Bible in one year November 17Ezekiel 25:1-171. И сыс кэ мэ Ра́скирэ-Дэвлэ́скиро лав дасаво:2. “Манушэ́скиро чхава! Рисёв тырэ́ мо́са пэ Амоноскирэ чхавэ́ндэ, ра́кир пэ лэ́ндэ ангилпхэныбэ́н.3. Пхэн Амоноскирэ чхавэ́нгэ: ‘Шунэ́н Ра́скирэ-Дэвлэ́скиро лав: адя́кэ ракирэ́ла Рай Дэвэ́л: ‘Ко́ли ту ракирэ́са пал Миро свэ́нто: “А!”, палдова́ со ёв исын магирдо́, ракирэ́са пал Израилёскири пхув, пал дова́, со ёй исын чхучи́, ракирэ́са пал Юда́скиро кхэр, пал дова́ со лэн традынэ дрэ наволя,4. палдава́, акэ, Мэ отда́ва тут чхавэ́нгэ, савэ́ явэ́на вастоко́стыр сыр миштыпэ́н; ёнэ явэ́на тэ кэрэ́н ту́тэ пэ́скирэ бакрэ́нгирэ гражы (загоны), ёнэ чхувэ́на ту́тэ пэ́скирэ ша́тры, – и явэ́на тэ хан Тыро́ хабэ́н, явэ́на тэ пьен тыро́ тхуд.5. Мэ кэра́ва адя́кэ, со дрэ Рава явэ́ла шта́ла ваш верблюдэнгэ, а Амоноскирэ чхавэ́ явэ́на тэ чаравэн бакрэ́н. И тэ́ньчи тумэ́ галёна, со Мэ сом Рай Дэвэ́л, Дэвэ́л.’6. Адя́кэ ракирэ́ла Рай Дэвэ́л, Дэвэ́л: пал дова́, со ту марэсас дрэ васта́, штавэсас ґэрэ́нца, радынэсаспэ илэ́са, со на камэсас тэ дыкхэ́с пэ Израилёскири пхув,7. палдава́, акэ, Мэ протырдава кэ ту Миро васт, Мэ кэра́ва адя́кэ, соб (кай) тэ обчорэн тут Наюды́тка на́цыи, Мэ чхурдава криг тут сарэ́ манушэ́ндыр, вычхинава тут пхувьенгиро гиныбнастыр, роспхагирава тут и ту ґалёса, со Мэ сом Рай Дэвэ́л, Дэвэ́л.”8. Адя́кэ ракирэ́ла Рай Дэвэ́л, Дэвэ́л: “Пал-дова́ со Моа́во и Сеиро (Эдо́мо) ракирэ́на: акэ, Юда́скиро кхэр яця́ дасаво, сыр сарэ́ народы (манушы́тка на́цыи),9. то пал дава́ Мэ ла́ва тэ кэра́в форье́ндыр, сарэ́ лэ́скирэ форье́ндыр, савэ́ исын пашы́л ме́жа (граница), пхувья́киро шукарибнастыр, Бен-Ешымофостыр, Ваал-Меоностыр и Кириафаимостыр, и Мэ откэрава Моавоскири риг,10. ваш манушэ́нгэ, савэ́ явнэ́ вастоко́стыр, Мэ отда́ва лэс лэ́нгэ кхэтанэ́ Амоноскирэ манушэ́нца, соб (кай) тэ на рипирэ́н бутэды́р Амоноскирэ манушэ́н машки́р народы.11. И Мэ ява́ва тэ сэндякирав Моа́во, и ёнэ ґалёна, со Мэ сом Рай Дэвэ́л, Дэвэ́л.’”12. Адя́кэ ракирэ́ла Рай Дэвэ́л, Дэвэ́л: ‘Пал-дова́ со Эдо́мо холя́са ґаздыя́пэ пэ Юда́скиро кхэр, и кэрдя́ баро́ грэ́хо, ке́ли отхалас холы́ пэ лэ́стэ.13. Палдава́ адя́кэ ракирэ́ла Рай Дэвэ́л, Дэвэ́л: “Мэ протырдава Миро васт кэ Эдо́мо, Мэ хасякира́ва лэ́стэ манушэ́н и мурдалэ́н; Мэ кэра́ва лэ́стыр чхучи́ пхув; дро Фемано, дро Дедано, сарэ́ пэрэ́на куртала́тыр.14. Мэ отхава холы́ пэ Эдо́мо Мирэ́ народоскирэ, Израилёскирэ вастэ́са; ёнэ явэ́на тэ кэрэ́н дрэ Идумея пир Мири́ холы́ и Миро холямипэн, и ёнэ ґалёна, сыр Мэ выродава лэ́ндыр,” – ракирэ́ла Рай Дэвэ́л, Дэвэ́л.15. Адя́кэ ракирэ́ла Рай Дэвэ́л, Дэвэ́л: “Палдова́, со Филистимля́ни ґаздэнаспэ пэ лэ́ндэ холя́са, на гинэнас лэн дрэ пэ́скиро ило́ пал манушэ́ндэ, тэ хасякирэ́н лэн пир ґаратуно накамибэн тэ дыкхэ́н пэ лэ́ндэ,16. палдава́, адя́кэ ракирэ́ла Рай Дэвэ́л, Дэвэ́л: А́кэ, Мэ протырдава Миро васт кэ Филистимля́ни, Мэ хасякира́ва Критянэн, хасякира́ва пэ морёскиро (дэрьявэ́скиро) брэ́го лэ́нгиро ячаибэ́н (остатко).17. Мэ отхава бари холы́ пэ лэ́ндэ и барэ́ холя́са выродава лэ́ндыр, – и ёнэ ґалёна, со Мэ сом Рай Дэвэ́л, Дэвэ́л, ке́ли Мэ выродава лэ́ндыр.’”Ezekiel 26:1-211. И сыс адя́кэ дро дэшуекхто бэрш, дро пэ́рво чхон, пэ пэ́рво чхонытко дывэ́с, со сыс кэ мэ Ра́скирэ-Дэвлэ́скиро лав:2. “Манушэ́скиро чхава! Палдова́, со Ти́ро ракирэ́ла пал Ерусалимо: ‘А! Ёв исын роспхагирдо – народэнгиро вуда́р; ёв обрисёла кэ мэ; мэ пхэрдякиравапэ, ёв исын чхучо́ (пусто).’3. Пал дова́, – адя́кэ ракирэ́ла Рай-Дэвэ́л, Дэвэ́л – акэ, Мэ сом проти ту́тэ, Ти́ро, Мэ ґазда́ва пэ ту́тэ бут на́цыи, сыр мо́рё (дэрья́в) ґаздэ́ла пэ́скирэ валны (вэлны).4. И ёнэ розмарна Тироскирэ ва́нты (сцяны), и роспхагирэна лэ́скирэ вучардя (башни) и Мэ вышулавава лэ́стыр лэ́скиро пра́хо, кэра́ва Лэ́стыр нанги бэ́рга.5. Ёв явэ́ла машки́р мо́рё (дэрья́в) штэтоса, кай росчхувэна кхудя, пал-дова́ со Мэ пхэндём дава́, – ракирэ́ла Рай Дэвэ́л, Дэвэ́л, лэс обчорэна яви́р народы.6. Лэ́скирэ чхае́н, савэ́ исын пэ фэ́лда, – мулякирэна куртала́са, – и тэ́ньчи ґалёна, со Мэ сом Рай Дэвэ́л, Дэвэ́л.”7. “Адя́кэ ракирэ́ла Рай Дэвэ́л, Дэвэ́л: “А́кэ, Мэ яна́ва пэ Ти́ро паш-ратятыр Навуходоносорос, Вавилоно́скирэ крали́с, кральенгирэ крали́с; Мэ яна́ва лэс грэнца, марибнытконэ́ вурдэнца, манушэ́нца, савэ́ традэ́на уклистэ́, халадыбнаса бутэ́ манушэ́нца.8. Тырэ́ чхае́н пэ фэ́лда ёв мулякирэ́ла куртала́са, кэрэ́ла марибны́тка туры, чхувэ́ла вало проти ту́тэ, явэ́ла пэ ту́тэ марибна́са.9. Ёв чхувэ́ла марибны́тка тараны тэ роспхагирэл тырэ́ ва́нты, роспхагирэла тырэ́ туры пэ́скирэ товэрэнца.10. Лэ́скирэ-грэнгирэ бутыпнастыр ту учхакирэсапэ прахоса, ке́ли зашуминэна лэ́скирэ мануша́, савэ́ традэ́на уклистэ́, ротэндыр и марибнытконэ́ вурдэнэндыр, то лэ́на тэ издран тырэ́ ва́нты, сыр ёв заджа́ла дрэ тырэ́ по́рты (вра́ты), сы́рбы заджа́на мануша́ дро розмардо фо́ро.11. Пэ́скирэ грэнгирэ пэталэнца ёв пириштавэла сарэ́ Тырэ́ вули́цы (га́сы); тырэ́ манушэ́н ёв мулякирэ́ла куртала́са; рипирибэ́н трэ зоралэ́ стылбэндыр ёв чхурдэ́ла пэ пхув.12. Ёнэ росчорэна тыро́ барвалыпэ́н, дова́, со ту бикнэсас, ёнэ роспхагирэна пэ котэра́ (куски) тырэ́ ва́нты, розмарна тырэ́ гожа кхэра́, тырэ́ бара́, тыро́ вэш, тыри́ пхув чхурдэна дро пани́.13. Мэ кэра́ва адя́кэ, со ту на явэ́са тэ багас бутэды́р Тырэ́ гиля́, на явэ́ла шундло, соб (кай) ту башавэсас пэ луты (цытры).14. Мэ кэра́ва ту́тыр нанги бэ́рга; ту явэ́са сыр штэ́то, кай розчхувэна кхудя (сети), ту на чхувэ́са бутэды́р тырэ́ кхэра́, пал-дова́ со Мэ, Рай Дэвэ́л, Дэвэ́л, пхэндём кадава́”, – ракирэ́ла Рай Дэвэ́л, Дэвэ́л.15. Адя́кэ ракирэ́ла Рай Дэвэ́л, Дэвэ́л Тироскэ: “Тырэ́ пэрибнаскирэ шуминыбнастыр, манушэ́нгирэ роибнастыр, ке́ли явэ́на тэ мулякирэ́н машки́р ту́тэ, ци на явэ́на тэ издран островы?16. Зджана сарэ́ морёскирэ (дэрьявэ́скирэ) тхага́рья пэ́скирэ тронэндыр, злэна пэ́стыр лэ́скирэ урибэна́, злэна пэ́стыр розсудэ ризы, нэ ёнэ урьенапэ дара́са, бэшэна пэ пхув, явэ́на тэ издран, явэ́на тэ дивинэнпэ трашаса пал ту́тэ.17. И ёнэ ґаздэ́на роибэ́н пал ту́тэ, ёнэ пхэнэ́на ту́кэ: “Сыр хасиян ту фо́ро, кай дживэ́нас мануша́, савэ́ традэнас пиро́ мо́рё (дэрья́в), славу́тно фо́ро, саво́ сыс зорало́ пэ мо́рё (дэрья́в), сыс зорало́ ёв кокоро́ и лэ́скирэ мануша́, конэ́стыр сарэ́ дарэнас!18. Какана́, дро дывэ́с, ко́ли ту пыян, издрандынэ островы; островэнгэ пэ мо́рё (дэрья́в) яця́ пхаро́ пал тыро́ хасибэ́н.’”19. Адя́кэ ракирэ́ла Рай Дэвэ́л, Дэвэ́л: “‘Ко́ли Мэ кэра́ва ту́тыр чхучо́ фо́ро, сыр фо́рья, кай нико́н на дживэ́ла, ке́ли ґазда́ва Мэ пэ ту́тэ морёскиро (дэрьявэ́скиро) хорипэ́н, то учхакирэна тут барэ́ валны.20. Тэ́ньци Мэ яна́ва тэлэ́ тут кхэтанэ́ кодолэнца дрэ маґила, кэ народо, саво́ сыс ґара́, Мэ чхурдава тут дро пхувья́киро хорипэ́н, дрэ вечна чхучэ́ пхувья́ хор тэл пхув мулэ́ манушэ́нца, соб (кай) ту тэ на дживэ́с буты́р; и сыкава́ва Мэ барипэ́н пэ пхув, кай исын джидэ́.21. Мэ кэра́ва ту́тыр траш, на явэ́ла тут бутэды́р; мэк и явэ́на тэ родэ́н тут, нэ на латхэ́на николи,” – ракирэ́ла Рай Дэвэ́л, Дэвэ́л.Psalms 128:1-61. Гилы́ анги́л Кхангири́. Бахтало́ исын кажно ману́ш, Саво́ дарэ́ла Ра́стыр-Дэвлэ́стыр, Саво́ псирэ́ла пир Лэ́скирэ дрома́.2. Ту явэ́са тэ хас маро́ бутя́тыр пэ́скирэ вастэ́ндыр, ту явэ́са бахтало́ и саро́ миштыпэ́н явэ́ла ту́са.3. Тыри́ ромны́ явэ́ла сы́рбы умалотно винаграды́тко кашт дро кхэр и пашы́л кхэр, тырэ́ чхавэ́ явэ́на сы́рбы оливитка рандя́ (ветки), со явэ́на трусця́л Тыро́ сками́нд.4. Ѓа́да! Тэ явэ́л адя́кэ-паць бахтало́ ману́ш, Саво́ дарэ́ла Ра́стыр-Дэвлэ́стыр.5. Рай Дэвэ́л бахтякирэ́ла Тут Сионо́стыр, и ту сашты́ тэ дыкхэ́с лачхипэ́н дро Ерусалимо пир сарэ́ дывэса́ дро Тыро́ джиибэ́н,6. и соб (кай) ту тэ дыкхэ́с чхавэ́н пэ́скирэ чхавэнгирэн. Тэ явэ́л рама́нё (миро) пэ Израилё!Proverbs 28:25-2525. Пхутькирдэ́-илэ́скиро ману́ш выкхарэла кошыбэ́н, нэ кон зоралэ́с патя́ла дрэ Растэ-Дэвлэ́стэ, кодолэ́скэ явэ́ла миштыпэ́н.Židenge 11:17-4017. Патяибна́са Авраа́мо яндя́ Исаакос дро свэ́нто дыибэ́н, ке́ли Дэвэ́л пропатякирэлас лэс; Дэвэ́л дыя́ лав и ёв скэдыяпэ тэ янэл дро свэ́нто дыибэ́н пэ́скирэ екхорэ чхавэ́с;18. пал савэ́стэ сыс пхэндло́: “Исаакостыр явэ́ла тэ джал дурэдыр тыро́ ро́до”;19. ёв думиндя пэ́скэ, со Дэвлэ́стэ исын зор и мулэ́ндыр тэ отджидякирэл лэ́скирэ чхавэ́с, и сы́рбы Авраа́мо дорэсця́ лэс палэ.20. Патяибна́са Исаа́ко бахтякирдя́ Яково́с и Исавос.21. Патяибна́са Яково анги́л, сыр тэ мэрэ́л, бахтякирдя́ Ёза́скирэ (Иосифо́скирэ) чхавэ́н, тэрдия́ пэ чанга́ и помангдяпэ Дэвлэ́скэ, ке́ли рикирдяпэ пал пэ́скиро дэсто́.22. Патяибна́са, со явэ́ла анги́л, Ёза анги́л пэ́скиро мэрибэ́н пририпирэлас Израилёскирэ чхавэ́нгэ пал выгиибэн Египто́стыр и припхэндя́, со тэ кэрэ́н лэ́скирэ кокалэнца.23. Патяибна́са Мойза́скирэ дада́ гаравэнас лэс трин чхона́ пало́ лэ́скиро бияныпэ́н, пал-дова́ со ёнэ дыкхнэ́, со ёв сыс шука́р, и ёнэ на дара́ндынэ крали́скиро припхэныбнастыр.24. Патяибна́са Мо́йза, ке́ли яця́ баро́, отпхэндяпэ тэ кхарэлпэ Фараоно́скирэ-чхакирэ чхавэ́са;25. и выкэдыя́ фэдэды́р тэ пирилыджал мэ́ньки (муки) Дэвлэ́скирэ манушэ́нца, сыр лэ́стэ тэ явэ́л бахт пэ набаро́ часо грэхоса,26. и холямо́ сабэн пал/пэ Месия́стэ (Христосо́стэ), саво пыя пэ Лэстэ коригэды́р (позжэды́р), ёв гиндя ваш пэ́скэ дрогэдыр сарэ́ Египто́скирэ кучипна́стыр, пал-дова́ со ёв дыкхця́ надея́са, со лэс ужакирэ́ла отдыибэ́н Дэвлэ́стыр.27. Патяибна́са ёв гия́ Египто́стыр и на дарандыя крали́скирэ холя́тыр; ёв вырикирэлас дурэды́р саро́, пал-дова́ со ёв дыкхця́ анги́л пэ́стэ Одолэ́с, Кон на сыс бицяло́.28. Патяибна́са ёв