Bible in one year November 28Ezekiel 47:1-231. Тэ́ньци ёв (дава́-паць ману́ш) яндя́ ман (Езэкилёс) палэ кэ Кхангирья́киро вуда́р; акэ, Кхангирья́кирэ прогостыр тхадэ́ла пани́ пэ васто́ко, пал-дова́, со Кхангири́ сыс тэрды фасадоса пэ васто́ко. И пани́ тхадэлас чачэ́-Кхангирья́кирэ рига́тыр пэ паш-дывэсы́тко риг, кай сыс алта́рё.2. И вылыджия́ ёв ман паш-ратитконэ́ портакирэ дромэ́са, саво́ сыс яври́, лыджия́ кэ по́рта, сави́ сыс яври́, дромэ́са, саво́ выджа́ла пэ васто́ко; акэ, пани́ тхадэ́ла пир чачи́ (право) риг.3. Ке́ли одова́-паць ману́ш гия́ пэ васто́ко, ёв рикирэлас дро васт шэло, и ёв вымериндя тысёнцы (бара́) куня́ (локци), и лыджия́ ёв ман пиро́ пани́; пани́ сыс кэ миро кокалкицо (ладыжка).4. Нэвэ́стыр (нэвэ́с) ёв выгиндя́ ишчо (инкэ́) екх тысёнцо, и лыджыя ман пиро́ пани́; пани́ сыс кэ чанг. Выгиндя́ ёв нэвэ́с тысёнцо, и лыджия́ ман; пани́ подги́я кэ мири́ кусты́к (трушула).5. Выгиндя́ ишчо (инкэ́) тысёнцо, ада́й сыс дасаво сы́гно панынг, со нашты́ сыс ма́нгэ тэ пириджав, пал-дова́ со пани́ сыс адя́кэ хор, со трэиндя́ тэ плывинав тэ пириджав дава́ панынг сыс нашты́.6. И пхэндя́ ёв ма́нгэ: “Дыкх ту дава́, манушэ́скиро чхаво́?” И лыджия́ ман палэ кэ брэ́го рэкакиро (лэнякиро).7. Ке́ли мэ явдём палэ, акэ, пэ брэги пашы́л сы́гно рэ́кица (лэнори́) (патоко) сыс бут дрэвы екхэ и явирэ рига́тыр.8. И пхэндя́ ёв ма́нгэ: “Дава́ пани́ тхадэ́ла пир васточнонэ-пхувья́кири риг, джа́ла пэ фэ́лда, а сыр заджа́ла дро мо́рё (дэрья́в), и кэрэ́лапэ лэ́скиро пани́ састякирибнытко (лечэбно).9. Кажно джидо́ создыибэн, саво́ кхарэ́лапэ (движынэлапэ) одо́й, кай заджа́на дуй рэкицы, явэ́ла тэ дживэ́л, одо́й явэ́ла бут мачхэ́, пал-дова́, со заджа́ла одори́к дова́ пани́ и кэрэ́лапэ пани́ дрэ мо́рё (дэрья́в) састякирибнытко, и карик заджа́ла дая́ сыкно рэ́кица (лэнори́), саро́ одо́й явэ́ла джидо́.10. Явэ́на тэрдэ́ пашы́л лэ́стэ мануша́, савэ́ ухтылэна мачхэн Эн-Гадятыр (Ен-Гаддятыр) кэ Еглаимо, ёнэ явэ́на тэ зачхурдэн кхудя (сети). Одо́й явэ́ла мачхэ́, явэ́на бут мачхэ́ сыр дро Баро́ Мо́рё (дэрья́в).11. Лэ́скирэ артапели (хор болоты) и чхувины (лужы), савэ́ на высастёна, явэ́на ячадэ (ячкирдэ́) ваш лонд.12. Пашы́л брэ́го сы́гно рэ́кица (лэнори́) (патоко), пир рэкицакирэ брэги, екхэ и явирэ рига́тыр явэ́на тэ барьён ра́зна дрэвы, савэ́ дэ́на хабэ́н: лэ́нгирэ патря (листы) на явэ́на тэ зашутён, и на пириячэна тэ янэ́н пхаба́ (пло́ды). Каждо нэво́ чхон явэ́на тэ выбарьён нэвэ, пал-дова́, со пани́ ваш лэ́нгэ тхадэ́ла свэнтонэ́ штэто́стыр; лэ́нгирэ пхаба́/пло́ды явэ́на тэ хан, а патря (листы) тэ састякирэнпэ.”13. Адя́кэ ракирэ́ла Рай Дэвэ́л, Дэвэ́л: “Акэ исын розгиныбэн, пир саво́ тумэ́ сан бангэ́ тэ роскэрэн пхув, соб (кай) тэ дорэсэлпэ ёй дэшудуенгэ Израилёскирэ родыцэнгэ: дуй паша́ Ёза́скэ (Иосифоскэ).14. Лэн дая́ пхув сыр мэкно́ миштыпэ́н екх и яви́р ману́ш, пал-дова́, со Мэ ґаздыём Миро васт совлахаса тэ дав дая́ пхув тумарэ́ дадэ́нгэ, кадая́ пхув исын тумаро́ мэкно́ миштыпэ́н.15. Акэ, исын пхувья́кири ме́жа: пэ паш-рати́тко яго́ро (краё), лыи Барэ́ Морёстыр пир дром кэ Хеглоно, сыр тэ джас кэ Цэдадо.16. Емафо, Берото, Сивраимо, кэ Гацар Тихоно, саво́ исын машки́р Дама́ско и Емафоскирэ штэ́ты, саво́ исын пэ Авраноскири ме́жа.17. И явэ́ла ме́жа морёстыр (дэрьявэстыр) кэ Гацар-Еноно, ме́жа пашы́л Дама́ско, а дурэды́р пэ паш-рати́тко исын штэ́то Емафо, акэ, исын паш-рати́тко риг.18. Шпэ́ра (чэрта) васточнонэ рига́тыр лыджа́н машки́р Аврано и Дама́ско, машки́р Галадо и Израилёскири пхув, пир Иорда́но, паш-ратитконэ́ рига́тыр, кэ васточно мо́рё (дэрья́в), дава́ исын васточно риг.19. Паш-дывэсы́тко риг исын паш-дывэсытконэ́ рига́тыр Тамаростыр кэ пани́, кай ханаспэ пир лава́ пашы́л Кадисо, кай тхадэ́ла ручаё кэ Баро́ Мо́рё (дэрья́в), дава́ исын паш-дывэсы́тко риг пэ паш-дывэсы́тко риг.20. За́падно ме́жа – Баро́ Мо́рё (дэрья́в), паш-дывэсытконэ́ межатыр кэ штэ́то анги́л Емафо, дава́ исын за́падно риг.21. Роскэрэн дая́ пхув манушэ́нгэ машки́р тумэ́ндэ пэ паша́ пир Израилёскирэ ро́дыцы.22. Роскэрэн (розделинэн) ла пиро́ жре́биё, соб (кай) тэ явэ́л дава́ тумаро́ мэкно́ миштыпэ́н явирэ – пхувьенгирэ манушэ́нгэ, савэ́ дживэ́на машки́р тумэ́ндэ, и савэ́ биянэна чхаворэ́н. Ёнэ исын бангэ́ тэ гинэнпэ машки́р Израилёскирэ чхавэ́ндэ сыр тумарэ́ мануша́, савэ́ дживэ́на, ёнэ заджа́на кхэтанэ́ тумэ́нца дрэ до́ля (бажын) машки́р Израилёскирэ ро́дыцы.23. И явэ́ла адя́кэ: со ко́ли дживэ́ла машки́р вари-саво́ ро́дыцо явирэ-пхувьенгиро ману́ш, одо́й дэн лэ́скэ мэкно́ миштыпэ́н лэ́скиро”, – ракирэ́ла Рай Дэвэ́л, Дэвэ́л.Ezekiel 48:1-351. Акэ, сыр кхарэнпэ ро́дыцы (чанга́/колены). Пэ паш-рати́тко риг пиро́ дром Хетлоностыр, саво́ лыджа́ла дрэ Емафо, Гацар Еноно, паш-ратитконэ́ межатыр Дамаскостыр пиро́ дром кэ Емафо, сари́ дая́ пхув вастоко́стыр кэ мо́рё (дэрья́в), исын екх пхувья́кири паш