Bible in one year - Пэ Балтитко Романи чиб

Bible in one year October 5

1. Ра́скирэ-Дэвлэ́скиро Ду́хо (Фа́но) исын пэ Ма́ндэ, пал-дова́ со Рай Дэвэ́л помакхця Ман тэ пхэна́в бахтало́ лав (бахталы́ зан) чорорэнгэ; бичхадя́ Ман, соб (кай) тэ састякирав манушэ́н розмардэ илэ́са, тэ пхэна́в пал во́ля одолэ́нгэ, кон исын дрэ наволя (бэшыбэн); тэ пхэна́в манушэ́нгэ дрэ бэшыбэн, со вудара́ бэшыбнытка исын псирадэ (откэрдэ).

2. Соб (кай) тэ пхэна́в пал лачхо́ бэрш Ра́скирэ-Дэвлэ́скиро, пал дывэ́с, ко́ли пхэрдёла холы́ амарэ́ Дэвлэ́скири, тэ подрикирав сарэ́н, дрэ конэ́стэ исын ту́га (тугинэла).

3. Тэ пхэна́в одолэ́нгэ, кон исын бибахтало́ пэ Сио́но, со пра́хо запарувэлапэ шукаронэ укэдыибнаса; ровибэн радымакирэ (лошалэ́) елеёса; пхаро́ (смэнтно) ду́хо (фа́но) запарувэлапэ шукаронэ урибнаса и кхарна лэн зоралэ́ чачипна́са, Ра́скирэ-Дэвлэ́скирэ бутяса дрэ Лэ́скиро барипэ́н.

4. И ёнэ явэ́на тэ ґаздэ́н пхувья́, савэ́ ґара́ исын чхучэ́; ґаздэ́на ґаратунэ́ роспхагирдэ́ кхэра́ и обчордэ фо́рья, савэ́ ґаратунэ́ дывэсэ́ндыр сыс чхучэ́.

5. Явэ́на мануша́ явирэ народо́стыр и явэ́на тэ чаравэн тумарэ́ кхэритконэ́ мурдалэ́н (ското); чхавэ́ лэ́нгирэ явэ́на тэ кэрэ́н буты́ пэ пхув и дрэ винагра́днико ваш тумэ́нгэ.

6. А тумэ́ явэ́на тэ кхарэнпэ Ра́скирэ-Дэвлэ́скирэ рашанца, тумэн кхарна амарэ́ Ра́скирэ-Дэвлэ́скирэ дынарье́нца; тумэ́ явэ́на тэ лэн ко́фо барвалэ́ народэнгирэ барвалыпнастыр, тумэ́ явэ́на шардэ лэ́нгирэ барипнаса.

7. Пал дова́, со тумэн ладжакирэнас, тумэ́ прилэ́на дрэ дуй мо́лы буты́р паты́в; пал-дова́, со кошэнас тумэн, тумэ́ явэ́на тэ радынэ́нпэ, со дасави́ исын лэ́нгири во́ля, пал-дова́ со дуй мо́лы тумэ́ дорэсэ́на (долэна) пэ пэ́скири пхув буты́р; ве́чно ра́дыма (лош) явэ́ла лэ́ндэ.

8. Пал-дова́ со Мэ, Рай Дэвэ́л, дава́ паты́в чачунэ́ сэндоскэ, Мэ на кама́м, ко́ли чорэна, ко́ли притасавэ́на; Мэ отда́ва палэ лэ́нгэ пир чачипэ́н; Мэ чхува́ва лэ́нца ве́чно завето.

9. И ґалёна машки́р Наюды́тка народы пал ро́до лэ́нгиро, лэ́нгирэ чхаворэ́н ґалёна машки́р ро́ды; сарэ́, кон дыкхэ́ла лэн, явэ́на тэ джинэ́н, со ёнэ исын ро́до, саво́ бахтякирдя́ Дэвэ́л.

10. Радыма́са мэ ла́ва тэ радынавпэ пал Растэ-Дэвлэ́стэ; явэ́ла тэ радынэ́лпэ зоралэ́с миро ду́хо (фа́но) пал мирэ́ Дэвлэ́стэ, пал-дова́ со Ёв уридя ман дрэ и́ди зракхибнытка, уридя ман чачипнаскирэ урибнаса; сыр пэ тэрнэстэ Ёв чхудя́ вя́нка, сыр тэрня укэдыя.

