Bible in one year November 4Lamentations 3:1-661. Мэ сом ману́ш, конэ́с Дэвэ́л притасадя дэстэса Лэ́скирэ холя́тыр,2. Ёв лыджия́ ман и яндя́ тэ псирав дро калыпэ́н (цямлыпэ́н), кай нанэ дуд.3. И Ёв рискирэлас Пэ́скиро васт пэ ма́ндэ нэвэ́с и нэвэ́стыр дывэсэнца.4. Ёв кэрдя́ адя́кэ, со мирэ́ маса́ и мири́ цы́па тыкнынэ, и Ёв пхагирдя́ мирэ́ кокалы́.5. Ёв ґаздыя́ ва́нта пэ ма́ндэ, и Ёв обгия трусця́л ман киркипнаса и пхарипнаса.6. Ёв чхудя́ ман дрэ цямлэ штэ́ты, сы́рбы мэ ґара́ мыём.7. Ёв обчхудя́ ман тыноса, соб (кай) мэ на могинав тэ джав анги́л: Ёв пхарьякирдя мири́ зандир.8. Адя́кэ-паць, ке́ли мэ кхардём роибнаса и дыём го́дла, тэды Ёв зарикирдя мири́ па́тери (моли́тва).9. Ёв закэрдя мирэ́ дрома́ вычингирдэ барэ́нца; Ёв попэнтындя мирэ́ дроморэ.10. Ёв яця́ ваш ма́нгэ сы́рбы рич, со исын пашто́, ужакири тэ замарэ́л, сы́рбы шчэр, саво́ исын дро чорахано штэ́то.11. Ёв пиририскирдя мирэ́ дрома́ и кусця ман пэ котэра́: Ёв пирикэрдя ман дро нисо́.12. Ёв ґаздыя́ Пэ́скиро лу́ко, и Ёв чхудя́ ман сыр цэлё ваш Пэ́скирэ марибны́тка бустя́ (стре́лы).13. Ёв кэрдя́ адя́кэ, со бустя́ Лэ́скирэ колчаностыр пхусадэ́ мирэ́ букорэ.14. Мэ яцём кадасаво́, со сарэ́ мануша́ санапэ холямэс ма́ндыр, мэ яцём сы́рбы лэ́нгири гилы́ пэ дывэ́с.15. Ёв дыя́ чалэ́с ма́нгэ киркипэн и панякирдя ман палыноса.16. Ёв пхагирдя́ мирэ́ данда́ гравилёса и чхакирдя ман пеплоса.17. Ёв лыджия́ ма́ндыр дур рама́нё (миро) мирэ́ дестыр, мэ бистырдём пал мишто́ джиибэ́н.18. И мэ пхэндём: ‘Мири́ зор и мири́ наде́я пэ Растэ-Дэвлэ́стэ хасинэ́.”19. Мэ рипирава мирэ́ мэ́ньки и мири́ бари би́да, кирки чар (полыно) и жэлучо.20. Миро ди ўса рипирэла лэн и исын пашто́ штылэ́с дрэ ма́ндэ.21. Дава́ мэ отпхэнава мирэ́ годякэ и палдава́ исын наде́я ма́ндэ:22. амэ на хасиям пал Ра́скирэ-Дэвлэ́скири ла́ска, пал-дова́ со Лэ́скири жалима на кончындяпэ;23. ёнэ сыкадёна нэвэ́с кажно зло́ко (ра́нко): саво́ баро́ исын Тыро́ патяибэ́н!24. “Мири́ до́ля исын дрэ Дэвлэ́стэ” – раки́рла миро ди – “палдава́ мэ ужакирава лачхипэ́н Лэ́стыр.”25. Рай Дэвэ́л исын лачхо́ ваш одолэ́нгэ, кон ужакирэ́ла Лэс, ваш кодолэнгиро ди, саво́ родэ́ла Лэс.26. Дава́ исын мишто́, соб (кай) ману́ш тэ рикирэ́л наде́я, и соб (кай) тэ ужакирэл штылэ́с, сыр Рай