Bible in one year - Пэ Балтитко Романи чиб

Bible in one year November 5

1. И сыс: дро (дэшутрито) бэрш, дро шта́рто чхон пэ па́нджто чхонытко дывэ́с, ко́ли мэ со́мас машки́р одолэ́ндэ, конэ́с традынэ дро пле́но, пашы́л рэка (лэнь) Ховар – откэрдяпэ болыбэ́н, и мэ дыкхцём дыкхибэна Дэвлэ́стыр.

2. Пэ па́нджто чхонытко дывэ́с дава́ сыс па́нджто бэрш, ке́ли залынэ дрэ наволя крали́с Иоакимос (Яхимос).

3. Сыс Ра́скирэ-Дэвлэ́скиро лав кэ Езэкилё, Вузияскирэ чхавэ́скэ, раша́скэ пэ Халдеенгири пхув, пашы́л рэка (лэнь) Ховар, и сыс пэ лэ́стэ одо́й Ра́скирэ-Дэвлэскро васт.

4. И мэ дыкхцём: акэ, рискирибнаскири балва́л джа́лас паш – ратятыр (северостыр), баро́ о́блоко, и яг ґаздэласпэ дрэ лэ́стэ, и дава́ зяинэласпэ пашы́л лэ́стэ.

5. А машки́р саро́ сыс сы́рбы дуд (свэ́то) ягатыр машкира́л: и машки́р лэ́стэ сыс дыкхнэ́ сы́рбы штар мурдала́ (жывотна), и адя́кэ ёнэ выдыкхэнас, а лэнгро муй сыс, сыр муй манушэ́стэ.

6. Кажнонэ́стэ сыс штар муя́, и кажнонэ́стэ лэ́ндыр сыс штар пхака́ (крылы).

7. Ѓэра́ лэнгрэ сыс роўна (ворта), а пирэ́/подэшвы (ступни) сыс сыр гуруворэстэ, и зяинэнэнаспэ, сыр жужакирды (чысто) харко́ма (медь).

8. А тэл лэ́нгирэ пхака́ сыс манушы́тка васта́ пир штар рига́, сарэ́ндэ штарэндэ сыс муя́ и пхака́.

9. Муя́ лэ́ндэ и васта́ лэ́ндэ – сарэ́ндэ штарэндэ притасавэнаспэ екх кэ яви́р: ко́ли ёнэ джа́нас, ёнэ на обрисёнас, а гинэ́, карик дыкхэ́лас лэ́нгиро муй.

10. Дова́, со зджа́ла пэ муй лэ́нгиро, кажно сыс дасаво сы́рбы манушэ́скиро муй и шчэрэскиро муй екх рига́тыр лэ́ндэ сарэ́ндэ. А явирэ рига́тыр сыс гуруворэскиро муй и орло́скиро (кидо́скиро) муй лэ́ндэ сарэ́ндэ.

11. Муя́ и пхака́ лэ́нгирэ упрэ́ сыс роскэрдэ, нэ кажнонэ́стэ дуй пхака́ притасавэнаспэ екх кэ яви́р, а дуй пхака́ учхакирэнас лэ́нгирэ маса́.

12. И джа́нас ёнэ, кажно дрэ доя́ риг, сави́ сыс анги́л лэ́скиро муй; карик камэлас тэ джал ду́хо (фа́но), одори́к ёнэ джа́нас, а ко́ли джа́нас, то на обрисёнас.

13. И выдыкхэнас далэ́ мурдала́, сыр хачкирдэ́ вангара, сыр момоля (свечки) дрэ кхангири́. Яг псирэлас машки́р лэ́ндэ, и дуд ягатыр, и блискавица выджа́лас ягатыр.

14. Мурдала́ сы́гэс псирэнас англэ и палэ, сыр блискавица.

15. Мэ дыкхцём пэ далэ́ мурдалэ́ндэ: акэ, пэ пхув, пашы́л лэ́ндэ сыс пиро́ екх рота анги́л штар лэ́нгирэ муя́.

16. Ро́ты выдыкхэнас, и сыс кэрдэ́ сыр куч бар топазо, сарэ́ штар выдыкхэнас, сыр екх, и сыкавэласпэ: сыр ёнэ выдыкхэнас, и сыр ёнэ сыс кэрдэ́, со исын рота андрэ́ дрэ яви́р рота.

