Beblia

1. “Палдава́ ту, манушэ́скиро чхава, пхэн пир лав ангилпхэныбэ́н пэ Гогастэ, пхэн: ‘Адя́кэ ракирэ́ла Рай Дэвэ́л, Дэвэ́л: Акэ, Мэ сом проти ту́тэ, Гогэ, Рошоскиро Мешэхоскиро и Фувалоскиро тхага́ри!

2. И Мэ рискира́ва палэ тут, и Мэ лыджа́ва тут, и лыджа́ва Мэ тут паш-ратитконэ́ (севернонэ) рига́тыр, Мэ яна́ва тут пэ Израилёскирэ бэ́рги.

3. Мэ вымарава Тыро́ лу́ко тырэ́ зэрвонэ (левонэ) вастэ́стыр, Мэ вычхурдава тырэ́ марибны́тка бустя́ (стре́лы) тырэ́ чачэ́ (правонэ) вастэ́стыр.

4. Ту пэрэса пэ Израилёскирэ бэ́рги, ту и сарэ́ тырэ́ халадэ́нгирэ полки, сарэ́ народы, савэ́ исын ту́са; Мэ отда́ва, соб (кай) тэ хан тут рискирибна́скирэ (хишчна) чирикля́ и фэлды́тка рискирибна́скирэ мурдала́.

5. Пэрэса ту пэ откэрды фэ́лда пал дова́, со Мэ пхэндём дава́, – ракирэ́ла Рай Дэвэ́л, Дэвэ́л.

6. Мэ бичхава́ва яг пэ пхув ‘Магог’, пэ манушэ́ндэ, савэ́ дживэ́на пэ островы би дарипнаскиро, и нисо́ на думинэн пал пэ́стэ, и ёнэ ґалёна, со Мэ сом Рай Дэвэ́л, Дэвэ́л.

7. И сыкава́ва Мэ Миро свэ́нто лав машки́р Миро народо, Израилё, Мэ на дава́ бутэды́р, соб (кай) тэ магирэ́н Миро свэ́нто лав, и ґалёна народы, со Мэ сом Рай Дэвэ́л, Дэвэ́л, Свэ́нто пэ Израилё.

8. Акэ, дава́ явэ́ла, пхэрдякирэлапэ, ракирэ́ла Рай Дэвэ́л, Дэвэ́л: дава́ исын кодова́ дывэ́с, пал саво́ Мэ пхэндём.

9. Тэ́ньци выджа́на мануша́, савэ́ дживэ́на дрэ Израилёскирэ фо́рья, захачкирна яг, явэ́на тэ хачкирэ́н марды́тко (оружыё), шчы́ты, шчытки саструнэ́, луки и марибны́тка бустя́, булавы и чхурдыбнытка бустя́ (коп΄и) и ёнэ явэ́на тэ хачкирэ́н кадалэ́ эфта́ (битринэ́нгиро дэш) бэрш.

10. На явэ́на ёнэ тэ янэ́н кашта́ фэлдатыр, на явэ́на тэ кэдэн лэн дро вэш, нэ явэ́на тэ хачкирэ́н екх мардытка; ёнэ обчорэна долэн, кон лэ́ндыр чорэлас, залэна одолэ́ндыр, кон лэ́ндыр залэлас”, – ракирэ́ла Рай Дэвэ́л, Дэвэ́л.

11. “Явэ́ла дро дова́ дывэ́с: Мэ да́ва Гогаскэ штэ́то ваш мэрибэ́н дро Израилё: до́ло, кай проджа́на мануша́, пэ васто́ко морёстыр (дэрьявэстыр); дава́ штэ́то явэ́ла тэ зарикирэл кажнонэс, кон тэ на джа́лас пашы́л одо́й; гаравэна одо́й Гогас и саро́ лэ́скиро-халадыбэ́н; явэ́на тэ кхарэ́н дава́ штэ́то, Гогаскирэ халадэ́нгиро табороскиро до́ло.

12. Эфта́ чхона́ явэ́ла тэ гаравэл лэн Израилёскиро кхэр, соб (кай) тэ жужакирэл пхув.

13. Народо сарэ́ пхувья́тыр явэ́ла тэ гаравэл лэн; баро́ явэ́ла дова́ дывэ́с, ко́ли Мэ сыкава́ва Пэ́скири сла́ва, – ракирэ́ла Рай Дэвэ́л, Дэвэ́л.

14. И выкэдэна манушэ́н, савэ́ явэ́на тэ обджан пхув би тэрдыпнаскиро, и савэ́ явэ́на тэ гаравэн кодолэ́н, савэ́ ячнэ́пэ пэ пхув кхэтанэ́ манушэ́нца, савэ́ явэ́на тэ проджан одо́й, соб (кай) пхув тэ жужакирэлпэ; ёнэ лэ́на тэ родэ́н дава́, ко́ли проджа́ла эфта́ чхона́.

15. А ко́ли вари-кон одолэ́ндыр, савэ́ явэ́на тэ обджан пхув, дыкхэ́ла манушэ́скиро кокало, тэ́ньчи чхувэ́ла пашы́л лэ́стэ шпэ́ра (знако), соб (кай) одолэ́, савэ́ гаравэна, тэ гаравэн лэс дро до́ло, кай сыс Гогаскиро баро́ кэ дар халадыбэ́н.

16. Форо́скиро лав явэ́ла: Ѓамона. Адя́кэ жужакирэна (вычыстинэна) ёнэ пхув.”

17. “А ту, манушэ́скиро чхава, адя́кэ ракирэ́ла Рай Дэвэ́л, Дэвэ́л: Пхэн сарэ́ чириклэнгэ и сарэ́нгэ фэлдытконэ мурдалэ́нгэ: ‘Скэдэ́нпэ, джа́н, скэдэ́нпэ сарэ́ ригэ́ндыр кэ Миро высвэнциндло хабэ́н, саво́ Мэ кэра́ва ваш тумэ́нгэ; кэ баро́ свэнтытко хабэ́н пэ Израилёскирэ бэ́рги; тумэ́ явэ́на тэ хан мас, явэ́на тэ пьен рат.

18. Зоралэ́-муршэнгиро мас явэ́на тэ хан; явэ́на тэ пьен рат тхагарьенгиро (князенгиро) пэ пхув, бакрэнгиро, бакрорэнгиро, бузнэнгиро (козлэнгиро) гурувэнгиро, сарэнгиро, конэ́с чаравэнас пэ Васа́но.

19. Тумэ́ явэ́на тэ хан и явэ́на чалэ; тумэ́ явэ́на тэ пьен рат и явэ́на матэ Мирэ́ высвэнцындлэ хабнастыр, саво́ Мэ зачхинава ваш тумэ́нгэ.

20. И явэ́на тумэ́ чалэ пало́ Миро сками́нд грэнца, манушэ́нца, савэ́ традэ́на уклистэ́, зоралэ́ муршэнца марибнаскирэ, и явирэ халадытконэ манушэ́нца” –, ракирэ́ла Рай Дэвэ́л, Дэвэ́л.

21. “И сыкава́ва Мэ Мири́ сла́ва машки́р Наюды́тка на́цыи (народы); сарэ́ народы дыкхэ́на Миро сэ́ндо, саво́ Мэ кэра́ва; дыкхэ́на Миро васт, саво́ Мэ чхува́ва пэ лэ́ндэ.

22. Палдава́ явэ́ла тэ джинэ́л Израилёскиро кхэр, со Мэ сом лэ́нгиро Рай Дэвэ́л, Дэвэ́л, лэ́нгиро Дэвэ́л далэ́ дывэсэ́стыр и дурэды́р.

23. И ґалёна Наюды́тка на́цыи, со кхэр Израилёскиро сыс вытрадыно пэ́скирэ пхувья́тыр пал лэ́нгиро хохаибэ́н, пал-дова́, со ёнэ хохавэнас Ман, Мэ закэрдём лэ́ндыр Миро муй, отдыём лэн дрэ лэ́нгирэ-вэргэ́нгирэ васта́, сарэ́ ёнэ мынэ́ куртала́тыр.

24. Пал лэ́нгиро нажужыпэн, пал лэ́нгиро чорипэ́н Мэ кэрдём далэнца дава́, и закэрдём лэ́ндыр Миро муй.

