Bible in one year November 7Ezekiel 5:1-171. А ту, манушэ́скиро чхава, лэ пэ́скэ востро (чолалы) курта́ла, лы́джа ла́са пир тыро́ шэро́ и пир тырэ́ чхора (брода) сыр мурадлуны (бритва), лэ пэ́скэ ублады́тка (весы), и роскэр бала́ пэ части (частыра).2. Три́то часть (частыр) хачкир яга́са машки́р фо́ро, сыр пхэрдякирэнапэ дывэса́, сыр вэ́рги облынэ трусця́л (ротаса) фо́ро, три́то частыр лэ и почингир куртала́са пашы́л фо́ро, и росчхурдэ три́то частыр пир балва́л. А Мэ вытырдава курта́ла пал лэ́ндэ.3. Лэ далэ́стыр нэвэ́с на́бут, запхандэ лэн дрэ бринда пэ́скрэ урибнаскири.4. А тэ́ньчи лэ ишчо (инкэ́) да лэ́стыр, со исын дрэ урибэ́н, и чхурдэ дрэ яг, схачкир кадава́ дрэ яг. Одотхы́р выджа́ла яг пэ саро́ Израилёскиро кхэр”5. Адя́кэ ракирэ́ла Рай Дэвэ́л, Дэвэ́л, Сарэзорья́киро: “Кадава́ исын Ерусалимо! Мэ чхудём лэс машки́р народы, а пашы́л лэ́стэ-пхувья́.6. А Ерусалимо кэрдя́ Мирэ́ припхэныбнэнца фуеды́р Наюдытконэ́ нацые́ндыр. Ёв кэрдя́ Мирэ́ закононэнца накучэдыр, со́са пхувья́, савэ́ исын пашы́л лэ́стэ. Ёнэ отпхэндлэпэ Мирэ́ упхэныбнэндыр, ёнэ на дживэ́нас пир Мирэ́ стату́ты.”7. Палдава́ адя́кэ ракирэ́ла Рай Дэвэ́л, Дэвэ́л: “Пал дова́, со тумэ́ кэрэ́нас тумарэ́ грэ́хи буты́р сыр Наюды́тка на́цыи, савэ́ дживэ́нас пашы́л тумэ́ндэ; и на кэрэ́на сыр исын припхэндло дрэ Мирэ́ припхэныбэна́, на дживэ́на пир Мирэ́ зако́ны, и тумэ́ на дживэ́на пир зако́ны, савэ́ исын машкира́л Наюды́тка на́цыи, савэ́ исын трусця́л тумэ́ндэ,8. палдава́ адя́кэ ракирэ́ла Рай Дэвэ́л, Дэвэ́л: “Акэ, чачэс, Мэ выджава пэ ту́тэ, Мэ Кокоро́, и кэра́ва машки́р ту́тэ сэ́ндо анги́л якха́ Наюдытконэ́-нацыенгирэ.9. И Мэ кэра́ва ту́са дова́, со Мэ николи на кэравас, и со буты́р Мэ на ява́ва тэ кэра́в пал сарэ́ тырэ́ джунгалэ́ (брыдка) рэ́нды.10. Пал дова́ дада́ явэ́на тэ хан машки́р ту́тэ чхавэ́н, а чхавэ́ явэ́на тэ хан дадэн. А Мэ ява́ва тэ сэндякирав тут, а тыро́ ячаибэ́н роспхурдава пир сарэ́ балваля.11. Палдова́, – “Тэ джива́в Мэ, – ракирэ́ла Рай Дэвэ́л, Дэвэ́л. – “Пал дова́, со ту магирдян Миро свэ́нто штэ́то сарэ́ пэ́скирэ джунгалыпнаса, и сарэ́ тырэ́ накуч рэндэ́нца Мэ кэра́ва тут тыкнэса, и на потангинэла тут Мири́ якх, и Миро ило́ на ковлёла пэ ту́тэ.12. Три́то паш ту́тэ мэрэ́ла фуендыр (язвэндыр) и хасёла бокха́тыр машки́р ту́тэ; три́то паш явэ́ла за-марды куртала́са пашы́л тыро́ фо́ро, а три́то паш Мэ роспхурдава пир сарэ́ балваля и Мэ вытырдава (дорэсава) пал лэ́ндэ курта́ла тэ традавпэ.13. И пириячэ́ла Мири́ холы́, и штылёла Миро холякирибэ́н пэ лэ́ндэ, и явэ́ла Ма́нгэ пир ило́, и ґалёна, со Мэ, Рай Дэвэ́л, Дэвэ́л, ракиравас дро Пэ́скиро зэвлыныпэ́н, ко́ли кончынэлапэ Мири́ хор холы́ пэ лэ́ндэ.14. И мэ кэра́ва адя́кэ, со ту явэ́са чхучи́ пхув и ладж, обракирибнаса машки́р народы, савэ́ исын пашы́л ту́тэ, анги́л якха́ кажнонэскирэ, кон явэ́ла тэ проджал пашы́л.15. И явэ́са ту сабнаса, и ладжаса, сыкаибнаса, и явэ́на тэ дивинэнпэ дара́са пэ ту́тэ народы, савэ́ исын пашы́л ту́тэ, ко́ли Мэ ява́ва тэ сэндякирав тут барэ́ холя́са и мэнькаса. Мэ, Рай Дэвэ́л, Дэвэ́л, пхэндём дава́.16. И ко́ли бичхава́ва Мэ пэ тумэ́ндэ барэ́ бокха, савэ́ явэ́на тэ хасякирэ́н тумэн, сыр мижэх матля, и ко́ли бичхава́ва лэн пэ тумаро́ хасибэ́н кэра́ва машки́р тумэ́ндэ бокх ишчо (инкэ́) зоралэды́р, Мэ отлава тумэ́ндыр маруно́ запасо,17. то бичхава́ва пэ тумэ́ндэ бокх, захалэ, рискирибна́скирэ мурдалэ́н (зверен); ёнэ отлэна тумэ́ндыр чхаворэ́н. Мэрибнытка фра́нсы / фуя́ (язвы) и рат пэрэ́на пэ ту́тэ, курта́ла явэ́ла пэ тумэ́ндэ. Мэ, Рай Дэвэ́л, Дэвэ́л, пхэндём дава́.”Ezekiel 6:1-141. И сыс кэ мэ Ра́скирэ-Дэвлэ́скиро лав дасаво:2. “Манушэ́скиро чхава! Рисёв тырэ́ мо́са кэ Израилёскирэ бэ́рги, ангилпхэн пэ лэ́ндэ.3. Пхэн: ‘Бэ́рги Израилёскирэ! Шунэ́н Ра́скирэ-Дэвлэ́скиро лав. Адя́кэ ракирэ́л Рай Дэвэ́л, Дэвэ́л пэ бэ́рги, бэ́ргицы, ровы и долы: акэ, Мэ кэра́ва адя́кэ, со курта́ла явэ́ла пэ тумэ́ндэ и роспхагирава тумарэ́ вучэ́ штэ́ты.4. Алта́ри тумарэ́ явэ́на роспхагирдэ́, сты́лбы тумарэ́, савэ́ тумэ́ ґаздэнас кхамэскэ, явэ́на розмардэ, Мэ росчхурдава тумарэ́ мулэн анги́л тумарэ́ и́долы.5. И Мэ чхува́ва тру́пы Израилёскирэ чхавэ́н анги́л лэ́нгирэ и́долы, и росчхувава тумарэ́ кокалы́ пашы́л тумарэ́ алта́ри.6. Дрэ сарэ́ штэ́ты, кай тумэ́ дживэ́на, фо́рья явэ́на чхучэ́, вучэ́ штэ́ты явэ́на роспхагирдэ́ ваш дова́, соб (кай) тэ авэн чхучэ́ и роспхагирдэ́ тумарэ́ алта́ри, соб (кай) тэ явэ́н зачхурдынэ тумарэ́ и́долы, соб (кай) тэ явэ́н роспхагирдэ́ сты́лбы кхамэскэ, соб (кай) тэ явэ́н бистырдэ тумарэ́ бутя́.7. И явэ́на тэ пэрэ́н машки́р тумэ́ндэ домардэ́, и ґалёна, со Мэ сом – Рай Дэвэ́л, Дэвэ́л.8. Нэ Мэ зракха́ва ячаибэ́н (остатко), и явэ́на тумэ́ндэ машки́р народы одолэ́, савэ́ ячэ́напэ джидэ́ куртала́тыр, ко́ли тумэ́ явэ́на рострадынэ пир яви́р пхувья́.9. И явэ́на тэ рипирэ́н пал Ма́нгэ кодолэ́, савэ́ ячэ́напэ джидэ́ машки́р народы, карик лэн традынэ. Пририпирна, ко́ли