Beblia

1. Акэ, сыс лав Ра́скирэ-Дэвлэ́скиро, саво́ явдя́ Михеёскэ Морасфеёстыр дрэ долэ́ дывэса́, ке́ли сыс трин кра́лья Юдэя́кирэ: Иофа́мо, Аха́зо и Езэки́я. Дава́ лав Дэвэ́л сыкадя́ лэ́скэ дрэ сунэ́, со явэ́ла Самарияса и Ерусалимоса.

2. ‘Шунэ́н, сарэ́ манушы́тка на́цыи (народы), пхув и саро́, со исын пэ ла́тэ! Мэк тэ явэ́л Рай Дэвэ́л сыр якхи́тко (свидетелё) проти тумэ́ндэ, о Рай Дэвэ́л Лэ́скирэ свэнтонэ́ Кхангирья́тыр.

3. Дыкхэ́н! Акэ, Рай Дэвэ́л выджа́ла Лэ́скирэ штэто́стыр; Ёв джа́ла тэлэ́, и Ёв явэ́ла тэ штавэл (тэ тэрдёл) пир вучэ́ штэ́ты пэ пхув.

4. Бэ́рги явэ́на тэ билавэн тэл Лэ́стэ, и долы явэ́на тэ пхарадён, сы́рбы мом анги́л яг, сы́рбы паня́, со чхувэнапэ крутыматыр (вучипна́стыр).

5. Саро́ дава́ пал Яково́скиро чорипэ́н, и пал грэ́хи, со кэрдя́ кхэр Израилёскиро. Саво́ исын чорипэ́н Яково́скиро? Ци дава́ на пал Сама́рия? Савэ далэ́ исын вучэ́ штэ́ты дрэ Юдэ́я? Ци дава́ саро́ исын на Ерусалимо́стыр?

6. “Палдава́ Мэ кэра́ва Самариятыр груда руинэндыр пэ фэ́лда, – штэ́то, соб (кай) тэ почхувэн винаградо: Мэ вычхурдава ла́кирэ бара́ пэ до́ло, и Мэ отчхакирава ла́кирэ фундаменты.

7. Сарэ́ ла́кирэ вычхиндлэ́ муя́ явэ́на пхагирдэ́ пэ котэра́ (куски), и сарэ́ ла́кирэ да́ры, сыр биладжакунэ́ джувлякирэ, явэ́на хачкирдэ́ яга́са. Мэ хасякира́ва сарэ́ ла́кирэ и́долы, пал-дова́ со ёй (Сама́рия) кэрдя́ лэн пал да́ры, со дэнапэ биладжакунэ́ джувля́кэ, и кадалэ́ да́ры рисёна ваш да́ры явирэ биладжакунэ́ джувля́кэ.”

8. Палдава́ мэ, Михеё, ява́ва тэ обровав и тэ тугинав ясвэ́нца, мэ джа́ва обрискирдо и нанго; Мэ ява́ва и тэ выинав сыр шакалы, и тэ тугинав ровибнаса сыр страусы.

9. Пал-дова́ со Самариякирэ фра́нсы (раны) исын насастякирибнытка, пал-дова́ со ёнэ догинэ́ кэ Юдэ́я; ёнэ догинэ́ кэ по́рта мирэ́ манушэ́нгири, кэ Ерусалимо.

10. На пхэнэ́н дава́ дрэ Гефо, на ровэ́н зоралэ́с одо́й, нэ учхакирэн пэс прахоса дро форицо Офра.

11. Джа́н тэ дживэ́н пэ яви́р штэ́то, кон дживэ́ла кэ Шафиро, нангэ кэ ладж; на нашэла, кон дживэ́ла кэ Цаано (Цаанано), Эцэль (Бэт-Эцэль) тугинэла зоралэ́с; дава́ ровибэн на мэкэ́ла тумэн тэ тэрдёл дрэ лэ́стэ.

12. Кон дживэ́ла кэ Марофа (Марат), занасвалынэ пал лачхипэ́н, нэ биба́хт явдя́ тэлэ́ Ра́стыр-Дэвлэ́стыр кэ по́рта Ерусалимо́скири.

13. Кон дживэ́ла кэ Лахисо, дэ андрэ́ ґэнштэн дро вурдэ́н марибны́тко; пал-дова́ со чорипэ́н Израилёскиро латхнэ́ дрэ ту́тэ.

14. Палдава́ ту явэ́са тэ дэс почасту́нки (да́ры) кэ Морешэф-Геф: нэ кхэра́ дро Ахзиво явэ́на хоханэ́с тэ притырдэн кралье́н Израилёстыр.

