Bible in one year - Пэ Балтитко Романи чиб

Bible in one year November 29

1. Пэ три́то бэрш Иоакимоскирэ (Якимоскирэ) кралипнаскиро, Юдэя́кирэ крали́скиро, явдя́ о Навуходоносо́ро, Вавилоно́скиро кра́ли, кэ Ерусалимо и обгия лэс трусця́л халадыбнаса.

2. И дыя́ о Рай Дэвэ́л дро лэ́скиро васт э Иокимос, Юдэя́кирэ крали́с, и ада́кицы кхорэ́ (сасу́ды) Дэвлытконэ́ кхэрэ́стыр, и ёв бичхадя́ лэн пэ пхув Сеноар, кэ лэ́скирэ Дэвлэ́скиро кхэр, и яндя́ адалэ́ сарэ́ кхорэ́ дрэ пиралы́ ваш казна лэ́скирэ дэвлэскири.

3. И пхэндя́ о кра́ли Асфеназоскэ, кон сыс барыдыро́ лэ́скирэ евнухэнгиро, соб (кай) ёв тэ янэл Израилёскирэ чхавэ́н, савэ́ тэ явэ́н кралитконэ и тхагаритконэ родо́стыр,

4. тэрнэ́-бэршэнгирэн (отрокэн), савэ́ндэ нанэ нисавэ доша дрэ маса́ (шталто), гожонэ мо́са, соб (кай) ёнэ тэ ґалён тэ сыклён дро кажно годыпэ́н, дро джиныбэ́н и сы́гэс тэ ґалён, савэ́ могинэ́нас (дэ́нас ра́да) тэ дынаринэ́н (тэ служынэн) дрэ крали́скири фэлатин (коло́в), и, соб (кай) тэ сыклякирэ́н лэн Халдеитконэ лылварипнаскэ (грамотакэ) и чибакэ (чибьякэ).

5. И выдыя лэ́нгэ кра́ли содывэсытко хабэ́н крали́скирэ скаминдэстыр и мол (вино), сави́ ёв кокоро́ пьелас, и пхэндя́ лэн тэ сыклякирэ́н трин бэрш, соб (кай) дро ко́нцо (дро яго́ро) сыклякирибнаскэ (учобакэ) ёнэ могинэ́нас (дэ́нас ра́да) тэ тэрдён тэ дынаринэ́н анги́л крали́стэ.

6. Машкир лэ́ндэ сыс Юда́скирэ чхавэ́ндыр о Дание́лё, о Анания, о Мисаило и о Аза́рия.

7. И пирикхардя лэн барыдыро́ евнухэнгиро – о Дание́лё яця́ о Валтасаро, о Анания – о Седрахо, о Мисаило – о Мисахо и Аза́рия о Авед-Него.

8. О Дание́лё чхудя́ дро пэскро ило́, соб (кай) тэ на магирэлпэ хабнаса кралитконэ скаминдэстыр и моляса, сави́ пьелас о кра́ли, и палдава́ мангдя́ э барыдырэ́с евнухэнгирэс пал дова́, соб (кай) явэ́лас сашты́ лэ́скэ тэ на магирэлпэ.

9. Дыя́ о Дэвэ́л Даниелёскэ ла́ска и лачхипэ́н евнухэнгирэ барыдырэстыр;

10. и о евнухэнгиро барыдыро́ пхэндя́ Даниелёскэ: “Мэ дарава мирэ́ ра́стыр крали́стыр, саво́ кокоро́ припхэндя́ тумэ́нгэ хабэ́н и пибэ́н. И палдава́, сыр дыкхэ́ла о кра́ли тумарэ́ муя́ санэдыр, сыр тэрнэ́ манушэ́ндэ тумарэ́ екхэ-бэршэнгирэндыр, то явэ́ла миро шэро́ банго́ анги́л крали́стэ палэ тумэ́ндэ.”

