Bible in one year November 1Jeremiah 49:1-391. Адя́кэ ракирэ́ла Рай Дэвэ́л пал Амоноскирэ чхавэ́ндэ: “Ци нанэ чхавэ́н дро Израилё? Ци нанэ лэ́стэ прилыибнаскиро (наследнико) пэ мэкно́ миштыпэ́н? Со́скэ тэды о Малхомо прилыя́ мэкно́ миштыпэ́н Гадостыр, и лэ́скирэ мануша́ дживэ́на дрэ Гадоскиро фо́рья?2. Палдава́, акэ, явэ́на дывэса́,” – ракирэ́ла Рай Дэвэ́л, – “со явэ́ла шундлы марибнаскири зан (глос) дрэ Рава Амоноскирэ-чхавэнгири. И далэ́ форо́стыр ячэ́напэ руинэнгирэ бэ́ргицы, и Равакирэ гава́ явэ́на хачкирдэ́ яга́са. Тэ́ньци Израилё лэ́ла палэ дая́ пхув сыр пэ́скиро миштыпэ́н одолэ́ндыр, кон лыя́ лэ́стыр,” – ракирэ́ла Рай Дэвэ́л.3. “Тугин ясвэ́нца, Есевоне, пал-дова́ со Гаё (Аё) исын росчордо, дэн го́дла, чхая́ Раваскирэ, подпхандэн пэс балытконэ гонэнца! Ракирэ́н ясвэ́нца и прастан одори́к и палэ пир ва́нты; пал-дова́ со Малхомо джа́ла дро пле́но кхэтанэ́ лэ́скирэ рашанца и пэ́скирэ тхагарьенца.4. Со́скэ ту барьякирэса пэс долэнца? Джин, со ёнэ ростхадэнапэ ратэ́са, ту, бунтуи́тко чхай Амоноскири! Сави́ гарадёла пал пэ́скиро кучипэ́н тэ зракхэлпэ, пхэни́: ‘Кон явэ́ла проти ма́ндэ?’5. Акэ, Мэ яна́ва дар (траш) пэ тумэ́ндэ,” – ракирэ́ла болыбна́скирэ-янголэ́нгиро Рай Дэвэ́л, Дэвэ́л. “Кажно (сва́ко) тумэ́ндыр, кон исын тумэ́ндэ, явэ́ла традыно криг тэ нашэ́л пэ́скэ, кон карик: и на явэ́ла ние́кх ману́ш тэ кэдэл кхэтанэ́ кодолэ́н, кон нашнэ́.6. Нэ пало́ (после) дова́ Мэ яна́ва палэ пленнонэ манушэ́н Амоностыр,” – ракирэ́ла Рай Дэвэ́л.7. Пал Эдо́мо адя́кэ ракирэ́ла болыбна́скирэ-янголэ́нгиро Рай Дэвэ́л: “Со нанэ буты́р годыпэ́н дро Фемано? Ци со барэ́-годякирэ мануша́ пириячнэ тэ дэн годы́ явирэ́нгэ? Ци со годыпэ́н нашадыя?8. Нашэ́н, рискири пэ́скирэ думэ, бэшэ́н дрэ хор ґанбиня́ (ямы), мануша́лэ, савэ́ дживэ́на кэ Дедано, пал-дова́ со Мэ яна́ва Исавоскиро хасибэ́н пэ лэ́ндэ, – дава́ часо Мэ ява́ва тэ сэндякирав лэн.9. Ко́ли явнэ́ винаградо-скэдыибнаскирэ кэ ту, то нау́што ёнэ тэ на мэкэ́н вари-кицы́ цэ́ла му́ри? Ко́ли явэ́нас чора раты́, то ёнэ чорэнас пэ́скэ ада́кицы, кицы́ лэ́нгэ трэй?!10. Нэ Мэ росчхудём [рочхувава-р.с.] Исавос кэ нангипэ́н: Мэ откэрдём [откэрава-р.с.] сарэ́ лэ́скирэ чораханэ штэ́ты, и ёв на дэ́ла ра́да тэ гарадёл. Лэ́скирэ пала́л-явибнаскирэ чхавэ́ пир кхэри́тко ро́до (пле́мё) хасёна, лэ́скирэ пша́ла и лэ́скирэ сусе́ды (кота́рья), и ёв буты́р на явэ́ла.11. Мэкэ́н пэ́скирэ пиротэн (сиротэн) Ма́нгэ, и Мэ ява́ва тэ ракхав лэн, и мэк тырэ́ пивля (удовы) тэ патя́н зоралэ́с дрэ Ма́ндэ.12. Пал-дова́ со-адя́кэ ракирэ́ла Рай Дэвэ́л: “А́кэ, кодолэ́ яви́р Юды, савэ́нгэ на сыс присэндиндло тэ пьен тахта́й (чаша), дыкхэ́н, явэ́на тэ пьен тахта́й. И со да ту, Эдоме, джа́са криг, би сэндоскиро? Над, ту на кэрэсапэ никай, соб (кай) тэ выракхэспэ сэндостыр, и ту, чачэс [усае́кх-р.