Bible in one year November 20Ezekiel 31:1-181. Дро дэшупэрво бэрш, дро три́то чхон, пэ пэ́рво чхонытко дывэ́с сыс кэ мэ Ра́скирэ-Дэвлэ́скиро лав дасаво:2. “Манушэ́скиро чхава! Пхэн фараоно́скэ, Египто́скирэ крали́скэ и лэ́скирэ народоскэ: ‘Конэса ту кэрэ́са пэс равнонэса дро тыро́ барипэ́н?’3. Акэ, Асуро сыс кедро пэ Лива́но, шукаронэ ранденца (веткэнца), бутэ́ патренца (листэнца); сыс вучо́ кашт; лэ́скиро упралыпэ́н сыс машки́р барэ́ вэ́тки.4. Пани лэс барьякирэлас, пхув лэс ґаздэлас, ла́кирэ рэ́ки (лэня́) сыс пашы́л лэ́стэ; ёй бичхавэлас пэ́скиро пани́ кэ сарэ́ фэлды́тка кашта́ (дрэвы).5. Палдава́ лэ́скиро вучипэ́н сыс вучэды́р сарэ́ндыр фэлдытконэ каштэндыр; сыс пэ лэ́стэ бут сэнкицы; барьёнас лэ́скирэ рандя́ (вэ́тки), сэнки лэ́скирэ кэрэнаспэ длугонэнца панескиро бутыпнастыр, ко́ли розбарьёлас дава́ кашт.6. Пэ лэ́скирэ сэнкицы кэрэ́нас пэ́скэ гня́зды (ку́фы) ра́зна болыбны́тка чирикля́; тэла́л лэ́скирэ вэ́тки барьякирэнас тыкнорэн (чхавринэн) ра́зна фэлды́тка мурдала́ (звери); тэло кадалэ́-каштэскири зэр (тень) дживэ́нас ра́зна народы, конэ́с сыс бут.7. Ёв сыкавэлас пэ́скиро гожыпэн пэ́скиро вучипна́стыр, пэ́скирэ длуга вэ́тки, пал-дова́ со лэ́скиро корнё (рукх) сыс пашы́л баро́ Египто́скирэ пани́.8. Кедры дрэ Дэвлы́тко у́нта (садо) на закэрэнас лэс пэ́са, кипарисы на сыс равна лэ́скирэ сэнкицэнгэ, ни екх кашт (дрэ́во) дрэ Дэвлы́тко у́нта на сыс дасаво шука́р, сыр ёв.9. Мэ укэдыём лэс бутэ́ лэ́скирэ ранденца, сарэ́ Эдэмоскирэ кашта́ дрэ Дэвлы́тко у́нта (садо) дыкхэнас пэ лэ́стэ.10. Палдава́ адя́кэ пхэндя́ Рай Дэвэ́л, Дэвэ́л: “Пал дова́, со ёв выбария древа́н вучо́, и чхудя́ тыро́ упралыпэ́н машки́р барэ́ сэнки, и лэ́скиро ило́ пхутия лэ́скирэ славатыр,11. палдава́ Мэ отдыём лэс дрэ народонэнгирэ-крали́скирэ васта́; ёв кэрдя́ лэ́са, сыр трэй; пал лэ́скири злыднима Мэ отгиём лэ́стыр.12. И счиндлэ лэс явирэ-пхувьенгирэ мануша́, дасавэ́ захалэ, со нанэ бутэды́р дасавэн дрэ народы, и ёнэ чурдынэ лэс пэ бэ́рги, пэ сарэ́ фэ́лды пынэ́ лэ́скирэ вэ́тки, лэ́скирэ, сэнки обпхагирдэпэ пэ сарэ́ лэнги; гинэ́ криг зэрьятыр (тенёстыр) сарэ́ пхувитка народы, и ячядэ лэс.13. Пэ лэ́скирэ ропхагирибэна лынэ́ тэ дживэ́н ра́зна болыбны́тка чирикля́, дрэ лэ́скирэ сэнки сыс ра́зна фэлды́тка мурдала́ (звери).14. Ваш дова́, соб (кай) нисавэ кашта́ пашы́л пани́ тэ на пхутёнас, со выбаринэ ёнэ дасавэ́ барэ́, на ґаздэнас пэ́скиро