́жа Моавоскири и шэрэскиро гутуп (темё) пэ чхавэ́ндэ бунтарье́ндэ.
46. Бида пэ ту́тэ, Моаве! Мануша́ Хамосостыр хасинэ́; пал-дова́ со тырэ́ чхавэ́н лынэ́ дро пле́но, и тырэ́ чхая́ исын дрэ наволя.
47. Нэ Мэ рискира́ва палэ Моавоскирэ пленонэн дрэ палатунэ́ (последня) дывэса́’”, – ракирэ́ла Рай Дэвэ́л. Акэ, дасаво исын сэ́ндо пэ Моа́во.
113. Мэ бидыкхав дуемуенгирэ манушэ́н, нэ ма́нгэ исын дро́го Тыро́ Зако́но.
114. Пал Ту́тэ мэ гарадёвава, и мэ зракхавапэ сыр пал шчы́то, мэ ужакирава лачхипэ́н Тырэ́ лавэ́стыр.
115. Дурьён криг ма́ндыр, тумэ́-чорэ́ мануша́лэ. Мэ ява́ва тэ рикиравпэ кэ Дэвлэ́скирэ припхэныбэна́.
116. Подрикир ман Тырэ́ лавэ́са, соб (кай) ма́нгэ сашты́ тэ явэ́л тэ джива́в, соб (кай) мэ тэ на явав ладжакирдо́ долэ́стыр, со́стыр мэ ужакирава лачхипэ́н.
117. Подрикир зоралэ́с ман и мэ зракхавапэ, и мэ ўса́ды (сак) ява́ва тэ рискирав годы́ кэ Тырэ́ стату́ты.
118. Ту на прилэса одолэ́н, савэ́ гинэ́ дрэ риг Тырэ́ статутэндыр, пал-дова́ со лэ́нгиро хохаибэ́н нисо́ на дэ́ла.
119. Ту гинэса пал ґнэё (гноё) сарэ́н чорэ́ манушэ́н пэ дая́ пхув, палдава́ ма́нгэ исын дро́га Тырэ́ пририпирибэна.
120. Мири́ лоч (плоть) издрала дара́тыр анги́л Ту́тэ; ма́ндэ исын трашаибэ́н анги́л Тыро́ сэ́ндо.
5. Бибахталэ́ мануша́ на ґалёна чачипэ́н; нэ одолэ́, савэ́ родэ́на Рас-Дэвлэ́с, ґалёна саро́.
1. И палдава́ мэ зоралэ́с манга́ва тут анги́л Дэвлэ́стэ и Исусо́стэ Христосо́стэ, Саво́ явэ́ла тэ сэндякирэ́л джидэн и мулэн, ке́ли Ёв явэ́ла тэ хулаинэ́л сыр Кра́ли,
2. роспхэн Дэвлэ́скиро лав манушэ́нгэ, дро кажно часо и ке́ли нанэ часо, выракир доша́, сыка́в банг, приракх сарэ́ длэнгэ вырикирибнаса и сыклякирибнаса.
3. Палдава́ со явэ́ла часо, ке́ли мануша́ на явэ́на тэ пирилыджан чачуно́ сыклякирибэ́н, ёнэ кокорэ́ явэ́на тэ выкэдэн пэ́скэ сыклякирибнаскирэн пир пэ́скири годы́, савэ́ явэнэ тэ ракирэ́н лэ́нгэ кодова́, со ёнэ кокорэ́ камэ́на тэ шунэ́н.
4. Ёнэ отрискирэна пэ́скирэ кана́ тэ шунэ́н чачипэ́н, а ёнэ рискирэна кана́ тэ шунэ́н манушэ́нгирэ парамыси.
5. Нэ ту яв ракхуно́ дро саро́, пирилыджа саро́ чорипэ́н, роспхэн бахталы́ зан (звесь), кэр пхэрдэ́с пэ́скиро дынарибэ́н.
6. Пал-дова́ со какана́ миро рат прочхувэла, сыр мол ваш свэ́нто дыибэ́н Ра́скэ-Дэвлэ́скэ и явдя́ миро часо тэ уджав кадалэ́ свэто́стыр.
