Bible in one year November 3Lamentations 1:1-221. Пхаро́ исын дро Ерусалимо: ёв (фо́ро) исын би манушэ́нгиро, сы́рбы пивлы (удова), сави́ сыс раны машки́р манушыпнаскирэ на́цыи! Акэ, кон сыс тхага́ри пэ пхувья́кирэ рига́, одова́ ману́ш, яця́ дынариса.2. Ёв ровэла киркэс раты́, и ясва исын пэ лэ́скирэ чхама (шчоки): нанэ ние́кх подрикирибнаскиро машки́р сарэ́ндэ, конэ́скэ сыс дро́го дава́ фо́ро. Сарэ́ форо́скирэ мала́ бикиндлэ лэс, и ёнэ ячнэ́ лэ́скирэ вэргэнца (врогэнца).3. Юдэя́кирэ мануша́ гинэ́ дрэ наволя, кай мэнчынэна лэн и енэ исын пхарэ́ – бутякирэ андынаршчыки. Ёнэ дживэ́на машки́р Наюдэ́ндэ, ёнэ на откхинёна. Сарэ́, кон традынэ лэн, явнэ́ наўжакирдэс пэ лэ́ндэ, сыр лэ́нгэ яця́ пхаро́ тэ дживэ́н.4. Сионоскирэ дрома́ тугинэна, пал-дова́ со ние́кх на явэ́ла тэ свэнкинэл. Сарэ́ лэ́скирэ по́рты исын чхучэ́, лэ́скирэ рашая́ дэ́на ґондя́, лэ́скирэ патывалэ́ тырнэ джувле́н притасавэ́на, Сионоскэ, кокорэскэ, исын пхаро́.5. Лэ́скирэ намала ячнэ́ рая (ранца), лэ́скирэ вэ́рги зяинэна миштыпнаса, пал-дова́ со Рай Дэвэ́л притасадя Сионоскирэ манушэ́н пир дова́, со ёнэ кэрдэ́ бут чорипэ́н. Лэ́скирэ чхаворэ́ гинэ́ дро пле́но анги́л намалэстэ.6. Сари́ шук Сионоскирэ чхатыр хасия́, ла́кирэ тхага́рья ячнэ́ сы́рбы мирга (оленё), савьятэ нанэ чаритко пхув, савэ́ гинэ́ бизорья́кирэ анги́л традыпнаскирэстэ.7. Дрэ дывэса́, ке́ли ёнэ мэнчындлэпэ и лэн традэнас, тэды Ерусалимо рипирдя сарэ́ куч рэ́нды, со сыс ґарэдыр лэ́стэ, сыр хасинэ́ лэ́скирэ мануша́ вэргоскирэ вастэ́ндыр и ние́кх на дыя́ васт лэ́скэ. Намала дыкхнэ́ лэс и ёнэ сандлэпэ холямэс лэ́скирэ бэдыпнастыр.8. Ерусалимо кэрдя́ баро́ грэ́хо, палдава́ ёв яця́ магирдо́. Сарэ́, кон кутякирдэ лэс, мэкнэ́ тэ кэрэ́н паты́в; пал-дова́ со ёнэ дыкхнэ́ лэ́скиро нангипэ́н. Ёв, чачо́, дыя́ ґондя́ и гия́ криг.9. Лэ́скиро магирипэ́н исын пэ лэ́скирэ и́дя, ёв на думиндя пал пэ́скиро джиибна́скиро ко́нцо (яго́ро), палдава́ ёв пыя́ адя́кэ намиштэс, лэ́стэ нанэ подрикирибнаскиро. Раё Дэ́вла! Дыкх мирэ́ мэ́ньки, пал-дова́ со вэ́рго барьякирдя пэс.10. Вэ́рго (врого) диндькирдя пэ́скиро васт пир кучипэ́н, со сыс лэ́стэ; Ерусалимо дыкхця́ сыр На́юды гинэ́ андрэ́ Свэ́нто Штэ́то, конэ́скэ Ту припхэндян тэ на джа́н андрэ́ Тыри́ Кхангири́.11. Сарэ́ лэ́скирэ мануша́ дэ́на ґондя́, ёнэ радэна