17. Ёнэ джа́нас пэ пэ́скирэ штар рига́, нэ ко́ли ёнэ джа́нас, то на обрисёнас.

18. А лэ́нгирэ ободы ёнэ сыс вучэ́ и даранэ; сыс пхэрдэ́ якхэ́нца сарэ́ндэ штарэндэ.

19. И ко́ли джа́нас мурдала́, то джа́нас пашы́л лэ́ндэ ро́ты, а ко́ли мурдала́ ґаздэнаспэ пхувья́тыр, тэ́ньчи ґаздэнаспэ ро́ты.

20. Карик камэлас ду́хо (фа́но) тэ джал, одори́к ёнэ джа́нас, и ёнэ карик бы тэ на джал ду́хо (фа́но), и ро́ты ґаздэнаспэ лэ́нца, пал-дова́ со мурдалэнгиро ду́хо сыс дрэ ро́ты.

21. Ко́ли джа́нас мурдала́ (жывотна), то джа́нас и ро́ты; ко́ли мурдала́ сыс тэрдэ́, сыс тэрдэ́ ро́ты, а ко́ли мурдала́ ґаздэнаспэ пхувья́тыр, тэ́ньчи ро́ты ґаздэнаспэ лэ́нца кхэтанэ́, пал-дова́ со мурдалэгиро ду́хо (фа́но) сыс дрэ ро́ты.

22. Упра́л мурдалэнгирэ шэрэ́ сыс сыр сво́до пэ болыбэ́н, саво́ выдыкхэлас, сыр дарано бар кристало. Ёв сыс ростырдыно упра́л лэ́нгирэ шэрэ́.

23. А тэл сво́до пэ болыбэ́н сыс лэ́нгирэ пхака́, савэ́ обрисёнас маму́й екх кэ яви́р. Кажнонэ́стэ сыс дуй пхака́, савэ́ учхакирэнас лэн, кажнонэ́стэ дуй пхака́ учхакирэнас лэ́нгирэ маса́.

24. И ко́ли ёнэ джа́нас, мэ шунавас, сыр шуминэнас лэ́нгирэ пхака́, кодова́ сыс сы́рбы бутэ́-панескиро шумо, сы́рбы зан Сарэзорьякирэскири, зорало́ шуминыбэн, сы́рбы шуминыбэн дро халадэ́нгиро скэдыибэ́н; а ко́ли ёнэ сыс тэрдэ́, то ёнэ змэкэнас пэ́скрэ пхака́.

25. И сыс зан сводостыр пэ болыбэ́н, саво́ сыс упра́л лэ́нгирэ шэрэ́; ко́ли ёнэ сыс тэрдэ́, тэ́ньчи змэкэнас пэ́скирэ пхака́.

26. А упрэ́ долэ́ сводостыр пэ болыбэ́н, саво́ сыс упра́л лэнгрэ шэрэ́, сыс сы́рбы троно, саво́ выдыкхэлас сы́рбы куч бар сапфиростыр, а упра́л пэ штэ́то сыс дова́, со сыс сы́рбы ману́ш пэ лэ́стэ.

27. И мэ дыкхцём сы́рбы хачкирды харко́ма, сы́рбы яг, сави́ сыс дрэ лэ́стэ и пашы́л лэ́стэ, лэ́скирэ трушулэндыр, и лэ́скирэ трушулэндыр, и вучэды́р, и тэлэды́р дыкхцём мэ сы́рбы яг и зяиныбэн сыс пашы́л лэ́стэ.

28. Сыр выдыкхэла банги (радуга) пэ болыбэ́н дро брышындэскиро дывэ́с, адя́кэ выдыкхэлас дасаво зяиныбэн, саво́ сыс пашы́л лэ́стэ. Адя́кэ выдыкхэлас Ра́скирэ-Дэвлэ́скири сла́ва.

Ezekiel 2:1-10

1. Ко́ли мэ дыкхцём дава́, то мэ пыём пэ пэ́скиро муй и шундём Одолэскири зан (глос), Саво́ ракирдя́ ма́нца. Ёв пхэндя́ ма́нгэ: “Манушэ́скиро чхава! Ушты́ пэ тырэ́ ґэра́, Мэ ява́ва тэ ракира́в ту́са.”

2. А ко́ли Ёв ракирэ́лас, то загия́ дрэ ма́ндэ Ду́хо (Фа́но) и чхудя́ ман пэ мирэ́ ґэра́, и мэ шундём Одолэ́с, Саво́ ракирэ́лас ма́нца.

