Bible in one year
December 17

1. Дыкхибэ́н Авдиёскиро. Адя́кэ ракирэ́ла Рай Дэвэ́л пал Эдо́мо: амэ шундя́м звесь (зан) Мирэ́ бичхаибнаскирэ манушэ́стыр, савэ́с Мэ, Рай Дэвэ́л, бичхадём машки́р на́цыи тэ пхэнэ́л: “Уштэ́н, явэ́н тэ ґаздаспэ пэ марибэ́н проти лэ́стэ.”
2. Акэ, Мэ кэрдём адя́кэ, со ту яця́н тыкно́ ро́до машки́р на́цыи; ту явэ́са дрэ бари напатыв.
3. Тыро́ пхутькирдо ило́ хохадя тут, кон дживэ́ла машки́р шчэ́ли пэ бэ́рги, конэ́скиро кхэр исын вучо́; ту, саво́ ракирэ́ла дро пэ́скиро ило́: ‘Кон счхурдэла тэлэ́ ман?’
4. На дыкхи́ пэ дова́, со ту ґаздэса пэс сыр о́рло (ки́до), и со ту кэрэ́са пэ́скиро гня́зда (ку́фо) машки́р чэргэня́, нэ и одотхы́р Мэ чхурдава тэлэ́ тут”, – ракирэ́ла Рай Дэвэ́л.
5. “Ко́ли явэ́нас чора кэ ту, ци розмарибнаскирэ чора раты́, – со адя́кэ зоралэ́с обчордэ тут. Ци на лэнас ёнэ фэ́ни (то́ка) ада́кицы, кицы́ лэ́нгэ трэиндя́? Ко́ли явэ́нас винаградонэ-кэдыбнаскирэ (сборшчыки), со ж ёнэ на мэкэнас ту́кэ вари-кицы́ мурины?
6. Сыр кэ Иса́во саро́ сыс пириродыно? Сыр сарэ́ лэ́скирэ чораханэ штэ́ты пиридыкхнэ!
7. Сарэ́ тырэ́ дру́ги (мала́) пир доракирибэ́н (союзо) традэ́на тут аж кэ кустыка (границы); а мануша́, кон сыс дро рама́нё (миро) ту́са, хохавэна тут, и ёнэ лэ́на упралыпэ́н проти ту́тэ; кодолэ́, савэ́ ханэ́ тыро́ маро́, чхувэ́на фэлы́ пэ ту́тэ”, – нико́н на ґалёла дава́.
8. “Дро дова́ дывэ́с явэ́ла адя́кэ, – ракирэ́ла Рай-Дэвэ́л, – со Мэ хасякира́ва и годэ́ манушэ́н Эдомостыр, и барэ́ годярьен Исаво́скирэ бэрга́тыр.
9. И тырэ́ зоралэ́ мурша́, о Фема́не, пхадёна дро ду́хо, со кэ екх, нэ кажно (сва́ко) ману́ш, кон исын Исаво́скирэ бэргэндыр, хасёла – мулякирэна лэс.
10. Пал-дова́ со ту са́нас нахрато кэ тыро́ пшал Яково, ладжаипэ́н учхакирэ́ла тут, и ту хасёса пэ сарэ́ ве́ки.
11. Дро дова́ дывэ́с, со ту са́нас тэрдо́ пэ яви́р риг, дро дова́ дывэ́с, ке́ли чу́жа мануша́ лыджа́нас дро пле́но Яково́скирэ зоралэ́ халадэ́н, сыр явирэ-пхувитка мануша́ гинэ́ андрэ́ лэ́скирэ по́рты, и чхурдэнас жре́биё пал Ерусалимо, и ту са́нас екх лэ́ндыр.
12. Нэ ту́кэ на трэиндя́ тэ дыкхэ́с холямэс пала́л пал тырэ́ пшалэ́стэ дро дывэ́с, сыр лэнас лэс лэ́скирэ пхувья́тыр; и тэ на радынэспэ хасибнастыр Юда́скирэ-чхаворэнгирэндыр, и тэ на откэрэс бу΄глэс муй сабнаса дро дова́ бибахтало́ дывэ́с.
13. Ту́кэ на трэиндя́ тэ джас андрэ́ по́рта (вра́ты) дро дова́ дывэ́с, ке́ли бари биба́хт пыя́ пэ Мирэ́ манушэ́ндэ. Чачэс, на трэиндя́ ту́кэ тэ дыкхэ́с холямэс пала́л пэ лэ́нгирэ мэ́ньки, ци тэ причхувэс васта́ кэ лэ́нгиро миштыпэ́н, сыр сыс бари би́да лэ́ндэ.
14. Ту́кэ на трэиндя́ тэ тырдёс пэ трушулытка дрома́ (перекрёстки), соб (кай) тэ замарэс (тэ мулякирэс) кодолэ́н, савэ́ нашэнас; и тэ на выдэс кодолэ́н, савэ́ ячнэ́пэ, сыр сыс бари дар лэ́нгэ.