Дэвэ́л ракхэ́ла Лэс.27. Дава́ исын мишто́ ваш манушэ́скэ, соб (кай) ёв тэ лыджа́л ґа́мо Дэвлэ́стыр пэ́скирэ тырныпнастыр.28. Мэ ёв тэ бэшэ́л екхджино́ и тэ явэ́л штыл, пал-дова́ со дава́ Рай Дэвэ́л чхудя́ дава́ пэ лэ́стэ;29. мэк ёв тэ чхувэ́л пэ́скиро муй дро пра́хо, – мо, тэ явэ́л ишчо (инкэ́) наде́я.30. Ёв подчхувэла пэ́скири чхам (шчока) кодолэ́скэ, кон марэла лэс; мэк тэ обракирэн лэс пхэрдэ́с.31. Пал-дова́ со Рай Дэвэ́л на ячкирэ́ла пэ ўса́ды (сак).32. Нэ ко́ли Ёв бичхавэ́ла илэскири дукх, тэды Ёв адя́кэ-паць сыкавэ́ла и жалима, пир-дова́ со барвалы исын Лэ́скири ла́ска:33. пал-дова́ со Ёв на притасавэла ци калякирэла манушэ́нгирэ-чхавэ́нгирэ илэ, пир-дова́ со Лэ́скэ трэй адя́кэ.34. Ко́ли тасавэна ґэрэ́нца сарэ́н, кон исын дро штарибэ́н, пир пхув,35. ко́ли рискирэна пэ риг чачипэ́н, со исын пал манушэ́стэ анги́л Най Вучэдырэскирэ Дэвлэ́стэ;36. ко́ли начачунэс сыкавэ́на манушэ́с дро лэ́скиро рэ́ндо, – ци Рай Дэвэ́л приджинэла чачипэ́н пэ дава́?37. Кон исын кадава́, кон пхэнэ́ла: ‘Дава́ кэрэ́лапэ адя́кэ, – мэк Рай-Дэвэ́л и на припхэндя́.38. Ци на Най Вучэдырэскирэ-Дэвлэ́скирэ лавэ́стыр, со явэ́ла чорипэ́н и лачхипэ́н?39. Со́скэ тэды джидо́ ману́ш жалинэлапэ, ко́ли Рай Дэвэ́л сэндякирэ́ла лэс пал лэ́скирэ грэ́хи.40. Явэ́н, розґалёваса хор и выпхучаса пэс пал амарэ́ дрома́ и рисёваса палэ кэ Рай Дэвэ́л.41. Явэ́н, ґаздаса амэ амаро́ ило́ и васта́ кэ Рай Дэвэ́л, Саво́ исын пэ болыбэ́н.42. Амэ кэрдя́м чорипэ́н и бу́нто: Ту на отмэкцян амари́ банг.43. Ту чхакирдян Пэс холя́са и Ту традыян амэн, Ту мулякирэсас амэн и Ту на тангинэсас.44. Ту чхакирдян пэс облокоса, соб (кай) амари́ па́тери тэ на проджал пир лэ́стэ.45. Ту кэрдя́н амэ́ндыр шума и джунгалыпэ́н (гидота) машки́р манушэ́ндэ.46. Сарэ́ амарэ́ вэ́рги псирадэ пэ́скирэ муя́ пэ амэ́ндэ.47. Дар и фэлы́ исын пэ амаро́ дром, чхучипэн и хась.48. Мирэ́ якхэ́ндыр праста́на панескирэ рэ́ки (лэня́) пал мирэ́ манушэ́ндэ [тэрнэ́ патывалэ́ джувля́тэ-р.