3. Ёв пхэндя́ ма́нгэ: “Манушэ́скиро чхава! Мэ бичхава́ва тут кэ Израилёскирэ чхавэ́, кэ мануша́, савэ́ никонэ́с на кандэ́на, савэ́ ґаздынэ́пэ пэ Ма́ндэ. Ёнэ и лэ́нгирэ дада́ отгинэ́ Ма́ндыр кэ/ жы́ко ададывэ́с.

4. Адалэ́ чхавэ́ исын биладжакирдэ мо́са и захалэ илэ́са; Мэ бичхава́ва тут кэ ёнэ, а ту пхэнэ́са лэ́нгэ: “Адя́кэ ракирэ́ла Рай Дэвэ́л, Дэвэ́л!

5. Явэ́на ёнэ тэ шунэ́н ци на явэ́на, пал-дова́ со ёнэ исын бунтуи́тка мануша́, – нэ, соб (кай) ёнэ тэ джинэ́н, со машки́р лэ́ндэ сыс проро́ко.

6. А ту, Манушэ́скиро чхаво́, на дар лэ́ндыр, и на дар лэнгрэ лавэ́ндыр, ко́ли ёнэ явэ́на ваш ту́кэ налачхэ́ чарьяса (пхусадытконэ дрэвицоса) и жылтонэ пхусадытконэ хрустэнца, ке́ли ту явэ́са тэ дживэ́с машки́р лэ́ндэ (сыр машки́р скорпионэндэ). На дар лэнгрэ лавэ́ндыр, на дар лэнгрэ мо́стыр, пал-дова́ со ёнэ исын кхэр, кай никонэ́с на кандэ́на.

7. Ра́кир лэ́нгэ Мирэ́ лава́, явэ́на ёнэ тэ шунэ́н, ци на явэ́на, пал-дова́, со ёнэ исын кхэр, кай никонэ́с на кандэ́на.

8. А ту, Манушэ́скиро чхаво́, шун, со Мэ ява́ва тэ ракира́в ту́кэ: на яв дасаво нарто (упрямо), сыр дава́ Кхэр, кай никонэ́с на кандэ́на, откэр пэ́скрэ ушта́, и ха, со Мэ да́ва ту́кэ.”

9. Мэ дыкхцём: акэ, исын протырдыно васт кэ мэ, а дрэ васт сыс лылвари́ (сви́тко).

10. И Ёв откэрдя ла анги́л ма́ндэ, и сыс лылвари́ зачхиндлы англэ и палэ, и сыс зачхиндло́ дрэ лылвари́: “Ровибэн, и тугипэн ясвэ́нца, и биба́хт.”

Psalms 119:153-160

153. Дыкх ракхунэс, сыр ма́нгэ исын пхаро́ и зра́кх ман, пал-дова́ со мэ на бистырдём Тыро́ Зако́но.

154. Затэрдёв зоралэ́с пал миро чачипэ́н и выракх ман, джидякир ман пир Тыро́ лав.

155. Чорэ́ мануша́ исын дур зракхибнастыр, пал-дова́ со ёнэ на дыкхэ́на цямкэс пэ Тырэ́ стату́ты.

156. О Раё Дэ́вла, Тыри́ лачхэ́-илы́ткима исын зоралы́; джидякир ман пир Тыро́ чачипэ́н!

157. Кодолэ́, савэ́ традэнапэ пал ма́ндэ и исын мирэ́ вэ́рги, лэн исын бут; нэ мэ на рисиём дрэ риг Тырэ́ допхэныбнэндыр.

158. Мэ дыкхцём кодолэ́н, савэ́ дэнапэ палэ и миро ило́ калыя, пал-дова́ со ёнэ на рикирэнапэ кэ Тыро́ лав.

159. Придыкхпэ, сыр исын дро́га ма́нгэ Тырэ́ допхэныбэна! Раё Дэ́вла, джидякир ман пир Тыри́ лачхэ́-илы́ткима.

160. Тырэ́ лавэскиро кучипэ́н исын дро чачипэ́н, кажно Тыро́ чачипна́скиро сэ́ндо ячэ́лапэ пэ сарэ́ ве́ки.

Proverbs 28:12-12

12. Ке́ли чачунэ́ мануша́ зоралэ́с радынэ́напэ, тэды сы́рбы баро́ свэ́нко исын. Ке́ли фуй мануша́ ґаздэ́напэ, то мануша́ гарадёна.

