Beblia

1. И сыс кэ мэ Ра́скирэ-Дэвлэ́скиро лав дасаво:

2. “Манушэ́скиро чхава! Рисёв тырэ́ мо́са кэ Ерусалимо, пхэн лав пэ свэ́нто штэ́то, ра́кир ангилпхэныбэ́н пэ Израилёскири пхув.

3. Пхэн Израилёскирэ пхувьякэ: “Адя́кэ ракирэ́ла Рай Дэвэ́л, Дэвэ́л: ‘Акэ, Мэ выджава пэ ту́тэ, Мэ дорэсава Мири́ курта́ла (мечо) ножнатыр, хасякира́ва ту́тэ чачунэ́ манушэ́с и грэхитконэ́ манушэ́с.

4. А ваш дова́, соб (кай) тэ хасякира́в ту́тэ чачунэ́ манушэ́с и грэхитконэ́ манушэ́с, Мири́ курта́ла выджа́ла ножнатыр пэ кажно лоч, со исын пэ паш-дывэсы́тко, и паш-рати́тко рига́.

5. И ґалёла кажно лоч (плоть), со Мэ, Рай Дэвэ́л, Дэвэ́л, дорэсцём Мири́ курта́ла, палэ ёй на рисёла.’

6. А, ту, Манушэ́скиро чхаво́, дыхинэ пхарэ́ деса и илэ́са, со пашварэ тэ пхарадён, ров киркэс анги́л лэ́нгирэ якха́.

7. И явэ́ла адя́кэ, со пхэнэ́на ту́кэ: ‘Со́скэ ту ровэса?’ пхэн: ‘Шуныбнастыр, саво́ джа́ла, и розмарэлапэ кажно ило́, и мэкэнапэ тэлэ́ сарэ́ васта́, пхаро́ явэ́ла кажнонэ́ дескирэ духоскэ, и сарэ́ чанга́ издрана, сыр пани́. Акэ, дава́ явэ́ла и пхэрдякирэлапэ”, – ракирэ́ла Рай Дэвэ́л, Дэвэ́л.

8. И сыс кэ мэ Ра́скирэ-Дэвлэ́скиро лав дасаво:

9. “Манушэ́скиро чхава! Пхэн ангилпхэныбэ́н, пхэн: ‘Адя́кэ ракирэ́ла Рай Дэвэ́л, Дэвэ́л: Пхэн: “Курта́ла, курта́ла исын кэрды востро, исын жужакирды (вычыстиндлы).

10. Кэрды востро (чолалы) ваш дова́, соб (кай) бут тэ мулякирэ́л, жужакирды, соб (кай) тэ хачол, сыр блискавица. Ци трэй амэ́нгэ тэ радынаспэ, со Мирэ́ – чхавэ́скирэ дэсто́ исын вучэды́р кажнонэ́ каштэ́стыр?

11. Мэ дыём тэ жужакирэн (тэ вычыстинэн) ла, соб (кай) тэ лав ла дро васт; кадая́ курта́ла кэрды востро (чолалы), жужакирды, соб (кай) тэ лэл ла мулякирибнарискиро васт.

12. Ров и тугин ясвэ́нца, манушэ́скиро чхава, пал-дова́ со ёй явэ́ла пэ Мирэ́ манушэ́ндэ, пэ сарэ́ Израилёскирэ тхагарьендэ, лэн отдэна курталакэ кхэтанэ́ мирэ́ манушэ́нца, палдава́ мар пэс пир стаця (сцёгны).

13. Курта́ла исын пропатякирды. И со ко́ли ёй ґаздэ́лапэ пэ крали́тко дэсто́? То дэсто́ на вырикирла,’ – ракирэ́ла Рай Дэвэ́л, Дэвэ́л.

14. А ту, манушэ́скиро чхава, ангилпхэн и мар вастэ́нца, курта́ла кэрэ́лапэ ишчо (инкэ́) яви́р и три́то мо́ло зоралэды́р; курта́ла подджа́ла пэ манушэ́нгиро мулякирибэн, пэ барэ́ – манушэ́скиро мулякирибэн, саво́ заджа́ла дрэ лэ́нгирэ кхэра́.

15. Пашы́л сарэ́ лэ́нгирэ по́рты (вра́ты) и Мэ чхува́ва дараны курта́ла, соб (кай) тэ розмарэнпэ лэ́нгирэ илэ, соб (кай) тэ явэ́л ишчо (инкэ́) бутэды́р замардэ́ манушэ́н. Курта́ла хачола, сыр блискавица, сави́ кэрды востро тэ мулякирэ́л.

