Bible in one year December 15Amos 6:1-141. Бида тумэ́нгэ, кон прилэ́ла джиибэ́н локхэс, и савэ́ исын наракхибнытка (беспечна) дро патяибэ́н пэ бэ́рга дрэ Сама́рия, – тумэ́, славутна мануша́ барэ́ нацыятыр, кэ савэ́ явэ́ла кхэр Израилёскиро.2. Джа́н дурэды́р кэ Калнэ, и дыкхэ́н, одотхы́р джа́н кэ баро́ Емафо, и одотхы́р кэ Гефо Филистимлянэнгиро: ци ёнэ исын фэды́р кадалэ́ тумарэ́ кралипнэндыр? Ци лэ́нгирэ ме́жы исын буґлэдыр тумарэ́-пхувья́кирэ межэндыр?3. Бида пэ тумэ́ндэ, савэ́ отчхувэна бибахтало́ дывэ́с, и, савэ́ янэ́на пашылэды́р кэ пэ, сыр явэ́на тэ притасавэн тумэн.4. Тумэ́, савэ́ сан паштэ́ пэ чхуибэна, со исын ґожакирдэ слонытконэ кокалоса, и тумэ́ потырдэнапэ пэ тумарэ́ дро́га пасиндля (ложы). Тумэ́ ха́на выкэдынэ́ бакрэ́н тумарэ́ стадатыр, и тхулэ гуруворэ́н ґуртостыр.5. Тумэ́ багана тэл гусленгири (арфакири) зан (глос), и придуминэна ваш пэ́скэ музыкакирэ струме́нты сыр Дави́до.6. Тумэ́ пьена мол (вино) тахтаендыр, и макхэнапэ най фэдыршонэ макхлуненца (мазенца), нэ тумэ́ на пиридживэна пал дова́, со Ёза (Иосифо) исын притасадо.7. Палдава́ тумэ́ акана́ джа́на пэ́рва дро пле́но анги́л пленонэндэ и, савэ́ тумэ́ндыр акана́ исын бэштэ́ пал свэнкитка скаминда паш-пасиндой, явэ́на штыл.8. Рай Дэвэ́л совлахадя́ Пэ́са, янголэ́нгирэ-болыбна́скиро Дэвэ́л, Рай Дэвэ́л и ракирэ́ла адя́кэ: “Ма́нгэ исын джунгало́ (брытко), со пхутёла Яково, и Мэ бидыкхава лэ́скирэ барэ́ фэлатиня́ (колова́); палдава́ Мэ выдава лэ́скиро фо́ро и саро́, со исын дрэ лэ́стэ.”9. И тэ́ньчи явэ́ла адя́кэ: со ко́ли дэш мануша́ ячэ́напэ дро екх кхэр, то и ёнэ мэрэ́на.10. И сэмэ́нца мулэнгири, лэ́ла явирэ манушэ́с, саво́ явэ́ла тэ хачкирэл тру́пы, и ёв пхэнэ́ла кодолэ́скэ кхэрэ́стыр, кон яця́пэ джидо́: “Ци исын ишчо (инкэ́) вари-кон дро кхэр?” Тэ́ньци кодова́ ману́ш кхэрэ́стыр пхэнэ́ла: “Нанэ ‘никонэ́с.” И дая́ сэмэ́нца тэды пхэнэ́ла: “Рикир пэ́скири чиб! Пал-дова́ со амэ́нгэ нашты́ тэ пририпирас лав Ра́скирэ-Дэвлэ́скиро.”11. Пал-дова́ со, акэ, Рай Дэвэ́л припхэнэла, со Ёв пхагирэ́ла баро́ кхэр (кралипэ́н Израилёскиро) кэ руи́ны, и тыкно́ кхэр (кралипэ́н Юдэя́киро) пэ котэра́.12. Ци праста́на грая пир бэ́рги? Ци пахинэла пхув ману́ш, одо́й, пэ гурувэстэ? А сыр жа тумэ́ пиририскирдэ чачипэ́н дрэ жэлучоскири трута (ядо), а бар΄якирдо (пло́до) чачипна́скиро дро киркипэн (палыно)?13. Тумэ́, савэ́ радынэ́напэ нисостыр, савэ́ пхэнэ́на: “Амэ, ж, хай, на пэ́скирэ зорья́са дорэсцям пэ́скэ зоралыпэ́н?”14. “Нэ, акэ, Мэ, – ракирэ́ла Рай Дэвэ́л, янголэ́нгиро-болыбна́скиро Дэвэ́л, Мэ ґазда́ва Наюдытко нацыя проти тумэ́ндэ, кхэр Изралёскиро, и адалэ́ вэ́рги тумарэ́ явэ́на тэ притасавэн тумэн штэто́стыр, кай тэ джа́н андрэ́ Емафо, кэ сы́гно рэ́кица (лэнори́) пэ чхучэ́ прахи (Аравия).”Amos 7:1-171. Адя́кэ Рай Дэвэ́л сыкадя́ ма́нгэ: ‘Акэ Ёв создыя́ бут пхакитконэ скочкэн (саранча), ке́ли лэ́ла тэ барьёл атава (позднё чар); и, акэ, дая́ атава яця́ пало́ дова́, сыр прогия́ счхиныбэн крали́скиро.2. И сыс адя́кэ: ке́ли скочки поханэ на́бут со на сари́ чар, пэ пхув, тэ́ньчи мэ, Амосо, пхэндём: “О Раё Дэ́вла! Отмэк, мэ мангавапэ Ту́кэ! Сыр Яково дэ́ла ра́да тэ тэрдёл проти? Пал-дова́ со ёв исын тыкно́.”3. Рай Дэвэ́л тангиндя пал дова́, со Ёв кэрдя́. “Тэ на явэ́л дава́”, – пхэндя́ Рай Дэвэ́л.4. Адя́кэ Рай Дэвэ́л сыкадя́ ма́нгэ: акэ, Рай Дэвэ́л кхардя́ яг тэ сэндинэл, и ёй хачкирдя́ бари (хор штэ́ты) тэл пхув колбань и сари́ мэкны пхув.5. Тэ́ньци Мэ пхэндём “О Раё Дэ́вла! Тэрдёв! Мэ мангав Тут! Сыр Яково дэ́ла ра́да тэ тэрдёл проти? Пал-дова́ со ёв исын тыкно́!”6. Палдава́ Рай Дэвэ́л пожалиндя пал дова́, со Ёв кэрдя́. “Тэ на явэ́л дава́”, – пхэндя́ Рай Дэвэ́л.7. Адя́кэ Рай Дэвэ́л сыкадя́ ма́нгэ: акэ, Рай Дэвэ́л, сыс тэрдо́ пэ яго́ро (пэ краё) вантакиро, и сыс моловано отвесо дро Лэ́скиро васт.8. И пхэндя́ Рай Дэвэ́л ма́нгэ: “Амосэ! Со дыкхэ́са ту?” Мэ пхэндём: “Моловано́ отвесо.” Тэ́ньци Рай Дэвэ́л пхэндя́: “Акэ, Мэ чхува́ва отвесо машки́р Мирэ́ манушэ́ндэ Израилёстыр: Мэ буты́р на ява́ва тэ отмэкав банг лэ́нгэ.9. И вучэ́ штэ́ты, пэ савэ́ янэ́на дыибэна́, явэ́на чхучэ́ (пуста), и свэ́нта штэ́ты Израилёскирэ явэ́на паштэ́ дрэ руи́ны. И Мэ ґазда́ва курта́ла пэ Еровоамоскиро кхэр.”10. Тэ́ньци о Ама́сия, раша́й Вефилятыр, бичхадя́ лав Иеровоамоскэ, крали́скэ Израилёскэ, пхэни́: “О Амосо зракирдяпэ пэ ту́тэ машки́р кхэр Израилёскиро: пхув нашты́ тэ шунэ́л сарэ́ лэ́скирэ лава́.11. Пал-дова́ со Амосо адя́кэ пхэндя́: “О Иеровоамо мэрэ́ла куртала́тыр, а Израилё явэ́ла, чачипна́са, лыджино криг дро пле́но лэ́скирэ пхувья́тыр.”12. Тэ́ньци о Ама́сия пхэндя́ Амососкэ: “Джа́ ту, ангилдыкхибнаскиро (магико), наш пэ пхув Юдаскири. Одо́й ха маро́, и