Bible in one year - Пэ Балтитко Романи чиб

Bible in one year November 16

1. И сыс кэ мэ Ра́скирэ-Дэвлэ́скиро лав дасаво:

2. “Манушэ́скиро чхава! Сыс дуй манушня, екхэ – да́кирэ дуй чхая́.

3. И кэрэ́нас ёнэ биладжакирэ рэ́нды дро Еги́пто, ёнэ кэрэ́нас дава́ грэ́хо дрэ пэ́скирэ тэрнэ́ бэрша́; одо́й нашадэ ёнэ чхакири ладж, одо́й лэ́нгирэ колына чаладэ мурша́.

4. Акэ, исын лэ́нгирэ лава́: пхурэдырья кхарэнас Огола́, а ла́кирэ пхэня́ – Оголива́. Ёнэ сыс Мирэ́, биянэнас (лотькирэнас) чхавэ́н и чхае́н. Огола́ – дава́ сыс Сама́рия, Оголива́ – дава́ сыс Ерусалимо.

5. И лыя́ Огола́ тэ кэрэ́л биладжакирэ рэ́нды, и тэ дурьёл Ма́ндыр кэ пэ́скирэ камлэ́, кэ Асирийцы, савэ́ дживэ́нас пашы́л ла́тэ.

6. Кэ кодолэ́, савэ́ урьенаспэ дрэ шука́р фиолетова тхана (ткани), кэ округакирэ барыдыра́, кэ барыдыра́ тхэмэ́скирэ, кэ сарэ́ шука́р чхавэ́, кэ кодолэ́, савэ́ традэнас пэ грэ́ндэ.

7. Конэ́скэ отдэлас ёй пэс дрэ биладжакирэ рэ́нды, сарэ́нца выкэдынэ́ Асуроскирэ чхавэ́нца, магирэлас пэс сарэ́ лэ́нгирэ идолэнца, пал савэ́ндэ традэласпэ ёй.

8. Ёй на пириячэлас тэ кэрэ́л грэ́хо и Египтянэнца, пал-дова́ со ёнэ джинэнаспэ ла́са, ко́ли ёй сыс тэрны́, ёнэ чилавэнас ла́кирэ колына, ёнэ кэрэ́нас ла́са биладжакиро грэ́хо.

9. Палдава́ Мэ отдыём ла дрэ ла́кирэ-камлэнгирэ васта́, дрэ Асуроскирэ–чхавэ́скирэ васта́, пал савэ́ндэ традэласпэ ёй.

10. Ёнэ откэрдэ ла́киро нангипэ́н, залынэ ла́кирэ чхавэ́н и ла́кирэ чхае́н, а ла мулякирдэ́ куртала́са. Ёй кэрдя́пэ ладжакунэ лавэ́са машки́р джувлендэ, ке́ли ёнэ кэрдэ́ сэ́ндо пэ ла́тэ.

11. На дыкхи́ пэ дова́, со ла́кири пхэн, э Оголива́, дыкхэ́лас саро́ дава́, ёй ишчо (инкэ́) бутэды́р кэрэ́лас биладжакиро грэ́хо, и пыя́ бутэды́р дро ла́киро биладжаипэ́н, сыр ла́кири пхэн.

12. Ёй потырдыяпэ Асуроскирэ чхавэ́н, округакирэ барыдырэ́н и барыдырэ́н тхэмэскирэн, манушэ́н, савэ́ урьенаспэ дро древа́н шука́р урибэ́н, манушэ́н, кон традэлас пэ грэ́ндэ, сарэ́н гожонэ тэрнэ́ манушэ́н.

13. Мэ дыкхцём, со ёй магирдя пэс, и со лэ́ндэ дуендэ, пхэнендэ, сыс екх дром.

14. Нэ кадая́, Оголива́, кэрэ́лас грэ́хо ишчо (инкэ́) бутэды́р, пал-дова́ со дыкхця́ манушэ́н, со сыс вычиндлэ пэ ва́нта, дыкхця́ Халдеенгиро портрето, дыкхця́ муя́ Халдеенгирэ, савэ́ сыс макхнэ ярконэ мастиняса (краскаса).