11. Тэ́ньци пхэндя́ о Дание́лё Амелсароскэ, дыкхибнаскирэскэ, савэ́с евнухэнгиро барыдыро́ причхудя кэ Дание́лё, Анания, Мисаило и Аза́рия:

12. “Мэ манга́ва тут: пропатякир тырэ́ писхарье́н пир дэш дывэса́; и мэк тэ дэн амэ́нгэ тэ хас шаха́ (овошчы) и пани́ тэ пьяс;

13. тэ́ньчи тэ явэ́н анги́л ту́тэ амарэ́ муя́ и э муя́ одолэ́ тэрнэ́-бэршэнгирэ, савэ́ ханас крали́тко хабэ́н, коригэды́р (позжэды́р) кэр тырэ́ писхарье́нца дова́, со ту дыкхэ́са лачхэ́с.”

14. Ёв кандыя́ лэн дро дова́ и пропатякирдя лэн пир дэш дывэса́.

15. Акэ, пэ ко́нцо (яго́ро) кадалэ́ дэш дывэсэнгирэ мина пэ лэ́нгирэ муя́ яця́ гожэдыр, и ёнэ сыс зоралэды́р одолэ́н тэрнэ́-бэршэнгирэндыр, савэ́ ханас крали́тко хабэ́н.

16. И Амелсаро, лэ́нгиро дыкхибнаскиро, лэлас криг лэ́нгиро хабэ́н и мол ваш пибэ́н лэ́ндыр, и дэ́лас лэ́нгэ шаха.

17. И дыя́ о Дэвэ́л штарэнгэ адалэ́ тэрнэ́-бэршэнгирэнгэ джиныбэ́н и ґалыибэ́н дрэ кажно лылвари́ и годы́, а Даниелёскэ ишчо (инкэ́) дыя́ ґалыибэ́н дро кажно дыкхибэ́н, и дрэ сунэ́.

18. Пэ ко́нцо (яго́ро) долэ́ дывэсэнгиро, ке́ли о кра́ли припхэндя́ тэ сыкавэ́н лэн, о барыдыро́ евнухэнгиро сыкадя́ лэн Навуходоносороскэ.

19. И ракирлас лэ́нца о кра́ли, и сарэ́ндыр тэрнэ́-бэршэнгирэн на латхяпэ кадасавэн, сыр Дание́лё, Анания, Мисаило и Аза́рия, и лынэ́ ёнэ тэ дынаринэ́н анги́л крали́стэ.

20. И дро кажно годо́ рэ́ндо и лэ́нгиро розґалыибэн, пал со пхучэлас лэ́ндыр о кра́ли, ёв латхэлас лэн дро дэш мол фэды́р сарэ́н човаханэндыр и магэндыр, савэ́ сыс дро саро́ кралипэ́н лэ́скиро.

21. И сыс одо́й о Даниелио кэ/жы́ко пэ́рво бэрш о Кираскирэ крали́скиро.

Daniel 2:1-49

1. Пэ яви́р бэрш кралипнаскиро Навуходоносороскиро, о Навуходоносо́ро дыкхця́ (дыя́) сунэ́, и залыяпэ ду́хо (фа́но) лэ́скиро, и соибэн гия́ лэ́стыр.

2. Припхэндя́ о кра́ли тэ скэдэ́н сарэ́н човаханэн, и магэн, и джиныбнаскирэн пир планеты, и Халдеен, соб (кай) ёнэ тэ роспхэнэ́н э крали́скэ лэ́скиро суно́. Ёнэ явнэ́, и тэрдинэ́ анги́л крали́стэ.

3. И пхэндя́ лэ́нгэ о кра́ли: “Дыкха́вас сунэ́ мэ, трашадёла о ду́хо (фа́но) миро; ма́нгэ трэй тэ джина́в дава́ суно́.”

4. И пхэндлэ́ э Халдеи крали́скэ Арамеиткэс кэ: “Кра́лё! Яв джидо́ дрэ ве́ки! Пхэн суно́ тырэ́ писхарье́нгэ, и мэ роскэдасам, сави́ зна́чыма исын дрэ лэ́стэ.”

5. Отпхэндя́ о кра́ли и пхэндя́ Халдеенгэ: “Лав отгия́ ма́ндыр; ко́ли тумэ́ тэ на пхэнэ́н миро суно́, и со ёв значынэ́ла, то мэк тэ чингирэн тумэн пэ котэра́ (куски), и кхэра́ тумарэ́ явэ́на роспхагирдэ́.

