Bible in one year November 18Ezekiel 27:1-361. И сыс кэ мэ Ра́скирэ-Дэвлэ́скиро лав дасаво:2. “И ту акана́, Манушэ́скиро чхаво́, ров пал Ти́ро,3. пхэн Тироскэ, Ту, саво́ дживэса машки́р мо́рё (дэрья́в), кон тимисякирэла (таргинэла) народэнца бутэ́ островэндыр” адя́кэ ракирэ́л Рай Дэвэ́л, Дэвэ́л: ‘Ти́ро! Ту ракирэ́са нанэ никонэ́с гожэдыр ма́ндыр!’4. Ме́жы тырэ́ исын дро морёскиро (дэрьявэ́скиро) ило́; кодолэ́, кон кэрэ́лас тут, кэрдэ́ тут гожэдыр шукарипнастыр.5. Сенироскирэ – кипарисонэ каштэндыр кэрдэ́ ёнэ Тыро́ ґэристо (помосто) ёнэ лэнас кедро Ливаностыр, соб (кай) тэ кэрэ́н пэ ту́тэ мачты;6. Васаноскирэ дэмбэндыр кэрэ́нас тырэ́ ровля (вёслы), прэдки (скамейки) тырэ́, кэрэ́нас мануша́ Ашуростыр букитконэ каштэ́стыр, и укэдэнас лэн слонытконэ кокалоса Китимсконэ островэндыр.7. Россудэ похтана (полотны) Египто́стыр мэкэнас пэ тырэ́ балвалунэ́ (па́русы), ёнэ сыс тыро́ сцяго (флаго); синя и лолэ́ тхана (ткани) Елисакирэ островэндыр учхакирэнас тут.8. Мануша́ Сидоностыр и Арвазостыр кэрэ́нас ту́тэ буты́ ровленца (вёслэнца); пэ́скирэ джиныбнарья сыс ту́тэ, Ти́ро, ёнэ лыджа́нас Тырэ́ па́рмы (корабли).9. Пхурыдыра́ Гевалостыр, и лэ́скирэ годэ́ мануша́ сыс ту́тэ, соб (кай) тэ закэрэн пакласа промардэ штэ́ты. Ра́зна па́рмы и лэ́нгирэ кодолэ́ мануша́, савэ́ кэрэ́нас буты́ ровленца, сыс ту́тэ, соб (кай) тэ джал Тыро́ бикныбэн.10. Персияни, Лидияни, Ливийцы сыс дро тыро́ халадыбэ́н; ёнэ сыс марибнаскирэ ту́тэ, ёнэ ублавэнас пэ ту́тэ шчы́то и шлемо; лэ́ндыр ту са́нас баро́.11. Арвадоскирэ мануша́ тырэ́ халадыбнаса сыс тэрдэ́ трусця́л пэ тырэ́ ва́нты, Гамадимы сыс тэрдэ́ пэ тырэ́ вучардя (башни); пэ тырэ́ ва́нты ёнэ ублавэнас пэ́скирэ шчы́ты/колчаны; ёнэ допхэрдякирэнас Тыро́ шукарибэн.12. Фарсисо, Тыро́ тимисяри (торговцо), конэ́стэ сыс баро́ барвалыпэ́н, плэскирэлас пал дова́, со ту бикнэсас, рупэ́са, састырэса, моловиса (свинцоса), волывоса (оловоса).13. Явано (Иавано), Тувало, Мешэхо тимисякирэнас ту́са, парувэнас дова́, со ту бикнэнас, пэ манушэ́ндэ и харкунэ́ пирья.14. Фогармоскирэ кхэрэ́стыр лыджа́нас ту́кэ грэн, ґэнштэн и лошакэн пал дова́, со ту бикнэсас.15. Дедамоскирэ мануша́ тимисякирэнас ту́са; бут островы кэрэ́нас ту́са паруибэн. Ёнэ янэ́нас ту́кэ слонытко кокало и кало́ вэш.16. Куч джа́лас тыро́ бикныбэн; тимисякирэнас ту́са