Bible in one year - Пэ Балтитко Романи чиб

Bible in one year November 9

1. И пхэндя́ Ёв, соб (кай) тэ шунэ́н мирэ́ кана́, зоралэ́ заня́са: “Мэк тэ джа́н пашылэды́р одолэ́, савэ́ явэ́на пхарэ́с тэ сэндякирэн фо́ро, кажнонэ́стэ дрэ васт сыс дова́, со хасякирэ́ла кэ мулыпэн.

2. Акэ, шов мануша́ джа́на упратунэ портатыр, со исын кэ паш-рат (северо). Кажнонэ́стэ (сваконэстэ) дро васт исын дова́, со хасякирэ́ла кэ мулыпэн, а машки́р лэ́ндэ сыс екх, саво́ сыс уридо́ дро похтанытко урибэ́н, конэ́стэ пашы́л лэскро симири сыс дова́, со́са чхинэна лыла́ (приборо). И явнэ́ ёнэ, и сыс тэрдэ́ пашы́л алта́рё.

3. И Израилёскирэ-Дэвлэ́скири сла́ва згия херувимостыр, пэ конэ́стэ ёй сыс, кэ Кхэрэ́скиро прого. И кхардя́ Ёв манушэ́с дро похтанытко урибэ́н, конэ́стэ пашы́л лэскро симири, сыс дова́, со́са чхинэна лыла́.

4. И пхэндя́ лэ́скэ Рай Дэвэ́л, Дэвэ́л: “Джа́ пэ́скэ машки́р фо́ро, машки́р Ерусалимо, и кэр шпэ́ра (знако) пэ чэкат одолэ́ манушэ́нгирэ, савэ́нгэ исын пхаро́ пал саро́ джунгалыпэ́н, и савэ́ пиридживэна, со кэрэ́лапэ машки́р лэ́ндэ.”

5. А явирэ́нгэ пхэндя́ адя́кэ, соб (кай) мэ тэ шунав: “Джа́н пал лэ́стэ пир фо́ро тэ мулякирэ́н, мэк тэ на тангинэ́л тумари́ якх, мэк тэ на ковлёл тумаро́ ило́.

6. Пхурэн и тэрнэ́ манушэ́н, патывалэ́ тэрнэ́ джувле́н и биято́с и джувле́н мулякирэ́н, нэ на чилавэн ни екх манушэ́с, пэ конэ́стэ исын шпэ́ра (знако). Лэн (зачнинэн) тэ кэрэ́н Мирэ́ свэнтонэ́ штэто́стыр.” Ёнэ лынэ́ тэ мулякирэ́н долэ́ годэ́-пхурэндыр (пхурыдырэндыр), савэ́ сыс анги́л Кхэр.

7. И пхэндя́ Ду́хо (Фа́но) лэ́нгэ: “Магирэ́н Кхэр (Кхангири́), и пхэрдякирэн грэ́да (дво́ро) домардэ́ манушэ́нца, и выджа́н.” Ёнэ гинэ́ яври́, лынэ́ тэ замарэ́н дро фо́ро.

8. Ко́ли ёнэ замарэнас лэн, а мэ яцёмпэ, тэ́ньчи мэ пыём пэ пэ́скиро муй, и дыём го́дла, и пхэндём: “Раё Дэ́вла, Дэ́вла! Ту чхувэ́са Тыро́ холямипэн пэ Израилё, со Ту хасякирэса саро́ Израилёскиро ячаибэ́н?”

9. Тэ́ньци пхэндя́ Ёв ма́нгэ: “Израилёскирэ-кхэрэ́скиро и Юдэя́киро чорипэ́н исын баро́, древа́н баро́, и ада́я пхув исын пхэрды́ ратэ́са, и фо́ро исын пхэрдо́ чорипнаса, со кэрэ́нас пэхроми, долэ́стыр, со ёнэ ракирэ́на: “Мэкця́ Рай Дэвэ́л, Дэвэ́л ада́я пхув, и на дыкхэ́ла Рай Дэвэ́л, Дэвэ́л.”

10. Пал дова́ на потангинэла лэн Мири́ якх, и на ковлёла Миро ило́; нэ Мэ да́ва лэнгрэ рэ́нды палэ пэ лэнгрэ шэрэ́.