с.], явэ́са тэ пьес дава́ тахта́й.13. Пал-дова́ со Мэ совлахадём Мирэ́ Лавэ́са”, – ракирэ́ла Рай Дэвэ́л, “со пэ Восоро (Хацоро) явэ́на тэ дивинэнпэ трашаса, лэ́скэ явэ́ла бипатыв, прокошыбэ́н (арман) и ёв ячэ́ла чхучо́. И сарэ́ лэ́скирэ форье́ндыр явэ́на ўса́ды / сак (всегда) чхучэ́ штэ́ты.”14. Мэ шундём шуныбэ́н Ра́стыр-Дэвлэ́стыр и посло сыс бичхадо́ кэ Наюды́тка на́цыи тэ пхэнэ́л: ‘Кэдэнпэ кхэтанэ́, джа́н проти лэ́стэ, и тэрдён пэ марибэ́н!’15. “И, акэ, Мэ кэра́ва ту́тыр, Эдоме, тыкнэс машки́р Наюды́тка на́цыи, со явэ́на тэ дыкхэ́н вучипна́са пэ ту́тэ.16. Трашаибэ́н тыро́ хохадя тумэн и пхутькирибэ́н тырэ́-илэ́скиро притырдынэ тут, саво́ дживэ́ла машки́р скалакирэ шчэлі, и саво́ залэла вучипэ́н бэргицэнгиро! Мэк ту кэрдя́н пэ́скири гня́зда (ку́фо) адя́кэ вучэ́с, сыр о́рло (ки́до), нэ Мэ и одотхы́р тырдава [счхурдава-р.с.] тут тэлэ́,” – ракирэ́ла Рай Дэвэ́л.17. ‘И явэ́ла Эдо́мо сыр ди́во трашаса; и кажно (сва́ко) ману́ш, кон явэ́ла тэ джал пашэ́, явэ́ла тэ дивинэлпэ трашаса, и ёв лэ́ла тэ дэл шоля (тэ свистинэл), сыр дыкхэ́ла сарэ́ лэ́скирэ мэрибнытка фра́нсы,18. сыр сыс радэ тэлэ́ Содо́мо и Гомо́ра и лэ́нгирэ пашатунэ́ форицы’ – ракирэ́ла Рай Дэвэ́л, со ние́кх ману́ш на явэ́ла тэ дживэ́л одо́й, со ние́кх чхаво́ Манушэ́скиро на ячэ́лапэ тэ дживэ́л дрэ лэ́стэ.19. Акэ, о Навуходоносо́ро ґаздэ́лапэ сыр шчэр (ле́во) Иорданоскирэ бэргицэндыр проти зорьякирдэ кхэратунэ штэ́ты, и Мэ зачхувава Эдо́мо тэ нашэ́л лэ́скирэ штэтэ́ндыр. И кон исын выкэдыно ману́ш, савэ́с Мэ ґаздыём упрэ́ пэ лэ́ндэ? Пал-дова́ со кон исын адасаво́ сыр Мэ сом? И кон пхучэлапэ отпхэныбэ́н Ма́ндыр? Кон выкхарэла Ман? И кон исын адасаво́ чхупна́ри (пастырё), кон дэ́ла ра́да тэ тэрдёл анги́л Ма́ндэ?20. Палдава́ шунэ́н годо́ лав Ра́стыр-Дэвлэ́стыр, саво́ Ёв чхудя́ тэды пэ Эдо́мо, со Ёв камдя́ тэ придуминэл пэ манушэ́ндэ, кон дживэ́на кэ Фемано: аж тыкнэ́-зорьякирэ Халдее́нгирэ гуртостыр явэ́на тэ тырдэн лэн криг; чачэс, ёнэ кэрэ́на лэ́нгирэ кхэратунэ штэ́ты чхучэ́.21. Пхув явэ́ла тэ издрал шумостыр, ке́ли ёнэ пэрэ́на, и зан лэ́нгирэ годлатыр явэ́ла шундлы пэ Лоло́ мо́рё (дэрья́в).22. Акэ, о вэ́рго ґаздэ́лапэ сыр о́рло (ки́до) и ёв явэ́ла тэ вурнял и тэ росчхувэл пэ́скирэ пхака́ упралэстыр пэ Восоро (Боцра). Дрэ дава́ дывэ́с ячэ́лапэ ило́ зоралэ́-муршэнгиро сы́рбы ило́ джувля́киро, савья́ мэнчынэна дукха́ тэ биянэ́л.23. Пал Дама́ско. – “Емафо [Хамато-ю.о.] и Арпадо ладжакирдэ́, пал-дова́ со ёнэ шундлэ́ фуй нэвипэн. Лэ́нгиро ило́ биладыя (замыя́) криг; мо́рё (дэрья́в) кунинэлапэ тугатыр; ёв на дэ́ла ра́да пэ́скэ тэ явэ́л штыл.24. Дама́ско яця́ бизорья́киро, и рисия́ тэ нашэ́л, дар (траш) ухтылдя лэс. Илытко дукх и туги лынэ́ зор пэ лэ́стэ сы́рбы пэ джувля́тэ, савья́ мэнчынэна дукха́ тэ биянэ́л.25. Сыр да славу́тно фо́ро на яця́пэ цэ́ло, фо́ро, савэ́стыр радынэнаспэ мануша́!26. Палдава́ тэрнэ́ мануша́ далэ́ форо́стыр пэрэ́на пэ лэ́скирэ вули́цы (га́сы), и сарэ́ марибнаскирэ мурша́ хасёна дро дава́ дывэ́с, – ракирэ́ла болыбна́скиро-янголэ́нгиро Рай Дэвэ́л.27. ‘Мэ росхачкирава яг пэ ва́нта Дамаскоскири, и ёй похала сарэ́ фэлатиня́ Венададоскирэ [Бэн-Хададоскирэ-ю.