16. Скэдэпэ куртала́са, джа́ пэ чачи́ (право) риг, ци джа́ пэ зэ́рво (ле́во) риг, карик тэ на рисёл тыро́ муй.

17. Мэ ява́ва тэ мара́в дрэ васта́, и пириячэ́ла Мири́ холы́. Мэ, Рай Дэвэ́л, Дэвэ́л”, – пхэндём кадава́.

18. И сыс кэ мэ Ра́скирэ-Дэвлэ́скиро лав дасаво:

19. “Ту, манушэ́скиро чхава, кэр адя́кэ, со исын сы́рбы дуй дрома́, кай трэй тэ джал Вавилоно́скирэ-крали́скирэ курталакэ; трэй, соб (кай) дуй дрома́ тэ выджа́н екхэ пхувья́тыр; кэр шпэ́ра (знако) [васт-р.с.] пашы́л дрома́, савэ́ джа́на дрэ фо́рья.

20. Выкэдэ дром, пир саво́ кур-тала джа́лас пэ Рава, Амоноскирэ-чхавэ́нгирэ фо́ро и пэ Юдэ́я, дро зорьякирдо Ерусалимо.

21. Пал-дова́ со Вавилоно́скиро кра́ли исын тэрдо́ пэ дуй дрома́, соб (кай) тэ зумавэл: тринскирэла марибны́тка бустя́ (стре́лы), пхучэлапэ терафимэндыр, дыкхэ́ла пэ кало́ буко (печонка).

22. Дро чачо́ васт лэ́стэ исын драбакирибэн: “Дро Ерусалимо”, кай трэй тэ чхувэ́н марибны́тка тараны проти ва́нты, тэ кхарэ́н тэ мулякирэ́н, тэ ґаздэ́н зан годлыпнаса тэ чхувэ́н пхув ваш вало, тэ ґаздэ́н форитко ва́нта.

23. Кадава́ драбакирибэн сыкадыя́ дрэ Ерусалимо́скирэ – манушэ́нгирэ якха́ хохаибнаса, нэ пал-дова́, со ёнэ совлахадэ, кра́ли пририпирдя пал лэ́нгиро чорипэ́н, соб (кай) тэ лэн фо́ро марибна́са.”

24. Палдава́ адя́кэ ракирэ́ла Рай Дэвэ́л, Дэвэ́л; Пал-дова́ со тумэ́ кокорэ́ пририпирэн тумаро́ чорипэ́н, кэрэ́н адя́кэ, соб (кай) тумаро́ чорэ́ рэ́нды тэ явэ́н дыкхнэ́, соб (кай) тэ сыкадён тумарэ́ грэ́хи пир сарэ́ тумарэ́ рэ́нды; пал-дова́ со тумэ́ кокорэ́ пририпирэна пал дава́, – тумэн лэ́на вастэ́нца.

25. И ту, магирдо́, на́лачхо Израилёскиро тхага́ри, саво́ кэрэ́ла грэ́хо, тыро́ дывэ́с явдя́ ададывэ́с, ту на явэ́са тэ кэрэ́с тыро́ чорипэ́н бутэды́р.

26. Адя́кэ ракирэ́ла Рай Дэвэ́л, Дэвэ́л: ‘Укэдэ диадэма, лэ тэлэ́ пэ́стыр тыри́ коро́на, кадалэс буты́р на явэ́ла; тэлатуно явэ́ла тэ барьёл, а упратуно тэ тэлякирэлпэ.

27. Мэ чхува́ва тэлэ́ лэс троностыр чхува́ва, чхува́ва тэлэ́ лэс, лэс на явэ́ла; нэ, ке́ли явэ́ла Одова́, Конэ́скэ трэй тэ явэ́л, Мэ отда́ва Лэ́скэ.’

28. “Ту, манушэ́скиро чхава, пхэн ангилпхэныбэ́н, пхэн: ‘Адя́кэ ракирэ́ла Рай Дэвэ́л, Дэвэ́л пал Амоноскирэ чхавэ́ндэ пал дова́, со явэ́ла лэ́нца. Пхэн: Курта́ла, курта́ла вытырдыны, жужакирды пэ мулякирибэн, соб (кай) тэ чингирэл, соб (кай) тэ домарэл, соб (кай) тэ хачол, сыр блискавица,

29. соб (кай), ке́ли дэ́на ту́кэ чхучэ́ (пуста) дыкхибэна, зумавэна ту́кэ и хохавэна тут, соб (кай) тут тэ чхувэ́н кэ домардэ́ накуч мануша́, савэнгиро дывэ́с явдя́, на явэ́на бутэды́р тэ кэрэ́н чорипэ́н.