с.], савэ́ хасёна.49. Мирэ́ якха́ тхадэна, и ёнэ на пириячэна, ёнэ на зарикэрэнапэ,50. анги́л дова́, сыр Рай Дэвэ́л на подыкхэла тэлэ́ вучипна́стыр и, акэ, на удыкхэ́ла.51. Мирэ́ якхэ́ндыр джа́на дукха́ дро миро ило́ пал сарэ́ манушэ́ндэ мирэ́ форо́стыр.52. Мирэ́ вэ́рги традэнаспэ пал ма́ндэ би-причынакирэ сы́рбы пал чириклятэ.53. Ёнэ затрадынэ кэ мэрибэ́н ман дрэ ґанби́н и чхурдынэ́ бара́ пэ ма́ндэ,54. паня́ ґаздынэ́пэ вучэды́р мирэ́ шэрэстыр, тэ́ньчи мэ пхэндём: “Мэ хасиём.”55. Мэ кхардём Тыро́ лав, Раё Дэ́вла, тэлатунэ́ ґанбинятыр.56. Ту шундя́н мири́ зан: “На гарав Тыро́ кан, сыр мэ да́ва ΄гондя, сыр мэ ровава.”57. Ту явэсас пашылэды́р дро дывэ́с, сыр мэ кхардём Тут. Ту пхэндя́н: “На андарша.”58. Раё Дэ́вла! Ту лыджиян миро рэ́ндо; Ту выкиндян миро джиибэ́н.59. Раё Дэ́вла! Ту дыкхця́н, сыр начачунэс исыс ма́нца. Россэндин миро рэ́ндо.60. Раё Дэ́вла! Ту дыкхця́н саро́ лэ́нгиро фуипэ́н, со ёнэ кэрэ́на ма́нгэ, и со ёнэ придуминдлэ пэ ма́ндэ.61. О Раё Дэ́вла! Ту шундя́н, сыр ёнэ обракирэнас ман, со сари́ лэ́нгири фантазия исыс пэ ма́ндэ;62. сыр мирэ́-вэргэ́нгирэ ушта́ ґундяринэнас пэ ма́ндэ дывэсэнца.63. Подыкх, сыр ёнэ бэшэна, и сыр ёнэ уштэна; Мэ яцём сы́рбы лэ́нгири гилы́.64. Отдэ́ палэ лэ́нгэ, О Раё Дэ́вла, пир дова́, со лэ́нгирэ васта́ кэрдэ́.65. Бичха́в лэ́нгэ калыпэ́н пэ ило́, мэк тэ явэ́н Тыро́ прокошыбэ́н (арманя) пэ лэ́ндэ!66. Традэ лэн анги́л холя́са, и мулякир лэн Тырэ́ болыбна́стыр, Раё Дэ́вла!Lamentations 4:1-221. Сыр калыя сувнака́й! Сыр парудыя жужо́ сувнака́й! Бара́ свэнтонэ́ штэто́стыр росчхурдынэ пир кажно вэнгло, кай га́сы розджана.2. Дро́га Сионоскирэ чхавэ́, савэ́ исын мол сыр жужо́ сувнака́й, сыр да лэ́нгэ дэ́на паты́в сы́рбы ґлэякирэ судинкэнгэ, со кэрдя́ кучикэнгиро (горшэчнико).3. Аж и рупучи [чудовишчы / шакалихи-ю.о.] дэ́на цюця тэ чаравэн пэ́скирэ тыкнэн, нэ мирэ́ – манушэ́нгирэ чхая́ ячнэ́ пхарэ́-илэ́скирэ сы́рбы страусы чхучэ́ прахэндыр.4. Тыкнэ́-масэнгири чибори ухтылэлапэ зоралэ́с пал талой дро лэ́нгиро муёро, сыр камэ́на пани́: тыкнэ́ бияты мангэна маро́, нэ ние́кх на пхагирэ́ла (на дэ́ла) котэроро лэ́нгэ.5. Кодолэ́, кон хая дэликатэсы, исын на́бут со джидэ́ пэ вули́цы (пэ га́сы); кодолэ́, конэ́с барьякирдэ́ дро лоло́ плашчо, облэна кучы ґнэё.6. Пхаро́-сэндякирибэн пал чорипэ́н, со кэрдэ́ мирэ́-манушэ́нгирэ чхая́, исын зоралэды́р пхарэ́-сэндякирибнастыр, со дорэснэ́ пал Содомоскиро грэ́хо. Дова́ фо́ро сыс радо тэлэ́ пал екх мэнта (минута) адя́кэ, со ние́кх на дыя́ ра́да тэ подэл васт.7. Ерусалимо́скирэ тхага́рья сыс яснэдыр ивэстыр и парнэдыр тхудэстыр; ёнэ сыс лоликанэдыр, дрэ маса́ рубинэндыр; ёнэ выдыцёнас сы́рбы сапфиры.8. Какана́ ёнэ выдыцёна калэдыр бовэскирэ мэлятыр, ёнэ джа́на пир га́сы, лэн на пинджкирэна. Лэ́нгири цы́па ухтылэлапэ зоралэ́с кэ лэ́нгирэ кокалы́, ёй вышутия и яця́ сыр кашт.9. Кодолэнгэ, конэ́с мулякирдэ́ куртала́са, исын бахталэдыр адалэндыр, савэ́ мэрэ́на бокха́тыр. Пал-дова́ со ёнэ нашавэна поволинькэс (ле́нтэс) зор и клёко, пир дова́, со на ухтылэ́ла (на́доси) фэлды́тка аплоды.10. Васта́ лачхэ́-илэ́скирэ джувле́н кэрадэ пэ́скирэ биятэ́н: ёнэ сыс мас лэ́нгэ, ке́ли пыя́ бэдыпэн пэ Ерусалимо́скирэ манушэ́ндэ.11. Рай Дэвэ́л выпхэрдякирдя пэ́скири бари холы́, Ёв вычхудя́ Пэ́скирэ-холякири яг. Ёв хачкирдя́ яг пэ Сио́но, и ёй похая сарэ́са форо́скирэ фундаменты.12. Кра́лья пэ пхув и сарэ́ джиибнарья пэ свэ́то на патяндынэ́, со намал и вэ́рго заджа́ла дрэ Ерусалимо́скири по́рта, –13. саро́ дава́ пал форо́скирэ пророкэ́ндэ и пал лэ́нгиро – раша́нгиро чорипэ́н, кон прочхудэ чачунэ́ – манушэ́нгиро рат машки́р дава́ фо́ро.14. Ёнэ псирдэ́ сыр корорэ́ пир га́сы, енэ магирдэ́ пэс ратэ́са адя́кэ, со ниекхэ манушэ́скэ сыс нашты́ тэ чилавэл лэ́нгирэ и́ди.15. Мануша́ дэ́нас го́дла пэ лэ́ндэ: “Джа́н криг, магирдэ́! Джа́н криг! Джа́н криг! Джа́н! На чилавэн амэн.” Сыр ёнэ псирдэ́ трусця́л Наюдэ́ндэ, исыс пхэндло́ машки́р лэ́ндэ: “Ёнэ на дживэ́на буты́р ада́й!”16. Ра́скирэ-Дэвлэ́скири холы́ роскэрдя́ лэн пэ паша́. Ёв на явэ́ла тэ кэрэ́л паты́в лэ́нгэ. Нико́н на кутякирдя ни раша́н, ни сыкадя́ ла́ска кэ годэпхурэ́.17. Амарэ́ якха́ кхинынэ тэ дыкхэ́н ивья́ (дармэс), со вари-кон подэла васт амэ́нгэ. Амэ дыкхцям амарэ́ вучардятыр (башнятыр) пал манушэ́ндэ, савэ́ на дынэ́ ра́да тэ зракхэн амэн.18. Амарэ́ вэ́рги традынэпэ пал амэ́ндэ пир амарэ́ шпэры (сляды), со амэ на могиндям тэ джас яври́ пэ га́са. Амаро́ ко́нцо (яго́ро) исын пашы́л, амарэ́ дывэса́ сыг кончынэнапэ, пал-дова́ со явдя́ амари́ хась.19. Амарэ́ шалэ сыс сыгэды́р кидэндыр (орлэндыр) пэ болыбэ́н, енэ традынэпэ пал амэ́ндэ дрэ бэ́рги; ёнэ ужакирдэ чораханэ́с амэн пэ чхучэ́ прахи.20. Амарэ́ крали́с, саво́ исын сы́рбы маро́ дрэ амаро́ джиибэ́н, конэ́с Рай Дэвэ́л помакхця сыр крали́с, ухтылдэ́ дрэ лэ́нгирэ ганбиня. Пал лэ́стэ амэ пхэндям: “Амэ ява́са тэ джива́с машки́р Наюдэ́ндэ тэл лэ́скири зэр (тенё).”21. Ра́дынпэ и яв весёло (хотно), Эдомоскири Чхай, кон дживэ́ла пэ пхув Уз. Тахта́й адя́кэ-паць явэ́ла пирда́л кэ ту: ту матёса, и ту нангякирэса пэс.22. О, Сионо́скири Чхай, пхаро́ сэндякирибэн кончындяпэ: Рай Дэвэ́л на явэ́ла тэ лыджа́л тут криг дро пле́но. Нэ Ёв сэндякирэ́ла тут пал Тыро́ чорипэ́н, Эдомоскири Чхай. Ёв отчхакирэла тырэ́ грэ́хи.Lamentations 5:1-221. Ри́пир, Раё Дэ́вла, со явдя́ пэ амэ́ндэ: обдумин и дыкх амари́ бипатыв!2. Амаро́ миштыпэ́н гия́ ригаса чужонэ́ манушэ́нгэ, а амарэ́ кхэра́ явирэ-тхэмэскирэнгэ.3. Амэ яця́м сироты, бидадэскирэ, амарэ́ дая́ ячнэ́ сы́рбы пивля (удовы).4. Амэ пьяса амаро́ пани́ пал ловэ́, амэ плэскираса ловэ́ пал амарэ́ кашта́ ловэ́.5. Вэ́рги традэнапэ пал амэ́ндэ пир пенты [дрэ мэн-р.с.], амэ кэра́са буты́ пхарэ́с, и амэ́ндэ нанэ откхиныбэн.6. Амэ тырдаса васта́ кэ Египтя́ни, и Асирийцы, соб (кай) тэ хан маро́ чалэ́с.7. Амарэ́ дада́ кэрдэ́ грэ́хи, нэ лэн нанэ буты́р, нэ пэ амэ́ндэ рикирэ́лапэ банг пал лэ́нгиро чорипэ́н.8. Дына́рья хулаинэна пэ амэ́ндэ, и ние́кх нанэ тэ выракхэл амэн лэ́нгирэ вастэ́стыр.9. Амэ дорэсаса амаро́ маро́, ко́ли амэ лыджа́са шэро́ пэ риско, пал-дова́ со исын бут прахарья.10. Амари́ цы́па калыя сы́рбы бов барэ́ бокха́тыр, со хачкирэ́ла.11. Вэ́рги лэ́на пэ зор Сионоскирэ джувле́н, а патывалэ́ тэрнэ́ джувле́н дрэ Юдэя́кирэ фо́рья.12. Тхагарьен ублавэна пал васта́, и годэпхурэнгэ на кэрэ́на паты́в.13. Ёнэ чхудэ́ тырнэ манушэ́н тэ мелинэн гив пэ сяв/ пхурт; тэрнэ́-бэршэнгирэ пэрэ́на каштэндыр, со ёнэ лыджа́на дрэ ангаля.14. Годэпхурэ́ пириячнэ тэ кэдэнпэ пашы́л форо́скири по́рта, а тырнэ мануша́ на башавэна буты́р.15. Амаро́ ило́ пирияця́ тэ радынэ́лпэ, амаро́ кхэлыбэн пирикэрдяпэ дрэ зоралы́ ту́га.16. Крали́тко стадык пыя́ амарэ́ шэрэстыр. Бида амэ́ндэ! Палсо́ амэ кэрдя́м грэ́хи!17. Палдава́ амаро́ ило́ нашавэла зор, амарэ́ якха́ лынэ́ наяснэс тэ дыкхэ́н,18. пал-дова́ со Бэ́рга Сио́но яця́ чхучи́, и шакалы псирэ́на пир ла́тэ.19. Нэ, Ту, Раё Дэ́вла, ячэсапэ ве́чнэс, и Тыро́ троно раинэл пэ сарэ́ ро́ды.20. Со́скэ Ту сарэ́са бистрэса амэн? Со́скэ Ту ячавэса амэн пэ дасаво баро́ часо (цы́ро)?21. Ри́скир