15. Нэ Мэ яна́ва миштыпэ́н-прилыибнаскирэс (наследникос) кэ ту, манушние Морешоскири; и барипэ́н Израилёскиро пириджала кэ Одоламо.

16. Кэр пэ́скэ плешка [злэ пэ́стыр бала́-р.с.] и обчхин пэ́скирэ бала́, ке́ли ило́ тыро́ явэ́ла тэ дукхал пал дрогонэ́ чхавэ́ндэ тырэндэ. Барьякир пэ́скири плешка сы́рбы о́рло (ки́до), пал-дова́ со ёнэ джа́на дро пле́но ту́тыр.

1. Бида пэ одолэ́ндэ, савэ́ придуминэна чорипэ́н и савэ́ выдуминэна биба́хт пэ пэ́скирэ чхуибэна! Пэ зло́ко, ке́ли дывэсёла, ёнэ кэрэ́на дова́, пал-дова́ со саро́ дава́ исын дро лэ́нгиро васт.

2. Ёнэ исын ґалка (скэмпа) кэ фэ́лды, и ёнэ лэ́на лэн зорья́са. Ёнэ исын ґалка кэ кхэра́, и ёнэ откэдэна лэн манушэ́ндыр. И ёнэ притасавэ́на (обкэдэна) манушэ́с и лэ́скиро кхэр, и манушэ́с кокорэс, и лэ́скиро мэкно́ миштыпэ́н.

3. Палдава́ адя́кэ ракирэ́ла Рай Дэвэ́л: “Акэ, Мэ придуминава кадасави биба́хт проти кадая́ сэ́м΄я (ири́), со тумэ́ на могинэ́на (на саштынэна) тэ дурьякирэн (тэ злэн) далэ́ бибахтятыр тумарэ́ мэня; и тумэ́ на явэ́на тэ задэнпэ, (тэ псирэ́н маму́й); пал-дова́ со дава́ часо исын бибахтало́.

4. Дро дова́ дывэ́с мануша́ явэ́на тэ ракирэ́н притча пал тумэ́ндэ, и ёнэ явэ́на тэ ракирэ́н зоралэ́с киркэ ясвэ́нца, и тэ пхэнэ́н: ‘Амэ хасиям сарэ́са, о Дэвэ́л парудя амари́ до́ля [отдыя́ явирэ́нгэ-р.с.]: сыр тэ рисёл амари́ до́ля? Ёв роскэрдя́ амарэ́ фэ́лды машки́р амарэ́ вэргэ́ндэ.’”

5. Палдава́ тумэ́ндэ на явэ́ла ние́кх ману́ш, соб (кай) тэ чхурдэл жре́биё и тэ обмеринэл шэлэса тумарэ́ ме́жы пэ скэдыибэ́н анги́л Растэ-Дэвлэ́стэ.

6. “На ангилпхэнэн, проро́ки, – тумэ́ ракирэ́на кодолэ́нгэ, савэ́ ангилпхэнэна, на ангилпхэнэн лэ́нгэ, соб (кай) ладжаипэ́н тэ на ячэ́лпэ [тэ на латхэл тумэн-р.с.].

7. Тумэ́, савэ́ кхарэнапэ кхэр Яково́скиро: ‘Ци Ра́скирэ-Дэвлэ́скиро Ду́хо тыкныя? Ци саро́ дава́ чорипэ́н лэ́стыр? Ци на кэрэ́на лачхипэ́н Лэ́скирэ лава́ кодолэ́скэ, саво́ дживэ́ла дэвлыткэс [кон кэрэ́ла чачунэ́с-р.с.]?”

8. “На΄гара тумэ́, кон са́нас Мирэ́ мануша́, ґаздынэ́пэ сыр вэ́рги проти Ма́ндэ – тумэ́ злэна зорья́са упратуно урибэ́н и тэлатуны и́дя манушэ́ндыр, савэ́ джа́на пашы́л бидаракирэс, савэ́ рисёна марибнастыр.

9. Тумэ́ традэ́на яври́ джувле́н Мирэ́ манушэнгирэн лэ́нгирэ екхорэ кхэрэндыр, савэ́ исын лэ́нгэ пир ило́, тумэ́ откэдэна лэ́нгирэ чхаворэндыр бахталыпэ́н Миро.

10. Уштэ́н и джа́н адатхы́р; пал-дова́ со ада́й тумэ́ на откхинёна. Кадава́ штэ́то исын магирдо́, и хасякирэ́ла тумэн, и дава́ хасякирибэн явэ́ла кэ ко́нцо (кэ яго́ро).

