Bible in one year October 8Jeremiah 1:1-191. Далэ́ исын Еремеёскирэ лава́, кон сыс Хелкииноскиро [Хилкияскиро-ю.о.] чхаво́, раша́нгирэ родо́стыр, савэ́ сыс дрэ Анафофа пэ Вениаминоскири пхув.2. Лэ́скэ бичхадя́ Рай Дэвэ́л Пэ́скиро лав, дрэ дывэса́ Иосияскирэ (Ёсияскирэ), кон сыс Юдэя́киро кра́ли дро дэшутрито бэрш, сыр ёв сыс кра́ли.3. Рай Дэвэ́л адя́кэ-паць бичхадя́ Лэ́скиро лав дрэ дывэса́ Иоакимоскирэ (Якимоскирэ), кон сыс Ёсиякиро чхаво́ и Юдэя́киро кра́ли кэ/ жы́ко/ дэшупэрво бэрш, сыр Сэдэки́я, Ёсияскиро чхаво́ сыс кра́ли пир Юдэ́я анги́л дова́, сыр дро па́нджто чхон Ерусалимо́скирэ манушэ́н лыджинэ́ дро пле́но.4. И сыс кэ мэ, Еремеёскэ, лав Ра́стыр-Дэвлэ́стыр и пхэндя́:5. “Анги́л дова́, сыр Мэ создыём тут дрэ да́кирэ маса́, Мэ выкэдыём тут. Анги́л дова́, сыр ту явдя́н пэ свэ́то, Мэ высвэнцындём тут. И Мэ чхудём тут сыр пророко́с ваш Наюдэ́нгэ.”6. Тэды пхэндём мэ: “Ах! Дэ́вла! Раё Дэ́вла! Дыкх, мэ на джино́м тэ ракира́в, пал-дова́ со мэ сом бия́то.”7. Нэ Рай Дэвэ́л пхэндя́ ма́нгэ: “На ра́кир: ‘Мэ сом бия́то’; – пал-дова́ со ту джа́са кэ сарэ́, кэ кон Мэ бичхава́ва тут, и со Мэ припхэнава ту́кэ, дова́ ту пхэнэ́са.8. На дар лэ́ндыр, пал-дова́ со Мэ сом ту́са тэ ракхав тут”, – пхэндя́ Рай Дэвэ́л.9. И тэ́ньчи ґаздыя́ анги́л Рай Дэвэ́л Лэ́скиро васт и чиладя́ миро муй. И пхэндя́ Рай Дэвэ́л ма́нгэ: “Акэ, мэ чхува́ва Мирэ́ лава́ дро тыро́ муй.10. Дыкх! Мэ чхудём тут ададывэ́с сыр барыдырэ́с пэ манушы́тка на́цыи и пэ кралипэна́: тэ рискирэс криг корне́нца (рукхэ́нца), тэ пхагирэс кэ пхув, тэ розмарэс пэ котэра́, и тэ чхурдэс тэлэ́; тэ ґаздэс кхэра́, и тэ почхувэс гив дрэ пхув.”11. И ишчо (инкэ́) сыс кэ мэ Ра́скирэ-Дэвлэ́скиро лав, и пхэндя́: “Ереме́ё, со дыкхэ́са ту?” И мэ пхэндём: “Мэ дыкха́ва рандь (вэтка) миндалитконэ дрэвостыр (каштэ́стыр).”12. Тэды пхэндя́ Рай Дэвэ́л ма́нгэ: “Ту миштэ́с дыкхэ́са. Мэ ракхава, соб (кай) миро лав тэ кэрэ́лпэ (сполнинэ́лпэ) дро чачипэ́н.”13. И сыс кэ мэ Ра́скирэ-Дэвлэ́скиро лав яви́р мо́ло, и пхэндя́: “Со дыкхэ́са ту?” Мэ отпхэндём: “Мэ дыкха́ва кака́ви (котло), со кэрадёла, и со сы́рбы рисёла пэ паш-ратякири (северно) риг.14. Тэ́ньци пхэндя́ Рай Дэвэ́л ма́нгэ: “Паш-ратякирэ рига́тыр явэ́ла би́да, пэ сарэ́ манушэ́ндэ пэ пхув.”15. Пал-дова́ со, акэ, Мэ кхара́ва тэ явэ́н сарэ́ сэм΄и (ирья́), савэ́ исын дрэ кралипэна́ пэ паш-ратякири риг, – пхэндя́ Рай Дэвэ́л, – и ёнэ явэ́на тэ чхувэ́н кажно (сва́ко) пэ́скиро троно анги́л