11. Акэ, ману́ш, уридо́ дро похтанытко (ґандладытко) урибэ́н, конэ́стэ пашы́л симири сыс дова́, со́са чхинэна лыла́, дыя́ отпхэныбэ́н и пхэндя́: “Мэ кэрдём, сыр Ту припхэндян ма́нгэ.”

Ezekiel 10:1-22

1. И мэ дыкхцём, акэ, пэ сво́до, саво́ сыс упра́л херувимонэнгирэ шэрэ́, сыс вари-со сы́рбы куч бар сапфиро, сы́рбы вари-со, сыр троно (престоло), со сыс упрэ́ лэ́ндыр.

2. И ракирэ́лас Ёв манушэ́скэ, саво́ сыс уридо́ дро похтанытко урибэ́н, и пхэндя́: “Джа́ андрэ́ машки́р ро́ты тэл херувимы, лэ пхэрдэ́ васта́ хачкирдэ́ вангара и чхурдэ лэн пэ фо́ро.” Ёв гия́ андрэ́ пэ мирэ́ якха́.

3. Херувимы сыс тэрдэ́ пир чачи́ риг Кхэрэ́стыр, ко́ли загия́ одова́ ману́ш, и о́блоко пхэрдякирэлас грэ́да (дво́ро), сави́ сыс андра́л.

4. И ґаздыя́пэ Ра́скирэ-Дэвлэскри сла́ва херувимостыр и догия́ кэ Кхэрэ́скиро про́го, и Кхэр пхэрдякирдяпэ облокоса, и сыс дуд пэ грэ́да, сави́ зяинэлас Ра́скирэ-Дэвлэ́скирэ славатыр.

5. Шуныбэн херувимонэнгирэ пхакэндыр сыс шундло пэ грэ́да, сави́ сыс яври́, сы́рбы зан Сарэзорьякирэ-Дэвлэ́скири, ко́ли Ёв ракирэ́ла.

6. И сыс адя́кэ, ке́ли Ёв припхэндя́ манушэ́скэ, саво́ сыс уридо́ дро похтанытко урибэ́н, и пхэндя́: “Лэ яг машки́р ро́ты, машки́р херувимы”, и загия́ и сыс тэрдо́ пашы́л ро́ты.

7. Тэ́ньци протырдыя́ екх херувимо пэ́скиро васт кэ яг, сави́ сыс машки́р херувимы, и лыя́, и дыя́ манушэ́скэ, уридэскэ дро похтанытко урибэ́н. Ёв лыя́ и гия́ яври́.

8. И сыс дыкхно тэл херувимэнгирэ пхака́ дова́, со сыс сы́рбы манушэ́нгирэ васта́.

9. И мэ дыкхцём: акэ, штар ро́ты пашы́л херувимы, пир екх рота пашы́л кажно херувимо, и выдыкхэнас ро́ты, и зяинэнас сы́рбы кэрдэ́ кучонэ́ барэстыр топазостыр.

10. И выдыкхэнас сарэ́ штар сыр екх рота, сы́рбы екх рота чхуды́ дрэ яви́р рота.

11. Ке́ли джа́нас ёнэ, то джа́нас пэ пэ́скирэ штар рига́, сыр ёнэ джа́нас, то ёнэ на обрисёнас долэ́стыр, карик ёнэ джа́нас, а ёнэ джа́на одори́к, карик дыкхэ́лас шэро́. Ёнэ джа́нас одори́к, а ке́ли джа́нас, то на обрисёнас.

12. Сарэ́ лэ́нгирэ маса́, и лэнгро думо, и лэнгрэ васта́, и ро́ты сыс пхэрдэ́ якхэ́нца, сарэ́ лэнгрэ штар ро́ты.

13. Кэ долэ́ ро́ты, сыр мэ шундём, сыс пхэндло́ лав “галгал”.

14. Кажнонэ́стэ мурдалэ́ндэ (жывотнэндэ) сыс штар муя́. Пэ́рво муй сыс херувимоскиро муй, яви́р муй – Манушэ́скиро муй, три́то муй – шчэрэскиро (левоскиро), шта́рто муй орло́скиро (кидо́скиро).