11. Ко́ли тэ явэ́л балвалитко ману́ш, и тэ пхэнэ́л хохаибэ́н кадасавэ́ лавэ́нца: ‘Мэ ява́ва тэ ангилпхэнав пал мол (вино) и пал зорало́ пибэ́н (сикера), аж и ёв явэ́лас куч проро́ко ваш кодолэ́ манушэ́нгэ.

12. Нэ Мэ, чачэс, кэдава кхэтанэ́ сарэ́н тумэн, о Яково, Мэ чачипна́са скэда́ва ячкирдэ́ манушэ́н Израилёскирэн; Мэ чхува́ва кхэтанэ́ (кхэтанякирава) лэн сыр бакрэ́н дрэ Восора (Боцра) сы́рбы стада машки́р лэ́нгирэ чарьитка фэ́лды: ёнэ явэ́на зоралэ́с тэ дэн го́дла, пал-дова́ со лэн ада́кицы бут мануша́ исын.”

13. Анги́л лэ́ндэ халадо пхагирэ́ла ва́нты (сцяны): и ёнэ пхагирэна дова́, со сыс пэ дром лэ́ндэ, и ёнэ доджана кэ по́рта и джа́на пэ́скэ дурэды́р. Лэ́нгиро кра́ли явэ́ла тэ джал анги́л лэ́ндэ, и Рай Дэвэ́л явэ́ла анги́л лэ́ндэ.

1. И пхэндём мэ, (Михеё): “Шунэ́н акана́ тумэ́, шэралэ́ Яково́скирэ, и тумэ́, тхага́рья Израилёскирэ кхэрэ́стыр: ци да на тумэ́нгэ трэй тэ джинэ́н чачипэ́н?

2. Нэ тумэ́ сан мануша́, кон бидыкхэла лачхипэ́н тэ кэрэ́л, нэ тумэ́нгэ исын пир ило́ биба́хт (чорипэ́н): тумэ́, савэ́ лучкирэна цы́па манушэ́ндыр, и лэ́нгири лоч (джидэ́ маса́) лэ́нгирэ кокалэндыр;

3. савэ́ ха́на лоч (джидэ́ маса́) мирэ́ манушэ́ндыр, савэ́ лучкирэна цы́па лэ́ндыр, и пхагирэна лэ́нгирэ кокалы́, и чингирэна лэн пэ котэра́ сыр мас ваш пири́, сыр лоч (джидэ́ маса́) ваш кака́ви (котло).”

4. Тэ́ньци ёнэ явэ́на тэ прикхарэн зоралэ́с Рас-Дэвлэ́с, нэ Ёв на отпхэнэ́ла лэ́нгэ [на явэ́ла тэ шунэ́л лэн-р.с.], и Ёв гаравэла пэ́скиро муй лэ́ндыр пэ дова́ часо, пал дова́, со ёнэ кэрдэ́ бибахталэ́ рэ́нды.

5. Палдава́ адя́кэ ракирэ́ла Рай Дэвэ́л пал пророкэ́ндэ, савэ́ кэрдэ́ адя́кэ: “Со мирэ́ мануша́ дынэпэ дукха́; савэ́ дандырэнапэ и дэ́на го́дла: ‘Рама́нё.’ Нэ кон на дэ́ла ничы́ лэ́нгэ дро муй, тэды ёнэ джа́на марибна́са проти лэ́стэ:

6. Палдава́ явэ́ла тумэ́нгэ рат заме́ст дыкхибэ́н, и явэ́ла тумэ́нгэ цямлыпэ́н заме́ст дова́, соб (кай) тумэ́ тэ роспхэнэ́н сунэ́; кхам джа́ла тэлэ́ пэ пророкэ́ндэ, а дывэ́с ячэ́ла цямло ваш лэ́нгэ.”

7. И магики (прозорливцы) явэ́на ладжакирдэ́, и драбакирибнаскирэ явэ́на обсандлэ (дылнякирдэ); ёнэ чачипна́са пхандэна пэ́скирэ ушта́; пал-дова́ со на явэ́ла отпхэныбэ́н Дэвлэ́стыр.

8. Нэ ма́ндэ, Михаёстэ, исын пхэрды́ зор, сави́ дыя́ Рай Дэвэ́л пир Свэ́нто Ду́хо, чачипэ́н и зоралыпэ́н, соб (кай) ма́нгэ тэ припхэнав (тэ сыкавав) Яково́скэ лэ́скиро чорипэ́н, и Израилёскэ лэ́скиро грэ́хо.