Ерусалимо́скири по́рта, и маму́й сарэ́ ва́нты, со исын трусця́л (кругом), и маму́й сарэ́ фо́рья, со исын дрэ Юдэ́я.16. И Мэ выпхэнава Миро пхаро́-сэндякирибэн пэ лэ́ндэ пал саро́ лэ́нгиро фуипэ́н, пал-дова́ со ёнэ ячкирдэ́ Ман, и ёнэ тхувлякирдэ дро́га смо́лы явирэ дэвлорорэнгэ, и ёнэ дынэ́ паты́в идолэ́нгэ, со кэрдэ́ лэ́нгирэ васта́.17. Палдава́, яв скэдыно́ и ушты́, и пхэн лэ́нгэ саро́, со Мэ припхэнава ту́кэ. На замэр дара́тыр лэ́нгирэ муендыр, соб (кай) Мэ тэ на запхагирав тыро́ ду́хо (фа́но) анги́л лэ́ндэ.18. Пал-дова́ со Мэ, акэ, кэрдём ту́тыр сы́рбы зоралякирдо фо́ро, сы́рбы саструно сты́лбо, сы́рбы бронзытка ва́нты проти сари́ пхув, проти Юдэя́кирэ кралье́ндэ, проти тхагарьендэ, проти рашандэ, проти кадалэ́ пхувья́кирэ манушэ́ндэ.19. И ёнэ явэ́на тэ марэ́нпэ ту́са, нэ ёнэ на пиризорькирэна тут, пал-дова́ со Мэ сом ту́са, – пхэндя́ Рай Дэвэ́л, – соб (кай) тэ ракхав тут.”Jeremiah 2:1-371. И сыс кэ мэ, Ра́скирэ-Дэвлэ́скиро лав, и пхэндя́:2. “Джа́ и пхэн ясвэ́нца дрэ манушэ́нгирэ [чхакирэ-р.с.] кана́ Ерусалимо́стыр, пхэни́: ‘Адя́кэ ракирэ́ла Рай Дэвэ́л: ‘Мэ рипирава тут, Израилё, савэ́ лачхэ́ сыс тырэ́ мануша́ тэрнал, тумари́ паты́в, со сыс сы́рбы тэрнэндэ анги́л совэ́л, сыр тумэ́ гинэ́ пал Ма́ндэ пэ чхучэ́ прахи, пэ пхув, со на чхудэ́ гива́ ишчо (инкэ́).3. Ту, Израиле, са́нас свэ́нто Ма́ндэ, ту са́нас пэ́рво барьякирдо́ (пло́до) Мирэ́ умалотостыр. Мэ пхарэ́с сэндякирдём сарэ́н, кон дукхавэлас тут, мэ бичхававас би́да пэ лэ́ндэ,’’” – пхэндя́ Рай Дэвэ́л.4. Шунэ́н Ра́скирэ-Дэвлэ́скиро лав тумэ́, кхэр Яково́скиро, и сарэ́ сэм΄и (ирья́) [кхэра́-р.с.] Израилёскирэ кхэрэ́стыр!5. Адя́кэ ракирэ́ла Рай Дэвэ́л: ‘Саво́ чорипэ́н тумарэ́ дада́ латхнэ́ дрэ Ма́ндэ, со ёнэ дуринэ Ма́ндыр, со ёнэ гинэ́ пал хартытка и́долы, и со ёнэ кокорэ́ ячнэ́ хартытка (суетна)?6. И на пхэндлэ́ ёнэ: “Кай исын Рай Дэвэ́л, Кон лыджия́ криг амэн Египто́скирэ пхувья́тыр, Кон лыджия́ амэн пирда́л чхучэ́ пхувья́, пирда́л чхучэ́ прахи, пирда́л ґанбиня́, пирда́л шутькирды пхув, кай исын зэр (тень) сы́рбы мэрибна́стыр, пирда́л пхув, пэ сави́ ние́кх на прогия́, и нико́н на дживдя́.”7. И Мэ яндём тумэн пэ барвалы пхув, соб (кай) тумэ́ тэ хан ла́кирэ барьякирдэ́ (пло́ды), и ла́киро миштыпэ́н, нэ сыр тумэ́ загинэ́ пэ дая́ пхув, тумэ́ магирдэ́ кадая́ пхув, и тумэ́ магирдэ́ Миро миштыпэ́н.8. Э рашая́ на пхэндлэ́: ‘Кай исын Рай Дэвэ́л?’, – кодолэ́, кон рикирэ́ла зор пэ Зако́но, ёнэ на джиндлэ́ Ман: пастыри адя́кэ-паць кэрдэ́ чорипэ́н Ма́нгэ, и проро́ки ангилпхэнэнас Валаалоскирэ лавэ́са, и ёнэ псирдэ́ пал и́долы, савэ́ндыр на сыс ни саво́ лачхипэ́н лэ́нгэ.9. Палдава́ Мэ ява́ва буты́р тэ сэндякирав тумэн’, – ракирэ́ла Рай Дэвэ́л, – “Мэ ява́ва тэ сэндякирав тумарэ́-чхаворэнгирэ чхаворэ́н.10. Джа́н пал Хитимоскирэ островы, бичхавэн манушэ́н пэ Кидаро и обдуминэн миштэ́с, ци сыс вари-со кадасаво́, сыр кэрдэ́ мануша́:11. соб (кай) манушы́тко нацыя тэ парувэл пэ́скирэ дэвлэн, мэк ёнэ и на сыс дэвэла́? Нэ Мирэ́ мануша́ парудэ лэ́нгири сла́ва (Дэвлэ́скиро Барипэ́н) пэ и́долы, савэ́ндыр на сыс нисаво́ лачхипэ́н.12. Дивинэнпэ зоралэ́с, болыбэ́н кадалэстыр, и тринскирэнпэ’, – пхэндя́ Рай Дэвэ́л.13. Пал-дова́ со мирэ́ мануша́ кэрдэ́ чорипэ́н дуй мо́лы: ёнэ ячкирдэ́ Ман, Кон исын джидэ́-панескири ґанингори и ёнэ выганадэ пэ́скэ вэндариня (сажалки), пхагирдэ́ лэн, со на могинэ́на тэ рикирэ́н пани́.14. Со Израилёскирэ мануша́ ячнэ́ дынарье́нца? Ци со ёнэ исын кхэри́тка писха́рья? Со́скэ лэс вэ́рги обчорэна?15. Тэрнэ́ шчэра́ (левы) рыкинэна пэ Израилё и ёнэ брилинэна; ёнэ кэрдэ́ Израилёстыр чхучи́ (пусто) пхув; лэ́скирэ фо́рья хачкирдэ́ и нико́н на дживэ́ла одо́й.16. И адя́кэ-паць тэрнэ́ мануша́ Тафнатыр и Мемфисостыр пхагирдэ́ тырэ́-шэрэскири крали́тко стадык.17. Ци на яндян ту кокоро́, Израиле, саро́ дава́ пэ пэ́стэ, сыр ту ячкирдян Ман, Рас-Дэвлэ́с, Дэвлэ́с, ке́ли Мэ лыджиём тут дромэ́са.18. И акана́, ваш со ту́кэ, Израиле, трэй тэ кэрэ́с дром кэ Еги́пто и тэ пьес Сихороскирэ (Нилостыр) паня́, ци тэ кэрэ́с дром кэ Асирия; и тэ пьес ла́кирэ рэка́тыр (лэня́тыр).19. Фуипэ́н, со ту кэрдя́н, пирисыклякирэла тут, и тыро́ отпхэныбэ́н Ма́ндыр бангякирэла тут: палдава́ джа́ и дыкх, сыр кирко и биба́хт ту́кэ, со ту ячкирдян Ман, Рас-Дэвлэ́с, и со ту́тэ нанэ дар анги́л Ма́ндэ”, – пхэндя́ Рай Дэвэ́л, Рай Дэвэ́л болыбна́скирэ-янголэ́нгиро.20. ‘Пал-дова́ со Мэ ґара́ пхагирдём ґа́мо тырэ́ мэнятыр, Мэ роскусцём Тырэ́ пэнты, и ту пхэндя́н: ‘Мэ на ява́ва тэ кэра́в чорипэ́н: нэ ту тэл кажно бэ́ргица и тэл кажно зэлэно дрэ́во ту дэ́са паты́в идолэ́нгэ, сы́рбы налачхи джувлы́.21. И Мэ почхудём тут дрэ пхув сыр лачхэ́-родоскиро винаградо, лачхэ́-семёскирэ зяркатыр: сыр да ту пирикэрдянпэ дрэ хасибны́тко (верутно) отбарипэн диконэ винаградостыр анги́л Ма́ндэ.22. Палдава́, мэк ту и тэ выморэспэ акана́ содаса, и тэ лэс бут сапуни, сароекх тыро́ чорипэ́н сыкадо анги́л Ма́ндэ,’ – пхэндя́ Рай Дэвэ́л, Рай Дэвэ́л.23. Сыр да ту могиндян тэ пхэнэ́с: ‘Мэ на сом магирдо́, мэ на гиём пал Ваалостэ’? Дыкх, со ту кэрдя́н пэ до́ло: ту сан сы́рбы чвытко верблюдиха (дромадариха), сави́ уса́ парувэла пэ́скирэ дрома́;24. ту сан сы́рбы хрустэнгири ослица, со присыклёла кэ чхучи́ пхув, со сунгэла кэ пэ балва́л [глытынэла фа́но-р.