Арамеяни, пал-дова́ со ту бут бикнэсас, ёнэ плэскирэнас ту́кэ эмеральдоса (карбунколоса), лолэ́, розсудэ тханэнца, висонытконэ ризэнца, коралэнца и рубинэнца.17. Юдея и Израилёскири пхув тимисякирэнас ту́са. Палдова́, со ту бикнэсас, плэскирэнас Минифоскирэ парнэ́ гивэса, гудлыпнаса, ягвинэса, каштунэ ксилэса и бальзамоса.18. Куч джа́лас Тыро́ бикныбэн Дамаскоса, конэ́стэ сыс баро́ барвалыпэ́н, ёв бикнэлас ту́кэ Хелбоноскири мол (вино) и парны вы́лна (шэрсь).19. Дано и адя́кэ-паць Явано Узалостыр плэскирэнас ту́кэ, псири одори́к-палэ, пал дова́, со ту бикнэсас, выкэрдэ састырэса; кассия, духмяно тришчына джа́нас пэ паруибэн.20. Дедано тимисякирэлас (кофинэлас) ту́са кучонэ́ цэргэнца (дэкэнца) тэ традэ́н уклистэ́.21. Аравия, сарэ́ Кидароскирэ тхага́рья, парувэнас ту́са: парувэнас бакрорьенца, бакрэнца, бузнэнца (козлэнца).22. Тылгарья (ку́пцы) Саватыр и Раематыр тимисякирэнас ту́са. Кучонэ кхандыпнэнца, разнонэ кучонэ́ барэ́нца и сувнака́са плэскирэнас ту́са пал дова́, со ту бикнэсас.23. Харано, Ханэ́, Едено, Савакирэ тылга́рья, Асуро и Хилмадо тимисякирэнас ту́са.24. Ёнэ тимисякирэнас ту́са кучонэ́ выкэдымэ урибнэнца – пхарунэ и россудэ тханэнца, савэ́ ёнэ янэ́нас пэ тыро́ тарго дрэ куч мохтэ (яшчыки), со сыс кэрдэ́ кедростыр, савэ́ сыс миштэ́с притасадэ.25. Пармы (корабли) Фарсисостыр лыджа́нас саро́, соб (кай) тэ джал Тыро́ бикныбэн; ту яця́н барвало́, розгия́пэ тыри́ сла́ва машки́р мо́рё (дэрья́в).26. Нэ кодолэ́ мануша́, савэ́ кэрэ́нас буты́ пэ ровля пэ ту́тэ, лыджинэ́ тут дро баро́ пани́, нэ васточно балва́л розмардя́ тут машки́р мо́рё (дэрья́в).27. Тыро́ барвалыпэ́н, тырэ́ товары, тырэ́ барэ́ пираля́ (склады) – дова́, со ту ракхэсас; мануша́, савэ́ кэрэ́нас тырэ́ барки (лодки), мануша́, савэ́ закэрэнас тырэ́ промардэ штэ́ты, савэ́ лыджа́нас тыро́ бикныбэн, сарэ́ халадэ́ тырэ́, савэ́ сыс ту́тэ; сарэ́ трэ бут мануша́, кон сыс ту́тэ, дро тыро́ пэрибнаскиро дывэ́с, пэрэ́на дро морёскиро (дэрьявэ́скиро) хорипэ́н.28. Лоцманэнгирэ годлатыр, савэ́ лыджа́нас тырэ́ па́рмы, лэ́ла тэ издрал пхув.29. И зджана пэ брэ́го тырэ́ пармэндыр сарэ́ мануша́, савэ́ гребинэнас ровленца, савэ́ плывинэнас пэ лэ́ндэ, и савэ́ лыджа́нас лэн, штавэна пэ пхув.30. И заровэна пал ту́тэ зоралэ́ заня́са, и явэ́на тэ ровэ́н киркэс пал ту́тэ, чхувэ́на пра́ска (пепло), пэ пэ́скирэ шэрэ́ и явэ́на тэ равэнпэ дро пра́хо.31. Ёнэ обчхинэна пэ́скирэ бала́ сарэ́са пал ту́тэ, урьена пэ пэ́стэ балытка гонэ́ праскаса, и заровэна пал ту́тэ илэ́скирэ дукхатыр барэ́ роибнаса.32. Дрэ пэ́скиро тугипэн (жалость) ёнэ забагана роибнытко гилы́ пал ту́тэ, адя́кэ ёнэ явэ́на тэ обровэнпэ пал ту́тэ: ‘Саво́ сыс фо́ро, сыр Ти́ро, со сыс роспхагирдо машки́р мо́рё (дэрья́в)!’33. Ке́ли явэ́лас морёстыр (дэрьявэстыр) дова́, со ту бикнэсас, то ту чалякирэсас бутэ́ манушэ́н тырэ́ барвалыпнаскирэ бутыпнаса, тырэ́ бикныбнаса ту барвалякирэсас пхувьенгирэ кралье́н.34. А ке́ли тут розмардя́ баро́ пани́ пэ са́мо хорипэ́н, то сарэ́ товары, со ту бикнэсас, саро́; со пхэрдэ́с сыс дрэ ту́тэ, пыя́ дро са́мо хорипэ́н.35. Сарэ́ мануша́, савэ́ дживэ́нас пэ островы, дивиндлэ́пэ трашаса ту́тыр, лэ́нгирэ кра́лья заиздрандынэ, парудяпэ лэ́нгиро муй пхарипнастыр.36. Тимисярья (торговцы) явирэ народэндыр, дынэ́ шоля (свистиндлэ) пал ту́тэ, ту кэрдянпэ сыр траш, и ту на явэ́са тэ дживэ́с бутэды́р.”Ezekiel 28:1-261. И сыс кэ мэ Ра́скирэ-Дэвлэ́скиро лав дасаво:2. “Манушэ́скиро чхава! Пхэн тхагарискэ пэ Ти́ро: адя́кэ ракирэ́ла Рай Дэвэ́л, Дэвэ́л: пал-дова́, со древа́н пхутькирдо яця́ тыро́ ило́, и ту ракирэ́са: “Мэ сом Дэвэ́л, бэшав пэ дэвлы́тко штэ́то дро морёскиро (дэрьявэ́скиро) машкиралыпэн”, пал-дова́ со ту сан ману́ш, а на Дэвэ́л, нэ ту думинэса, со ту сан дасаво годявэр, сыр Дэвэ́л:3. акэ, ту сан годьварэдыр Даниелёстыр, нанэ чораханыбэн, со ту на джинэсас.4. Тырэ́ шэрэ́са, тырэ́ годя́са ту заухтылдян дасаво барвалыпэ́н, и скэдыян пэ́скэ руп и сувнака́й.5. Тырэ́ годя́са, тырэ́ бикныбнастыр, ту кэрдя́н, соб (кай) тэ явэ́л Тыро́ барвалыпэ́н ишчо (инкэ́) бутэды́р, и тыри́ годы́ яця́ тэ пхутёл тырэ́ барвалыпнаса.6. Палдава́ адя́кэ ракирэ́ла Рай Дэвэ́л, Дэвэ́л: “Ко́ли ту думинэса дро пэ́скиро ило́, со ту сан дасаво годявэр, сыр Дэвэ́л,7. то, акэ, Мэ яна́ва пэ ту́тэ манушэ́н явирэ пхувьендыр, савэ́ исын древа́н захалэ; ёнэ выджа́на пэ́скирэ курталэнца пэ тырэ́ – годя́киро шукарибэн, ёнэ магирэна тут, соб (кай) ту на явэс бутэды́р дасаво шука́р райканыткэс, сыр са́нас.8. Ёнэ залыджана тут дрэ маґила и ту мэрэ́са дро морёскиро (дэрьявэ́скиро) ило́, сыр мэрэ́на мулякирдэ́ мануша́.9. Пхэнэса ци ту тэды тырэ́ мулякирибнаскирэскэ: ‘Мэ сом