15. Савэ сыс обпхандлэ́ симириса пашы́л кустыка, пэ лэ́нгирэ шэрэ́ сыс шука́р пхандлуня (повязки); и выдыкхэнас Халдеи, сы́рбы халадэ́нгирэ рая, сы́рбы Вавилоно́скирэ чхавэ́ Халдеенгирэ пхувья́тыр.

16. Сыр ёй дыкхця́ лэн, и ёй сы́гэс потырдыяпэ кэ ёнэ, бичхадя́ кэ ёнэ кэ Халдея выкэдынэ́ бичхадэн, соб (кай) тэ кхарэ́н лэн.

17. Явнэ́ кэ ёй Вавилоно́скирэ тэрнэ́ мурша́ пэ ла́киро чхуибэ́н, магирдэ́ ла пэ́скирэ биладжакунэ́ рэндоса, ёй магирдя пэс лэ́нца и дурия лэ́ндыр ла́киро ило́.

18. Ке́ли ж ёй откэрдэ́с (явнэс) лыя́ тэ кэрэ́л пэ́скиро биладжакиро рэ́ндо, и отчхакирдя́ пэ́скиро нангипэ́н, тэ́ньчи отгия́ ла́тыр Миро ило́, сыр отгия́ Миро ило́ ла́кирэ пхэнятыр.

19. Ёй ишчо (инкэ́) бутэды́р кэрэ́лас пэ́скиро биладжакуно рэ́ндо, сыр пририпирлас пэ́скирэ тэрнэ́ бэрша́, ке́ли кэрдя́ биладжакуно рэ́ндо пэ Египто́скири пхув.

20. Пал-дова́ со ёй тырдэласпэ кэ пэ́скирэ камлытка, конэ́стэ сыс сыр ослэнгири лоч (плоть), конэ́стэ сыс баро́ на́лачхо камибэн, сыр ґэнштостэ.

21. Адя́кэ ту пририпирдян тыро́ на́лачхо камибэн дрэ тырэ́ тэрнэ́ бэрша́, ке́ли Египтя́ни чилавэнас тут пал тырэ́ патывалэ́-чхакирэ колына.

22. “Палдава́, Оголива́е, адя́кэ ракирэ́ла Рай Дэвэ́л, Дэвэ́л: ‘Акэ, Мэ ґазда́ва пэ ту́тэ тырэ́ камлэн, савэ́ндыр ту кокори дуриян, Мэ скэда́ва лэн пэ ту́тэ сарэ́ ригэ́ндыр.

23. Вавилоно́скирэ тэрнэ́ муршэ́н и сарэ́н Халдеен: Пеходостыр, Шоатыр и Коатыр, а лэ́нца – сарэ́ Асуроскирэ манушэ́н, гожонэ тэрнэ́ муршэ́н, округакирэ барыдырэ́н, тхэмэ́скирэ барыдырэ́н, ран халадэнгирэн, барвалэ́ манушэ́н и славутнонэ, сарэ́н, кон кучэс традэлас уклисто (уклистэ́).

24. Ёнэ явэ́на пэ ту́тэ курталэнца, грэнца, марибнытконэ́ вурдэнэнца, манушэ́нгирэ бутыпнаса; ёнэ явэ́на пэ ту́тэ трусця́л дро марибны́тко урибэ́н, саструнэ́ шчытэнца и дрэ шлёмы, и Мэ отда́ва тут лэ́нгэ пэ сэ́ндо, и явэ́на ёнэ тэ сэндякирэн тут пэ́скирэ сэндоса.

25. И Мэ ява́ва тэ зэвлынав тут; ёнэ явэ́на тэ кэрэ́н ту́са барэ́ холя́са, отчингирэна тыро́ накх и кана́, а саро́ тыро́ яви́р пэрэ́ла куртала́тыр, ёнэ залэна тырэ́ чхавэ́н и тырэ́ чхае́н, а саро́ тыро́ яви́р, со ячэ́лапэ, хачкирэна яга́са;

26. и ёнэ злэна ту́тыр тыро́ урибэ́н, залэна тырэ́ шукарьякирибэна куч-барорэ.

