Bible in one year - Пэ Балтитко Романи чиб

Bible in one year October 6

1. Кон дава́ джа́ла Едомостыр, джа́ла дрэ лолэ́ и́ди Восоростыр, адасаво́ баро́ дро Пэ́скиро урибэ́н, Саво́ выджа́ла дро Пэ́скирэ-зорьякиро пхэрдыпэн? “Мэ сом Одова́, Кон пхэнэ́ла чачипэ́н, зорало́, соб (кай) тэ зракхав.”

2. Со́скэ ж исын лоло́ Тыро́ урибэ́н, и и́ди Тырэ́ исын дасавэ́, сыр одолэ́стэ, кон тасадя дро пресо (тачыло).

3. “Мэ тасадём ґэрэ́нца екхджино́, на сыс Ма́нца нико́н народо́стыр. Мэ тасадём лэн дрэ Мири́ холы́, дро Миро холямипэн, Мэ пэ лэ́ндэ ґаздаваспэ; лэ́нгиро рат прочхудяпэ пэ Мирэ́ и́ди, Мэ замакхцём саро́ Пэ́скиро урибэ́н.

4. Пал-дова́ со дывэ́с, ко́ли холы́ пхэрдия, исын дро Миро ило́; явдя́ бэрш одолэнгиро, конэ́с Мэ выкиндём.

5. Мэ дыкхцём, нэ на сыс никонэ́с, кон бы дыя́ васт (помогиндя); дивиндёмпэ, со на подрикирдя нико́н, нэ помогиндя Ма́нгэ Миро васт, и Мири́ холы́ подрикирдя Ман.

6. Тэл ґэра́ Мэ чхудём народы дрэ Мири́ холы́, хасякирдём лэн дэ Мири́ холы́, и вычхудём пэ пхув лэ́нгиро рат.”

7. Пририпирава мэ лачхипэ́н Ра́скирэ-Дэвлэ́скиро и барипэ́н Ра́скирэ-Дэвлэ́скиро пал саро́, со Рай Дэвэ́л дыя́ амэ́нгэ, пририпирава баро́ бахталыпэ́н Лэ́скиро ваш кхэр Израилёскиро, саво́ Ёв кэрдя́ пир Лэ́скиро лачхипэ́н, пир Лэ́скиро баро́ кучипэ́н.

8. Ёв пхэндя́: “Чачо́, ёнэ исын Мирэ́ чхаворэ́, савэ́ на хохавэна”, и Ёв сыс ваш лэ́нгэ Зракхибнариса.

9. Сави́ б на сыс биба́хт (би́да), Ёв лэн на ячкирэлас и Янго́ло Лэ́скиро лэн зракхэлас; Ёв выкиндя лэн, пал-дова́ со ёнэ исын дро́га Лэ́скэ и Лэ́скиро ило́ исын лачхо́; Ёв лыя́ лэн и лыджалас сарэ́ ґаратунэ́ дывэса́.

10. Нэ ёнэ на кандэнас, пхарэ́с сыс далэ́стыр Свэнтонэ́ Духоскэ; палдава́ Ёв яця́ лэ́нгирэ вэргоса: Кокоро́ Ёв марэласпэ лэ́нца.

11. Тэ́ньци Лэ́скиро народо пририпирдя ґаратунэ́ Мойза́скирэ дывэса́: “Кай исын Одова́, Саво́ вылыджия́ лэн морёстыр (дэрьявэстыр) чхупнариса, Саво́ чаравэла Лэ́скирэ бакрэ́н? Кай исын Одова́, Саво́ чхудя́ Пэ́скиро Свэ́нто Ду́хо (Фа́но) дро лэ́скиро ило́?

12. Саво́ лыджия́ Мойза́с пал чачо́ васт, Ёв лыджалас Пэ́скирэ зоралэ́ вастэ́са, Ёв розлыджия (укэдыя) анги́л лэ́ндэ пани́, соб (кай) тэ кэрэ́л Пэ́скэ ве́чно лав?

13. Саво́ лыджия́ лэн пир хорипэна, сыр грэс пир фэ́лда, и ёнэ на пэрэнас (на обштавэнаспэ) пэ́скирэ ґэрэ́нца?

14. Сыр бакря́ змэкэнапэ пэ до́ло, адя́кэ Дэвлэ́скиро Ду́хо (Фа́но), лыджалас лэн кэ штылыпэн. Адя́кэ Ту лыджасас Тыро́ народо, соб (кай) тэ кэрэ́н Пэ́скэ славу́тно лав.

15. Дыкх тэлэ́ болыбна́стыр, подыкх штэто́стыр, кай исын Тыро́ Свэ́нто штэ́то и барипэ́н Тыро́: кай исын зэвлэныпэн и зоралыпэ́н Тыро́? Кай исын Тыро́ лачхипэ́н? Нанэ Ту́тэ тангипэ́н кэ Мэ.