Židenge 1:1-14

1. Дэвэ́л на е́кхвар и пир саро́ ґары́м-ґара́ (ва́го) ракирдя́ амарэ́ прададэнгэ пир пророкэ́ндэ,

2. а дрэ далэ́ палатунэ́ (последня) дывэса́ Ёв ракирдя́ амэ́нгэ пир Пэ́скирэ Чхавэ́стэ, Савэс чхудя́ хула́са тэ прилэл Лэ́стыр саро́, и пир Савэ́стэ Ёв создыя́ свэ́то (лот):

3. а Чхаво́, Саво́ зяинэла Дадэ́скирэ слава́са, сыкавэ́ла Пэ́са чачипэ́н пал Дэвлэ́стэ, и рикирэ́ла Пэ́скирэ зоралэ́ лавэ́са саро́ свэ́то, и ке́ли Ёв выжужакирдя́ сарэ́ амарэ́ грэ́хи, тэды бэсця́ пир чачи́ риг Дэвлэ́скирэ Барипнастыр дро Болыбна́скиро Раё.

4. Ёв яця́ пэ ада́кицы фэды́р Янголэндыр, пэ кицы́ лав, саво́ Ёв прилыя́ Дадэ́стыр, исын най фэдэды́р лэнгирэндыр.

5. Пал-дова́ со никонэ́скэ ишчо (инкэ́) Янголэндыр на пхэндя́ Дэвэ́л: “Ту сан Миро Чхаво́, ададывэ́с мэ яцём Тырэ́ Дадэ́са (Тыро́ Дад).” Ци: “Мэ ява́ва Лэ́скэ Дад, и Ёв явэ́ла Чхаво́ Ма́нгэ”?

6. адя́кэ-паць, ке́ли Ёв нэвэ́стыр (нэвэ́с) янэлас Пэ́скирэ Пэрвонэ́ Чхавэ́с, со латхяпэ пэ свэ́то, Дэвэ́л ракирэ́лас: “И мэк сарэ́ Дэвлэ́скирэ Янго́лы тэ клонинэнпэ (тэ кэрэн шэрэ́са) патыва́са Лэ́скэ.”

7. Пал Янголэндэ Ёв ракирэ́ла: “Ёв кэрдя́ Пэ́скирэ Янголэн тэ явэ́н сыр балва́л и Пэ́скирэ дэвлытконэ́ дынарье́н (слугэн) тэ явэ́н сыр яг, со хачола”,

8. а пал Чхавэ́стэ: “Дэ́вла, Тыро́ троно, исын пэ сарэ́ ве́ки и Ту кралинэса чачипны́ткэс.

9. Ту́кэ пир ило́ чачипэ́н и Ту́кэ исын на пир ило́ дова́, со исын проти Зако́но, пал-дова́ со Дэвэ́л, Тыро́ Дэвэ́л дыя́ паты́в и ра́дыма Ту́кэ буты́р, сыр Тырэ́ малэ́нгэ (другэ́нгэ).”

10. И ишчо (инкэ́) пхэндя́ Ёв пал Чхавэ́стэ: “Ту, Раё Дэ́вла, англэды́р сарэ́стыр создыян пхув, и болыбэ́н, дава́ кэрдэ́ васта́ Тырэ́.

11. Ёнэ хасёна, а Ту явэ́са тэ дживэ́с, ёнэ сарэ́ пхурьёна, сыр упратуно урибэ́н;

12. и сыр баро́ дыкхло Ту скрэнцынэса лэс и парувэса пэ нэво́, нэ Ту явэ́са адасаво́-паць и Тырэ́ бэршэнгэ на явэ́ла ние́кхвар ко́нцо (яго́ро).”

13. Ке́ли конэ́скэ Янголэндыр Дэвэ́л пхэндя́: “Бэш пэ чачо́ васт Ма́ндыр, пака Мэ чхува́ва вэргэ́н тырэ́н тэл ґэра́ тырэ́.”

14. Ци ёнэ исын на сарэ́ ду́хи, кадалэ́ Янго́лы, савэ́ дынаринэна (служынэна) одолэ́нгэ, кон дорэсэ́ла пэ́скири паш дро зракхибэ́н.

Romani Bible Baltic 2019

Maintained by the United Bible Societies for the Baltic Romani Mission