27. Мэ кэра́ва адя́кэ, со ту пириячэс тэ кэрэ́с тыро́ биладжакиро грэ́хо, и тырэ́ биладжакунэ́ рэ́нды, савэ́ ту яндян Египто́скирэ пхувья́тыр, со ту на рисёса кэ ёв тырэ́ якхэ́нца, ту на явэ́са тэ рипирэс бутэды́р пал Еги́пто.

28. Пал-дова́ со адя́кэ ракирэ́ла Рай Дэвэ́л, Дэвэ́л: ‘Акэ, Мэ отда́ва тут дрэ васта́ кодолэнгирэ, конэ́с ту зоралэ́с на камэ́са дрэ васта́ кодолэнгирэ, конэ́стыр отгия́ тыро́ ило́.

29. Ту дыкхэ́са лэ́нгири бари холы́, ёнэ залэна ту́тыр саро́ миштыпэ́н, пал саво́ ту пхарэ́с кэрдя́н буты́, ёнэ мэкэ́на тут, со ту явэ́са нанги, научхакирды. И явэ́ла откэрдо тыро́ нангипэ́н, тыро́ биладжакуно рэ́ндо, тыро́ биладжакиро грэ́хо.

30. Ѓа́да, ёнэ кэрэ́на ту́са адя́кэ колэ пал тырэ́ биладжакунэ́ рэ́нды Наюдытконэ́ нацыенца, конэскирэ идолэнца ту магирдян пэс.

31. Ту псирэсас тырэ́-пхэнякирэ дромэ́са, палдава́ Мэ да́ва ту́кэ дро васт ла́киро тахта́й (чаша).’

32. Адя́кэ ракирэ́ла Рай Дэвэ́л, Дэвэ́л: “Ту явэ́са тэ пьес тырэ́-пхэнякиро тахта́й, хор и буґло́, и явэ́на тэ санпэ ту́тыр, ту лэ́са ладж пэ пэ́стэ, пал-дова́ со баро́ исын дава́ тахта́й!

33. Ту явэ́са сыр маты тугатыр, тахтастыр, кай исын дар и чорорипэн, ґа́да, исын тырэ́ – пхэнякирэ Самариякиро тахта́й!

34. Ту явэ́са тэ пьес, и допьеса саро́, со явэ́ла дрэ лэ́стэ; розмардо тахта́й ту чилавэса тырэ́ уштэ́нца, ту росчхинэса тыро́ колы́н, пал-дова́ со Мэ пхэндём дава́, – ракирэ́ла Рай Дэвэ́л, Дэвэ́л.

35. Палдава́ адя́кэ ракирэ́ла Рай Дэвэ́л, Дэвэ́л: ‘Пал-дова́ со ту бистырдян Ман, рискирдян тыро́ думо́ пэ Ма́ндэ, мэк тэ явэ́л ту́тэ биба́хт пал тыро́ тырдыпэ́н кэ грэ́хо, пал тырэ́ биладжунэ рэ́нды.’”

36. И пхэндя́ ма́нгэ Рай Дэвэ́л, Дэвэ́л: “Манушэ́скиро чхава! Камэ́са ту тэ сэндякирэс Огола и Оголива? Пирипхэн лэ́нгэ лэ́нгиро джунгалыпэ́н (брыткима).

37. Пал-дова́ со ёнэ кэрэ́нас биладжаипэ́н, и рат исын пэ лэ́нгирэ васта́: ёнэ кэрэ́нас биладжаипэ́н пэ́скирэ идолэнца, и аж янэ́нас сыр свэ́нто дыибэ́н пэ́скирэ чхавэ́н, савэ́н ёнэ бияндлэ (лотькирдэ) ваш Ма́нгэ, и чхувэ́нас лэн дрэ яг, соб (кай) и́долы тэ хан лэн.