маро́; ёнэ дынэ́ сувнакая и куч бара́ пал хабэ́н, соб (кай) тэ ракхэ́н джиибэ́н. “Дыкх, Раё Дэ́вла, обдумин, сыр санапэ холямэс ма́ндыр!” – ракирэ́ла Ерусалимо.12. “Сарэ́нгэ тумэ́нгэ дава́ нисо́, кон джа́ла пэ́скэ (накхэла) маму́й! Ѓа́да, дыкхэ́н: ци исын ишчо (инкэ́) вари-конэ́стэ дасави́ дукх сыр ма́ндэ – со пыя́ пэ ма́ндэ, – савья́са Рай Дэвэ́л притасадя ман дро дывэ́с, ке́ли Ёв холя́сыя зоралэ́с.13. Вучипна́стыр Ёв бичхадя́ яг пэ мирэ́ кокалы́, и яг лыя́ зор пэ миро фо́ро; Ёв росчхудя́ фэлы́ ваш мири́ ґэро́й и рискирдя́ ман палэ; Ёв кэрдя́ адя́кэ, соб (кай) мэ тэ явав чхучо́ (пусто), соб (кай) мэ тэ млоснёвав (тэ нашавав зор) саро́ дывэ́с.14. Рай Дэвэ́л пхандя зоралэ́с Пэ́скирэ вастэ́са ґа́мо мирэ́ чорипна́стыр; ёй исын кхуды́ и зарэсця пэ мири́ мэн. Ёв кэрдя́ адя́кэ, со мири́ зор замыя́. Ёв здыя ман дрэ васта́, савэ́ндыр мэ на могина́ва тэ ґаздавпэ.15. Рай Дэвэ́л штакирдя тэл ґэра́ сарэ́ мирэ́ зоралыпнаскирэ манушэ́н машкира́л миро фо́ро, Ёв кхардя́ кхэтанэ́ скэдыибэ́н пэ ма́ндэ тэ затасавэн сарэ́ мирэ́ тырнэн манушэ́н: Рай Дэвэ́л штакирэла сы́рбы дро пресо патываля тэрня джувля́, кон исын Юдэякири чхай.16. Палдава́ мэ и ровава, мири́ якх чхувэ́лапэ пане́са, пал-дова́ со миро подрикирибнаскиро, кон могинэлас тэ дэл палэ джиибэ́н мирэ́ дескэ, исын дур ма́ндыр. Мирэ́ чхавэ́ нашадынэ, пал-дова́ со вэ́рго пирилыя упралыпэ́н.”17. Сио́но д(з)инд(з)ькирэла пэ́скирэ васта́, нэ нанэ ние́кх тэ подрикирэ́л лэ́скиро ду́хо (фа́но). Рай Дэвэ́л припхэндя́ адя́кэ, соб (кай) тэ явэ́н лэ́скирэ мала́ трусця́л Яковостэ (Якубостэ), нэ мэ, Ерусалимо, яцём магирдо́ машки́р лэ́ндэ.18. Рай Дэвэ́л исын чачипна́скиро, пал-дова́ со да мэ кэрдём бу́нто пэ Лэ́скирэ припхэныбэна́. Шунэ́н, какана́, сарэ́ манушыпнаскирэ на́цыи, и, ґа́да, мэ пыём дро ду́хо (фа́но), а мэ, мирэ́ чхая́ и мирэ́ тырнэ мануша́ гинэ́ дро пле́но.19. Мэ кхардём одолэ́н, кон сыс мирэ́ дру́ги (мала́), нэ ёнэ хохадэ ман; мирэ́ рашая́ и мирэ́ пхурэ́ пхурдынэ пэ́стыр палатуно́ (последнё) ду́хо (фа́но) дро миро фо́ро, родыи пэ́скэ маро́ тэ ракхэ́н джиибэ́н.20. Дыкх, Раё Дэ́вла, сыр бари биба́хт пыя́ пэ ма́ндэ; миро ди исын дрэ траш, миро ило́ рискирдяпэ упрэ́ дрэ ма́ндэ, пал-дова́ со мэ кэравас дова́, со мэ камамас. Яврестыр какана́ курта́ла (мечо) чингирэла шэро́, нэ кхэрэ́ исын сы́рбы мэрибэ́н.21. Со мэ да́ва ґондя́, со нанэ кон тэ подрикирэ́л ман. Сарэ́ мирэ́ вэ́рги шундлэ́ пал мири́ бари би́да, ёнэ радынэ́напэ далэ́стыр, со Ту кэрдя́н дава́. Бичха́в дова́ дывэ́с, со Ту, Раё Дэ́вла, пхэндя́н статэчнэс, мэк ёнэ тэ ячэ́нпэ дасавэ́-паць, сыр мэ сом.22. Мэк саро́ лэ́нгиро фуипэ́н тэ сыкадёл анги́л Ту́тэ, и кэр лэ́нгэ дова́, со Ту кэрдя́н ма́нгэ пал миро чорипэ́н, пал-дова́ со мэ пхарэ́с дава́ ґондя́, и миро ило́ нашавэла зор.”Lamentations 2:1-221. Сыр чхакирдя Рай Дэвэ́л Сионоскирья Чха цёмнонэ облокоса, дрэ Пэ́скири холы́! Ёв чхурдыя́ тэлэ́ болыбна́стыр Израилёскири гожыма и на рипирдя пал Пэ́скирэ-ґэрэнгиро прэдкицо дро дывэ́с, сыр Ёв холя́сыя.2. Рай Дэвэ́л хасякирдя́ и на потангиндя сарэ́ Яково́скирэ кхэра́: Ёв чхурдыя́ тэлэ́ холя́тыр Юдэя́кирэ-чхакирэ тва́рдыми [зоралэ́ штэ́ты-р.с.], Ёв пхагирдя́ сарэ́са лэн пэ пхув, Ёв чхудя́ магирипэ́н пэ кралипэ́н и лэ́скирэ тхагарьендэ.3. Ёв чингирдя тэ хасёл кажно Израилёскиро марибны́тко шынг Пэ́скирэ барэ́ холя́тыр; Ёв дыяпэ палэ Пэ́скирэ вастэ́са анги́л дова́, сыр явдя́ вэ́рго, Ёв росхачкирдя бари яг маму́й Яковостэ, соб (кай) тэ хал саро́, со сыс трусця́л.4. Ёв ґаздыя́ Пэ́скиро лу́ко пэ амэ́ндэ сыр вэ́рго, Ёв тэрдия́ дро стонка Пэ́скирэ чачэ́ вастэ́са сы́рбы вэ́рго, и Ёв мулякирдя́ саро́, со сыс шука́р Лэ́скирэ якхэнгэ. Ёв вычхудя́ Лэ́скири холы́ сы́рбы яг пэ ша́тра, кай сыс Сионо́скири чхай.5. Рай Дэвэ́л яця́ сыр вэ́рго: Ёв пхагирдя́ тэлэ́ Израилё, Ёв пхагирдя́ тэлэ́ сарэ́ лэ́скирэ фэлатиня́, Ёв вымардя пэ котэра́ лэ́скирэ тва́рдыми и Ёв дыя́ бутэды́р роибэ́н и ту́га Юдэя́кирэ Чхакэ.6. И Ёв холямэс роспхагирдя́ Пэ́скири Кхангири́ сы́рбы хру́сты унтатыр (садостыр), Ёв мардя пэ котэра́ штэ́то, кай кэдэнаспэ тэ дэн паты́в Лэ́скэ. Рай Дэвэ́л кэрдя́ адя́кэ, соб (кай) тэ бистрэн упхэндлэ свэ́нки са́ваты и дро Израилё, Ёв яця́ тэ на дэл паты́в крали́скэ и раша́скэ.7. Ёв отпхэндяпэ ладжаса Пэ́скирэ алтарёстыр, Ёв мэкця́ Пэ́скиро Свэ́нто Штэ́то; Ёв отдыя́ фэлатинякирэ ва́нты Ерусалимо́стыр дрэ вэргоскирэ васта́. Ёнэ ґаздынэ́ дасави́ го́дла дро Ра́скирэ-Дэвлэ́скиро Кхэр, сыр дро свэнкэнгиро дывэ́с.8. Рай Дэвэ́л придуминдэ тэ хасякирэ́л Сионоскирэ-Чхакири ва́нта: Ёв диндькирдя шэло, Ёв на обрикирдя Пэ́скиро васт, соб (кай) тэ на хасякирэ́л, Ёв