30. Ци тэ рискирав курта́ла дрэ ла́кири ножна? Пэ штэ́то, кай ту са́нас создыно́ пэ пхув, кай ту бияндыян (лотиян), Мэ ява́ва тэ сэндякирав пхарэ́с тут.

31. Вычхувава пэ ту́тэ Мири́ зоралы́ холы́, Мэ пхурдава пэ ту́тэ Мирэ́-холямипнаскирэ яга́са, отда́ва тут дрэ биилэскирэ-манушэ́нгирэ васта́, манушэ́нгэ, савэ́ джинэ́на, сыр трэй тэ замарэ́н.

32. Тут похала яг; тыро́ рат ячэ́лапэ дро машкира́л пэ пхув, на явэ́на тэ рипирэ́н пал ту́тэ, пал-дова́, со Мэ, Рай Дэвэ́л, Дэвэ́л, пхэндём дава́.’”

1. И сыс кэ Мэ Ра́скирэ-Дэвлэ́скиро лав дасаво:

2. “А ту, манушэ́скиро чхава, ци камэ́са ту тэ сэндякирэс? Камэ́са ту тэ сэндякирэс фо́ро, кай чхувэ́лапэ рат? Пхэн лэ́скэ пал саро́ лэ́скиро джунгалыпэ́н (сари́ лэ́скири брыткима).

3. Пхэн: ‘Адя́кэ ракирэ́ла Рай Дэвэ́л, Дэвэ́л: о, фо́ро, саво́ чхувэ́ла рат машки́р пэ́стэ, соб (кай) тэ явэ́л лэ́скиро часо, и саво́ кэрэ́ла пэ́стэ и́долы, соб (кай) тэ магирэл пэс!

4. Ратэстыр, саво́ ту прочхудян, ту сан банго́, идолэндыр, савэ́н ту кэрдя́н, ту сан магирдо́. Подгинэ́ тырэ́ дывэса́, явдя́ тыри́ шту́нда (ґодина). Пал кадава́ Мэ отда́ва тут пэ манушэ́нгиро сабэн, пэ сарэ́ – пхувьенгиро просаибэн.

5. Кодолэ́, савэ́ исын пашы́л ту́тэ, и кодолэ́, савэ́ исын дур ту́тыр, явэ́на тэ кошэнпэ пэ ту́тэ, кон магирдя тыро́ лав, прославиндэпэ долэса, со дро бу́нто на кандэнас никонэ́с.

6. Акэ, Израилёскирэ тхага́рья: кажно (сва́ко) пэ́скирэ зорья́са сыс ту́тэ, соб (кай) тэ чхувэ́н рат.

7. Ту́тэ намишто ракирэ́на пал датэ и дадэ́стэ: кэрэ́на намиштэс манушэ́са, саво́ явдя́ явирэ пхувья́тыр; машки́р ту́тэ накуч кэрэ́на пиротоса (бидадэскирэ чхавэ́са), пивляса (биромэскирэ манушняса).

8. Ту на дэ́са паты́в мирэ́ свэнтонэскэ, и пхагирэса Мирэ́ са́ваты (суботы).

9. Мануша́, савэ́ намиштэс ракирэ́на пал явирэ манушэ́ндэ, исын дрэ ту́тэ, соб (кай) тэ чхувэ́н рат; пэ бэ́рги ха́на ту́тэ свэнтонэ́ – дыибнытко хабэ́н идолэ́нгэ, машки́р ту́тэ кэрэ́на фуипэ́н.

10. Дадэ́скиро нангипэ́н откэрэна ту́тэ, ёнэ явэ́на зорья́са кэ джувлы́, ко́ли ёй жужакирэлпэ ла́кирэ нажужипнастыр.

11. Яви́р кэрэ́ла биладжаипэ́н чужонэ́ ромня́са, яви́р магирэла пэскирья́ борья, яви́р кэрэ́ла биладжакиро грэ́хо пхэняса, пэ́скирэ – дадэ́скирэ чхаса.