25. Палдава́ адя́кэ ракирэ́ла Рай-Дэвэ́л, Дэвэ́л: ‘Акана́ рискира́ва Мэ Яково́с плено́стыр, и потангинава (пожалинава) саро́ Израилёскиро кхэр, Мэ ява́ва тэ зэвлынав пир Миро свэ́нто лав.

26. И ґалёна ёнэ пэ́скиро биладжакирибэн, и сарэ́ пэ́скирэ напатяибэн, саво́ кэрэ́нас анги́л Ма́ндэ, ко́ли явэ́на тэ дживэ́н пэ пэскри пхув би дара́киро, нико́н на явэ́ла тэ страхакирэл лэн.

27. Ко́ли Мэ рискира́ва лэн народонэндыр, скэда́ва лэн лэ́нгирэ вэргэ́нгирэ пхувьендыр, и Мэ сыкава́ва Пэс дрэ лэ́ндэ, со Мэ сом Свэ́нто анги́л бут народонэнгирэ якха́.

28. И ґалёна, со Мэ сом лэ́нгиро Рай Дэвэ́л, Дэвэ́л, ко́ли рострадава лэн машки́р народы, а тэ́ньчи скэда́ва лэн пэ лэ́нгири пхув, и Мэ на ячавава (ячкирава) одо́й никонэ́с лэ́ндыр.

29. Мэ на ява́ва тэ закэрав лэ́ндыр Миро муй, пал-дова́, со Мэ чхува́ва Миро ди пэ Израилёскиро кхэр”, – ракирэ́ла Рай Дэвэ́л, Дэвэ́л.

1. Дро биш тэ па́нджто бэрш, ко́ли амэ вытрадыям, ко́ли лыяпэ бэрш, пэ дэ́што чхонытко дывэ́с, дро дэшуштарто бэрш, ко́ли сыс роспхагирдо фо́ро, дро дова́-паць дывэ́с сыс пэ ма́ндэ Ра́скирэ-Дэвлэ́скиро васт, и Ёв лыджия́ ман одори́к.

2. Дро дыкхибэ́н Дэвлэ́стыр Ёв лыджия́ ман пэ Израилёскиро пхув, чхудя́ ман пэ древа́н вучи́ бэ́рга, и пэ ла́тэ кажнонэ́ рига́тыр сыс сы́рбы патри́н (рисунко) пэ форитка кхэра́.

3. И лыджия́ ман одори́к. Акэ, сыс ману́ш, саво́ выдыкхэлас сы́рбы харко́ма (медь), ко́ли ёй хачола, дро лэ́скиро васт сыс шэло лёностыр (ґандладэстыр) и дэсто́, савэ́са гинэ́на; ёв сыс тэрдо́ пашы́л по́рта.

4. И пхэндя́ ма́нгэ адава́ ману́ш: “‘Чхаво́ манушэ́скиро! Дыкх пэ́скрэ якхэ́нца и шун пэ́скрэ канэнца, и прилэ́ илэ́са саро́, со Мэ ява́ва тэ сыкавав ту́кэ, пал-дова́ со тут яндлэ́ ваш одова́, соб (кай) мэ тэ сыкавав ту́кэ дава́ саро́, со ту дыкхэ́са, пхэн зоралэ́с Израилёскирэ кхэрэ́скэ.”

5. Акэ, пало́ кхангири́ сыс ва́нта сарэ́ лэ́скирэ ригэ́ндыр, а дро кодолэ́ – муршэскиро васт сыс дэсто́ ваш гиныбэ́н, дрэ шов куня́; кажно кунь гинэласпэ барипнаса сыр бурнык (ладошка): ёв выгиндя́ дро кадава́ Кхэр екх дэсто́ буґлыпэ́н, екх дэсто́ вучипэ́н.

6. Тэ́ньци гия́ ёв кэ по́рта, сави́ сыс рискирды кэ васто́ко; загия́ дрэ ла́тэ, выгиндя́ дрэ екх портакиро прого сыс екх дэсто́ буґлыпэ́н, и дро яви́р прого сыс екх дэсто́ буґлыпэ́н.

