Bible in one year - Пэ Балтитко Романи чиб

Bible in one year December 12

1. Лав Ра́скирэ-Дэвлэ́скиро, со явдя́ Иоилёскэ, чхавэ́скэ Вафуилоскирэскэ [Пэтуилоскирэскэ-ю.о.]

2. Шунэ́н дава́, тумэ́ пхурыдыра́ (годэпхурэ́), и причхувэ́н кан сарэ́, кон дживэ́ла пэ дая́ пхув! Ци сыс дасаво дрэ тумарэ́ дывэса́, ци дрэ дывэса́ тумарэ́-дадэнги́рэ?

3. Пхэнэ́н тумарэ́ чхаворэнгэ пал дава́, мэк тумарэ́ чхаворэ́ тэ пхэнэ́н лэ́нгирэ чхаворэнгэ, и лэ́нгирэ чхаворэ́ явирэ родо́скэ:

4. дова́, со мэкця́ листэнгиро кирмо (гусеница), похая пхакитко скочко (саранча), нэ дова́, со мэкця́ пхакитко скочко, похая кирмо, нэ дова́, со мэкця́ кирмо, похая бамбула (жуко).

5. Джангадён, матымарьялэ, и ровэ́н киркэс, и тугинэн ровибнаса, сарэ́, кон пьела мол (вино) пал бродно (винаграды́тко) со́ко (хум), пал-дова́ со ёв исын отлыно тумарэ́ уштэндыр.

6. Пал-дова́ со бут зоралэ́ мануша́ явнэ́ пэ Мири́ пхув, со нашты́ лэн тэ погинэс; лэ́нгирэ данда́ исын сыр шчэрэстэ (левостэ), и лэ́нгирэ жанды исын сыр шчэрихатэ (левицатэ).

7. Ёнэ кэрдэ́ Мирэ́-винаградытконэ барьендыр чхучи́ пхув, и ёнэ пхагирдэ́ Миро инжыритко дрэ́во, ёнэ лучкирдэ цы́па лэ́стыр и чхурдынэ́ ла яври́: лэ́скирэ рандя́ ячнэ́ парнэ́.

8. Ровэ́н зоралэ́с, мануша́лэ, и подпхандэнпэ жалобнонэ балытконэ гонэса, сы́рбы патывалы́ тэрны́ джувлы́, кон тугинэла пал ромэстэ пэ́скирэ тэрныпнастыр.

9. Буты́р на янэ́на марунэ свэ́нта дыибэна́ и тхадунэ свэ́нта дыибэна́ дрэ Кхангири́ Ра́скирэ-Дэвлэ́скири. Э рашая́, кон кэрэ́ла буты́ ваш Ра́скэ-Дэвлэ́скэ, зоралэ́с тугинэна.

10. Фэ́лда чхучакирды (пустошоно), и пхув зоралэ́с тугинэла, пал-дова́ со гива́ обчордэ, вышутия бродно со́ко (хум), и маслинитко дзэт (маслина) хасия́.

11. Ладжан тумэ́, кон сан пхувья́кирэ бутярнэ́, тугинэн ровибнаса, тумэ́, кон сан винаградарья, пир парно́ гив и ґэрсто (ячменё), пал-дова́ со фэлдакирэ гива́ хасинэ́.

12. Винаграды́тко бар шутия, и инжыритко дрэ́во зашутия, и гранатытко дрэ́во, и пальма адя́кэ-паць, и пхабалин – сарэ́ дрэвы пэ фэ́лда зашутинэ, дыкхэ́н, нанэ буты́р ра́дыма манушэ́нгирэ чхавэ́ндэ.

13. Подпхандэнпэ жалобнонэ балытконэ гонэса, и ровэ́н зоралэ́с тумэ́, кон сан рашая́: тугинэ́н ровибнаса, тумэ́ кон кэрэ́ла Дэвлэ́скири буты́ анги́л алта́рё. Явэ́н, пасён сари́ рат, дрэ жалобна балытка гонэ́ тумэ́, кон кэрэ́ла буты́ мирэ́ Дэвлэ́скэ; пал-дова́ со буты́р на янэ́на свэ́нто дыибэ́н гивэстыр и тхадуно свэ́нто дыибэ́н дрэ Кхангири́ тумарэ́ Дэвлэ́скири.

14. Подэн звесь (зан) пал свэ́нто посто, кхарэ́н тэ явэ́н пэ свэ́нто скэдыибэ́н, кэдэн пхурыдырэн (годэпхурэн) и сарэ́ манушэ́н далэ́ пхувья́тыр дрэ Кхангири́ Ра́скирэ-Дэвлэ́скири, тумарэ́ Дэвлэ́скири и прикхарэн зоралэ́с Рас-Дэвлэ́с.

