Bible in one year November 26Ezekiel 43:1-271. И лыджия́ кадава́ ману́ш ман кэ по́рта (вра́ты), кэ одоя по́рта, сави́ выджа́лас пэ васто́ко.2. И, акэ, Израилёскирэ-Дэвлэ́скири сла́ва джа́лас вастоко́стыр, Лэ́скири зан – сыр бутэ́-панескиро шумо, пэ пхув зяиндя Лэ́скири сла́ва.3. Дава́ дыкхибэ́н сыс дасаво-паць, сыр мэ дыкхцём, ко́ли Мэ явавас тэ пхэна́в, со хасёла фо́ро, и дыкхибэна сыс сы́рбы долэ́ дыкхибэна, савэ́ Мэ дыкхцём пашы́л рэка (лэнь) Ховар. Мэ пыём мо́са пэ пхув.4. Ра́скирэ-Дэвлэ́скири сла́ва загия́ дрэ Кхангири́ пир по́рта, сави́ выджа́лас пэ васто́ко.5. И ґаздыя́ ман Ра́скирэ-Дэвлэ́скиро Ду́хо, и лыджия́ ман дрэ андратуны́ грэ́да, и, акэ, Ра́скирэ-Дэвлэ́скири сла́ва змэкцяпэ пир сари́ Кхангири́.6. И мэ шундём вари-конэ́с, саво́ ракирлас ма́нгэ Кхангирья́тыр, а одова́ ману́ш сыс тэрдо́ пашы́л ма́ндэ.7. И пхэндя́ ёв ма́нгэ: “Манушэ́скиро чхава! Кадава́ исын Миро штэ́то, штэ́то ваш Мирэ́ ґэра́, кай Мэ ява́ва тэ джива́в машки́р Израилёскирэ чхавэ́ндэ саро́ джиибэ́н. Израилёскиро кхэр на явэ́ла тэ магирэл буты́р Миро свэ́нто лав; ни ёнэ, ни лэ́нгирэ кра́лья на явэ́на тэ кэрэ́н кадава́ биладжаипэ́н трупэнца, лэ́нгирэ кральенгирэ, пэ вучэ́ штэ́ты.8. Ёнэ чхувэ́нас пэ́скиро прого пашы́л Миро прого, пэ́скиро вуда́р пашы́л Миро вуда́р, адя́кэ, со екх ва́нта сыс машки́р Ма́ндэ и лэ́ндэ; ёнэ магирэнас Миро свэ́нто лав пэ́скирэ джунгалэ́ рэндэ́нца, савэ́ кэрэ́нас, пал-дова́ Мэ хасякирдём лэн дрэ Мири́ холы́.9. А акана́ ёнэ залэна Ма́ндыр пэ́скиро биладжаипэ́н, пэ́скирэ-кральенгирэ тру́пы, и Мэ ява́ва тэ джива́в машки́р лэ́ндэ пэ сарэ́ бэрша́.10. Ту, манушэ́скиро чхава, роспхэн Израилёскирэ кхэрэ́скэ пал кадая́ Кхангири́, соб (кай) ёнэ тэ ладжан пэ́скирэ грэхэ́ндыр и, соб ёнэ тэ кэрэ́н Кхангирья́кири ме́ра.11. Ко́ли ёнэ явэ́нас тэ ладжан долэ́стыр со ёнэ кэрэ́нас, то сыка́в лэ́нгэ, сыр выдыкхэла Кхангири́, кай и сыр ёй сыс тэрды, ла́кирэ выгиибэна, ла́кирэ загиибэна, сарэ́ ла́кирэ припхэныбэна́, сарэ́ ла́кирэ зако́ны, зачхин дава́ анги́л лэ́нгирэ якха́, соб (кай) ёнэ тэ ракхэ́н, сыр выдыкхэла кадая́ Кхангири́, сарэ́ ла́кирэ упхэныбэна́, соб (кай) ёнэ тэ кэрэ́н пир лэ́ндэ.12. Акэ, исын Кхангирья́киро зако́но; упра́л, пэ бэ́рга саро́ ла́киро штэ́то, саро́ трусця́л ла́киро штэ́то исын Свэ́нто свэнтонэстыр. Акэ, исын Кхангирья́киро зако́но!”13. Акэ, саво́ исын алтарёскиро барипэ́н дрэ куня́, ко́ли тэ гинэс екх кунь сыр екх кунь и екх бурныкакиро буґлыпэ́н; дова́, пэ со ёв исын тэрдо́ (фундаментыцо) исын екх кунь, буґлыпнаса екх кунь исын дрэ кусты́к трусця́л (вокруг) пир сарэ́ лэ́скирэ рига́; акэ, исын алтарёскири палатуны риг.14. Долэ́стыр, пэ со ёв исын тэрдо́ пэ пхув (фундаментыцостыр) кэ тэлатуно ґаздыибэн сыс дуй куня́, а буґлыпэ́н – екх кунь. Тыкнэ́ ґаздыибнастыр кэ баро́, газдыибэн штар куня́, а буґлыпэ́н лэ́скиро – екх кунь.15. Алтарёскиро вучипэ́н – штар куня́, лэ́стыр ґаздэ́напэ упрэ́ штар шынга́ (ро́ги).16. Алтарёскиро длугипэ́н – дэшуекх куня́, а буґлыпэ́н – дешуекх кунь, ёв исын штарвэнглытко пэ сарэ́ штар рига́.17. А лэ́скиро выступо сыс дэшуштар куня́ дро длугипэ́н, дэшуштар куня́ дро буґлыпэ́н пэ сарэ́ штар рига́, трусця́л лэ́стэ сыс кусты́к (полоса) дрэ паш кунь, ла́киро фундаментыцо сыс – дрэ кунь трусця́л, загиибэ́н кэ алтаре сыс вастоко́стыр.18. И пхэндя́ ёв ма́нгэ: “Манушэ́скиро чхава! Адя́кэ ракирэ́ла Рай Дэвэ́л, Дэвэ́л: ‘Акэ, исын упхэныбэна́ пал алта́рё кэ дова́ дывэ́с, ко́ли ёв явэ́ла кэрдо́, соб (кай) тэ янэ́н пэ лэ́стэ схачкирибнытка свэ́нта дыибэна́ (усасожэнни) тэ чхувэ́н пэ лэ́стэ рат.19. Рашангэ Левиёскирэ родыцо́стыр, савэ́ исын Садокоскирэ-кхэритконэ́ родо́стыр, савэ́ явэ́на кэ Мэ, соб (кай) тэ кэрэ́н буты́ ваш Ма́нгэ, ракирэ́ла Рай Дэвэ́л, Дэвэ́л – тэ янэ́н гуруво́рэс сыр свэ́нто дыибэ́н пало́ грэ́хо.20. Лэ лэ́скиро рат, чхув пэ сарэ́ лэ́скирэ штар шынга́, пэ штар вэ́нглы пир выступо пэ кусты́к (полоса) трусця́л, адя́кэ жужакир лэс, кэр лэс свэнтонэса.21. Лэ гуруво́рэс, сыр свэ́нто дыибэ́н пало́ грэ́хо, схачкир лэс пэ скэрдо ваш дова́ штэ́то дро кхэр, пало́ свэ́нто штэ́то.22. А пэ яви́р дывэ́с ян сыр свэ́нто дыибэ́н пало́ грэ́хо бидошакирэ бузнэ́с, мэк тэ жужакирэн алта́рё адя́кэ, сыр жужакирэнас (чыстинэнас) гурувэса.23. Ко́ли ту мэкэса тэ жужакирэс, ян бидошакирэ гуруво́рэс, а бакрэ́нгирэ стадатыр – бидошакирэ бакрэ́с.24. Ян лэн анги́л Ра́скирэ-Дэвлэ́скиро муй, рашая́ мэк тэ чхурдэ́н пэ лэ́ндэ лонд, и янэ́на лэн пэ цэ́ло схачкирибэ́н Ра́скэ-Дэвлэ́скэ сыр свэ́нто дыибэ́н.25. Ян эфта́ дывэса́, сыр свэ́нто дыибэ́н пало́ грэ́хо пир бузнэстэ дро дывэ́с; мэк тэ янэ́н, сыр свэ́нто дыибэ́н пир гуруворэстэ и пир бакрэстэ бакрэ́нгирэ стадатыр, соб (кай) тэ явэ́н