Beblia

1. И сыс кэ мэ Ра́скирэ-Дэвлэ́скиро лав дасаво:

2. “Ту, манушэ́скиро чхава, пхэн: “Адя́кэ ракирэ́ла Рай Дэвэ́л, Дэвэ́л. ‘Ко́нцо (яго́ро) исын Израилёскирэ пхувьякэ, ко́нцо (яго́ро) явдя́ пэ сарэ́ штар рига́.

3. Акэ, ко́нцо явдя́ ту́кэ. Бичхава́ва Мэ пэ ту́тэ Мири́ холы́, Мэ ява́ва тэ сэндякирав тут пир тырэ́ дрома́, и Мэ чхува́ва банг пэ ту́тэ пал сарэ́ тырэ́ джунгалыпэна.

4. И на потангинэла тут Мири́ якх, и Миро ило́ на ковлёла кэ ту. Мэ отда́ва палэ ту́кэ пир тырэ́ дрома́, и джунгалыпэна тырэ́ явэ́на ту́са, и ґалёна, со Мэ сом Рай Дэвэ́л, Дэвэ́л.’

5. “Адя́кэ ракирэ́ла Рай Дэвэ́л, Дэвэ́л: ‘Бари биба́хт екхджины, акэ, джа́ла биба́хт.

6. Ко́нцо (яго́ро) явдя́, явдя́ ко́нцо (яго́ро), ґаздыя́пэ пэ ту́тэ, акэ, явдя́.”

7. Явдя́ тыри́ кирки до́ля кэ ту, ману́ш, саво́ дживэ́ла пэ пхув! Явэ́ла часо (цы́ро), джа́ла пхаро́ дывэ́с, на явэ́ла тэ розмэкэлпэ ра́дыма пэ бэ́рги.

8. Акэ, сы́гэс Мэ чхува́ва пэ ту́тэ Миро холямипэн, и Мэ выпхэрдякирава пэ ту́тэ холы́ Мири́. Ява́ва Мэ тэ сэндякирав тут пир тырэ́ дрома́, Мэ чхува́ва банг пэ ту́тэ пал сарэ́ тырэ́ джунгалэ́ рэ́нды.

9. И на потангинэла тут Мири́ якх, и Миро ило́ на ковлёла кэ ту. Мэ отда́ва палэ ту́кэ пир тырэ́ дрома́, и чорипэна тырэ́ явэ́на ту́са, и тумэ́ ґалёна, со Мэ сом Рай Дэвэ́л, Дэвэ́л, Саво́ пхарэ́с сэндякирэ́ла.

10. Акэ, исын дывэ́с! Акэ, явдя́ ёв, выбария дэсто́, розбария пхутькирибэ́н.

11. Ѓаздэлапэ нахратэс зор пэ чорипнэнгиро дэсто́. Ничи на ячэ́лапэ лэ́ндыр (Израилёстыр) и лэ́нгирэ барвалыпнастыр, лэ́ндыр кокорэндыр, лэ́нгирэ шуминыбнастыр, лэ́нгирэ гожыпнастыр.

12. Явдя́ часо, подги́я дывэ́с. Кон киндя – на ра́дынпэ, кон бикиндя – на ров, пал-дова́ со холямипэн Дэвлэ́скиро исын пэ лэ́ндэ сарэ́ндэ.

13. Одова́, кон бикиндя, на рисёла кэ дова́, со ёв бикиндя, ко́ли ячэ́лапэ джидо́, пал-дова́ со пророкоскиро дыкхибэ́н ваш саро́ лэ́нгиро бутыпэн на отпарувэлапэ; и нико́н пэ́скирэ чорипнаса на зракхэ́ла пэ́скиро джиибэ́н.

14. Забашавэна дро ро́го (труба), саро́ кэдэлапэ, соб (кай) тэ джал пэ марибэ́н, нэ нико́н на явэ́ла пэ марибэ́н, пал-дова́ со Миро холямипэн исын пэ саро́ лэ́нгиро бутыпэн.

15. Пало́ кхэр-курта́ла, а дро кхэр-фуя́ и бокх. Кон исын пэ фэ́лда, одова́ мэрэ́ла куртала́тыр, а кон исын дрэ фо́ро, кодолэ́с схана бокх и фра́нсы.

