Bible in one year
October 9

1. Ишчо ракирэ́на ёнэ: ‘Ко́ли ману́ш розджалапэ пэ́скирэ ромня́са, и ёй джа́ла криг лэ́стыр и ёй ячэ́ла ромны́ явирэ манушэ́скэ, ци сашты́, соб (кай) ёй тэ рисёл палэ кэ ёв? Ци на явэ́ла кодоя пхув хор магирды? Нэ тумэ́, мануша́ Израилёстыр, камлэ́ бут явирэ дэвлорэ́ сы́рбы налачхи джувлы́, нэ сароекх (усае́кх) рисёв кэ Мэ’, – ракирэ́ла Рай Дэвэ́л.
2. Ѓаздэн пэ́скирэ якха́ пэ вучэ́ биманушэнгирэ штэ́ты и Дыкхэ́н акана́, кай тумэ́ сыкадэ паты́в явирэ дэвлорэ́нгэ. Пашэ дрома́ тумэ́ са́нас бэштэ́ ваш лэ́нгэ, сы́рбы о Арабо пэ чхучи́ пхув, и тумэ́ магирдэ́ пэ́скири пхув налачхэ́ камибнаса и фуипнаса.
3. Палдава́ панинга́ сыс пририкирдэ, и на сыс вэснакирэ брышында и тумэ́ндэ чиката ячнэ́ сы́рбы налачхэ́ джувля́тэ, нэ тумэ́ на прилынэ́ ладжакирибэн.
4. Ци явэ́на тумэ́ тэ кхарэ́н ясвэ́нца Ман: ‘Миро Да́до! Ту сан Лыджаибнаскиро амарэ́ тэрныпнастыр?
5. Ци ячэсапэ Ту холямо́ пэ сарэ́ ве́ки? Ци явэ́са Ту тэ рикирэс холы́ кэ са́мо ко́нцо (кэ яго́ро)?’ Дыкхэ́н, тумэ́ пхэндлэ́ дава́, нэ тумэ́ кэрдэ́ чорипэ́н ада́кицы бут, кицы́ тумэ́ фэ́ни могиндлэ́!”
6. И пхэндя́ Рай Дэвэ́л ма́нгэ, Еремеёскэ, дрэ дывэса́, ке́ли Иосия (Ёсия) сыс кра́ли: ‘Ци дыкхця́н ту, со кэрдя́ чхай Израилёскири, сави́ отгия́ патяибнастыр? Ла́кирэ мануша́ псирэнас тэл кажно вучи́ бэ́рга, и кажно зэлэно дрэ́во и ёнэ сыкадэ паты́в кэ яви́р дэвлорэ́ сы́рбы налачхи джувлы́.
7. И пало́ дова́, сыр Израилё кэрдя́ саро́ дава́, Мэ пхэндём: “Рисёв кэ Мэ.” Нэ ёв на рисия́. И лэ́скири здыибнаскири пхэн Юдэ́я дыкхця́ дава́.
8. И дыкхця́ Юдэ́я дава́, ке́ли пир причына, со Израилё отгия́ патяибнастыр и лэ́скирэ мануша́ уса́ сыкавэнас камибэн кэ яви́р дэвлорэ́ сы́рбы налачхи джувлы́, то Мэ бичхадём Израилёскирэ манушэ́н криг Пэ́стыр, и дыём лэ́скэ розгиныбнытко лыл (фода), нэ лэ́скири здыибнаскири пхэн Юдэ́я на дарандыя, нэ ёй гия́ и ёй адя́кэ-паць сыкадя́ паты́в кэ яви́р дэвлорэ́.
9. И сыс адя́кэ, со Юдэ́я магирдя пхув пэ́скирэ нахратонэ камибнаса, и ёй дэ́лас паты́в барэнгэ и каштэнгэ.