15. Дэ́вла! Саво́ Дывэ́с ж да явэ́ла! Пал-дова́ со Ра́скирэ-Дэвлэ́скиро дывэ́с исын пашы́л; ёв явэ́ла сы́рбы хасибэ́н Сарэзорьякирэстыр.

16. Ци да на хасёла хабэ́н амэ́ндэ пэ якха́, и ра́дыма и весёлыма (лош) кхэрэ́стыр амарэ́ Дэвлэскирэстыр?

17. Зя́рки кирнынэ тэл лэ́нгирэ комки, пираля́ (кладовки) ячнэ́ чхучэ́; шурны пхагирдэ́, пал-дова́ со гив вышутия.

18. Сыр пхарэ́с мурдала́ (жывотна) дыхинэна! Гурты гурувэ́н исын сы́рбы насвалэ; пал-дова́ со лэ́ндэ нанэ чаритка фэ́лда, адя́кэ-паць и ста́ды бакрэ́нгирэ мэнчынэнапэ.

19. О Раё Дэ́вла! Мэ зоралэ́с кхара́ва Тут, пал-дова́ со яг похая чаритка фэ́лды пэ чхучи́ пхув, и хачкирибэ́н хачкирдя́ сарэ́ дрэвицы пэ фэ́лда.

20. Мурдала́ пэ фэ́лда адя́кэ-паць кхарэ́на Тут, пал-дова́ со рэкицы (лэнорья́) пане́са вышутинэ, и яг похая чаритка фэ́лды пэ чхучи́ пхув.

Joel 2:1-32

1. Пхурдэ́н дро ро́го (дрэ труба) пэ Сио́но, и ґаздэ́н го́дла пэ свэ́нто Дэвлэ́скири бэ́рга; мэк сарэ́ мануша́, кон дживэ́ла пэ пхув – тэ издран, пал-дова́ со явэ́ла пашэдыр Ра́скирэ-Дэвлэ́скиро дывэ́с, акэ, ёв откэрлапэ:

2. явэ́ла дава́ дывэ́с кало́ и тугитко, хмуры́тко дывэ́с ґэнстонэ калыпнаса (цямлыпнаса), сыр о́блоки пэ зло́ко (пэ ра́нко) розджанапэ палэ бэ́рги, адя́кэ-паць и явэ́на мануша́, барэ́ и зоралэ́, савэ́ на сыс векэндыр: и кадасавэ́-паць буты́р на явэ́на ние́кхвар пал лэ́ндэ машки́р манушэ́нгирэ ро́ды.

3. Анги́л лэ́ндэ джа́ла яг, со похала саро́, а пала́л пал лэ́ндэ хачкирибэ́н, со пэкэла саро́. Анги́л лэ́ндэ пхув исын сы́рбы у́нта (садо) Эдэмоскири, а пала́л пал лэ́ндэ ячэ́лапэ чхучакирды мал (степ), нисо́ никай на кэрэ́лапэ лэ́ндыр.

4. Ёнэ явэ́на выдыцён сы́рбы грая́: и ёнэ явэ́на тэ прастан сыр уклистэ́ пэ грэ́ндэ-цэлдарьендэ.

5. Ёнэ традэ́на уклистэ́ пир бэргэнгирэ фе́ли (макушки) ґрукатоса сы́рбы марибнытконэ́ вурдэнэндыр, сы́рбы бари яг, сави́ пхарадёла, ке́ли похала пхуса, сы́рбы зоралэ́ мануша́, кон исын скэдыно́ тэ марэ́лпэ.

6. Анги́л лэ́ндэ дара́тыр явэ́на тэ бандён дукхаса мануша́, а сарэ́ лэ́нгирэ муя́ ячэ́на парнэ́.

7. Ёнэ праста́на сыр зоралыпнаскирэ мурша́, и ёнэ пирирэсэна пир ва́нта сыр марибнаскирэ мануша́; кажно (сва́ко) лэ́ндыр джа́ла анги́л пэ́скирэ дроморэса, и ёнэ на змарэнапэ дро строё.

8. Ёнэ на шпулэна (пихинэна) екх екхэ́с, кажно (сва́ко) лэ́ндыр джа́ла дрэ лэ́нгири колона. И ке́ли ёнэ пэрэ́на пэ марибны́тка [коп΄и-р.с.], ёнэ на дукхавэна пэс.

