Bible in one year November 6Ezekiel 3:1-271. И пхэндя́ Дэвэ́л ма́нгэ: “Манушэ́скиро чхава! Ха дова́, со исын анги́л ту́тэ, ха кадая́ лылвари́ (сви́тко), и джа́, ра́кир Израилёскирэ кхэрэ́скэ!”2. Тэ́ньци мэ откэрдём пэ́скирэ ушта́, и Ёв дыя́ ма́нгэ, соб (кай) мэ тэ хав кадая́ лылвари́.3. И пхэндя́ ма́нгэ: “Манушэ́скиро чхава! Чалякир пэскро пэр, пхэрдякир лэс лылварьяса (свиткоса), сави́ Мэ да́ва ту́кэ.” Мэ хаём, и сыс гудло́ дрэ мирэ́ ушта́ сыр авги́н (мэда).”4. И Ёв пхэндя́ ма́нгэ: “Манушэ́скиро чхава! Ушты́, джа́ кэ Израилёскиро кхэр, – ра́кир лэ́нца Мирэ́ лавэ́нца.5. Мэ бичхава́ва тут на кэ народо, саво́ ракирэ́ла наґалыибныткэс, конэ́стэ исын пхари́ чиб, а кэ Израилёскиро кхэр.6. На кэ бут народы, савэ́ ракирэ́на наґалыибныткэс, и конэ́стэ исын пхари́ чиб, конэ́с ту на галёсас бы; нэ ко́ли б Мэ тэ бичхавав Тут кэ ёнэ, то ёнэ на кандэнас тут.7. А Израилёскиро кхэр на закамэ́ла тэ шунэ́л тут, пал-дова́ со ёнэ на камэ́на тэ шунэ́н Ман, пал-дова́ со саро́ Израилёскиро кхэр исын пхарэ́-шэритка, и захалэ илэ́са.8. Акэ, Мэ кэра́ва тыро́ муй и ду́хо зоралэды́р, сыр лэ́нгирэ муя́ исын, и чэкат тыро́ зоралэды́р, сыр лэ́нгирэ чэка́та исын.9. Сыр алмазо (диаманто), со исын зоралэды́р барэстыр, кэрдём Мэ тыро́ чэкат, на дар лэ́ндыр, на дар тэ явэс анги́л лэ́нгиро муй, пал-дова́ со ёнэ исын кхэр, кай на кандэ́на никонэ́с.”10. И пхэндя́ Ёв ма́нгэ: “Манушэ́скиро чхава! Сарэ́ Мирэ́ лава́, савэ́ Мэ ява́ва тэ ракира́в ту́кэ, прилэ́ тырэ́ илэ́са и вышу́н трэ канэнца.11. Ушты́, джа́ пашылэды́р кэ одолэ́, конэ́с традынэ дро пле́но, кэ чхавэ́ тырэ́ народо́стыр, ра́кир лэ́нгэ, и пхэн лэ́нгэ: “Адя́кэ ракирэ́ла Рай Дэвэ́л, Дэвэ́л: Ци явэ́на ёнэ тэ шунэ́н ци на явэ́на.”12. И ґаздыя́ ман Ду́хо (Фа́но), и шундём мэ пал пэ́стэ зоралы́ зан сы́рбы громо: “Тэ явэ́л бахтякирды Ра́скирэ-Дэвлэ́скири сла́ва далэ́ штэто́стыр!”13. И адя́кэ-паць шундём мэ шумо мурдалэнгирэ пхакэндыр, савэ́ притасавэнаспэ екх кэ яви́р. И сыр шуминэна ро́ты пала́л пашы́л лэ́ндэ, и зорало́ громо.14. И ґаздыя́ ман Ду́хо (Фа́но), и лыя́ ман. И джавас мэ пхарэ́ илэ́са, холя́са, и Ра́скирэ-Дэвлэ́скиро зорало́ васт сыс пэ ма́ндэ.15. И явдём мэ дро Тель-Авиво кэ одолэ́, конэ́с вытрадынэ́ пэ́скрэ пхувья́тыр, савэ́ дживдэ́ пашы́л рэка (лэнь) Ховар, и Мэ со́мас машки́р лэ́ндэ эфта́ (битринэ́нгиро дэш) дывэса́, и зоралэ́с дивинаваспэ.16. Ко́ли ж прогинэ́ эфта́ дывэса́, сыс кэ мэ Ра́скирэ-Дэвлэ́скиро лав:17. “Манушэ́скиро чхава! Мэ чхудём тут ракхибнариса Израилёскирэ кхэрэ́скэ. Ту явэ́са тэ шунэ́с лав Мирэ́ уштэндыр, а тэ́ньчи ту явэ́са тэ сыклякирэс лэн Ма́ндыр.18. Ко́ли Мэ пхэна́ва грэхитконэ́ манушэ́скэ: ‘Ту мэрэ́са!’, а ту на сыклякирэса лэс, на пхэнэ́са, соб (кай) тэ зракхэс грэхитконэ́ манушэ́с лэскрэ грэхитконэ́ дромэ́стыр, соб (кай) тэ явэ́л ёв джидо́, адава́ грэхи́тко ману́ш мэрэ́ла дрэ пэ́скрэ грэ́хи, а ту явэ́са банго́ анги́л Ма́ндэ пал лэ́скиро рат.19. Нэ ко́ли ту сыклякирэсас грэхитконэ́ манушэ́с, а ёв на ячадя пэ́скиро грэ́хо (бэдыпэн) и пэ́скиро грэхи́тко дром: то ёв мэрэ́ла дро пэ́скиро чорипэ́н, а ту зракхця́н тыро́ ди.20. И нэвэ́стыр, ко́ли дэвлы́тко ману́ш отджала пэ́скрэ чачипнастыр и скэрла чорипэ́н, то Мэ чхува́ва анги́л лэ́стэ вари-со, со́стыр ёв пэрэ́ла, и мэрэ́ла дэвлы́тко ману́ш, пал-дова́ со ту на сыклякирэсас лэс. Ёв мэрэ́ла пал пэ́скиро грэ́хо, и на пририпирлапэ лэ́скиро чачипэ́н, со ёв кэрэ́лас, а ту явэ́са банго́ анги́л Ма́ндэ дро лэ́скиро рат.21. Ко́ли ж ту явэ́са тэ сыклякирэс дэвлытконэ́ манушэ́с, соб (кай) ёв тэ на кэрэ́л грэ́хо, и на кэрла ёв грэ́хо, тэ́ньчи ёв явэ́ла джидо́, пал-дова́ со сыс сыклякирдо, а ту зракхця́н тыро́ ди.”22. И сыс пэ ма́ндэ одо́й Ра́скирэ-Дэвлэ́скиро васт. Ёв пхэндя́ ма́нгэ: “Ушты́, выджа пэ фэ́лда. Мэ ява́ва тэ ракира́в ту́са.”23. Мэ уштыём, и гиём пэ фэ́лда. Акэ, одо́й сыс тэрды Ра́скирэ-Дэвлэ́скири сла́ва, сыр сла́ва, сави́ мэ дыкхцём пашы́л рэка (лэнь) Ховар. Мэ пыём пэ пэ́скиро муй.24. И загия́ дрэ ма́ндэ Ду́хо (Фа́но), и чхудя́ ман пэ мирэ́ ґэра́. И Ёв ракирлас ма́нца, и пхэндя́ ма́нгэ: “Джа́, запхандэпэ дро тыро́ кхэр.25. Манушэ́скиро чхава! Акэ, лэ́на шэлэ и пхандэна тут лэ́нца, и ту на явэ́са тэ псирэ́с машки́р лэ́ндэ.26. Чиб тыри́ Мэ отлава ту́тыр, и ту явэ́са бичибакиро, и на пхэнэ́са чачипэ́н пал лэ́ндэ, пал-дова́ со ёнэ исын кхэр, кай на кандэ́на никонэ́с.27. А ко́ли Мэ ява́ва тэ ракира́в ту́са, тэ́ньчи мэ откэрава тырэ́ ушта́. Тэ́ньци ту пхэнэ́са лэ́нгэ: “Адя́кэ ракирэ́ла Рай Дэвэ́л, Дэвэ́л! Кон камэ́ла тэ шунэ́л-шун, а кон на камэ́ла тэ шунэ́л-на шун, пал-дова́ со кадава́ исын кхэр, кай на кандэ́на никонэ́с.”Ezekiel 