6. Нэ ко́ли тумэ́ роспхэнэна суно́ и лэ́скири зна́чыма, тэды тэ лэн ма́ндыр да́ры, почасту́нки, и явэ́ла тумэ́нгэ бари паты́в. Адя́кэ пхэнэ́н ма́нгэ суно́ и лэ́скири зна́чыма.”

7. Ёнэ нэвэ́стыр (нэвэ́с) отпхэндлэ́ и ракирдэ́: “Тэ пхэнэ́л о кра́ли пэ́скирэ писхарье́нгэ суно́, и амэ пхэна́са лэ́скири зна́чыма.”

8. Отпхэндя́ о кра́ли и пхэндя́: “Чачэс, джино́м мэ, со тумэ́нгэ трэй тэ выбашавэн часо, пал-дова́ со тумэ́ дыкхэ́на, со лав отгия́ ма́ндыр.

9. Адя́кэ со, ко́ли тумэ́ на роспхэнэнас миро суно́, то тумэ́ндэ екх исын пэ годы́: тумэ́ скэдынэ́пэ тэ пхэнэ́н ма́нгэ хохаибэ́н и начачунэ лава́, соб (кай) тэ джал дурэды́р (накхэла) о часо; адя́кэ, роспхэнэ́н ма́нгэ суно́, и тэды мэ ґалёвава, со тумэ́ сашты́ (могинэ́на) тэ роспхэнэ́н ма́нгэ лэ́скири зна́чыма.”

10. Э Халдеи отпхэндлэ́ крали́скэ и ракирдэ́: “Нанэ пэ пхув э манушэ́с, саво́ могинэлас (дэ́лас ра́да) тэ откэрэл дава́ рэ́ндо (де́ло) крали́скэ, и палдава́ ни екх кра́ли, ни екх тхага́ри, ни екх тхэмэскиро барыдыро́ (правителё), на пхуця́ дасаво ни савэ́ човаханэстыр, ни астрологостыр, ни Халдеёстыр.

11. Рэ́ндо (де́ло), пал саво́ пхучэла о кра́ли, исын пхаро́, со нико́н яви́р на саштынэла (на могинэ́ла (дэла ра́да)) тэ откэрэл лэс крали́скэ, апри́ч дэвлэндэ, савэ́ дживэ́на на дрэ манушаны лоч (плоть).”

12. Росхолясыя о кра́ли и древа́н пхэрдия холямипнаса пал дова́, и припхэндя́ тэ мулякирэ́н сарэ́н годыпнаскирэн дро Вавило́но.

13. Ке́ли выгия́ адасаво́ припхэныбэ́н, и лынэ́ тэ мулякирэ́н годыпнаскирэн, то родэнас Даниелёс, и малэн (другэн) лэскирэн, соб (кай) тэ мулякирэ́н лэн.

14. Тэ́ньци Дание́лё отпхэндя́ илэ́стыр и годыпнаса Ариохоскэ, барыдырэ́скэ пэ кралитконэ стрэгарьендэ, савэ́ выгинэ́ тэ замарэ́н Вавилонытконэ годыпнаскирэн;

15. и пхуця́ Ариохостыр, крали́скирэ барыдырэстыр: “Палсо́ дасаво зорья́са припхэныбэ́н исын крали́стыр?” Тэ́ньци Ариохо роспхэндя́ саро́ рэ́ндо Даниелёскэ.

16. И Дание́лё загия́, и мангдя́ крали́с тэ дэл лэ́скэ часо, соб (кай) ёв тэ пхэнэ́л крали́скэ сунэскири зна́чыма.

17. Дание́лё явдя́ кэ пэ кхэрэ́, и роспхэндя́ саро́ рэ́ндо Ананияскэ, Мисаилоскэ и Азарияскэ, лэскрэ малэнгэ,

18. соб (кай) ёнэ мангнэ́ ла́ска болыбна́скирэ Дэвлэ́стыр пал дасаво гарадо́ чачипэ́н, соб (кай) о Дание́лё лэ́скирэ малэнца тэ на хасён сарэ́нца явирэнца годыпнаскирэнца дро Вавило́но.