кэрдя́ адя́кэ, со вало и ва́нта лынэ́ тэ ровэ́н тугатыр, и исын паштэ́ котэрэнца кхэтанэ́.9. Форо́скирэ по́рты бэшнэ́ дрэ пхув: Рай Дэвэ́л хасякирдя́ и пхагирдя́ форо́скирэ штабы, форо́скирэ кра́ли и тхага́рья исын бичхадэ́ машки́р Наюдэ́ндэ. Зако́но буты́р нанэ, и форо́скири проро́ки на дыкхэ́на сунэ́ Ра́стыр-Дэвлэ́стыр.10. Годэпхурэ́ Сионоскирэ исын бэштэ́ штылэ́с пэ пхув; и исын ёнэ чхурдэна пра́хо пэ пэ́скирэ шэрэ́ и ёнэ подпхандэнапэ жалобнонэ гонэса. Ерусалимо́скирэ патывалэ́ тырнэ джувля́ бандякирэна шэрэ́ кэ пхув.11. Миря якха́ хасёна ясвэндыр, саро́ андра́л ма́ндэ исын дрэ траш, миро кало́ буко (печонка ) чхувэ́лапэ яври́ пэ пхув, пир-дова́ со хасёна мирэ́ – манушэ́нгири чхай, пал-дова́ со чхаворэ́ и бияты нашавэна зор пэ вули́цы (га́сы) дро фо́ро.12. Ёнэ ракирэ́на пэ́скирэ даенгэ: ‘Кай исын гив и кай исын мол?’ Ёнэ мэрэ́на [нашавэна соджиныбэн-ю.о.] сы́рбы дукхадэ пир форо́скирэ га́сы, и ёнэ отдэна пэ́скиро ди пал лэ́нгирэ – дакири брэг.13. Со́са ма́нгэ тэ раманякирав тут? Со́са ма́нгэ тэ поровнинав тут, Ерусалимо́скири чхай? Со́са тэ ровнякирав тут, соб (кай) ма́нгэ тэ дав лачхо́ лав ту́кэ, патывалы́ тэрны́ джувлы́, чхай Сионо́стыр? Пал-дова́, со тыро́ бэдыпэн росчхудяпэ буґлэс сыр мо́рё (дэрья́в), кон могинэ́ла тэ састякирэл тут?14. Тырэ́ проро́ки дыкхнэ́ ваш ту́кэ чхучэ́ и нагодьварэ сунэ́; ёнэ на сыкадэ тыро́ чорипэ́н, соб (кай) тэ рискирэ́н палэ тумэн плено́стыр, нэ ёнэ дыкхнэ́ ваш ту́кэ хоханэ́ ангилпхэныбэна; палдова́ и выбичхадэ тумэн.15. Сарэ́, кон джа́ла пашы́л, пэкавэна пир васта́ пэ ту́тэ; ёнэ сипинэна и кунинэна шэрэнца пэ Ерусалимо́скирэ чхатэ: “Ци дава́ исын фо́ро, со кхардяпэ Гожымакиро пхэрдыпэн, сарэ́ – пхувья́кири ра́дыма?”16. Сарэ́ тырэ́ вэ́рги псирадэ пэ́скирэ муя́ пэ ту́тэ: ёнэ сипинэна и ёнэ скрежынэна пэ́скирэ дандэнца. Ёнэ ракирэ́на: “Амэ хасякирдям дава́ фо́ро! Акэ, исын дывэ́с, со амэ ужакирдям, амэ латхям дова́, амэ дыкхцям дава́.”17. Рай Дэвэ́л кэрдя́ дова́, со Ёв придуминдя: Ёв выпхэрдякирдя Пэ́скиро лав, со Ёв припхэндя́ дрэ ґаратунэ́ дывэса́. Ёв чхурдыя́ тэлэ́ Ерусалимо, и Ёв на потангиндя, Ёв кэрдя́ адя́кэ, соб (кай) тыро́ вэ́рго древа́н тэ радынэ́лпэ тырэ́ бибахтятыр, Ёв барьякирдя зор тырэ́ намалэнгэ.18. Ерусалимо́скирэ – манушэ́нгиро ило́ лыя́ тэ дэл го́дла