4:1-171. Ту, Манушэ́скиро чхаво́, лэ пэ́скэ кирпичо (цэгло), чхув лэс анги́л ту́тэ. Кэр пэ лэ́стэ чэртёжо (патри́н) фороскэ Ерусалимоскэ.2. И кэр адя́кэ, соб (кай) тэ явэ́н тэрдэ́ мануша́ халадыбнаса, со обчхудэ трусця́л лэ́скирэ ва́нты, соб (кай) тэ явэ́л вычхудо пхувья́тыр вало, росчхув халадэнгирё та́боро (лод (лагерё)) и росчхув машыны, со пхагирэна ва́нты.3. Лэ пэ́скэ саструны пхал и чхув ла сыр саструны ва́нта машки́р ту́тэ и машки́р фо́ро, и дыкх пэ фо́ро. Пэ фо́ро ґаздэ́напэ вэ́рги, а акана́ ту кэр, сыр ёнэ. Кадава́ явэ́ла ґерты́к (сыкаибэ́н) Израилёскирэ кхэрэ́скэ.4. А ту пасёв пэ тыро́ зэ́рво пашваро, чхув пэ лэ́стэ Израилёскирэ-кхэрэ́скиро чорипэ́н. Кицы́ дывэса́ ту явэ́са тэ пасёс, ада́кицы дывэса́ ту явэ́са тэ лыджас лэ́нгиро чорипэ́н.5. Мэ выкэдыём ту́кэ бэрша́, со ту явэ́са тэ лыджас лэ́нгиро чорипэ́н (ка́ра): триншэла́ тэ дэшуеня дывэса́ ту явэ́са тэ лыджас чорипэ́н кхэрэ́скиро Израилёскиро.6. Ко́ли ту кэрэ́са саро́ адя́кэ, то яви́р мо́ло пасёв пэ чачо́ (право) пашваро, и штардэша́ дывэса́ лы́джа пэ пэ́стэ Юда́скирэ-кхэрэ́скиро чорипэ́н, дывэ́с пал бэрш, дывэ́с пал бэрш, сыр Мэ выкэдыём ту́кэ.7. Ѓаздэ тыро́ муй и тыро́ нанго чачо́ васт пэ Ерусалимо, и ангилпхэн (пророчын) пэ лэ́стэ.8. Акэ, Мэ пхандава тут, соб (кай) ту тэ на рисёс екхэ рига́тыр пэ яви́р дакицы бут, сыр ту кончынэса дывэса́.9. Лэ пэ́скэ парно́ гив (гивны), гэрсто (ворзо), нуклэ (бобы), линса (чэчэвица), просо и вика, и чхув лэн дро екх кхоро́, и кэр лэ́ндыр пэ́скэ маро́. Ту явэ́са тэ хас лэс ада́кицы дывэса́, кицы́ явэ́са ту тэ пасёс: трин шэла́ тэ енядэша дывэса́.10. Ту явэ́са тэ хас тыро́ хабэ́н пир биш шэкэли пхарипнаса (весоса) дро дывэ́с, ха лэс дро пэ́скиро уляго (пора).11. И пани́ пи на́бут, пи пани́ дро пэ́скиро уляго (пора).12. И ха пэскро хабэ́н сыр гэрстытко маро́, и пэк лэн пэ манушэ́нгиро нажужыпэн, адя́кэ, соб (кай) мануша́ тэ дыкхэ́н.13. Тэ́ньци пхэндя́ Рай Дэвэ́л, Дэвэ́л: “Адя́кэ Израилёскирэ чхавэ́ явэ́на тэ хан пэскро нажужо маро́ машки́р кодолэ́ народы, кэ савэ́ Мэ вытрадава лэн.”14. Мэ пхэндём: “О, Раё Дэвлалэ! Николи мэ на со́мас магирдо́ мирэ́ тэрныпнастыр, мэ на хавас мулэ́-мурдалэскиро мас, мэ на хавас и дова́, со роскусця рискирибна́скиро мурда́л (зверё). Нисаво́ нажужо мас мэ на хаём.”15. Тэ́ньци