19. И тэ́ньчи сыс сыкадо гарадо́ чачипэ́н Даниелёскэ дро ратя́киро дыкхибэ́н, и о Дание́лё бахтякирдя́ болыбна́скирэ Дэвлэ́с.

20. О Дание́лё отпхэндя́ и пхэндя́: “Мэк тэ явэ́л бахтало́ Лав Ра́скирэ-Дэвлэ́скиро векостыр пэ сарэ́ ве́ки! Пал-дова́ со Лэ́стэ исын годы́ и зор.

21. И ёв парувэла часы и бэршы́тка поры, Ёв тэлякирэла кралье́н и Ёв чхувэ́ла кралье́н; дэ́ла годыпэ́н годыпнаскирэнгэ и джиныбэ́н годэнгэ,

22. Ёв откэрэла хорало и гарадо́ чачипэ́н, Ёв джинэ́ла, со исын дро калыпэ́н (цёмныма), и дуд исын Лэ́са.

23. Мэ парикирава и мэ шарава Тут, Дэ́вла, мирэ́ дадэ́нгиро, со Ту дыя́н ма́нгэ годы́ и зор и откэрдян ма́нгэ одова́, пал со мангэнас Тут; пал-дова́ со Ту откэрдян амэ́нгэ рэ́ндо крали́скиро.”

24. Пало́ дова́ гия́ Дание́лё кэ Ариохо, савэ́скэ о кра́ли припхэндя́ тэ мулякирэ́л э Вавилонытконэ годыпнаскирэн, явдя́ и пхэндя́: “На мулякир Вавилонытконэ годыпнаскирэн; лэ ман кэ кра́ли, мэ пхэна́ва лэ́скэ зна́чыма суноскири.”

25. Тэ́ньци Ариохо сы́гэс лыджия́ Даниелёс кэ кра́ли и пхэндя́ лэ́скэ: “Мэ латхём пленонэ Юдытконэ чхавэ́ндыр манушэ́с, саво́ откэрэла крали́скэ суноскири зна́чыма.”

26. О кра́ли пхэндя́ Даниелёскэ, саво́ кхардо сыс Валтасаро: “Ци сашты́ ту, хай, тэ пхэнэ́с ма́нгэ суно́, саво́ мэ дыкхцём, и лэ́скири зна́чыма?”

27. Дание́лё отпхэндя́ анги́л крали́стэ и ракирдя́: “Гарадо́ чачипэ́н, пал саво́ пхучэла о кра́ли, нашты́ тэ откэрэн ни годыпнаскирэ (тануки), ни човаханэ.

28. Нэ исын пэ болыбэ́н о Дэвэ́л, Саво́ откэрэла гарадэ́ чачипэна́; и Ёв откэрдя крали́скэ Навуходоносороскэ, со явэ́ла дрэ палатунэ́ (последня) дывэса́. Тыро́ суно́ и дыкхибэна трэ шэрэскирэ пиро́ тыро́ чхуибэ́н сыс дасавэ́:

29. “Ту, кра́лё, пэ тыро́ чхуибэ́н думиндян пал-дова́, со явэ́ла пало́ дава́, и Ёв, Откэрибнытко (Открываюшчо) гарадэ́-чачипнэнгиро, сыкадя́ ту́кэ дова́, со явэ́ла.

30. Нэ ма́нгэ дасаво гарадо́ чачипэ́н сыс сыкадо на палдова́, со мэ со́мас годьварэдыр сарэ́ джидэндыр, нэ ваш дова́, соб (кай) тэ явэ́л сыкадо суноскири зна́чыма крали́скэ, и, соб (кай) ту ґалыян ду́мы тырэ́ илэ́скирэ.

31. Ту́кэ, кра́лё, сыс дасаво дыкхибэ́н: акэ, саво́-то баро́ вычхиндло муй идоло! Древа́н баро́ сыс одова́ идоло, лэ́скири шук древа́н зяинэлас, ёв сыс тэрдо́ анги́л ту́тэ, и дараны сыс лэ́скири форма.