7. Дрэ каждо шту́ба пэ рига́ ваш ракхибнарьенгэ сыс екх дэсто́ длугипэ́н, екх дэсто́ буґлыпэ́н, машки́р шту́бы сыс пандж куня́, и дро портакиро прого, пашы́л портакиро трэ́мо (коридоро) сыс екх дэсто́!

8. И выгиндя́ ёв андра́л дрэ портакирэ трэмы екх дэсто́.

9. А пашы́л по́рта, дрэ трэмы, выгиндя́ охто́ (бидуе́нгиро дэш) куня́ (локци) и дуй куня́ дрэ сты́лбы. Кадава́ трэ́мо сыс пашы́л по́рта, сави́ сыс кхангирья́кирэ рига́тыр.

10. Штубицы ваш ракхибнарьенгэ пашы́л васточно по́рта сыс: трин екхэ рига́тыр и трин явирэ рига́тыр; екх ме́ра (выгиныбэн) дрэ сарэ́ трин штубицы, екх выгиныбэн пир сты́лбы екхэ и явирэ рига́тыр.

11. Портакиро буґлыпэ́н ёв выгиндя́ дэш куня́, а портакиро длугипэ́н сыс дэшутрин куня́.

12. А анги́л шту́бы сыс выступо дрэ екх кунь, и ва́нта дрэ екх кунь явирэ рига́тыр; дрэ далэ́ шту́бы сыс шов куня́ екхэ рига́тыр и шов куня́ явирэ рига́тыр.

13. Тэ́ньци выгиндя́ ёв дрэ по́рта екхэ штубакирэ упралыпнастыр кэ яви́р штубакиро упралыпэ́н биш тэ пандж куня́ буґлыпэ́н; вуда́р сыс тэрдо́ анги́л яви́р вуда́р.

14. А пир сты́лбы выгиндя́ ёв шовдэша́ куня́, дрэ кажно сты́лбо пашы́л грэ́да и пашы́л по́рта.

15. И англатунэ́ рига́тыр дро загиибэ́н рига́тыр кэ англатуны портакири риг сыс пандждэша́ куня́.

16. Фэнштры решоткэнца сыс дрэ шту́бы ваш ракхибнарьенгэ, пэ лэ́нгирэ сты́лбы андра́л по́рты ёнэ сыс тэрдэ́; дрэ трэ́мо сыс фэнштры, ёнэ лыджа́нас пэ андралатуны риг, а пэ сты́лбы сыс пальмы.

17. Ёв яндя́ ман дрэ грэ́да, со сыс яври́, акэ, одо́й сыс шту́бы трусця́л, грэ́да сыс кэрды гэристоса (дроморэса); трия́нда шту́бы сыс дро дова́ кхэр, со выджа́нас пэ баруно ґэристо.

18. Дава́ ґэристо (дроморо) сыс пашы́л по́рта пир портакиро длугипэ́н, кодова́ ґэристо сыс тэлыдыр.

19. И выгиндя́ ёв длугипэ́н тэлатунэ́ портатыр кэ андралатуны портакири риг, сави́ сыс яври́, шэл куня́ кэ васто́ко и паш-рати́тко (северно) риг.

20. Ёв выгиндя́ длугипэ́н и буґлыпэ́н портакиро, сави́ сыс дрэ грэ́да, со яври́, сави́ сыс рискирды кэ паш-рати́тко риг.

21. И сыс шту́бы пир рига́ (боки), савэ́ сыс пашы́л ла́тэ; трин шту́бы екхэ рига́тыр, трин шту́бы явирэ рига́тыр, лэ́нгирэ сты́лбы, лэ́нгиро трэ́мо сыс дасавэ́-паць, сыр по́рта, сави́ сыс англэды́р; лэ́нгиро длугипэ́н сыс пандждэша́ куня́, а буґлыпэ́н – биш тэ пандж куня́.

22. Лэ́нгирэ фэнштры (дудаля), и лэ́нгиро своды сыр выступы, лэ́нгирэ пальмы сыс дасавэ́-паць барипнаса (мераса), сыр сыс по́рта, сави́ выджа́лас пэ васто́ко, дрэ лэ́ндэ заджанас пир эфта́ ґэруня (ступени) и анги́л лэ́ндэ сыс трэ́мо.