9. Акана́, шунэ́н дава́ тумэ́, шэралалэ кхэрэ́стыр Яковоскирэстыр, и барыдыра́ тхэмэ́скирэ кхэрэ́стыр Израилёскирэстыр, савэ́нгэ исын джунгало́ (брыдко) чачипэ́н, и савэ́ пиририскирэна патяибны́тко отлыджаибэн кэ чачипэ́н;

10. савэ́ ґаздэ́на Сио́но пэ манушы́тко рат и Ерусалимо пэ начачипэ́н:

11. лэ́нгирэ шэралэ́ сэндинэна пал почасту́нки (подарки), лэ́нгирэ рашая́ сыклякирэ́на пал плэскирибэн (покиныбэн), и лэ́нгирэ проро́ки сыклякирэ́на пал ловэ́, на дыкхи́ пэ дова́, со ёнэ рикирэнапэ Ра́скэ-Дэвлэ́скэ и пхэнэ́на ёнэ: “Ци нанэ Рай Дэвэ́л машки́р амэ́ндэ? На явэ́ла биба́хт (би́да) амэ́нгэ.”

12. Пал тумэ́ндэ палдава́ Сио́но явэ́ла пхарадо сыр фэ́лда, и Ерусалимо́стыр ячэ́лапэ бэ́ргица руи́ны, а бэ́рга тэл Кхэрэ́скиро фунда́менто ячэ́лапэ сыр бэ́ргица дро вэш.

9. О Дэ́вла! Мэ ява́ва тэ бага́в нэви́ гилы́ Ту́кэ, мэ ява́ва тэ бага́в псалмы пэ дэшэ-струнэнгири лута Ту́кэ,

10. Екхэ́скэ, Кон зракхэ́ла кралье́н, Кон выракхэла Пэ́скирэ писхари́с Давидо́с мэрибнытконэ куртала́тыр.

11. Дэ воля́ ма́нгэ и выракх ман чужонэ́-манушэ́нгирэ вастэ́ндыр, савэнгирэ муя́ ракирэ́на фрэнта лава́ и лэ́нгиро чачо́ васт исын хохаибнаскиро.

12. Мэк тэ явэ́н амарэ́ чхавэ́ сы́рбы раслины, со выбаринэ дро лэ́нгиро тэрныпэн, мэк тэ явэ́н амарэ́ чхая́ сы́рбы шэралэ́ сты́лбы, со исын вычингирдэ дрэ бари фэлатин (колов):

13. мэк тэ явэ́н пхэрдэ́ амарэ́ пираля́ (жытницы) кажнонэ́ гивэса, мэк тэ биянэн амарэ́ бакря́ бара́ и дэш бара́ (тысёнцы) тыкнорэн пэ амарэ́ чаритка пхувья́;

14. мэк тэ явэ́н масунэ амарэ́ гурува, мэк тэ на явэ́л ни саво́ пхарипэ́н, ни саво́ хасякирибэн, ни саво́ ровибэн пэ амарэ́ вули́цы (га́сы).

15. Тэ явэ́н бахталэ́ дасавэ́ мануша́, савэ́ндэ саро́ дава́ исын. Тэ явэ́н бахталэ́ мануша́, конэ́скиро Дэвэ́л исын Рай Дэвэ́л!

10. На калякир лавэ́са дынари́с анги́л лэ́скирэ растэ, соб (кай) ёв тэ на прокошэл тут, и соб (кай) ту тэ на явэс банго́.

1. И па́нджто Янго́ло пхурдыя дрэ пэ́скиро ро́го; и мэ дыкхцём чэргэн, со пыя́ болыбна́стыр пэ пхув, и ла́кэ сыс дыно́ клыдын люноскирэ ганынгатыр (безнатыр).

2. И чэргэн псирадя (отпхандя) люноскири ґаны́нг и тхув (дымо) выгия́ ґанынгатыр, сыр тхув барэ́ бовэстыр: кхам и фа́но (воздухо) калынэ ґанынгакирэ тхувэстыр.

3. И пхакитка скочки (саранча) выгинэ́ пэ пхув тхувэстыр и сыс дыны́ лэ́нгэ зор, сави́ исын пхувитконэ скорпионэндэ.

4. Лэ́нгэ сыс пхэндло́ тэ на кэрэ́н чорипэ́н ни пхувитконэ чарьякэ, ни савэ́ зэлэнэ раслинакэ, ни савэ́ каштэскэ (дрэвоскэ), а екх манушэ́нгэ, савэ́ндэ на сыс Дэвлэ́скиро та́вро пэ лэ́нгирэ чэката:

5. и пхакитконэ скочкэнгэ сыс дыно́ тэ на мулякирэ́н лэн, а тэ мэнчынэн манушэ́н пандж чхона́; и лэ́нгири мэнька сыс сыр скорпионо мэнчынэла, ке́ли дукхавэла манушэ́с.