амэн кэ Пэ, о Раё Дэ́вла, и амэ рисёваса кэ Ту! Нэвякир амарэ́ дывэса́, сыр сыс ґарэдыр.22. Нау́што Ту сарэ́са отчхурдыян пэ риг амэн, ци со Ту адя́кэ зоралэ́с холясыян пэ амэ́ндэ!Psalms 119:145-152145. Мэ кхара́ва зоралэ́с сарэ́ мирэ́ илэ́стыр, о Раё Дэ́вла, отпхэн ма́нгэ: мэ ява́ва тэ рикиравпэ зоралэ́с кэ Тырэ́ стату́ты.146. Мэ кхара́ва Тут: зра́кх ман и мэ ява́ва тэ рикиравпэ кэ Тырэ́ припхэныбэна́.147. Мэ ґаздавапэ пэ са́мо зло́ко тасярла́киро анги́л дывэ́с и мэ да́ва го́дла тэ помогинэн: мэ ужакирава лачхипэ́н Тырэ́ лавэ́стыр.148. Мирэ́ якха́ исын джангадэ анги́л рати́тко стрэ́га, соб (кай) ма́нгэ тэ розлав Тыро́ лав.149. Вышу́н мири́ зан пир Тыри́ лачхэ́-илы́ткима: о Раё Дэ́вла, джидякир ман пир Тыро́ сэ́ндо.150. Одолэ́, савэ́ чорьёнапэ холя́са пал ма́ндэ, явнэ́ пашылэды́р: ёнэ исын дур Тырэ́ Законо́стыр.151. Ту сан пашы́л, о Раё Дэ́вла, и сарэ́ Тырэ́ припхэныбэна́ исын чачунэ́.152. Ѓара мэ уджиндём Тырэ́ допхэныбнэндыр, со Ту учхудян лэн пэ сарэ́ ве́ки.Proverbs 28:11-1111. Барвало́ думинэ́ла пэ́скэ, со ёв исын годо́, нэ годьваро́ чороро́ ману́ш розґалёла лэс.Filemonoske 1:1-251. Павли́стыр, саво́ исын дро штарибэ́н пал патяибэ́н дрэ Исусо́стэ Христосо́стэ и пшалэстыр Химастыр, Филимоно́скэ, амарэ́ малэ́скэ пир буты́,2. и пхэня́кэ пир патяибэ́н Амфия́кэ, и Архимо́скэ, саво́ исын амаро́ мал – халадо́ пир буты́, и кхангирья́кэ, сави́ скэдэлапэ дро тыро́ кхэр.3. Мэк тэ явэ́л бахталыпэ́н и рама́нё (миро) тумэ́нгэ амарэ́ Дэвлэ́стыр Дадэ́стыр и Ра́стыр-Дэвлэ́стыр, Исусо́стыр Христосостыр.4. Мэ парикирава Дэвлэ́скэ Мирэ́скэ каждо мо́ло, ке́ли мэ рипирава тут, сыр мэ мангавапэ Дэвлэ́скэ,5. пал-дова́ со мэ шундём, сыр ту зоралэ́с сыкавэса паты́в сарэ́ дэвлытконэ́ манушэ́нгэ и патя́са дрэ Растэ-Дэвлэ́стэ Христосо́стэ.6. Мэ мангавапэ Дэвлэ́скэ, соб (кай) тыро́ патяибэ́н, саво́ кхэтанякирэла амэн, тэ дэл саро́ лачхипэ́н, ке́ли амэ дживаса дрэ екхипэ́н Исусо́са Христосо́са.7. Пал-дова́ со тыри́ паты́в кэ яви́р мануша́, ми́ро пша́л, древа́н обрадындя и подрикирдя ман; ту зорьякирдян дэвлытконэнгирэ илэ́.8. Палдава́, мэк ма́ндэ исын бари во́ля дрэ Христосо́стэ тэ припхэнав ту́кэ, со трэй тэ кэрэ́с,9. нэ мэ фэды́р манга́ва тут илэ́са, мэ, Па́вли, сом пхуро́, и какана́ сом