бидошакирэ.26. Эфта́ дывэса́ трэй лэ́нгэ тэ жужакирэн алта́рё и тэ кэрэ́н лэс свэнтонэса, и адя́кэ посвэнцынэн лэ́са васта́ пэ́скирэ.27. Ке́ли ж проджа́на (накхэна) кадалэ́ дывэса́, пэ охто́то (бидуе́нгиро дэ́што) дывэ́с и дурэды́р, рашая́ явэ́на тэ янэ́н пэ алта́рё тумарэ́ цэ́ла схачкирибнытка и парикирибнытка свэ́нта дыибэна́, и Мэ прилава лэн,’ – ракирэ́ла Рай Дэвэ́л, Дэвэ́л.Ezekiel 44:1-311. Тэ́ньци ёв, кадава́ ману́ш, яндя́ ман палэ, кэ свэ́нто штэ́то, кай сыс по́рта (вра́ты), сави́ выджа́лас пэ васто́ко, нэ ёй сыс запхандлы.2. И пхэндя́ ма́нгэ Рай Дэвэ́л, Дэвэ́л: “Кадая́ по́рта явэ́ла запхандлы, на псиравэлапэ (на откэрэлапэ), нисаво́ ману́ш на заджа́ла пир ла́тэ, пал-дова́ со Рай Дэвэ́л, Дэвэ́л Израилёскиро загия́ дрэ ла́тэ; ёй явэ́ла запхандлы.3. А тхага́ри (князё), саво́ ишчо (инкэ́) явэ́ла бэшэ́ла дрэ по́рта, сыр тхага́ри, соб (кай) ёв сашты́ тэ хал маро́ анги́л Растэ-Дэвлэ́стэ. Ёв заджа́ла дрэ кадалэ́ – портакиро трэ́мо: далэ́ дромэ́са заджа́ла и далэ́ дромэ́са выджа́ла.”4. Тэ́ньци ёв лыджия́ ман дромэ́са пир паш-рати́тко (северно) по́рта анги́л Кхангирья́киро англыпэ́н, и Мэ дыкхцём: акэ, Ра́скирэ-Дэвлэ́скири сла́ва пхэрдия Кхэр Дэвлэ́скиро (Кхангири́), и Мэ пыём пэ пхув мо́са.5. И пхэндя́ ма́нгэ Рай Дэвэ́л, Дэвэ́л: “Манушэ́скиро чхава! Прилэ́ саро́ тырэ́ илэ́са, дыкх тырэ́ якхэ́нца, шун тырэ́ канэнца саро́, со Мэ ракира́ва ту́кэ пал сарэ́ Дэвлэ́скирэ-Ра́скирэ Кхангирья́кирэ упхэныбэна́, пал сарэ́ лэ́скирэ зако́ны, прилэ́ тырэ́ илэ́са дова́, кон заджа́ла дрэ Кхангири́, и кон выджа́ла свэнтонэ́ штэто́стыр.6. Пхэн Израилёскирэ кхэрэ́скэ, кай нико́н на кандэ́ла Дэвлэ́с: Адя́кэ ракирэ́ла Рай Дэвэ́л, Дэвэ́л: “Ухты́лла (до́си) тэ кэрэ́н тумэ́нгэ, Израилёскиро кхэр, сарэ́ тумарэ́ джунгалэ́ рэ́нды.7. Тэ лыджа́н андрэ́ явирэ-манушнякирэ чхавэ́н, конэ́стэ нанэ обчхиндло ило́, нанэ обчхиндлы лоч (плоть), соб (кай) тэ явэ́н пэ Миро свэ́нто штэ́то, савэ́ магирэнас Мири́ Кхангири́; тэ янэ́н Миро маро́, чэкэ́н и рат; соб (кай) тэ пхагирэн Миро завето тумарэ́ джунгалэ́ рэндэ́нца.8. Тумэ́ на ракхэнас Миро свэ́нто штэ́то, а чхувэ́на лэн, соб (кай) тэ ракхэ́н пэ Миро свэ́нто штэ́то.”9. Адя́кэ ракирэ́л Рай Дэвэ́л, Дэвэ́л: “Нашты́ тэ заджа́л дро Миро свэ́нто штэ́то чужонэ́-манушнякиро чхаво́, саво́ наобчхиндлэ илэ́са, наобчхиндлэ лочаса (плотяса), мэк и дживэ́л ёв