дэвэл’, – ко́ли дрэ лэ́скиро васт, кон мулякирэ́ла, тут ту явэ́са сыр ману́ш, а на сыр дэвэл?10. Ту мэрэ́са наобчхиндлэ-манушэ́нгирэ вастэ́стыр, ту мэрэ́са сыр мэрэ́на мануша́, пал-дова́ со Мэ пхэндём дава́”, – ракирэ́ла Рай Дэвэ́л, Дэвэ́л.”11. И сыс кэ мэ Ра́скирэ-Дэвлэ́скиро лав дасаво:12. “Манушэ́скиро чхава! Ров пал Тироскирэ крали́стэ, пхэн лэ́скэ: ‘Адя́кэ ракирэ́ла Рай Дэвэ́л, Дэвэ́л: Нанэ годьварэдыр ту́тыр, нанэ гожэдыр ту́тыр.13. Ту са́нас кэ Эдо́мо, дрэ Дэвлэ́скири у́нта (садо), пэ тыро́ урибэ́н сыс куч бара́: рубино, топазо и мирикло (алмазо), хризолито, ониксо, ясписо, сапфиро, карбункуло и якхори (изумрудо) сувнака́са, саро́ дава́, куч кэрдо́, сыс уридо́ пэ ту́тэ; саро́ дава́ сыс кэрдо́ дро дывэ́с, ко́ли ту са́нас создыно́.14. Ту са́нас помакхно херувимо, соб (кай) тэ ракхэ́с, и Мэ чхудём тут ваш дава́. Ту са́нас пэ свэ́нто Дэвлэ́скири бэ́рга, псирэсас машки́р хачкирдэ́ бара́ яга́са.15. Ту са́нас пхэрдэ́с создыно́: лачхо́ дрэ тырэ́ дрома́, дывэсэ́стыр, ке́ли ту са́нас создыно́, нэ латхяпэ дрэ ту́тэ чорипэ́н.16. Барэ́ тырэ́ бикныбнастыр дрэ тыро́ андрыпэн загия́ начачипэ́н, ту кэрдя́н грэ́хо; Мэ чхурдыём тут тэлэ́, сыр магирдэс Дэвлэ́скирэ бэрга́тыр, Мэ хасякирдём тут, ракхно херувимо, хачкирдэ́ барэндыр дрэ машкиралыпэн.17. Тырэ́ гожыпнастыр пхутия тыро́ ило́; Тырэ́ пхутькирибнастыр пал тыри́ шук ту хасякирдян Тыри́ годы́, палдава́ Мэ чхурдава тут тэлэ́ пэ пхув, Мэ отда́ва тут пэ ладж анги́л кралье́ндэ, соб (кай) ёнэ тэ дыкхэ́н пала́л.18. Тырэ́ бут-молытконэ чорипнаса, Тырэ́ хоханэ́ бикныбнастыр Ту магирдян Тырэ́ свэ́нта штэ́ты; Мэ дорэсава яг одотхы́р, кай ту дживэса, яг, сави́ зхала тут; Мэ кэра́ва ту́тыр пра́ска (пепло) пэ пхув анги́л сарэнгирэ якха́, кон дыкхэ́ла тут.19. Сарэ́, кон джинэлас тут машки́р манушэ́ндэ, явэ́на тэ дивинэнпэ трашаса пал ту́тэ, ту́тыр явэ́ла дар, ту на явэ́са бутэды́р тэ дживэ́с.’”20. И сыс кэ мэ Ра́скирэ-Дэвлэ́скиро лав дасаво:21. “Манушэ́скиро чхава! Рисёв тырэ́ мо́са кэ Сидоно, ра́кир пэ лэ́стэ ангилпхэныбэ́н,22. Пхэн: ‘Акэ, Мэ выджава пэ ту́тэ, Сидоно, тэ прославинавапэ машки́р ту́тэ, и ґалёна, со Мэ сом Рай Дэвэ́л, Дэвэ́л, ке́ли Мэ ява́ва тэ сэндякирав лэс, и ке́ли Мэ сыкава́ва Пэс пир лэ́стэ, со Мэ сом Свэ́нто.23. Пал-дова́ со Мэ бичавава пэ лэ́стэ мэрибнытка фра́нсы (фуя́), рат явэ́ла