10. Нэ усае́кх (сароекх) Израилёскири здыибнаскири пхэн Юдэ́я на рисия́ кэ Мэ сарэ́ илэ́стыр, нэ ёй фэ́ни пэфроми (пэмисни), – пхэндя́ Рай Дэвэ́л.
11. Тэ́ньци пхэндя́ Рай Дэвэ́л ма́нгэ, Еремеёскэ: “Израиле, саво́ отгия́ патяибнастыр, сыкадя́ пэс чачунэдыр, сыр здыибнаскири Юдэ́я.
12. Джа́ и роспхэн (обзанякир) сарэ́нгэ далэ́ лава́ одо́й кэ паш-ратякири (шылалы) риг, кон исын одо́й дро пле́но, и пхэн: ‘Рисёв, отгиибнытко Израиле!’ -ракирэ́ла Рай Дэвэ́л, – ‘Мэ на ява́ва тэ дыкха́в холямэс пэ ту́тэ, пал-дова́ со Мэ сом лачхэ́-де́скиро и Мэ на ява́ва тэ рикирав холы́ пэ сарэ́ ве́ки.
13. Фэ́ни (екх) приґалёв пэ́скири банг, со ту пхагирдян Ра́скирэ-Дэвлэ́скиро, Дэвлэ́скиро Зако́но, и ту чхурдэсапэ екхэ рига́тыр пэ яви́р анги́л чужонэ́ дэвлорэндэ, тэл кажно зэлэно дрэ́во, и со ту на шундя́н Мири́ зан’, – пхэндя́ Рай Дэвэ́л.
14. “Рисён тумэ́, отгиибнытка чхавэ́”, – пхэндя́ Рай Дэвэ́л, – пал-дова́ со Мэ сом тумаро́ Хула́й. Мэ ла́ва екхэ́с кажнонэ́ форо́стыр, и дуе́н кажнонэ́ сэмёстыр (родо́стыр), и Мэ яна́ва тумэн пэ Сио́но.
15. И Мэ да́ва тумэ́нгэ чхупнарьен [пастырен-р.с.] пир Миро ило́, савэ́ явэ́на тэ чалякирэн тумэн джиныбнаса, и ґалыибнаса.
16. И явэ́ла адя́кэ: ке́ли тумэ́ндэ бияндёна бут-бут мануша́ и явэ́на буты́р и буты́р мануша́ тумэ́ндэ, дро долэ́ дывэса́, – пхэндя́ Рай Дэвэ́л, – тумэ́ндэ на явэ́на тэ ракирэ́н буты́р: ковчэго (мохто́) Дэвлэ́скирэ Заветоса.’ Манушэ́ндэ на явэ́ла дава́ пэ годы́: ёнэ на явэ́на ни тэ рипирэ́н дава́, ни тэ явэ́н кэ ковчэго ни на подкэрэн лэс.
17. Дро дава́ часо (цы́ро) ёнэ явэ́на тэ кхарэ́н Ерусалимо Ра́скирэ-Дэвлэ́скиро троноса, и сарэ́ манушэ́нгирэ на́цыи кэдэнапэ кхэтанэ́ кэ Ерусалимо и буты́р на явэ́на тэ псирэ́н накандунэс пир лэ́нгирэ пхарэ́ илэ.
18. Дрэ долэ́ дывэса́ мануша́ Юдэя́кирэ кхэрэ́стыр явэ́на кэ Израилёскиро кхэр, и ёнэ явэ́на кхэтанэ́ тэ джа́н пхувья́тыр, со исын пэ паш-рати́тко (шылалы) риг кэ пхув, со Мэ дыём тумарэ́ дадэ́нгэ сыр мэкно́ миштыпэ́н.
19. И пхэндём Мэ, Рай Дэвэ́л: ‘Сыр Мэ прилава тумэн сыр Мирэ́ чхаворэ́н и Мэ да́ва тумэ́нгэ лачхи́ пхув, най шукарэдыр миштыпэ́н сарэ́ манушэ́нгирэ нацые́ндыр!’ – и ишчо (инкэ́) Мэ пхэндём: ‘Тэды тумэ́ явэ́на тэ кхарэ́н Ман ‘Амаро́ Дад’, и тумэ́ на отджана криг Ма́ндыр.