Даноскэ.2. Пашы́л Даноскири ме́жа васточнонэ рига́тыр кэ за́падно яго́ро (краё) исын екх Асироскиро паш.3. Пашы́л Асироскири ме́жа васточнонэ рига́тыр кэ за́падно яго́ро исын екх Нефалимоскири паш.4. Пашы́л Нефалимоскири ме́жа васточнонэ рига́тыр кэ за́падно яго́ро исын екх Манасия́скиро паш.5. Пашы́л Манасияскири ме́жа, васточнонэ рига́тыр кэ за́падно яго́ро исын екх Ефремо́скири паш.6. Пашы́л Ефремо́скири ме́жа васточнонэ рига́тыр кэ за́падно яго́ро исын екх Рувимоскири паш.7. Пашы́л Рувимоскири ме́жа, васточнонэ рига́тыр кэ за́падно яго́ро исын екх Юдаскири паш.8. Пашы́л Юдаскири ме́жа васточнонэ рига́тыр кэ за́падно яго́ро исын свэнтонэ́ – пхувья́киро котэ́р. Лэ́скиро буґлыпэ́н исын биш тэ пандж тысёнцы дэстэ́, а длугипэ́н кадасаво́, сыр явирэ-пашэнгиро длугипэ́н, васточнонэ рига́тыр кэ за́падно яго́ро машки́р лэ́стэ явэ́ла свэ́нто штэ́то.9. Пхувья́киро котэ́р, саво́ тумэ́ отдэна Ра́скэ-Дэвлэ́скэ, сыр свэ́нто штэ́то, явэ́ла дро длугипэ́н биш тэ пандж тысёнцы дэстэ́, а лэ́скиро буґлыпэ́н явэ́ла дэш тысёнцы дэстэ́.10. Кадава́ свэ́нто пхувья́киро котэ́р исын банго́ тэ явэ́л раша́нгиро, кэ паш-рати́тко риг биш тэ пандж тысёнцы дэстэ́ дро длугипэ́н, кэ мо́рё (дэрья́в) дро буґлыпэ́н дэш тысёнцы, кэ васто́ко дро буґлыпэ́н дэш тысёнцы, а кэ паш-дывэсы́тко риг дро длугипэ́н биш тэ пандж тысёнцы, машки́р лэ́стэ явэ́ла свэ́нто штэ́то Ра́скирэ-Дэвлэ́скиро.11. Кадава́ отдэ́н рашангэ Садокоскирэ чхавэ́ндыр, савэ́ сыс тэрдэ́ пэ Мири́ стрэ́га (стража), савэ́ дро часо, ко́ли дурьёнас Ма́ндыр Израилёскирэ чхавэ́, на гинэ́ криг Ма́ндыр, сыр гинэ́ криг яви́р Леви́ты.12. Кадава́ пхувья́киро котэ́р свэнтонэ́ котэрэстыр явэ́ла лэ́нгиро, Свэ́нто-свэнтонэстыр пашы́л Левитэнгиро яго́ро.13. Леви́ты лэ́на пашо раша́нгиро яго́ро (краё) паш дрэ биш тэ пандж тысёнцы дэстэ́ дро длугипэ́н и дэш тысёнцы дэстэ́ дро буґлыпэ́н; саро́ длугипэ́н исын биш тэ пандж тысёнцы, а буґлыпэ́н – дэш тысёнцы дэстэ́.14. Кадалэ́ пхувья́кирэ котэрэстыр нашты́ лэ́нгэ тэ бикнэн, нашты́ тэ парувэн, саро́ пэ́рво пхувья́тыр на пириджала кэ явирэ пал-дова́, со дава́ исын свэ́нто Ра́скирэ-Дэвлэ́скиро.15. А яви́р пандж тысёнцы, со ячнэ́пэ дро буґлыпэ́н биш тэ пандж тысёнцы дро длугипэ́н – ваш фо́ро, ваш сарэ́нгэ, соб (кай) тэ дживэ́н одо́й, соб (кай) тэ явэ́н фо́ро машкира́л.16. Акэ, саво́ явэ́ла форо́скиро барипэ́н: паш-ратитконэ́ рига́ штар тысёнцы тэ панджшэл дэстэ́, и