11. И сыр пхув барьякирэл пэ́скэ чарья́, сыр у́нта (садо) барьякирэ́ла дова́, со дрэ ла́кири пхув чхудэ́, адя́кэ и Рай Дэвэ́л сыкавэ́ла чачипэ́н и паты́в анги́л сарэ́ народы.

Isaiah 62:1-12

1. На пириячава Мэ (Исаё) тэ пхэна́в пал Сио́но, мэ на ява́ва штыл пал Ерусалимо. Ко́ли газдэлапэ, сыр яг, лэ́скиро чачипэ́н и зракхибэ́н лэ́скиро сыр хачкирдо момолы́тко (свети́льнико) ґаздэ́лапэ, тэ́ньчи мэ ла́ва тэ ракира́в.

2. И дыкхэ́на народы тыро́ чачипэ́н, и сарэ́ кра́лья дыкхэ́на тыри́ паты́в, и кхарна тут нэвонэ́ лавэ́са, саво́ дэ́на ту́кэ Дэвлэ́скирэ ушта́.

3. Ту явэ́са шарибнытконэ вянкаса дро васт Ра́скирэ-Дэвлэ́скиро, сыр крали́скирэ диадэмаса ту явэ́са пэ тырэ́-Дэвлэ́скиро васт.

4. Тут на кхарна буты́р “ячкирдо (ячадо)”, пэ тыри́ пхув на пхэнэ́на “чхучи́”, нэ кхарэ́на тут “исын кэ ёв Мири́ лачхи́ во́ля”, а пхув тыри́ кхарлапэ “палоромитко”, пал-дова́ со Ра́скирэ-Дэвлэ́скири во́ля исын лачхи́ кэ ту, и пхув Тыри́ сы́рбы палоро́м джа́ла.

5. Сыр тэрно́ чхаво́ лэ́ла пэ́скэ патываля чха, адя́кэ кэрэ́на ту́са тырэ́ чхавэ́; сыр тэрно́ радынэ́лапэ тэрнятыр, адя́кэ радынэ́лапэ пал ту́тэ тыро́ Дэвэ́л.

6. Ерусалимо! Мэ чхудём пэ тырэ́ ва́нты ракхибнарьен, савэ́ ни дывэсэ́ ни раты́ на пириячэна тэ пхэнэ́н лав. Тумэ́, кон пхэнэ́ла пал Дэвлэ́стэ, на пириячэн тэ ракирэ́н!

7. На пириячэн тэ ракирэ́н анги́л Лэ́стэ, пока Ёв ґаздэ́ла Ерусалимо и на кэрэ́ла Лэс барипнаса (шарибнаса) пэ пхув.

8. Рай Дэвэ́л совлахадя́ Пэ́скирэ вастэ́са, Пэ́скирэ зоралэ́ вастэ́са: “Мэ на дава́ буты́р гив, соб (кай) тэ хан лэс тырэ́ вэ́рги, чужонэ́ манушэ́нгирэ чхавэ́ на пьена мол (вино), сави́ ту кэрдя́н.

9. Нэ одолэ́, кон скэдэ́ла, явэ́на тэ хан лэс и Рас-Дэвлэ́с тэ шарэ́н; кон скэдэ́ла винаградо (дракх), одова́ пьела мол лэ́стыр дрэ грэды (дворы), кай исын Миро свэ́нто штэ́то.

10. Джа́н андрэ́, джа́н дурэды́р дрэ по́рта, кэрэ́н дром народоскэ! Кэрэ́н, кэрэ́н дром, укэдэн бара́, ґаздэ́н стяго ваш народы!

11. Акэ, Рай Дэвэ́л пхэнэ́ла кэ сари́ пхув: “Пхэнэ́н патывалэ́ чхакэ Сионо́стыр: акэ, джа́ла тыро́ Зракхибнари, Лэ́скири мазу́ри (награда) исын Лэ́са, и отдыибэ́н Лэ́скиро исын анги́л Лэ́стэ.

