Bible in one year - Пэ Балтитко Романи чиб

Bible in one year December 13

1. Лава́ Амосо́скирэ, кон сыс екх чхупна́ри (пастухо) дрэ Фекоя [Тэкоа-ю.о.], савэ́ лэ́скэ Рай Дэвэ́л сыкадя́ дрэ сунэ́, дрэ одолэ́ дывэса́, ке́ли о Ози́я сыс кра́ли пэ Юдэ́я, и дрэ дывэса́, ке́ли о Иеровоамо, чхаво́ Иоасоскиро, сыс кра́ли пэ Израилё дуй бэрш анги́л пхувья́киро тринскирибэн.

2. И ёв пхэндя́: “О Рай Дэвэ́л явэ́ла тэ ґреминэл Сионо́стыр, и Ёв пхэнэ́ла Пэ́скирэ заня́са Ерусалимо́стыр; и явэ́на тэ тугинэн зоралэ́с санэ буди (хижыны) чхупнарьенгирэ, и вышутёла фе́ля (макушка) пэ вучипэ́н Кармилоскиро.”

3. Адя́кэ ракирэ́ла Рай Дэвэ́л: “Пал трин чорипэна и штар, со кэрдя́ Дама́ско, Мэ на отмэка́ва пхаро́ сэ́ндо лэ́нгэ, палдова́ со ёнэ молотиндлэ Галаа́до саструнэ́ гиваобкэрибнытконэ́нца (молотилкэнца).

4. И Мэ бичхава́ва яг пэ Азаилоскиро кхэр и ёй хачкирэ́ла Венададоскирэ [Бэн-Хададоскирэ-ю.о.] барэ́ фэлатиня́ (колова́).

5. И Мэ адя́кэ-паць пхагирава шы́беро (засо́во) пэ по́рта Дамаскоскири и Мэ хасякира́ва манушэ́н, кон дживэ́ла пэ до́ло Авеноскиро и кодолэ́с, кон рикирэ́ла тхагаритко дэсто́ дро Едэно (Бэн-Хададо). Мануша́ Сириятыр джа́на дро пле́но кэ Кира”, – ракирэ́ла Рай Дэвэ́л.

6. Адя́кэ ракирэ́ла Рай Дэвэ́л: “Пал трин чорипэна, со кэрдэ́ мануша́ Газатыр и пал штар чорипэна, Мэ на отмэка́ва пхаро́ сэ́ндо лэ́нгэ, пал-дова́ со ёнэ лыджинэ́ сарэ́ Юдэ́н дро пле́но, соб (кай) тэ бикнэн лэн сыр писхарье́н кэ Эдо́мо.

7. И Мэ бичхава яг пэ ва́нта Газакири, и ёй хачкирэ́ла ла́кирэ барэ́ фэлатиня́ (колова́) [коморы-р.с.].

8. И Мэ хасякира́ва манушэ́н, кон дживэ́ла кэ Азото, и кодолэ́с, кон рикирэ́ла тхагаритко дэсто́ пэ Аскалоно, и Мэ рискира́ва Миро васт проти Экроно (Екроно), и мануша́, кон ячэ́лапэ Филистимлянэндыр, хасёна” – ракирэ́ла Рай Дэвэ́л.

9. Адя́кэ ракирэ́ла Рай Дэвэ́л: “Пал трин чорипэна, со кэрдэ́ мануша́ Тиростыр, и пал штар чорипэна, Мэ на отмэка́ва пхаро́ сэ́ндо лэ́нгэ, пал-дова́ со ёнэ лыджинэ́ сарэ́н пленнонэн кэ Эдо́мо, и ёнэ на рипирдэ пшалы́тко доракирибэ́н (союзо).

10. Нэ Мэ бичхава яг пэ ва́нта Тироскири, и ёй хачкирэ́ла лэ́скирэ барэ́ фэлатиня́ (колова́) [коморы-р.с.].”