9. Ёнэ праста́на одори́к и палэ пир фо́ро; ёнэ ґаздэ́напэ пэ ва́нты прастаиндой: ёнэ зарэсэна дрэ кхэра́, ёнэ заджа́на дрэ кхэра́ пир фэнштры сыр чор.

10. Пхув явэ́ла тэ издрал анги́л лэ́ндэ, и болыбэ́н тэ рискирэлпэ кхам и чхон покалёна, и чэргэня́ пириячэна тэ зяинэн.

11. И пхэнэ́ла зоралэ́с Рай Дэвэ́л Пэ́скирэ заня́са (глосаса) сы́рбы грумо анги́л Лэ́скиро халадыбэ́н: пал-дова́ со исын зоралыпнаскирэ Лэ́скирэ марибнаскирэ мурша́. Дывэ́с Ра́скирэ-Дэвлэ́скиро исын баро́ и древа́н трашано, и кон дэ́ла ра́да тэ вырикирэл лэс?

12. “Палдава́ акана́”, – ракирэ́ла Рай Дэвэ́л, – “рисён кэ Мэ сарэ́ тумарэ́ илэ́стыр постоса, ровибнаса и тугаса?”

13. И рискирэ́н тумаро́ ило́, а на урибэ́н, рисён кэ Рай Дэвэ́л, тумаро́ Дэвэ́л, пал-дова́ со Ёв исын лачхэ́-де́скиро и бут исын ла́ска Лэ́стэ. Ёв ле́нтэс (насыгэс) холясо́ла, и Ёв исын лачхэ́-илы́тко; и Ёв тангинэла (жалинэла) анги́л дова́, сыр тэ кэрэ́л биба́хт.

14. Кон джинэ́ла, ци Ёв пожалинэла, и мэкэ́ла бахталыпэ́н пал Пэ́стэ, соб (кай) тумэ́ тэ янэ́н свэ́нто дыибэ́н гивэстыр, и тхадуно свэ́нто дыибэ́н Ра́скэ-Дэвлэ́скэ, тумарэ́ Дэвлэ́скэ?

15. Пхурдэ́н зоралэ́с дро ро́го (трамбура) пэ Сио́но, подэн звесь (зан) пал свэ́нто посто, кхарэ́н тэ явэ́н пэ свэ́нто скэдыибэ́н,

16. кэдэн манушэ́н, кэдэн кхэтанэ́ годэпхурэн (пхурыдырэн), кэдэн биятэ́н и колынытконэ тыкнэмасэн; мэк тэ джал яври́ тэрно́ лэ́скирэ коморатыр, и тэрны́ ла́кирэ штубатыр.

17. Мэк рашая́, дына́рья Ра́скирэ-Дэвлэ́скирэ, тэ ровэ́н машки́р трэ́мо и алта́рё, и мэк ёнэ тэ пхэнэ́н: Пожалин Тырэ́ манушэ́н, о Раё-Дэ́вла, и на дэ Тыро́ миштыпэ́н тэ бипатывакирэн, соб (кай) Наюды́тка на́цыи тэ хулаинэн пэ лэ́ндэ, савэ́ явэ́на тэ ракирэ́н: Кай исын лэ́нгиро Дэвэ́л?’”

18. Тэ́ньци Рай Дэвэ́л ячэ́ла тэ зэвлынэл пал Лэ́скири пхув, и Ёв сыкавэ́ла Пэ́скиро ило́ пал Лэ́скирэ манушэ́ндэ.

19. О Рай Дэвэ́л отпхэнэ́ла и пхэнэ́ла Пэ́скирэ манушэ́нгэ: “Акэ, Мэ бичхава́ва тумэ́нгэ гив, мол (вино), и маслинитко дзэт, и тумэ́ явэ́на чалэ лэ́ндыр; и Мэ кэра́ва адя́кэ, соб (кай) Наюды́тка на́цыи буты́р тэ на бипатывалякирэн тумэн.

20. И Мэ дурьякирава тумэ́ндыр халадыбэ́н паш-ратитконэ́ (севернонэ) рига́тыр, и Мэ традава лэн криг пэ бипанескири и чхучи́ пхув, лэ́нгирэ муенца тэ рисён кэ васточно мо́рё (дэрья́в), и лэ́нгирэ думэнца тэ рисён кэ пал-панитко (за́падно) мо́рё (дэрья́в). Лэ́нгири кхан явэ́ла тэ ґаздэлпэ, и джунгало́ (брыдко) кхандыпэн лэ́ндыр джа́ла упрэ́, пал-дова́ со ёнэ кэрдэ́ барэ́ ди́вы.

21. На страхадёв, о пхув, ра́дынпэ и веселинпэ (лошалёв): пал-дова́ со Рай Дэвэ́л явэ́ла тэ кэрэ́л барэ́ ди́вы!