о.].”28. Пал Кидаро и пал кралипэна́ Асороскирэ, савэ́ о Навуходоносо́ро, кра́ли Вавилоно́скиро, розмардя́. Адя́кэ ракирэ́ла Рай Дэвэ́л: “Уштэ́н, джа́н упрэ́ проти Кидаро и лучкирэн манушэ́н [чхавэ́н-р.с.] вастоко́стыр.29. Лэ́на лэ́нгирэ ша́тры и бакрэ́нгирэ ґурты, лэ́нгирэ пологи (покровы) дрэ ша́тры и сарэ́ лэ́нгирэ пирья, и лэ́нгирэ верблюдэн лыджа́на пэ́скэ Халдеи. Ёнэ явэ́на тэ годлэн: ‘Дар кажнонэ́ рига́тыр!’”30. “Нашэ́н, прастан дурэды́р адатхы́р, гарадён хор, мануша́лэ, кон дживэ́ла кэ Асоро,’” – ракирэ́ла Рай Дэвэ́л. ‘О Навуходоносо́ро, кра́ли Вавилоно́скиро, чхудя́ пэ годы́ тэ пэрэ́л пэ тумэ́ндэ, и ёв придуминдя плано проти тумэ́ндэ.31. Ушты́, Навуходоносо́ро, джа́ пэ барвалы нацыя, со дживэ́ла би дара́киро’, – ракирэ́ла Рай Дэвэ́л, – ‘конэ́стэ нанэ ни по́рты, ни штабы, савэ́ дживэ́на кокорэ́ пэ́скэ.32. Лэ́нгирэ верблюдэн сашты́ явэ́ла тэ лэн сыр дорэсыбэ́н, и бут-бут лэ́нгирэ мурдала́ явэ́на чордэ. И Мэ росчхувава тэ дживэ́н пэ сарэ́ балваля одолэ́н, савэ́ндэ яго́ры (краи́) пэ балэнгирэ пе́йсы исын обчхиндлэ́, и Мэ яна́ва биба́хт (би́да) пэ лэ́ндэ сарэ́ ригэ́ндыр’, – ракирэ́ла Рай Дэвэ́л.33. ‘Асоро явэ́ла штэ́то ваш шакалэнгэ тэ дживэ́н, и ёв усады (сак) (всегда) явэ́ла чхучо́, и ние́кх ману́ш на явэ́ла тэ дживэ́л одо́й и ниекхэ-манушэ́скиро чхаво́ на тэрдёла тэ дживэ́л одо́й’”34. Ра́скирэ-Дэвлэ́скиро лав, со сыс Еремеёскэ, пророкоскэ проти Еламо, ке́ли о Сэдэки́я, кра́ли Юдэя́киро, лыя́ тэ кралинэ́л:35. Адя́кэ ракирэ́ла Рай Дэвэ́л, болыбна́скирэ-янголэ́нгиро: “Акэ, Мэ пхагирава лу́ко Еламоскиро, са́мо-главныма лэ́нгирэ-зорьякири.36. Мэ яна́ва штар балваля штарэ́ ягорэндыр пэ болыбэ́н, и Мэ росчхувава тэ дживэ́н лэн пир сарэ́ далэ́ балваля; и на явэ́ла ние́кх нацыя, кэ сави́, соб (кай) тэ на явэ́н бикхэрэскирэ Еламостыр.37. Мэ кэра́ва адя́кэ, соб (кай) мануша́ Еламостыр тэ замэрэн дара́тыр анги́л лэ́нгирэ вэргэ́ндэ, и анги́л одолэ́ндэ, кон родэ́ла лэ́нгиро ди. Мэ яна́ва бари биба́хт (би́да) пэ лэ́ндэ, Мири́ зоралы́ холы́” – ракирэ́ла Рай Дэвэ́л, – ‘и Мэ бичхава́ва курта́ла пал лэ́ндэ адя́кэ ґара́ (длу́гэс), анги́л Мэ домарава лэн.38. И Мэ чхува́ва Миро троно дро Еламо, и Мэ мулякирава лэ́нгирэ кралье́н и тхагарьен’ – ракирэ́ла Рай Дэвэ́л.39. ‘Нэ дро са́мо ко́нцо (яго́ро) дывэсэнгиро Мэ яна́ва палэ пленонэн Еламоскирэн’” – ракирэ́ла Рай Дэвэ́л.Jeremiah 50:1-461. Акэ, исын лав, со Рай Дэвэ́л пхэндя́ проти Вавило́но, и проти пхув Халдее́нгири пир Еремеёстэ, пророкостэ:2. “Подэн