упралыпэ́н барэ́ сэнкицэндыр, соб (кай) на тырдэнаспэ кэ ёнэ, пал-дова́ со ёнэ исын дасавэ́ барэ́ кашта́, савэ́ пьена пани́; сарэ́ ёнэ мэрэ́на, джа́на пэ́скэ пэ дова́ свэ́то кхэтанэ́ манушэ́скирэ чхавэ́нца, савэ́ мынэ́.”15. Адя́кэ ракирэ́ла Рай-Дэвэ́л, Дэвэ́л: “Дро дова́ дывэ́с, ко́ли ёв мыя́, Мэ кэрдём роибэ́н пал лэ́стэ, закэрдём ваш лэ́скэ пхув, на дыём, соб (кай) тэ тхадэн ла́кирэ рэ́ки (лэня́), закэрдём баро́ пани́, и дыя́ тангипэ́н пал лэ́стэ Лива́но, и сарэ́ фэлды́тка кашта́ тангинэнас Лэс.16. Шумибнаса лэ́скирэ пэрибнастыр Мэ дыём дар народэнгэ, ко́ли отлыджиём лэс пэ дова́ свэ́то, кэ мануша́, савэ́ мынэ́, и радынэнаспэ пэ дова́ свэ́то сарэ́ Эдэмоскирэ кашта́, сарэ́ лачхэ́ Ливаноскирэ, сарэ́, кон пьела пани́.17. И ёнэ гинэ́ лэ́са пэ дова́ свэ́то кэ домардэ́ куртала́са, и кодолэ́, савэ́ сыс лэ́са дро доракирибэ́н, савэ́ дживэ́нас тэл лэ́стэ, машки́р народы.18. Адя́кэ, конэса Эдэмоскирэ каштэндыр ту равнинэса дрэ Тыри́ сла́ва, дро Тыро́ барипэ́н? Нэ акана́ кхэтанэ́ Эдэмоскирэ каштэнца ту джа́са пэ дова́ свэ́то, ту явэ́са тэ пасёс машки́р наобчхиндлэндэ, кхэтанэ́ домардэ́ куртала́са. Кадава́ исын фарао́но и лэ́скирэ-народоскиро бутыпэн,” – ракирэ́ла Рай Дэвэ́л, Дэвэ́л.Ezekiel 32:1-321. Дро дэшуявир бэрш, дро дэшуявир чхон, пэ пэ́рво чхонытко дывэ́с сыс кэ мэ Ра́скирэ-Дэвлэ́скиро лав дасаво:2. “Манушэ́скиро чхава! Ров пал фараоностэ, Египто́скирэ крали́стэ, пхэн лэ́скэ: ‘Ту сан сыр тэрно́ шчэр (ле́во) машки́р народы, сыр дарано мурда́л (зверё) дро мо́рё (дэрья́в), ту чхурдэсапэ дрэ тырэ́ рэ́ки (лэня́), ґаздэса пани́ тырэ́ ґэрэ́нца.”3. Адя́кэ ракирэ́ла Рай Дэвэ́л, Дэвэ́л: “Мэ зачхурдава пэ ту́тэ Мири́ кхуды́ (сеть) дрэ бутэ́-народонэнгиро скэдыибэ́н, ёнэ вытырдэна тут ла́са.4. И вычхурдава Мэ тут пэ пхув, чхурдава Мэ тут пэ откэрды фэ́лда, и явэ́на тэ бэшэ́н пэ ту́тэ ра́зна болыбны́тка чирикля́, явэ́на тэ хан тут рискирбнаскирэ мурдала́ (звери) сарэ́ пхувья́тыр.5. И росчхурдава Мэ тыро́ мас пир бэ́рги, и долы, и пхэрдякирава Мэ тырэ́ долы трупэнца.6. Пхувьякэ, кай ту плавинэсас (дэсас плима), Мэ да́ва, соб (кай) тэ пьел Тыро́ рат кэ /жы́ко ла́кирэ бэ́рги, сарэ́ ровы одо́й явэ́на пхэрдэ́ ту́са.7. Ко́ли ту мурдёса, Мэ закэрава болыбэ́н, Мэ мурдякирава лэ́нгирэ чэргэня́, Мэ закэрава кхам облокоса, чхон на явэ́ла тэ хачол.8. Сарэ́ дуда (светилы), со хачона пэ болыбэ́н, Мэ мурдякирава, Мэ яна́ва рат пэ тыри́ пхув,’ – ракирэ́ла Рай Дэвэ́л, Дэвэ́л9. Зачилавава Мэ ило́ бутэ́-народонэнгиро, ко́ли роспхэнава пал тыро́ пэрибэн машки́р народы, пир пхувья́, савэ́ ту на джинэсас.10. И пиритрашавава Мэ ту́са бут народы; лэ́нгирэ кра́лья издрана дрэ дар пал ту́тэ, ко́ли ґазда́ва Мэ Мири́ курта́ла анги́л лэ́нгиро муй, явэ́ла тэ издрал кажно лэ́ндыр кажно мэнта (минута) пал пэ́скиро ди дрэ тырэ́-пэрибнаскиро дывэ́с.11. Адя́кэ ракирэ́ла Рай Дэвэ́л, Дэвэ́л: “Вавилоно́скирэ-крали́скири курта́ла явэ́ла пэ ту́тэ.12. Зоралэ́ манушэ́нгирэ куртала́тыр пэрэ́ла Тыро́ народо, сарэ́ ёнэ исын древа́н захалэ; ёнэ хасякирэна Египто́скиро пхутькирибэ́н; и хасёла саро́ лэ́скиро бутыпэн.13. И Мэ хасякира́ва сарэ́ Лэ́скирэ кхэритконэ́ мурдалэ́н (ското), пашы́л баро́ пани́; на ґаздэ́ла бла́та бутэды́р дро пани́ манушэскири ґэро́й, на ґаздэ́ла бла́та дро пани́ гурувэнгиро копыто (най/кхурвал).14. Тэ́ньци дава́ Мэ штылыпэн лэ́нгирэ панескэ, кэра́ва адя́кэ, со потхадэна лэ́нгирэ рэ́ки (лэня́), сыр ксил, – ракирэ́ла Рай Дэвэ́л, Дэвэ́л.15. Ке́ли Мэ кэра́ва Египто́скири пхув чхучэ́ пхувья́са, ко́ли нашавэла пхув саро́, со пхэрдякирэла ла, ке́ли хасякира́ва сарэ́н, кон дживэ́ла пэ пхув, тэ́ньчи ёнэ ґалёна, со Мэ сом Рай Дэвэ́л.’16. Акэ, исын роибнытко гилы́, сави́ явэ́на тэ бага́н: народонэнгирэ чхая́ явэ́на тэ бага́н ла; пал Еги́пто, пал саро́ Лэ́скиро бутыпэн збагана ла”, – ракирэ́ла Рай Дэвэ́л, Дэвэ́л.17. Дро дэшуявир бэрш, дрэ дэшупанджто чхонытко дывэ́с сыс кэ мэ Ра́скирэ-Дэвлэ́скиро лав дасаво:18. “Манушэ́скиро чхава! Заров пал Египто́скиро народо, чхурдэ лэс, лэс и славутнонэ-народэнгирэ чхае́н дрэ хор штэ́ты тэл пхув/одова́ свэ́то кхэтанэ́ одолэнца, кон скэдыяпэ тэ мэрэ́л, кон джа́ла дрэ маґила.19. Фэды́р конэ́стыр ту сан? Джа́ тэлэ́, пасёв кхэтанэ́ одолэнца, савэ́ исын наобчхиндлэ.20. Ёнэ пэрэ́на машки́р манушэ́ндэ, савэ́ исын домардэ́ куртала́са, и ёв исын отдыно́ курталакэ; тэрдэн лэс и пэ́скиро бутыпэн.21. Пэ дова́ свэ́то явэ́на тэ ракирэ́н пал лэ́стэ и пал манушэ́ндэ, савэ́ сыс лэ́са дро доракирибэ́н пэ́рва муршарья-мануша́; ёнэ пынэ́, ёнэ исын паштэ́ одо́й машки́р одолэ́ндэ, савэ́ исын наобчхиндлэ, курта́ла домардя́ лэн.22. Одо́й исын Асуро и саро́ лэ́скирэ-халадэ́нгиро скэдыибэ́н паш лэ́стэ, одо́й исын лэ́нгирэ мулыканэ (гробы), сарэ́ домардэ́, кон пыя́ куртала́тыр.23. Лэ́скирэ мулыканэ чхудэ́ дрэ долэ́-свэтоскиро хорипэ́н; лэ́скирэ-халадэ́нгиро