12. И кхарэ́на лэн свэнтонэ́ народоса, саво́ Рай Дэвэ́л выкиндя, а тут кхарэ́на фороса, саво́ Рай Дэвэ́л зракхця́, на ячкирдэ́ фороса.”

Psalms 115:9-13

9. [17] О, Изра́иле! Патя зоралэ́с Ра́скэ-Дэвлэ́скэ; Ёв помогинэла и затэрдёла пал тумэ́ндэ.

10. [18] Ароноскиро кхэр, патя зоралэ́с Ра́скэ-Дэвлэ́скэ: Ёв помогинэла и затэрдёла пал тумэ́ндэ.

11. [19] Тумэ́, савэ́ дарэ́н Ра́стыр-Дэвлэ́стыр; патя́н зоралэ́с Ра́скэ-Дэвлэ́скэ, Ёв помогинэла и затэрдёла пал тумэ́ндэ.

12. [20] Рай Дэвэ́л рипирэла пал амэ́ндэ: Ёв бахтякирэ́ла амэн; Ёв бахтякирэ́ла Израилёскиро кхэр, Ёв бахтякирэ́ла Ароноскиро ро́до.

13. [21] Ёв бахтякирэ́ла одолэ́н, савэ́ дарэ́на Ра́стыр-Дэвлэ́стыр, тыкнэн и барэн.

Proverbs 26:24-26

24. Одова́, кон бидыкхэла (зоралэ́с на камэ́ла) явирэ манушэ́с сы́рбы гаравэла дава́ пэ́скирэ уштэ́нца, адасаво́ ману́ш счхувэла фрэнтыма (мэндрима) дро пэ́скиро ило́:

25. ке́ли ёв ракирэ́ла лачхэ́ заня́са (глосаса), нэ ту на патя, пал-дова́ со исын эфта́ (битринэ́нгиро дэш) налачхэ́ мысли дро лэ́скиро ило́.

26. Мэк лэ́скири зоралы́ намилыма исын учхакирды лэ́скирэ фрэнтымаса, нэ лэ́скиро фуипэ́н сыкадёла анги́л саро́ скэдыибэ́н.

Efežanenge 6:1-24

1. Чхавора́лэ, кандэ́н пэскирэн дадэн, савэ́ исын Ра́стыр-Дэвлэ́стыр, пал-дова́ со дро дава́ исын чачипэ́н.

2. “Кутя́кир (дэ паты́в) пэ́скирэс дадэ́с и да”, дава́ исын англатуно́ запхэныбэн дынэ́ лавэ́са,

3. соб (кай) ту явэс бахтало́ и тэ дживэ́с ґара́ пэ пхув.

4. И тумэ́, дада́, на хан пэ́скирэ чхаворэ́н, нэ барьякирэ́н лэн пир Ра́скирэ-Дэвлэ́скиро сыклякирибэ́н и приракхибэн.

5. Писхарья́лэ(рабы), кандэ́н пэ́скирэ хулан пэ пхув пир лоч, кутякирибна́са (вага́са) и дара́са сарэ́ тумарэ́ илэ́стыр, сыр Христосо́с;

6. на кэрэ́н дава́ ваш сыкаибэ́н, ваш манушэ́нгиро шарибэ́н, нэ сыр Христосо́скирэ писха́рья, савэ́ сарэ́ пэ́скирэ илэ́стыр кэрэ́на пир Дэвлэ́скири во́ля,

7. дынаринэ́н илэ́са сарэ́ илэ́стыр, сыр Ра́скэ-Дэвлэ́скэ, а на, сыр манушэ́нгэ;

8. джинэ́н тумэ́, со кажно ману́ш, ко́ли саво́ кэрэ́ла лачхипэ́н, то ёв дава́-паць и дорэсэ́ла палэ Ра́стыр-Дэвлэ́стыр, мэк ёв тэ явэ́л писха́ри ци во́льно.

9. И тумэ́, хулая́лэ, адя́кэ-паць отлыджанпэ шука́р кэ пэ́скирэ писха́рья и на страхакирэн лэн, джинэ́н, со дро Болыбна́скиро Раё исын Хула́й ваш лэ́нгэ и ваш тумэ́нгэ и Ёв кутякирэла шэра́ (ра́внэс) сарэ́ манушэ́н.