23. По́рта выджа́ла кэ андралатуны грэ́да анги́л паш-рати́тко (северно) васточно по́рта; ёв выгиндя́ (вымериндя) портатыр кэ по́рта шэл куня́ (локци).

24. И яндя́ ёв ман пэ паш-дывэсы́тко (южно) риг, акэ, одо́й сыс паш-дывэсы́тко по́рта; ёв выгиндя́ пир сты́лбы и ґэруня (ступеньки) ада́кицы, сыр сыс англэды́р.

25. Дрэ лэ́ндэ анги́л лэ́нгирэ вудара́ сыс фэнштры дасавэ́, сыр сыс кодолэ́ фэнштры: длугипнаса сыс ёнэ пандждэша́ куня́, а буґлыпнаса – биш тэ пандж куня́.

26. Соб (кай) тэ ґаздэспэ кэ ёнэ, трэиндя́ тэ проджас эфта́ ґэруня, анги́л лэ́ндэ сыс вудара́, укэдыибэн пальмэндыр – екх долэ́ рига́тыр, екх явирэ рига́тыр пэ лэ́нгирэ сты́лбы.

27. Сыс паш-рати́тко по́рта дрэ андратуны́ грэ́да, ёв выгиндя́ екхэ портатыр кэ яви́р по́рта шэл куня́.

28. Ёв лыджия́ ман кэ паш-дывэсы́тко (южно) по́рта, а одотхы́р – пэ англатуны грэ́да; выгиндя́ ёв дрэ паш-дывэсы́тко (южно) по́рта ада́кицы, сыр сыс англэды́р.

29. Лэ́нгирэ шту́бы пир рига́, савэ́ сыс пашэдыр кэ яго́ро, лэ́нгирэ сты́лбы и трэмы (выступы) – сыс дро дасави́-паць ме́ра; и фэнштры сыс дрэ лэ́ндэ, и дрэ лэ́нгирэ трэмы трусця́л (кругом); саро́ сыс длугипнаса пандждэша́ куня́, буґлыпнаса биш тэ пандж куня́.

30. Трэмы сыс трусця́л; лэ́нгиро длугипэ́н сыс биш тэ пандж куня́, а буґлыпэ́н сыс пандж куня́.

31. Сыс лэ́ндэ трэмы, савэ́ выджа́нас пэ андратуны́ грэ́да; пальмы сыс пэ лэ́нгирэ сты́лбы; соб (кай) тэ ґаздэ́нпэ кэ ёнэ, трэиндя́ тэ проджан охто́ ґэруня (ступени).

32. И яндя́ ёв ман кэ васточно по́рта, а одотхы́р – дрэ андратуны́ грэ́да (дво́ро); выгиндя́ ёв дрэ дая́ по́рта дасави́-паць ме́ра.

33. Лэ́нгирэ шту́бы пир рига́, савэ́ сыс пашэдыр кэ яго́ро (краё) лэ́нгирэ сты́лбы, лэ́нгирэ трэмы сыс дро дасави́-паць ме́ра; и фэнштры дрэ лэ́ндэ, и дрэ лэ́нгирэ трэмы сыс трусця́л; длугипэ́н сыс пандждэша́ куня́, а буґлыпэ́н – биш тэ пандж куня́.

34. Лэ́нгирэ трэмы выджа́нас пэ грэ́да (дво́ро), со сыс яври́, пэ лэ́нгирэ сты́лбы сыс пальмы екхэ и явирэ рига́тыр; соб (кай) тэ ґаздэ́нпэ кэ ёнэ, трэиндя́ тэ проджан охто́ ‘гэруня (ступени).

35. Тэ́ньци о ману́ш лыджия́ ман кэ паш-рати́тко (южно) по́рта; выгиндя́ одо́й сави́-паць ме́ра.

36. Шту́бы пир рига́ (боки), савэ́ сыс пашы́л лэ́ндэ; лэ́нгирэ сты́лбы и лэ́нгирэ трэмы; и фэнштры дрэ лэ́ндэ сыс трусця́л; сарэнгиро длугипэ́н сыс пандждэша́ куня́, а буґлыпэ́н биш тэ пандж куня́.