тэ чхувэлпэ пэ вули́цы (га́сы), га́сы, пэрэ́на машки́р лэ́стэ домардэ́ куртала́тыр, сави́ домарэла лэс сарэ́ ригэ́ндыр, и тэ́ньчи ёнэ ґалёна, со Мэ сом Рай Дэвэ́л, Дэвэ́л.’24. На явэ́ла ёв бутэды́р ваш Израилёскиро кхэр сыр пхусадытко хру́сто, сыр жылто хру́сто сувьенца дыкхады чар? На явэ́ла ние́кх тэ ґаздэлпэ пэ Израилёскиро кхэр бутэды́р явирэ манушэ́ндыр, савэ́ дживэ́на пашы́л Израилё, и тэ́ньчи ёнэ ґалёна, со Мэ сом Рай Дэвэ́л, Дэвэ́л.25. Адя́кэ ракирэ́ла Рай Дэвэ́л, Дэвэ́л: Ко́ли Мэ скэда́ва Израилёскиро кхэр народэндыр, машки́р савэ́ ёнэ исын рострадынэ; то Мэ сыкава́ва пэ лэ́ндэ, со Мэ сом Свэ́нто, соб (кай) тэ дыкхэ́л манушэ́нгиро ро́до; ёнэ явэ́на тэ дживэ́н пэ пэ́скири пхув, сави́ Мэ дыём Мирэ́ писхари́скэ, Яково́скэ.26. Тэ́ньци ёна явэ́на тэ дживэ́н пэ пхув, на явэ́на тэ дарэ́н никонэстыр, кэрэ́на кхэра́, явэ́на тэ барьякирэ́н виноградоскирэ унты (сады); на явэ́на тэ дарэ́н никонэстыр, пал-дова́ со Мэ ява́ва тэ сэндякирав сарэ́ лэ́нгирэ вэргэ́н, и ґалёна, со Мэ сом Рай Дэвэ́л, энгиро Дэвэ́л.”Psalms 129:1-41. Гили анги́л Кхангири́. Бут мо́лы ёнэ притасавэнас ман мирэ́ тэрныпнастыр, мэк тэ пхэнэ́л Израилё:2. “Ёнэ притасавэнас ман мирэ́ тэрныпнастыр бут мо́лы, нэ ёнэ на лынэ́ упралыпэ́н пэ ма́ндэ.3. Одолэ́, савэ́ пхаравэна (пахинэна) пхув, пахиндлэ пэ миро думо́, ёнэ кэрдэ́ динд(з)ькирдэ лесьни (борозны).4. Рай Дэвэ́л исын чачипна́скиро: Ёв росчхинэла пэ паш фуе́ манушэ́нгирэ шэлэ.Proverbs 28:26-2626. Кон зоралэ́с патя́ла пэ́скирэ илэскэ, кодова́ исын дылыно́, нэ кон годэс дживэ́ла, кодова́ явэ́ла зракхно.Židenge 12:1-291. Пал-дова́ со трусця́л амэ́ндэ адя́кэ-паць исын ада́кицы бут якхи́тка/якхалэ́ (свидетели), явэ́н чхурдаса пэ́стыр любо ґа́мо пхарипнаса и грэ́хо, саво́ припхандэлапэ кэ амэ сыр фэлы́ (сетка) и ява́са со исын зор тэ вырикирас, ява́са тэ причхувас зор тэ джас пир амаро́ джиибнытко дром, саво́ исын анги́л амэ́ндэ;2. и ява́са тэ дыкхас пэ Исусо́стэ, Савэ́стыр исын амаро́ патяибэ́н, и Саво́ кэрэ́ла амэн бидошакирэнца, Саво́ заме́ст ра́дыма, сави́ явэ́лас ваш Лэ́скэ, и Саво́ вырикирибнаса пиридживдя трушулыбэн кэ мэрибэ́н, на дыкхи́ пэ ладж, и бэсця́ пир чачо́ (право) васт Дэвлэ́стыр.3. Обдуминэн хор пал Исусо́стэ, Саво́ пирилыджия вэргитко бипатывакиро сабэн грэхитконэндыр, дава́ саро́ дэ́ла васт тумэ́нгэ тэ на хасякирэ́н зор дро ду́хо (фа́но) и тэ на здэн зорья́са.4. Тумэ́ ишчо (инкэ́) на мардэ́пэ кэ рат, ке́ли тумэ́ са́нас тэрдэ́ проти грэ́хо.5. И тумэ́ бистырдэ лава́, савэ́ Дэвэ́л ракирдя́ тэ подрикирэ́л тумэн, сыр Пэ́скирэ чхавэ́н: “Чхавоа миро, на лэ пэ ило локхэс, ке́ли Дэвэ́л сыклякирэ́ла тут, и на здэпэ духо́са, ке́ли Ёв пхэнэ́ла зорья́са банг ту́кэ;6. Дэвэ́л сыклякирэ́ла одолэ́ манушэ́с, конэ́с Ёв выкэдэ́ла, и марэла кажнонэ́ манушэ́с, савэ́с Ёв прилэ́ла, сыр Пэ́скирэ чхавэ́с.”7. Явэ́н вырикирдэ, ке́ли Дэвэ́л сыклякирэ́ла тумэн, дава́ сыкавэ́ла, со Дэвэ́л дыкхэ́ла пэ тумэ́ндэ, сыр пэ Пэ́скирэ чхаворэндэ. Ци исын вари-кай адасаво́ чхаво́, савэ́с лэ́скиро дад на сыклякирэ́ла?8. Ко́ли тумэн на сыклякирэ́на, сыр трэй ваш сарэ́ чхаворэнгэ, тэды тумэ́ сан кхэлбы, а на чачунэ́ Дэвлэ́скирэ чхавэ́.9. И ишчо (инкэ́): ке́ли амэ́ндэ сыс дада́ пир амаро́ рат, савэ́ сыклякирдэ́ амэн, и палдава́ амэ кутякирдям лэн, тэды ци пэ бут буты́р амэ́нгэ трэй тэ кандас амарэ́ Дадэ́с пэ ду́хо (фа́но), соб (кай) тэ джива́с?10. Амарэ́ дада́ сыклякирдэ́ амэн на́бут дывэса́, нэ Дэвэ́л сыклякирэ́ла ваш амаро́ миштыпэ́н, соб (кай) амэ́нгэ тэ явэ́л паш кхэтанэ́ Лэ́са дрэ Лэ́скири свэнтыма.11. Кажно сыклякирибэ́н дро акаканатуно часо исын ваш амэ́нгэ на дрэ ра́дыма, а дро пиридживибэн, нэ пало́ (после) дова́, кон высыклыя далэ́ сыклякирибна́стыр, дорэсэ́ла палэ рама́нё (миро) чачипна́скирэ джиибнастыр.12. Рикирэ́н маму́й (прямэс) пэ́скирэ васта́ и тэрдён сыр трэй пэ пэ́скирэ ґэра́, савэ́ кхинынэ.13. Псирэ́н тумарэ́ ґэрэ́нца пир маму́й (пряма) дроморэ, соб (кай) одолэ́ манушэ́скэ, саво́ исын лангало, тэ на змарэлпэ ґэрэндыр, а соб (кай) ёв тэ джал маму́й (прямэс).14. Причхувэ́н зор, соб (кай) тумэ́нгэ тэ явэ́н дро рама́нё (миро) сарэ́нца и дрэ свэнтыма, би савэскиро нико́н на дыкхэ́ла Рас-Дэвлэ́с.15. Дыкхэ́н миштэ́с, соб (кай) нико́н тумэ́ндыр тэ на хасякирэ́л Дэвлэ́скиро бахтякирибэ́н, соб (кай) тэ на явэ́л машки́р тумэ́ндэ кирко́ рукх (корнё), саво́ могинэ́ла тэ янэл фуипэ́н, и соб (кай) лэ́са тэ на явэ́н магирдэ́ бут яви́р мануша́;16. соб (кай) машки́р тумэ́ндэ тэ на явэ́л ману́ш, саво́ дживэ́ла джувле́нца би сэвлакиро, ци бидэвлыткари, сыр Иса́во, саво́ пал екх чаро́ хабнаса бикиндя пэ́скири льго́та, сави́ исын пэрвонэ́ биятостэ.17. И тумэ́ ж джинэ́на, со