16. Ту сан Екх амаро́ Дад Дэвэ́л; пал-дова́ со Авраа́мо на джинэ́ла амэн, Израилё на приджинэла амэн пал пэ́скирэ манушэ́ндэ. Ту, Раё Дэ́вла, сан амаро́ Дад, Тыро́ лав векостыр исын дасаво: “Одова́, Кон выкиндя амэн.”

17. Со́скэ, Раё Дэ́вла, Ту домэкцян, соб (кай) амэ тэ джас пэ́скэ Тырэ́ дромэ́стыр, соб (кай) амаро́ ило́ яця́ холямо́, соб (кай) тэ на дарас Ту́тыр? Обрисёв ваш Тырэ́ писхарье́нгэ, ваш ро́дыцы (чанга́), савэ́нгэ Ту дыя́н Тыро́ миштыпэ́н.

18. Наґара (надлугэс) сыс Ёв кэ Тырэ́-кхангирья́киро народо, амарэ́ вэ́рги ґаздынэ́пэ пэ Тыро́ свэ́нто штэ́то.

19. Амэ кэрдямпэ адасавэ́ мануша́, сыр одолэ́, савэ́ Тут на джинэнас; здэлапэ, со на кхарласпэ Тыро́ лав машки́р амэ́ндэ.

Isaiah 64:1-12

1. О, ко́ли б Ту росчхиндян болыбэ́н и ги́ян тэлэ́! Бэ́рги схачинэ б Тырэ́ мо́стыр.

2. Сыр хачкирдэ́ ягатыр, сави́ билавэла (плавинэла), сыр пане́стыр, саво́ кэрадёла, соб (кай) тэ джинэ́н Тыро́ лав джиндло́ Тырэ́ вэргэ́нгэ; соб (кай) тэ издран анги́л Ту́тэ народы.

3. Ке́ли Ту кэрэсас даранэ рэ́нды, савэ́ амэ на ужакирасас, и Ту джасас тэлэ́ – бэ́рги биладёнас (таинэнас) Тырэ́ мо́стыр.

4. Пал-дова́ со николи мануша́ на шунэнас канэнца, и нисави́ якх на дыкхця́ явирэ́с дэвлорэс. Ту сан Екх Дэвэ́л, Саво́ бут кэрдя́ ваш одолэ́нгэ, конэ́стэ исын наде́я пэ Ту́тэ.

5. Ту лачхипна́са прилэсас одолэ́с, кон радынэласпэ и кэрэ́лас пир чачипэ́н, кон рипирэлас пал Ту́тэ пэ Тырэ́ дрома́. Нэ, акэ, Ту холясыян, пал-дова́ со амэ гара (длу́гэс) лыям тэ кэра́с грэ́хи; и сыр же амэ зракхасапэ?

6. Сарэ́ амэ кэрдямпэ-сыр нажужо предмето, амари́ паты́в – сыр замакхны и́дя, амэ шутиям сыр патри́н (листо); амарэ́ налачхэ́ рэ́нды лыджинэ́ амэн, сыр балва́л.

7. На сыс одолэ́с, Кон бы кхардя́ Тыро́ лав, кон закамдя́ б тэ рикирэлпэ пал Ту́тэ; палдава́ Ту гарадян Тыро́ муй амэ́ндыр, Ту ячкирдэн амэн тэ хасёвас грэхэ́ндыр.

8. Нэ какана́, Раё Дэ́вла, Ту сан амаро́ Дад; амэ сам ґлэя (бла́та), савья́тыр кэрэ́на кхорэ́, а Ту – Одова́, Кон создыя́ амэн; сарэ́ амэ – Тырэ́-вастэнгири буты́.

9. На холясов ґара́ (длу́гэс), Раё Дэ́вла! На ри́пир ве́чнэс пал грэ́хи! Дыкх акана́ – сарэ́ амэ сам Тыро́ народо.

10. Тырэ́ форо́скирэ свэ́нта штэ́ты кэрдэ́пэ чхучэ́ пхувья́са; Сио́но – чхучи́ пхув, Ерусалимо исын обчордо.

11. Кхэр, кай амэ свэнтякирасаспэ, кай сыс амари́ паты́в и кай амарэ́ дада́ славинэнас Тут, исын схачкирдо яга́са; амаро́ барвалыпэ́н исын росчордо.

12. Ко́ли саро́ дава́ пхэрдия, ци явэ́са ишчо (инкэ́) ту тэ зрикирэс Пэс амэ́ндыр, Раё Дэ́вла? Ци явэ́са Ту ничи́ тэ на ракирэ́с, тэ холясос пэ амэ́ндэ буты́р, сыр трэй?

Psalms 115:14-18

14. [22] Рай Дэвэ́л явэ́ла тэ дэл бутэды́р и бутэды́р чхаворэ́н ту́кэ и тырэ́ чхавэ́нгэ.

15. [23] Рай Дэвэ́л, Кон создыя́ болыбэ́н и пхув, бахтякирэ́ла тут.

16. [24] Болыбэ́н исын Ра́скирэ-Дэвлэ́скиро болыбэ́н, нэ Ёв дыя́ пхув манушэ́нгирэ чхавэ́нгэ.

17. [25] Мулэ́ на шарэна Рас-Дэвлэ́с, адя́кэ-паць ни одолэ́, савэ́ джа́на дро штэ́то, кай исын штыл.

18. [26] Нэ амэ ява́са тэ бахтякирас Рас-Дэвлэ́с ададывэсатунэ дывэсэ́стыр и пэ сарэ́ ве́ки. Аллилуя.

Proverbs 26:27-27

27. Кон ґанавэла ґанби́н (яма), одова́ кокоро́ пэрэ́ла дрэ ла́тэ, и кон катынэла упрэ́ бар, пэ одолэ́стэ бар рисёла палэ.

Filipanenge 1:1-30

1. Павли́стыр и Химастыр (Тимафеёстыр), Исусо́скирэ Христосо́скирэ писхарьендыр, кэ сарэ́ свэ́нта мануша́ дрэ Филипы, кон патя́ла дрэ Исусо́стэ Христосо́стэ сарэ́ епископэнца (кхангирья́кирэ барыдырэ́нца) и диаконэнца;

2. мэк тэ явэ́л бахталыпэ́н и рама́нё (миро) тумэ́нгэ амарэ́ Дэвлэ́стыр Дадэ́стыр и Ра́стыр-Дэвлэ́стыр, Исусо́стыр Христосостыр.

3. Мэ парикирава мирэ́ Дэвлэ́скэ, ке́ли кажно мо́ло рипирава пал тумэ́ндэ,

4. саро́ часо дро миро мангипэ́н Дэвлэ́скэ, барэ́ радыма́са мэ мангавапэ Дэвлэ́скэ пал тумэ́ндэ,

5. пал-дова́ со тумэ́ роспхэнэнас бахталы́ зан (звесь) пэрвонэ́ дывэсэ́стыр и адя́кэ-паць кэ ададывэсатуно дывэ́с,

6. мэ патя́ва зоралэ́с дро дова́, со Дэвэ́л, Кон лыя́ тэ кэрэ́л дрэ тумэ́ндэ дава́ лачхо́ рэ́ндо, явэ́ла тэ кэрэ́л кэ/жы́ко дова́ Дывэ́с, ке́ли нэвэ́стыр явэ́ла Ису́со Христо́со:

7. чачэс, дава́ трэй ма́нгэ тэ мыслинав пал сарэ́ндэ тумэ́ндэ, пал-дова́ со тумэ́ сан дро миро ило́ и какана́ дро штарибэ́н (бэшыбэн), адя́кэ-паць, ке́ли мэ затэрдёвава пал сарэ́ндэ тумэ́ндэ и допхэнава патяибэ́н пал бахталы́ зан (звесь), сарэ́н тумэ́ндэ, савэ́ сан кхэтанэ́ ма́нца дро Дэвлэ́скиро бахталыпэ́н.

8. Дэвэ́л исын якхи́тко ма́нгэ, со тумэ́ сан древа́н дро́га ма́нгэ сарэ́ тумэ́, Исусо́скирэ Христосо́скирэ ласкаса.

9. И мэ мангавапэ Дэвлэ́скэ пал дова́, соб (кай) тумари́ паты́в кэ яви́р мануша́ уса́ буты́р и буты́р тэ барьёл пир джиныбэ́н и кажно хор ґалыибэ́н,

10. соб (кай) тумэ́ могинэ́нас тэ розлэн (тэ розгалён), со исын фэды́р ваш тумэ́нгэ, соб (кай) тумэ́ тэ явэ́н жужэ́ и бибангипнаскирэ дро Дывэ́с, ке́ли Христо́со явэ́ла,

11. соб (кай) тумаро́ джиибэ́н тэ явэ́л пхэрдо́ чачипна́са, саво́ исын пир Исусо́стэ Христосо́стэ, ваш Дэвлэ́скири сла́ва и шарибэ́н.

12. Пшала́лэ, мэ кама́м, соб (кай) тумэ́ тэ джинэ́н, со саро́, со кэрдя́пэ ма́нца, и со помогиндя ма́нгэ мишто́ тэ роспхэнав бахталы́ зан,

13. адя́кэ, со яця́ джиндло́ халадэнгэ дрэ претория и явирэ́нгэ, со мэ сом бэшто́ дро штарибэ́н пал патяибэ́н дро Исусо́стэ Христосо́стэ,

14. со барэды́р паш пшалэ́ндыр пир Растэ-Дэвлэ́стэ, пир дава́, со мэ сом бэшто́ дро штарибэ́н пал патяибэ́н, ячнэ́ зоралэды́р дро патяибэ́н дрэ амарэ́ Растэ-Дэвлэ́стэ и тэ ракирэ́н Дэвлэ́скиро лав би дара́киро.