с.] ваш пэ́скиро тырдыпэ́н? Кон дэ́ла ра́да тэ обрикирэл ла, сыр ёй исын насвалы пал ослэндэ? Сарэ́, кон родэ́ла ла, латхэ́ла ла би-пхарипнаскиро дро ла́киро чхон.25. Пририкир, Израиле, пэ́скирэ ґэра́, соб (кай) ёнэ тэ на явэ́н дукхадэ, и пэ́скиро кирло, соб (кай) ёв тэ на явэ́л трушало (пиришутькирдо). Нэ ту пхэндя́н: ‘Над, со́стыр тэ ужакирав лачхипэ́н. Над! Пал-дова́ со ма́нгэ кэрдэ́пэ (покамлэпэ) чу́жа дэвлорэ́ и мэ джа́ва пал лэ́ндэ.26. Сыр чор, савэ́с ладжакирдэ́, сыр ухтылдэ́ лэс, ада́кицы ладжакирдэ́ пэс тумэ́, – мануша́ Израилёстыр: тумарэ́ кра́лья, тумарэ́ тхага́рья, и тумарэ́ рашая́, и тумарэ́ проро́ки,27. савэ́ пхэнэ́на каштэскэ: ‘Ту сан миро дад’, – барэскэ: ‘Ту яндян ман пэ свэ́то! ‘Тумарэ́ мануша́ рисинэ́ думэса кэ Мэ, а на мо́са: нэ сыр явэ́ла пхаро́, тэды ёнэ пхэнэ́на: ‘Ушты́ и зра́кх амэн.’28. Нэ кай исын тумарэ́ дэвлорэ́, со тумэ́ кэрдэ́ ваш пэ́скэ? Мэк ёнэ тэ уштэ́н, и мэк ёнэ тэ зракхэн тумэн, сыр исын пхаро́ тумэ́нгэ! Пал-дова́ со ту́тэ, Юдэ́я, исын ада́кицы дэвлорэ́, кицы́ исын фо́рья!29. Со́скэ тумэ́ явэ́на тэ чингардэнпэ Ма́нца? Сарэ́ тумэ́ кэрдэ́ грэ́хо проти Ма́ндэ!’ – пхэндя́ Рай Дэвэ́л.30. Ивья́ (напра́снэс) мулякирдём Мэ тумарэ́ чхаворэ́н, ёнэ на прилынэ́ дова́, пал со мэ пирисыклякирдём лэн. Тумэ́ кокорэ́ зачингирдэ куртала́са пэ́скирэ пророкэ́н, сы́рбы шчэр (ле́во), со похала саро́.31. О, Израилёскиро ро́до! Шунэ́н мирэ́ лава́ Ра́стыр-Дэвлэ́стыр! Ци со́мас Мэ сы́рбы пэ чхучи́ пхув Израилёскэ? Ци сы́рбы калы (тёмно) пхув? Со́скэ тэды Мирэ́ мануша́ ракирэ́на: ‘Амэ кокорэ́ сам рая пэ́скэ! Амэ буты́р на ява́са кэ Ту!’32. Ци могинэ́ла чхай тэ бистрэл ла́кири шукарни вя́нка (шука́р укэдыибэн)? Ци тэрны́ тэ бистрэл ла́киро шукарно урибэ́н? Нэ Мирэ́ мануша́ бистрэнас Ман ада́кицы бут дывэса́, со нашты́ тэ погинас.33. Сыр тумэ́ шукарьякирэна (хоханэ́с подкэрэна) пэ́скири манера, соб (кай) тэ латхэ́н камибэн? Палдава́ тумэ́ аж высыклякирдэ пэ́скирэ манерэнгэ самонэ бэдонэ джувле́н.34. Адя́кэ-паць мануша́ латхнэ́ пэ труюны (пэ подя) рат, со бибангипнаскирэ мануша́ прочхудэ: ‘Мэ на латхём дава́, чораханэ́с родыи, нэ адя́кэ упра́л саро́ бицяло́.’35. Нэ тумэ́ ишчо (инкэ́) ракирэ́на: ‘Пал-дова́ со амэ на сам бангэ́, Лэ́скири холы́ рисёла ригаса амэ́ндыр!’ Дыкхэ́н жа! Мэ ява́ва тэ лыджав чинга́рд (тэ сэндинавпэ) тумэ́нца, пал-дова́ со тумэ́ пхэндлэ́: ‘Амэ на кэрдя́м грэ́хо.’36. Со́скэ тумэ́ древа́н бут псирэ́на чхучэс, и парувэна тумарэ́ дрома́? Тумэ́ явэ́на ладжакирдэ́ дро Еги́пто, адя́кэ-паць сыр тумэ́ са́нас ладжакирдэ́ дрэ Асирия.37. Нэ тумэ́ джа́на криг Египто́стыр, и тумарэ́ васта́ явэ́на пэ тумарэ́ шэрэ́: пал-дова́ со Мэ, Рай Дэвэ́л, на прилыём дова́, кэ со тумарэ́ илэ рисинэ́, и дава́ на удэлапэ кэ тумаро́ миштыпэ́н.”Psalms 116:5-145. Рай Дэвэ́л исын лачхэ́-дескиро и чачипна́скиро, и амаро́ Рай Дэвэ́л исын лачхэ́-илэ́скиро.6. Рай Дэвэ́л приракхэла простонэн: мэ яцём бизорья́киро; и Ёв зракхця́ ман.7. Рисёв тэ откхинёс пэ́скэ, миро ди; пал-дова́ со Рай Дэвэ́л бахтякирдя́ тут.8. Пал-дова́ со Рай Дэвэ́л выракхця миро ди мэрибна́стыр, мирэ́ якха́ ясвэндыр, и мирэ́ ґэра́ пэрибнастыр.9. Мэ ява́ва тэ псирав анги́л Растэ-Дэвлэ́стэ пэ пхув, кай дживэ́на. [ПСАЛМО 115-р.с.]10. [1] Мэ патяндыём, палдава́ мэ и пхэндём: “Ман зоралэ́с притасавэнас”11. [2] Мэ сы́гэс пхэндём пэ́скэ: “Сарэ́ мануша́ исын хоханэ́.”12. [3] Со́са мэ отда́ва палэ Ра́скэ-Дэвлэ́скэ пал саро́ лэ́скиро баро́ лачхипэ́н ма́нгэ?13. [4] Мэ ґазда́ва тахта́й (чаша) пал дова́, со Ёв зракхця́ ман и кхара́ва Ра́скирэ-Дэвлэ́скиро лав.14. [5] Мэ кэра́ва пир пэ́скири совла́х анги́л Растэ-Дэвлэ́стэ какана́, сыр Лэ́скирэ мануша́ скэдэ́напэ.Proverbs 27:1-11. На шарпэ атасятунэ дывэсэса, пал-дова́ со ту на джинэ́са, со дывэ́с янэ́ла ту́кэ.Filipanenge 3:1-211. Какана́, пшала́лэ мирэ́, радынэ́нпэ дро екхипэ́н Ра́са-Дэвлэ́са: ма́нгэ нанэ пхаро́ тэ чхинав тумэ́нгэ пал дава́-паць, нэ ваш тумэ́нгэ дава́ исын сыкляибэн.2. Ракхэ́нпэ манушэ́ндыр, савэ́ кэрэ́на биба́хт, сыр джукэла, ракхэ́нпэ холямэ́ манушэ́ндыр, ракхэ́нпэ хоханэ́ обчхиныбнастыр.3. Пал-дова́ со обчхиныбэн дава́ исын амэ тумэ́нца, савэ́ мангэ́напэ Дэвлэ́скэ Лэ́скирэ Духо́са, и шарасапэ дро екхипэ́н Исусо́са Христосо́са, и амэ на древа́н патя́са дрэ лоч (плоть),4. мэк и мэ адя́кэ-паць древа́н патя́ва дрэ лоч; а ко́ли вари-кон яви́р камэ́ла тэ патял древа́н дрэ лоч, тэды ма́ндэ исын буты́р саштыпэн:5. мэ со́мас обчхиндло пэ охто́то (бидуе́нгиро дэ́што) дывэ́с, сыр бияндыём, мэ сом Израилёскирэ родо́стыр, и мэ сом Вениамино́скирэ родыцо́стыр, Юдо Юдэндыр, и мэ сом Фарисеё пир