38. Акэ, со ёнэ кэрэ́нас: ёнэ магирэнас Миро свэ́нто штэ́то пэ кодова́ жэ дывэ́с, ёнэ пхагирэнас Мирэ́ са́ваты.

39. Пал-дова́ со, ке́ли ёнэ мулякирэнас пэ́скирэ чхаворэ́н ваш лэ́нгирэ и́долы, пэ кодова́ жэ дывэ́с явэ́нас ёнэ пэ Миро свэ́нто штэ́то, соб (кай) тэ магирэ́н лэс, акэ, сыр ёнэ кэрэ́нас машкира́л Миро кхэр!

40. И ишчо (инкэ́): ёнэ бичхавэнас пал муршэндэ, савэ́ дживэ́нас дур, бичхавэнас пал лэ́ндэ пэ́скирэ дынарье́н. Акэ, явнэ́ кадалэ́ мурша́, ту ваш лэ́нгэ выморэсаспэ, макхэсас тырэ́ якха́, урьесас шука́р урибэ́н.

41. Бэшэсас ту пэ рангиро чхуибэ́н (пасиндлы), анги́л саво́ сыс скэдыно́ сками́нд, пэ савэ́ ту дэсас лэ́нгэ Миро куч тхувипэн дрогонэ́ смолэндыр, Мири́ зан бутэ́-манушэ́нгири и оливи́тко дзэт.

42. Сыс шундлы зан народоскири, саво́ радынэнаспэ бидумакирэс ла́тэ; кэ кодолэ́ мануша́ народо́стыр явэ́нас матымарья чхучэ́ пхувья́тыр; а ёнэ урьенас вастытка (корэ) (браслеты) пэ лэ́нгирэ васта́, а пэ лэ́нгирэ шэрэ́ шука́р короны.

43. Тэ́ньци пхэндём Мэ пал кодолятэ, сави́ пхурия дрэ пэскирэ́ биладжакунэ́ рэ́нды: ‘Ци явэ́на ёнэ дурэды́р тэ кэрэ́н биладжаипэ́н ла́са и ёй лэ́нца?

44. Нэ ўсаекх джа́нас ёнэ кэ ёй, сыр джа́на кэ биладжакири манушны, адя́кэ сыр джа́нас кэ Огола и Оголива, кэ джувля́, кон тырдэлапэ тэ кэрэ́л ладж.

45. Нэ дэвлы́тка мурша́ явэ́на тэ сэндякирэн лэн; сыр джувле́н, савэ́ парудэ ромэскэ, сыр кодолэ́н, савэ́ прочхувэна манушэ́нгиро рат, пал-дова́ со ёнэ исын биладжакунэ́ джувля́, рат исын пэ лэ́нгирэ васта́.

46. Палдава́ адя́кэ ракирэ́ла Рай Дэвэ́л, Дэвэ́л: “Кхарэ́н манушэ́н пэ лэ́ндэ, отдэ́н лэн пэ пхарипэ́н и чорибэн.

47. Манушэ́нгиро скэдыибэ́н домарла лэн барэ́нца, и чингирэла лэн пэ́скирэ курталэнца, ёнэ замарэна лэ́нгирэ чхавэ́н и чхае́н, а лэ́нгирэ кхэра́ хачкирэна яга́са.

48. И Мэ кэра́ва адя́кэ, соб (кай) тэ пириячэн тэ тырдэнпэ тэ кэрэ́н биладжакуно рэ́ндо пэ дая́ пхув, соб (кай) сарэ́ джувля́ тэ сыклён далэ́стыр тэ на кэрэ́н биладжакирэ рэ́нды, сыр тумэ́.

49. А тумэ́ прилэ́на биба́хт пал тумаро́ биладжакиро рэ́ндо пал грэ́хи тумарэ́ идолэнца и тумэ́ и ґалёна, со Мэ сом Рай Дэвэ́л, Дэвэ́л.”

