Bible in one year November 25Ezekiel 41:1-261. Тэ́ньци лыджия́ ёв ман дрэ Кхангири́ и выгиндя́ пир сты́лбы шов куня́ буґлыпэ́н екхэ рига́тыр и шов куня́ буґлыпэ́н явирэ рига́тыр – дава́ сыс скиниякиро (шатракиро) буґлыпэ́н.2. Дрэ вудара́ сыс дэш куня́ буґлыпэ́н, пир вударитка рига́ сыс пандж куня́ екхэ рига́тыр и пандж куня́ явирэ рига́тыр; выгиндя́ длугипэ́н дрэ Кхангири́ – штардэша́ куня́, а буґлыпэ́н биш куня́.3. Загия́ ёв андрэ́, выгиндя́ пир сты́лбы пашы́л вуда́р дуй куня́, и дро вуда́р шов куня́, а вударитко буґлыпэ́н – сыс эфта́ куня́.4. Выгиндя́ дрэ лэ́стэ биш куня́ дро длугипэ́н и биш куня́ дро свэнтонэ́-штэтоскиро буґлыпэ́н, и пхэндя́ ма́нгэ: “Дава́ исын Свэ́нто-свэнтонэстыр штэ́то”5. Выгиндя́ ёв дрэ Кхангирья́кири ва́нта шов куня́, а буґлыпэ́н дрэ шту́бы, савэ́ сыс пашылэды́р, трусця́л Кхангири́, пир штар куня́.6. Сыс трия́нда тэ трин шту́бы (коморы) пэ рига́, шту́ба пашы́л шту́ба; ёнэ заджа́на дрэ ва́нта, сави́ сыс пашы́л Кхангири́ ваш шту́бы, трусця́л адя́кэ, со ёнэ сыс кхэтанэ́ кадалэ́ вантаса, нэ дрэ кхангирья́кири ва́нта ёнэ на заджанас.7. Нэ Кхангири́ буты́р и буты́р буґлёлас трусця́л и упра́л штубэнца, савэ́ сыс пир рига́, дрэ Кхангири́ крэнглыпэн буґлёлас упрэ́, тэлатунэ́ этажостыр шту́бы ґаздэнаспэ дро упралатуно пир машкиратуно этажо.8. И мэ дыкхцём Кхангирья́кирэ упралыпэ́н пир саро́ крэнглыпэн (окружность), шту́бы, савэ́ сыс пир рига́ пэ пхув, сыс пхэрдо́ дэсто́, шов пхэрдэ́ куня́.9. Вантытко буґлыпэ́н дрэ шту́бы, савэ́ сыс пир рига́ и выджа́нас яври́, сыс пандж куня́ сыс откэрдо штэ́то, пашы́л шту́бы пир рига́ дрэ Кхангири́.10. Дурипэн машки́р шту́бы сыс биш куня́, трусця́л сари́ Кхангири́.11. Вудара́ дрэ шту́бы, савэ́ сыс пир рига́, выджа́нас пэ откэрдо штэ́то: екх вуда́р – пэ паш-рати́тко, а яви́р вуда́р – пэ паш-дывэсы́тко риг; кадалэ́ откэрдэ-штэтоскиро буґлыпэ́н сыс пандж куня́ трусця́л.12. Кхангиритко буглыпэн анги́л форуны́ (пло́шча) пэ за́падно риг сыс эфтадэша́ куня́; сари́ дая́ Кхангиритко ва́нта сыс дрэ пандж куня́ буґлыпнаса, а ла́киро длугипэ́н сыс енядэша куня́.13. Ёв выгиндя́ дрэ Кхангири́ шэл куня́ длугипэ́н – дро дова́ англатуно́ штэ́то, дро дова́ кхэр, со сыс прикэрдо, дрэ лэ́скирэ ва́нты сыс шэл куня́ длугипэ́н.14. Кхангиритко буґлыпэ́н пир одоя риг, сави́ исын дыкхны, лыджа́ла кэ явритуны грэ́да, сави́ выджа́лас пэ васто́ко, сыс шэл куня́.15. Дро саро́ Кхангирьякиро длугипэ́н анги́л форуны́ (пло́шча) пэ лэ́скири палатуны риг, штубэнца, савэ́ сыс пир рига́, екхэ и явирэ рига́тыр ёв выгиндя́ шэл куня́ кхэтанэ́ долэса, со сыс андра́л Кхангири́ и трэмэнца, савэ́ сыс дрэ грэ́да (дво́ро).16. Вударэнгирэ сты́лбы, фэнштры ришоткэнца (кратэнца), шту́бы савэ́ сыс пир рига́ трусця́л, дрэ сарэ́ трин этажы анги́л проги сыс обчхудэ каштэса, пэтостыр (полостыр) кэ фэнштры; фэнштры сыс закэрдэ.17. Вударитконэ упралыпнастыр, сыр андра́л Кхангири́, адя́кэ-паць и яври́, пир сари́ ва́нта трусця́л, андрэ́ и яври́ сыс вычхиндлэ́ формы каштэ́стыр.18. Сыс кэрдэ́ херувимы и пальмы: пальма машки́р дуй херувимы; дро кажно херувимо сыс дуй муя́.19. Екхэ рига́тыр дыкхэ́лас пэ пальма манушэ́скиро муй, а явирэ рига́тыр – шчэроскиро (левоскиро) муй, адя́кэ сыс кэрдо́ дрэ сари́ Кхангири́ трусця́л.20. Пэтостыр (полостыр) кэ вударитко упралыпэ́н сыс вычхиндлэ́ херувимы и пальмы, адя́кэ сыс и пир Кхангирья́кири ва́нта.21. Дрэ Кхангири́ сыс штар вэнглытка вударэнгирэ сты́лбы, свэ́нто штэ́то выдыкхэлас адя́кэ, сыр мэ лэс дыкхцём.22. Алта́рё сыс каштуно, лэ́скиро вучипэ́н – трин куня́, длугипэ́н – дуй куня́, лэ́скирэ вэ́нглы, дова́ пэ со ёв сыс тэрдо́; лэ́скирэ ва́нты – каштэ́стыр. И пхэндя́ ману́ш ма́нгэ: “Кадава́ исын сками́нд, саво́ сыс тэрдо́ анги́л Растэ-Дэвлэ́стэ.”23. Дрэ Кхангири́ и дро свэ́нто штэ́то сыс пир дуй вудара́.24. Дрэ далэ́ вудара́ сыс пир дуй пхаля пэ завесы (зачхудэ), далэ́ пхаля ґаздэнаспэ; дуй пхаля сыс пашо екх вуда́р, дуй пхаля сыс пашо яви́р вуда́р.25. Пэ лэ́ндэ, пэ Кхангирья́кирэ вудара́, сыс вычхиндлэ́ херувимы и пальмы, дасавэ́-паць, сыр пэ ва́нты, а анги́л трэ́мо яври́ сыс каштуно ґеристо (помосто).26. Фэнштры пальмэнца екхэ и явирэ рига́тыр сыс пашы́л трэ́мо и дрэ Кхангирья́кирэ шту́бы, савэ́ сыс пир рига́, пэ кашт, савэ́са сыс одо́й обчхудо.Ezekiel 42:1-201. Тэ́ньци вылыджия́ ёв, адава́-паць ману́ш, ман пэ грэ́да, сави́ сыс яври́ паш-ратитконэ́ дромэ́стыр, яндя́ ман кэ шту́бы, савэ́ сыс анги́л форуны́ (пло́шча), анги́л кхэр Кхангирья́киро пэ паш-рати́тко (северно) риг.2. Кэ дова́ штэ́то, саво́ пашо паш-рати́тко вуда́р сыс дро длугипэ́н шэл куня́, а дро буглыпэн – пандждэша́ куня́.3. Анги́л андратуны́ грэ́да (дво́ро), сави́ сыс биш куня́, анги́л гэристо (помосто) сыс кэрдэ́ барэстыр, саво́ сыс пэ одоя грэ́да, сави́ выджа́лас яври́, сыс трэ́мо анги́л трэ́мо дрэ трин этажы.4. Анги́л шту́бы сыс загиибэ́н, лэ́скиро буґлыпэ́н сыс дэш куня́, а андрэ́ – дрэ екх кунь; лэ́нгирэ вудара́ выджа́нас пэ паш-рати́тко риг.5. Упралатунэ шту́бы на сыс дасавэ́ буґлэ, сыр