зачилавава лэ́нгиро биладжакиро ило́, со отпыя Ма́ндыр, и лэ́нгирэ якха́, савэ́ парувэнас Ма́нгэ анги́л и́долы. И ячэ́ла лэ́нгэ накуч дрэ лэ́нгирэ илэ пал дова́ чорипэ́н, саво́ ёнэ кэрэ́нас дрэ сарэ́ пэ́скрэ джунгалэ́ рэ́нды (де́лы).10. И ґалёна, со Мэ сом Рай Дэвэ́л, Дэвэ́л. На ивья́ ракиравас Мэ, со Мэ яна́ва лэ́нгэ бари би́да.”11. Адя́кэ ракирэ́ла Рай Дэвэ́л, Дэвэ́л: “Мар вастэ́нца, малав тырэ́ ґэрэ́нца, и пхэн: ‘Бида пал саро́ Израилёскирэ кхэрэ́скирэ чорипэ́н и джунгалыпэ́н! Ёнэ хасёна куртала́тыр, бокха́тыр и мэрибнытконэ франсэндыр.12. Кон исын дур, кодова́ мэрэ́ла мэрибнытконэ франсэндыр, а кон ячэ́лапэ, одова́ мэрэ́ла бокха́тыр. Адя́кэ Мэ выпхэрдякирава пэ лэ́ндэ Мири́ бари холы́.13. И ґалёна, со Мэ сом Рай Дэвэ́л, Дэвэ́л, ко́ли домардэ́ явэ́на тэ пасён машки́р лэ́нгирэ и́долы трусця́л лэ́нгирэ алта́ри, пэ кажно бэрґица, пэ сарэ́ сама вучэ́ бэрґи, тэл кажно зэлэно кашт, тэл кажно ґэнсто дэмбо, пэ дова́ штэ́то, кай ёнэ хачкирэнас кучонэ́-кхандыпнытка смо́лы сарэ́ идолэ́нгэ.14. И протырдава Мэ кэ ёнэ Миро васт, и кэра́ва адя́кэ, со пхув ячэ́ла чхучи́, чхучэдыр штэто́стыр, кай чхучэ́ пхувья́ Дивлаф кэ сарэ́ штэ́ты, кай ёнэ дживэ́на. И тэ́ньчи ёнэ ґалёна, со Мэ сом Рай Дэвэ́л, Дэвэ́л.”Psalms 119:169-176169. Мэк тэ джал пашылэды́р кэ Ту миро роибэ́н, о Раё Дэ́вла: дэ годы́ ма́нгэ пир Тыро́ лав.170. Мэк тэ явэ́л мири́ па́тери (моли́тва) кэ Ту: зра́кх ман пир лав, со Ту дыя́н.171. Мэк тэ шарэ́н мирэ́ ушта́ Тут, ке́ли Ту сыклякирэса ман Тырэ́ статутэнгэ.172. Мэк тэ выпхэнэл зоралэ́с мири́ чиб пал Тыро́ лав, пал-дова́ со Тырэ́ припхэныбэна́ исын чачипнаскирэ.173. Мэк тэ помогинэл Тыро́ васт ма́нгэ, пал-дова́ со мэ выкэдыём Тырэ́ упхэныбэна́.174. Мэ тырдавапэ илэ́са, соб (кай) Ту тэ зракхэс ман, о Раё Дэ́вла и мэ бахталёвава Тырэ́ Законо́стыр.175. Мэк тэ дживэ́л миро ди и ёв явэ́ла тэ шарэл Тут; мэк тэ дэл васт ма́нгэ Тыро́ чачипэ́н.176. Мэ гиём дрэ риг сыр бакри, сави́ нашадыя: придыкхпэ пашылэды́р кэ Тыро́ писха́ри; пал-дова́ со мэ на бистрава Тырэ́ припхэныбэна́.Proverbs 28:14-1414. Бахтало́ исын ману́ш, кон усады (сак) патыва́са дарэ́ла Дэвлэ́стыр, нэ кон пхарьякирэла пэ́скиро ило́, кодова́ пэрэ́ла дрэ бари би́да.