пало́ (после) дова́ ёв мыслиндя, соб (кай) дад тэ бахтякирэ́л лэс, нэ кодова́ на приґалыя лэс, пал-дова́ со ёв на могиндя́ тэ рискирэ́л палэ дова́, со кэрдя́.18. Тумэ́ на явнэ́ пашылэды́р кэ бэ́рга Синаё, сави́ сашты́ (можна) тэ чилавэн вастэ́са, и сави́ хачола барэ́ яга́са, и на кэ калыпэ́н (тьма), на кэ ми́гла (мрако), на кэ холями балва́л,19. тумэ́ на явнэ́ пэ рого́скиро (трубакиро) башаибэн, и пэ зан, сави́ ракирэ́ла дасавэ́ лава́, со мануша́, савэ́ шунэ́на лэн, мангэна пал дова́, соб (кай) лэ́нгэ буты́р далэ́ лава́ тэ на шунэ́н;20. пал-дова́ со ёнэ на могиндлэ́ тэ шунэ́н дова́, со лэ́нгэ сыс пхэндло́: “Ко́ли и саво́ рискирибна́скиро мурда́л (зверё) дочилавэлапэ кэ дая́ бэ́рга, ёв явэ́ла замардо (мулякирдо) барэ́нца”;21. пэ саро́ дава́ сыс адя́кэ дарано тэ дыкхэ́с, со Мо́йза пхэндя́: “Мэ древа́н издрава дара́тыр;22. а тумэ́ явнэ́ кэ бэ́рга Сио́но, кэ Болыбна́скиро Ерусалимо, кэ джидэ́-Дэвлэ́скиро фо́ро, кай исын Янго́лы, Савэ скэдынэ́пэ кхэтанэ́,23. тумэ́ явнэ́ пашылэды́р кэ Кхангири́, кай скэдынэ́пэ радыма́са чхаворэ́, савэ́ пэ́рва бияндёна, конэскирэ лава́ исын зачхиндлэ́ дро Болыбна́скиро Раё, и кэ Дэвэ́л, Саво́ исын Сэнда́ри пэ сарэ́ндэ и кэ манушэ́нгирэ ду́хи, со ячнэ́ бидошакирэнца;24. и кэ Ису́со, Саво́ пиридыя амэ́нгэ Нэво́ Завето Дэвлэ́са и кэ дро́го рат, со сыс прочхудо, саво́ исын зоралэды́р Авелёскирэ ратэстыр.25. Дыкхэ́н, на отрисён криг Одолэ́стыр, Саво́ ракирэ́ла тумэ́нгэ. Ко́ли одолэ́ мануша́, савэ́ отрисинэ криг тэ шунэ́н Лэс, Саво́ ракирдя́ лэ́нгэ Болыбна́стыр пэ пхув, на мениндлэ ка́ра, тэды буты́р сарэ́стыр и амэ на менинаса ла, савэ́нгэ Ёв ракирэ́ла Болыбна́стыр:26. Конэ́скири зан затринскирдя́ сари́ пхув, и Кон дыя́ лав какана́: “Мэ ишчо (инкэ́) мо́ло триинскирава на екх пхув, нэ и болыбэ́н.27. Нэ лав “ишчо (инкэ́) мо́ло” сыкавэ́ла пэ дова́, со Дэвэ́л кэрдя́, и со могинэ́ла тэ хасёл, соб (кай) тэ ячэ́лпэ дова́, со ние́кхвар на тринскирлапэ.28. Пал-дова́ со амэ приласа кралипэ́н, саво́ ние́кхвар на триинскирэлапэ, ява́са тэ ракхас бахталыпэ́н, савэ́са амэ могинаса тэ кэра́с буты́ ваш Дэвлэ́скэ дара́са анги́л Лэ́стэ и ворохо́са (барэ́ дара́са).29. Пал-дова́ со амаро́ Дэвэ́л исын яг, сави́ саро́ хачкирэ́ла. Romani Bible Baltic 2019 Maintained by the United Bible Societies for the Baltic Romani Mission