7. Мэ мардёмпэ лачхэ́с пал чачипэ́н ваш Ра́скэ-Дэвлэ́скэ, мэ кончиндём джиибнытко дром, и мэ зракхцём патяибэ́н.
8. А какана́ ман ужакирэ́ла вя́нка чачипнытко, сави́ Рай Дэвэ́л дэ́ла ма́нгэ, чачуно́ Сэнда́ри дро Дывэ́с, саво́ Ёв выкэдыя́, нэ на екхэ ма́нгэ, нэ и одолэ́ манушэ́нгэ, кон ужакирэ́ла откэрдэ илэ́са, ке́ли Ёв явэ́ла.
9. Кэр саро́ шука́р, причху́в зор, соб (кай) тэ явэс кэ мэ сы́гэс;
10. пал-дова́ со Димасо мэкця́ ман, лэ́скэ яця́ дро́го кадалэ́ – векоскиро джиибэ́н, и ёв гия́ дрэ Фесалоника, Крискенто гия́ дрэ Галатия, а Тито дрэ Далматия.
11. Екх Лука яця́пэ ма́нца. Лэ Маркос и ян пэ́са, пал-дова́ со ёв ма́нгэ трэй ваш дынарибэ́н Дэвлэ́скэ.
12. А Тихикос мэ бичхадём кэ Ефесо.
13. Ке́ли ту явэ́са тэ джас кэ мэ, ян миро бушлато, саво́ мэ ячкирдём кэ Троада Капростэ, и лылваря, буты́р сарэ́стыр кодолэ́, савэ́ исын пэ цы́па.
14. Лександро, фаирнари пир харко́ма (меднико), кэрдя́ бут чорипэ́н, мэк Дэвэ́л тэ отдэ́л лэ́скэ пал лэ́скирэ рэ́нды (де́лы).
15. Ракхпэ и ту лэ́стыр, пал-дова́ со ёв сыс древа́н проти амарэ́ пхэныбнаскирэ лава́.
16. Ке́ли мэ пэ́рво мо́ло затэрдёвавас пал пэ́стэ, ние́кх на сыс пашы́л ма́ндэ, а сарэ́ мэкнэ́ ман. Мэк дава́ тэ на явэ́л лэ́нгэ загиндло дрэ банг.
17. Нэ Рай Дэвэ́л сыс пашы́л ма́ндэ, Ёв дыя́ ма́нгэ зор, соб (кай) пир ма́ндэ тэ ячэ́л пхэныбэ́н пал Дэвлэ́стэ зоралэды́р и соб (кай) ман тэ шунэ́н сарэ́ мануша́, савэ́ исын На́юды, и соб (кай) ма́нгэ тэ зракхавпэ шчэрэ́скирэ (лево́скирэ) дандэндыр.
18. И Рай Дэвэ́л зракхэ́ла ман кажнонэ́ фуипнастыр и янэ́ла ман бидошакирэс дро Лэ́скиро Кралипэ́н дро Болыбна́скиро Раё. Тэ явэ́л Лэ́скэ сла́ва пэ сарэ́ ве́ки. Ами́нь.
19. Пиридэ “рама́нё” Прискилакэ и Акилоскэ и Анисифороскирэ сэмякэ.
20. Ерасто яця́пэ дро Коринфо, а Трофимос мэ ячкирдём насвалэс дрэ Милита.
21. Причху́в зор тэ явэс сыгэды́р адари́к анги́л ивант (зима). Евуло пиридэла ту́кэ “рама́нё”, и Пудо, и Лино, и Клавдиё, и сарэ́ яви́р пша́ла.
22. Мэк тэ явэ́л Рай Дэвэ́л Ису́со Христо́со тырэ́ духо́са. Мэк тэ явэ́л Дэвлэ́скиро бахталыпэ́н сарэ́нца тумэ́нца. Ами́нь.
Romani Bible Baltic 2019
United Bible Societies for the Baltic Romani Mission