Židenge 3:1-191. Палдава́, пшала́лэ свэ́нта, савэ́н Дэвэ́л адя́кэ-паць прикхардя, дыкхэ́н пэ Исусо́стэ, Савэс Дэвэ́л бичхадя́ тэ явэ́л англатунэ́ Раша́са пир амаро́ патяибэ́н,2. Саво́ исын патяибны́тко Одолэ́скэ, Кон чхудя́ Лэс пэ дая́ буты́, сыр и Мо́йза адя́кэ-паць пир саро́ Дэвлэ́скиро Кхэр.3. Пал-дова́ со Лэ́стэ сыс барэды́р сла́ва, сыр Мойзастэ, адя́кэ-паць сыр манушэ́стэ, саво́ чхудя́ кхэр, кутякирэна (дэ́на паты́в) буты́р, сыр кокоро́ кхэр.4. Пал-дова́ со кажно кхэр вари-саво́ ману́ш чхувэ́ла, а Кодова́, Кон чхудя́ саро́, исын Дэвэ́л.5. И Мо́йза сыс чачуно́ дына́ри пир саро́ Дэвлэ́скиро Кхэр ваш допхэныбэ́н пал дова́, со трэй тэ явэ́л анги́л;6. а Христо́со сыр Дэвлэ́скиро Чхаво́, сыс Хула́й пир Лэ́скиро кхэр; амэ сам кокорэ́ мануша́ Лэ́скирэ кхэрэ́скирэ, ко́ли зорало́ патяибэ́н и наде́я, савья́са амэ шарасапэ, явэ́ла амэ́ндэ кэ ко́нцо (кэ яго́ро).7. Палдава́ Свэ́нто Ду́хо (Фа́но) ракирэ́ла: “Ко́ли ададывэ́с тумэ́ шунэ́на Лэ́скири зан,8. на отрискирэн пэ́скиро ило́, сыр да тумэ́ ґаздынэ́пэ пэ Дэвлэ́стэ, ке́ли тумэ́ са́нас пэ чхучи́ пхув;9. кай тумарэ́ дада́ пропатякирэнас Ман, мэк ёнэ и дыкхнэ́, со Мэ кэрдём штардэша́ бэрш.10. Палдава́ Мэ и холясыём пэ адалэ́ манушэ́ндэ и пхэндём: ‘Саро́ часо ёнэ хохавэна пэс дро пэ́скиро ило́, и ёнэ на джинэ́на Миро дром’;11. палдава́ Мэ совлахадём дрэ холы́: ‘Ёнэ ние́кхвар на заджа́на дро Миро штэ́то тэ откхинён Ма́нца’.12. Пшала́лэ, дыкхэ́н, соб (кай) тэ на явэ́л пхутькирдо ило́ ни дрэ конэ́стэ тумэ́ндыр, саво́ на кандэ́ла Дэвлэ́с, соб (кай) тумэ́ тэ на отджан джидэ́ Дэвлэ́стыр.13. А подрикирэн екх екхэ́с со дывэ́с кэ/жы́ко дова́ часо, пака сашты́ тэ ракирэ́с “ададывэ́с”, соб (кай) грэ́хо тэ на хохавэ́л тумэн и тэ на отрискирэл тумаро́ ило́.14. Пал-дова́ со амэ ячасапэ кхэтанэ́ Христосо́са, ко́ли зракхаса дова́ зорало́ патяибэ́н кэ ко́нцо (кэ яго́ро), со амэ́ндэ сыс англэды́р.15. Палдава́ исын пхэндло́: “Ко́ли тумэ́ ададывэ́с шунэ́на Лэ́скири зан, на отрискирэн пэ́скиро ило́, сыр тумарэ́ дада́ дава́ кэрдэ́, ке́ли ґаздынэ́пэ пэ Дэвлэ́стэ”;16. кон сыс одолэ́ мануша́, со, ке́ли шундлэ́, ґаздынэ́пэ пэ Дэвлэ́стэ? Нау́што на сарэ́ лэ́ндыр выгинэ́ Египто́стыр Мойзаса?17. и пэ конэ́стэ Дэвэ́л сыс холямо́ штардэша́ бэрш? Ци на пэ одолэ́ндэ, савэ́ кэрдэ́ грэ́хи, и конэскирэ кокалы́ ячнэ́пэ тэ пасён пэ чхучи́ пхув?18. И конэ́скэ Ёв совлахадя́, со ёнэ на заджа́на пэ штэ́то тэ откхинён Лэ́са, нау́што на одолэ́нгэ, кон на кандыя́ Лэс?19. И амэ дыкхаса, со ёнэ на могиндлэ́ тэ заджа́н пэ Лэ́скиро штэ́то тэ откхинён, пал-дова́ со ёнэ на патяндынэ́. Romani Bible Baltic 2019 Maintained by the United Bible Societies for the Baltic Romani Mission