машки́р Израилёскирэ чхавэ́ндэ, нэ ўсаекх нашты́ лэ́скэ тэ заджа́л одори́к.10. Нэ Леви́ты, савэ́ дуринэ ма́ндыр, дро дова́ часо, ке́ли дурия саро́ Израилё, савэ́ ячадэ (ячкирдэ́) Ман, кон псирэлас кэ пэ́скирэ и́долы, лэ́ндыр пхучэнапэ пал дова́, со ёнэ кэрдэ́.11. Ёнэ явэ́на тэ дынаринэ́н пэ Миро свэ́нто штэ́то сыр ракхибна́рья пашы́л Кхангирья́кири по́рта и пособники (помогибнаскирэ) пашы́л Кхангири́, ёнэ явэ́на тэ зачхинэн ваш народо цэ́ла схачкирибнытка и яви́р свэ́нта дыибэна́; ёнэ явэ́на тэрдэ́ анги́л лэ́ндэ, соб (кай) лэ́нгэ тэ дынаринэ́н (тэ служынэн).12. Пал-дова́, со ёнэ дынаринэ́нас (служынэ́нас) лэ́нгэ анги́л лэ́нгирэ и́долы, ёнэ притырднэнас Израилёскиро кхэр тэ кэрэ́н чорипэ́н, Мэ ґаздыём пэ лэ́ндэ Миро васт, – ракирэ́ла Рай Дэвэ́л, Дэвэ́л – со пхучэлапэ лэ́ндыр пал лэ́нгиро чорипэ́н.13. Ёнэ на явэ́на пашы́л кэ Мэ, соб (кай) тэ кэрэ́н анги́л Ма́ндэ свэ́нто буты́ сыр рашая́, и ёнэ на явэ́на кэ сарэ́ Мирэ́, свэ́нта вешчы (чысы), кэ Свэ́нто-свэнтонэнгиро, нэ пэ лэ́ндэ явэ́ла лэ́нгири ладж и джунгалэ́ рэ́нды, савэ́ ёнэ кэрдэ́.14. Мэ кэра́ва лэ́ндыр Кхангирья́кирэ ракхибнарьен, ваш сари́ Кхангиритко буты́, ваш саро́, со кэрэ́лапэ одо́й.”15. А рашая́ Левиёскирэ родыцо́стыр, Садокоскирэ чхавэ́, савэ́ дро дова́ часо, ке́ли дуринэ Израилёскирэ чхавэ́, савэ́ ракхэнас Миро штэ́то (свэнтыма), явэ́на кэ Мэ, соб (кай) тэ кэрэ́н буты́ ваш Ма́нгэ, ёнэ явэ́на тэ тэрдён анги́л Миро муй, соб (кай) тэ янэ́н Ма́нгэ чэкэ́н и рат,” – ракирэ́ла Рай Дэвэ́л, Дэвэ́л.16. Ёнэ явэ́на тэ заджа́н пэ Миро свэ́нто штэ́то, ёнэ явэ́на кэ Миро хабэ́н, соб (кай) тэ кэрэ́н буты́ ваш Ма́нгэ, соб (кай) тэ ракхэ́н Мири́ стрэ́га.17. И явэ́ла адя́кэ, со ке́ли ёнэ явэ́на пэ андратуны́ грэ́да (дво́ро), кэ по́рта, тэ́ньчи ёнэ чхувэ́на пэ пэ́стэ ґандладытко (лёнытко) урибэ́н, нэ нашты́, соб (кай) тэ явэ́л пэ лэ́ндэ тхануно (вылнытко) урибэ́н, ке́ли ёнэ явэ́на тэ дынаринэ́н пэ андралатуны грэ́да пашы́л по́рта и андра́л Кхангири́.18. Пэ лэ́нгирэ шэрэ́ трэй, соб (кай) тэ явэ́н ґандладытка (лёнытка) турбаны; трэй, соб (кай) тэлатуно урибэ́н тэ явэ́л пэ лэ́ндэ ґандладэстыр (лёностыр), на трэй, соб (кай) тэ обпхандэнпэ, ко́ли ёнэ кхамлёна.19. Ке́ли явэ́ла трэй тэ выджа́н пэ грэ́да со яври́, пэ грэ́да, со яври́ кэ народо, лэ́нгэ трэй тэ злэн пэ́скиро урибэ́н, дро саво́ ёнэ кэрэ́нас свэ́нто