10. И дро ко́нцо (дро яго́ро) мирэ́ пша́ла, мэ кама́м тэ пхэна́в тумэ́нгэ, явэ́н зоралэды́р дро екхипэ́н Ра́са-Дэвлэ́са и Лэ́скирэ барэ́ зорья́тыр.

11. Урьен пэ пэ́стэ сарэ́ Дэвлэ́скирэ марды́тко, соб (кай) тумэ́ могиндлэ́ тэ тэрдён проти налачхэскирэ фрэнта рэндорэ (делыцы):

12. пал-дова́ со амэ сам на проти манушэ́ндэ, а проти барыдырэндэ и свэто́скирэ тхагарье́ндэ (князьендэ), савэ́ хулаинэна пэ дава́ цямло́ (тё́мно) свэ́то, проти бэнгланэ́ ду́хи, савэ́ исын дро Болыбна́скиро свэ́то.

13. Палдава́ урьен сарэ́ Дэвлэ́скирэ мардытка, соб (кай), ке́ли явэ́ла на́лачхо дывэ́с, тумэ́ могиндлэ́ тэ тэрдён проти, и саро́ тэ пиризорьякирэн и тэ вырикирэн.

14. И палдава́ тэрдён сарэ́ зорья́тыр, подпхандэнпэ симири́са чачипнастыр и опхандэ́н пэс патяибна́са сыр саструнэ́ шчытоса,

15. и урьен пэ́скирэ ґэра́, соб (кай) тэ явэ́н скэдынэ́ тэ джа́н и тэ роспхэнэ́н бахталы́ зан пал рама́нё (миро):

16. Нэ фэды́р сарэ́стыр, лэн пэ́са шчы́то патяибнастыр, савэ́са тумэ́ могинэ́на тэ мурдякирэн сарэ́ налачхэскирэ хачкирдэ́ марибны́тка бустя́ (стре́лы).

17. И лэн адя́кэ-паць зракхибнаскиро шлемо, и Духоскири курта́ла, со исын Дэвлэ́скиро лав,

18. и дро кажно часо мангэ́нпэ дро Ду́хо (Фа́но) кажнонэ́ патерьяса (молитваса), адя́кэ-паць саро́ часо мангэ́нпэ Дэвлэ́скэ пал сарэ́ дэвлытконэнэ;

19. адя́кэ-паць мангэ́нпэ Дэвлэ́скэ и пал ма́ндэ, соб (кай) ма́нгэ тэ явэ́н дынэ́ лава́, савэ́ трэй тэ ракира́в муршканэ́с гарадо́ чачипэ́н пал бахталы́ зан,

20. ваш дава́ мэ и сом бичхадо́ дрэ састыра́, соб (кай) мэ тэ ракира́в муршканэ́с, сыр и трэй ма́нгэ тэ ракира́в.

21. Нэ соб (кай) и тумэ́ адя́кэ-паць тэ джинэ́н пал дава́, со отлыджалапэ кэ мэ и пал мирэ́ рэ́нды, дова́ роспхэнэ́ла тумэ́нгэ пал саро́ Тихико, амаро́ дро́го пшал и чачуно́ Ра́скирэ-Дэвлэ́скиро дына́ри;

22. савэ́с мэ и бичхадём кэ тумэ́ ваш дова́-паць, соб (кай) тумэ́ тэ уджинэ́н пал амэ́ндэ, и, соб (кай) ёв тэ подрикирэ́л тумарэ́ илэ.

23. Мэк тэ явэ́л рама́нё (миро) пшалэ́нгэ и паты́в кэ яви́р мануша́ патяибна́са Дэвлэ́стыр Дадэ́стыр и Ра́стыр-Дэвлэ́стыр, Исусо́стыр Христосо́стыр.

24. Мэк тэ явэ́л бахталыпэ́н сарэ́нгэ, кон сарэ́ илэ́стыр рикирэ́ла сыр Дро́гима амарэ́ Рас-Дэвлэ́с, Исусо́с Христосо́с дро пэ́скиро ило́. Ами́нь.

Romani Bible Baltic 2019

Maintained by the United Bible Societies for the Baltic Romani Mission