32. Дро дова́ идоло сыс шэро́ жужэ́ сувнака́стыр, колы́н и васта́ лэ́скирэ-рупувэ́, пэр лэ́скиро и стаця (бёдры) лэ́скирэ-харкунэ́ (меди́тка),

33. лытки лэ́скирэ-саструнэ́, ґэра́ лэ́скирэ-паш саструнэ́, паш-глэяна (глинытка).

34. Ту дыкхця́н лэс анги́л дова́ моменто, сыр кокоро́ бар откусцяпэ бэрга́тыр на чиладо вастэ́са, пэкадя́ дро идоло, дрэ саструнэ́ и глэяна лэ́скирэ ґэра́, и розмардя́ лэн пэ котэра́ (куски).

35. Тэ́ньци саро́ сыс пиримардо пэ екх тыкнэ́ котэрорэ: састы́р, ґлэя, харко́ма, руп и сувнака́й кэрдэ́пэ сыр о пра́хо пэ лынаскирэ гива́-обкэрибнаскирэ шурны, и балва́л лыджия́ криг лэн, и шпэ́ра (слядо) лэ́ндыр на яця́пэ; и бар, кай пхарадя идоло, кэрдя́пэ барэ́ бэргаса и пхэрдия сари́ пхув.

36. Акэ, исын суно́! Пхэнасам акана́ анги́л крали́стэ и лэ́скиро ґалыибэ́н.

37. Ту, кра́лё, сан кральенгиро кра́ли, савэ́скэ о Дэвэ́л болыбна́скиро дыя́ о кралипэ́н, зор, зоралыпэ́н и сла́ва,

38. и сарэ́н чхавэ́н манушэнгирэн, кай бы ёнэ тэ на дживэ́н, э рискирибна́скирэ мурдалэ́н (зверен) пэ пхув и чириклен пэ болыбэ́н, отдыя́ дрэ тырэ́ васта́ и чхудя́ тут хула́са упра́л сарэ́ндэ лэ́ндэ. Ту сан – дава́ сувнакуно́ шэро́!

39. Нэ пало́ ту́тэ ґаздэ́лапэ яви́р кралипэ́н, тэлэды́р тырэстыр, и ишчо (инкэ́) три́то кралипэ́н, харкуно, саво́ лэ́ла тэ раинэл пэ сари́ пхув.

40. А шта́рто кралипэ́н явэ́ла зорало́, сыр састы́р, пал-дова́ со, сыр састы́р розмарэла и кэрэ́ла хурдэдыр (дробнэдыр) саро́, адя́кэ и ёв, явэ́ла тэ пхаравэл и тэ розмарэл пэ котэра́.

41. Нэ дова́, со ту дыкхця́н-ґэра́ и ангушта ґэрэнгирэ на́бут пиритконэ глэятыр, на́бут саструнэ́, то адя́кэ явэ́ла роскэрдо кралипэ́н, и дрэ лэ́стэ ячэ́лапэ на́бут саструно зоралыпэ́н, адя́кэ сыр ту дыкхця́н састы́р, змешымэ мэлалэ ґлэяса.

42. И сыр ΄гэрэнгирэ ангушта сыс паш-саструнэ́, паш-глэяна, то адя́кэ о кралипэ́н явэ́ла паш зорало́, паш бизорья́киро.

43. И со ту дыкхця́н састы́р, змешымо глэяса мэлаляса, дава́ сыкавэ́ла, со ёнэ явэ́на тэ змешынэнпэ манушэ́нгирэ родэнца, нэ ёнэ на притырдэнапэ екх явирэса, сыр састы́р на мешынэлапэ ґлэяса.

44. И дро дывэса́ кодолэ́ кралипнаскирэ о Дэвэ́л Болыбна́скиро чхувэ́ла кралипэ́н, саво́ дро ве́ки на пхадёла, и кодова́ кралипэ́н на явэ́ла пиридыно явирэ народоскэ; ёв пхаравэла и пхагирэ́ла сарэ́ кралипэна́, и ёв кокоро́ явэ́ла тэ тэрдёл дро ве́ки,

45. адя́кэ, сыр ту дыкхця́н, со бар кусцяпэ бэрга́тыр сы́рбы начиладэ вастэ́са, саво́ розмардя́ пэ тыкнэ́ которорэ састы́р, харко́ма, ґлэя, руп и сувнака́й – адя́кэ Баро́ Дэвэ́л дыя́ тэ джинэ́л крали́скэ, со явэ́ла пало́ саро́ дава́. Чачуно́ исын дава́ суно́, и патяибны́тко исын зна́чыма!”