12. Кэ ту мануша́ лэ́на мыто (взятка), соб (кай) тэ чхувэ́н рат, ту дэсас ловэ́ тэло ко́фо (процэнто), и лэсас барэды́р бажын (лихва) ту зорья́са отлэсас миштыпэ́н тырэ́ пшалэстыр, а пал Ма́ндэ бистырдян, – ракирэ́ла Рай Дэвэ́л, Дэвэ́л.

13. Акэ, палдава́ Мэ дивинавпэ, со аж мардём пэс пир васта́ трэ начачипнастыр, сыр тут тырдэла кэ барвалыпэ́н, сыр рат чхувэ́лапэ машки́р ту́тэ.

14. Ци вырикирла тыро́ ило́, ци на обмэкэнапэ Тырэ́ васта́ дрэ кодолэ́ дывэса́, ко́ли Мэ выджава пэ ту́тэ? Мэ, Рай Дэвэ́л, Дэвэ́л, пхэндём и кэра́ва дава́.

15. И Мэ росчхурдава тут пир народы тэ дживэ́с, роспхурдава тут пир пхувья́, и ту на явэ́са тэ кэрэ́с буты́р сарэ́са джунгалыпэ́н машки́р пэ́стэ.

16. Ту кокоро́ пэс магирэса анги́л манушэ́нгирэ якха́, и ту ґалёса, со Мэ сом Рай Дэвэ́л, Дэвэ́л.’”

17. И сыс кэ мэ (Езэкилё) Ра́скирэ-Дэвлэ́скиро лав дасаво:

18. “Манушэ́скиро чхава! Израилё кэрдя́пэ Ма́нгэ сыр шлако, сыр нажужо руп, сарэ́ ёнэ исын – волыво (олово), харко́ма (медь), састы́р, молови (свинцо) – кэрдэ́пэ дро бов, сыр шлако рупэ́стыр.

19. Палдава́ адя́кэ ракирэ́ла Рай Дэвэ́л, Дэвэ́л: ‘Ко́ли сарэ́ тумэ́ кэрдэ́пэ шлакоса рупэ́стыр, акэ, Мэ скэда́ва тумэн дро машкира́л Ерусалимо.’

20. Сыр дро бов мануша́ чхувэ́на саро́ кхэтанэ́ руп, и харко́ма, и састы́р, и молови, и волыво, соб (кай) тэ роспхурдэн яг пэ лэ́ндэ, соб (кай) тэ розбилавэн (тэ ростопинэн) лэн, адя́кэ Мэ, дрэ Миро холямипэн, скэда́ва и чхува́ва и розбилавава тумэн.

21. Акэ, Мэ скэда́ва тумэн, и Мэ пхурдава пэ тумэ́ндэ Мирэ́ холямипнаскирэ яга́са, и тумэ́ розбилавэнапэ машки́р ла́тэ.

22. Сыр руп розбилавэлпэ дро машкира́л бов, адя́кэ и тумэ́ розбиладёна, и ґалёна тумэ́, со Мэ, Рай Дэвэ́л, Дэвэ́л, вычхудём пэ тумэ́ндэ Миро холямипэн.”

23. И сыс кэ мэ Ра́скирэ-Дэвлэ́скиро лав:

24. “Манушэ́скиро чхава! Пхэн лэ́скэ: “Ту сан нажужи пхув, пэ сави́ на джа́ла брышы́нд дро дывэ́с, ке́ли пэрэ́ла холякири зор!

25. Ла́кирэ проро́ки зракирэнапэ машки́р ла́тэ, сыр шчэр (ле́во), саво́ рыкинэла, рискирэ́ла пэ́скиро дорэсыбэ́н: ёнэ ха́на манушэ́нгиро ди, залэна миштыпэ́н и дро́гима, ячкирэна джувле́н биромэскиро.

26. Ла́кирэ рашая́ пхагирэна Миро Зако́но, магирэна Миро свэ́нто, ёнэ на дыкхэ́на, кай исын свэ́нто, кай исын насвэнто; на сыкавэ́на, кай исын жужо́, а кай исын нажужо; пэ Мирэ́ са́ваты (суботы) ёнэ закэрдэ якха́; Мэ сом сы́рбы магирдо́ машки́р лэ́ндэ.

27. Ла́кирэ тхага́рья исын сыр рува́, савэ́ родэ́на хабэ́н, чхувэ́на рат, хасякирэна манушэ́нгиро ди, соб (кай) тэ латхэ́н барвалыпэ́н напатывалэс.