22. На дарэ́н, мурдала́ фэлды́тка: чаритка фэ́лды пэ чхучи́ пхув дэ́на пэ́скири чар, пхабалын дэ́ла пэ́скири пхабай; инжыритка дрэвы и винаграды́тка дрэвицы дэ́на му́ри и прибарипэн.

23. Тумэ́, чхаворэ́ Сионоскирэ, радынэ́нпэ, и веселинэнпэ (лошалён) Ра́стыр-Дэвлэ́стыр, тумарэ́ Дэвлэ́стыр, соб (кай) Ёв тэ дэл лачхо́ вэснакиро брышы́нд чачипна́са, и Ёв кэрэ́ла адя́кэ, со явэ́ла брышы́нд, сыр сыс брышы́нд: вэснакиро и пал-лынаскиро (осенякиро) дро пэ́рво чхон.

24. Гиваобкэрибнаскирэ шурны явэ́на пхэрдэ́ гивэса, и пресы явэ́на тэ обчхувэнпэ винаградытконэ соко́са (хумэ́са) и маслинитконэ дзэтэса.

25. И Мэ да́ва палэ тумэ́нгэ саро́ дова́, со хая пхакитко скочко, кирмэ, бамбулы (жуки) и листэнгиро кирмо – Миро баро́ халадыбэ́н, со Мэ бичхадём пэ тумэ́ндэ.

26. И тумэ́ явэ́на тэ хан, кицы́ камэ́на и явэ́на чалэ, и тумэ́ явэ́на тэ шарэ́н Рас-Дэвлэ́с, тумарэ́ Дэвлэ́с, Кон кэрдя́ дивнэс тумэ́нца. И Мирэ́ манушэ́н буты́р на явэ́на тэ ладжакирэн.

27. И тумэ́ явэ́на тэ джинэ́н, со Мэ сом машки́р Израилё и со Мэ сом Рай Дэвэ́л, тумаро́ Дэвэ́л, и буты́р нанэ явирэ Дэвлэ́с. Мирэ́ манушэ́н буты́р ние́кхвар на ладжакирэна.

28. И пало́ (после) дава́ явэ́ла адя́кэ, со Мэ да́ва пхэрдэ́с Миро Ду́хо кажнонэ́ лочакэ (плотякэ); тумарэ́ чхавэ́ и тумарэ́ чхая́ явэ́на тэ ангилпхэнэн, тумарэ́ пхуранэ́ мануша́ явэ́на тэ дыкхэ́н сунэ́, и тумарэ́ тэрнэ́ мануша́ явэ́на тэ дыкхэ́н дыкхибэна.

29. И аж ровно адя́кэ-паць Мирэ́ писхарье́нгэ и Мирэ́ писхарицэнгэ Мэ да́ва Миро Ду́хо дрэ долэ́ дывэса́.

30. И Мэ сыкава́ва ди́вы пэ болыбэ́н и пэ пхув, рат и яг и тхувалэ сты́лбы.

31. Кхам парудёла пэ калыпэ́н, и чхон парудёла пэ рат, – анги́л, сыр явэ́ла баро́ и трашано Дывэ́с Ра́скирэ-Дэвлэ́скиро.

32. И явэ́ла адя́кэ дрэ долэ́ дывэса́, со, ко́ли вари-кон явэ́ла тэ кхарэл лав Ра́скирэ-Дэвлэ́скиро, то одова́ зракхэ́лапэ; пал-дова́ со зракхибэ́н явэ́ла пэ бэ́рга Сио́но дро Ерусалимо сыр Рай Дэвэ́л пхэндя́: и ваш кодолэ́нгэ, савэ́ ячнэ́пэ, кон явэ́ла тэ кхарэл Рас-Дэвлэ́с.

Joel 3:1-21

1. Пал-дова́ со, акэ, дрэ долэ́ дывэса́ и дро дава́ часо, ке́ли Мэ яна́ва палэ пленонэ манушэ́н Юдэя́тыр и Ерусалимо́стыр,

2. тэды Мэ адя́кэ-паць кэдава сарэ́ Наюды́тка на́цыи, и Мэ яна́ва лэн тэлэ́ пэ до́ло Иосафато́скиро, и Мэ ла́ва тэ сэндинавпэ лэ́нца одо́й пал Мирэ́ манушэ́ндэ, Миро миштыпэ́н – Израилё, савэ́н ёнэ росчхудэ тэ дживэ́н машки́р Наюды́тка на́цыи, и ёнэ роскэрдэ Мири́ пхув.