16. А кон зракхэ́лапэ, одолэ́ нашэ́на, и явэ́на пэ бэ́рги сыр голумбы пэ до́ло. Сарэ́ ёнэ явэ́на тэ ровэ́н, кажно (сва́ко) пал пэ́скиро чорипэ́н.

17. Сарэ́ндэ обмэкэнапэ васта́, и чанга́ сарэ́ндэ издрана сыр пани́.

18. Тэ́ньци ёнэ урьенапэ дро балытко гуно праскаса, и учхакирэ́ла лэн трашаибэ́н, ладж явэ́ла пэ муя́ и ёнэ обчхинэна пэ́скирэ бала́.

19. Пэ́скиро руп вычхурдэна ёнэ пэ вули́ца (га́са), сувнака́й на явэ́ла лэ́нгэ трэй. Лэ́нгирэ руп и сувнака́й на зракхэна лэн дро дывэ́с, ко́ли явэ́ла Ра́скирэ-Дэвлэ́скиро холямипэн. Ёнэ на чаравэна лэ́нца лэ́скиро ди, и на пхэрдякирэна лэ́нца пэ́скиро пэр, пал-дова́ со руп и сувнака́й долыджинэ лэн кэ чорипэ́н.

20. И сыс ёнэ пхутькирдэ́, со сыс лэ́ндэ руп и сувнака́й пэ урибэ́н, ёнэ кэрэ́нас лэ́ндыр вычхиндлэ́ муя́ пэ́скирэ джунгалэ́ дэвлорэ́нгэ. Пал дава́ Мэ кэра́ва адя́кэ, со руп и сувнака́й явэ́на сыр ґнэё.

21. Отда́ва Мэ руп и сувнака́й дрэ васта́ сыр дорэсыбэ́н чужонэ́ манушэ́нгэ, грэхитконэ́ манушэ́нгэ, со исын пэ пхув, ёнэ чорэна лэс, и явэ́ла руп, сувнака́й магирдэ́ лэ́ндыр.

22. И рисёва́ва Мэ лэ́ндыр Мирэ́ мо́са, и ёнэ магирэна Миро свэ́нто штэ́то. Явэ́на розмарибнарья тэ магирэ́н лэс.

23. Кэр зандир (цэпо), пал-дова́ со пэ ада́я пхув чхувэ́лапэ рат, и дро фо́ро кэрэ́лапэ нахратыма (насильствы).

24. Мэ яна́ва явирэ народо́стыр дасавэ́ манушэ́н, савэ́ исын най фуеды́р Наюдытконэ́ нацые́ндыр. Ёнэ залэна лэ́нгирэ кхэра́. И закончынэлапэ зоралэнгиро пхутькирибэ́н, и явэ́ла магирдо́ лэ́нгиро свэ́нто штэ́то.

25. Джа́ла хасибэ́н: явэ́на тэ родэ́н рама́нё (миро), и на латхэ́на.

26. Бари би́да явэ́ла пал бари би́да, шуныбэ́н пало́ шуныбэ́н. Явэ́на тэ мангэ́н дыкхибэ́н пророкостыр, на явэ́ла сыкляибэн рашастэ и лачхо́ лав годэ́ – пхурэндэ/пхурыдырэндэ.

27. О кра́ли явэ́ла тэ тугинэл, тхагарис учхакирна бала́, манушэ́ндэ, со исын пэ пхув, явэ́на тэ издран васта́. Мэ кэра́ва лэ́нца пир лэ́нгирэ дрома́, Мэ ява́ва тэ сэндякирав лэн пир лэ́нгирэ сэнды, и ёнэ ґалёна, со Мэ сом Рай Дэвэ́л, Дэвэ́л.’”

1. И сыс дро шо́вто бэрш, дро шо́вто чхон, пэ па́нджто дывэ́с. Мэ бэшавас дрэ миро кхэр, и Юдэя́кирэ пхурыдыра́ бэшэнас анги́л ма́ндэ и пыя́ пэ ма́ндэ одо́й Ра́скирэ-Дэвлэ́скиро, Дэвлэ́скиро васт.

2. Мэ дыкхцём: акэ, вари-сави́ патри́н(о́бразо) сы́рбы ману́ш, лэскрэ ґэрэндыр сыс сы́рбы яг, вучэды́р лэ́стыр сы́рбы дуд, сы́рбы дуд ягатыр.