11. Адя́кэ ракирэ́ла Рай Дэвэ́л: “Пал трин чорипэна, со кэрдэ́ мануша́ Эдомостыр, и пал штар чорипэна, Мэ на отмэка́ва лэ́нгэ банг, пал-дова́ со ёнэ традэнаспэ пал пэ́скирэ пшалэ́стэ куртала́са и ёнэ на тангиндлэ лэн сыр сэмэ́нца, и лэ́нгири холы́ хачолас бипириячыбнаскиро, и ёнэ ўса́ды (сак) рикирэнас холы́ (мижэхипэн).

12. И Мэ бичхава́ва яг пэ Фемано, и ёй схачкирэ́ла барэ́ фэлатиня́ (колова́) дрэ Восора [Боцра-ю.о.].”

13. Адя́кэ ракирэ́ла Рай Дэвэ́л: “Пал трин чорипэна, со кэрдэ́ чхавэ́ Амоноскирэ, и пал штар чорипэна, Мэ на отмэка́ва пхаро́ сэ́ндо лэ́нгэ, пал-дова́ со ёнэ росчингирэнас (путравэнас) пэра́ пхарэ́ джувлендэ, соб (кай) лэ́нгэ тэ буґлякирэн кустыка (ме́жы) пэ пхув.

14. Нэ Мэ росхачкирава яг дрэ ва́нта Равакири, и ёй хачкирэ́ла сарэ́ ла́кирэ барэ́ фэлатиня́ (колова́), годлыпнаса дро марибны́тко дывэ́с, барэ́ штормоса дро дова́ дывэ́с, сыр явэ́ла рискирибнаскири балва́л.

15. И лэ́нгиро кра́ли джа́ла дро пле́но, ёв и лэ́скирэ тхага́рья кхэтанэ́”, – ракирэ́ла Рай Дэвэ́л.

Amos 2:1-16

1. Адя́кэ ракирэ́ла Рай Дэвэ́л: “Пал трин чорипэна, со кэрдэ́ мануша́ Моавостыр, и пал штар чорипэна, Мэ на отмэка́ва пхаро́ сэ́ндо лэ́нгэ, пал-дова́ со ёнэ хачкирдэ́ кокалы́ крали́скирэ Эдэмоскирэ ваш звёска (известь):

2. Нэ Мэ бичхава́ва яг пэ Моа́во, и ёй схачкирэ́ла барэ́ фэлатиня́ (колова́) дро Кериофо, и Моа́во хасёла машки́р марибнаскири го́дла, манушэ́нгирэ годлыпнаса и рогоскирэ башаибнаса.

3. И Мэ хасякира́ва сэндарис машки́р лэ́ндэ, и Мэ мулякирава сарэ́ лэ́нгирэ тхагарьен кхэтанэ́ лэ́са”, – ракирэ́ла Рай Дэвэ́л.

4. Адя́кэ ракирэ́ла Рай-Дэвэ́л: “Пал трин чорипэна, со кэрдя́ Юда и пал штар чорипэна, Мэ на отмэка́ва пхаро́ сэ́ндо лэ́нгэ, пал-дова́ со ёнэ на прилынэ́ (дыкхнэ́ вучипна́стыр) пэ Зако́но Ра́скирэ-Дэвлэ́скиро, и ёнэ на ракхнэ Лэ́скирэ припхэныбэна́ и лэ́нгирэ хоханэ́ дэвлорэ́, пал савэ́ лэ́нгирэ дада́ гинэ́ тэ кэрэ́н паты́в, лыджинэ́ лэн дромэ́стыр.

5. Нэ Мэ бичхава́ва яг пэ Юдэ́я, и ёй хачкирэ́ла барэ́ фэлатиня́ дро Ерусалимо.”

6. Адя́кэ ракирэ́ла Рай Дэвэ́л: “Пал трин чорипэна, со кэрдэ́ мануша́ Израилёскирэ и пал штар чорипэна, Мэ на отмэка́ва пхаро́ сэ́ндо, пал-дова́ со ёнэ бикиндлэ чачипнаскирэн манушэ́н пал руп, и чорорэн пал пара цурули (цандали).