Рай Дэвэ́л, Дэвэ́л пхэндя́ ма́нгэ: “Акэ, Мэ домэкава, соб (кай) ту тэ пэкэс пэ́скиро маро́ пэ гурувнякиро нажужипэн”16. И пхэндя́ ишчо (инкэ́) Ёв ма́нгэ: “Манушэ́скиро чхава! Акэ, Мэ отлава Ерусалимо́стыр маро́, со дэ́ла джиибэ́н. Явэ́на тэ хан маро́ пир котэра́ (куски) и ясвэ́нца, явэ́на тэ пьен пани́ пир тахта́й (чаша) и дара́са.17. Пал-дова́ со на явэ́ла лэ́ндэ маро́ и пани́. Ёнэ дара́са явэ́на тэ дыкхэ́н екх пэ явирэ́стэ, и ёнэ хасёна дрэ пэ́скирэ чорипэна.Psalms 119:161-168161. Тхага́рья (кня́зи) рэсэна вэрги́ткэс кэ мэ би причынакиро, нэ миро ило́ дарэ́ла Тырэ́ лавэ́стыр.162. Мэ бахталёвава Тырэ́ лавэ́стыр сы́рбы кодова́ ману́ш, кон латхя́ бари бажын.163. Мэ бидыкхава и дыкха́ва вучипна́стыр пэ кодолэндэ, савэ́ хохавэна, нэ ма́нгэ исын дро́го Тыро́ Зако́но.164. Мэ вышарава Тут эфта́ мо́лы пэ дывэ́с пал Тыро́ чачипна́скиро сэ́ндо.165. Пхэрдо́ рама́нё (миро) исын кодолэндэ, савэ́нгэ исын дро́го Тыро́ Зако́но и ёнэ на обштавэнапэ пир бар.166. О, Раё Дэ́вла! Мэ ужакирдём, соб (кай) Ту тэ зракхэс ман и пир Тырэ́ упхэныбэна́.167. Миро ди рикирэ́лапэ кэ Тырэ́ допхэныбэна, савэ́ исын древа́н дро́га ма́нгэ.168. Мэ рикиравапэ кэ Тырэ́ припхэныбэна́ и кэ Тырэ́ допхэныбэна, и сарэ́ мирэ́ дрома́ исын анги́л Тырэ́ якха́.Proverbs 28:13-1313. Кон гаравэла пэ́скирэ грэ́хи, одолэ́скэ на явэ́ла мишто́, нэ кон приджинэла грэ́хи и мэкэ́ла тэ кэрэ́л лэн, кодолэ́с Дэвэ́л тангинэла.Židenge 2:1-181. Палдава́ амэ́нгэ трэй тэ рикираспэ древа́н ракхунэс кэ дова́, со ракирэ́на, соб (кай) тэ на джан криг чачунэ́ дромэ́стыр.2. Пал-дова́ со, ко́ли лав, саво́ Янго́лы пхэндлэ́, исын сполниндло (кэрдо́ кэ ко́нцо (кэ яго́ро)), и мануша́ дорэсэ́на ка́ра пал дова́, со ёнэ кэрдэ́ проти Зако́но и пал дова́, со ёнэ на кандынэ́,3. нэ сыр тэды амэ менинаса ка́ра, ко́ли амэ на приласа илэ́са дасаво баро́ зракхибэ́н, саво́ англэды́р пхэндя́ Дэвэ́л, и допхэндлэ амэ́нгэ одолэ́, кон кокоро́ шундя́ Лэ́стыр;4. со Дэвэ́л и допхэндя Пэ́скирэ знамение́нца (ґертыкэ́нца), и дивэ́нца и кажнонэ́ зорье́нца, и Свэнтонэ́ Духо́скирэ таланэнца, саво́ Ёв дэ́лас манушэ́нгэ пир Пэ́скири во́ля.5. Пал-дова́ со Дэвэ́л на чхудя́ Янголэнгэ тэлэ́ тэл ґэра́ свэ́то, саво́ явэ́ла, пал саво́ амэ ракираса:6. нэ вари-кон допхэнэлас вари-катэ: “Кон адава́ ману́ш исын, со Ту рипирэса