паш-дывэсы́тко риг явэ́ла штар тысёнцы тэ панджшэл, васточно риг – штар тысёнцы панджшэла́, за́падно риг – штар тысёнцы панджшэла́ дэстэ́.17. Штэ́ты пашо фо́ро – кэ паш-рати́тко риг дуй шэла́ тэ пандждэша́ кэ васто́ко дуй шэла́ тэ панджшэла́, кэ паш-дывэсы́тко риг дуй шэла́ тэ пандждэша́, кэ за́падно дуй шэла́ тэ пандждэша́ дэстэ́.18. Дова́, со ячэ́лапэ длугипнастыр анги́л свэ́нто штэ́то – дэш тысёнцы кэ васто́ко и дэш тысёнцы кэ западо, анги́л свэ́нто штэ́то, дова́, со барьёла пэ дая́ пхув – саро́ дава́ ваш дова́, соб (кай) тэ чалякирэс бутярнэн, кон кэрэ́ла буты́ дро фо́ро.19. Сарэ́ Израилёскирэ ро́дыцы сашты́ (могинэ́на) тэ кэрэ́н буты́ дро фо́ро.20. Саро́ отдыно́ штэ́то дро биш тэ пандж тысёнцы дэстэ́ длугипнаса, буґлыпнаса биш тэ пандж тысёнцы дэстэ́, штарвэнглытко котэ́р, отдэ́н дро свэ́нто котэ́р, кхэтанэ́ форо́скирэ миштыпнаса.21. А саро́, со ячэ́лапэ-тхагарискэ: свэнтонэ́-котэрэскиро рига́тыр, форо́скирэ-миштыпнаскирэ рига́тыр анги́л биш тэ пандж тысёнцы дэстэ́ кэ котэрэскиро васточно ме́жа и пэ западо анги́л биш тэ пандж тысёнцы лашыл за́падно ме́жа пхувья́кири паш ваш тхагарискэ, палдава́ свэ́нто котэ́р пхув и свэ́нто штэ́то явэ́на машки́р лэ́стэ.22. Нэ одова́, со ячэ́лапэ Левитэ́нгирэ миштыпна́стыр и форо́скирэ миштыпна́стыр машкира́л, явэ́ла адя́кэ-паць ваш тхагарискэ а штэ́то машки́р Юдаскири ме́жа и машки́р Вениаминоскири ме́жа явэ́ла тхагарискирэ миштыпнаса.23. А саро́ явирэ родыцэндыр васточнонэ рига́тыр кэ за́падно риг-екх паш Вениаминоскэ.24. Пашы́л Вениаминоскири ме́жа, васточнонэ рига́тыр кэ за́падно риг екх паш Симёноскэ.25. Пашы́л Симёноскири ме́жа васточнонэ рига́тыр кэ за́падно риг-екх паш Исахароскэ.26. Пашы́л Исахороскири ме́жа васточнонэ рига́тыр кэ за́падно риг-екх паш Завулоноскэ.27. Пашы́л Завулоноскири ме́жа, васточнонэ рига́тыр кэ за́падно риг-екх паш Гадоскэ.28. А пашы́л Гадоскири ме́жа пэ паш-рати́тко риг джа́ла паш-рати́тко ме́жа Тамаростыр кэ пани́, кай чингардэнапэ пашо Кадисо, ручаёстыр кэ Баро́ Мо́рё (дэрья́в).29. Акэ, исын пхув, сави́ тумэ́ пир жре́биё роскэдэна Израилёскирэ родыцэнгэ, акэ исын лэ́нгирэ паша́ ракирэ́ла Рай Дэвэ́л, Дэвэ́л.30. Акэ, исын форитка выгиныбэна: паш-ратитконэ́ рига́тыр исын выгиныбэн штар тысёнцы тэ панджшэла́ дэстэ́.31. Форитко по́рта кхарэлпэ, пир Израилёскирэ родыцэнгирэ лава́: кэ паш-рати́тко риг исын трин по́рты: екх Рувимоскири по́рта, екх Юдаскири по́рта, екх