роибнаса кэ Дэвэ́л: о Сионоскирэ-Чхакири ва́нта! Мэк тэ прастан тырэ́ ясва сыр рэка (лэнь) дывэ́с и рат; на откхинёв, на дэ пэ́скирэ якхэнгэ тэ откхинён.19. ґаздэпэ, дэ го́дла яври́ раты́, ке́ли кажно стрэ́га джа́ла, вычхув сыр пани́ пэ́скиро ило́ анги́л Растэ-Дэвлэ́стэ, ґа́здэ пэ́скирэ васта́ кэ Ёв ваш джиибэ́н тырэ́ тырнэ биятэнгиро, савэ́ нашавэна зор бокха́тыр пэ кажнонэ́-гасакиро вэнгло.20. “Дыкх, Раё Дэ́вла, и обдумин, конэ́скэ Ту кэрдя́н адя́кэ? Соб (кай) джувля́ тэ хан пэ́скиро барьякирдо́ (пло́до), конэ́с ёнэ барьякирдэ́? Соб (кай), хай, тэ мулякирэ́н раша́с и пророко́с пэ Ра́скирэ-Дэвлэ́скиро Свэ́нто Штэ́то?21. Тырнэ и пхуранэ́ исын паштэ́ пэ пхув пэ га́сы, и ёнэ мирэ́ патывалэ́ джувля́ и мирэ́ тэрнэ́ мануша́ пынэ́ куртала́тыр; Ту мулякирдян лэн дро дывэ́с, сыр Ту холясыян, Ту замардян лэн и Ту на тангиндян (на пожалиндян).22. Ту кхардян кхэтанэ́ сы́рбы пэ свэнкитко дывэ́с траша, со обгинэ трусця́л ман; дро дывэ́с, сыр Ту холясыян, ние́кх на насця, на яця́пэ. Кодолэ́н, конэ́скэ мэ давас колы́н и конэ́с мэ барьякирдём, мирэ́ вэ́рги выханэ.”Psalms 119:137-144137. Ту сан чачипна́скиро, о Раё Дэ́вла, и Тырэ́ сэнды исын чачунэ́.138. Ту дыя́н Пэ́скирэ чачунэ́ досыкаибэна; ёнэ исын древа́н патяибнытка.139. Миро зэвлэныпэн хачкирдя́ сыр яг ман, пал-дова́ со мирэ́ вэ́рги бистырдэ Тыро́ лав.140. Тыро́ лав исын древа́н пропатякирдо, и Тыро́ писха́ри выкэдэ́ла лэс.141. Мэ сом тыкно́ и сом дрэ тыкны паты́в, нэ мэ на бистырдём Тырэ́ упхэныбэна́.142. Тыро́ чачипэ́н явэ́ла ўса́ды (сак) чачипна́скиро, и Тыро́ Зако́но исын чачуно́.143. Пхарипэ́н и би́да пирилынэ ман: нэ мэ бахталёвава Тырэ́ припхэныбнэндыр.144. Тырэ́ досыкаибэна исын чачипнаскирэ пэ сарэ́ ве́ки: дэ годы́ ма́нгэ, и мэ ява́ва тэ джива́в.Proverbs 28:9-109. Кодолэстэ, кон рискирэ́ла криг пэ́скиро кан, соб (кай) тэ шунэ́л Зако́но, адасавэстэ аж и лэ́скиро мангипэ́н Дэвлэ́скэ исын джунгало́ (брыдко).10. Кон кэрэ́ла адя́кэ, со дэвлы́тка джа́на дрэ риг пэ бибахтало́ дром, кодова́ кокоро́ пэрэ́ла дрэ ґанби́н (яма), со ёв выґанадя, а бидошэнгирэ мануша́ дорэсэ́на лачхипэ́н дро миштыпэ́н.Titoske 3:1-151. Пхэн ишчо (инкэ́) манушэ́нгэ пал дова́, соб (кай) ёнэ тэ кандэ́н ран и барыдырэ́н, и тэ явэ́н скэдынэ́ тэ кэрэ́н кажно лачхо́ рэ́ндо (де́ло);2. тэ на калякирэн