37. Лэ́нгирэ трэмы выджа́нас пэ грэ́да (дво́ро), со сыс яври́; пальмы сыс пэ лэ́нгирэ сты́лбы екхэ и явирэ рига́тыр, соб (кай) тэ ґаздэ́нпэ кэ ёнэ, трэиндя́ тэ проджан охто́ ‘гэруня.

38. Сыс адя́кэ-паць шту́ба загиибнаса пашы́л портакирэ сты́лбы: одо́й выморэна схачкирибнытка свэ́нта дыибэна́ (жэртвы).

39. А дро трэ́мо, саво́ сыс пашы́л по́рта, сыс дуй скаминда: екхэ рига́тыр и дуй скаминда явирэ рига́тыр, соб (кай) тэ зачхинэс пэ лэ́ндэ схачкирибнытка свэ́нта дыибэна́, свэ́нто дыибэ́н пало́ грэ́хо, свэ́нто дыибэ́н пало́ чорипэ́н.

40. И пашы́л одоя риг, сави́ выджа́лас яври́, пашо загиибэ́н пир паш-рати́тко по́рта сыс дуй скаминда; и пашы́л яви́р риг, пашы́л портакиро трэ́мо сыс дуй скаминда.

41. Штар скаминда сыс екхэ рига́тыр, штар скаминда-явирэ рига́тыр, – пашы́л по́рта; кхэтанэ́-охто́ скаминда, пэ савэ́ зачхинэнас свэ́нта дыибэна́.

42. Сыс штар скаминда вычингирдэ барэндыр ваш дова́, соб (кай) тэ хачкирэс свэ́нта дыибэна́; лэ́нгиро длугипэ́н сыс екх тэ паш куня́, буґлыпэ́н сыс екх тэ паш куня́, а вучипэ́н екх кунь; пэ лэ́ндэ чхувэ́нас долэ́ струме́нты, со́са зачхинэнас свэ́нта дыибэна́ тэ хачкирэ́н и ваш яви́р дыибэна́.

43. Саструнэ́ нанглэ дрэ екх бурнык (ладошка) буґлыпнаса сыс примардэ кэ кхэри́тка ва́нты трусця́л, а пэ скаминда чхувэ́нас дыибнытко мас.

44. Пало́ андратуны́ по́рта сыс шту́бы ваш багибнаскирэнгэ; пэ андратуны́ грэ́да, пашы́л паш-рати́тко по́рта, екх выджа́лас пэ паш-дывэсы́тко риг, а яви́р, пашы́л паш-дывэсы́тко (южно) по́рта, выджа́лас пэ паш-рати́тко (северно) риг.

45. Ёв пхэндя́ ма́нгэ: “Кадая́ шту́ба (комора), сави́ выджа́ла пэ паш-дывэсы́тко риг, исын ваш рашангэ, савэ́ ракхэнас Кхангири́.

46. А шту́ба, сави́ выджа́ла пэ паш-рати́тко риг, исын ваш рашангэ, савэ́ ракхэнас алта́рё: кадалэ́ исын Садокоскирэ чхавэ́, екхджинэ мануша́ Левиёскирэ чхавэ́ндыр, савэ́ явэ́нас пашылэды́р кэ Рай Дэвэ́л, Дэвэ́л, соб (кай) тэ кэрэ́н буты́ ваш Лэ́скэ.

47. И выгиндя́ ёв дрэ грэ́да (дво́ро) шэл куня́ дро длугипэ́н и шэл куня́ дро буґлыпэ́н, ёй (грэ́да) сыс штарэ́-вэнглытко (ла́тэ сыс штар вэ́нглы), а анги́л Кхангири́ сыс тэрдо́ алта́рё.

48. Ёв яндя́ ман кэ Кхангирья́киро трэ́мо; выгиндя́ пир трэмитка сты́лбы пандж куня́ екхэ рига́тыр и пандж куня́ явирэ рига́тыр, а дрэ по́рта сыс трин куня́ буґлыпэ́н екхэ рига́тыр и трин куня́ явирэ рига́тыр.