3. Ёв протырдыя́ сы́рбы васт, и лыя́ ман пал бала́ пэ миро шэро́. И ґаздыя́ ман Ду́хо (Фа́но) машки́р пхув и болыбэ́н, и лыджия́ ман дрэ Дэвлэ́скирэ дыкхибэна кэ фо́ро Ерусалимо кэ загиибэ́н пашы́л вуда́р, саво́ сыс чхудо пэ паш-рат (северо), кай сыс чхудо идоло; саво́ выкхарэла зэвлыныпэ́н.

4. Акэ, одо́й сыс Израилёскирэ-Дэвлэ́скири сла́ва, сыр одоя, сави́ мэ дыкхцём пэ фэ́лда.

5. И пхэндя́ Ду́хо ма́нгэ: “Манушэ́скиро чхава! Ѓаздэ тырэ́ якха́ кэ паш-рат (северо).” Мэ ґаздыём мирэ́ якха́ кэ паш-рат, акэ, долэ́ рига́тыр пашы́л алтарёскири по́рта, пашы́л загиибэ́н сыс дова́ зэвлэныпнаскиро идоло.

6. И пхэндя́ Ёв ма́нгэ: “Манушэ́скиро чхава! Дыкхэ́са ли, со ёнэ кэрэ́на? Баро́ джунгалыпэ́н, саво́ кэрэ́ла ада́й Израилёскиро Кхэр (Кхангири́), соб (кай) Мэ тэ джав криг Мирэ́ свэнтонэ́ штэто́стыр? Нэ обрисёв, и дыкхэ́са джунгалыпэ́н (брыткима) ишчо (инкэ́) буты́р.

7. И Ёв яндя́ ман кэ загиибэ́н дрэ грэ́да (дво́ро), мэ подыкхцём: акэ, дрэ ва́нта сыс пропхагирибэн.

8. И пхэндя́ ма́нгэ: “Манушэ́скиро чхава! Проганав ва́нта” Мэ проганадём. Акэ, исын вари-саво́ вуда́р.

9. И пхэндя́ Ёв ма́нгэ: “Заджа́, подыкх пэ бэдо джунгалыпэ́н, саво́ ёнэ кэрэ́на ада́й.”

10. Мэ загиём и дыкхцём. Акэ, кажно патри́н (рисунко) цапненгиро, и нажужа мурдала́ и кажна и́долы Израилёскирэ кхэрэ́скирэ сыс чхиндлэ́ пэ ва́нты.

11. А эфтадэша́ (битрияндэнгиро шэл) мурша́, Израилёскирэ-Кхэрэ́скирэ годэ́-пхурэндыр (пхурыдырэндыр) сыс тэрдэ́ анги́л лэ́ндэ, и Езания́ (Иезания), Сафаноскиро чхаво́ сыс тэрдо́ машки́р лэ́ндэ. Кажнонэ́стэ дро васт исын пэ́скири кадила тхувипнаскири, баро́ облако кучонэ́-кхандыпнаскиро ґаздэласпэ упрэ́.

12. И пхэндя́ Ёв ма́нгэ “Дыкхэ́с ці, со кэрэ́на Израилёскирэ кхэрэ́скирэ барэдыра дро калыпэ́н (тёмныма) рат, со кэрэ́ла кажно лэ́ндыр дрэ пэ́скири шту́ба, кай исын и́долы? Ёнэ ракирэ́на: “На дыкхэ́ла амэн Рай Дэвэ́л, Дэвэ́л, ячадя Рай Дэвэ́л, Дэвэ́л дая́ пхув”

13. И пхэндя́ ма́нгэ: “Обрисёв и ишчо (инкэ́) буты́р дыкхэ́са джунгалыпэ́н, саво́ ёнэ кэрэ́на”

14. И яндя́ ман кэ загиибэ́н дрэ Ра́скирэ-Дэвлэ́скирэ Кхэрэ́скири (Кхангирья́кири) по́рта, сави́ исын пэ паш-рат (северо). Акэ, одо́й бэшэнас манушня, савэ́ ровэнас ваш Фамузо (Тамузо).

15. И пхэндя́ ма́нгэ: “Дыкхэ́са ци, манушэ́скиро чхаво́? Обрисёв, и ишчо (инкэ́) буты́р джунгалыпэ́н дыкхэ́са, саво́ ёнэ кэрэ́на.”