20. Нэ ту, Израиле, сы́рбы напатяибнытко ромны́, сави́ дурьёла пэ́скирэ ромэстыр, адя́кэ-паць тырэ́ мануша́ мэкнэ́ Ман!
21. Шунэ́н заня́ пэ вучэ́ штэ́ты, сыр ровэна и мангэ́напэ Израилёскирэ чхаворэ́, пал-дова́ со ёнэ пиририскирдэ пэ́скирэ дрома́ дро джиибэ́н, и ёнэ бистырдэ Рас-Дэвлэ́с, пэ́скирэ Дэвлэ́с.
22. Рисён тумэ́, отгиибнытка чхаворалэ, и Мэ састякирава тумаро́ начачипэ́н. И ёнэ пхэндлэ́: ‘Акэ, амэ джа́са кэ Ту, пал-дова́ со Ту сан, Рай Дэвэ́л, амаро́ Дад.’
23. Чачипэ́н, со амэ ивья́ патяндыям, со бэ́ргицы выракхэна амэн, со бутэ́-бэргэнгири зор подэла васт амэ́нгэ: чачипна́са Рай Дэвэ́л, амаро́ Дэвэ́л фэ́ни выракхэла амэн.
24. Пал-дова́ со ладж, со кэрдэ́ амарэ́ дада́ тэрныпнастыр, похалас лэ́нгирэ-бакрэ́нгирэ ста́ды и тэды, лэ́нгирэ чхавэ́н и чхае́н.
25. Амэ сам паштэ́ дрэ амари́ ладж, и амаро́ биладжаипэ́н чхакирдя амэн: пал-дова́ со амэ кэрдя́м грэ́хо проти Растэ-Дэвлэ́стэ, амарэ́ Дэвлэ́стэ: амэ и амарэ́ дада́, амарэ́ тырныпнастыр кэ ададывэ́с, и амэ на кандыям Ра́скирэ-Дэвлэ́скири, амарэ́-Дэвлэ́скири зан!”
1. ‘Ко́ли ту рисёса, Израиле’, – пхэндя́ Рай Дэвэ́л, – ‘рисёв кэ Мэ. И ко́ли ту вычхурдэса пэ́скирэ джунгалэ́ (брыдка) дэвлорэ́ Мирэ́ якхэ́ндыр, тэ́ньчи ту на явэ́са тэ парувэс пэ́скиро дром.
2. И ту явэ́са тэ совлахас: “Тэ явэ́л джидо́ Рай Дэвэ́л патяибна́са, сэндоса и чачипна́са, соб (кай) Мэ тэ бахтякирав сарэ́н Наюдэн, соб (кай) Ма́ндыр ёнэ тэ барьякирэ́н пэс!”
3. И адя́кэ пхэндя́ Рай Дэвэ́л манушэ́нгэ Юдэя́тыр и Ерусалимо́стыр: ‘Роспхаравэн (роспашынэн) начиладэ пхувья́ (чхучэ́ пхувья́), и на чхувэ́н гив дрэ пхув машки́р пхусадытка хру́сты.
4. Обчхинэн пэс ваш Ма́нгэ, Ра́скэ-Дэвлэ́скэ, и злэн цы́па тумарэ́ илэндыр, тумэ́, мануша́лэ Юдэя́тыр, и кон дживэ́ла кэ Ерусалимо, соб (кай) тэ на пэрэ́л Миро холякирибэ́н сыр яг, и соб (кай) тэ захачол адя́кэ, со нико́н на мудькирэла, пал-дова́ со тумэ́ кэрдэ́ биба́хт.