скэдыибэ́н исын пашы́л лэ́скири копли́ца, сарэ́ домардэ́, кон пыя́ куртала́тыр, сарэ́ одолэ́, савэ́ янэ́нас дар пэ джидэ́-манушэ́нгири пхув.24. Еламо сарэ́ пэ́скирэ бутыпнаса исын пашы́л лэ́скири копли́ца, сарэ́ ёнэ исын домардэ́, сарэ́ пынэ́ куртала́тыр, сарэ́ на сыс обчхиндлэ́ и адя́кэ гинэ́ пэ дова́ свэ́то; одолэ́ сыс мануша́, савэ́ янэ́нас дар пэ джидэ́-манушэ́нгири пхув и лыджа́на пэ́скири ладж кхэтанэ́ манушэ́нца, савэ́ мынэ́.25. Машкир домардэндэ дынэ́ чхуибэ́н лэ́скэ Еламоскэ и сарэ́ лэ́скирэ бутыпнаскэ; пашы́л лэ́стэ исын лэ́нгирэ мулыканэ, сарэ́ исын наобчхиндлэ, пынэ́ курталытыр, пал-дова́ со ёнэ янэ́нас пэ́са дар пэ джидэ́-манушэ́нгири пхув, ёнэ лыджа́на пэ пэ́стэ ладж кхэтанэ́ одолэнца, кон мыя́; лэн чхудэ́ машки́р домардэндэ.26. Одо́й исын Мешэфо и Фувало сарэ́ лэ́нгирэ бутыпнаса; пашы́л лэ́стэ исын лэ́нгирэ мулыканэ (гробы), сарэ́ исын наобчхиндлэ, домардэ́ куртала́са, пал-дова́, со ёнэ янэ́нас дар пэ джидэ́-манушэ́нгири пхув.27. Ци на трэй лэ́нгэ тэ пасён славутнонэ муршарьенца-манушэ́нца, савэ́ на сыс обчхиндлэ́, савэ́ пэ́скирэ халадытконэ скэдыибнаса гинэ́ пэ дова́ свэ́то/лю́но, чхудэ́ пэ́скирэ курталы пэ́скэ тэло шэро́, и яця́пэ лэ́нгиро чорипэ́н пэ лэ́нгирэ кокалы́, пал-дова́ со ёнэ, сыр зоралэ́, сыс дара́са пэ джидэ́-манушэ́нгири пхув.28. И ту явэ́са домардо машки́р наобчхиндлэндэ, ту явэ́са тэ пасёс одолэнца, кон сыс домардо куртала́са.29. Одо́й исын Эдо́мо, и лэ́скирэ кра́лья, и сарэ́ лэ́скирэ тхага́рья, савэ́ на дарэнас никонэстыр, нэ чхудэ́ лэн машки́р одолэ́ндэ, кон сыс домардо куртала́са; ёнэ пасёна кхэтанэ́ одолэнца, кон сыс набчхиндло, кон мыя́.30. Одо́й исын одолэ́, кон сыс тхага́рья пэ паш-рат (северо), сарэ́ ёнэ и сарэ́ Сидоняни, савэ́ гинэ́ одори́к кхэтанэ́ домардэ́ манушэ́нца. Ёнэ лынэ́ ладж пэ́скирэ зоралыпнастыр, саво́ страхакирэлас сарэ́ манушэ́н, и исын паштэ́ ёнэ кхэтанэ́, наобчхиндлэ манушэ́нца, савэ́ пынэ́ куртала́тыр, и лыджа́на пэ́скири ладж кхэтанэ́ одолэнца, кон мыя́.31. Дыкхэ́ла лэн фарао́но, и на явэ́ла тэ тангинэ́л пал пэ́скиро бутыпэн, саво́ пыя́ куртала́тыр, фарао́но и саро́ лэ́скирэ-халадэ́нгиро скэдыибэ́н, – ракирэ́л Рай Дэвэ́л, Дэвэ́л.32. Мэ розбуґлякирава Мири́ дар пэ джидэ́-манушэ́нгири пхув, явэ́ла чхудо фарао́но и сарэ́ лэ́скиро бутыпэн машки́р наобчиндлэндэ, кхэтанэ́ домардэ́ куртала́са манушэ́нца”, – ракирэ́ла Рай Дэвэ́л, Дэвэ́л.Psalms 