7. Ёнэ древа́н тырдэнапэ кэ пра́хо пхувья́киро, тэ явэ́л пэ шэро́ чорорэскиро, и ёнэ пиририскирэна дром, савэ́са псирэ́на напхутькирдэ мануша́, а дад и чхаво́ псирэ́на кэ екх джувлы́, соб (кай) тэ магирэ́н свэ́нто Миро лав.

8. Ёнэ пасёна пашы́л кажно алта́рё дрэ и́ди, со лынэ́ дрэ сымады́ (залого), и пьена мол (вино) бангякирдэ-манушэ́нца дро кхэр, кай исын лэ́нгиро дэвлоро.

9. Нэ дава́ сыс Мэ, Кон хасякирдя́ Амореен анги́л лэ́ндэ, Мирэ́ манушэ́ндэ, савэ́ исыс вучэ́ сы́рбы кедры, и ёнэ сыс зоралэ́ сы́рбы дэмбы, нэ Мэ хасякирдём лэ́нгирэ барьякирдэ́ (пло́ды) упра́л, и лэ́нгирэ ко́рни (рукха́) тэла́л.

10. И дава́ сыс Мэ, Кон вылыджия́ тумэн Египто́скирэ пхувья́тыр, и Кон лыджия́ тумэн штардэша́ бэрш пир чхучи́ пхув, соб (кай) тэ заухтылэн тумэ́нгэ пхув Амореенгири.

11. Мэ выкэдыём вари-савэ́ тумарэ́ чхавэ́н сыр пророкэ́н, и вари-савэ́н тумарэ́ тэрнэ́ манушэ́н сыр Назареен. Ци на сыс дава́ адя́кэ тумэ́, чхавэ́ Израилёскирэ” – раки́рла Рай Дэвэ́л.

12. “Нэ тумэ́ дынэ́ Назареенгэ мол (вино) тэ пьен, и тумэ́ припхэндлэ пророкэнгэ, ракири́: ‘На ангилпхэнэн!’

13. Акэ, Мэ притасавава тумэн, сы́рбы вурдэ́н, со исын пхэрдо́ ґарбэ́нца (снопэнца).

14. Палдава́ сы́гно ману́ш на кэрлапэ никай, а зорало́ на явэ́ла тэ рикирэ́л пэ́скири зор, и муршари на зракхэ́ла кокоро́ пэс;

15. и кон рикирэ́ла лу́ко, на вырикирэ́ла, а сы́гно пэ ґэро́й ману́ш, на нашэла, и одова́, кон традэ́ла уклистэ́, на зракхэ́ла пэ́скиро ди.

16. Нэ са́мо муршкано́ ману́ш, нашэла нанго криг дро дова́ дывэ́с”, – ракирэ́ла Рай Дэвэ́л.

Amos 3:1-15

1. Шунэ́н дава́ лав, со Рай Дэвэ́л пхэндя́ проти тумэ́ндэ, чхавора́лэ Израилёскирэ, проти саро́ кхэри́тко ро́до, саво́ Мэ вылыджиём Египто́скирэ пхувья́тыр, ракири́:

2. “Тумэ́ сан екх кхэри́тко ро́до сарэ́ родэндыр пэ пхув, савэ́скэ Мэ кэрдём паты́в, палдава́ Мэ пхарэ́с сэндякирава тумэн пал саро́ тумаро́ чорипэ́н.”

3. Ци сашты́ дуй мануша́ тэ джа́н кхэтанэ́, ко́ли ёнэ на доракирэнапэ?

4. Ци явэ́ла шчэр (ле́во) тэ брилинэл дро вэш, ко́ли ёв на дыкхэ́ла вари-со тэ роскушэл дандэнца? Ци явэ́ла тэ выдэл шчэр зан пэ́скирэ хашха́тыр (логовостыр) –, ко́ли ёв ничы́ на ухтылдя.

5. Ци сашты́ чириклы тэ пэрэ́л дрэ фэлы́ (петля) пэ пхув, ко́ли тэ на явэ́л фэлы́ сеткаса пэ ла́тэ. Ци ґаздэ́лапэ фэлы́ пхувья́тыр, ко́ли тэ на ухтылэ́н нисо́ ла́са?