6. И дрэ долэ́ дывэса́ мануша́ явэ́на тэ родэ́н мэрибэ́н, нэ ёнэ на латхэ́на; ёнэ явэ́на тэ мангэ́н, соб (кай) тэ мэрэ́н, нэ мэрибэ́н нашэла лэ́ндыр.

7. Кадалэ́ пхакитка скочки (саранча) сыс сыр грая, савэ́ кэдынэпэ пэ мэрибэ́н; и пэ лэ́нгирэ шэрэ́ сыс вянки (короны) сы́рбы сувнака́стыр, и лэ́нгирэ муя́ сыс сы́рбы муя́ манушы́тка.

8. И лэ́нгирэ бала́ сыс сы́рбы бала́ джувликанэ́, и лэ́нгирэ данда́ сыс сы́рбы шчэрэндэ (левэндэ),

9. и сыс лэ́ндэ саструнэ́ колына сыр саструнэ́ панцыри, и лопотымо лэ́нгирэ пхакэндыр сыс сыр лопотымо ґаратунэ́ вурдэнэндыр, ке́ли грая праста́на пэ мэрибэ́н;

10. и сыс лэ́ндэ порья сыр скорпионэнгирэ жалы и дрэ кадалэ́ порья сыс зор тэ дукхавэн манушэ́н пэ пандж чхона́.

11. Люноскиро (Адоскиро) Янго́ло сыс кра́ли пэ лэ́ндэ. Лэ́скиро лав пир Юды́тко чиб сыс “Абаддон”, а грэки́ткэс (балами́ткэс) “Апполион.”

12. Пэ́рво би́да гия́ криг, акэ, ишчо (инкэ́) дуй биды, со джа́на пал пэрвонатэ.

13. И шо́вто Янго́ло пхурдыя дрэ пэ́скиро ро́го и мэ шундём зан штартонэ вэнглэндыр сувнакунэ́ алтарёстыр, со сыс анги́л Дэвлэ́стэ,

14. ґа́да, зан пхэнэлас шовтонэ Янголоскэ, савэ́стэ сыс ро́го: “Роспхандэ штарэ́ Янголэн, савэ́ исын пхандлэ пашы́л рэка (лэнь) Евфрато.”

15. И штар Янго́лы сыс роспхандлэ, савэ́ сыс скэдынэ́ ваш шту́нда и дывэ́с, и чхон, и бэрш тэ мулякирэ́н три́то паш манушэ́ндыр;

16. и сыс дуй милионы халадэ́н пэ грэ́ндэ и мэ шундём лэ́нгиро кицыпэн (количэство).

17. И, ґа́да, мэ дыкхцём грэн сы́рбы дрэ сунэ́ и одолэ́н, савэ́ сыс бэштэ́ уклистэ́ пэ лэ́ндэ; лэ́ндэ сыс саструнэ́ панцыри, лолэ́ сыр яг, цёмна-синэ сыр гиацынто, жылта сыр се́ра (дзэвэ́ля). Грэнгирэ шэрэ́ сыс сыр шчэрэнгирэ (левэнгирэ) шэрэ́, и лэ́нгирэ мо́стыр джа́лас яг, тхув и се́ра (дзэвэ́ля).

18. Три́то паш манушыпнастыр сыс мулякирды далэ́ тринэ́ франсэ́ндыр: яга́са, тхувэса и дзэвэляса, со джа́нас яври́ грэнгирэ муендыр.

19. Пал-дова́ со грэнгири зор сыс дрэ муя́ и порья лэ́нгирэ: и лэ́нгирэ порья сыс сыр сапа шэрэнца, савэ́нца ёнэ дукхавэнас.

20. И яви́р ману́ш, савэ́ на сыс мулякирдэ́ кадалэ́ франсэнца, аж на рискирдэ́ палэ долэ́стыр, со ёнэ кэрдэ́ пэ́скирэ вастэ́нца. Ёнэ на пириячнэ тэ бандякирэн шэрэ́ налачхэ́ духэнгэ, хоханэ́ дэвлэнгэ сувнака́стыр, рупэ́стыр и харкома́тыр, барэ́стыр и каштэ́стыр, савэ́ на могинэ́на ни тэ дыкхэ́н, ни тэ шунэ́н, ни тэ псирэ́н.

21. И ёнэ на приджиндлэ пэ́скири банг дрэ мэрибэна, ни дрэ човаханыпэна, ни дрэ биладжакунэ́ рэ́нды, ни дрэ чорибэна.

Romani Bible Baltic 2019

United Bible Societies for the Baltic Romani Mission