5. Подэн зан (звесь) дрэ Юдэ́я, обзанякирэн дро Ерусалимо и пхэнэ́н: ‘Пхурдэ́н дрэ ро́ги (трубы) пир пхув: ровэ́н, кэдэнпэ кхэтанэ́ и пхэнэ́н: ‘Скэдэ́нпэ и джа́са андрэ́ фо́рья марибнытконэ́ (зоралэ́) вантэнца.’
6. Ѓаздэн сцяго каринг Сио́но: нашэ́н, на ячэ́нпэ (на тэрдён). Пал-дова́ со Мэ яна́ва биба́хт паш-ратитконэ́ (шылалэ) рига́тыр и бари хась (баро́ хасибэ́н).
7. Шчэр (ле́во) выджа́ла пэ́скирэ хашчатыр и хасякирибнаскиро пэ Наюдытконэ́ манушэ́ндэ: ёв джа́ла пэ́скирэ, штэто́стыр тэ чхучакирэл Юдэякири пхув, соб (кай) фо́рья дрэ Юдэ́я тэ явэ́н чхучэ́, би манушэ́нгиро.
8. Палдава́ подпхандэнпэ жалобнонэ гонэса, обровэн и ровэ́н годла́са: пал-дова́ со Ра́скирэ-Дэвлэ́скиро холякирибэ́н, на рисия́ амэ́ндыр.
9. ‘И явэ́ла адя́кэ дрэ дова́ дывэса́’, – ракирэ́ла Рай Дэвэ́л, – ‘со крали́скиро и тхагарьенгирэ илэ замэрэна, и ди́во дара́са ухтылэ́ла раша́н, и пророкэ́ндэ кэрэ́напэ барэ́ якха́ трашатыр (дара́тыр)!
10. И пхэндём тэды Мэ, Ереме́ё: “Ах, Дэ́вла, Раё-Дэвлалэ! Нау́што Ту залыджиян дрэ фротыма кадалэ́ манушэ́н Ерусалимо́стыр, пхэни́: ‘Тумэ́ндэ явэ́ла рама́нё!’ Нэ ке́ли чачунэ́с курта́ла исын пашы́л лэ́нгирэ дия́.”
11. Дро дова́ часо явэ́ла пхэндло́ кадалэ́ манушэ́нгэ и Израилёскэ: “Шуки́ балва́л джа́ла вучэ́ штэтэ́ндыр, со исын пэ чхучэ́ прахи, пэ Мирэ́ манушэ́ндэ, на, соб (кай) тэ жужакирэн, ци, соб (кай) тэ веинэл сыр гив;
12. нэ дая́ балва́л долэ́ штэтэ́ндыр явэ́ла зоралэды́р пир Миро припхэныбэ́н: акана́ Мэ пхэна́ва мирэ́ лава́ тэ сэндякирав лэн.
13. Акэ, вэ́рго джа́ла тэлэ́ сы́рбы о́блоки и лэ́скирэ марибны́тка вурдэна́ явэ́на сыр рискирибнаскири балва́л, а лэ́скирэ граё исын сыгэды́р орлэндыр (кидэндыр). “Бида амэ́нгэ! Пал-дова́ со амэ хасиям!”
14. Выморэн тумарэ́ илэ фуипнастыр, соб (кай) тумэ́нгэ тэ зракхэнпэ. Сыр ґара́ бибахталэ́ ду́мы явэ́на дрэ тумарэ́ шэрэ́?
15. Пал-дова́ со зан джа́ла Даностыр, шылалэ рига́тыр, и пал бэдыпэн (хасибэ́н) занякирэна Ефраимоскирэ бэрга́тыр:
16. “Дэн тэ джинэ́н пал дава́ Наюдэ́нгэ, – мэк Ерусалимо тэ шунэ́л, со вэ́рги джа́на дуратунэ́ пхувья́тыр тэ облэн трусця́л фо́ро, и ёнэ газдэна пэ́скири го́дла пэ Юдэя́кирэ фо́рья.