зан (дэн тэ джинэ́н) машки́р на́цыи, и обзанякирэн (роспхэнэ́н) сарэ́нгэ, и ґаздэ́н сцяго (флаго); обзанякирэн, и на гаравэн дава́, – пхэнэ́н: ‘Вавило́но лыно́, Вило ладжакирдо́. Меродахо исын пхагирдо́ пэ котэра́, лэ́скирэ и́долы магирдэ́, лэ́нгирэ вычхудэ́ муя́ пхагирдэ́ пэ котэра́.3. Ваш одова́ со паш-ратитконэ́ (севернонэ) рига́тыр джа́ла пашылэды́р Мидянэнгири нацыя проти Вавило́но, ёнэ кэрэ́на лэ́нгирэ пхувья́тыр чхучо́ (пусто) штэ́то, и ние́кх (нико́н) на явэ́ла тэ дживэ́л одо́й: и мануша́ и мурдала́ (жывотна) нашэ́на и джа́на криг.4. Дрэ долэ́ дывэса́ и дро дова́ часо’, – ракирэ́ла Рай Дэвэ́л, – ‘чхавэ́ Израилёскирэ и сарэ́ чхавэ́ Юда́скирэ явэ́на кхэтанэ́, и ёнэ явэ́на, рови, соб (кай) тэ родэ́н Рас-Дэвлэ́с, пэ́скирэс Дэвлэ́с.5. Ёнэ явэ́на тэ пхучэнпэ дром пэ Сио́но, и ёнэ явэ́на тэ рискирэ́н пэ́скирэ муя́ кэ ёв, ракири́: ‘Явэ́н и ла́са тэ кхэтанякираспэ кэ Рай Дэвэ́л вечнонэ заветоса, саво́ на бистрэлапэ.6. Мирэ́ мануша́ нашадынэ сыр бакрэ́: лэ́нгирэ чхупна́рья (пастыри) лыджинэ́ лэн криг дромэ́стыр, ёнэ рискирдэ́ лэн дромэ́стыр пэ бэ́рги. Ёнэ гинэ́ тэ псирэ́н бэрга́тыр пэ бэ́ргица и ёнэ бистырдэ пэ́скиро штэ́то тэ откхинён.7. Сарэ́, кон латхэлас лэн, ханас лэн, и лэ́нгирэ намала (вэ́рги) ракирдэ́: ‘Амэ на сам бангэ́, пал-дова́ со ёнэ кэрдэ́ грэ́хи проти Растэ-Дэвлэ́стэ, дрэ Савэ́стэ дживэ́ла чачипэ́н, Рай Дэвэ́л, Савэ́стыр ужакирдэ лачхипэ́н лэ́нгирэ дада́.8. Израилёскирэ мануша́лэ, прастан Вавилоно́стыр, джа́н криг Халдеенгирэ пхувья́тыр; и явэ́н сыр бузнэ анги́л пэ́скиро ґурто.9. Пал-дова́ со, акэ Мэ ґазда́ва и яна́ва пэ Вавило́но и кэдава кхэтанэ́ проти лэ́стэ барэ́ на́цыи паш-ратитконэ́ тхэмэстыр, и ёнэ явэ́на тэ кэдэнпэ тэ марэ́нпэ проти лэ́стэ, и ёнэ лэ́на Вавило́но. Лэ́нгирэ марибны́тка бустя́ (стре́лы) явэ́на сы́рбы одолэнгирэ, кон исын марибнаскирэ спе́цы, савэ́ на рисёна палэ ивья́ (дармэс).10. И пхув Халдее́нгири явэ́ла пхагирды; сарэ́, кон росчорэла ла, явэ́на чалэ”, – ракирэ́ла Рай Дэвэ́л.11. ‘Пал-дова́ со тумэ́, мануша́ Вавилоно́стыр, радындлэпэ, и тумэ́ свэнкиндлэ кэ вучипэ́н, тумэ́, савэ́ росчордэ Миро мэкно́ миштыпэ́н – Мири́ нацыя. Тумэ́ радындлэпэ, ухнэ (ухтынэ) пэ́скэ сыр рэца (тёлка) пэ чар, и тумэ́ грымитындлэ сы́рбы ґэншта (граё).12. Тумари́ дай, Вавило́но, явэ́ла хор ладжакирды (дрэ бари ладж), ёй, сави́ яндя́ тумэн пэ свэ́то, явэ́ла тэ лолёл ладжатыр [ладжакирды-ю.