28. А ла́кирэ проро́ки макхэна саро́ блатанэ обмакхибнаса, ёнэ дыкхэ́на чхучипэн (пустота), ангилпхэнэна хохаибэ́н и ракирэ́на: ‘Адя́кэ ракирэ́ла Рай Дэвэ́л, Дэвэ́л”, – а Рай Дэвэ́л, Дэвэ́л ничи́ на ракирэ́лас.

29. А мануша́ народо́стыр кэрэ́на намиштэс екх явирэскэ; чорэна, залэна чорорэстыр и манушэ́стыр, саво́ мангэ́ла, кэрэ́на намиштэс манушэ́са, саво́ явдя́ явирэ пхувья́тыр.

30. Родыём Мэ лэ́ндэ манушэ́с саво́ чхувэлас ва́нта и тэрделас дро пропхагирибэн анги́л Ма́ндэ пал дая́ пхув, соб (кай) Мэ тэ на распхагирав ла, нэ Мэ налатхём.

31. Адя́кэ явэ́ла: Мэ вычхувава пэ лэ́ндэ Мирэ́ холякири яг, Мирэ́ холякирэ яга́са Мэ хасякира́ва лэн, и Мэ отда́ва палэ пал лэ́нгирэ рэ́нды пэ лэ́нгиро шэро́” – ракирэ́ла Рай Дэвэ́л, Дэвэ́л.

1. Гилы́ анги́л Кхангири́. Ке́ли Рай Дэвэ́л яндя́ палэ Сионоскирэ манушэ́н плено́стыр, амэ са́мас сы́рбы одолэ́, савэ́ дыкхэ́на сунэ́.

2. Тэды амаро́ муй сыс пхэрдо́ сабнаса и амари́ чиб багалас радыма́са, и ракирдэ́ тэды машки́р Наюдэнгирэ на́цыи: “Рай Дэвэ́л кэрдя́ барэ́ рэ́нды лэ́нгэ.”

3. Рай Дэвэ́л кэрдя́ барэ́ рэ́нды амэ́нгэ, и амэ сам ра́да.

4. Ян палэ амарэ́ манушэ́н плено́стыр, сыр ручаи янэ́на пани́ пэ паш-дывэсы́тко (южно) риг.

5. Одова́, кон чхувэ́ла зя́рка дрэ пхув ясвэ́нца, явэ́ла тэ чхинэл умалото радыма́са.

6. Одова́, кон лыджа́ла пэ́скирэ зя́рки ясвэ́нца, явэ́ла тэ лыджа́л палэ ґарбы (снопы) пэ́скирэ радыма́са.

23. Кон сыкавэ́ла банг явирэ манушэ́скэ, кодова́ латхэ́ла буты́р ла́ска парикирибнаса, сыр кодова́ ману́ш, кон шарэла явирэ манушэ́с на илэ́стыр.

19. Палдава́, пшала́лэ, амэ могинаса муршканэ́с тэ заджас пэ Свэ́нто Штэ́то, пал-дова́ со Ису́со прочхудя Пэ́скиро рат;

20. Ёв дыя́ зор амэ́нгэ тэ проджас пир шы́рма нэвонэ́ и джидэ́ дромэ́са, саво́ исын пир Лэ́скири лоч (плоть);

21. Ёв исын амаро́ Баро́ Раша́й пэ Дэвлэ́скиро Кхэр, саво́ исын дро Болыбна́скиро Раё;

22. палдава́ явэ́н пашылэды́р кэ Дэвэ́л чачунэ́ илэ́са, пхэрдэ́ патяибна́са, соб (кай) тэ явэ́н амарэ́ илэ выжужакирдэ грэхэ́ндыр и тэ на чуинас фуес, со амэ сам бангэ́; тэ явэ́н амарэ́ маса́ обмордэ жужэ́ пане́са.

23. Ява́са тэ рикираспэ зоралэ́с пал наде́я, сави́ амэ приджиндям би кунипна́скиро, пал-дова́ со Дэвэ́л, Кон дыя́ лав, исын патяибны́тко;

24. явэ́н тэ дыкхас екх пэ екхэ́стэ, соб (кай) тэ сыкавэ́н паты́в екх екхэ́скэ и тэ кэрэ́н лачхипэ́н екх екхэ́скэ;

25. и на ява́са тэ мэкас тэ скэдаспэ дрэ кхангири́, сыр дава́ присыклынэ яви́р мануша́, а ява́са тэ сыклякирас екх екхэ́с бутэды́р, ко́ли тумэ́ дыкхэ́на, со Ра́скирэ-Дэвлэ́скиро Дывэ́с явэ́ла сыг.