свэнкиндя Патради́ и обмакхця ратэ́са вударэнгирэ касяки, соб (кай) Мэрибнытко янго́ло, саво́ мулякирэлас пэрвонэ́ биятэ́н, тэ на чилавэл лэн.29. Патяибна́са ёнэ пиригинэ́ Лоло́ мо́рё (дэрья́в), сыр пир шуки́ пхув; и ке́ли Египто́скирэ мануша́ спробиндлэ адя́кэ-паць тэ пириджан мо́рё (дэрья́в), ёнэ тасадынэ.30. Патяибна́са пынэ́ Ерихоноскирэ ва́нты пало́ (после) дова́, сыр мануша́ обджанас трусця́л фо́ро пал эфта́ дывэса́.31. Патяибна́са Раав (Рахаб), биладжакуны джувлы́, на мыя́ кхэтанэ́ одолэ́ манушэ́нца, савэ́ на кандынэ́ Дэвлэ́с, пал-дова́ со ёй прилыя́ Израилёскирэ поддыкхибнаскирэн (чораханэн), сыр пэ́скирэ малэн.32. И со мэ могина́ва буты́р тэ пхэна́в? На ухтылэ́ла (на́доси) ма́нгэ часо, ко́ли мэ ява́ва тэ ракира́в пал Гедеоностэ, Варакостэ, Салосоностэ, Ефаёстэ и Давидо́стэ и Самуилостэ и пал явирэ пророкэ́ндэ:33. савэ́ пэ́скирэ патяибна́са пиризорьякирэнас яви́р кралипэна́, кэрэ́нас пир чачипэ́н, дорэсэнас дова́, пал со Дэвэ́л дыя́ лав лэ́нгэ, пхандэнас муя́ шчэрэ́нгэ (левэнгэ),34. мурдякирэнас барэ́-зорьякири яг, зракхэнаспэ курталакирэ войстрима́тыр (чолыпнастыр); лэ́нгиро бизорьякирибэн кэрдя́ лэн зоралэнца, ёнэ мардэ́пэ зоралэ́с пэ мэрибэ́н и вытрадэнас чужонэ́ халадэ́н, савэ́ явэ́нас марибна́са пэ лэ́ндэ явирэ ригэ́ндыр.35. Джувля́ лэнас палэ пэ́скирэ мулэн, савэ́ сыс отджидякирдэ; яви́р мануша́, савэ́ на закамлэ, соб (кай) лэн тэ отмэкэн кэ во́ля, сыс замэнчиндлэ пэ мэрибэ́н, соб (кай) тэ дорэсэн фэдэды́р отджидякирибэна,36. пэ явирэ манушэ́ндэ сыс холямо́ сабэн, лэн мардэ́ чхупня́са, лэн пхандэнас дрэ састыра́ и чхувэ́нас дро штарибэ́н.37. Лэн домарэнас барэ́нца, пропатякирэнас пэ мэ́ньки тэ пирилыджан, лэн пилинэнас (ризилинэ́нас) пэ дуй паша́; ёнэ мэрэнас куртала́тыр, псирэнас дрэ бакранэ́ и бузны́тка (козы́тка) цы́пи, ёнэ дживдэ́ дро наухтылыбэн, дрэ мэ́ньки; страдындлэ манушэ́ндыр,38. адасавэ́ мануша́, савэ́н саро́ свэ́то на сыс мол, дживдэ́ пэ чхучэ́ прахи, дрэ бэ́рги, пир ґебара́ (пешчэры), пир лошчыны пэ пхув.39. И сарэ́нгэ лэ́нгэ исын лачхо́ допхэныбэ́н пал лэ́нгиро патяибэ́н, нэ ние́кх лэ́ндыр на дорэсця́ дова́, пал со Дэвэ́л дыя́ лав лэ́нгэ.40. Пал-дова́ со Дэвэ́л придуминдя анги́л тэ кэрэ́л ваш амэ́нгэ вари-со фэдэды́р, соб (кай) ёнэ кхэтанэ́ амэ́нца тэ ячэн бидошакирэнца. Romani Bible Baltic 2019 Maintained by the United Bible Societies for the Baltic Romani Mission