о.]: ёй явэ́ла най тыкнэды́р сарэ́ нацые́ндыр: явэ́ла сы́рбы чхучи́ мал (степ), шуки́ пхув и чхучэ́ прахи.13. Пир Ра́скирэ-Дэвлэ́скиро холякирибэ́н, пэ ла́тэ нико́н на явэ́ла тэ дживэ́л, и ёй явэ́ла сарэ́са чхучи́. Кажно (сва́ко) ману́ш, кон джа́ла пир Вавило́но, явэ́ла тэ путравэл якха́ трашатыр (тэ дивинэлпэ) и явэ́ла тэ дэл шоля (тэ свистинэл), сыр дыкхэ́ла марибны́тка фра́нсы.14. Тэрден тумэ́ тэ марэ́нпэ проти Вавило́но, трусця́л лэ́стэ, сарэ́, савэ́ одтырдэна лу́ко; дэн карье́ дрэ лэ́стэ, на тангинэн (на жалинэн) бустя́, пал-дова́ со ёв кэрдя́ грэ́хо (бизо) проти Растэ-Дэвлэ́стэ.15. Годлэн проти лэ́стэ сарэ́ трусця́л, пал-дова́ со ёв ґаздыя́ васт тэ поддэлпэ, фундаменты лэ́скирэ пынэ́, лэ́скирэ ва́нты радэ тэлэ́, пал-дова́ со дава́ Рай Дэвэ́л дукхавэла палэ, сыр ёв кэрдя́ адя́кэ, адя́кэ-паць кэрэ́н и тумэ́ лэ́скэ.16. Чингирэн тэ хасёл одолэ́с, кон чхувэ́ла гив дрэ пхув дро Вавило́но, и кодолэ́с, саво́ рикирэ́ла серпо (чхиндло́), сыр тэ чхинэл гив, курталакирэ дара́тыр, сави́ явэ́ла тэ притасавэл, мэк со екх ману́ш тэ рисёл кэ пэ́скирэ мануша́, мэк со екх ману́ш тэ нашэ́л пэ пэ́скири пхув.’17. ‘Мануша́ Израилёскирэ исын сы́рбы бакрэ́, савэ́ росчхурдынэ, кай якха́ дыкхэ́на, шчэра́ (левы) рострадынэ лэн криг: англэды́р кра́ли Асирия́киро похая лэн, и акана́, палатуно́ (после́днё) кадава́ Навуходоносо́ро, кра́ли Вавилоно́скиро, пхагирдя́ лэ́нгирэ кокалы́.’18. Палдава́ адя́кэ ракирэ́ла болыбна́скирэ-янголэ́нгиро Рай Дэвэ́л, Дэвэ́л Израилёскиро: ‘Акэ, Мэ пхарэ́с сэндякирава крали́с Вавилоноскирэс и лэ́скири пхув, сыр Мэ пхарэ́с сэндякирдём крали́с Асириякирэс.19. Нэ Мэ яна́ва палэ Израилё пэ лэ́скири чаритко фэ́лда (пажыть) и лэ́скирэ мануша́ явэ́на тэ чаравэнпэ пэ Кармило и Васа́но; и лэ́скиро ди явэ́ла чало пэ бэ́рга Ефраимо и Галаа́до.20. Дро долэ́ дывэса́ и дро дова́ часо’, – ракирэ́ла Рай Дэвэ́л, – ‘явэ́на тэ родэ́н чорипэ́н дро Израилё, нэ нисо́ на латхэ́на, и явэ́на тэ родэ́н грэ́хи Юдастэ, нэ ёнэ ничы́ на латхэ́на, нэ Мэ отмэка́ва банг кодолэ́нгэ, савэ́н Мэ ячкирава джидэнца (ракхава тэ дживэ́н).’21. ‘Джа́н проти пхув Мэратаим и конэскирэ мануша́ гинэ́ криг дромэ́стыр. Чхучакир (пустошын) и розмар сарэ́са лэн, – ракирэ́ла Рай Дэвэ́л, – ‘и кэр саро́, со Мэ припхэндём ту́кэ.22. Грукато [шумо-р.с.] марибнаскиро шундло пэ пхув и баро́ хасибэ́н.’23. Сыр дава́ млото (свиринд/хамло), со сыс пир сари́ пхув, яця́ чхиндло́ пэ котэра́ и пхагирдо́! Сыр да Вавило́но яця́ дивоса трашаса машки́р на́цыи?!24. Мэ росчхудём фэлы́ (сеть) пэ ту́тэ, Вавило́но, и тут адя́кэ-паць лэ́на, и ту на джиндян дава́. Тут латхнэ́ и лынэ́ дро пле́но пир дова́, со ту тэрдиян проти Растэ-Дэвлэ́стэ.25. Мэ, Рай Дэвэ́л, откэрдём Мири́ пиралы́, и Мэ лыджиём яври́ марибны́тка. Мирэ́ холя́тыр – пал-дова́ со Мэ, Сарэзорья́киро Рай Дэвэ́л, болыбна́скирэ-янголэ́нгиро, лыджа́ва Мири́ буты́ пэ пхув Халдее́нгири.26. Джа́н марибна́са пэ ла́тэ сарэ́ ягорэндыр (крае́ндыр) пэ пхув, псиравэн (откэрэн) ла́кирэ пираля́, счхувэн екх пэ екх сыр ґарбы, розмарэн сарэ́са дая́ пхув: мэк нисо́ тэ на ячэ́лпэ.27. Чхинэн сарэ́ ла́кирэ гурувэ́н: мэк ёнэ сарэ́ тэ джа́н тэл чхури! Бида пэ лэ́ндэ! Лэ́нгиро дывэ́с явдя́, соб (кай) лэн пхарэ́с тэ сэндякирэн.28. Шунэ́н манушэ́нгири зан (глос), савэ́ нашэ́на и ракхэнапэ Вавилоно́скирэ пхувья́тыр. Ёнэ подэна зан (звесь) дро Сио́но, со Рай Дэвэ́л, амаро́ Дэвэ́л дукхавэла палэ, Ёв дукхавэла палэ пал Лэ́скири Кхангири́.29. Кхарэ́н кхэтанэ́ сарэ́ карье́-дыибнаскирэн пэ лу́ко проти Вавило́но. Тэрдён кхэтанэ́ (табороса) сарэ́ трусця́л, кон одтырдэла лу́ко: соб (кай) ние́кх тэ на кэрэ́лпэ никай. Кэрэ́н чорипэ́н палэ лэ́скэ пир дова́, сыр ёв кэрдя́; пал сари́ лэ́скири буты́, со ёв кэрдя́, кэрэ́н и тумэ́ адя́кэ-паць лэ́скэ. Пал-дова́ со ёв яця́ пхутькирдо проти Растэ-Дэвлэ́стэ, проти Свэ́нто Израилё.30. Палдава́ лэ́скирэ тэрнэ́ мануша́ пэрэ́на пэ га́сы, и сарэ́ лэ́скирэ марибнаскирэ мурша́ хасёна дро дава́ дывэ́с, – ракирэ́ла Рай Дэвэ́л.31. ‘Акэ, Мэ сом проти ту́тэ, пхутькирдо Вавило́но!’, – ракирэ́ла Рай Дэвэ́л, болыбна́скирэ-янголэ́нгиро; пал-дова́ со тыро́ дывэ́с явдя́, соб (кай) Мэ пхарэ́с тэ сэндякирав тут.32. Най пхутькирдэ́ обштавэнапэ (обстэмпинэнапэ) и пэрэ́на, и ние́кх наґаздэла пэс. Мэ росхачкирава яг дрэ лэ́скирэ фо́рья, и ёй похала саро́ трусця́л лэ́стэ.’33. Адя́кэ ракирэ́ла болыбна́скирэ-янголэ́нгиро Рай Дэвэ́л: “Чхавэ́ [бияты-ю.о.] Израилёскирэ исын притасадэ, адя́кэ сыр и чхавэ́ [бияты-ю.о.] Юда́скирэ. Сарэ́, кон лынэ́ дро пле́но лэн, рикирэ́на лэн зоралэ́с; ёнэ отпхэнэнапэ тэ мэкэ́н лэн пэ во́ля.34. Лэ́нгиро Выракхибнаскиро исын зорало́; болыбна́скирэ-янголэ́нгиро Рай Дэвэ́л исын Лэ́скиро лав: Ёв добусовэс (старательнэс) обсэндякирэла (роскэдэла) лэ́нгиро рэ́ндо, соб (кай) ёв сашты́ (могинэл) тэ дэл откхиныбэн пхувьякэ, со исын тэл Халдее́ндэ, и напокоё (дар) манушэ́нгэ, кон дживэ́ла кэ Вавило́но.35. Курта́ла джа́ла пэ Халдее́ндэ, – ракирэ́ла Рай Дэвэ́л, – и пэ манушэ́ндэ, кон дживэ́ла кэ Вавило́но, и пэ лэ́скирэ тхагарье́ндэ и пэ лэ́скирэ годэ́ манушэ́ндэ.36. Курта́ла пэ подпхэныбнаскирэндэ [зумакирибнаскирэндэ-р.с.], и ёнэ явэ́на дылынинька. Курта́ла пэ сарэ́ марибнаскирэ муршэндэ, и ёнэ замэрэна дара́тыр.37. Курта́ла пэ лэ́нгирэ грэ́ндэ, и пэ марибнаскирэ вурдэна́, и пэ сарэ́ явирэ-родэнгирэ (мешанонэ) манушэ́ндэ, савэ́ исын машки́р лэ́ндэ, и ёнэ ячэ́на сыр джувля́. Курта́ла пэ лэ́нгирэ кучипэна, и лэ́ндыр лэн чорэна.38. Баро́ шукипэн тэ явэ́л пэ лэ́скирэ паня́, соб (кай) ёнэ тэ вышутён. Пал-дова́ со дая́ исын пхув вычхиндлэ́ муенца, и мануша́ одо́й ячнэ́ бигодякирэ пэ́скирэ даракунэ идолэндыр.39. Палдава́ рискирибна́скирэ мурдала́ малятыр/ степатыр [чхучэ́ прахэндыр-ю.