17. Сы́рбы ракхибнаскирэ пэ фэ́лда, ёнэ сарэ́ обджана трусця́л Ерусалимо, пал-дова́ со дава́ фо́ро газдыя бу́нто пэ Ма́ндэ’, – пхэндя́ Рай Дэвэ́л.
18. Дова́, сыр тумэ́ дживдэ́ и со тумэ́ кэрдэ́, мануша́ Юдэя́тыр, сыс причына, со кэрдя́пэ тумэ́нца.
19. Миро ди калёла! Миро ди калёла, саро́ миро ило́ дукхала тугатыр! Сыр издрала миро ило́ роибнастыр, ма́нгэ нашты́ тэ явав штыл, пал-дова́ со ту шунэса, миро ди, сыр башавэла ро́го (труба), сыр дэ́на го́дла, кай джа́ла марибэ́н.
20. Хась (би́да) джа́ла пал хась (би́да), дыкхэ́н, сыр саро́ пэ пхув исын розмардо, мирэ́ ша́тры (буды) пэ якха́ роспхагирдэ́, и анги́л якха́ хасякирдэ́ шатракиро полого.
21. Сыр ґара́ (длу́гэс) ма́нгэ тэ дыкха́в пэ сцяго (пэ флаго), и тэ шунав рогоскири зан?
22. ‘Пал-дова́ со Мирэ́ мануша́ исын налачхэ́, ёнэ на джинэ́на Ман, – ракирэ́ла Рай Дэвэ́л – ‘ёнэ исын на годьварэ́, ёнэ исын годэ́ тэ кэрэ́н биба́хт (чорипэ́н), нэ ёнэ на джинэ́на тэ кэрэ́н лачхипэ́н.”
23. Мэ, Ереме́ё, дыкха́ва пэ пхув сы́рбы дро суно́, и, акэ, – ёй исын нашады и чхучи́; и, акэ, пэ болыбэ́н – нанэ дуд (свэ́то) пэ лэ́стэ.
24. Мэ дыкха́ва пэ бэ́рги, и, акэ, – ёнэ издрана, и сарэ́ бэ́ргицы тринскирнапэ одори́к и палэ.
25. Мэ дыкха́ва дурэды́р, и, акэ, – нанэ ние́кх ману́ш, и сарэ́ болыбна́скирэ чирикля́ вурняндынэ криг.
26. Мэ дыкха́ва дурэды́р, и акэ, – Кармило (пхабуны фэ́лда) кэрдя́пэ сыр чхучи́ пхув; и сарэ́ ла́кирэ фо́рья исын пхагирдэ́ пэ бара́ анги́л Растэ-Дэвлэ́стэ, Лэ́скирэ барэ́ холя́тыр.
27. Пал-дова́ со адя́кэ пхэндя́ Рай Дэвэ́л: “Сари́ пхув явэ́ла чхучакирды (чхучи́), нэ Мэ на сарэ́са хасякира́ва пхув.
28. Далэ́стыр пхув явэ́ла тэ тугинэл зоралэ́с, и болыбэ́н упра́л явэ́ла кало́, пал-дова́ со Мэ, Рай Дэвэ́л пхэндём дава́, Мэ чхудём дрэ годы́ дава́; Мэ на ковлёвава, Мэ на рисёва́ва палэ.
29. Кажно (сва́ко) ману́ш явэ́ла тэ нашэ́л криг годлатыр, со ґаздэ́на уклистэнгирэ халадэ́, и карье-дыибнарья лукостыр. Вари-савэ́ джа́на криг дрэ хашчы (заросли), и яви́р зарэсэна пэ бэ́рги. Кажно фо́ро явэ́ла мэкно́, и ние́кх ману́ш на явэ́ла тэ дживэ́л одо́й.