49. Трэмитко буґлыпэ́н – биш куня́, а длугипэ́н – дэшуекх куня́, соб (кай) тэ ґаздэ́нпэ кэ ёв, трэиндя́ тэ проджан дэш ґэруня (ступени); сты́лбы рикирнас трэ́мо екхэ и явирэ рига́тыр.

10. На рисёв криг Пэ́скирэ Помакхнэ манушэ́стыр пал Давидо́стэ, Тырэ́ писхаристэ.

11. Ту совлахадян чачипна́са Давидо́скэ, со Ту на рисёса криг Лэ́стыр: “Мэ чхува́ва пэ троно Тырэ́ чхавэ́с.

12. Ко́ли Тырэ́ чхавэ́ явэ́на тэ рикирэнпэ кэ Миро Зако́но и кэ Мирэ́ допхэныбэна, савэ́нгэ Мэ ява́ва тэ сыклякирав лэн, тэды и лэ́нгирэ чхавэ́ адя́кэ-паць явэ́на тэ бэшэ́н пэ троно пэ сарэ́ ве́ки.”

13. Рай Дэвэ́л выкэдыя́ бэ́рга Сио́но, сави́ яця́ дро́го Лэ́скэ, соб (кай) тэ дживэ́л одо́й:

14. “Дава́ исын Миро штэ́то тэ откхинёвав пэ сарэ́ ве́ки, мэ ява́ва тэ джива́в ада́й, пал-дова́ со ёй яця́ дро́го Ма́нгэ.

15. Мэ, чачэс, бахтякирава ла́киро хабэ́н, Мэ да́ва чалэ́с чорорэ́ манушэ́нгэ;

16. и Мэ урьявава ла́кирэ раша́н зракхибнаса и ла́кирэ свэ́нта явэ́на тэ дэн го́дла радыма́са.

17. Мэ кэра́ва адя́кэ, со выбарьёла Давидоскири зор дрэ чхавэ́стэ, Мэ кэра́ва момолы́тко (свети́льнико) Мирэ́ Помакхнэскэ.

18. Мэ урьявава лэ́скирэ вэргэ́н ладжаипнаса; нэ лэ́скири вя́нка (коро́на) явэ́ла тэ зяинэл пэ лэ́стэ.”

5. Кон шарэла на илэ́стыр пэ́скирэ пашатунэс, кодова́ росчхувэла фэлы́ лэ́скирэ ґэрэнгэ.

1. Какана́ шунэ́н тумэ́, барвалэ́ мануша́лэ, ровэ́н и годлэн зоралэ́с анги́л хасибэ́н, саво́ явэ́ла пэ тумэ́ндэ.

2. Барвалыпэ́н тумаро́ кирныя, и урибэ́н хая мэль (моль)

3. Пэ тумаро́ сувнака́й и руп иржа лыя́ упралыпэ́н, дая́ иржа явэ́ла сыр допхэныбэ́н пэ тумэ́ндэ, и схала тумарэ́ маса́ сыр яг. Тумэ́ скэдынэ́ пэ́скэ кучипэ́н пэ палатунэ́ дывэса́.

4. Ѓа́да, исын мазу́ри (награда), сави́ тумэ́ на доплэскирдэ бутярнэнгэ, савэ́ укэдэнас маро́ тумарэ́ фэлдатыр, далэ́ ловэ́ дэ́на ґодла ясвэ́нца и лэ́нгири го́дла догия́ кэ болыбна́скирэ-янголэ́нгиро Рай Дэвэ́л.

5. Тумэ́ дживдэ́ дро барвалыпэ́н пэ пхув ваш пэ́скирэ-масэ́нгиро камибэн; тумэ́ чалякирдэ тумаро́ пэр пэ хасякирибэн;

6. тумэ́ сэндиндлэ и мулякирдэ манушэ́н, савоэ сыс чачуноэ; ёнэ на сыс проти тумэ́ндэ.

7. Пшала́лэ, вырикирэн ґара́ (длу́гэс), пака явэ́ла Рай Дэвэ́л. Ѓа́да, ґавитко ману́ш ужакирэ́ла аплодо пхувья́тыр и ваш лэскэ ёв ужакирэ́ла ґара́ (длу́гэс), пака явэ́ла тасярлуно (раннё) и коригуно (позднё) брышы́нд.