одо́й ангилпхэн,13. нэ буты́р ту тэ на ангилпхэнэс дрэ Вефиль, пал-дова́ со дава́ исын свэ́нто штэ́то крали́скиро, и дава́ исын кхэр крали́скиро.”14. Тэ́ньци Амасо отпхэндя́, и пхэндя́ Амасияскэ: “Мэ на со́мас проро́ко, и мэ на сом чхаво́ пророкоскиро. Нэ мэ со́мас чхупна́ри (пастухо) пэ стада, и мэ кэдыём му́ри пэ сикоморитка кашта́.15. Тэ́ньци о Рай Дэвэ́л лыя́ ман, ке́ли мэ гиём пал стада, и Ёв пхэндя́ ма́нгэ: ‘Джа́ и ангилпхэн Мирэ́ манушэ́нгэ Израилёстыр.’16. И акана́ шун лав Ра́скирэ-Дэвлэ́скиро: ту ракирэ́са: ‘На ангилпхэн пэ Израилё, и на выпхэн лава́ пэ кхэр Исако́скиро’17. “Палдава́ адя́кэ ракирэ́ла Рай Дэвэ́л: ‘Тыри́ ромны́ явэ́ла биладжакуны джувлы́ дро фо́ро, а тырэ́ чхавэ́ и чхая́ пэрэ́на куртала́тыр, тыри́ пхув роскэрэна пэ паша́ шэлэса меринытконэса, и ту мэрэ́са пэ магирды пхув; и Израилё, чачипна́са, лыджа́на криг дро пле́но лэ́скирэ пхувья́тыр.”Psalms 142:1-71. Давидо́скиро Сыклякирибэ́н. Сыр Ёв мангдя́пэ Дэвлэ́скэ, ке́ли ёв сыс дрэ Ѓебар (Пешчэра).2. Мэ мангдёмпэ зоралэ́с Ра́скэ-Дэвлэ́скэ мирэ́ заня́са.3. Мэ выпхэндём мирэ́ хор ду́мы анги́л Лэ́стэ; мэ сыкадём Лэ́скэ миро пхарипэ́н.4. Ке́ли миро ду́хо (фа́но) замыя́ дрэ ма́ндэ, тэды Ту джинэ́са, савэ́ дромэ́са мэ псирава. Ёнэ чораханэ́с чхудэ́ фэлы́ пэ дром, кай мэ псирава.5. Мэ дыкхцём сы́гэс пэ чачи́ риг ма́ндыр и дыкхцём, со ние́кх на пиджкирэла (на пригалёла) ман, нанэ, кай тэ гарадёвав ма́нгэ, ние́кх пэкэлапэ / на дэ́ла ту́га (заботинэлпэ) пал ма́ндэ.6. Мэ дыём го́дла ясвэ́нца кэ Ту; Раё Дэ́вла мэ пхэндём: “Ту сан миро гарадыипэн, мири́ до́ля пэ пхув, кай дживэ́на.”7. Пришунпэ, со мэ ровава, пал-дова́ со мэ догиём сарэ́са кэ пхув, зра́кх ман одолэ́ндыр, савэ́ традэ́на ман, пал-дова́ со ёнэ исын зоралэды́р ма́ндыр.Proverbs 29:27-2727. Чачунэ́ мануша́ джа́на криг (брыдинэна) начачунэ манушэ́ндыр, нэ дэвлы́тка мануша́ рикирнапэ дрэ риг фуе́ манушэ́ндыр.Zjaveňie 5:1-141. И Мэ дыкхцём скрэнцындло сви́тко дро чачо́ (право) васт Одолэ́стэ, Кон сыс бэшто́ пэ троно, дрэ саво́ сыс зачхиныбэна яври́ и андрэ́. Ёв сыс запхандло пэ эфта́ чэргэнорья (печати).2. И мэ дыкхцём зоралэ́ Янголо́с, саво́ пхэнэлас анги́л сарэ́ндэ зоралэ́ заня́са: “Кон исын мол тэ отпхандэл лылвари́ и тэ пхагирэл чэргэнорья?”3. И на сыс нико́н ни дро Болыбна́скиро Раё, ни пэ пхув, ци тэл пхув, конэ́скэ сыс