16. И яндя́ Ёв ман дрэ грэ́да (дво́ро), сави́ сыс андра́л Ра́скирэ-Дэвлэ́скиро Кхэр. Акэ, пашо вуда́р Ра́скирэ-Дэвлэ́скири Кхэр (Кхангири́) машки́р трэмы (коридоры) и алта́рё сыс тэрдэ́ биш тэ пандж пхурыдыра́. Лэнгрэ муя́ дыкхэнас пэ васто́ко, а кэ Ра́скирэ-Дэвлэ́скири Кхэр ёнэ думэса рисинэ́, и мангэнаспэ (молинэнаспэ) кхамэскэ пэ васто́ко.

17. И пхэндя́ ма́нгэ: “Дыкхэ́са ци, манушэ́скиро чхаво́? Нау́што/хай ишчо (инкэ́) на́бут Юдакирэ кхэрэ́скэ долэ́ джунгалыпэна, савэ́ ёнэ кэрдэ́ ада́й, нэ ёнэ инкэ́ (ишчо) пхэрдякирдэ пхув нахратымаса, и ёнэ рисинэ́ тэ кошэнпэ Ма́нца. Акэ, ёнэ подлыджана рандя́ (вэ́тки) кэ пэ́скирэ накха.

18. Пал дова́ Мэ ява́ва тэ кэра́в холямипнаса: на потангинэла Мири́ якх, и на поковлёла Миро ило́. Мэк ёнэ тэ годлэн дрэ Мирэ́ кана́ зоралэ́ заня́са, нэ Мэ на шунава лэн.”

1. Гилы́ анги́л Кхангири́. Ке́ли ма́нгэ сыс пхаро́, мэ кхардём зоралэ́с Рас-Дэвлэ́с, и Ёв отпхэндя́ ма́нгэ.

2. О Раё Дэ́вла, зра́кх миро ди хоханэ́ уштэндыр, фрэнтонэ чибатыр.

3. Со дэ́ла ту́кэ? Саво́ лачхипэ́н янэ́ла ту́кэ начачуны чиб?

4. Халадэскирэ востра (чолалэ́) марибны́тка бустя́ (стре́лы) ягакирэ вангарэнца ядлоўцостыр?

5. Бида ма́нгэ, со мэ сом манушэ́нца кэ Масохо, со мэ джива́ва машки́р Кедароскирэ ша́тры.

6. Миро ди древа́н бут дживдя́ машки́р одолэ́ндэ, кон бидыкхэла рама́нё (миро).

7. Мэ сом пал рама́нё (миро); нэ ке́ли мэ ракира́ва, тэды ёнэ пал марибэ́н.

15. Сыр шчэр (ле́во), саво́ рыкинэла, и сыр рич, саво́ исын холынакиро, исын фуй барыдыро́, саво́ хулаинэла пэ чорэ́ манушэ́ндэ.

1. Палдава́, пака пхэндло́ лав амэ́нгэ тэ заджа́н пэ доя́ пхув тэ откхинён Лэ́са, на хасия́, тэды ява́са тэ ракхаспэ, соб (кай) тэ на явэ́л адя́кэ, со вари-кон явдя́ древа́н кори́г (по́знэс).

2. Бахталы́ зан (звесь) сыс пхэндлы амэ́нгэ, адя́кэ-паць сыр и лэ́нгэ, нэ лэ́нгэ доя́ зан, сави́ ёнэ шундлэ́, на яндя́ ни саво́ лачхипэ́н, пал-дова́ со ёнэ на прилынэ́ дава́ пхэныбэ́н патяибна́са.

3. Нэ амэ, савэ́ патя́са, заджаса пэ доя́ пхув тэ откхинёвас Лэ́са, адя́кэ, сыр Дэвэ́л пхэндя́: “Мэ совлахадём дрэ Мири́ холы́: “Ёнэ ние́кхвар на заджа́на тэ откхинён Ма́нца’”, на дыкхи́ пэ дова́, со Лэ́скирэ бутя́ сыс сарэ́ кэрдэ́ анги́л дова́, сыр Ёв создыя́ свэ́то.