сыклякирибэ́н;6. мэ со́мас баро́ вэ́рго и хачкирдэ́ илэ́са традыём Христососкири Кхангири́ и пир Законоскиро чачипэ́н мэ сом бидошакиро;7. нэ со ваш ма́нгэ сыс льго́та, мэ лыём тэ гинав пал хасибэ́н ваш Христосо́скэ.8. И мэ гинава саро́ яви́р пал хасибэ́н ваш дова́, соб (кай) бутэды́р тэ уджинав мирэ́ Рас-Дэвлэ́с, Исусо́с Христосо́с, ваш Лэ́скэ мэ сарэ́стыр отпхэндёмпэ, мэ саро́ гинава пал шума (смети), соб (кай) ма́нгэ екх тэ явав дро екхипэ́н Христосо́са;9. и тэ явав сарэ́са дро екхипэ́н Лэ́са на пэ́скирэ чачипна́са; саво́ исын Законо́стыр, нэ чачипна́са, саво́ исын пир патяибэ́н дро Христосо́стэ, чачипна́са, саво́ исын Дэвлэ́стыр пир патяибэ́н,10. соб (кай) тэ уджинав Лэс и Лэ́скирэ отджидякирибнаскири зор, и тэ явав кхэтанэ́ дрэ Лэ́скирэ мэ́ньки, и тэ мэрав, сыр Ёв.11. Соб (кай) фэ́ни (то́ка) тэ дорэсав отджидякирибэн мулэ́ндыр кэ джиибэ́н.12. Нэ пал-дова́, со мэ ничы́ саро́ дава́ на дорэсцём, и мэ на сом какана́ бидошакиро, нэ мэ причхувава зор тэ латхав, ци на латхава и мэ дова́, пал со и латхя́ ман Ису́со Христо́со ваш Пэ́скэ.13. Пшала́лэ, мэ гинава, со кокоро́ мэ на латхём, нэ екх, со мэ бистрава дова́, со яця́пэ палэ, и мэ джа́ва анги́л,14. мэ прастава кэ цэлё, кэ най вучэды́р паты́в, ваш сави́ Дэвэ́л кхардя́ ман пир Христосо́стэ Исусо́стэ.15. И ада́кицы, пэ кицы́ амэ́ндыр исын бидошакирэ мануша́, лэ́нгэ адя́кэ трэй тэ думинэн, а ко́ли тумэ́ пал дава́ пэ яви́р думинэ́на, то и дава́ Дэвэ́л отчхакирэла тумэ́нгэ.16. Нэ дова́, со амэ прилыям, адя́кэ и амэ ява́са тэ думинас и тэ джива́с.17. Пшала́лэ, причхувэ́н зор тэ кэрэ́н адя́кэ-паць сыр мэ, и дыкхэ́н пэ одолэ́ манушэ́ндэ, савэ́ кэрэ́на дова́-паць, сыр и тумэ́ думинэ́на пал амэ́ндэ;18. пал-дова́ со бут мануша́, пал савэ́ндэ мэ частэс ракирдём тумэ́нгэ, а какана́ и ясвэ́нца мэ ракира́ва, кэрэ́на сыр вэ́рги Христосо́скирэ мэрибна́скэ пэ трушу́л:19. ёнэ исын тэрдэ́ пэ дром кэ хасибэ́н, лэ́нгиро дэвэл исын кужум (жэлудко), и лэ́нгири сла́ва исын дрэ ладж, ёнэ думинэ́на екх пал далэ́ свэто́скирэ рэ́нды:20. пал-дова́ со амэ сам джиибнарья тхэмэстыр (штэто́стыр), саво́ исын дро Болыбна́скиро Раё, одотхы́р амэ ужакираса и амарэ́ Зракхибнарис Рас-Дэвлэ́с, Исусо́с Христосо́с,21. Саво́ парувэла амарэ́ хасибны́тка маса́ адя́кэ, со ёв явэ́ла тэ зджал пэ Лэ́скирэ маса́ зорья́са, савья́са Ёв чхудя́ тэлэ́ саро́ анги́л Пэ́стэ. Romani Bible Baltic 2019 Maintained by the United Bible Societies for the Baltic Romani Mission