дро штарибэ́н пал патяибэ́н дрэ Исусо́стэ Христосо́стэ.10. Мэ древа́н манга́ва тут сарэ́ илэ́стыр пал Анисимостэ, мирэ́ чхавэ́стэ пир патяибэ́н, савэ́скэ мэ яцём сы́рбы дад, ада́й, дрэ састыра́,11. саво́ ґарэдыр на сыс трэй ту́кэ, а какана́ ёв трэй ту́кэ и ма́нгэ:12. мэ и бичхава́ва лэс палэ кэ ту: ёв исын дро́го ваш ма́нгэ, сыр миро ило́:13. савэ́с мэ древа́н камдём (мангдём) тэ ячкирав лэс паш пэ́стэ, соб (кай) ёв заме́ст ту́тэ тэ помогинэл ма́нгэ, пака мэ сом дрэ састыра́, пал-дова́, со мэ роспхэнавас бахталы́ зан (звесь);14. нэ мэ на камдём тэ кэра́в дава́ би тырэ́-лавэскиро, соб (кай) тэ явэ́л тыро́ лачхипэ́н на пир дова́, со тут зачхувэна, а пир ило́;15. палдава́ могинэ́ла тэ явэ́л, со ёв ваш дава́ на сыс ту́са вари-саво́ часо, соб (кай) ту тэ прилэс лэс нэвэ́стыр пэ саро́ джиибэ́н;16. нэ на буты́р сыр екхэ́ дынари́с (слугас), а барэды́р дынари́стыр, сыр пэ́скирэ дрогонэ́ пшалэ́с, ёв исын древа́н дро́го ма́нгэ, нэ буты́р ту́кэ, сыр ману́ш и сыр пшал пир патяибэ́н дрэ Растэ-Дэвлэ́стэ.17. И палдава́, ко́ли ту гинэса ман пал пэ́скирэ малэ́стэ (другостэ), тэды прилэ́ лэс адя́кэ, сыр ту прилэсас ман:18. и, ко́ли ёв вари-со́са дукхадя тут ци яця́пэ вужло ловэ́, чхув саро́ пэ ма́ндэ.19. Мэ, кокоро́ Па́вли, чхиндём дава́ мирэ́ вастэ́са, мэ плэскирава ту́кэ саро́: ма́нгэ трэй тэ пхэна́в ту́кэ пал дова́, со ту и кокоро́ сан банго́ ма́нгэ пал тыро́ нэво́ джиибэ́н, ке́ли ту упатяндыян дрэ Христосо́стэ.20. Палдава́, пша́ла, ма́нгэ трэй тыри́ ра́дыма ваш Растэ-Дэвлэ́стэ; зорьякир миро ило́, сыр пшал пир патяибэ́н дрэ Христосо́стэ.21. Мэ зоралэ́с патя́ва, со ту кандэса ман, и чхина́ва ту́кэ, со мэ джино́м, со ту кэрэ́са буты́р, сыр мэ манга́ва тут.22. А пал екх латх шту́ба (камо́ра) ма́нгэ, пал-дова́ со мэ древа́н патя́ва, со пир тумаро́ мангипэ́н Дэвэ́л отмэкэ́ла ман штарибнастыр кэ тумэ́.23. Епафрасо пиридэ́ла “паклоно” ту́кэ, саво́ исын бэшто́ кхэтанэ́ ма́нца пал патяибэ́н дрэ Исусо́стэ Христосо́стэ:24. адя́кэ-паць Марко, Аристархо, Димасо, Лука – мирэ́ мала́ пир буты́.25. Мэк тэ явэ́л бахталыпэ́н амарэ́ Ра́скирэ-Дэвлэ́скиро, Исусо́скирэ Христосо́скиро тумарэ́ духо́са. Ами́нь. Romani Bible Baltic 2019 Maintained by the United Bible Societies for the Baltic Romani Mission