130:1-41. Гилы́ анги́л Кхангири́. Сирэ́ хор бида́тыр мэ кхара́ва Тут, Раё Дэ́вла.2. Раё Дэ́вла! Шун мири́ зан, и причху́в кан кэ мири́ зан, сыр мэ манга́ва Тут тэ подэл васт ма́нгэ.3. Ко́ли Ту, о Раё Дэ́вла, явэ́са тэ рипирэс саро́ чорипэ́н, тэды кон, Раё Дэ́вла, могинэ́ла тэ тэрдёл пэ чачипэ́н.4. Нэ Ту отмэкэса грэ́хи амэ́нгэ, соб (кай) амэ тэ дарас Ту́тыр.Proverbs 28:28-2828. Ке́ли фуй мануша́ ґаздэ́напэ, тэды мануша́ кокорэ́ гарадёна, а ке́ли ёнэ хасёна, тэды чачунэ́ мануша́ ячэ́на буты́р.Jakob 1:1-271. Яково, саво́ исын Дэвлэ́скиро и Ра́скирэ-Дэвлэ́скиро, Исусо́скирэ Христосо́скиро писха́ри (рабо), бичхавэ́ла миро (рама́нё) Юдэ́нгирэ дэшудуе́ родэ́нгэ, савэ́ исын росчхурдынэ пир свэ́то машкира́л Наюдэ́ндэ.2. Пшала́лэ мирэ́, гинэн пал бари ра́дыма, ке́ли тумэн пропатякирэна пир яви́р (разнэс),3. и джинэ́н тумэ́, со пропатякирибэн кэрэ́ла тумаро́ патяибэ́н зоралэды́р.4. Тумаро зорало́ патяибэ́н тэ вырикирэл кэрэ́ла бидошакиро рэ́ндо (де́ло), соб (кай) тумэ́ тэ явэ́н лачхэ́ и бидошакирэ пир саро́, соб (кай) тэ на явэ́л ни саво́ наухтылыбэн тумэ́ндэ.5. Ко́ли вари-конэ́стэ тумэ́ндыр на ухтылэл (на́доси) годы́, то мэк ёв тэ мангэ́л Дэвлэ́стыр, Саво́ дэ́ла сарэ́нгэ, кон камэ́ла, и Саво́ на выракирэла, а дэ́ла лэ́скэ:6. нэ мэк ёв тэ мангэ́л патяибна́са; мэк ёв тэ на кунинэлапэ. Пал-дова́ со кон нанэ зоралэ́с тэрдо́ дро пэ́скиро патяибэ́н, одова́ исын сы́рбы морёскири вална (вэлна), сави́ балва́л ґаздэ́ла, и нэвэ́стыр чхурдэ́ла палэ:7. мэк тэ на думинэл адасаво́ ману́ш, со ёв дорэсэ́ла вари-со Ра́стыр-Дэвлэ́стыр;8. адасаво́ ману́ш исын балвалитко и чхурдэлапэ пэ дуй рига́, нанэ зорало́ пир ду́хо (фа́но) дрэ сарэ́ пэ́скирэ дрома́.9. А пшал, саво́ исын притасадо, мэк тэ шарэлпэ ёв долэса, со исын лэ́скэ дыно́ вучипна́стыр,10. и барвало́ ману́ш, мэк ёв тэ шарэлпэ, ке́ли мануша́ ладжакирэна лэс, пал-дова́ со явэ́ла часо и лэ́скиро барвалыпэ́н хасёла, сыр фэлды́тка лулудя́ (цвэты) пир чар.11. Пал-дова́ со уштэ́ла кхам и шутькирэла чар пэ́скирэ хачкирибнаса, и ла́кирэ лулудя́ (цвэты) пэрэ́на, и саро́ шукарибэн хасёла, адя́кэ-паць и хасёла барвало́ ману́ш сарэ́са, со ёв кэрдя́.12. Бахтало́ исын одова́ ману́ш, саво́ зоралэ́с вырикирэ́ла пропатякирибэн, пал-дова́ со, ко́ли ёв вырикирдя пропатякирибэн, ёв дорэсэ́ла джиибна́скири вя́нка, пал сави́ Дэвэ́л дыя́ лав сарэ́ манушэ́нгэ, конэ́скэ исын дро́го Ёв.13. Ке́ли пропатякирэна