тэлатунэ́ и машкиратунэ, пал-дова́, со одо́й сыс трэмы.6. Ёнэ сыс кэрдэ́ дрэ трин этажы, нэ дасавэ́-паць сты́лбы, савэ́ сыс пэ грэ́да, лэ́ндэ нанэ; пал-дова́ со ёнэ на сыс дасавэ́ буґлэ, сыр тэлатунэ́ и машкиратунэ шту́бы.7. Ва́нта анги́л кадалэ́ шту́бы явритунэ грэдатыр (дворостыр), сави́ сыс яври́, сыс дро буґлыпэ́н пандждэша́ куня́.8. Пал-дова́, со штубэнгиро длугипэ́н, савэ́ сыс пэ грэ́да, со выджа́нас яври́, сыс пандждэша́ куня́; акэ, анги́л Кхангири́ сыс шэл куня́.9. Тэлэ́ сыс загиибэ́н андрэ́ далэ́ шту́бы васточнонэ рига́тыр, ко́ли тэ подджан кэ ёнэ грэдатыр, сави́ сыс яври́.10. Кэ вантакиро буглыпэн, сави́ сыс пэ грэ́да, кэ васто́ко анги́л га́са, анги́л кхэр сыс шту́бы.11. Дроморо анги́л лэ́ндэ сыс дасаво сыр пашы́л кодолэ́ шту́бы, савэ́ выджа́нас пэ паш-рати́тко риг, дасаво длугипэ́н сыр лэ́ндэ, дасаво буґлыпэ́н, сарэ́ лэ́нгирэ выгиибэна, саро́ лэ́нгиро укэдыибэн, лэ́нгирэ вудара́ сыс дасавэ́, сыр лэ́ндэ.12. Кадасавэ́ вудара́ сыс сыр дрэ шту́бы, савэ́ выджа́нас пэ паш-дывэсы́тко (южно) риг, ваш дова́, соб (кай) тэ заджас дрэ лэ́ндэ, сыс вуда́р пашы́л дром, саво́ джа́лас пир ва́нта пэ васто́ко.13. И пхэндя́ ёв ма́нгэ: “Шту́бы пэ паш-рати́тко (северно) и пэ паш-дывэсы́тко (южно) рига́, савэ́ сыс анги́л англатуно́ штэ́то, исын свэ́нта шту́бы, кай рашая́ исын, савэ́ явэ́на кэ Рай Дэвэ́л, Дэвэ́л, и кай ёнэ ханас свэ́нта дыибэна́ (жэртвы), одо́й ёнэ чхувэ́на свэ́нта дыибэна́, и янэ́на маруно́ свэ́нто дыибэ́н, и дыибэ́н пало́ грэ́хо, и дыибэ́н пал чорипэ́н, пал-дова́ со кадава́ исын свэ́нто штэ́то.14. Ко́ли заджа́на одори́к рашая́, лэ́нгэ трэиндя́ тэ ячавэн (ячкирэн) одо́й пэ́скиро урибэ́н, дро саво́ ёнэ дынаринэ́нас (служынэ́нас), а тэ́ньчи (позжэ) тэ выджа́н далэ́-свэнтонэ́ штэто́стыр пэ грэ́да (дво́ро), со сыс яври́; пал-дова́, со кадава́ урибэ́н исын свэ́нто, лэ́нгэ трэиндя́ тэ урьен яви́р урибэ́н, а тэ́ньчи тэ выджа́н кэ мануша́.15. Ко́ли ёв выгиндя́ андратуны́ Кхангири́, ёв вылыджия́ ман пир по́рта, сави́ выджа́лас пэ васто́ко, и ёв лыя́ тэ выгинэл ла трусця́л (кругом).16. Ёв выгиндя́ васточно риг мериндытконэ дэстэса, и выгиндя́ ёв дэстэса пандж шэла́ дэстэ́.17. Пэ паш-рати́тко (северно) риг выгиндя́ ёв далэ́ мериндытконэ дэстэса панджшэла́ дэстэ́.18. Дрэ паш-дывэсы́тко риг выгиндя́ ёв мериндытконэ дэстэса панджшэла́ дэстэ́.19. Порисия ёв кэ за́падно риг и выгиндя́ мериндытконэ дэстэса панджшэла́ дэстэ́.20. Сарэ́ штарэ́ ригэ́ндыр вымериндя ла; трусця́л (кругом) сыс ва́нта, ла́киро длугипэ́н – панджшэла́ дэстэ́, ла́киро буґлыпэ́н, – сыс пандж шэла́ дэстэ́, соб (кай) тэ на явэ́л свэ́нто штэ́то кхэтанэ́ насвэнтонэ штэтоса.Psalms 133:1-31. Кхангирья́кири Гилы́. Давидоскири. Дыкхэ́н! Сыр лачхэ́с и дрогэс исын тэ дживэ́н машки́р пшалэ́ндэ дро екхипэ́н!2. Дава́ исын сы́рбы куч оливи́тко дзэт (елеё) пэ шэро́, со тхадэ́ла тэлэ́ пэ Ароноскирэ чхора́ (бро́да), саво́ прастала тэлэ́ пэ лэ́скирэ-идякиро яго́ро (краё);3. дава́ исын сы́рбы Ермоноскири пахлын (роса), со джа́ла тэлэ́ пэ Сионо́скири бэ́рга, пал-дова́ со одо́й пхэндя́ бахтякирибэ́н, джиибэ́н пэ сарэ́ ве́ки.Proverbs 29:6-66. Бибахтало́ ману́ш пэрэ́ла дрэ фэлы́ пэ́скирэ чорэ́ рэндэ́ндыр; нэ чачуно́ ману́ш явэ́ла тэ радынэ́лпэ.1 Peter 1:1-251. Пэтристыр, Исусо́скирэ Христосо́скирэ Апостолостыр, манушэ́нгэ, конэ́с Дэвэ́л выкэдыя́, савэ́ лодэна и исын росчхурдынэ пир свэ́то, дро Понто, Галатия, Кападокия, Асия и Вифиния,2. пир Дэвлэ́скирэ-Дадэ́скиро задуминыбэн ваш дова́, соб (кай) тэ кандэ́н Исусо́с Христосо́с, Саво́ отмэкця́ грэ́хи Лэ́скирэ Духо́са, соб (кай) тумэ́ тэ явэ́н помакхнэ Лэ́скирэ Ратэ́са: мэк бахтякирибэ́н и рама́нё (миро) тэ явэ́н бут бут тумэ́нгэ.3. Мэк тэ явэ́л бахтякирдо́ Дэвэ́л Дад амарэ́ Ра́скирэ-Дэвлэ́скиро, Исусо́скирэ Христосо́скиро, Саво́ пир Пэ́скиро баро́ тангипэ́н дыя́ амэ́нгэ яви́р джиибэ́н, ке́ли отджидякирдя́ Исусо́с Христосо́с мулэ́ндыр, соб (кай) амэ́ндэ тэ явэ́л джиды наде́я,4. соб (кай) тэ явэ́л амэ́ндэ паш дро нэво́ джиибэ́н дро Болыбна́скиро Раё, саво́ исын ве́чно, намагирдо, бигрэхэнгиро, саво́ Дэвэ́л ракхэ́ла ваш тумэ́нгэ.5. Пал савэ́ндэ Дэвэ́л Пэ́скирэ зорья́са явэ́ла тэ дыкхэ́л ваш зракхибэ́н, саво́ исын приготовиндло амэ́нгэ и явэ́ла сыкадо дро палатуно́ часо.6. Пал дава́ радынэ́нпэ какана́, мэк вари-саво́ часо тумэ́нгэ приджалапэ тэ пиридживэс мэ́ньки и тумэн явэ́на тэ пропатякирэн разнонэ ригэ́ндыр,7. соб (кай) дава́ пропатякирибэн тэ допхэнэл, со тумаро́ патяибэ́н исын чачуно́ и дрогэдыр сувнака́стыр, саво́ усае́кх исын хасибны́тко, мэк ёв тэ явэ́л пропатякирдо яга́са, тэды тумаро́ патяибэ́н янэ́ла тумэ́нгэ шарибэ́н и сла́ва, ке́ли явэ́ла нэвэ́стыр Ису́со Христо́со:8. Савэс тумэ́ ние́кхвар на дыкхнэ́, нэ Ёв исын дро́го тумэ́нгэ, и Савэс кэ дава́ часо на дыкхнэ́, нэ тумэ́ усае́кх патя́на дрэ Лэ́стэ и пир дава́ тумэ́ адя́кэ древа́н радынэ́напэ, со нашты́ тэ пхэнас лавэ́нца, и Савэс тумэ́ прославиндлэ,9. пал-дова́ со тумэ́ зракхэна пэ́скиро ду́хо (фа́но) пал тумаро́ патяибэ́н.10. Кадава́ зракхибэ́н родэнас