Левиёскири по́рта.32. Васточнонэ рига́тыр исын выгиныбэн пэ штар тысёнцы пандждэша́ дэстэ́, и трин по́рты: екх Ёзаскири по́рта, екх Вениаминоскири по́рта, екх Даноскири по́рта.33. Паш-дывэсытконэ́ рига́тыр исын выгиныбэн пэ штар тысёнцы пандждэша́ дэстэ́ и трин по́рты: екх Симеоноскири по́рта, екх Исахороскири по́рта, екх Завулоноскири по́рта.34. Морёстыр исын выгиныбэн пэ штар тысёнцы пандждэша́, дэстэ́ ада́й исын трин по́рты: екх Гадоскири по́рта, екх Асироскири по́рта, екх Нефалимоскири по́рта.35. Саро́ трусця́л (кругом) исын дэшуохто тысёнцы дэстэ́. А форитко лав долэ́ дывэсэ́стыр явэ́ла: “О Рай Дэвэ́л исын одо́й”!Psalms 135:8-148. Ёв хасякирдя́ пэрвонэс, кон бияндёла ци манушэ́ндэ ци кхэритконэ́ мурдалэ́ндэ (машки́р ското) дро Еги́пто;9. Ёв бичхадя́ знаме́нии (ґертыка́) и ди́вы машки́р Ту́тэ, о Еги́пто, пэ Фараоностэ и сарэ́ Лэ́скирэ дынарьендэ?10. Ёв хасякирдя́ барэ́ Наюды́тка на́цыи и мулякирдя́ бут кралье́н:11. Сигонос, Аморее́нгирэ крали́с, Огос, Васаноскирэ крали́с и сарэ́ Ханааноскирэ кралипэна́.12. И Ёв дыя́ лэ́нгири пхув сыр мэкно́ миштыпэ́н Пэ́скирэ манушэ́нгэ Израилёстыр.13. О, Раё Дэ́вла! Тыро́ лав ячэ́лапэ пэ сарэ́ ве́ки! О, Раё Дэ́вла! Рипирибэ́н пал Ту́тэ исын родо́стыр кэ ро́до.14. Пал-дова́ со Рай Дэвэ́л явэ́ла тэ сэндякирэ́л Пэ́скирэ манушэ́н, и Ёв явэ́ла лачхэ́-дескиро кэ Пэ́скирэ писха́рья.Proverbs 29:9-99. Ке́ли годо́ ману́ш исын проти дылынэстэ пир рэ́ндо, ци дылыно́ салапэ, ци холясо́ла усае́кх нанэ рама́нё (миро).1 Peter 4:1-191. И палдава́, сыр Христо́со пирилыджалас пхарипэ́н дрэ лоч, адя́кэ-паць и тумэ́нгэ приявэлапэ тэ лыджа́н пхарипэ́н; пал-дова́ со кон злыджала пхарипэ́н лочаса, одова́ ману́ш мэкэ́ла тэ кэрэ́л грэ́хи,2. соб (кай) палатуно́ (последнё) часо, саво́ яця́пэ лэ́скэ тэ дживэ́л дрэ маса́, тэ дживэ́л адава́ ману́ш на пир пэ́скирэ-лочакиро тырдыпэ́н, а пир Дэвлэ́скири во́ля.3. Пал-дова́ со ухты́лла (до́си) дова́, со тумэ́ англэды́р кэрэ́нас, сыр На́юды, савэ́ камэ́на тэ кэрэ́н: ке́ли тумэ́ рикирдэ пэс дрэ на́гожа рэ́нды (де́лы), дро на́лачхо камибэн дрэ маса́, дро пибэ́н магирибнаса, дро дылыно́ хабэ́н и пибэ́н би меракиро, дро биладжакуно мангипэ́н идолэ́нгэ.4. Палдава́ ж адалэ́ На́юды дивинэна, со тумэ́ буты́р на праста́на кхэтанэ́ лэ́нца пэ на́гожа рэ́нды, и калякирэна тумэн,5. нэ лэ́нгэ трэй явэ́ла тэ дэн отпхэныбэ́н анги́л Одолэ́стэ, Кон явэ́ла сыг тэ сэндякирэ́л джидэн и