26. Пал-дова́ со, ко́ли амэ уджиндям чачипэ́н, нэ усае́кх кэра́са грэ́хо кокорэ́ пэ́стыр, тэды нанэ буты́р нисаво́ свэ́нто дыибэ́н тэ злэл далэ́ грэ́хи,

27. нэ амэ́нгэ ячэ́лапэ барэ́ дара́са тэ ужакирас сэ́ндо и яг, сави́ хачкирэ́ла сарэ́ Дэвлэ́скирэ вэргэ́н.

28. Ко́ли кажно ману́ш, кон на дэ́ла паты́в Мойза́скирэ Законо́скэ, мэрэ́ла битангипнаскиро пир лава́ дуе́ ци тринэ́ якхитконэнгиро (свидетеленгиро):

29. то, сыр тумэ́ думинэ́на, ци пэ бут пхарэдыр явэ́ла ка́ра пэ одолэ́ манушэ́стэ, саво́ сы́рбы штакирэла ґэрэ́нца Дэвлэ́скирэ Чхавэ́с и на гинэ́ла пал свэ́нто завето́скиро рат, савэ́са ёнэ кокоро́ сыс свэнцындло, и ракирэ́ла налачхэ́ лава́ пэ Ду́хо (Фа́но), Савэ́стыр амэ лыям бахталыпэ́н?

30. Амэ джина́са Одолэ́с, Кон пхэндя́: “Мэ отха́ва палэ́ (Мэ отомстинава), и Мэ ява́ва тэ чхував би́да” – ракирэ́ла Рай Дэвэ́л.” И нэвэ́стыр: “Рай Дэвэ́л явэ́ла тэ сэндякирэ́л Пэ́скирэ манушэ́н.”

31. Дава́ исын дарано тэ пэрэ́н дрэ джидэ́ Дэвлэ́скирэ васта́.

32. Пририпирэн тумарэ́ пэ́рва дывэса́, ке́ли тумэ́ уджиндлэ́ и патяндынэ́ дрэ Христосо́стэ, тумэ́ са́нас зоралэ́ пир ду́хо (фа́но) дрэ пхарэ́ мэ́ньки;

33. екхэ рига́тыр, мануша́ холямэс сандлэпэ тумэ́ндыр анги́л манушэ́ндэ, кэрдэ́ би́да тумэ́нгэ; явирэ рига́тыр, тумэ́ кокорэ́ са́нас кхэтанэ́ явирэ манушэ́нца, савэ́ адя́кэ-паць дживэ́нас и мэнчынэнаспэ.

34. Тумэ́ пиридживэнас кхэтанэ́ манушэ́нца, савэ́ сыс бэштэ́ дро штарибэ́н, и ке́ли лынэ́ зорья́са тумаро́ миштыпэ́н, тумэ́ дава́ прилынэ́ радыма́са, пал-дова́ со тумэ́ джинэ́на, со тумэ́ндэ исын дро Болыбна́скиро Раё фэдэды́р миштыпэ́н, саво́ ячэ́лапэ ве́чнэс.

35. На мэкэ́н тумаро́ патяибэ́н, пал со тумэ́ дорэсэ́на баро́ отдыибэ́н Дэвлэ́стыр.

36. Тумэ́нгэ трэй тэ вырикирэн, соб (кай) тэ кэрэ́н саро́ пир Дэвлэ́скири во́ля и тэ дорэсэн дова́, пал со Ёв дыя́ лав тумэ́нгэ.

37. Пал-дова́ со сарэ́са на́бут яця́пэ тэ ужакирас, и Одова́, Кон джа́ла, на зарикирэлапэ.

38. Мирэ́ чачунэ́ мануша́ явэ́на тэ дживэ́н пир пэ́скиро патяибэ́н, нэ ко́ли вари-кон дэ́лапэ палэ́, тэды одова́ ману́ш нанэ лачхо́ Мирэ́ илэскэ.

39. Нэ амэ на сам одолэ́ манушэ́ндыр, савэ́ дэнапэ палэ пэ́скирэ патяибнастыр и джа́на кэ хасибэ́н; нэ амэ патя́са, со Дэвэ́л зракхэ́ла амэн.

Romani Bible Baltic 2019

United Bible Societies for the Baltic Romani Mission