лэс? Ци со да дасаво манушэ́скиро чхаво́ исын, со Ту дыкхэ́са пал лэ́стэ?7. Ту лэс на́бут тыкнякирдян анги́л Янголэндэ, ту прославиндян и кутякирдян лэс, Ту чхудя́н хула́са лэс пэ дова́, со Тырэ́ васта́ кэрдэ́,8. Ту чхудя́н саро́ тэлэ́ тэл лэ́скирэ ґэра́. Ке́ли Ту чхудя́н саро́ тэлэ́ тэл Лэ́скирэ ґэра́ тэ хулаинэ́л, тэды ничы́ на яця́пэ, соб (кай) тэ на явэ́л лэ́скиро. Нэ амэ ишчо (инкэ́) на дыкхаса, соб (кай) саро́ тэ явэ́л лэ́скиро”,9. нэ амэ дыкхаса Исусо́с, Савэс Дэвэ́л на́бут тыкнякирдя анги́л Янголэндэ, и Саво́ исын прославиндло и кутякирдо, пал-дова́ со Ёв пиридживдя мэ́ньки и мэрибэ́н; Ёв пиридживдя мэрибэ́н пал сарэ́ манушэ́ндэ пир Дэвлэ́скиро бахталыпэ́н.10. Пал-дова́ со, чачэс, трэиндя́, соб (кай) Дэвэ́л, Саво́ создыя́ саро́ и дурэды́р ракхэ́ла, тэ сполнинэл саро́ пир Лэ́стэ пир Лэ́скирэ мэ́ньки, Саво́ исын Лыджаибнаскиро, соб (кай) тэ янэл сарэ́н тэ зракхэнпэ.11. Пал-дова́ со Одова́, Кон отмэкэ́ла манушэ́нгирэ грэ́хи, и одолэ́, савэ́нгэ Ёв отмэкця́ грэ́хи, сарэ́ исын Дадэ́скирэ чхавэ́, палдава́ Исусо́скэ нанэ ладжаво тэ кхарэл лэн пшалэ́нца;12. и Ёв ракирэ́ла: “Мэ ява́ва тэ пхэна́в зан пал Тыро́ лав Мирэ́ пшалэ́нгэ, и Мэ ява́ва тэ бага́в шарды́тко гилы́ Ту́кэ машки́р сарэ́ндэ дрэ Кхангири́.”13. И ишчо (инкэ́): “Мэ ява́ва тэ патяв зоралэ́с дрэ Лэ́стэ. И ишчо (инкэ́): “Ѓа́да, Мирэ́ чхавэ́ исын, савэ́н Дэвэ́л дыя́ Ма́нгэ.”14. Пал-дова́, со сыр сарэ́-манушэ́нгирэ чхавэ́ндэ исын рат и лоч (плоть), адя́кэ-паць и Ёв прилыя́ саро́, сыр ману́ш, ке́ли бия́ндыя, соб (кай) пир Пэ́скиро мэрибэ́н Ёв могиндя́ тэ хасякирэ́л налачхэскири зор пэ мэрибэ́н;15. и тэ дэл во́ля сарэ́нгэ кодолэ́нгэ, савэ́ дара́ндынэ мэрибна́стыр и сыс писха́рья анги́л мэрибэ́н саро́ пэ́скиро джиибэ́н.16. Пал-дова́ со исын бицяло́, со Ёв помогинэла на Янголэнгэ, а Авраамо́скирэ родо́скэ.17. Ваш дава́ Христосо́скэ трэиндя́ тэ явэ́л адасаво́-паць, сыр Лэ́скирэ пша́ла, соб (кай) ёв тэ явэ́л лачхэ́-илэ́скиро и чачуно́ Англатуно́ Раша́й тэ дынаринэ́л анги́л Дэвлэ́стэ, соб (кай) Ёв тэ отмэкэ́л манушэ́нгирэ грэ́хи;18. пал-дова́ со, сыр Ёв кокоро́ мэнчиндяпэ и на́лачхо пропатякирэлас Лэс, то Ёв какана́ могинэ́ла тэ помогинэл одолэ́нгэ, конэ́с пропатякирэна. Romani Bible Baltic 2019 Maintained by the United Bible Societies for the Baltic Romani Mission