3. Ёнэ чхурдэнас жре́биё пал Мирэ́ манушэ́ндэ, и ёнэ дэ́нас тэрнэ́ манушэ́с тэ парувэн пэ биладжакунятэ, и ёнэ бикнэнас патываля джувля́ пал мол (вино) и ёнэ пинэ́.

4. Чачэс, со тумэ́ Ма́нгэ, Ти́ро и Сидоно, и брэгитка штэ́ты пэ Филистимакири пхув? Ци явэ́на тумэ́ тэ отдэ́н палэ фуипнаса проти Ма́ндэ? Нэ ко́ли тумэ́ явэ́на тэ отдэ́н палэ фуипнаса проти Ма́ндэ, Мэ древа́н сы́гэс отда́ва палэ фуипэ́н пэ тумаро́ шэро́.

5. Пал-дова́ со тумэ́ лынэ́ Миро руп и Миро сувнака́й, и лыджинэ́ пэ́са дро тумарэ́ мангипнытка кхэра́ Мирэ́ най фэдэды́р шука́р миштыпна;

6. и манушэ́н Юдэя́тыр и манушэ́н Ерусалимо́стыр бикнэнас тумэ́ Грекэ́нгэ (Баламэ́нгэ), соб (кай) тэ дурьякирэн лэн межэндыр пэ лэ́нгири жэ пхув.

7. Акэ, Мэ ґазда́ва лэн одолэ́ штэто́стыр, кэ саво́ тумэ́ бикиндлэ лэн, и Мэ рискира́ва палэ сыр отдыибэ́н дова́, со тумэ́ кэрдэ́, пэ тумаро́ шэро́.

8. И Мэ бикнава тумарэ́ чхавэ́н и чхае́н дрэ васта́ манушэ́нгирэ Юдэя́тыр, и ёнэ бикнэна лэн Савеенгэ, дуратунэ́ манушэ́нгэ – адя́кэ пхэндя́ Рай Дэвэ́л.

9. Тэ дэн дая́ зан (звесь) машки́р Наюдытконэ́ на́цыи: кэдэнпэ пэ марибэ́н. Джангавэн зоралыпнаскирэ муршэ́н адя́кэ, соб (кай) тэ явэ́н сарэ́ марибнаскирэ мурша́ пашылэды́р, мэк ёнэ тэ явэ́н.

10. Пирикэрэн тумарэ́ плуги (пхарадя) пэ курталы и тумарэ́ серпы (чхиндлэ́) пэ чхурдыбнытка бустя́, мэк б назорало тэ пхэнэ́л: “Мэ сом зорало́.”

11. Явэ́н сыгэды́р кэдэнпэ кхэтанэ́ и, тумэ́, сарэ́ Наюды́тка на́цыи, и кэдэнпэ сарэ́ кхэтанэ́ трусця́л. О Раё Дэ́вла, лы́джа Тырэ́ муршарьен тэ явэ́н одо́й.

12. “Мэк Наюды́тка на́цыи тэ джангадён, и мэк тэ явэ́н пэ до́ло Иосафато́скиро: пал-дова́ со одо́й Мэ, Рай Дэвэ́л, бэшава тэ сэндякирав сарэ́ Наюды́тка на́цыи, со исын трусця́л (кругом).

13. Мэк тэ чхинэл серпо (чхиндло́), пал-дова́ со гива́ исын спяла пхэрдэ́. Явэ́н, джа́н тэлэ́: пал-дова́ со тасавильня исын пхэрды́, пресо пиричхувэлапэ – пал-дова́ со ёнэ кэрдэ́ бут биба́хт.”

14. Бут, бут мануша́ исын пэ до́ло, пэ саво́ присэндинэна! Пал-дова́ со дывэ́с Ра́скирэ-Дэвлэ́скиро исын пашы́л пэ до́ло, пэ саво́ присэндинэна.

15. Кхам и чхон явэ́на калэ́ (цямлэ), и чэргэня́ пириячэна тэ зяинэн.

16. И Рай Дэвэ́л адя́кэ-паць загриминэла Сионо́стыр, и Ёв пхэнэ́ла Пэ́скирэ заня́са Ерусалимо́стыр; болыбэ́н и пхув явэ́на тэ тринскирэнпэ; кэ Рай Дэвэ́л явэ́ла гаравибнаскиро штэ́то ваш Лэ́скирэ манушэ́нгэ, и Ёв явэ́ла сыр тва́рдыма / диз (крепость) чхаворэнгэ Израилёскирэнгэ.