о.] явэ́на тэ дживэ́н пэ дая́ пхув кхэтанэ́ шакалэнца, и страусы явэ́на тэ дживэ́н пэ дая́ пхув. Пэ дая́ пхув буты́р ние́кх ману́ш на явэ́ла тэ дживэ́л, и нико́н на явэ́ла пэ дая́ пхув родэндыр кэ ро́до.40. Сыр Дэвэ́л радя тэлэ́ Содо́мо и Гомо́ра и лэ́нгирэ пашатунэ́ фо́рья, адя́кэ-паць ние́кх ману́ш на явэ́ла тэ дживэ́л ада́й, и ние́кх чхаво́ манушэ́скиро на ячэ́лапэ тэ дживэ́л сыр чу́жо дро дава́ фо́ро.41. Акэ, мануша́ джа́на паш-ратитконэ́ (севернонэ) рига́тыр, дая́ исын бари нацыя и бут кра́лья, савэ́ ґаздэ́напэ ягорэндыр (краендыр) пэ пхув.42. Ёнэ рикирэ́на лу́ко и пика (лонхо), ёнэ исын бидескирэ, и ёнэ на потангинэна. Лэ́нгири зан исын сыр мо́рё (дэрья́в) брилинэла (шуминэла), ёнэ традэ́на уклистэ́ пэ грэ́ндэ, ёнэ кэдэнапэ тэ марэ́нпэ со кэ екх ману́ш кэ сарэ́ пэ ту́тэ, э чхай Вавилоноскири.43. О кра́ли Вавилоно́скиро шундя́ дая́ зан (звесь), сыр пхукадэ (пирипхэндлэ) пал лэ́ндэ, и лэ́скирэ васта́ ячнэ́ бизорья́кирэ. Илытко дукх ухтылдя лэс, дукха́, сы́рбы джувля́тэ, савья́ мэнчынэна дукха́ тэ биянэ́л.44. Акэ, вэ́рго Вавилоно́скиро, явэ́ла сыр шчэр (ле́во) Иорданоскирэ бэргицэндыр [хашчатыр/логовостыр-ю.о.] проти зорьякирдэ кхэратунэ штэ́ты, нэ Мэ кэра́ва адя́кэ, со ёв екха́тыр нашэла криг Вавилоно́стыр. Кон исын одова́ выкэдыно ману́ш, соб (кай) Мэ сашты́ (могинавас) тэ ґаздав лэс упрэ́ пэ лэ́стэ? Кон исын кадасаво́ сыр сом Мэ? Кон исын муршкано́ тэ пхучэлпэ Ма́ндыр отпхэныбэ́н? И кон исын адасаво́ чхупна́ри (пастырё), саво́ явэ́ла тэ тэрдёл проти Ма́ндэ?’”45. Палдава́ шунэ́н годо́ лав Ра́стыр-Дэвлэ́стыр, саво́ Ёв чхудя́ пэ годы́ проти Вавило́но и со Ёв камдя́ тэ придуминэл проти пхув Халдее́нгири: най тыкнэды́р лэ́нгирэ чхавэ́ндыр [стадатыр-р.с.] Мидянэнгирэ халадэ́ лыджа́на криг и, чачэс, Ёв – Рай Дэвэ́л – чхучакирэла (опустошынэла) лэ́нгиро кхэратуно штэ́то (кхэра́) кхэтанэ́ лэ́нца.46. Пхув явэ́ла тэ издрал годлатыр Вавилоно́стыр, ке́ли лэс лэ́на, и годлыпэн явэ́ла тэ шунэлпэ машки́р Наюды́тка на́цыи.Psalms 119:121-128121. Мэ кэрдём пир Зако́но и чачипэ́н, на мэк ман пэ одолэ́ндэ, савэ́ традэнапэ пал ма́ндэ.122. Затэрдёв пал Тырэ́ дынаристэ ваш лэ́скиро лачхипэ́н, на мэк, соб (кай) пхутькирдэ́ тэ притасавэн ман.123. Мирэ́ якха́ мулёна со дывэ́с, ке́ли Ту зракхэ́са ман, и ёнэ махтынэна пал Тыро́ чачипна́скиро лав.124. Отлыджапэ Тырэ́ писхариса пир Тыри́ лачхэ́-илы́ткима и сыкля́кир ман Тырэ́ статутэнгэ.125. Мэ сом Тыро́ писха́ри, дэ годы́ ма́нгэ тэ джина́в Тырэ́ пририпирибэна.126. Дава́ исын Тыро́ часо, Раё Дэ́вла, тэ кэрэ́с вари-со, пал-дова́ со мануша́ пхагирдэ́ Тыро́ Зако́но.127. Палдава́ Тырэ́ припхэныбэна́ исын дрогэдыр сувнака́стыр, фэды́р чачунэ́ сувнака́стыр.128. Палдава́ мэ гиндём Тырэ́ упхэныбэна́ пир саро́, сыр най чачунэдыр: мэ бидыкхава какана́ начачуно дром.Proverbs 28:6-66. Фэды́р исын чороро́ ману́ш, кон кэрэ́ла саро́ лачхэ́с, сыр екх ману́ш, кон кэрэ́ла фуипэ́н пэфроми (нарочнэс), мэк ёв и тэ явэ́л барвало́.Titoske 1:1-161. Павли́стыр, Дэвлэ́скирэ писхаристыр и Исусо́скирэ Христосо́скирэ Апостолостыр. Мэ со́мас бичхадо́ тэ розлыджав манушэ́нгиро патяибэ́н, савэ́н Дэвэ́л выкэдыя́, и тэ янав лэн