46. Тэ́ньци кра́ли Навуходоносо́ро дыяпэ муял пэ́скэ и бандия анги́л Даниелёстэ, и припхэндя́ тэ янэ́н лэ́скэ почасту́нки (да́ры), и тэ тхувлякирэн дрогонэ́ смолэнца лэ́скэ.

47. И отпхэндя́ и ракирдя́ о кра́ли Даниелёскэ: “Чачэс, тумаро́ Дэвэ́л исын Дэвэ́л дэвлэнгиро и Баро́ Рай кральенгиро, Саво́ откэрэла гарадэ́ чачипэна́, ке́ли ту дыя́н ра́да тэ откэрэс дава́ гарадо́ чачипэ́н!”

48. Тэ́ньци ґаздыя́ упрэ́ о кра́ли Даниелёс и дыя́ лэ́скэ бут барэ́ почасту́нки, и чхудя́ лэс упрэ́ пэ сари́ Вавилонытко пхув и англунэ барыдырэ́са упрэ́ сарэ́ндэ годыпнаскирэндэ дро Вавило́но.

49. Нэ Дание́лё мангдя́ крали́с, и ёв чхудя́ Шэдрахос, Мишахос и Авед-Негос упрэ́ пэ рэ́нды Вавилонытконэ-тхэмэ́скирэ, и о Дание́лё яця́пэ пашы́л крали́скири грэ́да (дво́ро).

Psalms 135:15-21

15. Наюдытконэ́-нацыенгирэ и́долы исын рупэ́стыр и сувнака́стыр, манушэ́нгирэ васта́ кэрдэ́ лэн:

16. лэ́ндэ исын муя́, нэ ёнэ на пхэнэ́на нисо́, лэ́ндэ исын якха́, нэ ёнэ на дыкхэ́на;

17. лэ́ндэ исын кана́, нэ ёнэ на шунэ́на, и нанэ пхурд (дыханиё) лэ́нгирэ мо́стыр.

18. Мэк одолэ́, савэ́ кэрдэ́ лэн, тэ явэ́н дасавэ́-паць сыр лэ́нгирэ и́долы; и сарэ́ яви́р мануша́, савэ́ ужакирэ́на лачхипэ́н далэ́ статулэ́ндыр (статуендыр).

19. Мануша́лэ Израилёскирэ кхэрэ́стыр! Тумэ́ тэ вышарэн и тэ парикирэ́н Ра́скэ-Дэвлэ́скэ! Ароноскиро кхэр! Тэ вышарэн тумэ́ и тэ парикирэ́н Ра́скэ-Дэвлэ́скэ!

20. Мануша́лэ Левиёскирэ кхэрэ́стыр! Тэ вышарэн тумэ́ и тэ парикирэ́н Ра́скэ-Дэвлэ́скэ! Тумэ́, савэ́ дарэ́на Ра́стыр-Дэвлэ́стыр, тэ вышарэн и тэ парикирэ́н Ра́скэ-Дэвлэ́скэ!

21. Тэ вышарэн и тэ парикирэ́н Ра́скэ-Дэвлэ́скэ Сионо́стыр, Саво́ дживэ́ла кэ Ерусалимо! Аллилуя!

Proverbs 29:10-10

10. Мануша́, савэ́ исын ґалка (жадна) тэ прочхувэн явирэскиро рат, лэ́нгэ зоралэ́с на пир ило́ бидошэнгирэ мануша́, нэ чачипнытка (праведна) мануша́ пэкэнапэ (заботисона) пал адасавэ́ манушэ́ндэ.