17. “И тумэ́ явэ́на тэ джинэ́н, со Мэ сом Рай Дэвэ́л, тумаро́ Дэвэ́л, Саво́ дживэ́ла пэ свэ́нто бэ́рга пэ Сио́но. Тэ́ньци Ерусалимо явэ́ла свэ́нто, и ние́кх явирэ-тхэмэскиро ману́ш ние́кхвар на явэ́ла тэ джал пир дава́ фо́ро нэвэ́стыр.

18. И явэ́ла адя́кэ дро дова́ дывэ́с, со нэви́ мол (вино) явэ́ла тэ тхадэл бэргэндыр, и тхуд явэ́ла тэ чхувэлпэ бэргицэндыр, и панескирэ ровицы (хохоёрэ́) дрэ Юдэ́я явэ́на пхэрдэ́ пане́са, а фонтано (фолахар) явэ́ла тэ чхувэ́л пхэрдэ́с пани́ Ра́скирэ-Дэвлэ́скирэ Кхэрэскир и ёв явэ́ла тэ дэл пани́ пэ до́ло Ситимо.

19. Еги́пто явэ́ла сыр голоты́ня, и Эдо́мо сыр чхучи́ мал (сцеп), пал нахратыма, со ёнэ кэрдэ́ проти чхаворэндэ Юдаскирэндэ, пал-дова́ со ёнэ прочхудэ бибангипнаскиро рат пэ лэ́нгири пхув.

20. Нэ Юда явэ́ла тэ дживэ́л пэ сарэ́ ве́ки, и дро Ерусалимо сарэ́ родэндыр кэ яви́р ро́до явэ́на тэ дживэ́н мануша́.

21. И Мэ, Рай-Дэвэ́л, морава криг лэ́ндыр рат (банг пал рат), саво́ Мэ ишчо (инкэ́) на мордём: пал-дова́ со Мэ, Рай Дэвэ́л, джива́ва пэ Сио́но.”

Psalms 140:6-13

6. Пхутькирдэ́ гарадэ́ шэлэ и фэлы́ ваш ма́нгэ, ёнэ росчхудэ кхуды́ паш дром; ёнэ чхудэ́ фэля́ сеткаса пэ ма́ндэ. Сэ́ла.

7. Мэ пхэндём Ра́скэ-Дэвлэ́скэ: “Ту сан миро Дэвэ́л!” О Раё Дэ́вла! Причху́в кан кэ миро мангипэ́н Ту́кэ.

8. О, Дэвлалэ! Раё Дэ́вла, Зоралыпэ́н, Саво́ зракхэ́ла ман: Ту учхакирдян миро шэро́ дро марибнаскиро дывэ́с.

9. О, Раё Дэ́вла! На домэк, соб (кай) тэ явэ́л, сыр камэ́на фуй мануша́, на подэ васт анги́л лэ́нгирэ зракирибнаскэ ваш фуипэ́н, соб (кай) ёнэ тэ на пхутён кэ вучипэ́н.

10. Мэк одолэнгирэ шэрэ́, со исын трусця́л ма́ндэ, тэ учхакирэн жа пэс лэ́нгирэ кошыбнэнца, со джа́на лэ́нгирэ уштэндыр.

11. Мэк хачкирдэ́ вангара тэ пэрэ́н пэ лэ́ндэ, мэк ёнэ тэ пэрэ́н дрэ яг, дрэ бидугно́скирэ ґанбиня́ (ямы), соб (кай) ёнэ тэ на уштэ́н палэ.

12. Мэк фуе́-чибало ману́ш тэ на зоралёл пэ пхув, мэк фуй мануша́ тэ ухтылэ́н нахратонэ (нахальнонэ) манушэ́н кэ са́мо хасибэ́н.

13. Мэ джино́м, со Ту, Раё Дэ́вла, явэ́са тэ затэрдёс пал одолэнгиро рэ́ндо, савэ́н притасавэ́на, пал чорорэнгиро чачипэ́н.

Proverbs 29:24-24

24. Кон исын кхэтанэ́ чорэса, одова́ ману́ш сы́рбы зоралэ́с исын на пир ило́ кокоро́ пэ́скэ: ёв шунэ́ла сыр прокошэна лэс, нэ ёв на сыкавэ́ла лэс.