15. Херувимы ґаздынэ́пэ. Кадалэ́ сыс одолэ́ сама мурдала́/джидалэ (жывотна), савэ́н мэ дыкхцём пашы́л рэка (лэнь) Ховар (Кебар).

16. Ке́ли джа́нас херувимы, тэды джа́нас пашы́л лэ́ндэ и ро́ты. Ке́ли херувимы ґаздэнас пэ́скирэ пхака́, соб (кай) тэ ґаздэ́нпэ пхувья́тыр, то ро́ты на отрисёнас лэ́ндыр.

17. Ке́ли херувимы сыс тэрдэ́, сыс тэрдэ́ и ро́ты; ке́ли херувимы ґаздэнаспэ, газдэнаспэ и ёнэ долэ́стыр, со дрэ лэ́ндэ сыс мурдалэнгиро (жывотнэнгиро) ду́хо (фа́но).

18. И отгия́ Ра́скирэ-Дэвлэ́скири сла́ва Кхэрэ́скирэ прого́стыр, и яця́ упрэ́ херувимэндыр.

19. И ґаздынэ́ херувимы пэ́скирэ пхака́ (крылы) и ґаздынэ́пэ пэ мирэ́ якха́ пхувья́тыр. Ке́ли ёнэ джа́нас, то и ро́ты сыс пашы́л лэ́ндэ, и ячнэ́ ёнэ пашо загиибэ́н дрэ васточно Ра́скирэ-Дэвлэ́скиро Кхэрэ́скиро вуда́р. И Израилёскирэ-Дэвлэ́скири сла́ва сыс упрэ́ лэ́ндыр.

20. Кадава́ сыс одолэ́ мурдала́ (жывотна), конэ́с мэ дыкхцём тэл Израилёскирэ Дэвлэ́стэ пашы́л рэка (лэнь) Ховар. Мэ ґалыём, со кадалэ́ сыс херувимы.

21. Кажнонэ́стэ сыс штар муя́, и кажнонэ́стэ сыс штыр пхака́. А тэлэ́ пхака́ сыс колэ, савэ́ сыс сы́рбы манушэ́нгирэ васта́.

22. А дова́, со выдыкхэлас сы́рбы лэ́нгиро муй, сыс кадасаво́, сы́рбы муя́, савэ́ мэ дыкхцём пашы́л рэка (лэнь) Ховар. Кажно джа́лас маму́й дрэ одоя риг, кэ сави́ сыс анги́л лэ́скиро муй.

Psalms 121:1-8

1. Гилы́ анги́л Кхангири́. Мэ ґазда́ва якха́ мирэ́ пэ бэ́ргицы, каты́р дэ́на васт ма́нгэ.

2. Рай Дэвэ́л помогинэ́ла ма́нгэ, Саво́ создыя́ болыбэ́н и пхув.

3. Ёв на домэкэла, соб (кай) тыри́ ґэро́й тэ пэрэ́л; Ёв, Саво́ ракхэ́ла тут, исын на линдрало (на дреминэла).

4. Ѓа́да, Ёв, Саво́ ракхэ́ла Израилё, на явэ́ла тэ совэ́л ци тэ дэл линдра (дреминэл).

5. Рай Дэвэ́л ракхэ́ла тут, Рай Дэвэ́л явэ́ла тэ приракхэл тут пашы́л тыри́ чачи́ риг.

6. Кхам на пэкавэла тут дывэсэ́ ци чхон раты́.

7. Рай Дэвэ́л зракхэ́ла Тут сарэ́ чорипна́стыр, Ёв явэ́ла тэ ракхэ́л Тыро́ ди.

8. Рай Дэвэ́л явэ́ла тэ ракхэ́л тут, ке́ли ту джа́са яври́ и джа́са андрэ́, какана́ и дурэды́р пэ сарэ́ ве́ки.

Proverbs 28:16-16

16. Тхэмэскиро барыдыро́, кон исын на годьваро́, притасавэла пэ́скирэ манушэ́н: нэ кон на вырикирэ́ла ґалкима (жадныма) кэ ловэ́, одова́ явэ́ла ґара́ (длу́гэс) тэ дживэ́л.