1 Peter 5:1-14

1. Мэ, кокоро́ сом годэпхуро́ и пастырё (чхупна́ри), манга́ва тумарэ́ кхангирья́кирэ годэпхурэн и пастырен, пал-дова́ со мэ сом якхи́тко, сыр Христо́со пирилыджия пхарипэ́н, адя́кэ-паць ма́ндэ исын паш дрэ сла́ва, сави́ явэ́ла сыкады:

2. ракхэ́н Дэвлэ́скирэ манушэ́н, савэ́ исын машки́р тумэ́ндэ, кэрэ́н дава́ на пир трэ́бима, а сыр трэй Дэвлэ́скэ и на пал дова́, со тумэ́ сорбы сан бокхалэ́ кэ ловэ́, а пал-дова́ со тумэ́ камэ́на дава́ илэ́стыр;

3. и на хулаинэн пэ одолэ́ манушэ́ндэ, савэ́н Дэвэ́л допатяндыя тумэ́нгэ, а сыкавэ́н пэс лачхэ́ рига́тыр.

4. И ке́ли явэ́ла Са́мо Барэды́р Пастырё (Чхупна́ри), Христо́со, тэды тумэ́ дорэсэ́на славакири коро́на, сави́ явэ́ла тэ зяинэл ве́чнэс.

5. Адя́кэ-паць, тэрнэ́ мануша́лэ, кандэ́н пэ́скирэ годэпхурэн, явэ́н ковлэ́-илы́тка екх кэ екх, на шарэ́н пэс екх анги́л явирэ́стэ, пал-дова́ со Дэвэ́л исын проти одолэ́ндэ, кон гинэ́ла пэс вучэды́р явирэндыр, а одолэ́нгэ, кон на шарэла пэс, Ёв дэ́ла васт.

6. Кандэ́н и бандён тэл зорало́ Дэвлэ́скиро васт, соб (кай) Ёв тэ ґаздэл вучэ́с тумэн дро Пэ́скиро часо;

7. чхувэ́н упрэ́ сарэ́ пэ́скирэ пхарэ́ ду́мы пэ Лэ́стэ, пал-дова́ со Ёв дыкхэ́ла пал тумэ́ндэ.

8. Явэ́н трезва (ны́рна), ракхэ́нпэ. Тумаро вэ́рго, на́лачхо, псирэ́ла сыр шчэр (ле́во), саво́ рыкинэла и родэ́ла, конэ́с тэ хал.

9. Тэрдён проти лэ́стэ зоралэ́ патяибна́са, джинэ́н, со адя́кэ-паць пиристрадындлэ тумарэ́ пша́ла, савэ́ дживэ́на пир свэ́то.

10. Нэ Дэвэ́л, Саво́ бахтякирэ́ла, и Саво́ кхардя́ тумэн дрэ вечна Пэ́скири сла́ва, ко́ли тумэ́нгэ и приявэлапэ набаро́ часо тэ страдынэл, Ёв Кокоро́ кэрэ́ла тумэн зоралэды́р и дэ́ла зор, соб (кай) тумэ́ тэ на кунинэнпэ дро пэ́скиро патяибэ́н;

11. мэк тэ явэ́л Лэ́скэ сла́ва и зор пэ сарэ́ ве́ки. Ами́нь.

12. Мэ чхиндём дава́ набаро́ лыл тумэ́нгэ пир Силуаностэ, саво́ исын чачуно́ тумаро́ пшал, сыр мэ думинава, соб (кай) тэ подрикирав тумэн, рипири тэ допхэнав, со дава́ исын чачуно́ Дэвлэ́скиро бахтякирибэ́н, дро саво́ тумэ́ зоралэ́с сан тэрдэ́.

13. Пиридэла “паклоно” тумэ́нгэ кхангири́, со исын дро Вавило́но, Сави́ выкэдыя́ Дэвэ́л, адя́кэ-паць, сыр тумэн. Адя́кэ-паць пиридэла “паклоно” миро чхаво́ Марко.

14. Пиридэ́н “паклоно” и чамудэн екх екхэ́с Христосо́скирэ ласкаса. Мэк тэ явэ́л рама́нё (миро) тумэ́нгэ сарэ́нгэ, савэ́ исын Христосо́скирэ. Ами́нь.

Romani Bible Baltic 2019

Maintained by the United Bible Societies for the Baltic Romani Mission