15. Пал-дова́ со сыг явэ́ла Дывэ́с Ра́скирэ-Дэвлэ́скиро пэ сарэ́ Наюды́тка на́цыи: сыр ту кэрдя́н, адя́кэ и ту́кэ явэ́ла кэрдо́; тырэ́ рэ́нды рисёна пэ тыро́ шэро́.
16. Пал-дова́ со сыр тумэ́ пинэ́ пэ Мири́ свэ́нто бэ́рга, адя́кэ-паць и сарэ́ Наюды́тка на́цыи явэ́на ўса́ды (сак) тэ пьен; ёнэ явэ́на тэ пьен, и тэ накхавэн (тэ глытынэн), и лэн хасякирэна сы́рбы на сыс лэн.
17. Нэ пэ бэ́рга Сионо́скири мануша́ зракхэнапэ, и ёй явэ́ла свэ́нто штэ́то. Кхэр Яково́скиро лэ́ла пэ́скэ лэ́нгиро мэкно́ миштыпэ́н.
18. Мануша́ Яково́скирэ явэ́на сыр яг, а мануша́ Ёза́скирэ явэ́на сыр бари яг, нэ мануша́ Исаво́скирэ явэ́на сыр пхус: лэн подхачкирэна и схана яга́са, и ние́кх на пиридживэла, соб (кай) тэ ячэ́лпэ Исаво́скирэ кхэрэ́стыр,” – пал-дова́ со дава́ пхэндя́ Рай Дэвэ́л.
19. И мануша́ паш-дывэсытконэ́ (южнонэ) рига́тыр лэ́на пэ́скэ бэ́рги Исаво́скирэ, и мануша́ пэ до́ло лэ́на пэ́скэ Филистимия, и фэ́лды Ефраимоскирэ и Самариякирэ. Э мануша́ Веньяминоскирэ лэ́на пэ́скэ Галаа́до.
20. И халадэ́ Израилёскирэ чхавэ́ндыр, савэ́ сыс дро пле́но, явэ́на тэ лэн пэ́скэ Ханаано́скири пхув аж кэ Сарепта, а мануша́ Израилёскирэ, савэ́ исын дро пле́но дро Сефарадо, явэ́на тэ лэн пэ́скэ фо́рья пэ паш-дывэсы́тко (южно) риг.
21. И явэ́на зракхибнаскирэ пэ бэ́рга Сио́но тэ сэндякирэн бэ́рга Исавоскири, и явэ́ла кралипэ́н Ра́скирэ-Дэвлэ́скиро.”
7. Отпхэн сы́гэс ма́нгэ, о Раё Дэ́вла! Миро ду́хо (фа́но) замэрэла; на гарав Тыро́ муй ма́ндыр, соб (кай) ма́нгэ тэ на явав сы́рбы кодолэ́, савэ́ джа́на тэлэ́ дрэ ґанби́н (яма).
8. Кэр, соб (кай) мэ тэ шунав пал Тыри́ лачхэ́-илы́ткима тасярлатыр (ранкостыр), пал-дова́ со мэ зоралэ́с патя́ва дрэ Ту́тэ. Кэр адя́кэ, соб (кай) мэ тэ джина́в дром, савэ́са тэ псирав, пал-дова́ со мэ ґазда́ва миро ди кэ Ту.
9. О, Раё Дэ́вла! Зра́кх ман мирэ́ вэргэ́ндыр: пал-дова́ со мэ кэ Ту нашава тэ гарадёвав.
10. Сыкля́кир ман тэ кэра́в пир Тыри́ во́ля, пал-дова́ со Ту сан миро Дэвэ́л; мэк Тыро́ лачхо́ Ду́хо (Фа́но) тэ лыджа́л ман пэ чачипнаскири пхув.
11. О, Раё Дэ́вла! Ваш Тыро́ лав, джидя́кир нэвэ́стыр ман. Лы́джа ман криг пхарипнастыр пир Тыро́ чачипэ́н.
12. Тырэ́ лачхэ́-илыткиматыр росчхурдэ дрэ риг мирэ́ вэргэ́н тэ хасён и хасякир сарэ́ одолэ́н, савэ́ притасавэ́на миро ди, пал-дова́ со мэ сом Тыро́ писха́ри.
5. Кажно Дэвлэ́скиро лав исын жужо́: ёв исын шчы́то одолэ́нгэ, кон рисёла кэ Ёв тэ зракхэлпэ.
1. Пало́ дава́ мэ дыкхцём штарэ́ Янголэн, Савэ сыс тэрдэ́ пэ штар вэ́нглы пэ пхув и рикирэнас штар балваля, соб (кай) тэ на пхурдэл ни сави́ балва́л ни пир пхув, ни пир мо́рё (дэрья́в), ни пир вари-саво́ кашт (дрэ́во).