6. Ко́ли тэ на башавэл зоралэ́с ро́го (труба) дро фо́ро, ци явэ́на мануша́ тэ дарэ́н? Ко́ли исын бари би́да дро фо́ро, ци дава́ исын на Дэвлэ́стыр, Кон домэкця дава́?

7. Чачо́, Рай Дэвэ́л на кэрэ́ла нисо́ анги́л дова́, сыр Ёв сыкавэ́ла дова́, со Ёв придуминдя, Лэ́скирэ писхарье́нгэ, пророкэнгэ.

8. Шчэр лыя́ тэ рыкинэл – кон на явэ́ла тэ дарэл? О Рай Дэвэ́л пхэндя́ – кон на явэ́ла тэ ангилпхэнэл?

9. Подэн звесь (зан) дрэ барэ́ фэлатиня́ и пэ стрэхи кхэрэнгирэ дро Азото (пэ Филистимия), и дрэ барэ́ фэлатиня́ (колова́) пэ пхув Египто́скири и пхэнэ́н: “Кэдэнпэ кхэтанэ́ пэ бэ́рги Самариякирэ: дыкхэ́н пэ баро́ бу́нто годлэнца машки́р лэ́ндэ, и сыр притасавэ́на манушэ́н одо́й.”

10. “Пал-дова́ со ёнэ на джинэ́на, сыр тэ кэрэ́н чачунэ́с, – ракирэ́ла Рай Дэвэ́л, – ‘ёнэ, савэ́ загаравэна кучипэ́н, со яндлэ́ ёнэ дрэ чори, со ёнэ нахратэс чордэ, дрэ лэ́нгирэ барэ́ фэлатиня́ (колова́).’

11. Палдава́ адя́кэ ракирэ́ла Рай Дэвэ́л: ‘Намал явэ́ла трусця́л дая́ сари́ пхув! Ёв отлэла зор лэ́ндыр и ёв росчорэла лэ́нгирэ барэ́ фэлатиня́ (колова́).”

12. Адя́кэ ракирэ́ла Рай Дэвэ́л: “Сыр о чхупна́ри (пастырё) вытырдэла яви́р мо́ло и зракхэ́ла шчэроскирэ (левоскирэ) мо́стыр дуй кокалы́ ґэрэнгирэ и котэ́р канэскиро, адя́кэ-паць на́бут чхаворэ́н Израилёскирэн вытырдэна хасибнастыр, савэ́ дживэ́на кэ Сама́рия пэ яго́ро (пэ краё) чхуибнаскиро, и савэ́ исын бэштэ́ пэ яго́ро дрогонэ́ пасиндлякиро (пэ кушэтка).

13. Шунэ́н и допхэнэн дро кхэр Яково́скиро:” – ракирэ́ла Рай Дэвэ́л, янголэ́нгиро-болыбна́скиро Дэвэ́л,

14. “со Мэ дро дова́ дывэ́с пхарэ́с сэндякирава Израилё пал лэ́скирэ чорипэна, и Мэ пхарэ́с сэндякирава пал алта́ри дрэ Вефиль, и явэ́на обчингирдэ шынга́ (ро́ги) пэ алта́рё, и ёнэ пэрэ́на пэ пхув.

15. И Мэ розмарава пэ котэра́ ивантытко (зимитко) кхэр кхэтанэ́ лынаитконэ кхэрэса; и пэрэ́на кхэра́ шукарибнаса слонытконэ кокалэстыр, и на явэ́на буты́р барэ́ кхэра́”, – ракирэ́ла Рай Дэвэ́л.

Psalms 141:1-4

1. Давидо́скиро Пса́лмо. О, Раё Дэ́вла! Мэ кхара́ва ясвэ́нца Тут: яв сыгэды́р кэ мэ; причху́в кан кэ мири́ зан, ке́ли мэ кхара́ва ясвэ́нца Тут.

2. Мэк миро мангипэ́н (модло) тэ доджал кэ Ту сы́рбы фимиа́мо, а ке́ли мэ ґазда́ва васта́ сы́рбы бэльвэлякиро свэ́нто яныбэ́н.

3. Чхув стрэгарис, Раё Дэ́вла, пашы́л миро муй, тэ рикирэ́л вуда́р пэ мирэ́ ушта́.