15. Чачо́, со вари-савэ́ лэ́ндыр роспхэнэна Христосо́скиро лав пир зэвлыныпэ́н и пир дова́, со выпробинэна екх екхэ́с, нэ яви́р роспхэнэна лав пал Христосо́стэ патыва́са.

16. Екх мануша́ роспхэнэна Христосо́скиро лав далэ́стыр, со ёнэ спробинэна зорья дро лав екх екхэ́са, а на илэ́стыр, ёнэ камэ́на тэ кэрэ́н, соб (кай) тэ явэ́л ма́нгэ пхарэдыр дро штарибэ́н.

17. Нэ яви́р мануша́ роспхэнэна лав пир ла́ска; ёнэ джинэ́на, со мэ сом чхудо тэ затэрдёвав пал бахталы́ зан.

18. Нэ со исын далэ́стыр? Сы́рбы тэ на роспхэнэ́н Христосо́скиро лав дуемуиткэс (притворнэс) ци сарэ́ илэ́стыр, мэ и далэскэ сом радо и мэ адя́кэ-паць ява́ва тэ радынавпэ;

19. пал-дова́ со мэ джино́м, со дава́ явэ́ла ма́нгэ дыно́ ваш зракхибэ́н пир тумаро́ мангипэ́н и подрикирибэ́н Исусо́скирэ-Христосо́скирэ Духо́стыр.

20. Мэ джино́м зоралэ́с и мэ патя́ва, со ма́нгэ ни дро со на явэ́ла ладжаво, а мэ, сыр ґарэдыр, адя́кэ-паць и какана́ би дара́киро, ява́ва тэ барьякирав паты́в Христосо́скэ мирэ́ джиибнаса, ци ява́ва мэ джидо́, ци муло́.

21. Палдава́ со джиибэ́н ваш ма́нгэ исын Христо́со, и мэрибэ́н дава́ исын буты́р джиибэ́н Христосо́са;

22. нэ ко́ли ма́нгэ тэ джива́в дрэ лоч (плоть), дова́ дэ́ла ра́дыма пал мири́ буты́, тэды мэ на джино́м, со фэды́р ма́нгэ тэ выкэдав.

23. Ман тырдэла и екх и яви́р: ма́ндэ исын выкэдыибэн тэ розячавпэ джиибнаса и тэ явав кхэтанэ́ Христосо́са, пал-дова́ со дава́ исын фэды́р сарэ́стыр,

24. нэ тэ ячавпэ джидо́, дава́ исын буты́р трэй ваш тумэ́нгэ;

25. и мэ чачэс, джино́м дава́, со мэ ячавапэ и мэ ява́ва сарэ́нца тумэ́нца кхэтанэ́ ваш тумари́ бахт и ра́дыма дро патяибэ́н;

26. соб (кай) тумаро́ шарибэ́н дро екхипэ́н Христосо́са тэ барьёл пир ма́ндэ, ке́ли мэ ява́ва яви́р мо́ло кэ тумэ́.

27. Дживэ́н гожэс адя́кэ, соб (кай) тэ явэ́н лачхэ́ Христосо́скирэ – бахталэ́ занякэ (звесякэ), соб (кай) мэ, ке́ли ява́ва и дыкха́ва тумэн, ци на ява́ва, нэ соб (кай) тэ шунав тумэ́ндэ, со тумэ́ сан тэрдэ́ зоралэ́с дро екх ду́хо (фа́но), со тумэ́ марэнапэ кхэтанэ́ пал патяибэ́н дрэ бахталы́ зан (звесь),

28. и соб (кай) тумэ́ тэ на дарэ́н ни дро со манушэ́ндыр, савэ́ исын сцял (проти) тумэ́ндэ, дава́ ваш лэ́нгэ исын дыно́ сыкаибэ́н кэ хасибэ́н, а ваш тумэ́нгэ кэ зракхибэ́н, и дава́ саро́ исын Дэвлэ́стыр;

29. пал-дова́ со тумэ́нгэ сыс дыно́ ваш Христосо́скэ на со тэ патя́н дрэ Лэ́стэ, нэ и тэ пиридживэн мэ́ньки пал Лэ́стэ,

30. дасавэ́-паць пхарипнаса, саво́ тумэ́ вари-ке́ли дыкхнэ́ дрэ ма́ндэ, и какана́ тумэ́ шунэ́на пал ма́ндэ.

Romani Bible Baltic 2019

Maintained by the United Bible Societies for the Baltic Romani Mission