Zjaveňie 2:1-29

1. Чхин Янголоскэ Эфесоскирэ кхангирья́тыр: “Дава́ исын лава́ Одолэ́стыр, Кон рикирэ́ла эфта́ чэргеня дро Лэ́скиро чачо́ (право) васт, Кон псирэ́ла машки́р эфта́ сувнакунэ́ момолытка:

2. “Мэ джино́м (джина́в) Тыри́ буты́ и сыр бут ту кэрдя́н буты́, и тыро́ вырикирибэн, и дова́, со ту на могинэ́са тэ пирилыджас чорэ́ манушэ́н, и со ту пропатякирдян кодолэ́н, савэ́ пхэнэ́на пэ пэ́стэ “Апо́столы” и савэ́ нанэ, со ту латхян, со ёнэ исын хохаибнарья;

3. и со ту вырикирдян, и со ту пиризорьякирдян мэ́ньки пал Миро лав и на ивья́ (на дармэс) кэрдя́н дава́:

4. нэ Мэ бангякирава тут пал дова́, со ту́кэ нанэ дро́го буты́р, со сыс ту́кэ са́мо дро́го ґарэды́р.

5. Тэды ри́пир дова́ лачхипэ́н, саво́ ту мэкцян; приґалёв банг, и кэр дова́, со ту кэрдя́н ангил дова́. Ко́ли ту на приґалёса банг, тэды Мэ ява́ва кэ ту и Мэ ла́ва тыро́ момолы́тко (свети́льнико) лэ́скирэ штэто́стыр, пака ту приґалёса банг.

6. Екх, лачхипэн со исын дрэ ту́тэ исын, дова́, со ту́кэ древа́н исын на пир ило́ дова́, со Никалаиты кэрэ́на, дова́ и Ма́нгэ адя́кэ-паць древа́н на пир ило́.

7. Конэ́стэ исын кана́, мэк ёв тэ шунэ́л дова́, со Ду́хо (Фа́но) пхэнэ́ла кхангирье́нгэ. Одолэ́стэ, кон лэ́ла упралыпэ́н, Мэ да́ва лэ́скэ право тэ хал джиибна́скирэ каштэ́стыр (дрэвостыр), со барьёла дро Дэвлэ́скиро Раё.”

8. И чхин Янголоскэ Смирнакирэ кхангирья́тыр: “Дава́ ракирэ́ла Пэ́рво и Палатуно́, Кон исын муло́ и Кон отджидыя́:

9. Мэ джино́м (джина́в) тырэ́ рэ́нды (де́лы), тыро́ калыпэ́н (ту́га), нэ ту сан барвало́ и Мэ джино́м (джина́в), сыр калякирдэ тут одолэ́, савэ́ ракирэ́на, со ёнэ исын Юды и савэ́ нанэ, а ёнэ исын налачхэскирэ скэдынятыр (скедыибнастыр).

10. На дар нисостыр, пал со ту́кэ приявэлапэ тэ мэнчынэспэ. Ѓа́да, на́лачхо явэ́ла тэ чхурдэл вари-савэ́н тумэ́ндыр дро штарибэ́н (бэшыбэн); соб (кай) тумэн тэ пропатякирэн и тумэ́ндэ явэ́ла пхарипэ́н дэш дывэса́. Яв патяибны́тко кэ мэрибэ́н, и Мэ да́ва ту́кэ джиибна́скири вя́нка (коро́на).

11. Конэ́стэ исын кана́, мэк ёв тэ шунэ́л дова́, со Ду́хо (Фа́но) пхэнэ́ла кхангирье́нгэ: Одолэ́скэ, кон пиризорьякирэла (збердынэла), яви́р мэрибэ́н на кэрэ́ла биба́хт.”

12. И чхин Янголоскэ Пергамоскирэ кхангирья́тыр: “Дава́ ракирэ́ла Одова́, Конэ́стэ исын востро (чолало́) дуе-ригэнгири курта́ла (мечо):

13. Мэ джино́м тыри́ буты́, и, кай ту дживэса, одо́й, кай на́лачхо исын бэшто́ пэ пэ́скиро троно. Ту рикирэсапэ пал Миро лав и ту на отпхэндянпэ пэ́скирэ патяибнастыр дрэ Ма́ндэ аж дрэ долэ́ дывэса́, ке́ли Антипо, миро патяибнаскиро якхи́тко, сыс замардо машки́р тумэ́ндэ одо́й, кай на́лачхо дживэ́ла.

14. Нэ ма́ндэ исын вари-со проти ту́тэ; ту́тэ исын кадасавэ́ мануша́, савэ́ рикирэнапэ пал Валаамоскиро сыклякирибэ́н, саво́ сыклякирдя́ Валакос тэ чхурдэл бар пэ дром тэ обштавэлпэ анги́л Израилёскирэ чхавэ́ндэ, соб (кай) ёнэ тэ хан свэ́нто дыибэ́н идолэ́нгэ и тэ дживэ́н джувле́нца би сэвлакиро.