Židenge 5:1-14

1. Пал-дова́ со кажно англатуно́ раша́й лэ́лапэ манушэ́ндыр и чхувэ́лапэ ваш манушэ́нгэ, соб (кай) тэ дынаринэ́л Дэвлэ́скэ: тэ янэл свэ́нто дыибэ́н и да́ры пэ алта́рё ваш грэхэнгиро отмэкибэн;

2. а пал-дова́, со адасаво́ раша́й кокоро́ нанэ зорало́ пир саро́, Ёв могинэ́ла тэ сыкавэ́л ковлыпэн кэ мануша́, савэ́ на джинэ́на и одолэ́, савэ́ змардэпэ чачунэ́ дромэ́стыр,

3. и пал лэ́скиро бизорьякирибэн лэ́скэ трэй тэ янэл свэ́нта дыибэна́, сыр пал пэ́скирэ, адя́кэ-паць и пал манушэ́нгирэ грэ́хи.

4. И ние́кх на могинэ́ла (на дэла ра́да) тэ лэл паты́в тэ кэрэ́л дая́ буты́ ваш Дэвлэ́скэ кокоро́ пэ́стыр, а кодова́, конэ́с Дэвэ́л чхудя́, адя́кэ-паць, сыр и Аронос (Аароно́с).

5. Адя́кэ-паць и Христо́со на Кокоро́ Пэ́скэ дыя́ дая́ сла́ва тэ ячэ́л Англатунэ́ Раша́са, нэ дава́ кэрдя́ Дэвэ́л, Кон пхэндя́ Лэ́скэ: “Ту сан Миро Чхаво́, Мэ яцём ададывэ́с Тырэ́ Дадэ́са (Тыро́ Дад).”

6. Ёв адя́кэ-паць ракирэ́ла дро яви́р штэ́то: “Ту явэ́са Раша́й пэ сарэ́ ве́ки, адасаво́-паць пир рашаипэн, сыр Мелхисэдэко сыс.”

7. Ке́ли Христо́со дживдя́ пэ пхув, Ёв барэ́ годла́са и ясвэ́нца мангдя́ и мангдя́пэ Дэвлэ́скэ, Кон могиндя́ тэ зракхэ́л Лэс мэрибна́стыр. Дэвэ́л шундя́ Лэс пал Лэ́скири дар анги́л Лэ́стэ;

8. мэк Ёв сыс Дэвлэ́скиро Чхаво́, Ёв высыклыя тэ кандэл пир Пэ́скирэ мэ́ньки;

9. и ке́ли Христо́со кэрдя́ кэ ко́нцо / яго́ро (сполниндя) дава́ саро́, Ёв яця́ и тэ зракхэ́л манушэ́н пэ сарэ́ ве́ки, савэ́ кандэ́на Лэс,

10. и Дэвэ́л приґалыя Лэс Англатунэ́ Раша́са адасавэса-паць, сыр сыс прилыно пир рашаипэн Мелхисэдэко.

11. Амэ́нгэ трэй тэ ракирас бут пал дава́, нэ дава́ исын пхаро́ тэ пирипхэнас тумэ́нгэ, пал-дова́ со тумэ́ ґалёна пово́линькэс (насыгэс).

12. Пал-дова́ со тумэ́нгэ пал дава́ часо трэиндя́ кокорэнгэ тэ сыклякирэ́н манушэ́н; нэ тумэн нэвэ́стыр трэй тэ сыклякирас пал англатунэ́ чачипэна́ пал Дэвлэ́скиро лав, и тумэ́нгэ ишчо (инкэ́) трэй тхуд тэ пьен, а тэ на хас чачуно́ хабэ́н, пал-дова́ со тумэ́ сан сы́рбы чхаворэ́.

13. Кажно, кон дживэ́ла пэ тхуд, на ґалёла сыклякирибэ́н пал чачуно́ лав, пал-дова́ со кадасаво́ ману́ш исын сы́рбы бия́то (чхаворо́),

14. нэ стала мануша́ могинэ́на тэ хан чачуно́ хабэ́н, пал-дова́ со ёнэ высыклынэ джиибнастыр и пир годы́ тэ пхэнэ́н рознь, кай исын лачхипэ́н и кай исын фуипэ́н.

Romani Bible Baltic 2019

Maintained by the United Bible Societies for the Baltic Romani Mission