буты́, трэй тэ ячкирэн (тэ ячавэн) лэн дрэ свэ́нта шту́бы, и тэ урьенпэ дро яви́р урибэ́н, соб (кай) тэ на чилавэн ёнэ народо пэ́скирэ свэнтонэ́ урибнаса.20. И адя́кэ-паць нашты́ лэ́нгэ тэ муравэн (тэ бриинэн) шэро́, нашты́ лэ́нгэ тэ барьякирэ́н бала́, а трэй, соб (кай) тэ явэ́н подчхиндлэ лэ́нгирэ бала́.21. Нашты́, соб (кай) тэ пьел раша́й мол (вино), ке́ли ёв джа́ла пэ андратуны́ грэ́да.22. Нашты́ лэ́нгэ тэ лэн дрэ ромня́ пивля/биромэскирэ манушня (удова), джувля́, сави́ розгия́пэ ромэса, а трэй, соб (кай) тэ лэн пэ́скэ патывалэ́ джувле́н Израилёскирэ – кхэрэ́скирэ родо́стыр, ци пивля, конэ́скиро ром сыс раша́й.23. Трэй лэ́нгэ тэ сыклякирэ́н Миро народо, со исын свэ́нто, а со нанэ, тэ пхэнэ́н лэ́нгэ, со исын жужо́, а со-нанэ.24. Ке́ли исын нарозлынэ рэ́нды (де́лы), лэ́нгэ трэй тэ явэ́н сэндарьенца пир Мирэ́ упхэныбэна́ и тэ сэндякирэн лэн Мирэ́ сэндоса, тэ ракхэ́н Мирэ́ зако́ны, Мирэ́ стату́ты пал сарэ́ Мирэ́ свэ́нки, тэ ракхэ́н дрэ свэнтыма Мирэ́ са́ваты (суботы).25. Нашты́ лэ́нгэ тэ магирэ́н пэс, соб (кай) ёнэ тэ подджан кэ муло́ ману́ш, нэ, соб (кай) ёнэ тэ явэ́н кэ дад и дай, кэ чхаво́ и чхай, кэ пшал и пхэн, савьятэ на сыс ром; ёнэ сашты́ тэ явэ́н нажужэ́.26. А ке́ли кадасаво́ Левито жужакирэлапэ, то трэй, соб (кай) тэ отгинэл раша́й ишчо (инкэ́) эфта́ (битринэ́нгиро дэш) дывэса́.”27. Дро дова́ дывэ́с, ке́ли лэ́скэ трэй тэ явэ́л пэ свэ́нто штэ́то пэ андратуны́ грэ́да (дво́ро), соб (кай) тэ дынаринэ́л пашо свэ́нто, ёв исын банго́ тэ янэл свэ́нто дыибэ́н пало́ грэ́хо,” – ракирэ́ла Рай Дэвэ́л, Дэвэ́л.28. А ко́ли трэй тэ пхэнэ́с пал удело (котэ́р пхув лэ́нгэ) сыр мэкно́ миштыпэ́н, то Мэ сом лэ́нгиро удело (мэкно́ миштыпэ́н). И нисаво́ миштыпэ́н на дэн лэ́нгэ дро Израилё: Мэ сом лэ́нгиро миштыпэ́н.29. Ёнэ явэ́на тэ хан марэскирэ яныбнастыр, свэнтонэ́ дыибна́стыр пало́ грэ́хо, свэнтонэ́ дыибна́стыр пало́ чорипэ́н, саро́ свэнцындло хабэ́н дро Израилё исын раша́нгиро.30. Кажно пэ́рво пхабай/пло́до долэ́стыр, со барьёла пэ пхув, кажно свэ́нто яныбэ́н, савэ́ бы ёнэ тэ на явэ́н, исын раша́нгирэ, саро́ пэ́рво тумарэ́ марэстыр отдэ́н раша́скэ, соб (кай) тэ явэ́л бахтякирдо́ тыро́ кхэр.31. Нашты́, соб (кай) тэ хан рашая́ мулэ́-мурдалэнгиро ци чирикленгиро мас, нашты́ соб (кай) тэ хан дова́, со рискирибна́скиро мурда́л (зверё) захая.Psalms 134:1-31. Гилы́ анги́л Кхангири́. Тумэ́ вышарэн Рас-Дэвлэ́с, сарэ́ Ра́скирэ-Дэвлэ́скирэ писха́рья, савэ́ исын тэрдэ́ раты́ дрэ Ра́скирэ-Дэвлэ́скиро Кхэр (Кхангири́).2. Ѓаздэн пэ́скирэ васта́ пэ Свэ́нто штэ́то и вышарэн Рас-Дэвлэ́с.3. Рай Дэвэ́л, Саво́ создыя́ болыбэ́н и пхув, тэ бахтякирэ́л тумэн Сионо́стыр.Proverbs 29:7-77. Чачуно́ ману́ш роскэдэла (розлэла) чорорэ́-манушэ́нгиро рэ́ндо, нэ фуй ману́ш на ґалёла дава́.1 Peter 2:1-251. Тэды мэкэ́н кажно холы́, фрэнтыма, дуемуиткима, зэвлыныпэ́н и кажна хоханэ́ лава́,2. а явэ́н тумэ́ сы́рбы бияты, савэ́ фэ́ни со бия́ндынэ, и тумэ́ тырдэнпэ кэ лавитко тхуд (Дэвлэ́скиро лав), соб (кай) тэ чалякирэнпэ лэ́са и тэ барьён кэ зракхибэ́н,3. пал-дова́ со тумэ́ уджиндлэ́, со Дэвэ́л исын лачхо́.4. Явэ́н пашылэды́р кэ Ёв, Саво́ исын сы́рбы джидо́ бар, Савэс мануша́ на прилынэ́, а Савэс Дэвэ́л выкэдыя́ сыр Дрогонэс Лэ́скэ,5. и кокорэ́ тумэ́, савэ́ сан сы́рбы джидэ́ бара́, кэрэ́н пэ́стыр духовно кхэр тэ мангэ́лпэ Дэвлэ́скэ, соб (кай) тумэ́ тэ явэ́н свэ́нта рашая́, соб (кай) тэ янэ́н свэ́нто дыибэ́н, савэ́скэ явэ́ла радо Дэвэ́л пир Исусо́стэ Христосо́стэ.6. Палдава́ исын пхэндло́ дро Свэ́нто Чхиныбэ́н: “Ѓа́да, мэ чхува́ва вэнглытко бар пэ Сио́но, Саво́ Мэ выкэдыём и Ёв исын дро́го Ма́нгэ: одова́ ману́ш, саво́ явэ́ла тэ патял дрэ Лэ́стэ, на явэ́ла тэ ладжал:7. и адя́кэ Ёв исын дро́го ваш тумэ́нгэ, кон патя́ла, а ваш одолэ́нгэ, кон на патя́ла, Ёв исын бар, саво́ бутярнэ́ на прилынэ́, нэ саво́ яця́ шэралэ́ барэса, пал саво́ мануша́ обштавэнапэ и пэрэ́на;8. пал саво́ мануша́ обштавэнапэ, пал-дова́ со ёнэ на кандэ́на Дэвлэ́скиро лав, пал-дова́ со адя́кэ лэ́нгэ сыс задуминдло.9. Нэ тумэ́ сан выкэдынэ́ бияныпнастыр, кралитка рашая́, свэ́нта мануша́ Дэвлэ́скирэ миштыпна́стыр, соб (кай) тэ выпхэнэн лачхипэ́н пал Лэ́стэ, Саво́ кхардя́ тумэн калыпна́стыр дро дивно Лэ́скиро дуд (свэ́то);10. тумэн, савэ́ на сыс Лэ́скирэ мануша́, а какана́ тумэ́ ячнэ́ Лэ́скирэ манушэ́нца, ґарэдыр тумэн на тангиндлэ (на жалиндлэ), акана́ исын Дэвлэ́скиро тангипэ́н кэ тумэ́.11. Дро́га мирэ́! Мэ древа́н манга́ва тумэн, сыр манушэ́н, савэ́ наґара явнэ́ пэ дая́ пхув и савэ́ лодэна пир дава́ свэ́то: дурьён тумарэ́ лочакирэ камибнастыр, саво́ исын проти тумаро́ ди;12. и дживэ́н пир чачипэ́н машки́р Наюдэ́ндэ, соб (кай) одолэ́, кон ракирэ́ла чорипэ́н пэ тумэ́ндэ, со