мол тэ отпхандэл сви́тко и тэ дыкхэ́л андрэ́ дрэ лэ́стэ.4. И мэ рондём киркэс бут, со на сыс нико́н, саво́ сыс мол тэ отпхандэл сви́тко и тэ дыкхэ́л андрэ́ дрэ ла́тэ.5. И екх годэпхурэндыр пхэндя́ ма́нгэ: “На ров! Дыкх! О Шчэр (Ле́во) Юда́скирэ родо́стыр, Давидо́скирэ ратэстыр, сэмэ́нца, лыя́ упралыпэ́н, соб (кай)/ёв тэ дэл ра́да тэ отпхандэл сви́тко и лэ́скирэ эфта́ чэргэнорья.”6. И мэ дыкхцём Свэнтонэ́ Бакрорэс, Саво́ сыс сы́рбы нагара зачхиндло́ машки́р троно и штар джидалэндэ и годэпхурэндэ. Свэнтонэ́ Бакрорэстэ сыс эфта́ шынга́ (ро́ги) и эфта́ якха́, савэ́ исын эфта́ Дэвлэ́скирэ Ду́хи и сыс бичхадэ́ пир сари́ пхув.7. Свэ́нто Бакроро́ подги́я и лыя́ сви́тко чачэ́ вастэ́стыр Одолэ́стыр, Кон сыс бэшто́ пэ троно.8. И ке́ли Ёв лыя́ сви́тко, штар джидалэ (жывотна) и биш тэ штар годэпхурэ́ пынэ́ пэ чанга́ анги́л Свэнтонэ́ Бакрорэстэ. Кажнонэ́стэ лэ́ндыр сыс гусли и сувнакунэ́ тахтая́ (чашы), савэ́ сыс пхэрдэ́ фимиамоса дрогонэ́-смолакирэ тхувипнаса (фимиамоса), со исын патерья (молитвы), ке́ли свэ́нта мангэ́напэ Дэвлэ́скэ.9. И ёнэ багандлэ нэви́ гилы́, пхэни́: “Ту сан мол тэ прилэс кадава́ сви́тко и тэ отпхандэс чэргэнорья (печати), пал-дова́ со Ту са́нас зачхиндло́ и Ту выкиндян манушэ́н ваш Дэвлэ́скэ Пэ́скирэ ратэ́са кажнонэ́ екхэ́-чиба́кирэ ирья́тыр (сэм΄я́тыр) и кажнонэ́ родыцо́стыр, и манушытконэ́ нацыя́тыр и кхэритконэ́ родо́стыр.10. И Ту кэрдя́н лэ́ндыр раша́нгиро Кралипэ́н, савэ́ явэ́на тэ кралинэн пэ пхув.”11. И нэвэ́стыр мэ дыкхцём и шундём заня́ бутэ́-Янголэ́нгирэ, савэ́ сыс милионы пашы́л троно и штарэ́ джидалэндэ и биш тэ штар годэпхурэндэ,12. и ёнэ ракирдэ́ зоралэ́ заня́са: “Свэ́нто Бакроро́ исын мол, Саво́ сыс мулякирдо тэ прилэл зоралыпэ́н и барвалыпэ́н и зор, и паты́в, и сла́ва и манушэ́нгиро шарибэ́н.”13. И мэ шундём, сыр кажно джидало, савэ́с Дэвэ́л создыя́, саво́ исын дро Болыбна́скиро Раё, пэ пхув и тэл пхув, и пэ мо́рё (дэрья́в), и саро́, исын андра́л дрэ лэ́ндэ, пхэнэнас: “Одолэ́скэ, Саво́ исын пэ троно, и Свэнтонэ́ Бакрорэскэ, мэк тэ явэ́л шарибэ́н, и паты́в, и сла́ва и зоралыпэ́н пэ вечна ве́ки.”14. И штар джидалэ (жывотна), савэ́н Дэвэ́л создыя́, пхэндлэ́: “Ами́нь!” И годэпхурэ́ пынэ́ пэ чанга́ и поклониндлэпэ патыва́са. Romani Bible Baltic 2019 Maintained by the United Bible Societies for the Baltic Romani Mission