15. И тумэ́ндэ адя́кэ-паць исын мануша́, савэ́ рикирэнапэ пал Никалаитэнгиро сыклякирибэ́н [саво́ мэ бидыкхава-р.с.].

16. Палдава́ приґалёв пэ́скиро грэ́хо: ко́ли ту на приґалёса, тэды Мэ ява́ва кэ ту сыг, и Мэ ява́ва тэ маравпэ тумэ́нца куртала́са, со выджа́ла Мирэ́ мо́стыр.

17. Конэ́стэ исын кана́, мэк ёв тэ шунэ́л дова́, со Ду́хо (Фа́но) пхэнэ́ла кхангирье́нгэ. Одолэ́скэ, кон пиризорьякэла, Мэ да́ва вари-кицы́ манка, сави́ исын гарады. Мэ адя́кэ-паць дава́ лэ́скэ парно́ бар, пэ саво́ явэ́ла чхиндло́ нэво́ лав, саво́ нико́н на джинэ́ла, апри́ч кодолэстэ, кон дорэсэ́ла дава́ бар.”

18. И чхин Янголоскэ Фиатиракирэ кхангирья́тыр: “Дава́ ракирэ́ла Дэвлэ́скиро Чхаво́, Конэ́стэ якха́ исын сы́рбы ягакири чиб, и Лэ́скирэ ґэра́ исын сы́рбы зяиндлы харко́ма (медь):

19. Мэ джино́м тыри́ буты́, тыро́ лачхипэ́н кэ яви́р мануша́, и тыро́ патяибэ́н и тыри́ буты́ ваш Дэвлэ́скэ, и тыро́ вырикирибэн. Тыри́ буты́ какана́ исын буты́р кодолятыр, сави́ сыс ґарэдыр (вагэды́р).

20. Нэ Ма́ндэ исын вари-со проти ту́тэ: пал-дова́ со ту домэкэса, со ада́я джувлы́ Езавель, сави́ кхарэ́ла пэс пророчица, сыклякирэ́ла и затырдэла сы́рбы дрэ фэлы́ (петля) мирэ́ писхарье́н тэ дживэ́н джувле́нца би сэвлакиро, и тэ хан свэ́нто дыибэ́н (жэ́ртва) идолэ́нгэ.

21. И Мэ дыём ла́кэ часо тэ приґалёл ла́киро биладжаипэ́н, нэ ёй на камэ́ла тэ приґалёл пэ́скирэ грэ́хи.

22. Адя́кэ Мэ чхурдава ла пэ чхуибэ́н, кай ёй кэрдя́ на́гожа рэ́нды явирэ манушэ́нца, соб (кай) ёнэ тэ страдынэн, пака ёнэ приґалёна грэ́хо, саво́ сыс лэ́ндэ ла́са,

23. и Мэ мулякирава ла́кирэ чхавэ́н, соб (кай) сарэ́ кхангирья тэ джинэ́н, со Мэ сом Одова́, Кон джинэ́ла, со ману́ш думинэ́ла, и со ёв мангэ́ла, Мэ да́ва палэ кажнонэ́скэ тумэ́ндыр пир дова́, сави́ буты́ тумэ́ кэрдэ́.

24. А кадалэ́ манушэ́нгэ тумэ́ндыр дрэ Фиатира, савэ́ на рикирэнапэ пал дава́ сыклякирибэ́н и, савэ́ на джинэ́на хорипэ́н, со кхарэ́лапэ “налачхэскири зор”, Мэ пхэна́ва: Мэ на чхува́ва пэ тумэ́ндэ яви́р пхарипэ́н;

25. а тумэ́ рикирэнпэ пал дова́, со исын тумэ́ндэ, пака мэ ява́ва.

26. Одолэ́скэ, кон пиризорьякирэла и ракхэ́ла дова́, со Мэ кэра́ва кэ ко́нцо (кэ яго́ро), Мэ да́ва лэ́скэ зор пэ Наюдэ́ндэ,

27. и ёв явэ́ла тэ хулаинэ́л пэ лэ́ндэ саструнэ́ дэстэса: ёнэ пхарадёна пэ котэра́ сыр глэяна (глинытка) пирья, и лэ́скири зор пэ лэ́ндэ явэ́ла дасави́-паць, сави́ мэ дорэсцём (долыём) Мирэ́ Дадэ́стыр,

28. и Мэ да́ва лэ́скэ злокоскири чэргэн.

29. Конэ́стэ исын кана́, мэк ёв тэ шунэ́л, со Ду́хо (Фа́но) ракирэ́ла кхангирье́нгэ.”

Romani Bible Baltic 2019

Maintained by the United Bible Societies for the Baltic Romani Mission