4. На домэк, соб (кай) миро ило́ тэ рисёл криг кэ вари-саво́ чоро рэ́ндо, соб (кай) мэ тэ кэра́в дурэды́р фуипэ́н. На домэк, соб (кай) мэ тэ хав манушэ́нгирэ мизюли (сласти), савэ́ кэрэ́на чорипэ́н.

Proverbs 29:25-25

25. Кон дарэ́ла манушэ́ндыр, кодова́ сы́рбы чхувэ́ла фэлы́ пэ́скэ, нэ кон зоралэ́с патя́ла дрэ Растэ-Дэвлэ́стэ, одова́ явэ́ла бидаракиро.

Zjaveňie 3:1-22

1. И чхин Янголоскэ Сардисоскирэ кхангирья́тыр: “Дава́ ракирэ́ла Одова́, Конэ́стэ исын эфта́ Дэвлэ́скирэ ду́хи и эфта́ чэргэня́: “Мэ джино́м (джина́в) тыри́ буты́, и со мануша́ дэн годы́ пэ́скэ (думинэ́на), со ту сан джидо́, нэ ту сан муло́.

2. Ракхпэ и зоралякир дова́, со яця́пэ ту́тэ и со мэрэ́ла сыг, пал-дова́ со Мэ на латхём, соб (кай) тыри́ буты́ тэ явэ́л пхэрды́ анги́л Мирэ́ Дэвлэ́скирэ якха́.

3. Палдава́ пририпир дова́, со ту сыклякирдян, со ту шундя́н, ракх да́ва и ри́скир пэ́скиро джиибэ́н кэ Дэвэ́л. Ко́ли ту на явэ́са тэ ракхэспэ, тэды Мэ ява́ва пэ ту́тэ сыр чор, и ту на явэ́са тэ джинэ́с, ке́ли мэ ява́ва.

4. Нэ исын на́бут мануша́ ту́тэ дро Сардисо, савэ́ на мэлякирдэ пэ́скирэ урибэна́ грэхэ́нца, и ёнэ явэ́на тэ псирэ́н Ма́нца дрэ парнэ́ урибэна́, пал-дова́ со ёнэ исын лачхэ́.

5. Кон лэ́ла упралыпэ́н, одова́ урьела парнэ́ ризы, и Мэ на кхосава криг лэ́скиро лав джиибнытконэ лылварьятыр (книгатыр), и мэ приґалёвава лэ́скиро лав анги́л мирэ́ Дадэ́стэ и анги́л Лэ́скирэ Янголэндэ,

6. Конэ́стэ исын кана́, мэк ёв тэ шунэ́л, со Ду́хо (Фа́но) ракирэ́ла кхангирье́нгэ!”

7. И чхин Янголоскэ Филадэльфиякирэ кхангирья́тыр: “Дава́ ракирэ́ла Одова́, Кон исын Свэ́нто, Чачуно́. Лэ́стэ исын Давидо́скиро клыдын и Ёв псиравэла (отпхандэла) вуда́р, и нико́н на пхандэла, и ке́ли Ёв пхандэла, ние́кх на псиравэла.

8. Мэ джино́м тыри́ буты́. Дыкх: Мэ чхудём анги́л ту́тэ псирадо вуда́р и никонэ́скэ нашты́ тэ пхандэл дава́ вуда́р. Ту́тэ исын на́бут зор, и ту зракхця́н Миро лав и ту на отпхэндянпэ Ма́ндыр.

9. Акэ, мэ да́ва ту́кэ одолэ́н, савэ́ исын налачхэскирэ скэдыибна́стыр, савэ́ ракирэ́на, со ёнэ исын Юды, а дава́ нанэ чачипэ́н, ёнэ исын хохаибнарья; ґа́да, Мэ кэра́ва адя́кэ, соб (кай) ёнэ тэ дэн “паклоно” патыва́са анги́л тырэ́ ґэра́, тэ джинэ́н, со Ма́нгэ яця́н ту дро́го.