Ezekiel 24:1-27

1. И сыс кэ мэ Ра́скирэ-Дэвлэ́скиро лав, дро еня́то (биекхэ́скиро дэ́што) бэрш, дро дэ́што чхон, пэ дэштонэ-чхонытко дывэ́с дасаво:

2. “Манушэ́скиро чхава! Зачхин пэ́скэ сыр кхарэлпэ дава́ дывэ́с, дро кадава́ дывэ́с Вавилоно́скиро кра́ли явэ́ла тэ обджал трусця́л халадыбнаса Ерусалимо.

3. Пхэн притча (сыкаибэ́н) кхэрэ́скэ, кай на кандэ́на никонэ́с, пхэн лэ́нгэ: ‘Адя́кэ ракирэ́ла Рай Дэвэ́л, Дэвэ́л: “Чхув пири́ (кака́ви), чхув, чхув одори́к пани́.

4. Чхув одори́к котэра́ масытка, сарэ́ фэдэды́р котэра́, кумпёскирэ и псикэскирэ фэды́р кокалы́ чхув пхэрдэ́с.

5. Выкэдэ лачхэ́ бакрэ́н стадатыр, хачкир яг пэ кокалы́, кэра́в ваш хабэ́н мас адя́кэ, соб (кай) кокалы́ тэ явэ́н ковлэ́.’

6. Палдава́ адя́кэ ракирэ́ла Рай Дэвэ́л, Дэвэ́л: “Бида фороскэ, кай чхувэ́лапэ рат, би́да какавьякэ (пирьякэ), сави́ обхачия и савья́тыр обхачкирдо штэ́то на зджа́ла! Вычхурдэн ла́тыр котэ́р пир котэ́р, на выкэдэ лэ́ндыр пир жре́биё.

7. Пал-дова́ со рат исын машки́р фо́ро, ёв ячадя лэс пэ са́мо нанги бэ́рга, на чхудя́ лэс пэ пхув, соб (кай) пра́хо тэ учхакирэл рат,

8. соб (кай) тэ ґаздэлпэ холямипэн тэ кэрэ́л заводо (тэ отхал палэ) пэ фо́ро, Мэ ячадём лэ́скиро рат пэ са́мо нанги бэ́рга, соб (кай) ёв тэ на учхакирэлпэ.

9. Палдава́ адя́кэ ракирэ́ла Рай Дэвэ́л, Дэвэ́л: “Бида фороскэ, кай чхувэ́лапэ рат! Мэ росхачкирава барэды́р яг.

10. Чхув вучэды́р кашта́, росхачкир яг, кэра́в мас; мэк саро́ тэ выкэравэлпэ, и мэк кокалы́ тэ пирихачон.

11. А ке́ли пири́ (кака́ви) явэ́ла чхучи́, то чхув ла пэ вангара, соб (кай) ёй тэ ростатькирэлпэ, соб (кай) тэ ростатькирэлпэ лэ́скири харко́ма, савья́тыр исын кэрды пири́, соб (кай) тэ розбилавэлпэ саро́ пирьякиро нажужыпэн, соб (кай) тэ на явэ́л дрэ пири́ обхачкирдэ штэ́ты.

12. Ѓа́да, явэ́ла пхари́ буты́ ваш ла́кэ; нэ пирьякиро нажужыпэн на зджа́ла ла́тыр, и дрэ яг усае́кх ёв ячэ́лапэ.

13. Дро тыро́ нажужыпэн исын тырдыпэ́н тэ кэрэ́л джунгалыпэ́н, нэ пал-дова́, со Мэ жужакирдём тут, а ту усае́кх сан нажужо. Ко́ли вычхувава Мэ пэ ту́тэ саро́ Миро холямипэн, тэ́ньчи ту явэ́са жужакирды.

14. Мэ сом Рай Дэвэ́л, Дэвэ́л, Мэ ракира́ва: кадава́ саро́ явэ́ла, и Мэ кэра́ва со трэй. Мэ на обрикирава Пэс, Мэ на потангинава, Мэ на пожалинава. Пир тырэ́ дрома́, пир тырэ́ рэ́нды явэ́на тэ сэндякирэн тут”, – ракирэ́ла Рай Дэвэ́л, Дэвэ́л.

