Bible in one year
December 14

1. “Шунэ́н дава́ лав, тумэ́-джувля́лэ Васаностыр, савэ́ ячнэ́ тхулэ сы́рбы рэцы (телицы), савэ́ исын пэ бэ́рги дрэ Сама́рия, савэ́ притасавэ́на чорорэн, савэ́ на дэ́на тэ дживэ́н кодолэ́нгэ, кон исын дрэ трэ́бима и, савэ́ ракирэ́на пэ́скирэ хулангэ: ‘Янэ́н мол (вино), ява́са тэ пьяс ла!’”
2. О Рай Дэвэ́л совлахадя́ Пэ́скирэ свэнтымаса: “Акэ, явэ́на дывэса́ пэ тумэ́ндэ, со тумэн явэ́на тэ тырдэн барэ́ нанглэнца (крюкэнца), и тумарэ́ явибнаскирэ чхаворэ́н нанглорэнца пэ вэндка пэ мачхэндэ.
3. Тумэ́ джа́на яври́ пир пхагирдэ́ ва́нты, кажно (сва́ко) тумэ́ндыр маму́й пэ́стэ, и тумэн вычхурдэна саро́ укэдыибэн дрэ харомы дро Ермоно”, – ракирэ́ла Рай Дэвэ́л.
4. “Явэ́н дрэ Вефиль, и кэрэ́н грэ́хи, а дро Гилгало кэрэ́н бутэды́р бутэдырьякирэн чорипэна; янэ́н пэ́скирэ свэ́нта дыибэна́ кажно зло́ко (ра́нко), тумарэ́ дэшэнгирья кажна трин дывэса́,
5. янэ́н свэ́нта дыибэна́ парикирибнаса пэ рошчына, подэн звесь (зан) и дэн тэ джинэ́н сарэ́нгэ пал во́льно яныбэ́н: дава́ исын пир ило́ тумэ́нгэ, чхавэ́ Израилёскирэ”, – ракирэ́ла Рай Дэвэ́л.
6. “И Мэ дыём адя́кэ-паць тумэ́нгэ нангэ данда́, би хабнаскиро дрэ сарэ́ тумарэ́ фо́рья, и на явэ́ла тэ ухтылэл маро́ пэ сарэ́ тумарэ́ штэ́ты, нэ тумэ́ на рисинэ́ кэ Мэ”, – ракирэ́ла Рай Дэвэ́л.
7. “Мэ адя́кэ-паць на давас брышы́нд тумэ́нгэ, ке́ли сыс ишчо (инкэ́) трин чхона́ кэ укэдыибэн гивэнгиро. Мэ бичхававас брышы́нд пэ екх фо́ро, и Мэ на бичхававас брышы́нд пэ яви́р фо́ро: екх котэ́р пхув сыс почхудо брышындэса, а яви́р, со сыс почхудо брышындэса, зашутия.
8. Палдава́ дуй, ци трин фо́рья гинэ́ кэ яви́р фо́ро тэ пьен пани́, нэ ёнэ на пинэ́ чалэ́с, нэ усае́кх тумэ́ на рисинэ́ кэ Мэ”, – ракирэ́ла Рай Дэвэ́л.
9. “Мэ дукхававас тумэн шукэ́ насвалыпнаса (иржаса) и зэлэнэ кирныпнаса пэ гив; листэнгирэ кирмэ (гусеницы) поханас бут тумарэ́ унты (сады), и тумарэ́ винаградники (дракхитка), и тумарэ́ инжыритка кашта́, тумарэ́ маслинитка кашта́, нэ тумэ́ на рисинэ́ кэ Мэ”, – ракирэ́ла Рай Дэвэ́л.