4. Палдава́ Дэвэ́л пхэндя́ вари-катэ дро Свэ́нто Чхиныбэ́н пал эфта́то (битринэ́нгиро дэ́што) дывэ́с адя́кэ: “И откхиныя Дэвэ́л пэ эфта́то дывэ́с сарэ́ Пэ́скирэ бутендыр”:

5. и нэвэ́стыр исын пхэндло́: “Ёнэ ние́кхвар на заджа́на тэ откхинён Ма́нца.”

6. Нэ Дэвлэ́скиро лав, саво́ Ёв дыя́, ячэ́лапэ, и вари-савэ́ мануша́ заджа́на тэ откхинён Лэ́са; а кодолэ́, савэ́нгэ сыс пхэндло́ лав пал Христосо́стэ, на заджа́на, пал-дова́ со ёнэ на кандынэ́, со пхэндя́ Дэвэ́л,

7. и Ёв выкэдэ́ла нэво́ дывэ́с, саво́ Ёв кхардя́ “ададывэ́с.” Пало́ (после) дова́, сыр прогия́ (накхця) бут бэрш, Дэвэ́л пхэндя́ Давидо́скирэ уштэ́нца адя́кэ, сыр Ёв ракирдя́ ґарэдыр: “Ададывэ́с, ке́ли тумэ́ шунэ́на Лэ́скири зан (глос), на пхарьякирэн пэ́скирэ илэ.”

8. Палдава́, ко́ли Ису́со-Навино дэ́лас Дэвлэ́скирэ манушэ́нгэ тэ откхинён Дэвлэ́са, тэды Дэвэ́л на ракирэ́лас коригэды́р (позжэды́р) пал яви́р дывэ́с.

9. Палдава́ са́вато (субо́та) ячэ́лапэ ваш Дэвлэ́скирэ манушэ́нгэ тэ откхинён.

10. Ко́ли вари-кон заджа́ла тэ откхинёл Лэ́са, ёв адя́кэ-паць откхинёла пэ́скирэ бутя́тыр, сыр Дэвэ́л откхиныя Пэ́скирэ бутя́тыр.

11. И палдава́ ява́са амэ тэ причхувас зор тэ кэра́с буты́р, соб (кай) амэ́нгэ тэ заджас тэ откхинёвас Лэ́са, соб (кай) пир дова́-паць приме́ро (сыкаибэ́н) амэ тэ на пэрас, сыр одолэ́ мануша́, савэ́ на кандынэ́.

12. Дэвлэ́скиро лав исын джидо́ и пхэрдо́ зорья́са, вострэдыр (чолалэды́р) любонэ куртала́тыр, сави́ чхинэла пэ дуй рига́, Дэвлэ́скиро лав заджа́ла хор машки́р ило́ и ду́хо (фа́но), машки́р кокалы́ и трушу́л, кай исын думо, и сэндинэла манушэ́нгирэ рэ́нды и мысли пэ ило́.

13. Нисо́ дро свэ́то, со Дэвэ́л создыя́, нанэ ґарадо Дэвлэ́стыр; нэ саро́ исын нанго и бицяло́ анги́л Лэ́скирэ якха́, анги́л Конэ́стэ амэ ява́са тэ отпхэнас пал саро́.

14. Пал-дова́ со амэ́ндэ исын са́мо барэды́р Англатуно́ Раша́й Ису́со, Дэвлэ́скиро Чхаво́, Саво́ прогия́ болыбэ́н кэ Дэвэ́л, амэ ява́са тэ рикираспэ зоралэ́с пал амаро́ патяибэ́н.

15. Амэ́ндэ исын на адасаво́ англатуно́ раша́й, саво́ на могинэ́ла тэ помогинэл (тэ подэл васт) амэ́нгэ дро амаро́ бизорьякирибэн, нэ Адасаво́ Англатуно́ Раша́й, Саво́ сыс пропатякирдо дро саро́, нэ сыр и амэ, нэ Саво́ на кэрдя́ грэ́хо.

16. Палдава́ амэ ява́са тэ джас пашылэды́р муршыпнаса кэ Дэвлэ́скиро троно, Кон дэ́ла бахталыпэ́н, соб (кай) тэ дорэсас тангипэ́н и бахталыпэ́н тэ помогинас (тэ подас васт) екх екхэ́скэ.

Romani Bible Baltic 2019

United Bible Societies for the Baltic Romani Mission