пхарэ́с и сыклякирэнас лачхэ́с проро́ки, савэ́ англэды́р пхэнэнас тумэ́нгэ пал бахтякирибэ́н, саво́ явэ́ла дыно́ тумэ́нгэ.11. Ёнэ сыклякирдэ́ миштэ́с тэ уджинэ́н, ке́ли и пэ саво́ часо (цы́ро) упхэндя Христосо́скиро Ду́хо (Фа́но), ке́ли Ёв ангилпхэнэлас пал Христосо́скирэ мэ́ньки и пал Лэ́скири сла́ва, сави́ явэ́ла коригэды́р (позжэ).12. Лэ́нгэ сыс сыкадо, со ёнэ дынаринэ́нас (служынэ́нас) на пэ́скэ, а тумэ́нгэ, пал-дова́ со тумэ́нгэ роспхэндлэ́ бахталы́ зан (звесь) Духо́скирэ зорья́са, а пал дава́ аж Янго́лы сыклякирэнас миштэ́с.13. Ваш дава́ рискирэ́н пэ́скири годы́ тэ кэрэ́н лачхипэ́н, на совэн, рикирэ́н пхэрдэ́с наде́я пэ бахтякирибэ́н, саво́ явэ́ла дыно́ тумэ́нгэ, ке́ли явэ́ла Ису́со Христо́со;14. явэ́н сыр чхавэ́, савэ́ кандэ́на пэ́скирэ дадэн, и на дживэ́н пир пэ́скирэ-масэ́нгиро тырдыпэ́н, саво́ сыс ґарэдыр дрэ тумэ́ндэ, ке́ли тумэ́ на джиндлэ́ сыр тэ дживэ́н;15. нэ пал-дова́ со Ёв исын Свэ́нто, Саво́ кхардя́ тумэн, явэ́н кокорэ́ свэ́нта дро саро́, со тумэ́ кэрэ́на;16. пал-дова́ со исын чхиндло́: “Явэ́н свэ́нта, пал-дова́ со Мэ сом Свэ́нто.”17. И ко́ли тумэ́ кхарэ́на Дадэ́са Кодолэ́с, Саво́ шэра́ (ра́внэс) сэндякирэ́ла сарэ́ манушэ́н, на дыкхи́, кон ману́ш исын, тэды дживэ́н дара́са анги́л Лэ́стэ дава́ часо, пака тумэ́ дживэ́на пэ пхув;18. джины́, со на рупэ́са ци сувнака́са, савэ́ усае́кх нанэ важнэдыр сарэ́стыр, тумэ́ сан выкиндлэ чхучэ́ (пустонэ) джиибнастыр, саво́ тумэ́ дорэснэ́ пэ́скирэ дадэндыр;19. а тумэ́ сан выкиндлэ дрогонэ́ Христосо́скирэ Ратэ́са, Саво́ сыс сыр Свэ́нто Бакроро́, Конэ́стэ на сыс банг и дош.20. Христо́со сыс выкэдыно англэды́р, сыр яця́ свэ́то и Саво́ явдя́ дро палатуно́ часо ваш тумэ́нгэ;21. пир Лэ́стэ тумэ́ лынэ́ тэ патя́н дрэ Лэ́стэ, Саво́ отджидякирдя́ Лэс мулэ́ндыр и дыя́ сла́ва Лэ́скэ, соб (кай) тумэ́ндэ тэ явэ́л патяибэ́н и наде́я пэ Дэвлэ́стэ.22. Сыр тумэ́ лынэ́ тэ кандэ́н чачипэ́н, тэды тумэ́ выжужакирдэ пэ́скирэ дия́ ваш чачуны́ пшалы́тко паты́в, палдава́ сыкавэ́н паты́в екх екхэ́скэ сарэ́ илэ́стыр.23. Тумэ́ сан нэвэ́стыр бияндлэ, на тумарэ́ дадэндыр, а Дэвлэ́скирэ лавэ́стыр, саво́ исын джидо́, и саво́ ве́чнэс зракхэ́лапэ.24. Пал-дова́ со “кажно ману́ш исын сы́рбы чар, и лэ́нгири сла́ва исын сы́рбы фэлды́тка лулудя́ (цвэты), чар зашутёла и ла́кирэ лулудя́ отпэрэна.25. Нэ Дэвлэ́скиро лав ячэ́лапэ пэ сарэ́ ве́ки.” Адава́ исын дова́ лав, саво́ пхэндяпэ тумэ́нгэ. Romani Bible Baltic 2019 Maintained by the United Bible Societies for the Baltic Romani Mission