10. “Мэ бичхававас пэ тумэ́ндэ мэрибнытка фра́нсы, сыр и пэ Еги́пто: Мэ мулякиравас тумарэ́ тэрнэ́ муршэ́н куртала́са кхэтанэ́ грэнца, савэ́н лэнас дро пле́но; Мэ кэравас адя́кэ, доя́ кхан (смрадо) ґаздэласпэ пир тумарэ́ станы (таборы) дрэ тумарэ́ рутхуня, нэ тумэ́ на рисинэ́ кэ Мэ”, – ракирэ́ла Рай Дэвэ́л.
11. “Мэ рававас тэлэ́ тумарэ́ фо́рья, сыр Мэ, тумаро́ Дэвэ́л, радём тэлэ́ Содо́мо и Гомо́ра, и тумэн сыр ґломня выухтылэн ягатыр, со хачия, нэ тумэ́ усае́кх на рисинэ́ кэ Мэ”, – ракирэ́ла Рай Дэвэ́л.
12. ‘Палдава́ адя́кэ Мэ кэра́ва ту́кэ, о Израилё: и пир дова́, со Мэ адя́кэ кэра́ва ту́кэ, яв скэдыно́ тэ дыкхэспэ Ма́нца, тырэ́ Дэвлэ́са, о Израилё.”
13. Палдава́, акэ, Ёв, Кон выкэрдя бэ́рги, Кон создыя́ балва́л, Кон дэ́ла звесь (зан) манушэ́скэ, пал со ёв думинэ́ла, Кон кэрэ́ла адя́кэ, со зло́ко (ра́нко) парудёла пэ калыпэ́н яври́, и Кон штавэла (стэмпинэла) пир вучэ́ штэ́ты пэ пхув, – Рай Дэвэ́л, янголэ́нгирэ-болыбна́скиро Дэвэ́л, исын Лэ́скиро лав.’
1. Шунэ́н дава́ лав, савэ́са мэ, Амосо, ява́ва тэ тугинав ясвэ́нца пал тумэ́ндэ, мануша́лэ Израилёскирэ кхэрэ́стыр.
2. Пыя́ тэрны́ патывалы́ джувлы́ (дева) Израилёскири: ёй буты́р на ґаздэ́лапэ. Ёй исын пашты, и нанэ ние́кх ману́ш тэ ґаздэл ла.
3. Палдава́ адя́кэ ракирэ́ла Рай Дэвэ́л: “Дро фо́ро, саво́ дэ́лас тысёнцы манушэ́н пэ марибэ́н, ячэ́напэ шэл мурша́, дро фо́ро, саво́ дэ́лас шэл манушэ́н, ячэ́напэ дэш мурша́ ваш кхэрэ́скэ Израилёскирэскэ.”
4. Палдава́ адя́кэ ракирэ́ла Рай Дэвэ́л кхэрэ́скэ Израилёскирэскэ: “Тумэ́ родэ́н Ман и явэ́на джидэ́.
5. На родэ́н Вефиль, и на заджа́н дро Галга́ло и на псирэ́н кэ Вирса́вия (Бершэба), пал-дова́ со Гилгалоскирэ мануша́ джа́на дро пле́но, а Вефилятор нисо́ на ячэ́лапэ.”
6. Родэ́н Рас-Дэвлэ́с и тумэ́ явэ́на тэ дживэ́н, соб (кай) Ёв тэ на кэрэ́л адя́кэ, со яг пэрэ́ла сы́гэс пэ кхэр Ёзаскиро, и хачкирэ́ла сарэ́са лэс адя́кэ, со на явэ́ла ние́кх тэ мурдякирэл яг дрэ Вефиль.
7. Тумэ́, кон пирикэрэла чачуно́ сэ́ндо пэ трута (отрава), а чачипэ́н чхурдэна пэ пхув,
8. родэ́н Лэс, Кон создыя́ чэргэненгири група Плеады (Эфта́-чэргэнитко) и Орионо (Чэргэня́ пэ Васто́ко). Кон парувэла зэр (тень) мэрибнаскири пэ ясно зло́ко (ра́нко), Кон кэрэ́ла адя́кэ, со дывэ́с ячэ́ла сыр калы рат. Кон кхарэ́ла кэ Пэ панинга́ морёскирэ (дэрьявэ́скирэ), и Ёв росчхувэла лэн пир сари́ пхув, – Рай Дэвэ́л исын Лэ́скиро лав.