тумэн, мэк нико́н тэ на ракирэ́л: “Адава́ Дэвэ́л пропатякирэла ман”, пал-дова́ со холы́ на могинэ́ла тэ пропатякирэл Дэвлэ́с, а Дэвэ́л Кокоро́ на пропатякирэла никонэ́с.14. Нэ кажно ману́ш пропатякирэла пэс пэ́скирэ масэнгирэ тырдыпнаса, саво́ на трэй, и саво́ затырдэла лэс дрэ фэлы́;15. пало́ дава́ злыджаибэн, саво́ на трэй, и саво́ лыджа́ла кэ грэ́хо, саво́ явэ́ла кэрдо́ и саво́ лыджа́ла кэ мэрибэ́н.16. Дро́га мирэ́ пшала́лэ, дыкхэ́н, соб (кай) нико́н тумэн тэ на дэл дукха́ (тэ на хохавэ́л):17. кажно лачхипэ́н и кажно бидошакиро тала́но бичхадэ́ амэ́нгэ вучипна́стыр, дудэнгирэ (свэтэнгирэ) Дадэ́стыр, Саво́ на парудёла, и на пирикэрэлапэ.18. Ёв выкэдыя́ пир Пэ́скири во́ля тэ дэл джиибэ́н амэ́нгэ чачунэ́ лавэ́са, соб (кай) амэ́нгэ тэ явас Лэ́скирэ пэрвонэнца, савэ́н Ёв создыя́.19. Джинэ́н, мирэ́ дро́га пшала́лэ: мэк кажно ману́ш буты́р тэ шунэ́л ле́нтэс/поволинькэс (насыгэс) тэ ракирэ́л, ле́нтэс тэ холясол.20. Пал-дова́ со манушэскири холы́ на кэрэ́ла манушэ́с чачунэдыр, сыр дава́ трэй Дэвлэ́скэ.21. Ваш дава́ отчхувэн пэ́стыр сарэ́ ладжавэ кэ магирипэ́н рэ́нды и песьцёныма, савэ́ ишчо (инкэ́) ячнэ́пэ андрэ́ тумэ́ндэ и прилэ́н лав ковлэ́ илэ́са, саво́ мэкця́ корнё (рукх) дро тумаро́ ило́ и могинэ́ла тэ зракхэ́л тумэн.22. Кэрэ́н саро́ пир Дэвлэ́скиро патяибэ́н, и, ко́ли тумэ́ фэ́ни шунэ́на, а на кэрэ́на адя́кэ, тэды тумэ́ хохавэна кокорэ́ пэс.23. Пал-дова́ со, ко́ли вари-кон шунэ́ла лав и на кэрэ́ла саро́, сыр исын пхэндло́, одова́ исын сы́рбы ману́ш, саво́ роздыкхэла пэ́скирэ-москири гожыма дро гиндало,24. а адасаво́ ману́ш роздыкхэла пэс и джа́ла криг и ада́й-паць бистрэла, саво́ ёв сыс.25. Нэ ману́ш, саво́ лачхэ́с сыклякирэ́ла Зако́но, саво́ исын бидошакиро, и саво́ дэ́ла во́ля; кадава́ ману́ш кэрэ́ла пир Зако́но, и на бистрэла, со ёв шундя́, и явэ́ла бахтало́ дро дова́, со ёв кэрэ́ла.26. Ко́ли вари-кон тумэ́ндыр гинэ́ла пэс, со ёв исын зорья́са патяибнаскиро, а на пхандэла пэ́скири чиб, ёв хохавэла кокоро́ пэс, и кадасавэскирэ-манушэскири строгима на трэй ни конэ́скэ.27. Жужэ́-патяибнаскири и намагирды строгима анги́л Дэвлэ́стэ Дадэ́стэ исын дро дова́, соб (кай) тумэ́ тэ джа́н тэ дыкхэ́н пал пиротэндэ (сиротэндэ) и пивлендэ (удовэндэ), ке́ли ёнэ пхарэ́с пиридживэна и тэ зракхэн пэс бидошакирэнца далэ́ свэто́стыр. Romani Bible Baltic 2019 Maintained by the United Bible Societies for the Baltic Romani Mission