15. И сыс кэ мэ Ра́скирэ-Дэвлэ́скиро лав, пхэни́:

16. “Манушэ́скиро чхава! Акэ, Мэ отлава ту́тыр дова́, со́стыр тырэ́ якха́ радынэ́напэ, тыри́ бахт фуяса (язваса), нэ ту на тангинэ, на ров, мэк тэ на чхувэнпэ тырэ́ ясва.

17. Пириджив саро́ дава́ дрэ пэ́стэ пхарэ́ деса, на ров пал ромня́тэ, нэ обпхандэ тыро́ шэро́, ури тырэ́ тривики, на закэр тырэ́ ушта́, на ха маро́ чужонэ́ манушэ́ндыр.”

18. И ке́ли ракиравас мэ тася́рлэс (ра́нэс) лав кэ мануша́, мыя́ бэльвэле́ мири́ ромны́, и пэ яви́р дывэ́с Мэ кэрдём адя́кэ, сыр сыс припхэндло.

19. И пхэндя́ ма́нгэ народо: “Ци пхэнэ́са ту амэ́нгэ, со сарэ́ кодолэ́ колэ сыкавэ́на амэ́нгэ, и сыр тэ ґалёс амэ́нгэ дова́, со ту кэрэ́са?”

20. Тэ́ньци мэ отпхэндём лэ́нгэ: “Кэ мэ сыс Ра́скирэ-Дэвлэ́скиро лав дасаво:

21. ‘Пхэн Израилёскирэ кхэрэ́скэ: адя́кэ ракирэ́ла Рай Дэвэ́л, Дэвэ́л: ‘Акэ, Мэ отда́ва пэ магирипэ́н Миро свэ́нто штэ́то, саво́ пхэрдэ́с дэ́лас тумэ́нгэ зор, саво́ радынэлас тумарэ́ якха́ и тумаро́ ило́, а тумарэ́ чхавэ́ и тумарэ́ чхая́, савэ́н тумэ́ ячадэ, хасёна куртала́тыр.

22. И тумэ́ явэ́на тэ кэрэ́н дова́, со мэ кэравас: тумэ́ на явэ́на тэ закэрэн чхора (брода), тумэ́ на явэ́на тэ хан маро́ чужонэ́ манушэ́ндыр.

23. Шэро́ тумаро́ явэ́ла обпхандло, тривики явэ́на пэ тумарэ́ ґэра́, тумэ́ на явэ́на тэ тугинэн ясвэ́нца, и на явэ́на тэ ровэ́н, нэ явэ́на тэ шутён тумарэ́ чорипна́стыр, тэ тугинэн ровибнаса екх анги́л явирэ́стэ.

24. А Езекилё явэ́ла ваш тумэ́нгэ сы́рбы ґерты́к (знаме́ниё); саро́, со ёв кэрэ́лас, тумэ́ явэ́на тэ кэрэ́н, и сыр дава́ саро́ кэрэ́лапэ, то тумэ́ ґалёна, со Мэ сом Рай Дэвэ́л, Дэвэ́л.

25. А ту́са, акэ, со явэ́ла, манушэ́скиро чхаво́: дро кодова́ дывэ́с, ке́ли Мэ отлава лэ́ндыр лэ́нгири сла́ва, дова́, со́скэ радынэнаспэ лэ́нгирэ якха́ и лэ́нгиро ди, лэ́нгирэ чхавэ́н и чхае́н:

26. дро дова́ дывэ́с явэ́ла кэ ту ману́ш, саво́ зракхцяпэ одотхы́р, соб (кай) тэ дэл ту́кэ кан;

27. дро кодова́ дывэ́с, ке́ли ту дыкхэсапэ зракхнэ́ манушэ́са, откэрнапэ тырэ́ васта́, и ту явэ́са тэ ракирэ́с, на явэ́са ту буты́р бичибакиро, а явэ́са сыкаибнаса ваш лэ́нгэ, и ёнэ ґалёна, со Мэ сом Рай Дэвэ́л, Дэвэ́л.”

Psalms 127:1-5

1. Гилы́ анги́л Кхангири́. Соломоно́скири. Ко́ли Рай Дэвэ́л тэ на ґаздэл Кокоро́ Кхэр, ивья́ (напра́снэс) тэды кэрэ́нас буты́ одолэ́, савэ́ чхувэ́на лэс; ко́ли Рай Дэвэ́л тэ на ракхэлас фо́ро, тэды стрэгари (охранико), саво́ ракхэ́ла, ивья́ кэрэ́лас дава́.

2. Дава́ тэ явэ́л ивья́ рэ́ндо ваш ту́кэ, со ту уштэса тася́рлэс (ра́нэс), со ту сан бэшто́ кэ коригипэ́н (кэ по́зныма), со ту хаса маро́ палэ пхарэ́ бутя́тыр. Рай Дэвэ́л дэ́ла хабэ́н кодолэ́скэ, савэ́с Ёв камэ́ла, дрэ сунэ́.

3. Акэ, чхавэ́ исын сыр мэкно́ миштыпэ́н Ра́стыр-Дэвлэ́стыр; ёнэ исын бахталыпэ́н да́кирэ лочовя́тыр.

4. Сыр марибны́тка бустя́ (стре́лы) дро халадэскиро васт, адя́кэ-паць исын чхавэ́ тэрнэ́ дадэ́скирэ.

5. Бахтало́ исын ману́ш, савэ́стэ исын бут дасавэ́ бустя́ дро колчано. Ёнэ на явэ́на ладжакирдэ́, ке́ли ёнэ явэ́на тэ хаспэ намалэнца пашы́л по́рта, кай сэнды джа́на.

Proverbs 28:24-24

24. Кон чорэла дадэ́стыр ци датыр и ракирэ́ла: “Дава́ нанэ грэ́хо”, кадасаво́ ману́ш исын дро́го дру́го (мал) кодолэ́скэ, саво́ хасякирэ́ла саро́.

Židenge 11:1-16

1. Патяибэ́н – дава́ исын зорало́ (твардо) джиныбэ́н дро дова́, пэ со амэ́ндэ исын наде́я, со одова́ кэрэ́лапэ пхэрдэ́с, и зорало́ патяибэ́н дро дова́, со исын вари-савэ́ чачипэна́ пэ свэ́то, мэк амэ на дыкхаса лэн,

2. пир дава́ патяибэ́н Дэвэ́л приджиндя допхэныбэ́н амарэ́ годэ́-пхурэ́нгиро.

3. Екхэ́ патяибна́са амэ ґалёваса, со саро́ свэ́то исын создыно́ Дэвлэ́скирэ лавэ́са, и со саро́, со амэ дыкхаса, сыс кэрдо́ долэ́стыр, со нанэ бицяло́.

4. Патяибна́са Авелё яндя́ Дэвлэ́скэ фэдэды́р свэ́нто дыибэ́н, сыр Каино; пир патяибэ́н ёв дорэсця́ допхэныбэ́н Дэвлэ́стыр, со ёв исын чачуно́ ману́ш, ке́ли Дэвэ́л ракирдя́ пал лэ́скиро свэ́нто дыибэ́н и пир Пэ́скиро патяибэ́н, сыр и англэды́р, Авелё ракирэ́ла амэ́нгэ, мэк ёв ужэ мыя́.

5. Патяибна́са Енохо сыс лыно́ пэ болыбэ́н, и ёв на дыкхця́ мэрибэ́н, и лэс нико́н на могиндя́ тэ латхэл, пал-дова́ со Дэвэ́л лыя́ лэс. Нэ анги́л, сыр Дэвэ́л лыя́ лэс, ёв дорэсця́ допхэныбэ́н, со ёв кэрдя́ кучэс Дэвлэ́скэ.