8. Тумэ́ адя́кэ-паць вырикирэн ґара́ (длу́гэс): явэ́н зоралэды́р пэ́скирэ илэнца дро патяибэ́н, пал-дова́ со Дэвэ́л явэ́ла сыг пашылэды́р.

9. Пшала́лэ, на дэн ґондя́ (на уздыхинэн) холя́са екх пэ екхэ́стэ, соб (кай) тумэ́ тэ на явэ́н сэндиндлэ. Ѓа́да, исын тэрдо́ Сэнда́ри пашы́л вуда́р.

10. Пшала́лэ мирэ́, сыклён пророкэндыр, сыр ёнэ страдындлэ и сыр ґара́ ёнэ ужакирдэ, савэ́ ракирдэ́ Дэвлэ́скирэ лавэ́стыр.

11. Ѓа́да, амэ гинаса бахталэнца одолэ́ манушэ́н, савэ́ сыс зоралэ́с тэрдэ́ дрэ мэ́ньки. Тумэ́ шундлэ́ пал Иоваскири тва́рдыма дрэ мэ́ньки и дыкхнэ́, со ёв дорэсця́ дро ко́нцо (дро яго́ро) Дэвлэ́стыр, пал-дова́ со Дэвэ́л древа́н тангинэла и жалинэла манушэ́н.

12. Анги́л сарэ́стыр, мирэ́ пшала́лэ, на совлахан ни болыбнаса, ни пхувья́са, и нисавэ явирэ совлахаса; нэ мэк тэ явэ́л тумаро́ лав “ны, аи”, сыр “ны, аи”, а тумаро́ лав “над” сыр “над”, и тумэ́ на явэ́на тэл сэ́ндо.

13. Ци вари-кон тумэ́ндыр мэнчынэлапэ? Мэк ёв тэ мангэ́лпэ Дэвлэ́скэ. Ци исын вари-кон радо тумэ́ндыр? Мэк ёв тэ багал псалмы.

14. Ци исын вари-кон насвало́ тумэ́ндыр? Мэк ёв тэ кхарэл кэ пэ годэпхурэн Кхангирья́тыр, и мэк ёнэ тэ мангэ́нпэ Дэвлэ́скэ пэ лэ́стэ, и мэк ёнэ тэ макхэн лэс оливитконэ дзэтэса ваш Дэвлэ́скиро лав;

15. и мангипэ́н Дэвлэ́скэ патяибна́са высастякирэла насвалэс и Дэвэ́л кэрэ́ла зоралэса лэс; а ко́ли ёв кэрдя́ грэ́хи, тэды саро́ явэ́ла отмэкно лэ́скэ.

16. Приджинэн пэ́скирэ грэ́хи екх анги́л екхэ́стэ, соб (кай) тумэ́ тэ высастён: чачунэ́ манушэ́скиро мангипэ́н кэрэ́ла бари буты́.

17. Проро́ко Или́я сыс адасаво́-паць ману́ш, сыр и амэ сам, нэ ёв сарэ́ илэ́стыр мангдя́пэ Дэвлэ́скэ, соб (кай) тэ на явэ́л брышы́нд; и на сыс брышы́нд пэ пхув трин бэрш и шов чхона́,

18. и нэвэ́стыр мангдя́пэ Дэвлэ́скэ ёв, и болыбэ́н дыя́ брышы́нд, и пхув нэвэ́стыр лыя́ тэ дэл аплодо.

19. Пшала́лэ мирэ́, ко́ли вари-кон тумэ́ндыр змарэлапэ чачунэ́ дромэ́стыр, нэ яви́р ману́ш рискирэ́ла лэс палэ кэ Дэвэ́л,

20. мэк тэ джинэ́л одова́ ману́ш, со кодова́ ману́ш, кон рискирэлас палэ кэ Дэвэ́л грэхитконэ́ манушэ́с, ёв зракхэ́ла лэс мэрибна́стыр, и бут лэ́скирэ грэ́хи явэ́на гарадэ́.

Romani Bible Baltic 2019

United Bible Societies for the Baltic Romani Mission