никонэ́с, а тэ явэ́н раманёнэса (мирнонэса), тэ явэ́н штыл (тиха), ковлэ́-илы́тка кэ сарэ́ мануша́.3. Пал-дова́ со и амэ са́мас вари-ке́ли бигодякирэ, на кандыям и амэн; амэ са́мас писха́рья пэ́скирэ-масэнгирэ тырдыпнаскэ, амэ дживдям дро холы́ и зэвлыныпэ́н, древа́н бидыкхцям екх екхэ́с.4. А ке́ли амаро́ Дэвэ́л, Зракхибнари, сыкадя́ Пэ́скири лачхэ́-илы́ткима и ла́ска,5. на пал чачунэ́ рэ́нды, савэ́ амэ кэрасас, а пал Пэ́скиро тангипэ́н, тэды Ёв зракхця́ амэн пир панескиро болдэипэн кэ нэво́ джиибэ́н и нэвякирдя амари́ годы́ Свэнтонэ́ Духо́са,6. Саво́ Ёв пхэрдэ́с дыя́ амэ́нгэ пир Исусо́стэ Христосо́стэ, амарэ́ Зракхибнаристэ,7. соб (кай) Дэвэ́л тэ приґалёл амэн чачунэнца пир Пэ́скиро бахталыпэ́н тэ ячас Лэ́скирэ чхавэ́нца дро ве́чно джиибэ́н, ваш саво́ амэ́ндэ исын наде́я.8. Дава́ лав исын патяибны́тко, и мэ кама́м, соб (кай) ту тэ ракирэ́с пал дава́ сарэ́ зорья́са дро ду́хо (фа́но) ваш дова́, соб (кай) одолэ́, савэ́ упатя́ндынэ дрэ Дэвлэ́стэ, причхувэ́н зор тэ кэрэ́н лачхэ́ рэ́нды. Дава́ саро́ исын лачхипэ́н и трэй манушэ́нгэ.9. Джа́ криг (дурьёв) дурэды́р дылынэ́ пхучибнэндыр и роспхэныбнэндыр пал вари-конэ́скиро ро́до, ци спрэчкэндыр ци марибнэндыр пал лава́ Законо́стыр; пал-дова́ со дава́ на трэй ни конэ́скэ и дасаво ракирибэ́н исын кротконэ годятыр.10. Рисёв криг манушэ́стыр, саво́ причхувэла зор тэ розчхувэл патяибнаскирэн пэ групы пало́ (после) дава́, сыр ту сыклякирэса лэс екх ци дуй мо́лы,11. ту джинэ́са со адасаво́ ману́ш исын розмэкно и кэрэ́ла грэ́хи, кадалэса ёв сэндякирэ́ла кокоро́ пэс.12. Ке́ли мэ бичхава́ва кэ ту Артёмос ци Тихикос, прилэ́ зор сыр сыгэды́р тэ явэс кэ мэ дро Никаполё, пал-дова́ со мэ скэдыёмпэ тэ явав одо́й саро́ ивант (зима).13. Зинас, саво́ исын сыклякирдо пир Зако́но, и Аполос, бичха́в дро дром сыр трэй, соб (кай) лэ́нгэ саро́ тэ ухтылэл;14. и мэк амарэ́ мануша́ адя́кэ-паць тэ сыклён тэ кэрэ́н лачхэ́ рэ́нды, соб (кай) тэ сыклён тэ дэн ра́да пэ дава́, со трэй амэ́нгэ, соб (кай) лэ́нгиро джиибэ́н тэ на явэ́л чхучо́.15. Пиридэна “паклоно” ту́кэ сарэ́, кон исын ма́нца. Пиридэ “паклоно” сарэ́нгэ, конэ́скэ сам дро́га амэ дро патяибэ́н. Тэ явэ́л бахталыпэ́н сарэ́нца тумэ́нца. Ами́нь. Romani Bible Baltic 2019 Maintained by the United Bible Societies for the Baltic Romani Mission