6. Нэ нашты́ тэ кэрэ́с кучэс Дэвлэ́скэ би патяибнаскиро, пал-дова́ со трэй, соб (кай) ману́ш, саво́ явдя́ кэ Дэвэ́л тэ патял, со Ёв и ваш одолэ́нгэ, кон родэ́ла Лэс, Дэвэ́л отдэ́ла лачхипна́са.

7. Патяибна́са Ноё дорэсця́ подракхибэн пал дова́, со на сыс джиндло́ ни конэ́скэ; ёв свэнтонэ́ дара́са кэрдя́ ковчэго и зракхця́ пэ́скири сэ́м΄я (ири́). Патяибна́са ёв сэндиндя свэ́то, и Дэвэ́л приґалыя лэс чачипнаскирэ чхавэ́са пал лэ́скиро патяибэ́н.

8. Патяибна́са Авраа́мо, саво́ сыс кхардо тэ кандэл и сыс бичхадо́ тэ джал пэ дова́ штэ́то, пал саво́ сыс лэ́скэ дыно́ лав тэ дорэсэл паш; ёв гия́ и на джиндя́, карик ёв джа́лас.

9. Патяибна́са ёв лыя́ тэ лодэл сыр явирэ – ригакиро ману́ш пир пхув, пал сави́ Дэвэ́л дыя́ лав лэ́скэ; и ёв дживдя́ шатрэ́нца Исаакоса и Яковоса, савэ́нгэ адя́кэ-паць сыс дыно́ лав тэ дорэсэн паш кхэтанэ́;

10. ёв ужакирдя фо́ро, саво́ сыс банго́ (мусиндя) тэ явэ́л пэ зорало́ фунда́менто, савэскиро Дэвэ́л Кокоро́ явэ́ла архитекторо и явэ́ла тэ кэрэ́л лэс.

11. Патяибна́са Саара, савьятэ на сыс чхаворэ́, сави́ адя́кэ-паць дорэсця́ састыпэн, соб (кай) тэ явэ́н чхаворэ́ ла́тэ, бияндя́ тэл пхурипэн, пал дова́ со ёй допатяндыя Одолэ́скэ, Кон дыя́ лав.

12. Палдава́ екхэ́ кадалэ́ Авраамостыр, саво́ сыс пхуро́ кэ мэрибэ́н тэ явэ́л дадэ́са, бия́ндынэ ада́кицы бут мануша́, ада́кицы ци бут исын чэргэня́ пэ болыбэ́н и сыр нашты́ тэ гинэс саро пра́хо пэ морёскиро (дэрьявэ́скиро) брэ́го.

13. Сарэ́ кадалэ́ мануша́ мынэ́ патяибна́са, ёнэ на дорэснэ́ дова́, пал со Дэвэ́л дыя́ лав лэ́нгэ, ёнэ дыкхнэ́ саро́ дава́ дура́л и пхэндлэ́ “рама́нё” (миро) долэ́скэ и приджиндлэпэ, со ёнэ сыс чу́жа мануша́ и лодэна пир доя́ пхув.

14. Пал-дова́, со одолэ́ мануша́, савэ́ ракирэ́на адя́кэ, сыкавэ́на, со ёнэ родэ́на пэ́скиро тхэм (отечэство).

15. И ко́ли ёнэ пририпирэнас пэ́скэ пал дова́ тхэм, савэ́стыр ёнэ выгинэ́, лэ́ндэ явэ́лас часо одори́к тэ рисён;

16. нэ ёнэ какана́ зоралэ́с мангэна фэдэды́р тхэм, саво́ исын дро Болыбна́скиро Раё, палдава́ Дэвлэ́скэ нанэ ладжаво, ке́ли ёнэ кхарэ́на Лэс пэ́скирэ Дэвлэ́са; пал-дова́ со Ёв приготовиндя фо́ро ваш лэ́нгэ.

Romani Bible Baltic 2019

Maintained by the United Bible Societies for the Baltic Romani Mission