9. Ёв кэрэ́ла адя́кэ, со хасибэ́н сы́гэс пэрэ́ла пэ зоралэстэ, и Ёв янэ́ла хасибэ́н пэ дия́.
10. Тумэ́ нашты́ тэ дыкхэ́н пэ кодолэстэ, кон сыкавэ́ла банг тумэ́нгэ пашы́л по́рта и тумэ́ дыкхэ́на вучипна́са пэ кодолэстэ, кон ракирэ́ла чачипэ́н.
11. Палдава́, со тумэ́ штакирэна (притасавэ́на) чорорэс, и тумэ́ лэ́на лэ́стыр почасту́нки гивэса; на дыкхи́ пэ дова́, со тумэ́ чхудэ́ кхэра́ вычингирдэ барэстыр, тумэ́ усае́кх на явэ́на тэ дживэ́н дрэ лэ́ндэ; тумэ́ почхудэ дрэ пхув шука́р винаграды́тка унты (сады), нэ тумэ́ на явэ́на тэ пьен мол (вино) лэ́ндыр.
12. Пал-дова́ со Мэ джино́м, со тумэ́ кэрдэ́ бут чорипэна, и тумэ́ндэ исын бут грэ́хи: тумэ́ притасавэ́на чачунэ́ манушэ́н и лэ́на мыты (взятки); тумэ́ рискирэна пэ риг чачипэ́н чорорэ́-манушэ́нгири пэ сэ́ндо [пашы́л форо́скири по́рта-ю.о.].
13. Палдава́ барэ́-годя́киро ману́ш явэ́ла штыл дро далэ́ дывэса́, пал-дова́ со дава́ исын бибахтало́ часо.
14. Родэ́н лачхипэ́н, а на фуипэ́н, соб (кай) тумэ́ тэ дживэ́н, и палдава́ Рай Дэвэ́л, янголэ́нгирэ-болыбна́скиро Дэвэ́л, явэ́ла тумэ́нца, сыр тумэ́ и ракирэ́на.
15. Бидыкхэн тумэ́ чорипэ́н (биба́хт), нэ выкэдэн лачхипэ́н, и тумэ́ кэрэ́н адя́кэ, соб (кай) тэ явэ́л чачипэ́н пашы́л по́рта (вра́ты) форо́скири, сашты́ тэ явэ́л, со Рай Дэвэ́л, янголэ́нгирэ-болыбна́скиро Дэвэ́л, явэ́ла тэ тангинэ́л одолэ́н, кон ячэ́лапэ манушэ́ндыр Езаскирэндыр (Иосифостыр).”
16. Палдава́ адя́кэ ракирэ́ла Рай Дэвэ́л, янголэ́нгирэ-болыбна́скиро Дэвэ́л Сарэзорья́киро: “Зорало́ ровибэн явэ́ла пэ сарэ́ вули́цы (га́сы), и мануша́ явэ́на тэ припхэнэн пэ сарэ́ дрома́: ‘Дэ́вла! О Дэвлалэ!’ И ёнэ явэ́на тэ кхарэ́н пхувья́кирэ бутярьен тэ тугинэн зоралэ́с, и кадасавэн, кон исын спецы тэ тугинэн ровибнаса.
17. Дрэ сарэ́ винаграды́тка унты (сады) явэ́ла зорало́ ровибэн, пал-дова́, со Мэ проджава машки́р лэ́ндэ,” – ракирэ́ла Рай Дэвэ́л.