2. И мэ дыкхцём явирэ Янголо́с, Саво́ джа́лас долэ́ рига́тыр, кай кхам уштэ́ла и савэ́стэ сыс Джидэ́-Дэвлэ́скири чэргэнори́. Ёв дыя́ го́дла зоралэ́ заня́са штарэ́ Янголэнгэ, конэ́скэ Дэвэ́л дыя́ зор тэ кэрэ́л чорипэ́н пэ пхув и пэ мо́рё (дэрья́в) и пхэндя́:
3. “На кэрэ́н чорипэ́н ни пэ пхув, ни пэ мо́рё (дэрья́в), анги́л дова́, сыр амэ чхуваса чэргэнори́ пэ чэкат писхарье́нгэ Амарэ́ Дэвлэ́скирэ.”
4. И мэ шундём одолэнгирэ-манушэ́нгиро кицыпэн (количэство), конэ́скэ чхудэ́ чэргэнори́: 144000 мануша́, савэ́ сыс сарэ́ Израилёскирэ-чхавэ́нгирэ родэндыр (чангэ́ндыр):
5. 12 тысёнцы Юда́скирэ родо́стыр, 12 тысёнцы Рувимо́скирэ родо́стыр, 12 тысёнцы Гадо́скирэ родо́стыр (чангэ́ндыр);
6. 12 тысёнцы Асироскирэ родо́стыр, 12 тысёнцы Нефалимоскирэ родо́стыр, 12 тысёнцы Манасиякирэ родо́стыр;
7. 12 тысёнцы Симёоноскирэ (Семёноскирэ) родо́стыр, 12 тысёнцы Левиёскирэ родо́стыр, 12 тысёнцы Изахароскирэ родо́стыр;
8. 12 тысёнцы Завулоноскирэ родо́стыр, 12 тысёнцы Ёза́скирэ (Иосифо́скирэ) родо́стыр, 12 тысёнцы Вениамино́скирэ родо́стыр.
9. Пало́ дава́ саро́ мэ дыкхцём, и, ґа́да, исын бут бут мануша́, со никонэ́скэ на сыс пир зор тэ гинэл лэн, сарэ́ кхэритконэ́ родэндыр, сарэ́ родэндыр, сарэ́ манушытконэ́ нацые́ндыр, сарэ́ екхэ-чибакирэ ирье́ндыр (сэм΄е́ндыр/чибэ́ндыр/чибье́ндыр), савэ́ сыс тэрдэ́ анги́л троно и анги́л Свэнтонэ́ Бакрорэстэ. Ёнэ сыс уридэ́ дрэ парнэ́ урибэна́, и дрэ васта́ сыс лэ́ндэ пальмитка рандя́ (вэ́тки).
10. И ёнэ дэ́нас го́дла зоралэ́ заня́са и пхэнэнас: “Зракхибэ́н явэ́ла амарэ́ Дэвлэ́стыр, Саво́ исын бэшто́ пэ троно и Свэнтонэ́ Бакрорэстыр.”
11. И сарэ́ Янго́лы, со сыс тэрдэ́ трусця́л троно, и годэпхурэ́ и штар джидалэ́ (жывотна) пынэ́ пэ́скирэ муе́нца анги́л троно и поклониндлэпэ патыва́са (кэрдэ́ шэрэ́са) Дэвлэ́скэ,
12. и пхэнэнас: “Ами́нь! Мэк манушэ́нгиро шарибэ́н, и сла́ва, и годыпэ́н, и парикирибэн, и паты́в, и зоралыпэ́н, и зор тэ явэ́л амарэ́ Дэвлэ́скэ пэ сарэ́ ве́ки. Ами́нь.”
13. Екх годэпхурэндыр отпхэндя́ ма́нгэ, пхэни́: “Кон исын кадалэ́ мануша́, савэ́ндэ исын парнэ́ урибэна́, каты́р ёнэ исын?”
14. И мэ пхэндём лэ́скэ: “Раё Миро, Ту ж джинэ́са.” И ёв пхэндя́ ма́нгэ: “Дава́ исын кодолэ́ мануша́, со явнэ́ барэ́ страдицостыр (бидатыр), вымордэ пэ́скирэ урибэна́ и парнякирдэ лэн Свэнтонэ́ Бакрорэскирэ ратэ́са.
15. Ваш дава́ ёнэ исын анги́л Дэвлэ́скиро троно и дынаринэ́нас (служынэ́нас) Лэ́скэ дывэсэ́ и раты́ дрэ Лэ́скири Кхангири́. Одова́, Кон исын бэшто́ пэ троно, росчхувэла пэ́скири ша́тра пэ лэ́ндэ сы́рбы зракхэ́ла лэн.
16. Ёнэ на явэ́на буты́р тэ бокхалён, на явэ́на тэ тырдэнпэ тэ пьен: кхам и вари-саво́ хачкирибэ́н на пэрэ́ла пэ лэ́ндэ;
17. сыр Свэ́нто Бакроро́, Саво́ исын машкира́л троно, явэ́ла тэ чалякирэл лэн и тэ лыджа́л кэ ґанынгорья джидэ́-панескирэ. И Дэвэ́л выкхосэла кажно ясвин лэ́нгирэ якхэ́ндыр.”
Romani Bible Baltic 2019
United Bible Societies for the Baltic Romani Mission