30. И ту, росчордо Ерусалимо, со ту явэ́са тэ кэрэ́с? Мэк ту и тэ урье́спэ дро куч лоло́ плашчо, мэк ту и тэ шукарьякирэс пэс гожонэ вянкэнца сувнака́стыр, мэк ту и тэ подмакхэс пэ́скирэ якха́ макхлуняса (краскаса), нэ ивья́ (напра́снэс) ту саро́ гожакирэса пэс, Тырэ́ дро́га мала́ дыкхэ́на вучипна́стыр пэ ту́тэ, ёнэ родэ́на тэ мулякирэ́н тут.
31. Пал-дова́ со мэ, Ереме́ё, шундём го́дла сы́рбы джувлятыр, кон пхарэ́с биянэ́ла, дава́ исын джувлякирэ пхарэ́ ґондя́ сы́рбы кодолятэ, кон биянэ́ла пэ́рво мо́ло ла́кирэ биято́с, Ерусалимо́скири го́дла исын сы́рбы кодолятэ, сави́ мэнчынэлапэ зоралэ́с и протырдэла васта́, пхэни́ (ракири́): “Бида ма́нгэ! Миро ди нашавэла зор анги́л мулякирибнаскирэндэ!”
15. [6] Пхаро́ исын Ра́скирэ-Дэвлэ́скирэ якхэнгэ тэ дыкхэ́н мэрибэ́н Лэ́скирэ свэнтонэнгиро.
16. [7] О, Раё Дэ́вла, мэ чачэс, сом Тыро́ писха́ри, мэ сом Тыро́ писха́ри, Тырэ́-бутярнэнгиро чхаво́: Ту роспхандян мирэ́ пе́нты (кхурья́).
2. Мэк яви́р ману́ш тэ шарэл тут, а на тыро́ муй; мэк тэ явэ́л чу́жо ману́ш, а на тырэ́ ушта́.
1. И адя́кэ, мирэ́ дро́га, савэ́н мэ кама́м тэ дыкха́в, тумэ́ сан мири́ ра́дыма и бахт, тэрдён зоралэ́с дро пэ́скиро джиибэ́н дрэ Растэ – Дэвлэ́стэ.
2. Манга́ва Еводия, и Синтихияс тэ думинэн адя́кэ-паць дрэ Растэ-Дэвлэ́стэ;
3. и мэ манга́ва и тут, миро чачуно́ мал пир буты́, тэ дэс васт лэ́нгэ, адалэ́ джувленгэ, савэ́ лынэпэ тэ роспхэнэ́н бахталы́ зан (звесь) кхэтанэ́ ма́нца, и Климентоса и явирэ мирэ́ малэнца пир буты́, савэнгирэ лава́ исын дрэ Дэвлэ́скирэ-джиибна́скири лылвари́.
4. Радынэ́нпэ ўса́ды (сак) дро тумаро́ екхипэ́н Ра́са-Дэвлэ́са: и мэ нэвэ́стыр пхэна́ва: “Радынэ́нпэ.”
5. Мэк сарэ́ мануша́ тэ джинэ́н тумарэ́-илэ́скиро ковлыпэн, Рай Дэвэ́л исын сарэ́са пашы́л.
6. На пхагирэн шэро́ пэ́скэ ни пал со, нэ кажно мо́ло, ке́ли тумэ́ мангэ́напэ Дэвлэ́скэ, мангэ́нпэ парикирибнаса тэ отчхакирэн пэ́скирэ патерья (молитвы) анги́л Дэвлэ́стэ;
7. и Дэвлэ́скиро рама́нё (миро), саво́ исын вучэды́р кажнонэ́ амарэ́ джиныбнастыр, явэ́ла тэ ракхэ́л тумарэ́ илэ и годы́ дро екхипэ́н Исусо́са Христосо́са.
8. И акэ, пшала́лэ мирэ́, саро́, со исын чачуно́, со нанэ хохано́, со исын патяибны́тко, со исын жужо́, со исын мол тэ сыкавэ́л паты́в, со исын патывало, ко́ли исын вари-саво́ лачхипэ́н и вари-саво́ шарибэ́н, екх пал дава́ тумэ́ думинэн.