кэ чачипэ́н, соб (кай) ёнэ тэ дживэ́н дара́са анги́л Дэвлэ́стэ;2. дава́ чачипэ́н дэ́ла наде́я пэ ве́чно джиибэ́н, пал саво́ Дэвэ́л дыя́ лав амэ́нгэ анги́л, сыр свэ́то сыс создыно́, а Дэвэ́л ние́кхвар на хохавэла,3. а, ке́ли явдя́ Лэ́скиро часо, Ёв сыкадя́ Лэ́скиро лав дро пхэндло́ лав, саво́ сыс допатяндло ма́нгэ пир Дэвлэ́скиро упхэныбэ́н, амарэ́ Зракхибнарискиро Дэвлэ́скиро, –4. Титоскэ, мирэ́ чачунэ́ чхавэ́скэ пир патяибэ́н, саво́ сыс екх кхэтанэ́ ма́нца, тэ явэ́л бахталыпэ́н ла́ска и рама́нё Дэвлэ́стыр – Дадэ́стыр и Ра́стыр-Дэвлэ́стыр, Исусо́стыр Христосостыр амарэ́ Зракхибнаристыр.5. Мэ ячкирдём тут пэ Крито ваш дова́, соб (кай) ту дурэды́р тэ докэрэс буты́, сави́ ту на кэрдя́н кэ ко́нцо (кэ ягор) и тэ чхувэ́с пхурэды́р пшалэ́н дро кажно фо́ро, сыр мэ ту́кэ припхэндём:6. соб (кай) кадасаво́ ману́ш тэ явэ́л бидошакиро, екхэ-ромнякиро ром, соб (кай) тэ явэ́н лэ́стэ чхавэ́, савэ́ патя́на Дэвлэ́скэ, савэ́ исын нарозмэкнэ, и савэ́ кандэ́на.7. Пал-дова́ со пхурыдырэ́ пшалэ́скэ трэй тэ явэ́л бидошакирэскэ, сыр Дэвлэ́скирэ-кхэритконэ́ барыдырэ́скэ, соб (кай) ёв тэ на гинэл пэс древа́н годьварэса, тэ на явэ́л холынакиро, матымари, пхутькирдо, розмарибнари, тэ на явэ́л ёв ґа́лко кэ барвалыпэ́н;8. а тэ прилэл манушэ́н илэ́са, савэ́ндэ нанэ пэ́скиро кхэр и тэ явэ́л дро́го лэ́скэ лачхипэ́н, тэ джинэ́л тэ рикирэ́л пэс дрэ васта́, тэ явэ́л ёв чачуно́, саво́ обрикирэла пэс,9. саво́ рикирэлпэ патяибнытконэ лавэ́скэ, сыр лэс сыклякирдэ́, соб (кай) ёв могинэлас тэ сыклякирэ́л явирэ манушэ́н чачунэ́ сыклякирибнаскэ, и тэ сыкавэ́л кадалэ́ манушэ́н, савэ́ исын проти чачуно́ сыклякирибэ́н.10. Пал-дова́ со исын бут мануша́ Юдэндыр, савэ́ ракирэ́на чхучэ́ лава́ и хохавэна явирэ́н,11. трэй, соб (кай) тумэ́ тэ запхандэн муй лэ́нгэ, савэ́ змарэна чачунэ́ дромэ́стыр бут сэм΄и (ирья́), а ваш пэ́скиро биладжаипнытко тырдыпэ́н кэ ловэ́ ёнэ сыклякирэ́на одова́, со на трэй.12. Екх лэ́ндыр лэ́нгиро проро́ко пхэндя́: “Критяни исын ўса́ды (сак) хоханю́ки, фуй, бу́са (дика) мурдала́ и кирнэ-масэнгирэ мануша́, савэ́ ханас, сыр на дрэ пэ́стэ.”13. Кадава́ допхэныбэ́н исын чачуно́; пир дава́ бангякир шылалэс лэн, соб (кай) лэ́нгиро патяибэ́н тэ явэ́л чачуно́,14. тэ на шунэ́н Юдэ́нгирэ парамыси́ (сказки) и манушэ́нгирэ припхэныбэна́, савэ́ дурьёна чачипнастыр.15. Ваш жужэ́ манушэ́нгэ – саро́ исын жужо́, нэ ваш манушэ́нгэ, савэ́ исын нажужэ́ пир грэ́хо, и савэ́ на патя́на Дэвлэ́скэ, ваш лэ́нгэ нисо́ нанэ жужо́, пал-дова́ со лэ́нгири годы́ и ладж исын нажужэ́.16. Ёнэ ракирэ́на, со ёнэ джинэ́на Дэвлэ́с, нэ пэ́скирэ рэндэ́нца ёнэ сыкавэ́на, со ёнэ отпхэнэнапэ Лэ́стыр, ёнэ исын джунгалэ́ и на кандэ́на, ёнэ нанэ лачхэ́ ни кэ саво́ лачхэ́ рэ́ндо. Romani Bible Baltic 2019 Maintained by the United Bible Societies for the Baltic Romani Mission