18. Бида явэ́ла пэ тумэ́ндэ, кон древа́н камэ́ла, соб (кай) тэ явэ́л дывэ́с Ра́скирэ-Дэвлэ́скиро! Саво́ лачхипэ́н тумэ́ ужакирэ́на дывэсэ́стыр Ра́скирэ-Дэвлэ́стыр? Дава́ ж явэ́ла калыпэ́н, а на дуд.
19. Дава́ явэ́ла сы́рбы дова́, ко́ли ману́ш насця шчэрэстыр (левостыр), и рич пирилыя лэс, ци сы́рбы ману́ш, саво́ гия́ андрэ́ кхэр, причхудя пэ́скиро васт кэ ва́нта, и сап дандырдя лэс.
20. Нау́што дывэ́с Ра́скирэ-Дэвлэ́скиро исын на калыпэ́н, а дуд? Хор калыпэ́н, нанэ ни сави́ ясныма, и на зяинэла.
21. Мэ бидыкхава, Мэ дыкха́ва вучипна́са пэ тумарэ́ свэнкитка дывэса́, и Мэ на сунгава (на сунгавава) гудло́ кхандыпэн (парфуны), со ячэ́ла тумэ́ндэ пэ скэдыибэна.
22. На дыкхи́ пэ дова́, со тумэ́ янэ́на цэ́ла схачкирибнаскирэ свэ́нта дыибэна́ и свэ́нта дыибэна́ гивэстыр, Мэ на прилава лэн. И Мэ на кэра́ва паты́в тумарэ́ свэнтонэ́ дыибнэнгэ тэ парикирэ́н тумарэ́ тхулэ гуруворэнца
23. Дурьякирэн Ма́ндыр шумо (глумо) тумарэ́ гилендыр, пал-дова́ со Мэ на ява́ва тэ шунав мелодия тумарэ́ гусленца (арфэнгири),
24. нэ мэк чачуно́ сэ́ндо тэ чхувэлпэ сы́рбы паня́, и чачипэ́н сыр сы́гно рэ́кица (лэнори́).
25. Ци янэ́нас тумэ́ Ма́нгэ свэ́нта яныбэна́ и марунэ яныбэна́ пэ чхучи́ пхув штардэша́ бэрш, о кхэр Израилёскиро?
26. Нэ тумэ́ адя́кэ-паць (тожэ) янэ́нас пэ́са ша́тра Молохоскири и чэргэн тумарэ́ дэвлорэскири, Ремфанос муенца, со тумэ́ кэрдэ́ ваш пэ́скэ.
27. Палдава́ Мэ бичхава́ва тумэн дро пле́но пал Дама́ско”, – ракирэ́ла Рай Дэвэ́л, Кон кхарэ́лапэ янголэ́нгирэ-болыбна́скиро Дэвэ́л.
5. Мэк чачипнаскирэ мануша́ тэ пэкавэн ман, дава́ явэ́ла куч. И мэк ёв тэ сыкавэ́л мири́ банг, дава́ явэ́ла сы́рбы оливи́тко дзэт (елеё), савэ́стыр миро рама́нё (миро) на рисёла криг; нэ сароекх мэ ява́ва тэ мангавапэ, соб (кай) ёнэ тэ на кэрэ́н чорипэ́н.
6. Ке́ли лэ́нгирэ сэндарьен розмардэ пир бара́, ёнэ шунэ́на мирэ́ лава́, пал-дова́ со ёнэ исын гудлэ́.
7. Амарэ́ кокалы́ росчхурдынэ пашы́л загиибэ́н дрэ маґила (кула), сы́рбы, ке́ли вари-кон пхаравэла пхув (пахинэла) и чхинэла кашта́ пэ пхув.
8. Нэ мирэ́ якха́ исын пэ Ту́тэ, о, Раё Дэ́вла, миро Рай Дэвэ́л, дрэ Ту́тэ мэ зоралэ́с патя́ва: на домэк, соб (кай) миро ди тэ хасёл.
9. Ракх ман вастэ́ндыр, со чхудэ́ фэля́ пэ ма́ндэ, и фэля́ сетка́са, савэ́ кэрэ́на чорэ́ мануша́.