мулэн.6. Ваш дава́ и мулэнгэ сыс пхэндло́ пал бахталы́ зан (звесь), соб (кай) ёнэ, савэ́ сыс сэндиндлэ, ке́ли ёнэ дживдэ́ дро манушы́тко лоч, соб (кай) ёнэ тэ дживэ́н дро ду́хо (фа́но), сыр Дэвлэ́скэ исын лачхо́.7. Нэ сыг сарэскэ явэ́ла ко́нцо (яго́ро): палдава́ ракхэ́нпэ и дживэ́н годьварэс, ке́ли тумэ́ мангэ́напэ Дэвлэ́скэ;8. а буты́р сарэ́стыр сыкавэ́н паты́в екх екхэ́скэ сарэ́ илэ́стыр, пал-дова́ со паты́в зачхакирэла бут грэ́хи;9. прилэ́н манушэ́н сарэ́ илэ́стыр, савэ́ явэ́на кэ тумэ́ би холямэ́ ракирибнаскиро;10. дынаринэ́н екх екхэ́скэ долэ́ таланоса, саво́ тумэ́ дорэснэ́ Дэвлэ́стыр сы́рбы лачхэ́ кхэри́тка барыдыра́ тэ пиридэ́н манушэ́нгэ ра́зна Дэвлэ́скирэ бахтякирибэна.11. Ко́ли вари-саво́ ману́ш ракирэ́ла, мэк ёв тэ ракирэ́л Дэвлэ́скирэ лавэ́нца; одова́ кон дынаринэла, мэк ёв тэ дынаринэ́л пир зор, сави́ Дэвэ́л дэ́ла лэ́скэ, соб (кай) тэ барьякирэлпэ Дэвэ́л дро саро́ пир Исусо́стэ Христосо́стэ, Савэ́скэ тэ явэ́л сла́ва и зор пэ сарэ́ ве́ки. Ами́нь.12. Мирэ́ дро́га! На дурьен ягитконэ́ пропатякирибнастыр тэ пропатякирэл тумаро́ патяибэ́н, дро дава́ нанэ нисаво́ ди́во;13. а сыр тумэ́ пирилыджана пхарипэ́н, сыр и Христо́со, радынэ́нпэ, пал-дова́ со тумэ́ бут буты́р обрадынэнапэ, ке́ли отчхакирэлапэ Лэ́скири сла́ва.14. Ко́ли обракирэна тумэн пал Христосо́скиро лав, тэды тумэ́ сан бахталэ́, пал-дова́ со Дэвлэ́скирэ-славакиро Ду́хо (Фа́но) згия пэ тумэ́ндэ: (одолэ́ мануша́ калякирэна Лэс, а тумэ́ славинэна).15. Соб (кай) ние́кх тумэ́ндыр тэ на злыджал пхарипэ́н сыр замарибнари (умарибнари), ци чор, ци ману́ш, саво́ кэрэ́ла фуипэ́н; ци сыр ману́ш, саво́ исын ґа́лко кэ чу́жо миштыпэ́н;16. а ко́ли тумэ́ пирилыджана пхарипэ́н сыр Христиани, тэды на ладжан, а славинэ́н Дэвлэ́с, пал-дова́ со тумэн кхарэ́на адя́кэ.17. Пал-дова́ со подги́я часо, со явэ́на тэ сэндинэ́н манушэ́н дро Дэвлэ́скиро Кхэр, и ко́ли амэ ява́са пэ́рва мануша́ пэ сэ́ндо, тэды, со явэ́ла одолэ́ манушэ́нгэ, савэ́ на кандэ́на Дэвлэ́скири бахталы́ зан (звесь)?18. И ко́ли чачунэ́ манушэ́скэ древа́н пхаро́ явэ́ла тэ зракхэлпэ, тэды, со явэ́ла надэвлытконэнца, и грэхитконэ́ манушэ́са?19. И палдава́ мануша́, савэ́ пирилыджана пхарипэ́н пир Дэвлэ́скири во́ля, мэк ёнэ тэ отдэ́н пэ́скиро ди Лэ́скэ, Кон исын чачуно́, и Кон создыя́ лэн, и мэк ёнэ дурэды́р тэ кэрэ́н лачхипэ́н. Romani Bible Baltic 2019 Maintained by the United Bible Societies for the Baltic Romani Mission