10. Палдава́ со ту ракхцян лав тэ вырикирэс, то и Мэ адя́кэ-паць ракхава тут мардэстыр (штундатыр), ке́ли явэ́на тэ пропатякирэн саро́ свэ́то, соб (кай) тэ пропатякирэн кажнонэ́ манушэ́с, кон дживэ́ла пэ пхув.

11. Дыкх, Мэ сы́гэс ява́ва. Рикир, со исын ту́тэ, соб (кай) вари-кон тэ на лэл ту́тыр тыри́ вя́нка (коро́на), ке́ли ту лыян упралыпэ́н.

12. Кон лэ́ла упралыпэ́н, кодолэстыр Мэ кэра́ва важно сты́лбо дрэ Мирэ́-Дэвлэ́скири Кхангири́, и ёв буты́р на выджа́ла яври́. И Мэ чхина́ва пэ дава́ сты́лбо Мирэ́ Дэвлэ́скиро лав, и Мирэ́-Дэвлэ́скирэ форо́скиро лав “Нэво́ Ерусалимо.” Дава́ нэво́ Ерусалимо явэ́ла тэ джал тэлэ́ Болыбна́скирэ Раёстыр, Мирэ́ Дэвлэ́стыр. И Мэ чхина́ва пэ лэ́стэ Миро нэво́ лав.

13. Конэ́стэ исын кана́, мэк ёв тэ шунэ́л, со Ду́хо (Фа́но) ракирэ́ла кхангирье́нгэ.”

14. И чхин Янголоскэ Лаодикиякирэ кхангирья́тыр: “Дава́ ракирэ́ла “Ами́нь”, патяибны́тко и чачуно́ Якхи́тко, Саво́ исын англыпэ́н сарэскэ, со́стыр Дэвэ́л создыя́ свэ́то:

15. Мэ джино́м (джина́в) тыри́ буты́, со ту на сан шылало, и со ту на сан хачкирдо. Фэды́р явэ́лас, соб (кай) ту тэ явэс хачкирдо ци шылало.

16. Палдава́ со ту сан тато, а ту на сан шылало ци хачкирдо, мэ чунгардава тут Мирэ́ мо́стыр.

17. Пал-дова́ со ту ракирэ́са: ‘Мэ сом барвало́ и мэ барвалыём и ма́нгэ на трэй ничы́, нэ ту на джинэ́са, со ту сан бэдо и бибахтало́; чороро́, короро́ и нанго;’

18. палдава́ мэ подпхэнава ту́кэ тэ кинэс сувнака́й Ма́ндыр, саво́ сыс пробиндло яга́са. Кин адя́кэ-паць парны и́дя тэ урьеспэ, соб (кай) тэ сыкавэс ладж пэ́скирэ нангипнаскири; и помакх пэ́скирэ якха́ якхитконэ макхлуняса (мазяса), соб (кай) тэ дыкхэ́с.

19. Сарэ́нгэ, кон исын дро́го Ма́нгэ, Мэ пхэна́ва зорья́са лэ́нгири банг и сыклякирава лэн кэ дукха́. Палдава́ яв хачкирдэ́ илэ́са кэ Дэвэ́л и ри́скир пэ́скиро джиибэ́н кэ Ёв.

20. Дыкх! Мэ сом тэрдо́ пашы́л вуда́р и марава дрэ лэ́стэ; ко́ли вари-кон шунэ́ла Мири́ зан и псиравэла (отпхандэла) вуда́р, тэды Мэ заджава андрэ́ кэ ёв и ява́ва тэ хав бэльвэлякиро хабэ́н лэ́са и ёв Ма́нца.

21. Одолэ́с, кон лэ́ла упралыпэ́н, Мэ бэшлякирава лэс тэ бэшэ́л Ма́нца пэ троно, сыр и Мэ, ке́ли Мэ лыём упралыпэ́н и бэсцём Мирэ́ Дадэ́са пэ Лэ́скиро троно.

22. Конэ́стэ исын кана́, мэк ёв тэ шунэ́л, со Ду́хо (Фа́но) ракирэ́ла кхангирье́нгэ.”

Romani Bible Baltic 2019

Maintained by the United Bible Societies for the Baltic Romani Mission