10. Мэк чорэ́ мануша́ тэ пэрэ́н дрэ лэ́нгирэ фэля́ пал екх мо́ло, а мэ обджава лэн.
26. Бут мануша́ родэ́на, соб (кай) тэ явэ́н куч тхэмэ́скирэ барыдырэ́са, нэ кажно ману́ш дорэсэ́ла чачипэ́н Ра́стыр-Дэвлэ́стыр.
1. Пало́ (после) дава́ мэ дыкхцём, – ґа́да, со вуда́р исын псирадо (отпхандло) дро Болыбна́скиро Раё. И доя́-паць зан, со ґарэдыр мэ шундём, хай, рогоскири (трубакири), сави́ ракирдя́ ма́нца, пхэндя́: “Яв упрэ́ адари́к, и Мэ сыкава́ва ту́кэ, со сыг явэ́ла пало́ дава́.
2. Екха́тыр Ду́хо (Фа́но) лыя́ упралыпэ́н пэ ма́ндэ. И, акэ, сыс троно дро Болыбна́скиро Раё, и пэ дава́ троно сыс бэшто́ Вари-Кон.
3. И Одова́, Кон сыс бэшто́, зяиндя сыр бар ясписо и сардисо, и сыс брышындэскири банги (радуга) трусця́л троно сы́рбы смарагдо.
4. И трусця́л кадава́ троно сыс биш тэ штар яви́р троны и биш тэ штар годэпхурэ́ сыс бэштэ́ пэ кадалэ́ троны дрэ парнэ́ урибэна́ и пэ шэрэ́ сыс лэ́ндэ сувнакунэ́ вянки (короны).
5. И троностыр джа́нас блискави́цы, и заня́, и гро́мы и эфта́ шандалэ (подсвечники) хачонас анги́л троно, савэ́ исын эфта́ Дэвлэ́скирэ ду́хи.
6. Анги́л троно сыс стёклы́тко (балунало́) мо́рё (дэрья́в) сыр кристало, и машкира́л и трусця́л троно сыс штар джидалэ (жывотна), савэ́ндэ сыс пхэрдо́ якха́ пала́л и анги́л;
7. и пэ́рво джидало сыс сыр шчэр (ле́во), яви́р джидало сыс сыр гуруворо, и тритонэстэ джидалэстэ сыс манушы́тко муй, и шта́рто джидало сыс сыр вурняибнытко о́рло (ки́до).
8. И кажнонэ́ джидалэстэ сыс шов пхака́ (крылы) пэ сарэ́ рига́, и андрэ́ сыс пхэрдо́ якха́ и дывэсэ́ и раты́ ёнэ ракирэ́нас: “Свэ́нто, Свэ́нто, Свэ́нто исын Рай Дэвэ́л, Сарэзорья́киро, Саво́ сыс исын, и Саво́ трэй исын тэ явэ́л.”
9. И ке́ли штар джидалэ (жывотна) славинэна, дэ́на паты́в и парикирэна Одолэ́скэ, Кон исын бэшто́ пэ троно и Саво́ дживэ́ла ве́чнэс пэ сарэ́ ве́ки,
10. тэды дэшуштар годэпхурэ́ клонинэнапэ патыва́са анги́л Кадалэстэ, Кон исын бэшто́ пэ троно, и Саво́ дживэ́ла ве́чнэс пэ сарэ́ ве́ки. Ёнэ чхурдэна пэ́скирэ вянки (короны) анги́л троно, пхэни́:
11. “Амаро́ Рай Дэвэ́л и Дэвэ́л! Ту сан мол тэ прилэс сла́ва, паты́в и зор, пал-дова́ со Ту создыян саро́ и пир Тыри́ во́ля саро́ сыс создыно́ и дживэ́ла.”
Romani Bible Baltic 2019
United Bible Societies for the Baltic Romani Mission