9. Саро́, со тумэ́ высыклынэ, и со прилынэ́ и шундлэ́, ци со тумэ́ дыкхнэ́ дрэ ма́ндэ, дова́ и кэрэ́н, и Дэвлэ́скиро рама́нё (миро) явэ́ла тумэ́нца.
10. Мэ древа́н обрадындёмпэ дро екхипэ́н Ра́са-Дэвлэ́са, со тумэ́ какана́ лынэ́ тэ пэкэнпэ (тэ заботисон) пал ма́ндэ, тумэ́ и англэды́р пэкнэпэ, нэ тумэ́нгэ на сыс саштыпэн (возможность/ваканцыя).
11. Мэ ракира́ва дава́ на палдова́, со ма́нгэ вари-со трэй; нэ палдова́ со мэ присыклыём тэ явав радо сарэскэ, со ма́ндэ исын.
12. Мэ джина́в тэ джива́в и дро чорорипэн и дро миштыпэ́н, мэ высыклыём сарэскэ и дро саро́, тэ явав чало и тэ вырикирав бокх, тэ явав дро миштыпэ́н и тэ явав дро наухтылыбэн.
13. Мэ саро́ могина́ва тэ вырикирав зорья́са, сави́ Христо́со дэ́ла ма́нгэ.
14. Нэ тумэ́ шука́р кэрдэ́, со дынэ́ васт, ке́ли ма́ндэ сыс би́да.
15. Нэ и тумэ́ джинэ́на, Филипийцалэ, со сыр мэ лыём тэ роспхэнав бахталы́ зан (звесь), ке́ли мэ выгиём Македониятыр, ни екх кхангири́ на сыс кхэтанэ́ ма́нца и на помогиндя ма́нгэ ловэнца пшалэ́ндыр и на прилыя́ ман апри́ч екхэ тумэ́ндэ;
16. Тумэ́ адя́кэ-паць и дрэ Фесалоника на екх мо́ло бичхавэнас ма́нгэ пэ джиибэ́н.
17. Мэ ракира́ва дава́ на ваш дова́, со мэ родыём ловэ́ пшалэ́ндыр, нэ мэ кама́м, соб (кай) тумэ́ тэ кэрэ́н дова́, со янэ́ла тумэ́нгэ лачхипэ́н.
18. Мэ дорэсцём буты́р, сыр ма́нгэ трэй, мэ сом радо, ке́ли дорэсцём Епафодитостыр саро́, со тумэ́ бичхадэ́ ма́нгэ сы́рбы гудло́ аромато, сыр дро́го свэ́нто дыибэ́н, саво́ исын лачхо́ Дэвлэ́скэ.
19. Нэ мэк миро Дэвэ́л тэ пхэрдякирэл саро́, со тумэ́нгэ трэй пир Пэ́скиро барвалыпэ́н дрэ сла́ва пир Исусо́стэ Христосо́стэ.
20. Мэк тэ явэ́л сла́ва амарэ́ Дэвлэ́скэ и Дадэ́скэ пэ сарэ́ ве́ки. Ами́нь.
21. Пиридэ́н “рама́нё” сарэ́ Исусо́скирэ Христосо́скирэ свэнтонэнгэ. Адя́кэ-паць саро́ пиридэна ‘рама́нё’ тумэ́нгэ сарэ́ пша́ла, савэ́ исын кхэтанэ́ ма́нца, пиридэна “рамане” тумэ́нгэ.
22. Пиридэна “рама́нё” тумэ́нгэ сарэ́ свэ́нта, нэ най буты́р кхенингоскирэ (кесарёскирэ) кхэрэ́стыр.
23. Мэк бахталыпэ́н амарэ́ Ра́скирэ-Дэвлэ́скиро, Исусо́скирэ Христосо́скиро тэ явэ́л сарэ́нца тумэ́нца. Ами́нь.
Romani Bible Baltic 2019
United Bible Societies for the Baltic Romani Mission