тумэ́ сан фуй, тэ дыкхэ́н тумарэ́ лачхэ́ рэ́нды и тэ славинэ́н Дэвлэ́с, ке́ли Ёв явэ́ла.13. Кандэ́н кажнонэ́ ран манушэ́ндыр ваш Ра́скэ-Дэвлэ́скэ: ци крали́с сыр най упратунэдыр зорьякэ,14. ци балунитконэс (правителёс), савэ́с кра́ли бичхадя́ тэ чхувэ́л ка́ра пэ одолэ́ манушэ́ндэ, савэ́ кэрэ́на фуипэ́н, и тэ шарэ́н одолэ́н, савэ́ кэрэ́на лачхипэ́н.15. Пал-дова́ со пэ дава́ исын Дэвлэ́скири во́ля, соб (кай) тэ кэра́с лачхипэ́н и пир дава́ тэ явэ́н штыл ушта́ дылынэ́ манушэ́нгирэ, ке́ли ёнэ явэ́нас тэ ракирэ́н грэхи́тка лава́.16. Дживэ́н сыр вольна мануша́; нэ тэ на явэ́л дая́ во́ля ваш дова́, соб (кай) тэ приучхакирэн грэ́хо, а дживэ́н сыр Дэвлэ́скирэ писха́рья.17. Дэн паты́в сарэ́нгэ, сыкавэ́н паты́в пшалэ́нгэ и пхэнэ́н пир патяибэ́н дрэ Дэвлэ́стэ, дарэ́н Дэвлэ́стыр и кутякирэн крали́с.18. Дынарья́лэ, кандэ́н и дарэ́н пэ́скирэ хуландыр, на со екхэ лачхэн и ковлэ́-илытконэн, нэ адя́кэ-паць и кодолэ́н, савэ́ биилыткэс (шылалэс) отлыджанапэ кэ тумэ́.19. Пал-дова́ со дава́ исын лачхо́ Дэвлэ́скэ, ко́ли вари-кон пир пэ́скири паты́в ваш Дэвлэ́скэ пиридживэла мэ́ньки, пхарипэ́н на пир чачипэ́н.20. Пал-дова́ со, пал со тэ шарас тумэн кэ сла́ва, ко́ли тумэ́ мэнчынэнапэ, ке́ли тумэн марэна пал тумарэ́ грэ́хи? А ке́ли тумэ́ кэрэ́на лачхипэ́н и страдынэна пал дава́, тэды тумэ́нгэ явэ́ла бахтякирибэ́н Дэвлэ́стыр.21. Пал-дова́ со тумэ́ са́нас кхардэ́ ваш дава́, пал-дова́ со и Христо́со адя́кэ-паць страдындя пал тумэ́ндэ, Ёв ячкирдя́ сыкаибэ́н (приме́ро) амэ́нгэ, сыр трэй тэ кэра́с, соб (кай) амэ тэ джас пир Лэ́скири шпэ́ра (слядо):22. “Ёв на кэрдя́ нисаво́ грэ́хо, и на сыс нисаво́ хохаибэ́н дрэ Лэ́скирэ лава́”,23. пэ Лэ́стэ ракирдэ́ фуипэ́н, нэ Ёв ни пэ конэ́стэ на пхэндя́ фуй лав, и ке́ли Ёв страдынэлас, Ёв на страхакирдя вари-конэ́с, а Ёв саро́ допатякирдя Кодолэ́скэ, Кон исын Чачуно́ Сэнда́ри;24. Христо́со Кокоро́ Пэ́скирэ Масэнца ґаздыя́ амарэ́ грэ́хи пэ трушу́л, соб (кай) амэ тэ явас мулэ́ ваш грэ́хо и тэ джива́с пир чачипэ́н: Лэ́скирэ фра́нсы (раны) высастякирдэ тумэн.25. Пал-дова́ со тумэ́ са́нас хасибны́тка бакрэ́, савэ́ блэндынэнас, нэ какана́ тумэ́ рисинэ́ кэ тумаро́ Чхупна́ри (Пастырё) и кэ Кхангирья́киро Дыкхибнаскиро (Блюстителё), Саво́ ракхэ́ла тумаро́ ди. Romani Bible Baltic 2019 Maintained by the United Bible Societies for the Baltic Romani Mission